BUT...... (Short Story)

BUT......

ELTY LUHLUL AUG HNAMTE

(PHALNA TELLO CHUAN KA HMING PAWH LANG DAWN MAHSE COPY PASTE KA PHAL CHUANG LO.)

'Te, lo let leh rawh. Kha thil kha iti thei lovang' min ti tu thu sawi chu ka ngaithla a, ka rilru a buai map mai. Engati tunah chiah let tur a min sawm? A hma pawn a sawi thei a, tunah, pasal ka nei tawh dawn. Engvang a tun ang hun a sawi nge anih?

'Pawi ka ti. Engkim a tlai tawh. Nangpawh hmalam pan la, keipawh ka lo let thei tawh lo' ka ti sap a, a rum hak ri ah chuan ka mittui a tla mai dawn. He mihring ka hmangaih zia hi ka zep lo. Ka hmangaih takzet ani. Mahse......

'Nihleh in inneih hma in vawikhat chiah inhmu ang' a tih leh ah chuan keipawn pawi ka ti lo. A tawp nan ka hmu chak ve tho. Mahse ka pasal tur phalna erawh ka la ang. A remti lo anih chuan ka hmu lo thung ang.

'A tha alawm. Mahse U Puia ka hrilh phawt ang' ka tih chuan ani pawn min hnial hran lo. Pasal nei mai tur ka ni. Ka hmangaih hmasa erawh ka ngaihna a bang hauh lo. Tuemaw dawtsawi vang a ka hmangaih hi kalsan ka ni. Chu erawh nakin lam ah ala lang ang chu.

U Puia ka hrilh chuan a ngai haw lem lo. A chhan ber ni a ka hriat chu a tan hian ka rinawm lo ngai lo tih hrechiang tu ani. Tin, Opa hi ka hmangaih hmasa ber ani tih a hrechiang viau bawk. Mahse pawnlam a inhmuh erawh a remti lo thung. Keimahni inchhung ah ngei leng tur a sawm tur in min ti a, keipawn chu chu ka tum ani bawk.

Opa lo len ni tur ah chuan ka rilru chu engtinemawni a awm tlat. Ka hmu chak a, mahse ka huphurh ru viau thung. A rawn thlen chuan ka rilru ti thar tur tak mai in keimah nen ngei a T-shirt kan leidun, a dum leh a inhmeh ka tih ber thin jeans kekawr, paw duk raih hi a rawn ha a, mahse U Puia aia tha ka tan an awm lo tih ka rilru ah a awm reng thung.

'Ka lawmpui che' kan inkawt ah chuan kan thu dun a, a hmel ah chuan na tuar hmel ka hmu ani. Na lo ka ni bik hauh lo. Mahse keichu U Puia ka nei. Ani erawh a natna hnem tu tur tumah a nei lo tih ka hria.

'Ka lawm e. Nangpawh in nupui tha tak ila neih vat ka beisei' hma lam ka en ngar a, amah ka en ngam lo.

'In inneih ni ah ka lo kal ve i remti angem?' mitmeng hlim hauh si lo in a nui lui sak a, a ha var rual mawi tak te chu ala ngai reng. Ka hmangaih ber thin kha ala ni reng bawk. Ni lo, hetiang ngaihtuah thei ka ni lo.

'Ilo kal loh chuan ka vui viau zawk ang' ka lo ti ve vat a, mahse lo kal lo se ka duh zawk. Nupui nei hmasa zawk chu ni se pawi ka ti hauh lovang. Mahse phatsan tu ang mai in ka inngai tlat ani. Amah ni lo inneihna thu ka tiam pui lai min hmu tur in ka duh lo tak zet zawk. Mahse.....

'Chutia min chhan ngei chu ka ring reng ani. Mahse ka tuarchhuak zo angem ka inhre lo' tih pah chuan ka kut a rawn vuan a, laksawn duh viau mah ila la sawn tur in ka chak tawk lo. Ka kut a vawn ringawt chu enge pawi? Sual ani hleinem.

'Chutiang zawng in engmah sawi lovang. Nangpawhin keiaia tha, kalsan ve ngai lo tu che i hmu mai ang' ka mit ka chhing a, kan nunhlui chu ka mitthla ah alo lang iarh iarh a, ka ngai ani.

'Mai thei. I mi duhsakna anih chuan chutiang chuan a thlen ka beisei tlat ang. Tunah chuan nangpawh keiaia ngaihsak tu che, bialpa ngawireng ni lo pasal tha tak i nei dawn a, mipa vannei tak ani' ka kut a humna chu a hum nghet sauh a, a thusawi chu sawi chhuah harsa a tih hmel tak zet ani.

'Ka lawm e. Mipa tha tak ani. Nangpawh. In thatna lai a in ang lo mai ani' ka rilru dik tak ani ka sawi. Ka tan an tha tawk ve ve. Ka phulo ve ve bawk.

'Amah chu tunah hian alo kal ve hman angem?' a tih chuan ka meng kawk thei.

'Engatan?' ka ti hu a, min en a, a nui var var.

'Ka hmu ve chak a, i ko thei angem?' a tih chuan ka hnial lo. U Puia ka phone a, alo kal hman leh hman loh ka zawt a, vanneihthlak tak in kan veng bul lawk a kan inneih hun a kan khum tur a siam tir en tur in alo kal hlauh a, a rawn tlang tur thu min hrilh a, phone ka dah nghal.

'Mipa tan ngaihpawimawh loh theih loh mizia i neih thu hi ka hrilh tawh che em?' Opa chuan ati bauh a, ka nuih aza zawk.

'Hrilh ngai lo aniang. I sawi dan tak ah bialpa ngawireng kha i ni thin a' nui hak hak chung a ka tih let chuan tawi deuh in a nui hak a, fiamthu in a insawisa zui ve mai.

U Puia alo thlen chuan Opa nen chuan an inchibai a, mipa tha tak 2 an va ni chiang em! Ka rilru hi tenawm lo ti lo hram rawh u. U Puia hi ka iai lam ani lo, Opa hi ka hmangaih hmasa ber ani miau a, ka tan chuan theihnghilh theih ani lo ani. Kan inthen dan ah pawh tuemaw dawt vawrh vir vang tih ka sawi zeuh tawh kha. Min kalsan tu ani lova, keimah zawk zel in ka kalsan ani.

Thingpui ka lum a, ka chhungte erawh ka Patea nupui damloh avangin an kal vek a, kei erawh Opa vang in chhuanlam ka siam thung. Thingpui ka chhawp hnu chuan U Puia bul ah chuan ka thu chat a, Opa lo nui ru sak chu ka hmu. U Puia erawh a fing takzet ani. Opa hmuh ah over tak in a che hauh lo. Hei hi ania U Puia ka duhna em em chu. Mipa cool tak, ti chawng chawng lo hi ani ka duh.

'Te... Ohhh, Tei, pasal i neih hma ka tirh tawpna tur che. Kuhva han lei la' Opa chuan nuisang chuan a tia, U Puia lah chuan alo support em em bawk. Ka tho a, ka chhuak zui nghal. Mipa in ti ti an duh ani tih ka hrethiam. Ka hmanhmawh vak lo. Dawr hla ah ka kal ve ngat.

Hlauhthawn ka nei lo a, an duhtawk sawi rawh se ka ti mai.

Ka let chuan an 2 chuan an lo ti ti bawrh bawrh a, football chungchang ani an sawidun ni. Min ngaihsak hran lo. Ka mipa hmangaih em em 2 te inngeih hmel tak a an ti ti dun hmuh chu a nuam in ngaihsak ak phut lo kher mai. Nidang chu ni se U Puia ka tihtauh khum anga, thlem ka ngai leh anga. Mahse nidang ani lo. Vawiin ani tawp mai.

'Ka phei tawh ange. Tlai lam ah ka cousin fanu birthday-ah kal kan ngai sia' tih pah chuan Opa chu a ding uaih a, keini pawh kan ding ve nghal. Chaw ei tur chuan ka sawm khawmawi ve nangin a ei dawn lo tih erawh ka chiang. U Puia nen chuan kawngka thleng kan thlah a, a liam tur chu ka en reng a, engtikah nge ka hmuh leh ang?

'Ka nupui tur in mipa dang a thlir liam vang vang a' U Puia chuan nui kur kur chuan min rawn fiam a, ka inthiam lo lek lek. Mahse a hmel ah chuan a hlimzia a lang. Engvang a hmel hlim tak pu nge a nih? A dinhmun ah hian ding ta ila ka thikthu vang in kan inneih kan thulh hial mai thei. Hei vang tak hian alawm U Puia hi keima U Puia anih tlat thung.

'Khum chu engtiknge an zawh dawn a?' tih pah chuan a kawng ah ka kuah a, mi awm loh lai hi chuan ka pangchang ve nghar nghar thei.

'Naktuk tlai ah an rawn dah ang' tih pah chuan ka hmui ah a rawn chuk zeuh a, sofa-ah chuan kan thu dun a, nghet deuh in min kuah a, hetia min kuah hi chuan ka thla a muang ngawih ngawih zel.

'Ka nghakhlel tawh rual in ka huphurh ve tho' tih pah chuan ka kuah let ve nghal a, ka lu chu a fawp zauh a, Nuam ka ti. Ka lu ah emaw, ka mit ah emaw bialpa ten an fawh hi chuan a ril ka ti

.

'Ka vannei ka ti' a tih chuan ka lo nui hek hek a, ka intithei tak zet

.

'Khati khawp a hmangaihtu i nei chung pawh a ka nupui tur i nih avangin ka lawm ani' a tih leh tak ah chuan ka nui reh riai riai a, min kuahna atang chuan muangchangin ka chhuak a, a hmel ka en a, hmalam a en a, a hmel ah engmah ka hrethiam lo.

'I lung a awi lo anih chuan ka tihpalh. Engmah kan inkar ah a awm tawh lo' ka ti sep a, ka rilru a buai lutuk. Engvang a Opa min dilna kha pawm mai nge ka nih? U Puia hi chan ka duh lo.

'Hey, enge i sawi? Tihpalh sawina chhan tur a awm lo' tih pah chuan min rawn kuah a, amhse ka ngaih ala ngam chuang lo.

'Ni lo, i lung ka ti awi lo anih chuan pawi ka ti tak tak. Amah khan hmuh ve che a duh sia' ka ti niah niah a, min kuahna thlahdul in ka ban bul ve ve ah a vuan a, amah en thei tur in min nawr hla deuh a.

'Ka lung i ti awi mah mah zawk ani. Ka nupui tur, ka hmangaih em em hi hmangaihtu alo nei ve reng a, a hmangaih hmasa ber lehnghal in. Min kalsan lova kei min la vuan tlat leh min zahder thiam tak a a hmangaih hmasa ber tan a huntawp a siam sak tur ah pawh ka phalna la thlap tu ka nei che hi ka lawm asin. Tin, ani khan a hmangaih tak zet che ani. Hmangaihna dik tak in. I hria em? I chhuah hlan a a thu sawi chu maw, " Ani hi kalsan ngai lo la, hmeichhe luhlul tak ang a lang si hi a rilru a thianghlim a, a ring tawk bawk che. A hmangaih bawk che. I ti na emaw, i chhungte emaw pawn an ti na anih chuan a hma ah ka ding zel ang" a ti thlap asin. Ka haw lo, a hmangaih vang che a i hmakhua a sial sakna che kha a ropui ka ti takzet ani' a tih chuan ka thaw a tawp mai dawn in ka hria. Engmah ka sawi thei lo. U Pui a awm ah ka bei chial a, min phatsan anih loh chuan he mihring hi keichuan ka phatsan ngai lovang.

Kum 3 lai a liam ta. Fapa pakhat kan nei ve tawh. Opa erawh a chanchin ka hre zui lo. Ka pasal neih ni in alo kal lo bawk. Ni e, a tan chuan lo kal a chakawm hauh lovang. Ka vui lo. Engemaw chang a han ngaih ve vang vang chang erawh ka nei.

Kum 3 hnu ah chuan engemaw chhan lian tak vang in ka nuthlawi ta hlawl mai. Ka la na a, ka

tuar thiam thei lo. Mahse ka nu leh pa in min fuih nasa a, let leh chi tawh loh bur anih avang in keipawn indawm kun reng lovin hmalam ka pan ve ta. Mut hmun ah a chang chuan Opa ngaih vawng vawng chang ka nei thin. Mahse biak pawh ka tum chuang lo. A tan ka tling tawh lova, nupui tha tak a a neih ve ka beisei.

Nikhat chu ka fapa nen bazar lam ah kan chhuak dun a, ka fapa pawh a tlei ve tawh lutuk. Plaza restaurant-a thil ei tur a kan lut chu Opa te kan hmu hlawl mai. Mahse amah chauh alo ni tawh lo. Hmeichhe pakhat, naute pawm nen an ni tawh. An awmdan ah chhungkua an ni tih a hriat ngawih ngawih. Min hm thei lo zawng a a thut avangin an thut lohna lam ah chuan ka fapa chu ka luhpui vat a, an tawngri erawh ka hre pha thung. An tawngdan ah chuan chhungkua an ni tih ka hrethiam. Ka lawmpui tak zet ani.

Ka fapa nen chuan thil kan ei zawh chuan an ni an la thu a, a nupui chuan thil alo la ei mek. Ani erawh in naute alo pawm thung. An hnunglam atang chuan ka en a, ka pasal neih dawn a a rilru tur ka hriatthiam pui ta chiah. Mahse keihi lo na ve ngawt tur ka ni lo. Nui sak in ka fapa ka pawm a, kan chhuak nghal.

Opa te ka hmuh atang thla 2 vel a liam tawh. Ka phone number ka thlak lem lo a, ani erawh chuan a thlak tawh anih ka ring. Vawikhat chu ka pasal neih laiin ka call ve dawn a, kan pa nen kan inhmuh fuh vak loh tum in. Mahse ka call tlang thei lo. Khata tang khan vawikhatmah ka try leh tawh ngai lo.

Ka fapa leh ka nu an lengchhuak a, ka chhungte dang erawh hna an kal. Ka phone ri char char chu ka pick up a, ka tum loh lutuk in Opa ani tlat. Ka chanchin engmah a hre lo tih a tawngdan ah a hriat theih. Kan nupa hlim leh hlim loh te, a mumang that vak loh thu te a rawn sawi a, a phone number a thlak chhan erawh a sawi lo. Ka hlim thu ka sawi. Kan inthen thu erawh ka hrilh ngam ta ngang lo.

Min rawn phone hnu ah chuan kan inbe zui leh hran lo. Ani pawn pasal la nei reng ah min ngai bawk a, inbiak vak a rem lo ani mai. Ka chanchin hrilh ta ila min khawngaih ngei ang tih ka hria. Mahse chu chu ka duh lo bur thung. Khawngaih nih hi ka duh loh ber te zing ami ani.

'Engvang a pasal i then thu min hrilh lo nge i nih?' Opa phone ka lak rual a ka thu dawn ani. Ka thaw hak a, sawi tur engmah ka hre lo.

'Mawh, ka rawn biak che pawh khan in inthen tawh. Engvang a dawt min hrilh duh ta nge i nih?'

'Dawt ka hrilh lo che a, mahse thudik erawh ka thup mai alawm' ka ti sap a, dik tak chuan ka inthiam bik lo. Mahse ka pasal then thu hrilh kha ka ngam hauh lo. Kan inthen chhan min zawt anga, ka tlawm dawn vawng vawng lutuk.

'A tha alawm. Engvang nge tih ka zawt dawn lo che. Ka hre tawh. Hnunglam ah tawlh lo la, hmalam pan zel ang che' a tih chuan ka thaw huai mai. Min zawt pawh ni se sawi ka duh lo. Ka hrilh ngai lova a hria chu ka lawm zawk.

'Ka lawm e. I nupui pawh a hmeltha. I fa pawh' ka tih chuan a chek tlak a, engtinnge ka hriat a hre duh ngei ang.

'Engtinnge i hriat?' a rawn ti ta chiah. Ka nui sak a, a hmel awmdan tur ka mitthla zui.

Ka hmuh thu te ka sawi chuan ka biak loh avang in a vui ve nuah nuah a, mahse thinrim erawh ani lo. Ka chanchin hrilh fo tur a min tih hnu chuan phone kan dah zui nghal a, ka lung erawh a leng ru veng veng thung. Mal riau a inhriatna ka nei lian em em ta bawk. He tiang ang ngaihdan hi ka nuthlawi hnu ah ka la pu ngai miah lo.

'Nupui then ka duh' kan inbiak hnu kar 2 a liam in Opa msg ka dawng a, ka phu zawk thei.

'Engvangin?'

'Harsatna kan ngah lutuk'

'Nupa kar ah harsatna chu a awm thei alawm. Mahse keimah ang hian i awm ve tur ani lo'

'Chu chu i sawi ka ring reng a. Ka lo call dawn che aw' a tih chuan zan a rei deuh tawh nangin pawi ka ti hran lo. Inbunruah a duh anih chuan inbunruak se, a ngaihdan pawh a dang mahna!

A rawn call a, kan inbe rei khawp mai. Ka fapa hi ka nu leh pa in an riahpui daih zel avang in keimah in room-ah ka mu a, venthawn tur em em ka nei hran lo. Nupui then lo tur leh an nupa kar harsatna chu amah ngeiin chingfel tur in keiin ka nawr a, a tawngkam hman ah chuan ka tan beisei tur tam tak a awm tih ka hria. Mahse keimah vang a fahrah an awm belh ka duh lo.

Hemi hnu atang phei hi chuan min rawn be nasa a, nuam ka ti chiah thin lo nangin inngaihzawnna lam kan sawi ngai lo thung. An nupa kar pawh a zia leh viau tawh bawk a, keipawn ka lawmzia thu te pawh ka hrilh nghe nghe. Mahse rei a daih thin lo, an hlim rei thei tlat lo chu ka ngaihtuah a, kei hian Opa hi be ta lo ila a that zawk ka rin avang in ka phone number ka thlak a, a phone number erawh ka delete phal chuang lo.

Kum 1 a liam ta, keipawh in hmalam ka pan zel. Opa chungchang ka ngaihtuah duh tawh lo a, mahse hmun pakhat ka kaltlang chuan ka hrechhuak lo ngai lo. Khalai hmun kha kan 2 tan a hmun pawimawh, kan inngaizawng ani tih nemnghehna hmun ani tlat a, ka tan chuan hmun hlu tak ani.

Company pakhat hnuai ah hna ka nei ve tawh a, nitin ka fapa kalsan in hnathawk in ka chhuak ve thin. Ka hlim a, ka pasal hlui emaw, Opa emaw vang a lungngaih ka tum tawh lo. Mahse mihring hian hmalam hun kan hre lo tak zet ani. Nikhat ka hna bang hi kan office bul ah Opa alo ding a, min hmuh chuan rangzet in min raawn pan a, hel ngaihna a awm lo. Acher em em a, tin, a mitkhur a thuk dak bawk. Ngawireng in taxi alo phar a, tunhma a kan thianpa thin, Arema te in ah min kalpui a tum tih taxi driver a biak dan ah ka hrethiam. Hnial ka tum hauh lo. A taksa hmuh theih a danglam ka hmuh hian ka na ani.

Arema te in kan thlen chuan tumah an lo awm lo. Mahse chahbi a la a, kan lut a, tawng tur engmah ka hre lo. Sitting room-ah chuan kan thu a, a ngawireng a, mahse a mit chuan khawdang a hawi hauh lo. Keimah chiah min en ani. Keipawn tawng ka tum chuang lo.

' Engvang nge ka biak pawh i duh loh?' dam raih chuan a ti a, nuam ka ti lo kher mai.

'Mi nupa inkar tichhe thei ka ni tih ka inhria. Kan inbiak fo loh hi nang, kei, i nupui fanau te tan a tha ber ani. Min rawn umzui tawh suh' kun ngal chung chuan ka ti sap a, thudik tak ani ka sawi.

'Kan nupa kar i tichhe lo. Min fuih kal tu zawk i ni reng thin. Ka biak che khan chakna thar ka

nei zel thin asin' a lu a dawm a, a hmel chu a beidawn hmel tak zet ani. Kuah a, hnem a, engkim a tha vek, ka tlanchhiatsan tawh ngai lovang tih hrilh ka chak. Mahse a theih miau si loh. Keimah ah effect ala nei nasa ani tih hi a hre tur ani lo.

'Op, kan nunhlui avang hian engemaw chen ah thian satliah inkawm a harsat chang a awm tih chu i hrethiam vek a. Chuvang chuan ka tello in i hmalam ah pen tawh la, keichu i nunhlui pakhat ve mai ah min ngai la, biak tlak loh ang ah min ngai rawh' ka thusawi chu a awih dawn lo tih ka hria, mahse awih tur erawh chuan ka duh em em thung.

'Nupui ka then anga, bultan tha leh ang. I fapa chu ka fapa ani anga, nangpawn min hmangaih thin kha, ka fanu pawh i pawm thei ang. Chhungkaw hlim tak hnuai a awm ve ka chak tawh ani' a thusawi chuan min thawng lutuk. Nupui then a kei min neih hi a sawi ka ring ngai lo. Ka tihtawp ngei ngei a ngai. Na tak a ka siam a ngai ani.

'Op, pawi ka ti. Ka hrin loh fa chu ka pawm thei ngai lovang. Ka hmangaih thei ngai bawk lovang. Tin, nang hi pasal atan ka duh lo bawk che. Mipa, mahni nupui nen a harsatna a neih pawh chingfel thei lo mipa chu ka tan a tha tawk lo. Kan lo inhmangaih tawhna ah khan duhtawk ila, mi pasal duhlai lo neih sak tur khawp in ka hniam hauh lo bawk. Haw la, i nupui fanau tan pa tha tak ni la, keihi min rawn tibuai zui tawh lovang che' ka rilru tak tak erawh chuan a fa chu ka hmangaih thei teh meuh ang. Mahse mi pasal duhlai ani tlat.

'Ka thei lo ani. Nangpawn min hmangaih a, keipawn ka hmangaih che. Bultan that leh remti hram rawh' a hmel lungrun lutuk chu ka khawngaih takzet ani. Nupui lo nei hman ta lo se, tun ang hian min neih la duh tho ta se chuan insit tak chung pawn ka nei ngei ang. Mahse....

'Ka hmangaih thin che. Tunah chuan ka danglam tawh. I thian nih pawh ka duh tawh lova, i hmangaih nih pawh ka duh tawh hek lo. Tichuan a tawk em? Min kalsan la, min theihnghilh ang che. Keipawn ka hrereng tawh lo che. Ka nun ah rawn inrawlh buai tawh lovang che. I tello in ka hlim tawk viau ani. Ka kalsan ang che' tih pah chuan ka tho a, amah ka hnungchhawn nghal. Ka mittui tla chu a hmuh ka hlau ani.

Kawngka ka hawng a, hawilet tawh miah lo in ka kal nghal. Ka thuswi chuan eng ang tak in nge a tihnat ang? Keimah ngei pawn rapthlak ka in ti. Mahse chhungkaw pakhat ka humhim ah ka in ngai. Na ka ti lo bik lo asin. Ka hmangaih hmasa ber leh tun thleng a ka la hmangaih awmchhun ani tlat ani. Ka thutlukna hi ka tisual ngai lovang tih ka hria. Mi chhungkaw ti kehdarh tu chu a chhungkua ala kehdarh ve ngei ang. Chutiang mi ni lo thei a hmangaihna ka hnawl khan ka na lutuk. Mahse...

A TAWP TA

(He story hi mi 3 nun kaikhawm a ka ziah ania, in story ziak tur a min ngenna te ka tihlawhtling zung zung thei thin lova, pawi ka ti. A story inzulzui chin ho hi chu ka khaikhawm mai thin a, ka ziah sak te pawn min hriatthiam ka beisei tak meuh meuh e. Chuan, remove leh tur a min ngen leh tur kha chuan ziak tur in min ngen tawh lo hram ang che u. Hun leh ngaihtuahna seng a ka ziah tawh sa hi remove leh ka phal tawh bik lo ania. Chuan, story ka ziah sak te hi mention an duh loh tlangpui avang in ka mention kher ngai lo. Lo inngaihbel a, lo lungawi lo in awm anih pawh in min rawn ankhum mai mai tawh suh u. Khatiang kha ka ngaina lo. Keichuan min hrilhtu te duh ang in ka ziahsak mai ani. Ka ziahsak te hi ka hmelhriat an ni kher ngai lo bawk. KA LAWM E)