ECCITATO - 2

ECCITATO - 2


ELTY LUHLUL AUG HNAMTE


Min fawhna hmui lum ham ham leh zei tak a ka ka chhung a hawlna chuan ka taksa zawng zawng a fan chhuak a ni ber mai. Ka kawr a hlih lai te chuan che tur eih ka awm lo. Ni lo, ka lo pui ani mah zawk. Ka hnute kawh tha zet a rawn hum tak ah chuan ka rum hak a, ka kapkar ah tlazep a ka chhung a rawn luh dawn chuan ka rum leh nghat a, ka harh zawk. Lalpa, ka mumang lek chu ni in. Ka thaw hlawp hlawp a, ka taksa chu a sa hat hat thei. Ka lu ka thing nawk a, ka mumang ram atang chuan ka ral riai riai a, ka taksa chu vawtin a rawn hmet a, tumah awm lo mahse ka mumang vang chuan ka hmai a sen tan tan in ka ring, a sa hat hat tlat a ni.


Ka tho a, ka room chu a thim vek avangin light ka on vat a, ka mumang bawk chu ka ngaihtuah leh. Ani ber kher, ka mipa ngainat miah loh lehnghal. Mahse a mitmeng pa lutuk te, a taksa nalh lutuk leh duhthawh tak a min fawhna te kha mumang mahnise nuam ka ti takzet tih ak pha thei lo. A nuam miau a ni. Ni lo, ka ngaihtuah tawh tur a ni lo. Sana ka en a, dar 9 a ri tep. Ka nu te chu an mu tawh ngei ang. Anihloh pawhin room ah ka pa nen TV an en dun ngei ang. Ka pum ri rak ah chuan ka ril a tam tih ka hrechhuak zawk. Inhnuah ah ka chhukthla vat a, kan nula te 2 in TV an lo en. Min hmuh veleh eitur ka duh leh duh loh min zawt a, ka nu in ti tur a a chah ang thlap anih ka ring. TV en tur leh keimah a ka indap tur thu ka sawi chuan an TV en chu an en chhunzawm lehnghal a, a chang chuan an nun hi a awhawm ka ti fo. An hma a awm engpawh hi hlim takin an thawk mai a, chhungte an chawm a, lunglen chang nei amhse chhel takin an tihtur an hlen thei zel a, an fakawm ka ti.


Ka in eipuar zawh chuan ka room lam ah ka let lehnghal a, TV ka en ve peih loh avangin Laptop ka phawrh chhuak a, movie en tur ka dah khawl sa chu ka enkual dan dan a, a tawp ah Turkish movie bawk ka thlang chhuak leh ta nge nge. Ka atchilh tawp thei dawn lo anih hi. Ka movie en chu ka tui bawk a, ka mutchhuak eih bawk si lo nen ka tap ang pur a, hei hi ka tih dan than a ni. Movie hrim hrim hi heart touching lampang hi ka first choice ani ziah reng a ni.


`Hello` ka phone chu ka pick up a, ka number hriat ngai loh a ni. Ka movie en lai a phone call lo kal hi ka haw thei hle, ka silent ziah thin a, tun tum chu ka silent theihnghilh palh a, ka pick up nge nge.


`I mu tawh em?` chu awri chu ka hai thlawt lo. Ka mumang ah khan a awri kha ka hrechiang lutuk tlat a ni.


`Tunge?` hre sa ang a awm chu ka duh hauh lo.


`Keimah Noah`


`Ohh, Nihchu. Tun ang hun ah enge ni ta?` ka ze ngai, kherkhiap zia pakhat ka tilang leh ta.


`Tunang hun ah mipa in nula a biak chuan enge ni a i rin?` a nui zui hak a, min fiam tih ka hria. Mahse tun ang hun ah engvang a min call nge a nih ngawt? Ka number engtinnge a neih? Ka bo map mai.


`Ka hre bik nang. Ka number engtinnge i neih?` ka tih chuan a nui hak a.


`A harsa hleinem. Tui deuhin i mu dawn nia` phone a hang up nghal hmak a, a mizia chu a ngeiawm ve kher mai. Ka phone chu ka melh reng a, ka nui sak mai. Ka lawm nge ka hre lo, mahse hrehawm ka ti hran lo.


Zingkar ah ka nu in min rawn kaitho a, ka va haw ber mai tak. Sana ka en a, dar 6 pawh ala ri lo. Zing dang ah chuan dar 7 thleng ka mu thin a, engvang a min rawn kaitho hma em em nge a nih ka hre hrep lo ve. Ka inphih fai a, inhnuai ka chhuk chu ka hawi buai nasa mai. Sitting room ah Ruatkimi, Spi, Muana leh Noah an lo thu thap mai.


`Enge ni ta?` makti zet chuan ka enkual a, an lo nui thaw lehnghal. Noah erawh min lo en reng a, ka mumang ka hrechhuak zawk, tumah hriat lohin ka hmai asa leh ta hat mai leh.


`Spi te huan a kal kan rel kha i hre tawh lo ami?` Ruatkimi mit min siai khum zauh chu ka hmu lo der hmiah. Mahse ka nu in ka tiffin tur a rawn khai phei ka hmuh chuan ka nu leh pa an lo bum fel hman vek tawh tih ka hrethiam nghal.


`Ka lo theihnghilh daih a` tih niah niah pahin Ruatkimi bul ah ka zuk thu a. Vawiin hi chawlh ani tih ka theihnghilh bawk.


`Mambawih, han inthlak vat la, kal hma rawh u. Rawn haw tlai ka remti lo ania` ka nu chuan  arawn ti phei mawlh mawlh a, an zavai mai chuan ka haw hlawm ngei mai. Mi te hrilh lawk tur ania.


Ka insiam zawh chuan motor ka pa ken ka dil a, alo remti nasa mai. Noah motor ah kan leng vek nachungin chhiat tawh palh theih ani, spare ken loh chu ka duh hauh lo. Bakah Spi`n a bawh hiam hiam lai ka hmu chak hran lo. Ka mumang vang kha nge ka hre lo, ka thinlung kil khat ah hmuh chaklohna a awm ta tlat. Ka motor ah Muana leh Ruatkimi an chuang a, kan in ah Muana bike kan dah thung. Noah leh Spi a hma ah an tlan a, an hnung ah kan zui thung. Sihphir kan thlen chuan chawhmeh kan lei nual a, chaw erawh kan fun vek thung. Zanlam ah Muana leh Noah hna chungchang ah an inbiakna lam ah an lo rawt chu ni in, Noah chu a inhmeh ka ti hlawl lo. Chawlh alo ni lehzel bawk nen, rem an lo ruat fel vek chu ni in. Nizan a Noah in min lo biak khan min hrilh a tum a, Muana`n ka number alo pe a, mahse biak ka lo nuam chiah lo nen min hrilh ta lo anih hmel.


A hmun kan thlen chuan a nuam phian. Kawngpui chhaklam ah ania, a hmun a kang vah a, bengchhengin a bawh buai lo a, ke a tlem kal a ngai tih loh ah chuan duhthusam a ni. Apu hnen atang a an rochun anih thu Spi chuan a sawi siam siam a, a bul a kal a fuh bawk a, a mood a fuh ngar ngar teh e. In lian vaklo in an sa a, a chhung lah chu duhthusam a ni mai. Mamawh engkim a awm ani ber mai. Huan enkawltu te awmna tur a piah ah in pakhat a awm bawk a, nupa rek in an enkawl a, biak an nuam em em bawk.


`Rs, infangkual duh em?` Spi chuan pawn a ka hawikual lai chuan a rawn ti lang lang a, mahse nakin lam ah ti in ka lo chhang thung. In thlang lawk a swimming pool awm chuan ka mit a la zawk. Kan kal hma khan min hrilh lawk loh avangin tuichenna thawmhnaw ka keng der lo, ka va haw mai mai tak.


Inchhung a ka bag dah lam chu ka pan a, savawm 3 ka keng a, pakhat ka la chhuak a, pool lam chu ka pan nghal. Midang erawh choka lam ah chawhmeh buaipuiin an buai vek a, ka ngaihven lo. Puih tumna em em pawh ka nei hek lo, hetiang nikhua ah hian keichu tui awmna lam ka pan hmasa ber ziah, savawm hum chung ngeiin. Ka thlen thlak chuan a sir a thutna awm ah chuan ka thu a, savawm ka kheuh hawng a, ka phone phawrhin ka beng ah earphone ka vuah nghal a, ka hla duh em em, Mangheta Chinzah sak, ala tihchhuah loh, kan inhmelhriat that avang a a ui deuh chung chung ka dilchhuah luih `KAN THAWNTHU` tih hla chu ka ngaithla vang vang a, keichu Mizo hla hian ka lunglen a kaitho zawk mah. He hla hi chu ka ngaina ve tawk a, a thu hian ka nunhlui pakhat a phawrh chiang a ni. Ka la sawiri ngai lo, mi pakhat, hmangaih chu ka nei ve tawh. Mahse engemaw vangin kan inkar kha a tawp a, khata tang khan ani ngaihzawng hi ka serious theih tak miah loh. Ka la nghak em ka hre lo, mahse midang ka hnaih ve hian amah ka ngaihtuah chhuak ziah a, tumah ka kawp thei ta tlat lo a ni.


`Ava ngaihnawm awm ve` tawngri avang chuan ka mengchhuak a, nisa min hliah chiah chuan Noah chu alo ding a, uluk zetin min lo en bawk.


`Ooohh, ilo kal tih ka hre lo a` ka earphone chu ka la thla a, ka thu tha nghal.


`Rawngbawl peih lo a biru ka vai alawm` nuih hak pah chuan ka bul ah chuan a rawn thu thla nghal a, ka lo insangmar leh teuh tawh. Ka mumang zet chuan min va han tibuai hneh tak em!


`Bawl tur intam tho a, single bik tan chuan lo awm ve reng a nuam lo a` zahzel ah ka kekawr tlang chu ka zut niap niap a, ka nui zui hak bawk.


`Nangmah chiah single i awm tih ka lo hre hauh lova` thatchhe zet chuan chair hnung chu a ngheng ar ar a, a kut pahnih chu a tukhum ah a suih bawk a, a pian hi a nalh thlawt a ni. Ka ngaihtuah zawng ringawt pawhin ka mur ar ar thei.


`Insiam zo tawh mi?` thudang sawi vat ka duh a ni.


`A hmin nghah ani mai. Engtiknge i chhuk leh dawn?`


`Karleh nilaini ah exam turin ka chhuk ang`


`Kan kal hun a inrual dawn nihchu, Keipawh Delhi ah ka kal a ngai dawn a, ticket ila tawh em?`


`La tawh e. Enge i tih dawn?`


`Hna thil ah ania, Delhi lam hi ka tei tam lohna lam. Khawi airline ah nge i lak?`


`Air India`


`Anihchu. I awm rei dawn em?`


`Rei lovang. Ni 5 chhung ka exam anga, ka let lehnghal ang`


`Ok` a kut in a mit a hliah a, a insiamrem sut a, hahdam hmel em em in a mu chip hmak a, a engkim mai chu hmuhnawm ka ti takzet a ni. Mipa min hip tak tu ka tawn leh vawikhatna, amah hnu ah khan.


`Helam in awm ka ring reng ah. Ludo tui thiam zia hi Rs ila hmu ve lo a, cheng ang u` Spi rawn ri lang lang chu ka haw kher mai. Tui takin mu se, ngawirengin lo en ila nuam ka tih tehreng nen.


`Tuichenna tur engmah ka keng lova` ka dar ka san ak a, Noah lo che tual tual chu ka mitsir reng a.


`A ho lutuk. Kekawrbul leh kawr banbul spare ka keng. Ka han la ang. Ruatkimi te pawh an cheng ve duh ang` tih pah chuan a tlan let vat a, mihring ni chawng chawng hi ka ngaithei thlawt lo.


`Ani hi chu a rilru ang ang hi midangin pu ve tur ah a ngai thin` ka ngaihtuahna hria ni awm takin alo ti sup a, ka nui ringawt.


Kan tuicheng chu nuam kan ti phian. Spi sawi ang tak takin Noah chu tui a thiam tak tak a ni. A thuk lai ka kal ngam lohna ah min hruai a, min veng hneh kher mai. Mahse Spi chingcheng bawk alo inrawlh zel a, ka hne tan riau. Bakah ka lu a na tan a, savawm in vat ka duh ta. Pool atang ka chhuak nalh a, kawrhnuai ka hak loh avangin ka hnute chu ka hup tat a, in lampang ka pan chho nghal. Midang erawh an la cheng tuiin an la bengchheng tha angreng viau. Ka bag awmna lam chu ka pan vat a, engtiklaipawhin towel te hi ka bag ah ka dah a, ka sam leh ka taksa huh zual lai chu ka hru thuak thuak a, tumah anlo chhoh ka ring lo bawk a, savawm chu la chhuakin ka seh hawng nghal.


`Tinge maw mahni chauh a i tlat fal reng bik le?` Ka lo inngaihtuah tui lutuk chu ka au chhuak that.


`Thawm neih hmasak hi ching ve thin teh` bak hlak chuan ka lo ti a, ka lung lam hi ka pa ka chhun aniang, a chiang vak thin lo. Mahse ka chhungte bulah erawh ka sawi duh lem lo. An phili leh chung anga, a hneawm thin.


`Kawngka ka hawng thawm pawh hre lo khawp chu i ngaihtuah muk hle aniang` ka sir a chair ah chuan a thu a, a nui zui hak bawk.


`An lo chho ve dawn tawh angem?` ka savawm chu ka lem zo hlak a, alo chek hlak thung. A in ve ngai lo anih hmel. Mahse enge pawi? Ka in ngai a ni mai.


`Tep ang. Nuam an ti phian`


`Haw hma ka duh asin le. Zanah in en ve deuh te ka duh a` ka savawm bur ruak chu chhuat ah ka hung a, thatchhe zetin pawnlam hawiin ka thu zui nghal.


`Kan flight a in ang dawn` teh tawp a.


`Anihchu` han sawizui vak ngaihna ka hre lo.


`Kan kal rual thei tihna. Thlenna tur hotel min kawhhmuh theih ka beisei` ka nui hak. Thei lutuk tlat. A chhan chu ka thiante hnamdang ho nen kan dine out zing lutuk miau alawm.


`Thei tur ah ngai ang. Mahse khawi area-ah nge i duh ang?`


`In lo han chho daih a` min chhan hma in Spi a rawn lut leh hman tawh.


`Nia, ka lu a na deuh a, ka hahchawl e ka tia` a hnung a Ruatkimi lo lut ve chu ka melh a, zawhna mitmeng zetin min lo en thung.


`Ava zialo. Chaw ei lam kan hnaih dawn mi niang. Inbual ila, Rsi nu in haw hma turin min chah nasat em kha` Spi bawk chuan a tihzawm leh a, ka la inbuallo tih ka hrechhuak chiah. Kawrhnuai ka ha bawk si lo, ka hnute hmur chu a ngai ngaiin alang ani hawt e. Noah ka va melh a, ka awm zawn ah a mit a fu ngar bawk. Rangzetin ka inhup a, ka sa hat thei.


Chaw eikham chuan awm khawmuang tawh lovin kan haw tlang nghal a, in kan thlen chuan ka nu in kan kalna min lo zawt chul a, a tlangpui ka hrilh hnu chuan room ah ka luhsan a, ka khum a ka mu chu ka chau aniang, ka lo muhil hmak.


`Mambawih, tho ve tawh teh. Dawr hawn hma a ngai ania. Lunglei a kan customer pakhatin mamawh a rawn lam hma dawn ania` ka nu in ka dar a a rawn sawi chuan peih lo zetin ka meng a, nizan ka mu kha harh miah lo in ka lo mutlang daih anih hmel.


Dawr ka thlen chuan an lo hawng fel thlap tawh a, kan customer tur nen kan lut rual ani ber mai. Lunglei lam a dawr lian ve tak nei ania, bungrua hi kan hnen ah ala ziah thin a, ka pa pawhin a duhsak viau a ni. A mamawh ang te kan lo kawl kim hlauh avangin 407 a rawn ken bak ah pakhat dang a hire belh a, nuam ka ti vur vur hle. Hawn hlim a hetiang zat inhralh te chuan tunge lawm lo tehlul ang?


`Kan sumdawngnu chu a inhralh tha aniang a hlim vur vur emai` Ruatkimi lo lut chu ka lo nuih tha a, ka bul thutna ah chuan a rawn thu ve nghal.


`Dawn lawm ni.... Vawiin chu ka treat ang che. Mahse ei teuh awih loh` nui ar ar a ka tih chuan a au deuh raih a, kan nui dun hawk hawk ringawt.


Ruatkimi a haw hma a ngaih avangin min hawsan a, motor ka keng lo a, ka pa in lo tirh a tum a, mahse bazar a kawi ka duh avangin ka hnial thung. Pawisa ka tifel a, kan manager in ka pa hnen ah a hawnpui thung a, keierawh bazar lam ka pan thung. Mamawh leitur em em ka nei hran lo nangin ka chawlh hmang hi bazarna hun mumal tak ka la neih loh avangin bazar luh ve hrim hrim ka duh. Tul em em ni lo mahse chawhmeh tlem azawng ka lei a, kekawr awmhmun hak an lo sale ka lei nual bawk. Ka nu tan chapal ka lei bawk a, ka pa erawh pa duhkhirh ngang ania, engmah ka leisak hran lo. Kan monu tan erawh sunday hak chi kawr ka lei thung. An lo haw chhoh dawn avangin ka phur em em bawk. Rei erawh kan inhmu hman dawn chuang hlei lo a.


`Rs` min ko tu chu hmu lo mahila tunge anih hrilh nawn kher ka ngai lo. Muangchangin ka hawilet a, ka taxi channa piah lawk a Noah motor chhung a alo thu chu ka hmu a, ka nuih seih.


`In veng lam ah kal ka ngai a, lo kal ve ta che` a tih chuan ka hnial lo nasa mai. Ka thil khai chu ka duh aiin a rit lam hret tawh. Fruits lampang ka lei nual vang a ni.


In thleng min dah a, thingpui in tur a ka sawmna erawh a hnar thung. In ka lut chu ka nu alo ri chul. Ni e, bazar ngai hlei lo ka bazar haw hluah mai bawk sia, ka pa alo khi vei suk bawk. Thil tha tih nawmna em em chu ka nu leh pa hi an lawm thiam thei lutuk a, nu leh pa lawmna siam tluk a nuam dang a awm thei dawn em ni?


Zan lam chu lehkha ka zir ve e ka tia, mahse thianho group ah ka active em em thung. Ka awm tum dan ka sawi chu ka thiante an phur hlawm ngang mai. 2 chu kumthar atang Aizawl lam a awm an lo tum tawh bawk. Aizawl awm lo tur chu foreign lam a awm an ni thung. Thianho 8 kan nia, mahni tawk ah kan hlawhtling vek bawk. Keimah hi chawmhlawm ber ka nia, mahni a hnathawh chak ve viau mahila ka pa rem lo ruat tawh ang in pasal ka neih hma chu kan chhungkaw sumdawnna enkawl tu tur ka ni miau a, hna ka zawng buai duh ta lo kha ania. Midang chu mahni inchawm vek an ni tawh.