ECCITATO - 6

ELTY LUHLUL AUG HNAMTE


`Rosa chuan enge tel ve na a neih?` ani chu ka thian tha ania, engkim a Ruatkimi a hman loh pawh a ka rin ber a ni.


`A tel ve ngei em tih ka la hrechiang lova, hnaih rih lo phawt la tih erawh ka duhthusam a ni` a hmel a thutak ngang mai bawk si. Engkim mai chu a mak ka ti vel vek mai. Phir pui ka neih thu a sawi a, chutah ka thian tha em em chu ka tan hnaih a that loh thu a sawi leh a, a nuihzatthlak vel vek zawk a ni.


`Engtinnge heng zawng zawng hi...` ka ban ka vai hliai a, sawingaihna pawh ka hre lo.


`Heng zawng zawng sawifiah tur chuan hun ka la mamawh a ni. Chuan, nu leh pa sa him nan nang hi nupui ah ka neih che a ngai ang` a thusawi zawng zawng mai chu a nuihzatthlak tak zet a ni. Enge ka nu leh pa sa him a ngaih chhan? Ani ka neih avangin ka nu leh pa an him chhan tur engmah ka hrethiam lo.


`Enteh, fiamthu thawh a hun lo` ka nui hawk a, fiamthu thiam tak a ni.


`Ka fiamthu lo. Lalhmingliana suahsualna ti tawp tur hian ka nupui i nih a ngai. Ipa ka be tawh a, zanin ah Lalhmingliana ni lovin ka palai te hnen ah i pasal neih ni tur hrilh ani ang. Ropui tak a inneihna a awm dawn lova, a hmingin in chhungkua leh kan chhungkua hriatpuina in Pathian hma ah Pastorin min inkutsuihtir ang. Mo lawmna ruai tih vel chu beisei lo tawp mai rawh` a thusawi zawng zawng chuan mi a ang maiin min nuih tir a, mahse a hmel ah chuan a ti mai mai lo tih erawh ka thinlung chhungril hian a hre tho thung si. Mahse awih erawh ka awih chuang hauh lo.


`Nang hmuh che hi a hlawkna ka hre tlat lo. I rilru a kimlo ani ngei ang, ka haw san phawt mai ang che. I chau lutuk aniang, awm hahdam la, rilru fim i pu mai ang` tih pah chuan ka tho a, choka lam ka pan a, Ruatkimi te nupa chu ka haw tur thu ka hrilh a, biak hman lek lohin ka chhuak zui nghal. Ruatkimi min auh na pawh ka hrereng, mahse ka thluak buaih nuaih avangin tunah tak hi chuan tumah ka be chak lo.


In ka thlen chuan ka nu in min lo chiau-au vat a, nidang aiin a hmel hmuh a nuam viau. Mahse ka tawng peih thlawt lo, ngawirengin room lam ah ka luhsan a, ka nu leh pa hian enge an tihsual ni ta ang? Tinge heng thil mak tak tak hi kan tawh tak? Ka U lah biak ka tum apiangin chhuanlam fahrah te te siam in a buai thu min hrilh ziah bawk. Ka chhungte hian ka lak ah thil thup an nei ngei chuan ka hria, mahse enge anih erawh ka hre si lo. Mal intih ngawih ngawihna chuan keimah ah bu a rawn khuar a, ka khum ah mu in inchung chu ka thlir vang vang a, ka mittui ka dang zo ta ngang lo.


`Mambawih, chaw kan ei dawn em ni niang?` ka nu chu ka room-ah a rawn lut a, rangzetin ka mittui chu ka hru hul nghal. Ka mittui tla lai hi tumahin an hmuh ka duh lo.


`Ka rawn chhuk ang` ka ti sap a, min chhuahsan zui lehnghal.


Chaw ei lai chuan kan nula te pahnih chu ka pa in room lam a awm rih turin a hrilh a, chaw an lo ei hmasak tir tih an kalliam hnu a ka pa in a sawi chuan thu pawimawh tak sawitur a nei tih ka hrethiam mai.


`Bawihi, zanin hian palai hmun hnih atang an lo kal dawn a` ka chaw ei lai chu ka ei zawm mawlh mawlh. Noah khan dawt a sawi lo tih ka pawm a ngai.


`Ipa thusawi chu i ngaithla em?` ka nu in a tih chuan ka chaw ei lai chu ka chawl a.


`Ka nun ah thu ka nei hleinem. In rel ang ang khan rel rawh u` ka ti nghat a, ka tho zui nghal. Ka nu in min kohna pawh hrelo ang hmakin ka awm a, ka room lam ah ka lut chho zui lehnghal.


Ka khawvel chu a danglam vek a ni ber mai. Noah sawi ang chiahin ka pasal neih ni chu ho lam tak a ni. Ruatkimi te nupa chiah mi hrang an tel. Rosa erawh Noah sawi ang in engmah ka hrilh lo a, min rawn biak a tum viau nangin a phone call leh msg engmah ka chhang lo. Tunhma hmeichhe nung tak, mahni induhtawk ve tawk tak ni thin kha milim ang mai ka ni ber tawh. Engkim mai chu Noah sawi ang vekin a kal a ni ber mai. Ka nu leh pa lahin a sawi apiang an pawm a, ka U erawh ka pasal neih ni in an rawn chho lo. Zingkar ah erawh min rawn bia a, thil sawi duahna hun a awm lo a, mahse lo haw chhoh vat an tum thu erawh min hrilh thung.


`I inbual hmasa dawn nia, bathroom ah khan i mamawh tur chu a awm ang?` ka chhungte an haw tawh a, ka thiante nupa in min hawsan tawh bawk. Kan nupa room tur ah chuan Noah nen chuan kan awmdun ran a, ka awmdan chu mumang ang mai ni hian ka hria. Ka lo suangtuah ve thin kha engmah lo mai a ni ta.


`Khawnge i mut dawn?` a thusawi chu ka ngai pawimawh lo, kan mut dan tur ah ka buai ani mah zawk.


`Nupa chu khum khat ah kan mu ang` a ti nghut a, a phone chu a bih ngur bawk.


`Nupa pangai kan ni lo`


`Nupa diktak kan ni. Chuan, ka thusawi reng reng min hnial lo turin ka duh che. He inneihna hi ka duh vang anih ring suh, ipa in ka pa lak a a thiltih tawh vang chauh a in chhungkua hi humhim duh che u ka ni tih hrereng rawh` a hmel chu a nelawm thlawt loh.


`I bat a ni hauh lo`


`Ni e, ka bat a ni lo. Ipa in min ngen lo se chuan ka ti hauh lovang`


`Enteh, ka hrilh ang che. Keihi i bulah ka mu hauh lovang` a hma ah chuan kawngdawm meuhin ka ding a, a phone khawih lai chu dahin min rawn melh chho a, a lawm loh hmel takzet. Mahse ani aiin ka lawm lo zawk.


`Va inbual rawh. Nupui, pasal te hnial zawt zawt hi ka ngaithei lo ania` tih hmuk pahin a phone chu a khawih chhunzawm lehnghal a, ka kek bawrh bawrh chak lutuk.


Ka inbual zawh chuan room ah alo awm tawh lova, rangzet chuan ka thawmhnaw ka ha a, alo let leh hma ngei a mutthilh hman hram ka duh tak zet. Khum ah rang fahranin ka inthawlh nghal a, kan khum chu duhtak a pasal nei chu ni ila chuan a nuam ka ti khawp in ka ring. KKan room hrim hrim pawh ka lo dream thin ang chiah chiah a ni ber mai. Mahse a chhan ka hriat si loh a ka mipa ngainat miah loh ka pasal ni ta room a ni miau a, nuam tihna pakhatmah ka nei lo.


`Thawh a hun tawh e` kut lum thar tharin ka biang a rawn deh chuan ka phu nasa lutuk. Nizan khan ka chau deuh bawk aniang, ka mutui khawp mai. Noah lo let leh lai pawh ka hre lo hrim hrim. Alo let leh em tih pawh ka hre lo mah zawk.


`Dar engzatnge?` zahzel ah chuan kan ti ngawt a. Mo thar tuk a thawh hai nghal chu thil nuam a ni miah lo.


`Dar 7 a pel tawh. Tho la, intifai la, ka nu in chaw ei ah min lo nghak ang` a tih chuan hnial lem lovin ka tho ve nghal mai a, ka intihfai chhung zawng sofa-ah thu in min lo nghak a, ka rinai tak chuan a dawhthei hrep mai.


`Vawiin chu in nupa in Bawihi mamawh te va lam khawm ula, keierawh ipa thlan ah kal ka tum a, Mama, Rina kha lo hrilh la, min hruai teh se` chaw ei lai a Noah nu in a tih chuan Noah chu a bu nghauh a, nu fel tak anih ka ring. A fapa a enkawl kawng ah pawh a fakawm viau in ka ring.


`Ihhh, kalpui i duh em?` han au mai tur chuan ala tir mah mah ani. Ka mimawl biak erawh nuam ka ti bik hauh lo.


`A ngai lo ve. Vawiin chu keimah a kal ka duh a. In pa nen bazar ah va kal ula, i mamawh te in lamkhawm anga, chawhmeh in rawn bazar nghal dawn nia. Vawiin chiah chawlh ala hi in pa hi a ti mah mah deuh chu a ni` Noah nu in a tih chuan ka nui ringawt. Kan inneih avang a chawlh lak vak a tulna keipawhin ka hre tlat lo.


Chaw eikham chuan thleng seng pui ka tum a, mahse ka nu in a remtih loh avangin leh ka pasal thawmhnaw hak tur enpui tur a min tih chuan room lam ah ka chho ve nghal. Room ah tumah an awm loh avangin Noah chu ka zawng ru deuh a, a chhan pawh a thawmhnaw hak tur chu a duh chuan amah a in en mai tur a hrilh ka tum a ni. Mi hmuh ah nupa ni mahila a tak ah erawh nupa tak tak kan ni lo tih chu ka ngaihdan a ni miau a. Balcony lam ah thawm a awm avangin ka zuk chhuk vat a, pawn ah phone alo bia a, tihbuai ai chuan ti in ka letsan leh ta zawk a, sofa-ah chuan ka thu a, enge tih tur ber ka hre lo.


`Ilo inbual hmasa dawn mi niang?` ka ngaihtuahna ka lo kawm tui lutuk avangin a lo luh lai ka hre miah lo.


`A pawi lo. Ihh, englo, i thawmhnaw hak duhzawng ka hre lo a, nangmahin lo in en mai rawh` bah nak a ka tih chuan a nui hawk a.


`Nalh i tih ber ka lo ha ange. Chuan, enge mamawh lei tur i neih?`


`Ka nei lo. Chawhmeh chu lei ila. Tihtur i neih chuan keimah pawhin ka kal thei tho a` a huhang na zet chuan hnehsawh tak a tawngkhum ka duhna chu min ti zam tlat.


`Nei lo ve. Lo va inbual rawh, hna tlem tihfel lawk tur ka nei a, kan ti lawk ange. Ka nu chu a kal tawh ami?` min rawn kalpel a, room sir a computer inhunna bul chaih ah chuan thu in dawhkan hnuai atang chuan file chu a phawrh chhuak a.


Ka inbual zawh chuan a inbual ve nghal a, kan chhuah meuh chuan a tlai leh hman ruih tawh. Mamawh nei lo in ti viau mahila bazar han chhuah meuh chuan ka rinaia tam ka lei leh ta tho. Chawhmeh bazar ngai lo tih tak ah lei tur ka hre lo viau, mahse Noah zarah kan lei ta teuh tho. Pasal neih chu alo harsa dawn anih hi. An chawhmeh duhzawng thleng a hriat a ngai dawn a. Mi te ang a inneihna ropui leh inngaizawng a innei ni lo mahila pasal nei ka ni miau a, induhtawn tak a innei te tih ang tho ka tih a ngai tih ka hria, inzirna tur ka ngah dawn viau a ni.


`Inhnawh puar pahin kan hahchawl lawk dawn ami niang?` ka riltam chu ka pum a ri rak a, zingah khan chaw ka ei tam lo tlat a ni.


`In ah kan ei thei mai lo ami?` restaurant a ei ai chuan in a koka chhum ka ei chak zawk tlat a ni.


`A pawi lo. Mahse siam tur kan lei haw dawn mi niang?` ka rinaiin a bul a awm a hahdam phian.


`Koka lei ila` ka tih chuan a ngaihna a hriat loh hmel tawp. Ka nui hawk a.


`Noodles ania, Organic Hub-ah a awm, ka han kal lawk mai dawn mi?` MC-ah ground floor ah kan awm avangin amah hruai let leh kher chu ka inthlahrung ve deuh.


`Kan pahnih in le` tih pah chuan ka thil khai chu min laksak a, ka hnial phal lo, ka hne tawh nasa a ni.


Koka ka kawhhmuh chuan a nuih a zat hmel lutuk a, ka inthlahrung ve tep a ni. Ka duh ber tih ka sawi zauh a, a neitu te bulah chuan a case tawp a kan lak tur thu a sawi chuan ka nuih alo za ve thung. Organic Hub hi ka thil leikhawmna ber thin an nia, dawr an nawm bakah ka mamawh a tam ber bawk. Bazar a kal hian mamawh hi ka duhdan chuan hmun khat a lamkhawm vek mai hi ka duh thin a, kal kual duah hi ka taimak lohna lampang tak a ni. Koka bakah frozen meat eng eng emaw a la nual a, chulam erawh ka ngaihvenpui hran lo.


`I ei ve duh angem?` keimah ngeiin koka chu ka siam a, a chhan chu midangin an siam chuan a tui an ti tlem amh mah thin a, ka duh vak lo.


`Duh ve lovang. A thak iti ni lawm ni?` ka eisiamna bulah alo awm ve khuau a, a palian bawk sia, ka chet a ti nuam chiah lo.


`Thak e. Hmarcha i ngam lo ami?` ka tih chuan a ner nuk a.


`Khawvel ah hian ngam loh pakhat chiah ka nei, chu chu hmarcha` a tih chuan ka nuih a za lutuk a, ka insum hman lo. A palen tehreng nen hmarcha a ngam lo chu a inhmeh lo ka ti lutuk.


`Anihchuan enge ka siam sak ang che?`


`Thingpui min lo lum la, abak chu Liani khan lo siam mai rawh se. I eitur chu room lam ah rawn dahchhoh tir la, ka nu lo haw hma in ti ti lawk ang hmiang` dam thluam a a tih chuan ka bu nghauh a, helai a ka awmchhan theihnghilh dawn hial khawpin Noah bulah ka lo tlei leh hman tawh.


`Nizan khan Hmingliana khan min rawn bia a` ka thu ngil nghal auh. Ka thil ei lai ka chawl dat bawk.


`Chuan?`


`Thlalak kha thehdarh a tum a` ka thil ei tuina a bo vek thei. Tupawhin keimah emaw an ti ngei ang.


`Engtinnge kan dan theih ang?` ka rilru a awm hmasa ber a ni. He mihring hi ka mamawh dawn lo emaw ka tih kha ka lo tisual chiang a ni.


`Harsatna a awm lo tur ah ngai ang. I unaunu awmna ka hrechhuak tawh alawm` a tih chuan ka ding hman awk thei.


`Kha thil kha...`


`Ni e, phir pui i nei ka tih tawh kha. I nu in a neih lai cheu hian spi nu kha nurse ania, in unau chhartu ani nghe nghe a, khatihlai khan nu pakhat nau vei ve, kum 14 an inneih hnu a beidawn tawp a an nau pai ve nei ve chiah a awm a, mahse an naute kha a boral ta si a, Spi nu lainat lutuk khan naute kha alo thlak a, naute thi chu i phirpui ang in a sawi a, chuvang ania i nu leh pa hian an sawirik ngai lem loh` a chawl dat a, khum atang tho in ka thutna sofa-ah chuan a rawn thu ve a, sawi tur reng reng ka hre lo.


`Uluk deuhin ngaithla la, hei vang hi alawm Rosa hi hnaih lo tur a ka tih chhan che. Kha naute nu leh pa kha accident in an boral leh si a, Spi nu bawk hian ala leh a, kum 11 a tlin in vairam ah a hralh ta a` ka beng ka hup a, rapthlak ka ti lutuk. Ka unaunu chu hralh alo ni amaw?


`Mahse nang ang bawk a fing anih ve tho avangin hralh anihchu talchhuah tum in theihtawp alo chhuah ve a, kum 9 zet amah leitu te thuhnuai a a kun hnu ah tlanbo na remchanga  hmu a, a tlanbo ta a, tahchuan i thiannu Rosa nen hian an intawng ta a, an inkawpchhoh dan chu ka hriatpui lem lo. Rosa hi Lalhmingliana nupui a ni nghe nghe. Mahse Mizoram ah erawh nupa ang in an awm lo a, a chhan erawh chu Pathian chauhin a hria ang. Tunah hian Rosa te in ah hian i unaunu chu hrenbeh ni in heng thil zawng zawng hi an rawn ti ta a ni`


`Tinge i mantir mai loh?` ka aw chu a ri chang chang a ni ber mai.


`Man tir chu ka duh alawm. Mahse engmah evidence tha tawk tak ka nei lo a, bakah Hmingliana misual rual pawl lian tak a an hotupa thachhangdawltu ani a, heng a thil rawn tih zawng zawng hi an hotupa remtihna thlap a ti a nih avangin inchhungkaw tan a hlauhawm em em a, i u te nupa tan pawh a hlauhawm pha a ni. Finfiahna tha tawk tak kan neih hma chuan engmah ka ti thei rih lo a ni` a tih chuan ka thaw hak a, engdang zawng ai chuan ka unaunu chu ka ngaihtuah takzet a ni.


`Nihleh amah chuan unau a nei tih a inhria em?`


`Ka hre bik lo le. A hriat ka ring lem lo` a ti bauh a, ni e, a tan hriat ngaihna a awm miau lo alawm.


`Engtia hmalak zel tur nge?` tunah chuan ka lo mamawh takzet tih ka hrethiam lehzual.


`Rosa i kawmngeih a ngai ang. Ka hria tih engmah an hre lo a, Mahse karhnih chiah hun i nei a, i duh duh dan in che rawh. Ka duh ber chu an in ah kan pahnih a engemaw party siam a ni mai` a tih chuan ka bu nghauh a, thil harsa tak a ni lovang tih ka hria.


Ka nu lo haw hnu chuan kan 3 chuan kan thu ho a, nu kawm nuam tak a ni. Tin, mahni invawng chi tak ni in ka hre bawk. Tak a, ka sawi theihnghilh. Noah hian pianpui unau a nei lova, mahse a nu nau fa hi a tette atang an awmpui a, phai ah lehkhazirin an dah a, abak chu a nu a ni leh tawp mai. Awmpui pakhat riahchilh leh lang kal an nei a, an driver erawh veng mi tho an la a, an in a lian si a, a khawharthlak dawn khawpin ka hria. Ka nu lah office kal a ni bawk si.


`Mama, naktuk chu Bawihi pa in chaw ei ah min sawm a, ka rawn tlawh kawi e ka tia, hna i rawn haw hma deuh thei ang chu maw...` ka nu in a tih chuan ka lo lawm ru kher mai.


`Theih loh tur thu a awm lo. Mahse Rsi hi an in lam a teihawi vak ka remti dawn lo ania. Hmeichhia chu mahni in lam a an kal tam chuan vuina tur an ngah` a tih duah a, ka lo ei lo kher mai. Nupui tak tak ang a min cheibawl hi nuam ka ti chiah lo.


`Akhaiha, ni e. Mahse anni nen chuan chhungkua tho kan nia` ka nu chuan a ti hliai a, engemaw chen ah chuan pasal ka nei fuh ka ti dawn riau a ni.


`Ka nu` Noah in a tih chuan ka nu chu a nui var var a, a warning tih ka hrethiam. Ka nu in min rawn melh a, a nui sak a, ka lo nui ve tawp. Nupa tak tak kan ang ve lutuk tlat.


Kan zan mu pawh harsatna kan nei lem lo. Ani sofa-ah a riak a, kei khumah ka mu thung. Inngeih lohna em em kan nei hran lo. Rosa ka va biak hmasak ber pawhin alo vui der viau nangin anipawhin min hnaih a duh ve tho a, thlem lungawi a harsa hran lo. Leng tur a ka sawmna pawh a hnar phallo chiang khawp mai. Alo len ni in tumah an awm lo a, kan nula a bazar bawk. Lang a kal lah damlohna vangin alo kallo bawk a, kan in te ka fan pui a, min fak sak thiam khawp mai. Khatikhawp a inkawmngeih si kha engtinnge hetiang rilru hi a put theih tih ka ngaihtuah hial a ni. Kan inneihna a ka sawm loh vang a thuphachawina atan anmahni in a party buatsaih ka hreh loh thu ka sawi chuan a tim deuh tih hre mahila mo thar hlim a party han throw a mawi loh thu ka sawi tlat avangin a hnial thla ngam bik lo.


`Noah, enteh, a remti asin` Noah hna bang chu ka lo hrilh vat a, mahse a hmel hlim lo ka hmuh rual chuan ka tim leh deuh.


`Nakin ah kan sawidun thei angem?` a kamiz a phelh a, a hmel chu a dur khap a, a tawng peih loh hmel em em bawk.


`I chau em?` ka inthlahrun deuh avangin ka ti leh ringawt a, a awmdan chuan min ti awm nuam lo takzet a ni. Nidang ah tiang hmel hi a pu ngai hauh lo.


`Chau lo` tih pah chuan towel a la a, bathroom lam a pan zui nghal. A mizia chu mak ka ti tak tak a ni. Engvang a rawn hlim lo haw em em nge a nih ka hre lo.


A inbual hlan chuan a thawmhnaw hak tur chu ka dah chhuak a, phone ri ah chuan ka hawi vat a, a phone chu khum ah a dah avangin inthiam chiah lo chuan ka va en a, number hlang a ni, ka lak sak lem lo. Bakah phone inkhawihsak hi ka huat zawng tak a ni. A tawp a, a rik leh thin avang chuan ka ban a, ka pick up ta nge nge.


`I nupui chu kan kut a i hlan loh chuan i nu nunna hi a derthawng thei tih i hriat kha`