ECCITATO - 4

ECCITATO - 4


ELTY LUHLUL AUG HNAMTE


`Enge i duh?` a thutna piah sofa ah chuan ka thu a, ka kut ka kuangkuah at bawk.


`Kha thil kha ka tihpalh liau liau a ni. Keimah vangin....`


`I tih loh tawp tur i ti a ni. Pawi tur chu a pawi zo tawh` a sawi zawh hma chuan ka lo ti hmak a, ka lungawi lo tak zet a ni.


`Chanchinbu a chhuahtu hi ka zawng chhuak ngei ang` a ti nghut a, ka lo ner nawk zui. Advocate a ni a, advocate satliah a ni lo, a tha chungchuang a ni. A tan zawnchhuah a harsat ka ring lo. Mahse a puihna dil erawh ka tum lo bur thung.


`Chuzawng ka sawi tur a awm lo ve. Mi inkar ah hian inrawlh loh hi a him ber ania` ka ti nghat a, a nui hawk bawk.


`I tha tih ka rawn hmu a, ka kal leh mai ange. Lo in enkawl tha la, i kawp duh mihring uluk deuh tawh ang che` tih pah chuan a tho nghal a, engmah ka sawifiah peih lo. Bakah a hriat ve a tulna ka hre hauh lo bawk.


Ka chanchin diklo tak tak a thang nasa, mahse ka eng ah mah a thawk lo. Jerome pawh ka hlat a, Noah erawh nitin morning wish na leh goodnight tih a rawn thawn ziah. Abak erawh min be ngai lo. A msg ka reply ngai hek lo. Dawr pawh pangai takin ka kal leh tawh a, ka pa pawhin thil diktak a hre tawh a, lawm chiam lo mahse pangai takin kan awm ho leh tawh. Ka nu in fimkhur turin min chah awl lo a ni ber mai. Ka hun harsat laiin Ruatkimi te nupa in min thlahthlam ngai lo. Thiantha nih an tlin takzet a ni. Party ka tel tawh ngai lova, engemaw chang a Ruatkimi te nupa te nen chaw kan ei chhuah zeuh anihloh chuan ka chhuak ngai miah lo bawk.


Ka dawr kal chu bazar luhkual ka ngaih avangin bazar lam ah ka inkhalh phei a, car ken a buaithlak avangin scooty ka la e ka tia, chet vel a awlsam ta riau. Dawrpui ah scooty ka dah a, ka kalna tur nen a inhlat lem lo bawk a, hmanhmawh deuh chuan bazar lam ka pan thla a, RC.KHUMA dawr bul step a ka chhuk thla tur chiah chu Spi nen kan intawk hlawl. Ka mualphona ah khan a thiannu a inrawlh a, amah tak hi a inrawlh em tih erawh ka hre lo. Min hmu chu a hmel a pha dai a, mahse a insiamrem leh rang khawp mai. A khabe a poh vah a, min kal pel hmak. Biak ka tum lo nasa mai, a thiannu a inrawlh anihchuan amah pawh a tel ve loh chhan tur ka hre tlat lo.


`Hey, Rs` min ko tu lam chu ka hawi vat a, Rosaline ban lo vai vat vat ka hmuh chuan ka nui var var. Ani hi kan thian ho a thawveng ber ania, Mumbai lam ah hnathawkin a awm reng a, hmanni lawk ah a rawn haw chho tih ka hria, mahse hunawl kan la neih that loh avangin kan la inhmu hman lo.


`Hey, nangmahin ami?` anipawh bialpa nghet nei a ni.


`Aw, tunlai chu kan inngeih vak lo. Khawnge i kal dawn?` a nui sang a, a bul a awm hi a hahdamthlak phian zel.


`Khulai ah khuan pawisa lam lawk tur ka nei a, ke i keng em?`


`Keng lo. Hospital a lut a` a kiu pilh min hmuh pah a a tih chuan a nui var var. Alo tlu lehpek tawh anih hi.


`Anihchuan enge ila tih dawn?`


`Ka tihtur ka zo tawh. Haw a ni mai. Chaw kan ei chhuak dawn mi?` ti vel hi ania, ngaihsam lutuk anihna hi a chhungte hauh a tawrh phah zing ania.


`Kan in ah lo ei la. Kal ang, min zuk kalpui rawh. Zan ah ka thlah mai ang che` hmundang a chaw ei chhuah hi ka boruak tawn tawh avang khan ka hreh tlat tawh a ni.


`Pawi miah lo. Ka nu kan hrilh ange, anihloh chuan a te ring leh dawn emai` tih pah chuan a phone a hmet zui zat a, ka kal tumna ah min kalpui a, kan in lam kan pan zui nghal. Rosa te hi chhungkaw awm thei ve tak an nia, nau 2 a nei a, amah hi a upa ber ni chungin a tlaw ber. Mahse a ngainatawm em em thung. A thawven ngaihtuah hian ruihtheihthil engmah a ti lo thung. Kohhran upa fanu nih hi a inhmeh viau rualin a thawveng lutuk hi a inhmeh thlawt lo.


Tunah chuan Rosa nen kan inkawm tam leh ta. Ruatkimi nen erawh thuruk kan inhrilh ber thung. Pasal a nei tha a, a hlim bawk a, ka lawmpui tak zet. Mahse engemaw chang chuan ka khua erawh a har ru viau thin. Ngaihzawng nei bawk si lo, kohhran ah ka tal tam lo tih pawh ka pha lo. Vawi tam tak ka nu leh pa in min nawr tawh, sunday chawhma ka inkhawm a, zan ka inkhawm zauh zauh. KTP inkhawm zan in ka hman changin ka tel zauh zauh, a bak ka inrawlh lem lo khawp mai.


Vawiin hi kan dawr din champha a ni, ka pa in thenrual tha te nen chaw eikhawm a rawt a, kan tam dawn tih ka chiang. Dawr pawh kan khar hial a, keipawh ka tho hma lem lo. Ka thiante ka sawm ve bawk a, an rawn thlen pawhin ka la mu. Ruatkimi`n min rawn tung tho lawp a, thawhphan awm eih lovin kan ri nghal chul. Rosa pawh a bialpa a rawn hruai, keimah bawk ka chuang leh tawh. Mahse hrehawm ka ti hran lo. Ka insiam chhungin ka room ah an lo ti ti a, hunserh dar 1 daih ani tho a, ka room lam ah kan tawm khawm. Lo kal pawh an thahnem tawh viau tih inhnuai thawm atang a hriat. Ka U te nupa tel ve thei ta lo erawh a kim lo ka ti ru phian. U Partei`n nau a pai tan avangin zinchhuah Doctor in a remtih sak si lo a, tihngaihna vak awm hek lo.


Hunserh hman zawh ah ka pa in min ko a, a bul a nutling smart zet chu min inhmelhriattir a, Noah nu ani tih a sawi chuan anu a an zia ka hmuthiam. Nu zahawm tak anih pawh ka ring.


`Ka hmu thei che chu ka lawm hle mai` a tawngkam chhuak pawh a smart ka ti mai. Ani khap mai.


`Keipawh ka lawm e. Noah alo...`


`Heta hi ka awm` present bawm keng chung chuan a rawn lut chiah a, a thawmhnaw chu a inhmeh kher mai.


`Hunserh i rawn nang lova` anu chuan a fapa chu alo khak zauh a, Noah erawh a nui sak thung.


`Duhaiin court ah kan awm rei a. Ka pa, ka lawmpui che u` tih pah chuan a bawm ken chu ka pa a pe a, ka pa chuan lawmthu lo sawi let pahin bawm chu a la a, ka pa nen hian engtiklaiin nge an lo innel ka hre hauh lo.


Ni nuam tak a ni. Kan thian ho in inchung zawl ah akn thu a, Noah pawh a rawn tel ve. Ka insangmar teuh reng chu hahthlak ka ti takzet. Hepa uap na lutuk hi ka hrethiam tawh bik lo.


`Rs, ka tawng i ngaithla miah lo` Rosa titau deuh bar chu ka en a, ka ngaihtuahna ka lo kawm tui hret a ni.


`Sorry, enge ni khah?` ka nuihtlawn a, ani hi chu a titau thawm pawh a na, mahse midangte ngaidam hma tak, rilru rluang tak a ni miau a, a titau thlem dan tha ber chu nuihtlawn a ni.


`Inkhalh chhuak ve mai mai ang u, heta awm reng chu a boring ve det` a tih chuan ka hreh hran lo.


Inhnuai ah ka pa ka bia a, alo remti ve mai bawk. Mahse a mitmeng ah buaina lak a fihlim turin min chahna erawh ka hmuchiang khawp.


Noah nen kan inphur a, a kawp theuhin kan inphur a ni ber mai.


`Ka bul a kal chu i chak vak lo ani maw?` a nui huk a, ka inthiam chiah lo. Nia, a motor a ka thut luh hnu ah vawikhatmah ka tawng lova, ka inkuangkuah a, hmalam ka en ngar ngar miau a ni.


`Chutiang lam a ni lo` tihngaihna hre lo zet chuan ka nui tawp. Ka hreh em ka hre lo, mahse abul a ka insangmar teuh reng zel erawh hi chu ka ning ve tho.


`Lungngai suh, ka seh lovang` ka nui chhuak hawk ringawt. A chang chuan a tawngkam hi a nuihzatthlak thin tlat.


`Enge i nuih?` amah bawk chuan a ti leh nghut a, amah ka va en chuan alo thutak ngang mai, ka inthiam leh chiah lo.


`Eng ni love. Khawnge kal an tih leh thiante ho chu` ka ti kual ta vel ringawt.


`Bon Appetite ah kal an ti in ka hria` a tih chuan ka dar ka san zauh. He dawr hi a awmna a fuh bawk a, kal nuam kan ti tlang anih hi.


Bon Appetite kan thlen chuan midang an lo thleng tawh a, two wheeler keng an ni bawk a, keini ai chuan an dawk chak deuh hret chu a ni. Luh nghal an rawt a, pawi ka ti vak lo. Kan lut chiah chu tumloh lutuk in Spi te an lo awm ran mai, thil nuam zawk zawk chu a ni hauh lo.


`Eheu! Kan mihausa fanu zaktheilo zet chuan alo bumthlu ta che maw?` a mitmeng atang a normal lo tih a hriat reng. Hlau miah lo mahila a zahthlak ka ti, bakah a nuam chiah lo.


`Sp, i tawngkam fimkhur rawh` Noah chuan a ti nghut a, a hmel a nelawm loh kher bawk. Ni e, mi an tam bawk si a, a zahthlak ve em a ni.


`Maw? EEnteh, Ludo, i thutiam ila ti hlawhtling hauh lo ania aw...` Spi chu a zam loh hmel nasa bawk. A thiannu hruai ni awm tak chuan alo khap a, mahse a pawng tual tual zawk a ang.


`Hetah ni lovin nakin ah kan sawidun dawn nia` counter hma ah chuan kan ding thap mai a, a neitu te an zahawm kher mai.


`Enteh u, enge inbuaina ka hre lo. Mahse helai ah hian intibuai tur ni lovin, chawl hahdam a inkawm khawm pah a thil ei tur in kan lo kal a, khawngaihin min lo inthairfihlimsan ta che u` Rosa a rawn inrawlh ve nghal. Henu hi chu Ruatkimi ang a ni lo a, buaina hi a zawng lo, mahse hmachhawn turin a inpeih at reng. Chutihrualin a rilru a fim kak thei reng thung a, mi hma a mualpho a duh dawn lo, chuvang a hriatthiamna rawn dil a ni. A bak erawh a dil nawn hauh lovang tih ka chiang.


`Hmeli, lo inrawlh hlek suh` Spi chu a kai lam mah mah a ni.


`Duhtawk rawh` Noah aw-ri chu a ngainatawm loh kher mai. Mahse chutihrualin Spi chuan a hlau eih lo chu mak ka ti ru viau lawi.


`Thiani, tunge i nih ka hre lo che, mahse kan kawng lo dal miah suh` Rosa mizia a lang dawn tih ka hria, tihngaihna ka hre lo lutuk chu dawr neitu nu chu ka mitmengin puihna ka va dil a, anipawh a khawngaihthlak zawk.


`Enteh u, hetah hian buaina kan duh lo a, buaina insiam dawn ai chuan min chhuahsan vek mai rawh u` a rawn ti ta hlauh a, ka thaw huai thei. spi pawh dawr neitu berin chutia a tih tak ah chuan an awmna room lam ni awm tak chu a pan ta nghawng nghawng a, kan mood a buai leh ta vek. Rosa lah ala duhtawk lo tih a hmel atang ka hrechiang nasa mai si. Kan vai mai chuan kan ngawi ta nghiai a, milkshake kan in a, ti ti lam a lang tawh lo. Noah lah a hmel a insangmar teuh bawk nen, awm rei lo in kan haw ta dial, chhuak fuh lo ber kan ni awm e.


`Thiani, khanu kha tunge anih ka hre tawh. Tinge engmah min hrilh duh loh?` ka thutna bul chair ah chuan Rosa chu lungawi lo tih hriat zetin a rawn thu a, ka nuih aza ru kher mai. Ni e, kha buaina a  chhuah atang a ni 3 na a ni tawh. Rosa hian tunge anih min zawt nasa em em a, mahse ka sawi duh tlat lo. A chhan chu he ka thiannu hi a ngawi mai mai lehpek dawn lo tih ka hria, ka pa thin tih ur belh leh ka duh hauh lo.


`Duhtawk teh. Khatiang buaipui ai chuan engtiknge inneih in tih ve ang?` a rilru lakpen nan thudang ka rawlh lui ve tlat.


`Aih, thudang sawi suh. Khatiang hmeichhia in a duh duh a a ankhum tur i ni lo. Khawnge nangmah a huaisenna kha a awm zawh tak?` a sawi dik ve reng. Mahni induhtawk ve tak, ngeng ngalh kha ka ni thin miau a. Mahse ka mualpho atang khan keimah ah kan sumdawnna innghah thuk zia ka hre tlat tawh a, ka inthlak danglam ta reng a ni. Ka dinhmun hi a harsa ka ti ve fo, mi te tih ang tih vek ka tan a theih loh. Ka thil tha tih sawi si lovin ka tihsual pakhat lek khan ka hma hun a vaw danglam hneh em asin.


`Ka hria lawm. Mahse ngaihtuah teh, a mipa duhzawng vang a ka khinglet anih chuan a hma ang bawk a mualphona bak ka tawk leh chuang lovang` ka thaw hak a, ani erawh a ngaihdan anih hmel loh nasa mai. Noah hnaih a ka awm apiangin buaina a awm ta zel a, amah ka hlat ngei ngei a ngai tih ka ngaihtuah chhuah phah ta thung.


`Ka ning. Aaaa, engpawhnise ka thianpa ka hmelhriattir ang che. Cas nei rawh` ta thut zel mai a. He a mizia hi alawm ka awh ruk fo chu ni.


`Ringawt zel che hian. Ka duhzawng a ni dawn ami?` ka nui hak a, ka hnial tung duh lo.


Rosa in a thianpa min inhmelhriattir dawn ni chuan phur chiam lo mahila phur ang takin ka kal ve ta tho a, ka duhzawng a ni lem lo. Mipa pangai ve tak ania, mahse ka duhzawng a ni lo. An beiseina a san tehlul nen beidawng bawkin ka thian te chu ka chhuah leh ta nge nge. Ruatkimi`n whatsapp group ah min rawn nuih nasa ngei mai. Keimah tak pawh ka nuih a za zawk, zawnpui chi pawh ka ni lo.


`Mambawih, tho teh. ipa in a be duh che ania` ka nu in min rawn kaitho a, ka pa meuhin ka mu lai min kaitho meuh a min be duh chu a pawimawh viau in ak ring.


`Hetah hian lo thu teh` ka tho thla chu ka pa sitting room ah alo thu a, min lo ko vat a.


`Engenita Pa?` tih pah chuan a thutna sir ah chuan ka thu a, a hmel a thutak ran bawk. Ka rilru a nuam chiah lo.


`Pasal nei turin ka duh che a`