SEE YOU IN HEAVEN - 9

SEE YOU IN HEAVEN - 9


ELTY LUHLUL AUG HNAMTE


Jonah chuan a mitko a san uk a, engmah sawi tawh lem lo chuan min zuichhuak ve nghal hmak a, mi pasal mahnise inthiamlohna nei ru chungin ka hma a tihtur awm hi hlenchhuak tur chuan mi pasal ani tih ka hriatlohder mai a ngai rih anih hi.


`Khawiahemaw hawi thawven i duh em?` motor khalh pah chuan hmalam a en ngur a, ka pu te in kan chhuahsan atang kan la inbe miah lo.


` Ka hre lo. Mahse i let leh vat a ngaiin ka hria. I nupui....`


` Engmah thildang sawi a ngai lovang. Khatiang hmel pu chung kha chuan i nu phuba ila thei ngai hauh lovang` tih nghut pah chuan motor chu a her mawp a, Aizawl khawpawn lam hawiin a tlanzui nghal. Hnial tumna ka nei hran lo. Mahse ani nen a hmunfal a awm erawh ka duh lem lo viau.


` Helai hmun ah hian ka rilru tawt changin ka kal thin. Mimal ram ani hran lova, a hahdamthlak phian bawk` motor atang a ka chhuah ve chuan motor hma ah chuan a ding a, kan hmalam a ramngaw hring dup lam chu a en a, a sawi ang chiahin a hmun chuan min hip viau. Tin, a reh tha em em bawk.


` Sawrkar ta tihna mi?` a bul chiah ah chuan ka va thu a, a tih ang chiahin ka kuangkuah ve than bawk.


` Ni love. Pawl ta zawk ania, industry din an tum tawh a, mahse kan ram sawrkar lamin phalna an pe thei si lo a, tihian an dah tawp a, nakin ah chuan engemaw tak ala ding ngei ang tih erawh ka chiang` a khi suk a, a hmel hi ka rinlohlaiin ka lo en leh reng thin.


` Zawh duh che ka nei a...`


` Sawi la` a bul tek tawk hle. Mahse a mizia pakhat tih ka hre tawh tlat a, ka ngaipawimawh hran lo.


` Ka pi leh i unaupa...`


` I hre dik. Chuan, ka nupui hi an sipai rinawm` a hmel chu a lang hriam sawt a, a khabe ruh kal tawlh dan ah a thusawi chuan a ti thinrim hle tih pawh ka hria, mahse chuvang ngawt chuan thudik ka hriat duhna hi a bo phah hauh lo.


` Keihi engvang a min dahbo duh em em nge an nih?`


` Ipi hausakna i dal miau alawm le` a khi suk a, a mitmeng erawh ala thip ram thung.


` Nihleh engvang a he thil ah hian tel tlat nge i nih?`


` I hriat a hun ah ila hre ve mai ang. I ril a tam em?` teh daih chuan. Zawt lui pawh ni ila min hrilh dawn lo tih ka hrethiam.


` Tam hran lo. Nang?`


` Keichu a tam tawh reng. Heta tang 2KM vel ah thingpui dawr a awm a, iva kal ang hmiang. Tahchuan tuemaw pawhin an hmuchak viau ang che` tih pah chuan a thutna atang chuan a zuangthla thak a, chumirual chuan ka kut ala a, car lam ah chuan min kai phei nghal.


`In lo dam tha maw?` thingpui dawr lo nghaktu nu upa lampang, cher ve tak chu Jonah chuan a be nghal sawt sawt a, a kal thang viau tih a hriat bawk.


` Ekhai, nang i ni maw? Kan dam e. Iva reh ve, i damlo aniang kan lo ti mai asin. Hei, khawilam nula nge i rawn hruai ve mial?` chu pitar chuan hlim deuhin alo be nghal siam siam a, an innel viau tih chu sawi ngai lovin a hria nghal vek mai.


` Ka dam tha e. Nu Ngurpui, ka thil tiam che ti hlawhtling tur chuan hna ka thawh nasat a ngai miau a ni` Jonah chuan nui var var a a tih chuan chu pitarte, Nu Ngurpuii a tih chuan phawk zetin min rawn en a, a ngaihna ka hre lo kher mai.


` Bawihte, kum tam tak liam hnu ah ka hmu leh ta che. I ni meuh amaw?` ka lam chu a rawn pan a, keilah ka lo hawihai nasa mai.


`Nu Ngurpui, insum teh. Engmah ka la hriattir lo ania. Lt, ani hi i nu thiantha ber anih hi` Jonah chuan ka dar ah a rawn kuah a, ka hawihai lehzual. Enge ka sawi dawn ka hrethiam lo. Nu Ngurpuii lah chuan min kuah a, a tap rawih rawih mai bawk si.


`Bawihi, i thu ang u. Jonah, ka lawm e aw....` Nu Ngurpuii chuan thutna awl ah chuan min kuah thu a, angaihna engmah ka hrethiam lo. Ka nu khan hetiang thian a nei tih min hrilh ngai hauh lo.


`I nu kha hmuh leh ka chak ngawih ngawih a, mahse ka ngam ngang si lo` Nu Ngurpuii bawk chuan mittui hruk fiap fiap pah chuan a ti melh melh a, angaihna ka hre lo tih hian a sawifiah zo lo a ni ber mai.


`Tinge?` han sawingaihna vak ka hre lo.


`I nu in a pai che hian a hre hmasa ber ka ni a, i nu khan harsatna tam tam nen a hring che a, mahse pawi ta ber chu maw, ipi rilru chhe lutuk ka lo hrethiam lo kha a ni. Thiani, i fanu hma ah hian enge ka sawi dawn?` nutling rawl chhuah meuh in a tap a, a chhan hre kilh kelh lo mahila chhungril rum vawng vawng a tap ani tih erawh hai rual a ni lo.


` Ihhh, englo, ka nu chuan engpawh lo ti mahla a ngaidam ngei ang che` chu thu chu engvang a sawi nge ka nih ka hre lo. Mahse ka chhungril atang a chhuak a ni miau si a ni.


Nu Ngurpuii kan hmuh atang karhnih lai a liam tawh. Ka nu lo tawrh nasat zia ka hriat belh nual a, na ka ti thar ngawih ngawih. Jacob nen kan inbe leh tawh ngai lova, ka hna erawh pangai takin ka kal a, ka pu pawh a rawn kang chho veleh deuh tawh. Hna erawh a rawn akl lo a, ka pi nen kan inhmu zauh zauh nangin kan boruak engmah kan tilang ngai lo. Jonah nen erawh kan inhmu tam khawp mai. Nu Ngurpuii zar ah kan inpawh lehzual a, a lang ah a ngaihzawng ka ni nangin kan inkar ah inngaihzawnna erawh awm lo ang hmiah a ni. Min ngaihsak a, mahse ngaihzawng ngaihsak ang erawh a ni lo. Keierawh chuan a bul a ka awm tam pauh leh ka ngaina zual tulh tulh thung.


`Vawiin chu ka rawn lamkawi ang che, mi hmuh tur kan nei a` Jonah msg ka chhiar a, ka nui sak. A bul a awm hi nuam ka ti tulh tulh.


` Kan mi hmuh tur hi advocate tha lutuk ania, i pu pawh alo awm dawn a, i bo lutuk loh nan i pu hian a ro hi i hming in a dah dawn a, ka hrilh lawk che anihchu`


`Maw?` ka au ring ngei mai. Ni lo, a theih loh. Ro ka duh lo. Mahse ka nu thlan chung ah erawh ka pi hian ngaihdam a dil ka phut. Abak duh ka nei tawh lo. Anni nen a buaina neih reng hi ka kham hluah hluah tawh.


`I rilru ka hre lo. Mahse nakin a i hawihai lutuk ai chuan ka hrilh lawk che anihchu. Kan thleng e` a tih chhunzawm zat a, pawn ah ka pu leh mipa pakhat an lo awm a, kan kalna chu ka la hre ngai lo. Hlimen lampang chu a ni tih ka hria.


`In lo thleng thei maw?` motor atang kan chhuk veleh chuan ka pu chuan min lo be vat a, ka hmuh hnuhnun ber ngaihtuahin a hmel pawh a tha tawh ngei mai. Mahse a wheelchair sir lam a a khawl awm tup mai chuan a dinhmun a san lem loh zia a tilang chiang ngei mai.


`Enge ilo an?` ka nuih sang a, a bul a mipa ding chu ka en a, ka hmu tawh in ka hria, mahse ka hrechhuak zo mai lo.


`Ka tha e. Inchhung lam ah i lut ang u hmiang` tih pah chuan a khuh kharh kharh a, a taksa ala chaklo tih hriat tak a ni. Abul a mipa ding chuan a wheelchair chu nawr a tum a, mahse a vawikhatna atan ka pu chu keimah ngeiin inchhung ah ka nawrlut a, tumahin min hnial hran lo bawk.


`Puite, thingpui kha lo lum ta che. Mambawihi tan erawh theitui kha han chhawp la` ka pu chuan inchhung a nula lo awm chu a bia a, chulaikar ah makti takin ka en thung. Engtinnge thingpui aiin theitui ka duh zawk tih a hriat theih? Abul ah chaw eiin kalchhuak fo mahila midangte ei ang apiang sawisel lo in ka ei ve mai zel tlat a ni.


Thingpui kan in lai chuan kan ti ti ho sap sap a, kan advocate pawh tunge anih ka hrechhuak chiah. Ka thian pakhat, Lucy unaupa a ni. An in ah vawikhat chu chaw kan va ei tawh. Ani chuan min lo hre phian a, keimah bawkin ka lo chiang tawh lo mai mai zawk a ni. Ka pu pawh ka rinaiin a fit a, chutihrual erawh chuan a chau ve tih a hriat viau thung.


`Mambawih, vawiin hian koh chhan che ka nei a, Jonah hian a hrilh tawh che chuan ka ring tho a, ka ro neihchhun ve hi i hming a dah ka duh a, i nu lak a ka ngaihdam dilna....`


`Pu, khawngaihin i sawi zawh hma in thil ka dil thei che ngem?` ka pu tawng laklawh kai chu mawi lo tih hre tho mahila ka pawtchat lui nhram.


`Enge ni ta?`


`Ka nu ngaihdamna i duh anihchuan i ro min pek tum hi min pe lo la, mahse ka pi hnen ah erawh ka nu thlan chung a ngaihdam dil turin ti la ka duh. Abakchu i lak atang engmah duh ka nei lo` ka sawi zo chu ka thaw kawk thei. Ni e, ka pu tan thil harsa tak ka tuk a ni, mahse khang kum tam tak chhung ka hrehawm tawrhna bakah ka nu mittui ka ngaihtuah a, ka pi hian ngaihdam a dil ngawih ngawih tur a ni. Ka sen tet atanng min tihhlum a tum avang a ka nu in ramhnuai a min riahpui lai te khan ka nu kha ala naupang ve asin, a hlauh ve dan tur zia te ka ngaihtuah hian ka kawchhung hi a so bulh zel.


`Lt..`


`Ni lo, Jonah, he thil ah hi chuan khawngaihin...` Jonah tawng tur chu ka lo pawt chat vat a, ka thil phut hi a harsa ang tih ka hria. Ka pi tluk a mi chapo leh huaisar an awm lo ang. Ka pu duh angin a ro hi ka hmingin dah ta se tun a ka nu a huat avang a buaina ai hian buaina hi a nasa zawk ngei ang tih ka chiang a ni.


`Mambawih, ka lawm e. Ka tu neihchhun, ka tu ang pawh a ka enkawl theih loh, ipu hian ka va tluk lo tak che em! I duh ang chuan ipi hnen ah ka hrilh ngei ang, mahse a tihlawhtling tur chu ipi ani miau a, a ti duh ta lo anihpawhin min dem lo aniang chu` ka pu chuan a ti bauh a, ka hrethiam takzet. A theihtawp a chhuah ang tih pawh ka ring bawk.


`Ka lawm e. Chuan, ka hna hi ka kalsan a ngai dawn a...` Jonah chu ka melh zauh a, a dar a san uk ringawt. Ni e, tun hi sawina hun remchang tak a ni. Ka pu hlat a awm chu ka duh hauh lo, mahse ka thawh chhan ni ta ka pu berin hna a thawk tehi tawh miau lo a, ka tan kalsan vat kha a him zawk ang tih hrethiam rual ka ni ve tawh miau a ni.


`I tello chuan ka office chu a ho viau dawn anihchu. Mahse i tan engmah thil tha ka ti ngai lova, harsatna bak ak thlen lo che a, i duh dan a i awm chu a thiang a ni. Mahse ka tunu neihchhun i ni tih hrereng la, min hlatsan hlen lo hram ang che. Ka khawvel i ni tawh ania` ka pu chu ka en a, ak lainat takzet a ni. Mahse ka pi vangin ka hlat a ngai tlat si.


`Lungngai lo la, i tan ka awm reng dawn alawm. Jonah te hospital ah hian ka thawk dawn a, ngaihtuahawm ka ni dawn lo ania. Min mamawh hun apiangin min ko thei reng ania` ka pu chu ka hnaih a, a kut ah ka vuan a, ka lo huat thin tehreng nen ka pi suahsual lutuk vang a a fanu leh a tunu chan ani tih ka hriat hnu atang khan ka pu hi ka haw thei tawh lo.


`Ka hria alawm. Thil pakhat, he ka in hi tumahin an hre lova, nangni 3 leh kan nula hian in hre ve ani mai a, hei erawh hi chu ka tunu inihna angin thilpek ah ka pe dawn che a, hei hi chu min hnial lo aniang chu` a tih chuan Jonah chu ka va melh a, alo bu nghauh a, engvang a ani va rawn deuh tlat nge ka nih ka hre lo, mahse rinchhan tur nei ngai lo kha ani alo lan chinah hian amah ah ka innghat tam lutuk a, engpawh ti dawn ila ka rawn deuh tlat zel tawh.


`A tha alawm. Mahse kal mai tur ang a i awm hi ka hrethiam lo` thil zep hi ka zei lo, ka rilru a awm ang ang hi ka rik pui pawp zel.


`Ni lo e. Reitak ka la dam dawn alawm. Thil pakhat, ka boral anihchuan i nu thlan ah ka zal ve thei angem?` chu kher chu ka beisei lo lutuk nge tawng mi nachang ka hre lo. Ka nu thlan ah hian ka boral hun ah mut ve ngei chu ka tum a, mahse ka pu hian min dil ve ka ring lo reng reng a ni.


`Keimah hian mut ve ka duh dawn a` ka ti sap a, nuam erawh ka ti chiah lo.


`Harsatna a awm hleinem. Thlan 1 ah mi 3 pawh an zalh thin alawm` ka pu chuan a ti leh bauh a, kan bul a awm ve te lam kan ngaihtuah hlek lo.


`Chulam chu sawi tawh rih lovang u. Lt, i in a rawngbawl leh ai chuan i pu hi i rawngbawl thiam zia han hmuhtir teh. Chawhmeh chu ka lei vek a, nangin rawng va bawl rawh` Jonah chu alo inrawlh vat a, pawi ka ti hran lo.


Ka rawngbawl chu Puitei chuan min pui a, mipa ho erawh ka pu in min pek tur ram chin vel an sawi ho a, a lawmawm rualin ka duhdan erawh a ni hauh lo thung. Ni e, a thlawn a thil dawn hi ka duh hauh lo. Mahse ka pu hnen atang a ka dawn tur a ni miau a, lakloh duh viau mahila khawvel ah amah chiah pu ka nei, kan hun hmasa lam fuhlo mahse hmeichhe pakhat sual avang a ala dam te inhmelmak reng a tulna ka hre tawh tlat lo a ni.


`Ipu hnen a i thil ngen kha zahna i nei miah nange?` ka hma a ka pi ding chu a mit ah tak ka en kal a, ka in ah lehzel min rawn kalchilh ngam anihchuan ka lo zahder chiam chhan tur ka hre tlat lo.


`I ti thei lo anihchuan ka phut lui hauh lo che` ka awki chu a dam raih a, thinrim hmel ka hmuh hek lo.


`Nang naupang zaktheilo, nu leh pa kar a seilian lo...`


`Nangang mihring hi awm lo se nu leh pa kar ah ka seilian ve ngeiin ka ring. Nangmah avang a sawn dinhmun luah ka nih hi hrereng rawh` ka zam map lo. Ka nihna a rawn sawi avangin ak thinrim hek lo, mahse a tawngkam hman ang chiah a na pe let tur erawh chuan ka inpeih thlap reng thung.


`Naupang zakthei...`


`Apu nupui a chhun a, a zaktheilo anih hi` ka nui sak a, a mitmeng chu a alh pawp duh hmel hial a ni. Theihnise chuan a kut lawngin min pawtsawm vek duh hmel a pu.


`I nu thlan chung a ngaihdam ka dil chu lo beisei ngai suh. Ipu, damlo thi lek lek tawh hi a rosum it in ilo nawr vel a, a damlohin zankhat pawh i awmpui em? I nu ang chiah, zahna nei reng reng lo mai` ka in chhuat ah chuan a vei tawn sek a, ka pi ka ti nangin tarchhia ala ni lova, duham tawk lek a thluak la hmang thei ang vel a ni.


`Oxygen nen a awm zan khan engvang a i bialpa nen room hrang a mu daih nge innih?` ka duh loh lutuk ka sawichhuak ta nge nge. Ni e, khami zan khan ka pu a tahlo lutuk tih kan hria a, Jonah nen kan tlan phei a, ka pi leh Jacob kha mikhual room ah an lo mu dun daih anih kha. Kan kal tih hrilh hre lo turin an awmpuinu kha kan chah diam a, tumahin an hre ta lo reng a ni.