VISHAL BOOM ROMANCE (Complete)

CHAPTER -1



Mizoram ka thlen atang ni 3-na chiah a ni. Vishal Mega Mart hawn thar chuan Zoram a chiah hneh hle a ni. Keipawh ka chawlh chhung reilote chhung in kal ve ngei ka duh. Chutihrualin ka haw chhan dik tak, Restaurant lian ve pangai tak kan hawn thar ve tur chuan ka rilru a luah ber thung. Kan unau in theihtawp chhuahin kan sum lo khawl ve kerh kerh hmang chuan kan phak tawk dawr siam ve kan tum chu a nia, a phurawm viau rualin rilru erawh a hah duh kher mai. Kan unau hming tur anih avangin keilah chuan mahni a hawn hran leh ka la duh cheu. Tha thar a ka intuak leh tauh tauh erawh a ngai dawn tih ka hria. Chutihrualin ka theihtawp a ka thawh leh phawt chuan ka la nei ve mahnale!

Youtube-ah chuan mu ar ar pahin tunlai hla thar ho, Mizo bik ka enkual dan dan a, BCA_ One Team One Dream tih chu en kim ve hrim hrim nan ka click zauh a, karei! Ngaihthlak liam mai mai tum kha a music a rawn ri, Atea of Boomarang ngei mai chuan a rawn Boom Boom mai chu ka hmulthi a ding sung sung thei. Ka mu lai chu ka thu nghal zawt a, ka earphone lehlam chu ka vuah nghal zat a, ka ngaihthlak chhung zawng ka thaw tha thei lo ti ila dawt ka sawi hauh lovang. An zai zo chiah a, ka comment zui nghal a, ka play tha leh ngat. Hetiang em em hian Mizo te hi kan lo bon tawh tih reng reng ka hre lo. Ka nui ver ver a, ka hne mai mai dawn lo tih ka chiang. Ka ngaithla nawn tluk tluk dawn tih ka chian em avangin mp3-in ka download zui nghal. Ka play a, repeat ah ka dah zui nghal.

" Eki, ka hman tawh a nia" ka thiannu msg chu ka chhiar a, hmanhmawh zet chuan ka zuangtho a, ka la insiam lo tih hria se min va ankhum leh nasa dawn chiang tak. Ka taksa ka tleuh thuak a, ka sam erawh nizan lam ah ka suk tho avangin ka su lo. Ka thawmhnaw chu ka en a, Aizawl a hak atan chuan a tuiawm lutuk lo kher mai. Ka hnathawhna lam a ka chhiatloh pui ve em em kha Aizawl=ah chuan alo nalh lo chiang kher mai. Ka hawikual zuk zuk a, ka U thawmhnaw chu rang fahranin ka ha a, min hmuh hma ngei a ka tlanchhuah hman a ngai. Tun tum chu scooty-a in drop tir ka ngam lo tlat, pawilo, taxi-in ka kal mai ang.

Ka thiannu min lo nghahna, Armed Veng taxi stand ka thlen chuan min lo hau lehnghal bawrh bawrh a, nui hui chuan ngaihdam ka dil mawlh mawlh a, a thinrim rei leh hlei lo a. Kan thiandun hi chu han inhau ve bawrh bawrh mahila kan in haw rei ngai lo hrim hrim. Min hrechiang a, keipawhin ka hrechiang bawk. Sana ka en zauh a. chhun thil ei a hun der chu a nia. Zing chaw chhungte rual a ka ei peih ngang loh avangin engmah ka ei hman lo a, ka thiannu chu thil ei hmasak ka duh thu ka sawi chuan min hniallo in Sanpiau tuina dawr ah chuan kan chho nghal a, he dawr hi chu chawlh hmang a ka haw chuan tlawh hram ka duh thin. An thil tui zia hi ka hrechiang mah mah.

Thil kan ei zawh chuan kan kal tumna, Vishal awmna lam chu kan hawi ve nghal. Mi an tam an tih avangin a bul lawk a ka thianpa te dawr a mi tlem lai nghah pah kha kan tum sa a nia. Bus a tawt avangin ka chuang peih ngang lova, ka U taxi khalh, ama taxi khalh chu ka phone a, vanneihthlak takin Dawrpui Biakin bul ah alo awm hlauh a, hmanhmawh zet chuan kan tlanchho nghal. Bus chuan vel hi ka taimak loh ve thlawt avangin Mizoram a ka awm hi chuan ka cousin hi a taxi nen hian ka ta an ni deuh tawp thin. Lengpui atang min lo hmuak tan a, zanrei a ka thiante lo leng an awm pawhin mu tawh mahse ka kaitho leh mai thin. Ka pianpui unaute nen kan en dan a danglam em em lo. Ani pawhin pianpui ang chiahin min en bawkin ka hria.

Taxi-a kan thutluh hnu chuan kan kalna tur ka sawi a, phunnawi miah lo in ka u chuan min tlanpui nghal. Kan thawsa zual a reh chuan ka thiannu hnen ah ka hla ngaihthlak nalh zia hrilh pah chuan ka earphone lehlam chu a beng ah vuah sakin ka ngaihthlak tir ve nghal a, ani pawh chuan nalh chu a tih ve hmel tho. Mahse keiangin music ngaihthlak hi a peih ve lem lo thung. Atea aw sexy zia te chu ka sawi zui siam siam a, ka thiannu chuan a dan pangaiin a lu a lo bu nghauh nghauh a, mipa chungchang hi a sawi tam lo ve ngawt mai. Ngaihzawng fumfe tak a a neih pawh ka la hre lo e a.
Ka thianpa te dawr a reivaklo kan thut hnu chuan Vishal Mega Mart-ah chuan kan pen lut ve ta. Ka dan ngai bawkin earphone chu ka beng ah vuahin ka hla download thar leh The Weeknd hla " Reminder" chu playlist-ah dahin an pahnih chuan ka ngaihthlak chhawk leh ngar ngar. Ka thiannu chuan awh zawng a hmu hnem ngang mai. Kei erawh engmah ahn awh ngawih ngawih tur ka hre lo. Bakah ka pawisa neih nen engmah lei thei ka ni lo a, ka thiannu in kal a chak em avangin ka kalpui ve mai a ni. A duhzawng awmna lam ah a kal kual char char a, a hnung ah ka hla play ngaihthlak pah chuan phun hauh lovin ka zui ve zel bawk. Ka zai pah rat rat bawk.

" Te, ka duhtawk rih. Ka nu in min chah ho ka la kim tawh bawk a, counter lam ah kan phei tawh dawn mi niang?" Zamtei chuan a rawn tih chuan ka inher vut a, mahse counter a ka inline ve peih loh thu leh pawn a ka lo nghah mai tur thu ka sawi chuan a lungawi chiah lo nangin ka haider lui. Vairam ah pawh inline peih loh vang a pawnlam a tlem a to deuh zawk a lei ka chin lai a!

Pawn ah chuan thutna tur a awm lo kher mai. Bakah mipui an zi hut hut bawk nen, ka chau ta nghulh mai. Boruak huau huau hi ka zo ve hlawl lo. Ka hawikual a, thutna mai tur ka hmuh loh avangin kawt sir deuh a car dum nalh zet ding chu ka ngheng ar ar a, a chhung chu ka bih lem lo. A din dan ah chuan Vishal a bazar ve te ta a nih ka ring teh ngawt a. Ka hla ngaihthlak chu ka zai pui rat rat a, rinaiin ka thiani chu a rei hrep. Ka ke a kham tak deuh avangin car kawngka hnung zawk chu nghengin ka thu tung at a, hetiang tur tih hria ila bungrua te kha lo va enkual vel mai mai zawk ila a ninawm lo zawk daih ang. Ka mit ka chhing diar diar a, ni sa nen, ka lu chu a na tluk tluk a ni tawp mai.

" Excuse me, motor hi dahsawn a ngai a" mipa aw thum nalh zet in a rawn tih chuan ka thlawk chhuak lo chauh. Ka meng vat a, Lalpa leh! Ka tum aia hma a ka hmuh chu. Ang phuau chuan ka en a, ka hma ding hi nichin lawk a aw sexy ti a ka sawi ngei mai, Atea a ni tlat. Lalpa leh!

" Ka tawng i hre thei em?" nuihzat hmel deuh a a rawn tih nawn leh chuan ka harh chhuak zawk. Ka zak lutuk chu engemaw chu ka sawi ve chiang alawm, mahse enge ka sawi reng reng ka hre lo. Ka hriatchian em em chu a pa te lova, thau lampang, t_shirt dum, lian lampang a ha a, a sam chu a sei a, a fai hmelin a tawn fel thlap bawk. Jeans kekawr thawl hek hawkin a ha a, Adidas shoe, var nalh zet a bun bawk. A ban rek a eng eng emaw a bun nual bawk. Ka hmu kim hman hrep.

" Ilo ning em?" Zamtei chuan inkhaibawr lak chung a a rawn tih pawh chu chhan na chang hre lo in kan hma car dum tlan liam tur chu ka thlir zui vang vang a.

" Heyyy, enge a?" Zamtei'n ka hnung a a rawn ben tak ah chuan ka phu zawk a, car chu ka kawk ringawt pek.

" I hria em? Amah... ihhh.."

" Tu chuuuu?" ka thiannu in hrethiam lo zet a min melh chu ka nuih leh vak phawt a.

" Atea, nichin a hla ka ngaihthlak tir che khaaa... Awi, a fresh zia chuuu... Mahseeee" ka chet khir dan ka ngaihtuah let zawk a, ka zak leh hnuhnawh.

" Ava ho thei tak. Kal ang. Khua a thim tep, ipa in a bonus leh hlak ang che" tih pah chuan a bag khai pakhat chu min pe nghal a, a sawi dik. Ka kalna tur sawi lovin ka chhuak a, a tlai tawh nasa bawk. Ka phone lah a roaming avangin phone call ka dawng duh lo tih an hria, whatsapp msg ka en a, ka U msg a lo awm tuarh. Bonus chu ka dawng chiang khawp ang.

Sawi ang ngeiin in ka thlen chuan ka pa in min melh no lo chiang kher mai. Mahse vanneihthlak takin ka nu leh ka U in min lo hau hmasa hlauh a, ka pa a ngawi ta hlauh. Ka U leh ka nu hi chu an fing thin a nia. Ka pa min hauh an hlau hian min hau hmasa zaih zel. Ka pa a lungawi veleh mai thin. Mahni a eizawng a kalchhuak thei tawh pawh ni ila in ah kher hi chuan naupang treat hian min la treat tlat a ni. zan ah ka thiante lo len an tum avangin ka inthlak vat a, chaw ei hma a chhung inkhawm kan hman zawh chuan hmanhmawh ru zet chuan chaw ka ei a, ka pa erawh a tawng tha duh lo ngei mai. Ni reilote chauh ka la awm, ka pa hmui ka ti pawrh leh hman chu a nia. Thla khat chhungin vawi engzatnge a pawrh hman ang aw... Ka chhungte chuan kan dawr thar tur chungchang an sawi mawlh mawlh a, keichuan sawi tur em em ka hre lo. A chhan chu karoake kan dah nghal dawn loh avangin thil ei na lam tur in ka beng a verh ve vak lo. Hlawh ka lak hun ah ka hman atan a tawk ka tih chin ka hrilh anga, a bak chu ka thawn zo leh vek dawn tho a, karoake awm hun ah ka la han phusa ve ang chu.

" Laltlanmawi, enge ilo ngaihtuah?" ka pa in ka hming pum a min koh fawk ah chuan ka phu zawk a, ka lungawi lo viau nangin chhungkaw thil sawi lai a ka ngaihsak loh avangin a lungawi loh a zual tih erawh ka hrechiang, ka lungawi lohna ka tilang leh ngam ta lo.

" Aaaa, a tha alawm" ka ti ve ngawt a, ka U chu alo nui huk a, ka hawi hai kher mai. An thusawi pakhatmah hriat ka nei lo tih ka pa in a hriat ka hlauh vei nen.

" Anih chuan thla 1 ah Rs.3000 in indaih tum ang che. Mi ang a hausa sa a che tur kan ni lova, tunah rih chuan inren tak vek a kan awm a ngai a ni" ka pa in a tih chuan ka chaw ei ka phuh teuh kher mai. Engtinnge Rs.3000-a ka in manage theih ang?

" Pa. chutiang lek te..."

" Enge lei vak i tum? I hnathawhna ke in a kal phak. Thawmhnaw i mamawh rih lo. Mamawh pawh ni la heta tang i nu in a rawn thawn thei vek che. Zu te i zuk in thin lo maw nang te hi? I zia hi a dang bik lutuk a" ka pa in bung zet a a tih chuan ka ip zawih mai. Ka savawm in thin hi hre ta se ava sa dawn tehreng em! Pawi lo, a thu hniallo phawt ang. Ka nu mitmeng ah tlem chu ka neih belh theih hmel tho.

" A teuh lo. Zu in hman pawhin ka awm lo e a. E, tak a, Pa, ka thiante an lo leng dawn a, lo thu ve kur tawh suh u, a nuam lo thin a nia" ka pa chu ka nuih tlawn a, ka U nuihza insum hmel chu ka pa awm lo se chuan ka tlawh pawp ngei ang.

" Zu rim nam chum chum leh helmet rawn khailut chin an awm loh a thu a ni mai. A hrim hrim in vairam ah i awm a, engtinnge thian hi ila rawn neih fo ni. Hman a i thianpa, helmet dawhkan a dah kher ang chi kha hnaih fo suh. Bike nei te hi ilo lawm lutuk ange, a tullo. Hmeichhia chuan mahni tan a tha tur in hre lo" ka pa chuan a ti deuh duah a, a ngeiawm thin. Mahse ka thian tha ber chu ka pa tho hi a ni thung. Ka nu aiin ka pa hi ka mimal nun ka hrilh hnem zawk mai thei a ni.

" Teuh lo. Khatiang te chu a hmanlai tawh emai. Bakah ka bialpa te an ni ngawt lo. Thian mai mai alawm" intithei zet chuan ak ti zat zat a, ka nu chu alo nui ver ver a. Ka nu ka chhun lo hi chu a pawi. A hmeltha asin le.

" Bawihte, anih chuan ti vat vat la, inleng i neih hma in inbual teh. I hmel kha ni sa tuar hrep i ang riau, thiante bulah pawh fai tak a lan tur" ka nu dam dep a alo tih chuan ka nuih let ver ver a. Ka nu hi chu a zaidam thlawt a ni.

Ka thiante an lo thlen chuan ka lo intifai hman vek a, ka nu in ka U thleng seng a min awl tur a a tih khan nuam ka va ti tak. Ka U erawh a meng nur nasa mai. Sitting room-ah chuan kan thu khawm thap a, whatsapp group atang a inkawm khawm kan ni bawk a, kan innel hrep. La hmuh loh chiah ka nei. Pakhat chu kum 25 bawr vel a nih hmel. Pakhat erawh group-ah a tawng ve ngai vak lo aniang, ka hre ve miah lo. Palian lampang, hang lampang, kihabe ruh invuah nalh zet mai, mahse hmeltha hauh si lo, a hmeltha lo tih dawn a mi hipna ngah hmel chi tak a ni. Madinga a ni awm e. Ala tawng tlem em em zui. Keihi tawng duh ve tak ka nia, zanin pawh ka ri leh zat zat tawh. Mahse hmundang chu ni se ka tawng tha leh duh tawp nang. Ka tawng tam deuh a ka pa in a hriat chuan min rawn miss call thin. Ngeiawm thiam ve tak chu a ni.

" Senior, naktuk ah Madinga nau hian pasal a nei dawn a, fatu turin kan rawn sawm pah che a nia" Larson, kan group a tawng duh ber, a takah pawh ka kawmngeih em em chuan ka pa hriat ngei tur chuan a ti lang lang a, duhai hian kan in man mah mah.

" Awiha, in va sawi har. Taka, hmanni ah khan in sawi tak. Apa te ka lo hrilh theihnghilh daih. Apa ka lo dil anga, a phal te chuan theih loh tur thu a awm lo a" ka ti zat zat a, ka pa pawh ti lo chuan APA te kan ti ang duai duai a.

" Pa Chhuana chuan a phal em em ang. Madinga pawh hman lo chung chungin a rawn kal ve chhan a nia. Khawnge Lal Pa Chhuana chu. Amah ngei kan dil teh ang. I peih lo hian chhuanlam ah i pa i hmang palh ang" Larson chuan ati leh lang lang a, nuih a za duh kher mai. Midang lahin an lo support tliar tliar bawk. Larson chua ka pa room lam a awm chu a ko lang lang a, ka pa tan lo chhuah lohna chi ni hek lo. A rawn chhuak ve vut a, Larson chuan thiam zet chuan alo dil zat zat a, ka pa tan hnial chi der loh. Zamtei pawh alo kal ve tur thu an sawi chuan ka pa pawh chuan a phal ve mai. Ka pa room a a luh leh hnu chuan kan hmel kan va siam kawi nasa em!

" Mading, ih, ka U dawn che em?" Madinga ngawireng a lo nui ve vur vur chu ka va melh a.

" Kum 32 chiah ka la nia" a vawikhatna atan a tawng ve ta.

" Nihchuan keiaiin i upa, ka u ang che" ka lo ti vat a.

" Thian inkarah an in U ngai lo. Ka lang senior lutuk ang. Nangmah kha Senior i nih kha" a nui sak a, a vei nuih zui!

" Bawihte, i thian te kha thingpui lum sak nachang hria la. Ipa nen chuan kan mu hma ange" Ka nu chuan rawn chhuah pah chuan a rawn ti dam leh diai a. Ka tlin tawk lohna a rawn hliahkhuh nalh teh e. Sawi lo se khawiah thingpui ka lum leh tawp nang.

" Ummm.... Thingpui nge theitui in in duh?" ka thian te ho chu ka en a, tunlai dan tak ah Larson leh Madinga tihloh chuan phone an khawih vek.

" Keichu i thingpui lum ka in chak" Madinga chuan alo ti sup a, ka ngei ru kher mai. Midang erawh chuan theitui an lam thung. Madinga chuan a rilru a thlak beisei ru deuhin ka va melh a, a thlak lo tih a chiang. Nui sukin min lo la melh kur zui. Chimawm hrep mai!

Zingah chuan ka pa in a thu a zuk leh ka hlauh avangin chhungte rualin chaw ka ei thlap. Duh ka neih hi chuan ka fel ve thei viau a nia. Chaw ei laiin ka pa in haw tlai loh tur tih te, awmdan mawi te min hrilh leh nghek phawt. Thuawih hmel takin ka ngaithla a, ka U leh ka nu erawh chuan ka zawm leh dawn lo tih an chiang ang. Ka haw har hun a min phatsak dan tur an ngaihtuah lawk tawh hial mai thei. Chaw eikham chuan ka insiam sawk sawk a, Larson leh Sangtea chuan min rawn lam a, ka nalh leh vet vet viau tawh. Ka bag chhung a ka thawmhnaw thlakna tur chu ka pa in hmu se a lungawi lo vet vet ang chu!

" Keichu inkhawm ka peih lo emai, chaw ei tur chiah in kal ang u" kan in kal chhuahsan fel ta maw tih ah chuan ka ti chhuak hmasa ber a, Larson lah a lo nui huk.

" A chi loh. Inkhawm chhung a rei lovang. Inkhawm ban ah chaw kan ei nghal anga, Madinga te huan lam ah zan lam chu kan huau dawn alawm" Sangtea chuan car chu muangchang a khalh pah chuan alo ti bauh a, ka ner nasa ngei mai. Mahse hnial chi a ni lo tih erawh ka thluak thawl zet hian a hrethiam ve tlat. Zamtei kan sawm phei a, ani pawh a nu in car a rawn luh hnu ah pawh haw hma turin a rawn au zui lawm lawm. Inkawm awm tak hi kan inkawm ve chiang e.

Zarkawt Biakin kan thlen chuan pawnlam ah kan group member ho in min lo hmuak thap a, Madinga pawh alo ding ve a, a nalh kher mai. Casual dress kha a inhmeh viau a, coat suit phei chu inhmeh tak a ni. A palian tha a, a ngo vur lova, mahse a hrisel in ruihtheihthil in a bawh buai lo tih erawh a vun hang lam, nung sar si chuan a tilang chiang ngang mai. Tu fanu tak la vannei eng maw?

" In nalh hle mai. Kan lut nghal dawn mi?" Madinga chuan min en ran chung chuan alo ti vat a, a chhan hriat si lohin ka lo mur vel chuaih. Tenawm hian a!

" Nangte chu monu U i nia, kan bul ah i thu ve thei ngawt ami?" ka ka hi ka veng hman lo ziah.

" He he. Vairam awm nasa hi chu in hriat thin. Ka duh duhna ah ka thu thei alawm. I lut ang u" a ha var rual nalh zet lang chiang zet chuan a nui a, midang lah chuan min lo la nuihsawh zui.
Inneih inkhawm rei tak a ni. Hmelhriat ve miah loh inneihna a kal chu a ho duh ngei mai. Inkhawm ban chuan ka phi sek tawh a ni ber mai. Thlalak chhung hi duhaiin a rei mah mah ta in ka hria. Madinga kan nghah ve zel a ngai bawk nen, kalsan daih mai ka duh rum rum tawh. Chaw ei tur a kan kal meuh chuan ka heel bunna ka ke chu a puak mai dawn in ka hre tawh. Chaw chu midang zah zo lo in kan thian ho chuan kan dawh hmasa that a, kan ei kham chuan a nawlpuiin an la dawh tan dawn ek ek chauh. Madinga phei chuan ala ei ve miah lo. A farnu pasal neih ni a ni bawk a, a buai ve viau. Tha ka tih deuh erawh chu Biakin lam a mipa lam leh hmeichhe lam thliar miah lo a ruai an buatsaih tawp chu a ni. A hmeichhe lam chhungte tan lawi zawh a khawhar nghalna ang kha a zia bak ah sum sen a tlem zawk a, mopa leh monu chhungte tan in pawhna tha tak pakhat a ni.

" Lar, lo va kal hmasa mai ula. Keichu tih tur neuh neuh ala awm a, ka cousin thian ten live music an lo play reng dawn tho a, dar 7 hma in ka rawn thleng hman ang" Madinga chuan Larson bulah chuan a ti sup a, pawi ka ti lo nasa. A chhan chu he inneih boruak lian lutuk hi tlanchhiatsan vat ka duh ber a ni.

" A pawi hleinem. Kan nuhnuki te pahnih hi an meng puak tep tawh tlat. Kan lo va hawi dai hmasa mai ang. Tluanga leh Rammawia hian an pui che anga, midang chu kawppui nei fir fer kan ni sia, kan lo va kalpui hmasa ange" Larson chuan alo ti vat a, min kahna chu nidang ang chu ni se ka ngawi leh hauh lovang. Mahse tunah erawh chuan a rawtna tha lutuk avang hian ka chhanglet phal tlat lo.

" Ok. A tha alawm. Kan rawn kal har lovang. Chuan, hmeichhe ho kha kal hma a inthlakna mai tur a vang riau a, a hmun ah in lo inthlak mai dawn nia" Madinga chuan a lo ti leh vat a, tawng duah tawh lo a kal vat ka duh ber tawh.

Falkland lam pan chuan kan tlan vang vang a, kan dawr tur tlan pelin a thlang deuh ah chuan kawng peng alo awm a, chutah chuan kan peng a, thui lutuk lo kan tlan hnu chuan huan nuam zet, mi hausa ho nuam tawlna tih hriat zet mai kan thleng ta. Ka la kal ngai hauh lo. A hmun chu a nuam in a zau tha kher mai. Gate luh atang thui vaklo tlan in motor park-na alo awm a, motor kan park hnu chuan ke in tawi te kan phei a, swimming pool lian leh fai zet mai alo awm a, a sir ah chuan naupang chenna lian vak lo in a awm bawk. Swimming pool bul chiah ah chuan in lian tha deng dawng tak mai, a chhawng hi a awm a, chumi in chhak chiah ah chuan in lian vak lo 3 a in tlar phei a, avai mai chuan a mawiin a sak a nalh em em vek a ni.

Swimming pool kan thleng chu hmeichhe ho chu kan ri chel chul a, keini thiandun bak ah kan thian mipa te bialnu te ho pawh an awm nual. Kan vaiin mipa ho nen mi 17 zet chu kan awm tawh a ni. Kan hma a in lianpui a achung zawk ah chuan mi an ri nak nak bawk a, music play na tur tih hriat zet in music instrument an test vel mek tih a hriat. Boruak a dai tha tawh bawk a, in mal ding 3 zing a pakhat ah chuan Larson chuan min chhohpui vek a, kan thawmhnaw kan thlak sap sap nghal. Mipa thenkhatin kan inthlakna room-a fridge an hawn chuan savawm diktak ngei mai chu alo in rem khat tuarh a, ka va phur tehreng em! Mahse a lang ah erawh phur viau ang in ka awm duh bik thak lo.

" Hmeichhe ho khan zanin chu beer in in ve thei ang. Mahse a hnu a in chhunzawm erawh kan khap tlat" Larson chuan awki zang vah a a rawn tih chuan kan thiandun tih loh chu an khek raih hlawm a, keini erawh kan in hnem leh ber dawn tho a, phur tak ang in kan lang ve lem lo.

Tuichenna thawmhnaw ka ken loh avang leh tuichen ka thiam ve thlawt loh avangin swimming pool bul ah chuan savawm can keng chuan midang ho tuicheng chu ka thlir reng a, tuichen hi chu ka thiam ve chak chiang alawm. Mahse ka hlau tlat a, ka zir ve viau pawhin ka thaw thei tlat thin lo. Ka zir peih tawh lo a ni ber e. Inchhung atang chuan music a rawn ri tang ta at mai le! Mipa rawn zai ri chuan ka beng a verh kher mai. An hla play chu enge anih ka hre lo, mahse a zaitu awri chu ka hriat hnu a ni chiang mai. Ka beng chu uluk lehzualin ka chhi a, mahse tunge ka hrechhuak zo chuang lo. Music a rik hnu phei chuan inchhung lam a thalai lo awm sa an rawn chhuak bawk, boruak chu nuam helh helh tak a ni.

Thawklehkhat ah current a rawn thim thut, kan te that hlawm a, mahse generator hmang in light chu a rawn eng lehnghal a, mahse music erawh live a ngaihthlak a theih ta rih loh. Zamtei chu tui a a inchiah tui deuh avangin care vak a ngai lo bawk a, keipawh hawi thawveng turin ka thutna atang ka tho nghal a, sana ka en chuan dar 7 a ri tep tawh. Ri bengchheng a hla deuh ta amw tih ah ka nu ka phone a, ka haw tlai chuan Zamtei te in a ka riah tur thu leh ka pa lo ti lungawi mai turin ka chah a, a lungawi chiah lo nangin ka duh chu ka ti tlang dawn tih a hria, min hnial thui duh ta lo.

Savawm 2 can ka in zo ta chiah. Ken sa ka neih tawh loh avangin leh khua a thim tawh em avangin ka thutna atang chuan ka tho a, ka lu hai chu ka pai deuh chhat a. Ka lu ka thing nawk a, ka dose lo hniam tak zia ka ngaihtuah thut, ka nui sak a. Ka hmalam a thalai rual nuam ti ri chel chul lam chu ka pan phei a. Mizo thalai te hian enjoy na tur hi kan lo nei lo ngawt mai. Hei vang hi aniang zu in te hi kan thiam loh em em. Tin, huau huau a nundan mawi kan tlachham fo thin. Kan ram hruaitu te hian sports chauh ni lo a thalai te enjoy ve theihna tur hmun leh hun siam sak hi an ngaihtuah ve ngai lo em ni chu aw ka ti rilru fo thin. Vairam ah ka awm rei ve ta, party na a kal chang pawh ka nei ve zauh zauh. Tumah zu rui buai an awm ka la hre lo. Thalai atang nutling patling an kal ho vek. Nutling patling te khan thalai te enjoy dan kha a uchuak anih loh chuan an sawisel ve chhen ngai lo. Zu in leh in lo te lamtual ah an lam ho vek a, security an dah a, buaina a awm ngai lem lo. Lo awm palh pawh ni se security ten awlsam takin buaina siam tu te kha an ching let mai thin. Kan ram thalai thenkhat, sek deuh deuh, chak deuh deuh, gym-a kal peih deuh deuh tan part time a hetiang a inhlawhna tur te hi awm ve zauh zauh se. Kan police thenkhat, khawlai a zu rui, duty meng sen rem rum, dul kiar zet, intlansiak pui ah cho ila tlawm nghal mai tur ang chi ho ai chuan an laktlak ka ring thin. Police zawng zawng ka sawiselna a ni hlek lo a nia. Sawisel ngai chin ka sawisel a ni mai.

" Iva ngaihtuah muk awm ve" ka bul mai a tawngri ah chuan ka phu chiang kher mai. Ka sir lam chu ka hawi a, Lalpa leh!Amah kha! Atea!

" Enge.. hetah..." ka lai lutuk chu ka tawng bah nawk nawk a, a ding nuih suk. A biang puar pem ah chuan biangsum te reuhte alo lang kek bawk.

" Current a awm thei si lo a, kan che thei tawh lo a. Ka hawi kual vel mai mai. Atea ka nia" tih pah a a kut a rawn phar chhuah chuan ka lo ang pham ringawt.

" I hming min..."

" Tei ka nia" rangzet chuan a kut chu ka vuan a, mahse ka la sawn leh rang kher mai.Nichin a awri ka hriat, zai kha amah ngei hi alo nih dawn hi. Nangpawh i ngaihsan deuh bul ah awm ta la, i buai ve tho ang.

" I hming chu i inhmeh hle mai" a ding nuih suk chu a mawi thlawt a ni.

" He he. Ihh, ka kal phawt ang. Haw hma ka ngai" min chhan hma chuan rangzetin ka kalsawn nghal a. Ka tukhum erawh a hit mem mem.

In lam pan chuan chak zet in ka kal phei a, pool lam ah awm an la awm nual. Mahse keichu kawr bantluan hak ka duh tawh avangin inthlakna lam chu ka pan nghal a, Zamtei'n min lo au chu ban ka vai khum zauh a, min au zui tawh lem hlei lo a. Mahni chuan ka khi chho vur vur a, khik vur vur lohna chi pawh a ni lo. Ka star ve em em khan min be hmasa miau a. Chutah a awm ve ka rinloh na hmun ah alo awm ve reng bawk. In kawngka chu ka hawng a, a reh deuh thap avang chuan ka rap angreng viau. Keihi inchhung reh ruih hi ka hlauh zawng tak mai a nia. Ka kawr dahna bag chu ka la chhuak a, balcony thim ruih chu ka melh zauh a, tumah an awm lo ni a ka hriat avangin ka kawr haklai chu ka hlip a, diktak chuan kawrhnuai ka ha miah lo. Ka thatchhiatna ber pawl a nia. Light 2 chiah a eng a, hmun nuam tak ni a ka hriat kha ka rap tulh tulh. Ka kawr ka phelh lai tak chuan current a rawn awm thut, light a eng pup, ka te thawt. Ka dinna piah a sofa-ah chuan tuemaw hi a rawn inperh tho nghal zawt bawk.



CHAPTER -2

 Ka inher zawk a,kawr ka ha lo tih ka hre tawh lo. Mahse Madinga chauh hmel zet leh phawk zet si a min lo en kur ka hmuh chuah ka thaw huai mai.

" I kawr kha" Lalpa leh! Rangzetin ka hnute ka hup a, chetsawn nachang pawh ka hre lo. A bul a puan awm chu a rawn vawm phei a, rangzet a lo dawn pah chuan ka intuam than a, rangzet a inher in ka hma a ka kawr hak tur ka lakchhuah chu ka ban a, ka zak lutuk chu ka kut te chu a khur hlawk hlawk ni ber in ka hria.

" Ka hmu lo ang ah ngai rawh" nuihza insum deuh a a tih chuan a hma aiin ka zak zawk daih.

" I hmu alawm" zaklo awm fahran chuan ka ti hmiah a, ka savawm in kha a thawk tawh mang si lova, ka zahtheihlohna chu ka sawm khawm ngat ngat a ngai a ni.

" Ilo luh lai ka hre miah lo a" inthiamlo hmel deuh chuan a ti leh sup a, keipawh chuan nuam ka ti chiah ta bik lo.

" I mu tui hle a niang" ka kawr chu ka ha zo a, hreh teh mahila amah hmachhawn zawng chuan ka inher a, ka zak a ni tih tihlan ka tum bik hauh lo.

" Mai thei. Ka chau deuh a, ka lo tlu zal alawm le" min hmachhawn chuan a rawn ding ve nghal a, kan insan hlei viau mai.

" A tlai tawh sia, haw lam hnaih ka duh mange" a mi hipna na zet mai chuan min ti confi lo zual in ka hria.

" Chhungkaw naute i ni tak. Boruak nuam chin i tem ve dawn ta lo anih chu. Ka lo thlah dawn che mi? Midang hi an tha hlawm angreng sia" a ti ve mai a, min fiamna erawh ka nuih a za tlat. Tupawh mai hian family baby min ti ziah. Ka pa a strict ve bawk em a ni.

" I hreh loh chuan. Zamtei ka ko anga, kan hman har lovang" dik tak chuan la awm ka chak reng. Ka nu in ka pa a hmin fel daih tawh in ka ring bawk. Mahse haw ka rawt tlat bawk si. Madinga lahin min hnial eih bawk si lo. Atea kha ka hmu leh chak asin le. Current a awm tawh bawk sia, live music an play leh ngeiin ka ring bawk. Huiham, ka thil rawt fuh loh ber zing ami a ni hial ang.

" Zamtei chu sawm duh suh, Muana chanpual" mit min siai zauh a, a vei nuih sak bawk. Keihi, hriatloh ka lo nei leh ta. Kal lam a Zamtei mmotor ruih chhuanlam a car front seat a a thut chhan ka hre chiah e. Ka lo mawl fal thei bik thin. Ni tak, an fiam zauh zauh kha mawle!

" Ahhh, nia, ni dawn tak. Aaaa, Larson ka sawm mai ang. Ka tibuai lutuk palh ang che" Zamtei te chungchang hre lo tawp ang a awm chu ka duh bik lo. Mahse min hrilh ve lo erawh ka vui viau.
" Zuk hawi thla chhin la, sawm chi a ni angem?" tih pah chuan tukverh lam ah chuan a thle buk a. Muangchang chuan tukverh lam chu ka pan a, kan hawi thla chu Larson chu pool bul ah chuan hmeichhe pakhat nen music remin an lo lam uluk viau. Mi pangai tan chuan koh pen chi a ni hauh lo.

" Duhthlan tur dang ka nei ta lo anih hmel" ka ti sap a, a nui hak ri chuan min ti awm nuam lo nghal. Ka bag chu ka la a, ka thawmhnaw chu ka khai a, kawngka lam chu ka pan nghal vut pek. Mahse ka ban a min pawh let dawrh ah chuan ka phu nasa kher mai.

" Enge i tih?" ka ti that a, mahse a awm ah chuan nghet zet chuan min kuah bet a, chetsawn tum pawh ni ila ka che sawn thei dawn lo tih ka chiang. Min kuah ang ang chuan ka ding tlawn tawp a.

" Ka tihpalh" tih pah chuan min thlah a, a hmel chu a nelawm loh kher mai. Thinrim tur ka ni in ka hria, a chet dan avang khan. Mahse a hmel ka en a, thinrim ai in hlauhna keimah ah a lian zawk. Na tak tuar hrep a ang.

" Ka rindan chuan midang sawm ila tha in ka ring" ka special ve na em em, hlauhawm tawh palh a in control theihna kha a rawn lang tlat a ni.

" Hlauthawng suh. engemaw ka hrechhuak palh anih kha. Midang chu tibuai lo mai ang. Kal rawh le" dam dap chuan alo ti vat a, nichin a mi hlauhawm hmel kha a pu leh tawh hauh lo. Diktak chuan midang sawm tur an awm lem lo. A chhan chu an hun hlu tak tibuaitu mai ka ni dawn a, chu chu ka thlen tir duh bik hauh lo.

Kan chhuahthlak chuan thiante ho chu ka haw tur ka hrilh liam liam a, Zamtei leh Muana erawh ka hmu lo a, ka zawng buai duh ta bik lo. Ka lakah zep an nei a, ka ngaihpawimawh bik viau na chhan tur ka hre hauh lo. Thian leh thian inkar ah hetiang thil zep tlat mi tan ka lak ah pawimawhna chan inbeisei chi a ni lo. Chutihrualin ka haw hran lo. Min thlim anih chuan ka thlim ve thiam. Ka thil hriat pawh hre lo ang a awm ka thiam nasa. Anmahni ka atang ka hria anih loh chuan hria ang in ka awm ngai hauh lovang. Mahse midang aia hre hnuhnung ka nihna erawh ah chuan min hrilh ta tehreng pawh ni se ka ngaipawimawh teh chiam tawh chuang lovang.

" Hi, Tei, min tin san mai dawn ami?" ti tu lam chu ka hawi vat a, ka type ni lo mahse a talent vang hian ka duh tak zet a ni.

" Hi... Nia, haw tlai thei ka ni lo a" dar san ak chuan ka lo ti let vat a, ka nui sang bawk. I mi duh deuh kha tum hmum in i be ngaiin ka ring lo.

" Bhai, in lo inhmelhriat hman elaw? Ka han thlah ange, ani hi chu family baby a nia" Madinga chuan Atea dar ben thak thak pah chuan min fiam zauh a, ka haw phal lo. A bul a ding hi ka duh em asin.

" Ha ha. Ok, Bhai, tluang deuhin han thlah rawh. Hey, cool girl, Bhai hi hlau suh aw. Ala thianghlim ania" nui huah huah a a tih chuan Madinga chuan a dul ah alo hnek fiam a, an innel hle tih a hriat. Keipawh chu ka lo nui hawk hawk a. Ka hma a mipa pahnih te chuan duhawmna hran ve ve an nei. An tha dun thlawt e.

" Kal ila. Min puan tam hma a kalsan a fuh" Madinga chuan ka lam a rawn pen hma pah chuan nui hawk hawk in a ti zui a, Atea pawh a nui nasa mai. Kan in mangtha hnu chuan parking lam chu kan pan nghal a. Atea kan kalsan chiah chu ka lung a leng vel. Zaktheilo hian!

" Engtiknge i hnathawhna lam ah kal leh i tum?" ka ngaihtuahna atang chuan ka harh zawk. Ka rilru a lo awm mek ang tho min zawt kher nen.

" Aaa... Karleh hian dawr kan hawng ve tan anga, karhnih vel ka cham pui anga, chumi hnu ah ka let ang"

" Ticket ila la lo tihna mi?"

" Aw. Karleh lam ah ka ngaihven chauh ang"

" Kal tawh lo in dawr chu enkawl mai la"

" Ka pa duhdan chu a nia, mahse reivaklo chu intuak leh phawt ka duh a"

" Vairam chu nuam i ti deuh zawk ni maw?" a nui sak a, a tawng dan chu ka ei lo kher asin.

" Nuam tih vang a awm ah min ngai anih chuan nitin darkar 11 hnathawh hi a nuam em tih ngaihtuah phawt la. Ka sawi peih lo, tu ngaihdan mah ka..."

" A tawk a tawk. Chuti zawngin ka sawi hleinem. Ka fiam mai mai che a nih kha" alo ti vat a, mahse ka thin a khei hman tlat tawh a ni.

" Vairam a hnathawk a awm te kan en dan hi kan tih danglam a hun tawh viau a ni. Mahni in lum atang, thenkhat phei chu chawm hlawm lehnghal hian facebook velah min han deu ve khanglang zel a. A fello chu awm ve thin mahse theihtawp a hnathawk, sual hman mang lo a hnathawk te rilru hi an ti hliam fo thin alawm" ka ti leh hram a. Nia, a dik. Eng ang chiah in nge Mizoram pel a hnathawk a kalchhuak te hnathawh dan hre mang hlei lo a facebook vel a pawt zuah zuah thin ho hi keini vairam a rim tak a hnathawk te hian kan dahsang bik hauh lo. A tisual ve lo ten lo ngaih huat loh tur, ngai hua chuan diklohna deuh an nei a ni mai te hi an han ti thla rawk a. A fel tawk lo te pawh an awm alawm, mahse kan hnam tluk a mahni hnampui te chirh theh nasa hi kan awm lovang. Tumahin khanu/khapa kha tihin an sawi chat duh lo a, a Mizo ang tawp hian an sawi mai thin a, sim a hun tawh. A fello te in sawisel duh anih chuan mention pawp mai rawh u. Phai a Mizo hnathawk tih ringawt hian a fel tawk lo leh a sual lem lo te a huam vek.

" A dik alawm. Mahse i ngaih ang kha ka ngaihdan a ni miah lo a nia" dam dap a alo tih leh chuan keipawh chu ka hahdam ta deuh huai.

" I party ve hman lovang a... Keimah vangin i buai phah ta hrep sia" ti ti dang vawrh ka duh. Ka sawi zel chuan ka sawi leh hrep dawn tlat.

" Party tih vel hi ka ngaina over lem lo. Bakah hetia roam hi nuam ka ti daih zawk" alo ti tha ve mai a. A sawi dik ang. Party nuam ti tak hmel a pu lem lo. Tin, a cool mah mah tlat.

" Khawi department-ah nge i thawh khah?"

" P&E-ah a nia. Mahse hei, ka pa in family business hi enkawl tawh tur in min ti deuh a, thutlukna ka la siam fel lo chu a nia"

" Sawrkar hna kalsan tawp chu"

" Mi tam tak ngaihdan ah chuan a ni mai thei. Mahse kan hausak vang ni lovin keichuan sawrkar hna hi ka duh vak lo. Thil diklo ti thei tawk velin hna kan nei ve a, mahni aia lal te tih lawm a ngaih chang a engemaw zeuh ngai thin hi keichuan hahthlak ak ti" a ti ve duah a, a inhmeh lo zawk.

" Ni khawp ang. Business lampang ah i tui ami?"

" Tui mah mah mai thei" a nui suk a. A vei nuih hi a inhmeh ve thlawt a ni.

Kan ti ti tupi phian a, kan sawi duhzawng lah rinaiin a inmil hrep bawk. Mahse mipa tawng duh tak chu a ni chuang lo. Kan inkawt kan thlen chuan dar 9 a ri tep a, kan in mangtha hnu chuan min tlan let san lehnghal. Inchhung ka lut ka nu leh pa in TV an lo la en a, ka pa chuan min en run a, ka nu ka melh vat thung.

" I thiannu te in ah i riak nghal dawn emaw tia?" ka pa chuan alo ti bung nghut a. Ka nu in alo pha fel tawh tih a chiang e.

" Nia, mahse ka peih leh lo a. Mahni in a awm khat naklaiin riah chhuah kha ka hreh leh deuh a" ka pa chu ka nuih tlawn var var a. Ka pa meuh pawh a nui ve suk mai, ka thusawi chuan hna a thawk tha tih ka chiang.

Ka inbual fai sawk sawk a, ka U hla zir alo ban chuan ka room-ah ka mu fel than tawh. A rawn lut dan dan a, kan naupan lai kan tihdan ang bawkin ka khum ah chuan mu in kan ti ti a, ka awmna lam chanchin chu ka hrilh siam siam a, zawhna a ngah, chhan nuam ka ti bawk. Kan unau zing a ka kawmngeih ber a ni bawk. Midang hi chuan min ngei deuh thin a, a chhan chu ka phakar bik vang ania. Ka nu leh pa tihlawm dan ka thiam mah mah an ti fo thin.

Ka U in mu tur a a room min pansan hnu chuan ka phone ka khawih mial mial a, Zamtei miss call 4 lai a awm. Ka call let peih chuang lo. Tunah rih chuan ka be chak lo. Kan thianho group ah photo an post nasa a, ka va like vek a, ka ri chiah chu Zamtei a rawn lang ve nghal. Ka haw san avang a a lungawi loh thu leh phone ka pick loh vang a a mangan zia a rawn sawi hluah a, ka chhang peih lo. Mahse chhan loh tawp ai ah ka va nui ringawt a, tunah rih chuan keimah ah a tla na hlawl lo a ni tawp mai.

" Ila muhil bik nange?" Madinga msg ka dawng nawlh.

" La muhil lo chu a nia. I thlen pheina a rei tawh em?"

" Ka let ta lo. Ka tello pawhin nuam an ti tho a, ka lo call dawn che" a awmdan chu mak ka ti ang reng viau.

Ka reply hma chuan a rawn call nghal zat a, ka pick up peih em em hran lo. Mahse pick loh a mawi der si lo.

" La har leh si ve" ka tawng hma chuan a rawn ti nghal zat a, a aw ri ah chuan khum ah a mu tawh tih a hriat. Sexy reuh tawp.

" He he. Nge min lo call a?"

" I ngaihawm ve a"

" Awihawm loh"

" Ania lawm. Naktuk ah lunch ei dun ila. Tih tur dang i nei em?"

" Ka bialpa nen chhuah kan tum a" ka dawt sawi pawh chu keipawhin ka awih lo. Ka single chiang lutuk rapthlak. Mizoram a awm ka nih rih loh avangin distance relationship neih ka duh tawh lo. A hma in ka nei a, mahse rinawm lohna vangin na tak in ka awm tawh a, khatiang kha tawh nawn leh ka duh tawh lo. Ka ri phawr phawr nangin ngaihzawng chungchang ah hi chuan ka serious viau thin. Ka fel ve na lampang tak a ni.

" Dawt sawi kher a ngai hleinem. Min chhuahpui peih loh chuan a pawi chuang lo a" a rawn tih chuan nuam ka ti lo kher mai.

" He he. Ka fiam che anih kha, Tak tak a, dawr tur ah hnathawk va enpui ka ngai dawn a, lo kal ve zawk la, tiffin kan pai thei alawm" ka ti ta nge nge.

" A pawi miah lo. Tunkar chu chawlh ka la a, ka hman viau ang" nui hak hak a a rawn tih chuan a nui hmel leh ri hian engtin emaw tak min tham tlat thin.

" Chutichu driver ka nei tihna a ni mai alawm. Mahse insawifiah ngaihna a awm ka hlau deuh"

" Means what?"

" Tuemaw thik ka nih ka hlau tihna mawle" ka nui hak a, mahse mak deuhin ka nuih a za hauh lo.

" Nangmah leh nangmah kha i inthik chuan i thu alawm" thu tak deuh a a rawn tih chuan ka dang chiang hle a ni.

" I ho"

" Thudik alawm. Tak a, naktuk chuan dar engzatah nge niang?"

" Dar 11 vel a phei ka tum a"

" A that chu. Zinglam ah hmun tihfel a ngai dawn sia. 11 chuan ka hman thei ang"

" I hna a tihbuai dawn chuan keimahin ka lo va kal anga, i rawn phei thei tho alawm"

" Nope. Ka rawn lam dawn che nia. Mu tawh rawh. Party ho hlep in muhil hma ang. muttui aw" phone a dah zui nghal daih. Midang aia a danglamna ka hmu leh ta.

Zing chaw ei lai chuan ka pa chuan thil pawimawh tur ang min hrilh a, ka U erawh zing kar ah ka thawh hma in alo chhuak daih tawh. Ka nu erawh chuan tiffin min siam sak mawlh mawlh a, ka ei duhzawng hi hrilh ngai lo in a hre vek a ni. Ka pa chuan bus chang mai tur a min tih chuan ka thianpa lo kal ve tur thu ka sawi a, tunge anih min zawt a, ka sawi chuan a remti ve mai bawk. Hnathawk tur kan ni bawk a,inchei ngaiin ka hre lo. Ka kekawr hman thiam, a dum, a sir a violet colour a tial thla leh t-shirt lian lampang, violet colour tho ka ha a, ka sam sang tawkin ka tawn a, lukhum hmathlawk, ka pa hnathawh lukhum ngei mai chu ka khum bawk. Hnathawhna hmun a nalh zuarh hi ka pa ngaihtheihloh zawng tak a ni bawk a, ka inthuam dan chuan a ti lawm leh khawp ang.

Dar 11 a rik hma hretin Madinga alo thleng a, ka nu in thingpui a lum sak te te a, ka pa nen an ti ti chu an inkawmngeih hrep mai. Tupawh an kum leh phu tawkin a kawm thiam a nih hmel. Kan kal tur pawh ka pa in tlai chaw ei haw nghal turin a ti ve nghut a, mahse chu erawh a hnial ve thung. Mi pangai tan vawikhat chaw ei a sawmna pawm ngawt thu awm suh. A hranpa ngat a insawmna ang anih lem loh chuan.

" I pa chu a strict hmel ang aiin pa fel tak anih kha mawle" car steering herh pah chuan a ti nghut a, ka lo nui sak ringawt.

" A tuina zawng football sawipui tur a nei lo kha a khawngaihthlak reuh" a tih zawm leh a, ka pa kha reilote chiah a kawm hman a, mahse a hre hman tlat. Mak ka ti zawk. A swidik bawk. Fanu hlir min nei a, ka nu lah football tui lo lutuk, en aia ngaithla thin a ni. Kei a tuipui ber ka awm tam si lo a, a khawhar ve thin ngawt ang. Ka lo ngaihtuah ngai miah lo a.

" Nia. Keimah ber ka awm tam si lo a, mahni in a en ve ruk ruk zel. Ka nu lah hi football en tawh chuan a muthlu zui nghal zel a" nui hak hak a ka tih chuan a nui ve vur vur a.

" Tuemaw ber hian tupa in pek vat angai anih hi" tih pah chuan min rawn siai zauh a, ka lo en lai tak ani bawk nen, ka sen ap ap thei.

" A u ten an la nei vat mai ang" ka ti ta niah niah ringawt. A nui hwk hawk zui. A nelawm loh viau emaw ka ti kha vawiin chu a nelawm kher mai. Tin, a fai sar bawk. Hmuh a nuam.

Kan dawr tur kan thlen chuan table leh chair vel an lo hlangthla mek a, main gate vuah turin an lo chhawp chhuak tawh bawk. Ka u pawh biang tai takin alo che leh surh surh tawh. Min lo hmuh veleh min lo chiau-au vat a, Madinga chu ka inhmelhriat tir a, inhre sa ang maiin alo tawng pui nghal bawrh bawrh.

Kan dawr tur hi kan uluk ve khawp a, kan neih zawng zawng bak kan senna tur, kan future tam tak innghahna tur a ni bawk a, pal liam mai mai kan tum lo ve tawp mai. Kan upa ber in sum a khawl ve sa a thehchhuak char char a, keiin ka neih ve tawk tlem leh idea lo thawh ka hna a nia, ka U chiah hian sum awm sa in nitin mai a tlan kual a, a hah pawh a hah. Kan te ber hi awihawm loh khawpin idea a nei lo a, mahse engmah hi sawisel a nei ngai hauh lo thung. Kan nu leh pa te kan theih ang ang in kan awl a, mahse an tello erawh chuan kan ti hauh lo thung.

" Mading, helam ah hian lo kal rawh. Cabin lampang leh thalai deuhte tan a han thutkhawmna hmun tur lam hi lo enchhin rawh" tih pah chuan Madinga chu ka kai a, cabin lampang atan a kan pin dan ah chuan ka kai phei a, ka inchhuang ve kher asin. Eng designer mah kan ruai lo. A chhan chu rawihna tur sum kan nei ve miau lo a. Mahse kan unau in kan duhdan kan sawi ho a, ka pa in a pindan dan tur min enpui a, kan lungawi tawk em em a ni. Cabin 4 kan dah a, cabin bulah hian hmun awl ve deuh, mi 2 lek lek thut theihna tur dawhkan leh chair kan dah bawk a, helam hi chu cool deuh hlek a siam kan tum avangin light pawh kan dah eng vak lo.

" Wow! A nuam dawn kher mai. Heng zawng zawng hi designer tumah ruai lo a in buatsaih maw?" Madinga'n mak tih hmel deuh a a tih chuan ka lo hawi sang vel asin.

" Anih ve hi. Mi han ruai dawn ila kan sum neihin a pha si lo a. Enge a ang dawn a i hriat?" ka U chuan alo ti vat a, kei erawh ka lo nui vei sawng thung.

" Tha lutuk. Sound system tha tawk awm se, thalai tam tak chuan thianho a chawlh hahdam nan an la rawn duh thuai ang. Family place dah tel in tum em?"

" Aw, nichin a kan awmna lampang kha a ni dawn a. Naupang tan pawh a chep lutuk lo, an tualchai pah theihna tur kan han buatsaih ve chu a nia" ka U bawk chuan alo ti leh vat a. Ani pawh chuan han hrilhfiah vel chu nuam a tih ve hmel reng mai.

" Hawng vat ula ka va ti ve. Keipawh ka la rawn kal zing ngawt ang" Madinga chuan phur hmel zet a a tih chuan ka U chu a nui ver ver a. Min phur puitu an awm hian a nuam ve thin asin.

" Tikhat Tei khan alo enkual pui thei ang che. Choka lam saw tihfel tur ala awm nual a, ka pheisan ang che u. Tei, hnathawk ho chhun ei tur i rawn keng nghal em?" ka U chuan a tih zawm zat a. Lalpa leh! Ka tiffin chiah ka keng.

" Awii...."

" Kan han lei dawn nia. Vawiin chu in dawr tur lawm nan chhun thingpui ka treat ang cheu" Madinga"n alo tih chuan ka U in min melh rum teh e.

Ka U in min phei san hnu chuan dawr chhung chu ka fan kual pui a, engkim chu peih fel deuh thaw vek a ni tawh a, mahse karoake leh spa room tur erawh restaurant kan hawn fel ah kan siam leh dawn a ni.

" Heng zawng zawng hi in unau a in plan vek chu a ni sia. Awih a harsa zawk alawm le" Madinga chuan chair pakhat a thut pah chuan a ti sup a.

" Hemi tur hian unau pawh kan inhau ve nasa in kan intihtauh khum ve nasa alawm. Mahse midang an thinrim chuan pakhat in kan lungawi tlanna tur thil kan ngaihtuah vat zel. Kan kawng zawh pawh a biboh viau mai" a hma a chair ah chuan ka thu ve nghal a. Ka thaw ham ham.

" UUnau pawh inhauh chang a awm lo thei lo. Mahse chung zawng zawng paltlang a inbeihna hi nakin ah chiang deuhin min la hrilh ang chu" a tih chuan ka bu nghauh a. Sawi nuam ka ti viau ta ve ang.

" Eitur chu kan han lei dawn em ni?" a rawn tih leh chuan ka thutna atang ka zuangthla tharh a, min la nuih zui huk huk lehnghal.

" Keima pawisa in kan lei dawn nia. Ilo insen ve a ngai miah lo" ka ti vat a, ka ngaihdan tak pawh a ni. Ka nu khan a siam vek a, ka theihnghilh leh hram a. A hremna atan keimahin ka lei mai tur a ni.
" Anih chuan lo awm rawh. Hmeichhia in mipa rorel tawh sa lo hnial tum ai chuan mipa chu amahin a kal mai tur a ni" a ti nghut a, chhan ngaihna pawh ka hre lo. A tawngkam hi a chang chuan dawn sawn a nuam lo thin. Whatsapp group ah pawh.

Ka hamhaih lai chuhin a kal vut a, ka zui buai peih ta lo. Ka U bulah ka va tawlh hrut hrut a, min lo zilh hlak zui. Khawiah mai pawh hian zilh ka tawk reng mai chu anih hi. Mahse chhan en ah ka en lem lo. Ka nui vur vur a, bungrua a rem tha lai chu ka tihpui mai a, min zilh zawm peih ta lo aniang. Madinga min duh pui thu a sawi zui zat. Mawl lutuk! Ka bialpa pawh ni eih si lo a. Ka sawifiah vel peih lo e a.

Thingpui te kan in zawh chuan ka U chuan in la zei fahran in min haw hma tir a, in a rawngbawl ka peih loh tehreng nen. Madinga lahin lenna tur a hriat loh hmel ropui si. Ngawirengin car a khalh a, Zemabawk lam a tlan lo in WB Road lam ah a tlan phei a, tukverh ah dakin ka nunhlui ka ngaihtuah leh ta nge nge. He kawng a tlan apiang hian thil hriatchhuah ka nei ve ziah.

" A hma ami khan ala nghawng reng che tiraw?" ka phu nasa lutuk. Ka ngaihtuahna ka lo kawm nasa leh hman tawh tlat a ni.

" Theihnghilh mai chu a har alawm" ka ti tha ve mai a. Nia, kan group khan an hre vek. Ka rilru kha kha mihring hnen ah khan ka pe thuk chiang alawm. Mahse kan awmna a inhlat a, kum 1 ah vawikhat bak kan inhmu thei lo. A rinawm zo lo kha ka dem ngawih ngawih lo. Mahse midang a nei duh anih chuan min kawp lo khan tha taka min then mai tur ania. Khavang tak khan ka dam thei lo a, ka ngai bawk si a ni ber.

" In la inbia em?"

" Hmanni deuh khan min rawn bia a, mahse inbiak ka duh tawh lo tih ka hrilh a, kan in be ta lo"

" Hma iva sawn ve"

" Hmmmp... Ngeiawm mai e a"

" He he. Ngaihzawng neih leh ila ngam ta chuang lo ami?"

" Ka hlawhtling hlei thei meuh lo chu ala nih hi"

" Engkim a hrethiam tu che hmu ta la i nei duh angem?"

" Hriatthiam reng ngai nih ka duh lo. Ka normal hun ah ka la nei leh mai ang"

" Luhlul lutuk mai. In in lam kan pan nghal dawn nge lungdawh a thut khawmuan i duh em?"
" Haw tlang zawk ila. Ka pa pawhin chaw ei ah a sawm che kha"

" Chaw chu ei rih lovang. Mikhual kan la nei nual a. Nidang ah nangmah ngeiin min la sawm ang chu" a tih chuan hnial ka tum bik lo.

Naktuk tukleh hi kan dawr hawn ni a ni ta. Kan buaiin ngaihtuah tur a tam kher mai. Kan upa ber pawh a hnathawhna atang a rawn thlawk haw dawn bawk a, kan te ber pawh haw hlen turin a hna atang a bang fel ta bawk. Hawnni hian tih pui kan tum hran lova, mahse hemi ni atan bik hian customer zawng zawng tan 50% discount kan pe thung dawn a ni. Keipawh ka buai em avangin ka thiante ho pawh ka kawm hman meuh lo a, Zamtei erawh min pui turin a rawn kal ve reng. Mahse a hma ang in ka pawh tawh lova, ka lakah thup a nei tih ka chiang tawh. Larson pawhin min hrilh a, mahse hria ang a awm ka tum hauh lo. Thian ti a min chhal ve anih chuan min hrilh hre tur ah ka ngai a, mahse engmah ala sawi chuang lo. Tunah chuan amah atang ka rilru hi a hla daih tawh.

Ka pa in min tirh avangin chawhnu lam ah bazar ah thil mamawh lam khawm turin Larson nen kan kal a, Tluanga leh Muana kan hmu bawk. Muana chu ka be chak em em lo. Mahse ka be chhe chuang lo. Kan 4 chuan kan bazar ho a, Larson chuan bazar bag a ak a, kei erawh lal ang maiin an hma ah ka akl leh vah vah tawh. Mipa kawm nawmna chu min duat bik.

Kan bazar zo chu Saron Police Run bul a motor kan dahna lam chu kan pan a, motor a ka lut tur chu ka tim sawk thei. CBR bike rawn tlan phei khalhtu leh a phurh nu inhmeh zia chu. Mahse tinge kei hi ka lo nat ve ngawt? Kan zawn an rawn thlen chuan min rawn hmu a, Madinga chu a ding a, a hmeichhe phurh chuan a kuah fet em em lehnghal.

" Hey, min thlim in inchhuak ho bik a?" nui sang a a rawn tih chuan tah vak mai ka duh. Amah zawk hian keini ho hi min thlim zawk a ni.

" Hey, Bro, min inhmelhriattir dawn lo em ni?" Larson chuan alo ti vat a, ka ngei angreng zawk.
" Tu te emaw restaurant hawn ni ah sawmna ka hmu ve anih chuan chumi hun ah le?" keimah min chhaih fiam tih ka hria. Ka phone hum lai chuan vawm chawrh ka chak tlat pek.

" Sawm nghal in ni e. Kan kal dawn. Ka pa alo bengchheng leh hman palh ang. Lar, hmanhmawh ang" tih pah chuan car-ah chuan ka thu lut nghal hmak. Ka kut khur dar dar chu ka thut bet zui nghal.

" Madinga chu ava lo nei chhelo ve tiraw?" Larson chuan ka rilru hre miah lo chuan a ti ham ham a, ka chhang peih lo. Ka nui ringawt.

Ka mood a fuh thei ta hlek lo. Mahse tinge ka lo thik ve ngawt? Ka bialpa pawh a ni lo a, a duh duh a ngaizawng thiang alawm. Mahse thikna meipui chuan min hliau reng tho si. Tlai chaw pawh ka ei peih lo a, ka thiante zan lo len tum pawh ka nawm loh chhuanlam in ka hnar hmiah. Ka phone ka switch off hmak a, anih loh chuan tuemaw online leh online loh ka check ka hlau. Dar 9 a ri tep tihin ka U chuan min rawn ko a, inleng ka neih thu a sawi chuan mak ka ti viau. Sana ka en a, a hma tawh der si lo. Peih lo zet chuan sitting room lam chu ka pan a, Sofa-a Madinga lo thu ka hmuh chuan ka ding dat a, thawk ka la hak bawk.



CHAPTER -3


 " Tun ang hun ah engenita?" tih pah chuan a hma a sofa-ah chuan ka thu ve nghal a, ka hmui chu a nui na in ka nuih erawh a za hlawl lo.
" Phone i off daih sia, ka leng chhuak ka rawn kawi lawk. I damlo ta emaw kan ti a" nui sang a a tih chuan ka thin a rim ru teuh. Min hmu tur a lo kal vang vang pawh ni lo, a leng a rawn lut kawi mai mai. A lungawithlak tehchiam lo.
" Anih chu. Ka chau deuh a, mut hma ka duh a, ka off rih anih kha" ngaihnobei vak lo chuan ka ti ve mai a, dik tak chuan amah vang hi a ni reng sia.
" Chutichu ka rawn tibuai mai mai zawk che nih chu. Group lam ah an ko nasa che a, lo luhkawi a remchang bawk nen, va mu leh tawh rawh. I dam that chuan a lawmawm a ni mai" tih pah chuan a tho nghal a, ka lung a awi chuang lo. Min ngaihsak ve deuh ni a ka hriatna kha engmah anih loh zia a rawn tilang chiang khawp mai.
" Muttui le" kawngka lam a pan chu ka ti sap a, tawngkam tha pawhin ui beh der ka tum lem lo. Alo kal chhan ni a a sawi ka dam a, a tawk viau a ni.
KKan dawr thar tur ah chuan zingkar ah ka U nen kan phei a, engkim peih fel vek a hun tawh miau a ni. Kan bulb chah nimin lam a lo thleng chu kan vuah dun mawlh mawlh a, thalai te tan deuh a kan tih lam chu a nuam raih raih khawp mai. Family lampang pawh a eng tha a, a zau tha in naupang tan pawh a tawt lem lo khawp ang. Nizan lam thil avang khan ka mood a fuh viau lo a, Larson te ho in min lo puih an tum avangin hlim hmel put ka ngai tih ka hria. Mahse hlim der hi harsa ka ti thin. Fake deuh a nun hi ka thiam viau lo bawk.
" In lo hah tawh em?" Larson chuan a rawn ti lut lung lung a, hepa hi chu engtiklai pawhin a rawl a ring. Tin, mi hlim thei tak a ni bawk.
" Hah lo e. In lo va thleng hma ve" ka lo ti vat a, thutna tur ka kawhhmuh nghal a.
" I nu in in chaw ei tur a daih hman a hlau em alawm" nui huah huah a a tih chuan ka riltam tawh zia ka hrechhuak chiah.
" Yes. U, ei nghal ang. Ka ril a tam tawh. Lar, bel ho kha an rawn dah dawn a. Chuan, sawlam pang ami tur chair ho an rawn keng nghal dawn bawk a, lo rem ru aw... Ka ril a tam tawh" tih pah chuan Larson tiffin rawn ken chu ka thet nghal a. Ka U in nui hawk hawk a min rawn zawm chuan ka lo nuih hui ringawt. Ka ril a tam tawh hi chuan engmah ka ngaihtuah thei ngai lo. Ei teuh phawt a ni tawp. Tin, ka insum thei lo lutuk hi ka thau tulh tulh mai in ka hria.
Tlai lam ah kan in lam ah kan haw ho dial a, ka nu in rawng min lo bawl sak chu tui ti deuhin kan ei bawk. Zamtei pawh tlai lam ah chaw ei turin ka sawm ve a, sawm loh ngawt chu thil mawi a ni hauh lo. Ka awmdan ah engemaw a awm tih a hrethiam ve tawh bawk aniang, a hma ang in min hnaih herh lo. Kan thian dun boruak chu rinaiin a rit ru phian. A tirah khan tha takin sawi se chuan hetiang hian kan awm hauh lovang. Mahse tumahin kan inkar chu an hre hauh lo.
" Te, Madinga hi i be tawh em?" Larson chuan kan thutkhawm thap lai chuan a rawn ti chhuak hlawl a. Ngaihtuah loh tum a ka beih lai takin.
" Be nang. Ngatinge?" ka lo ti let hu pek.
" Naktuk kha chawlh alo la lo ang tih a hlauhawm alawm. Bakah in dawr hawnna hunserh zawh ah an pool-ah khan zuk kal leh ka chak" a tih chuan ka biak ngei a ngai tih ka hria. Mahse ka chak hlawl lo. Lo kal ve lo se ka duh zawk asin le.
Madinga ka biak zawh chuan hunserh nang hman a lo kal a tum thu min hrilh a, kan in be rei lem lo. A chhan chu hmeichhe aw-ri ka hre miau a, a leng anih ka ring. Bakah biak reina chhan tur ka nei lo bawk.
" Bawihte, tho tawh rawh. Ipa chhuak lo let hma a i thawh loh chuan buaina a awm leh hlauh ange" ka nu in min rawn kaihthawh chuan peih lo zet chuan ka tho a. Zing thawh hi ka taimak lohna tak a ni lehnghal. Ka pa min hauh tamna pakhat. Ka hmai ka phih fai a, sana ka en a, dar 8 a ri dawn hnai. Dar 11 kha hunserh anih avangin ka pa lo thlen rualin chhung inkhawm kan hmang a, chaw kan ei zui nghal.
Dawr kan thlen chuan ka thiante ho pawh an lo thleng nual tawh a, tluang takin kan hun pawh kan hmang a. Madinga pawh a rawn nalh kher mai. Mahse kha hmeichhia kha a rawn hruai dawn emaw ka tia, amahin a rawn kal tlat thung. Advertisement eng eng emaw kan lo tih ve nual avangin thalai thenkhat chu an rawn kal ve nghal a, Pathian zar ah hawn tirh ni ah pawh kan hawi hil bik lo hlauh e.
Kan chhungte ho erawh rei an awm lo a, keini thian ho pawh Larson rawtna ang in Madinga te huan lam kan pan thla nghal a, ka chak zawk zawk lo kher asin. Mahse a hmun kan thlen thlak chuan nuam chu ka ti leh tho. A hmun hma hi a nuam em a ni. Tum lawk anih vangin thawmhnaw thlakna an lo keng far a, kei erawh tui ka thiam lem loh avangin ka keng ve lem lo. Pool bul ah chuan thu in an tui cheng chu ka thlir a, savawm ka in chak kher mai. Mahse eng an hria nge ni, vawiin chu in tur lam an keng miah lo. Zu tello pawhin an hlim tawk. Hrehawm ka ti bik lo.
" Ka lo zirtir ve dawn che mi?" ka bul a rawn thut pah chuan Madinga chuan a rawn ti a. Tul miah lo in ka lo tawlh sawn hret thung.
" Aih. Ka ngaina lo"
" Ka zirtir chuan an thiam ngei ngei asin"
" Ka chak lo ni mai rawh se"
" I zia hi a dang ta riau in ka hria. Nge i nuamsam lo zawk?"
" Ka dan pawh ka hre lo. Ka dam tha alawm. A chang chuan hmeichhe cool tak ka ni ve thin tho a" ka ti ta duah a.
" Ni tak. Atea pawh khan cool girl ti in a ko tak che. In inhresa ami?" Atea a rawn sawichhuah chuan ka nui sak a, ka mitthla ah a hmel dam dup kha a rawn lang nghal.
" Hre sa lo e. Khami ni kha a ni mai" ka nui sak a, Vishal Dawr kawt a ka hmuh kha chu sawi a ngai in ka hre hran lo.
" Anih chu. Engemaw i in duh em?" a tih chuan ka phur ru nghal rap. Mahse phur ang a awm chu ka tum hauh lo.
" Tui pangai ka lo duh ang. A vawt a awm thei angem?" ka rilru ni kiah lo sawi mai hi ka ching leh thut thin.
" Ok. Lo nghak lawk rawh" tih pah chuan in lam chu a pan nghal a, hnunglam atang pawh mipa pian nalh tak a ni.
" Min lo hrethiam lawk. Madinga ka rawn zawng a" ti tu hmeichhe aw lo chhuahna lam ka hawi chuan ka down rawih thei. Tunah heta maw? Engvang a rawn zui zel nge a nih?
" Sawlam ah sawn" tih pah chuan in awmna lam chu ka kawk a, lawmthu min hrilh sap pah chuan Madinga awmna lam chu a pan nghal a. Hnunglam atang chuan vawm zui mai ka chak rum rum. A nalh hrep lehnghal a!
Inchhung atang a Madinga leh hmeichhia kha an rawn chhuah dun chuan an rawn nui chhuak dun sang a, an inhmeh em em lehnghal. Thawh lawk a tlanchhiat vang vang ka chak kher mai.
" Tei, ilo ning hman em? Hei ka thiannu Ramtei anih hi. Ramte, hei hi Tei, vawiin a restaurant lian zet hawn thar neitu nu anih hi" Madinga chuan nui sang a a tih chuan Ramtei chuan a kut chu a rawn phar chhuak a, chiabai duh loh ngawt chi ni hek lo. Nui lui nasa zet chuan ka lo nuih let a, a kut lah chu a nem no hrep. Keiang a hna rum thawk thin a ni ve lo tih a hriat kher mai.
" A neitu nu ber chu ka ni miah lo a nia. Chuan, pawi in tih loh chuan sawlam ah sawn ka va phei ve ange" tih pah chuan Larson te ho tui cheng zo nisa a an inpho na lam chu ka kawk zeuh a, min chhan hma chuan rang fahran in ka kalsawn nghal.
Larson te bul ka va thlen chuan hmeichhia chu tunge anih min lo zawt sap sap a, tha deuhin a hming chu ka sawi ve mai a, mahse Madinga bialnu anih thu erawh ka sawichhuak thei lo, ni lo, ka phallo a ni mah zawk. Ka thikzia hre lo in anni lah chuan a chhiatloh thu leh an inhmehzia thu an sawi nak nak a, ka va han chum chak hlawm chiang em! Madinga leh Ramtei chu thingkung hlim hnuai a thutna awm ah chuan an thu dun a, an nuih dun leh thin dan atang chuan an hlim dun viau tih a hriat. A khat tawkin Madinga chu a rawn hawi leh zauh zauh thin a, chuerawh ka hmu lo der tlat thung. Tinge keihi hetia ka awm vak vak le? Ka duh tih chu ka hrethiam tawh. Mahse thikthu lo pe ve ngawt turin a bialnu pawh ka la ni ngai tawp si lova.
" Lar, zanin chu ka pa in kan dawr thar lawm nan cabin 1 hi kan tan a dah a, dinner kan ei ho thei dawn a, inhman hlawm angem?" ka tih chuan an kuk raih hlawm a. Nia, huau hi kan lawm ve em asin.
" Te, keichu anu a damlo a, haw hma ka ngai a, i thinrim lo ang chu tiraw?" Zamtei chuan inthlahrun hmel deuh a a tih chuan ka dar ka san ak a.
" I lak a ka thinrim theih tawh lohna chu hmanni atang khan a intan tawh alawm. I nu chu a dam vat ka duhsak e. Engtinnge i hawn ang?" ka thusawi dan chu min hrechiangtu tan hriatthiam loh chi a ni lo. Zamtei meng khup lap chu ka en a, ka haw lo. Mahse ka khawngaih chuang lo.
" Ka va thlah ange. Keipawh kan section OB inhmuhkhawm a ngai a, dinner chu ka tel ve hman meuh in ka ring lo" Muana'n a rawn tih chuan ka mitko ka san zauh a, ngeiawm zet chuan ka nui hak bawk.
" A pawi hleinem. In tih dan dan. Midang tel thei lo in la awm em? Sawi nghal ila, eitur siam tir dan tur hriat a ngai" ka ti lehnghal puat a. Ngaipawimawh lo zet a ka tawng chu min hrechiangtu Larson chuan ka rilru nat ka thupna a ni tih alo hre kar mai. Ni e, ka na alawm. Mahse rei ka na dawn chuang lo. An thup theih chhung thup se, eng hun ah pawh sawi se buaina ka nei tawh lo.
" Te, kan inbe lawk thei angem?" Zamtei"n inthlahrung dek a a rawn tih chuan ka rilru a buai nak hman.
" Thian ho vek kan ni. Thian ho inkar ah inbiak hran bik a ngaiin ka hre lo. I sawi duh chu ti hian sawi mai rawh" kei lunglian luhlul zet chuan ka lo ti leh hmiah. Anni ang a thil thup tit tet a thian kawm ka peih ve tlat lo a ni.
" Ihhh, englo ania. Muana nen hian...."
" In lo va ti ti tui awm ve. Zanin chu restaurant thar ah dinner ka treat ang cheu ka lo tia. Guys, hei hi ka thiannu Ramtei anih hi. Durtlang Hospital-ah nurse hna a thawk mek a, Ramte, anni ho hi ka thiante, ka nau te an nih hi" Zamtei tawng lai tak chuan Madinga chuan engmah kan boruak hre lo in a rawn ri phei ve mawp a, Zamtei hmel ka va en chu ka nuih a za ru phian zawk.
" Tei pa in kan thianho tan cabin pakhat a dah-awl a, kan lo sawi mek a. Zanin chu a neitu nu in a show dawn anih hmel zawk" Larson chuan zangkhai vah chuan alo chhang a, kan boruak hmasa hup bo hmakin kan ti ti zui leh miah miah hlawm tawh. Ramtei pawh a fel hmel viau mai. Zamtei vang a ka boruak kal fuh chiah lo chuan Ramtei ka thikna chu a pawt hniam deuh hlauh a, a lawmawm letling.
Ala hma deuh avangin Madinga te huan atang chuan chhuak chho in kan roam leh te te a, dar 7 velah chuan kan dawr lam chu kan pan chauh. Dawr kan thlen chuan rinai takin mi an lo awm ve a. Family restaurant lam phei chu hmuh an nuam laih laih khawp mai. Keini erawh cabin no.4 lam kan pan ding nghal a. Ka U chu a buai hmel ve viau nangin pui ta nge ka ti chuang hlei lo. Ani pawhin min phut chuang lo a. Madinga leh Ramtei inkai erawh mak a tih hmel viau. An inkaih dan kha an in kai mah mah bawk a ni. Ti ila Ramtei zawkin Madinga a kai mah mah zawk.
Kan dinner ei pawh kan puar hlawm tlang a ni. Cook tha tak kan lo nei chiang e. Staff te lah an fel bawk a, nuam an tih hlawm ka beisei. Dinner ei zawh chuan keichu ka U nen haw rual turin ka awm khawtlai tur thu ka sawi a. A chhan chu kan dawr hi zan dar 10 thleng kan hawn dawn vang a ni. Zanrei a mahni a haw tir chu ka ngai ngam chiah lo deuh bawk. Ka thian te an haw fel hnu chuan customer tlem an la awm a, keichu ka U bul ah, counter-ah thu in computer ka khawih leh zat zat tawh. Story ziah leh pawh ka chak tawh viau mai. Ka hnathawhna ah hian hunawl ka neih changin story ka ziak ve zauh zauh thin a, nuam pawh ka ti viau thin.
" I haw daih tawh sia" dawr chhung a Madinga rawn lut leh hlawl ka hmuh chuan mak ka ti ngei mai.
" Nia, ka thlah haw ang che u ka tia" tih pah chuan chair awl ah chuan a thu a, angaihna ka hre lo kher mai.
Ka chawlh hman pawh a zo dawn ta der mai. Naktuk chawhnu dar 2:15pm-ah Lengpui atang ka thlawk leh dawn ta der mai. Madinga nen pawh thian ang in kan inkawm zui ta zel a, a chang erawh chuan ka duh tih hi ka lo tilang teuh thin hle a ni.
Tluang takin ka hna pawh ka zawm leh tawh a. Ka chawlh hmang chu thil engemaw chu ka zir chhuak ve nual alawm. Ka pa lahin min zilh hnem malh malh bawk.
" Hey, i dam tha maw?" Larson chuan ka hna bang ka haw lam chu min rawn call a, phone call hian kan inbe khat khawp mai.
" Ka dam alawm. Nang enge i an?"
" Ka tha. News i hria em?"
" Eng news?"
" Zamtei leh Muana an inru daih"
" Oohh... Ka hre lo ang ah ngai rawh" ka thin chu a tawt up up ni ber in ka hria.
" Ka hrethiam che alawm. In dawr hawnni khan i rilru natzia ka hre tawh. Mahse thian chu thian kan ni a, tumah inhuat loh tur" a tih chuan ka nui hak a.
" Thian chu thian kan ni. Tumah ka haw lo. Mahse ka duhtawk viau e. Sawi zawm rih lo teh. Midang an dam em?"
" Ok. Aw, an dam tlang. Tin, Madinga pawh a hna a bansan dawn" ka phu deuh zuk.
" Anih chu. Hman ah khan min hrilh thuak tawh a. Chuan, Lar, a bengchheng reuh tawp. Ka dah rih dawn. Nakin ah in ka thlen ah ka lo bia ang che" ka tih hnu chuan kan in bye bye zui nghal.
In ka thlen chuan ka mu nghal tap a. Mahni a awm hi a khawharthlak ka ti thin. Mahse midang awmpui neih erawh ka peih lem lo. Ka ril a tam lem loh avangin eitur ka siam peih lo va. Haw kawng ah momo ka lei haw a, chu chu ka ei mai ang. Peih lo zet in ka tho a, ka inbual hmasa a, ka inbual zawh ah khua a lum deuh avangin fridge a savawm ka dah vawh chu ka in khalh khalh a, hei hian min vawng dai tlat thin a ni.
Mu chung chuan thil ka ngaihtuah vang vang a, ka phone lo nghawr dar dar ah chuan ka suangtuahna khawvel atang ka harh chhuak chiah. Zamtei call a ni tlat. Peih lo zet chuan ka pick up a, an chanchin min rawn hrilh a, ngaihdam pawh min dil nasa. Mahse thil a pawi tawh hnu a ngaihdam indil hi a tul ka ti hran lo. Tha takin duhsakna ka hlan thu leh nupui tha tak ni tur a ka duh thu ka hrilh a, inngaihdamna lam erawh ka sawi thei rih lo.
" In khua ah ka rawn zin dawn" Madinga msg ka hmuh chuan ka phu nasa mai. Ka chawlh hmang ka let hnu ah thla 3 a liam leh tawh. Group lam a kan inbiak bak kan inbe ngai lem lo.
" Enge ilo tih dawn?"
" Sumdawnna thil ah a nia"
" Nihchu. Ilo thleng dawn nia" enge ka sawi pawh ka ngaihtuah leh pek tawh lo.
" Hotel ka hauh lawk tawh a. Mahse chaw ei ah erawh min sawm aniang chu"
" Thian te kan awm reng a, hotel te lo hauh. Ti ila ka in ve chu nangni thlen nan chuan a nuam lovang"
" Chutiang lam a ni lo. Ka tibuai mai mai zawk che. Mahse nikhat lek chu ka tan chawlh ila ve ang chu"
" Tehreng mai. A changtunu i rawn hruai dawn em?"
" Ka lo call ang che" A msg ka open rual deuhthaw in a phone call a rawn kal nghal zat.
" Ummm, lo zin dawn meuh chuan min rawn hrechhuak ve ta nge nge alawm" nui hak hak chuan ka lo fiam nghal a, ani pawh a nui ri hak tho.
" He he. I induh thei lutuk a, biak che ka inthlahrung thin alawm"
" AAwihawm loh. Ramtei nen in tluang amaw?" ka hriat chak et et avangin chu bawk chu ka sawi ri leh ta.
" Chuzawng ka lo kal hun ah kan la sawi dawn nia. Hna khawih tur ka la nei a, ka mangtha phawt ang che. Naktuk ah ka lo be leh dawn che nia. Muttui phawt" phone a dah leh hmiah tawh. A mizia hi a mak thin ngawt mai.
Khum ah chuan ka mu zangthal ar a, ka savawm in lai ka in zo tawh bawk a, ka hna chu youtube a movie en emaw, suangtuahna ram a chen emaw a ni leh mai. Ka ngaihtuah neuh neuh a, tinge alo kal hun ah kher sawi a tih le? An innei dawn hnai tawh ngei in ka ring. Ka ngaihtuahna chu ka duh hlawl lo. Mahse thil dang ka ngaihtuah thei leh ta hlek lo mai. Ka lu ka beng det a, mang ram a ka chhungte vawksa hmeh lai chil put chung a ka thlir lai hmu tawh lo hram tur a in ngai chung in ka muhil ta a.



CHAPTER -4

 Hna kal tur a ka insiam chu ka peih lo kher mai. Nizan lam ka mu tha vaklo bawk nen, ka lu a rit deuh lak lehnghal a. Khawlum hi chu ka nunphung a khawih buai ve tawk alawm. Kumtluan hian favang leh thlasik ni deuh tawp mai se keichuan ka ti deuh tawh. Shower hnuai ah chuan ding in ka hla duh deuh, Famkimi Kawlni hla, ' Nghilhzai rel ang" tih chu phone-a play in ka zai pui leh nghek nghek tawh. Hmalam ka pan ve tauh tauh lai tak a he hla a rawn thlawh chhuak hi chu ka duh ve em asin. Ka infuihna hla pawh a ni reng a ni.
Vawiin hi Monday a ni. Ka offday a ni bawk. Tin, Madinga lo thlen ni tur a ni bawk. A thlenna tur hotel chu ka awmna atang a hlat deuh hlek avangin ka intifai hma a, Larson nen kan inbe zuaih bawk. Saturday khan Madinga tak chu Mumbai a rawn thleng tawh a, mahse Mumbai-ah Sunday a hmang phawt a, cab hire-in zing ah Nashik a rawn pan a ni. Ka phone ri ral ral chu ka en vat a, Madinga call a ni tawh tlat.
" Hello. Ilo thleng tawh ami?"
" Aw. Hei, Hotel-ah ka check-in zo ka room tur ah ka indah fel chiah"
" A that chu. Ka rawn phei dawn nia. Mahse pawn ah min lo nghak ta che. Mahni a hotel rawn luh ngauh ngauh chu ka hreh ve deuh"
" Aw le"
IBIS Hotel ka thlen phei chuan Madinga chu Hotel kawt ah alo ding vang a, a hma aiin a lang upa deuh nangin a hmel chu a hma ai mahin a hrisel hmel zawk mah. Tin, a khabe hmul chu ala shave hman lo anih ka ring, hmul tlem a to siar siar a, chu chuan a tilang pa daih zawk lehnghal.
" I tuan ava tha ve" nui sang a min lo tih chuan a nui hmel chuan min ti hnim leh ruih tawh. A nui hmel hi chu a tha thlawt a ni. Mipa hmeltha vur ni lo mahse a ngaihnobei ka ti mai. A pa tih hian a sawifiah ber ang.
" Kei hi chu sakhi ang zarh mai mawle" nui hawk hawk a ka tih let chuan a nuih a zat ve hmel tawp.
" Room-ah chho ila, engemaw pawh ka rawn hawn ve che a, chumi zawh ah i in lam ah min hruai ta la, a rem chuan"
" Tehreng mai" ka tih chuan a room lam chu min pan pui nghal a. Hotel nuam ve tawk tak chu a ni. Tin, Nashik-ah chuan Express In leh Gateway Hotel tih loh ah chuan Hotel tha ber pawl a ni. India ram hmun hrang hrang a branch an nei bawk.
Room chhung kan luh chuan boruak chu a dai huai mai. AC double room ala a, a zim lo a, tin, hnathawhna tur hmun a awm tel bawk. Sofa an hun ah chuan ka thu a, mini-fridge an dah atang chuan cold drinks a rawn phawrh a, ka hnial lo kher mai. Khawlum hnuai a cold drinks han in khalh khalh hi chu a nuam alawm. Savawm vawt phei phei.
" Tichuan engtik thleng nge i cham dawn?" ka hma zawn a khum tlang a a thu chu ka en a, a chawn sei thlerh thlawrh, hmul tam lo te chu ka en zauh a, a nalh ka ti lehpek hle.
" Ni 5 cham tur chuan ka in ring a, mahse a aia rei pawh a ni mai thei. AC leh fridge vel hi zawrh tel kan duh deuh a, chumi chungchang chu ania ka lo kal chhan ber. Hmundang pawh a tha chu a awm nual a, mahse ka duh ang inremna kan hmu thei lo a, helam atang hian offer a tha riau a, ka rawn kalchilh deuh rup anih hi" a tih chuan ka lo bu nghauh nghauh a. Mahse hriatthiam loh ka nei. Ani sumdawnna chu sawrkar nen a indawrna a ni mah zawk sia, tunah hetiang lam daih.
" Mahse...."
" I zawhna tur ka hria. Dawr thar keima pual tur ka hawng thar ve dawn alawm. Tuna kan sumdawnna hi chu Mapuia la enkawl chhoh tur ania"alo ti vat a. Mahse tunge Mapuia chu ni ta? Ka bo map mai. Nau pakhat chiah a neih ka hre sia.
" Mapuia chu ka hre ve lo aniang" ka lo ti sap a. A nui hak a.
" Ka Nutei fa a nia. Anu in a boralsan hma a, ka nu leh pa in an enkawl chho a, tunah chuan kan unau zing ami tak tak ang a ni deuh ber mai. Mizoram ah a awm ngai lo a, naktuk atang erawh sumdawnna enkawl thei turin Mizoram lam ah a let ve tawh ang" tih pah chuan a fanta ken chu a in zauh a, a hma in chu chu ka la hre ngai miah lo. Mahse hre tur pawhin kan inhre tha uchuak pawh a ni chuang hlei lo a.
" Anih chu. Mahse fapa dik tak zawk i ni sia" ka lo ti leh hmanhmawh.
" He he. Mi zawng zawng ngaihdan a ni. Mahse ka nu leh pa in kan tleirawl chhuahin kan thawh chak zawng min zawt vek a, keichuan mahni a dinchhuah ka tum a, ka nau erawh chuan sawrkar hnathawh a tum a, a thawk reng bawk a. Mapuia erawh chuan sumdawnna khawih a duh thu a sawi a, kei erawh chuan ka pa sumdawnna ang hi ka tar pui peih ka rin loh thu ka sawi tlang a, Mapuia hian ka pa sumdawnna enkawl turin a zir chhunzawm ta zawk a ni. Keichuan plan dang ka nei a ni" nui var var a a tih chuan mak ka tih zia ka thup thiam lo. Heti khawp a Mizoram ah pawh sumdawng hausa, sawrkar pawhin a a mamawh a lamkhawmna meuh si hi engtinnge a kalsan theih zawk le? Mi anglam tak chu a ni thlawt e.
" A tha alawm. Insiam la, ka in lam ah kan phei dawn mi niang? Zanin chu ka in ah zanriah i ei anga, ka auto hman thin in a dah phei leh thei dawn tho che a" thawh hliai pah chuan tukverh ah chuan ka dak nghal a. Khua chu a sa tih a hriat ngawih ngawih. Lum tih hian a sawifiah zo lo ka tia, a sa ka ti mai.
" Hotel hian car hman theih an nei a, ka book vek tawh tho a. Nakin ah i tello a ka chhuah a ngai dawn sia, auto chan chawp chu a buaithlak dawn riau a" a tih chuan tha ka ti viau. Vairam khaw dang ang in auto te hi zan lam ah phei chuan hmuh tur a vang khawp a. Chhun lam ah pawh tlanna lam hawi an nei deuh fur a, an area lam anih loh chuan auto fare a to duh phian. Tin, hmel danglam hi chu min bum tum tawk an lo awm ve bawk nen. Car hman mai chu a awlsam zawk daih a ni.
" Ngaihdan tha tak a nih chu" tukverh a dak reng chung chuan ka lo ti sap a. ka ngaihtuahna erawh pawnlam a ka hnathawhna a ka boss chuan a luah ta daih thung. Enge hetah an tih ve dawn ka hre lo. Mahse chhun a Hotel vel a inhmuh erwh ka duh lem lo. Ngaihdan diklo tak an neih ka duh lo.
" Ka hman e" Madinga tih ri ah chuan ka phu zawk a, hun han pawh khawtlai deuh duh viau mahila chhuanlam mai tur ka hre lo. Bakah thil sual ti pawh ka ni lo a, ka hlauh viau chhan tur ka hre lo leh hnu hnawh.
Vanneihthlak takin boss te hmu lo chuan Hotel chu kan chhuahsan thei ta hlauh a, a lawmawm hrim hrim e. Car a hire hmang chuan ka in lam kan pan a, ka in kan thlen chuan driver chu zan a hruai leh tur a a chah fel hnu chuan a tlan liam tir nghal. Ka inchhung kan lut chu ka in chu te thar ta riau hian ka hre pek a. Keimah a awm nan kha chuan a tawk tiu teu viau. Inleng ka nei ngai lo a, ka inleng neih vawikhatna a ni bawk. Sofa 2seats pahnih ka neih ve ah chuan a thu a, tui vawt chhawpsak in a thut lohna zawk sofa-ah chuan ka thu ve nghal a, sawi tur mai ka hre lo kher asin.
" A nuam reuh hle mai" a rawn ti chhuak sup a, ka lo nui ringawt.
" Tihian hna kal lai anih loh chuan in ah i awm deuh tawp zel ami?"
" Ni deuh mai. Ka chawlh chang hi chuan ka bazaar ve zauh zauh. Han chhuahna vak tur hi ka hre lo bawk a"
" Hmeichhe tan chuan chhuahtam loh hi a him ber alawm"
" Nia. Enge chawhmeh kan siam ang?"
" Tak a, hei, vawksa rep ka rawn ken che a. Mahse hei chu nangmah a i ei tur" tih pah chuan a thil khai chu min rawn pe a, ka hlim kher mai. A hma in min rawn ken tih a sawi miah lo.
" Wow! A awihawm loh zawk. Siam nghal ang. Mahni a ei ai chuan ei pui neih a ei a tui duh zawk" tih pah chuan vawksa rep chu ka phawrh a, alo keng hnem hrep lehnghal.
Vawksa a thlak tur zikhlum chu ka in thlang chawhmeh zawrehna ah chuan kan zuk lei dun a, salad tur tlem azawng kan lei nghal bawk. Kei ang tho in chawhmeh hmeh duah a thiam bik lo. Kan awlsam dun phian. Ka nu in phuihnam leh khanghu rep min lo thawn chu ka tlak pawlh bawk. Kan rawngbawl dun chu rinaiin nuam kan ti phian. Rawngbawl pahin savawm kan tauh dun a, ani hi zu in lem lo ania, mahse ka hruaisual ve ta hlak chu a nih hi. Can 1 a in zawh meuh chuan amah ang lo takin a tawng duh ve khawp a, ka nuih kar kar reng mai.
Dar 8-ah zanriah kan ei a, kan eikham a kan thutchawlh chuan dar 9 a ri thuak tawh. A car hire lah dar 10:30 a lo lam tur in a hrilh tawh bawk a, tih tur kan nei lo dun hle a ni. Ka laptop neih ve chhun chu on in movie kan en dun a, kan tawng tam lo dun ta khawp mai. ' The longest ride' chu kan en dun a, hmuhnawm ka ti bang thei lo. Ka en tui lai tak chuan a rawn hnar deuh hrak a, a lam ka va hawi chu alo mu tui em em lehnghal. A chau ve khawp ang. A muhil hmel chu ka en reng a, a hmeltha han tih ngawih ngawih tur ni si lovin ava hmeltha si em! He mihring hi ka hmuh apiangin ka duhna a zual zel dawn anih ka ring.
Sana ka en a, dar 10:30 a ri tep. Madinga lah ala muthlu tui ang reng bawk si. A dar ah chuan zawite in ka va sawi a, a rawn che tual tual a, a rawn meng hlawl. Ka lo nuih sang a.
" Ka lo muthlu pek a ni maw? Dar engzatnge?" tih pah chuan a sana bun chu a en zauh a.
" I chau anih ka ring a. I driver pawh a rawn thleng dawn tawh ang" ka lo ti ve vat a. A mu tho te hlei hlei chu a chhelo in ka hria.
Staff lam kan indaih loh deuh avangin chawlh ka la leh mai thei lo a. Madinga nen erawh zan tin kan inhmu. Chaw a rawn ei loh leh kan ei chhuak dun a. A hna pawimawh ah puih theihna ka nei lo nangin a hunawl a a khawhar tur erawh ka hnem ve viau in ka ring.
Thursday zan ah min rawn bia a, ka hna ban ah SOMA WINE FACTORY lam a kal a duh thu leh ka hman leh hman loh min rawn zawt a, ka phur zawng tak a ni. He hmun hi ka ngaina a, mi nazawng an kal lem lo bawk. SULA WINE FACTORY hi a lar zawk a, tlawhtu pawh an ngah. Mahse keichuan SOMA hi ka ngaina zawk. Tlawhtu an tlem zawk a, a chek hnawk vak an awm ngai lo. Tin, a hmun hi a romantic tawp bawk.
Ka hna ban ah chuan ka in kawt ah min lo nghak a, kan ban hma lutuk loh avangin ka in a lut kawi lovin kan tlang nghal a. Kawng ah chuan kan kalna tur hmun nawmzia te chu ka sawi siam siam a, a khat tawkin min lo zawm ve zauh zauh bawk. A hmun kan thlen chuan driver chu a duhzawng lo ei ve mai tur leh a bill chu amahin a pek sak tur thu a sawi chuan driver chuan a ngaihsan hmel kher mai. Restaurant lam kan pan a, mahse thil ei hma in hookah zuk pui ah ka sawm zauh pek. Min hnial ka rin tehreng nen pawi alo ti bik lo va, hookah zukna hmun bik ah chuan kan lut hmasa a, green apple flavor chu kan zu hlat hlat bawk.
" Inrinni hian Mumbai atang ka thlawk haw tawh dawn a" ka hookah zuk lai chu ka hak hman tep. Haw mai tur a ni tih chu ka hria, mahse ka la ui a ni. Zan hun ninawm zet ka tum tawi pui ber a ni rih sia.
" Anih chu. I chak tawh ngawt ang a" sawi mai tur ka haih chham deuh.
" Ka chak vak lo mai thei" a hmel chu a nui nangin zan dang aiin a thutak riau lehnghal.
" Khilam ah nghaktu i nei tha a, i chak viau ang" ka lo ti leh vat a, mahse a ruk tak chuan ka thik viau a ni.
" Kan tawp tawh" teh tawl chuan. Ka en hau a, a hmel chu a thutak ngang mai bawk si.
" Ava pawi ve" ka ti sap a. Pawi ka ti tak tak em ka hre lo. Ka ti lo in ka hria.
" Chaw ei tur in kan chho tawh dawn em ni niang?" a hma a hmel thutak ngang chu bo in hmel zangkhai vah chuan min rawn melh a, a mizia hi ka hrethiam meuh thin lo.
" Pawi hleinem" tih pah chuan ka tho hliai a. Kan hookah zukna man chu a pe a, inchung lam pan in kan chho zui nghal.
Kan chaw ei chhung chuan ti ti dang a vawrh a, Ramtei chungchang a sawi ri leh tawh miah lo. Mahse a bul a awm erawh a nuam sarh tho mai. Kan ei hnem dun bawk a, car lam pan a kan let leh chuan kan speed a zawi dun raih mai. Thla a eng nuam bawk nen, restaurant kawt a phul cham dur mai ah chuan kan kal phei a, helai hmun ka kal chuan ka pheikhawk bun ka phelh ziah thin. Ka pheikhawk phelh a hmun chuan rang zet in a loafers bun lai chu a hlip ve nghal a, a mawza a hlip tel bawk. Phul huh dup chung a ke lawng a kal hi nuam ka ti a ni.
" Ngaihzawng i nei ngam tawh em?" phul chung a kan kal kual lai chuan a rawn ti phut a, ka phu nasa ngei mai. Bakah min zawh dan teh tawp chu a tlang mah mah in ka hria.
" Ka neih tur a zir aniang chu" ka ti ve ta nge nge. Amah hi anih dawn chuan ka nei ngam tawh a, mahse midang erawh ka la ngaihven lo chu a nia.
" Keimah hi ni ta se" ka kal lai chu ka ding dat a, ka nuih a za thut. A zei ve viau a ka rin nen a zei vak lo anih hmel ta. Mahse ka nui chhuak duh lem lo.
" Ngaihzawng then hlim chauh i nih kha" a mit ah tak chuan ka en kal a. A rilru hriat ka duh a ni.
" Ka then chhan chu duh dang ka neih vang a ni. Chu chu nangmah" ka thaw kawk a, ka rilru a buai nak.
" Nakin ah duh dang i neih leh hun ah Ramtei ang bawk in min then veleh anga"
" Chu chu a thleng lovang. Min duh ve tih ka hria" ka duhaiin a tlang mah mah a ni ber mai.
" Engtinnge ka rin ngawt ang che?" inthup ka tum buai peih tawh lo.
" Mipa chuan thil kan sawi duah thiam lo. Mahse a takin i hmu mai ang chu"
Abak sawi leh vak tur a awm tawh lo. Keipawhin ngaihzawng atan ka duh. Alo rinawm lo anih tak leh ka na leh mai aniang chu. Chumi hma in keimah hi ka chak tawk tawh tur a ni thung. In thleng min thlah hnu chuan min let san a, a tuk zan a ka in a chaw lo ei a tum thu a sawi chuan ka hnial hran lo. Hotel a thlen hnu ah min rawn call a, reivaklo kan inbiak hnu in min mangtha a, keipawh ka muhil ve nghal.
Zing ka thawh chuan kan pu ka bia a, chawlh ka dil hmiah. Dawtsawi ka duh lem loh avangin ka bialpa lo zin thu leh naktuk a let tawh dawn avangin lenchhuah kan duh thu ka hrilh a, alo phal ve mai bawk. Ka bialpa ti a ka chhal ta chu ka nuih a za lek lek zawk. Madinga erawh ka chawlh lak ka hrilh duh lem lova, vawiin lam ahhnathawh tur a nei tawh lo tih ka chiang a, mut hahdam a tum thu pawh min hrilh. A room-a va surprise ka duh avangin ka intifai a, engmah ka ei duh rih lo bawk. A chhan Hotel-ah lunch treat ka tum vang a ni. Keiaiin a hausa, mahse mikhual zawk a ni. Chuvangin keimahin tun tum chu show ve ka tum tlat a ni.
A room kawngka chu ka kik karh karh a, tunge ka nih min rawn zawt a, ka aw ti danglam in room service ka ti zauh a, kawngka a rawn hawng chu a meng phawk nasa mai. A thawhna ala rei bik lo tih hriat zetin alo la meng phak viau bawk. Nui var var a a room chhung ka luh chuan tawng nachang a hre mai lo. A beisei loh tawp thil a ni miau a.
" Vawiin chu kan pu in i bialpa va awmpui rawh a ti teh tlat a" ka tih chuan a rawn nui chhuak hawk hawk a. Thawveng zet chuan a khum ah chuan ka let thla tap a, a delhna pawh ala lum vang vang mai.
" In pu chu a biang ah fawh sak tlak anih chu" tih pah chuan ka bul ah chuan a rawn mu ve nghal a. Min in ti ta tu zet in min rawn kuah nghal bawk.
" Ka va fawhsak lawk dawn ami?" tih pah chuan thawh ka tum der a, min kuah nghet zual sauh. Ka nui ar ar bawk. Boruak ka ngam hmel in ti em? Ka zaklo lui anih hi. Tin, zak tet tet rual ka ni tawh lo bawk a.
" Tichuan min awm nileng dawn tihna maw?" awih chiah lo deuh chuan min zawt a, a lam hawiin ka nui seih a.
" Vawiin chu bialpa thar neih lawm nan chawlh ka dil a" ka tih chuan a nui nasa mai.
Khum ah chuan kan pahnih chuan mu in ka ti ti a, kan hmalam hun pawh kan sawidun chiang e. Mahse inneih lam a ni hauh lo a nia. Ka hlauhthawnna a hria a, hlauthawng lo turin min hrilh a. Tin, keipawhin midang duh a nei anih chuan tlang tak a min hrilh mai tur in ka ti bawk. Chu erawh a nui tawi tak mai.
" Kan intleuh ve lawk anga, eitur lo chah ta che aw" tih pah chuan a inbeng kang a, ka chal ah a rawn fawp zauh a, a nuam veng veng.
" Inhnuai ah ei ila, vawiin chu keimahin ka treat dawn che. Duh loh awih loh" tawng tum a a ka a ang zuau lai chu a hmui ka hup sak hmak bawk.
" Ok, a tha alawm. Mahse hetah kan ei thei mai lo em ni?" thatchhe zet a min melh chung chuan a ti sup a, ava sexy chiang tak.
" Aih. Chhuak tur in insiam nghal la. Bazar pah ang. Chuan, thian te ho thil tur ka thawn ve duh che" ka tih chuan a hnial lem lo.
" Anih chuan ka va inbualo ange" tih pah chuan a ding nghal a, a hnung lam atang a va pawm ka chak kher mai. Ka zaktheilo in ti em? Ka chak ve miau sia. I mipa duh ve deuh nen inngaizawng ula inpawm ve vawng vawng chu inthlahlel ve tho ang.
A inbual zawh chuan T-shirt var a ha a, jeans dumpawl leh sneakers var a bun a, a inhmeh kher mai. A ngo lo nangin T-shirt var hi a inhmeh ka ti ve thlawt. An lo len hmasak ber zan pawh khan a ha tawh a ni. Inhnuai ah kan inhnawh puar hnu in City Center Mall lam kan pan nghal a. Tun tum chu Auto-a kal ka rawt tlat avangin car a ko lo bawk. Mall-ah chuan thian te ho thil tur kan lei nual a. Zamtei lak a ka lungawi lohna pawh a hre vek tawh a, mahse inneih present engemaw lei tur in min ti tlat thung. Engmah leisak ka tum lo kha ania, mahse Madinga berin lei tur a min tih tlat avang chuan Zamtei mimal thil tur ka leisak ta nge nge.
Mall atang a kan chhuak chiah chu ka phone a rawn nghawr dar dar a, ka phone chu ka bag atang a phawrh a kan en chuan Larson hnen atang a ni.
" Hello, Eka, in thil tur ka lei vek tawh" kan ti nghal tawng pek a.
Mahse Larson thu rawn sawi chuan ka nui sang lai chu a ti tawp nghal vek thei. Ka kut atang Madinga chuan phone a rawn phihthla vat a, engtinnge an inbiak zui tak ka hre lo. Ka awmna chu a reh duk ni ber in ka hria. Ka awih thei thlawt lo. Dawt a nI.



CHAPTER -5

 Madinga chuan min rawn sawi nawk nawk a, ka chhaw chhuih a ni ber mai. Ka ngaihtuahna mang vek chu zawi zawi in a rawn pangai tial tial a, mahse ka thu hriat chuan min la thawng hle a ni. Zamtei chu a damchhuak leh thei angem?
" Tei, i rilru ti paukhauh hram hram la. A tha leh mai ang" Madinga chuan ka dar ah a kuah a, Mall kawt ah chuan min thut pui a. Mahse ka rilru a dam lo. Damchhuak leh thei tawh lo ta se damchhungin ka inchhir angem?
" A dam chhuah ngei ngei a ngai. Ka ngaidam a ni tih ka hrilh tur a ni" ka mittui lo luang chu hrukfai ka tum lo.
" A dam chhuak leh dawn alawm. Haw phawt ila, in ah hahdam deuhin i awm phawt dawn nia" a tih chuan ka bu nghauh a, auto chu ko in ka in lam chu kan pan nghal.
In kan thlen chuan sofa-ah chuan ka thu hnawk a, ka ngaihtuahna a buai nuaih nuaih a ni ber mai. Kan thian dun a hun kan lo hman tawh ka chhui kir a, tinge kha thil pakhat vang ringawt khan ka ngaihdam theih loh? Ka tan kha leh chen a rinawm tawh a, ka tan a awm thin bawk. Kha thil pakhat lek vang khan tinge ka thinrim em em. A thil lo tih that tawh lam aia a tihsual zeuh pakhat lek kha tinge ka lo hmuh len em em ni.
" Tun ah an zai mek a, Doctor chuan a damchhuah a ring a, mahse a ke erawh tan a ngaih hmel a tia" Madinga phone hmang zo chuan a rawn ti a, ka lo tim sawk thei.
" Ka haw a ngai in ka hria" Ni e, ka haw ngei tur a ni. Ka ngaihzawng te ai pawh a ka dah pawimawh thin ka thiannu chu natna khum ah a awm mek a, na satliah a ni lo. A ke hial tan ngaiin a awm a, min mamawh ang tih ka hria. A tul anih chuan ka hna ka bansan mai tur a ni. Eizawnna bul kan tan ve tawh tho bawk a.
" I nu leh pa be phawt la" Madinga'n a tih chuan ka phone ka la nghal a, ka pa ka han biak chuan ka pa chuan haw alo remti nghal a. A tul anih chuan ka hna chu kalsan mai turin min hrilh nghal bawk. Ka thiannu hi ka dah pawimawh zia chu ka chhungte hian an hrechiang a, ka duhdan chu an hnial hauh in ka ring lo reng a ni.
Madinga nen chuan flight ticket kan en nghal a, chutihrual chuan kan pu bia in ka haw a ngaih thu leh ka let leh dawn leh dawn loh ka chian theih loh thu te, emergency thil anih avang a hrilhlawkna hun ka neih loh thu te, ka haw chhan tur dik tak ka hrilh chuan min ui der viau mahse chelh luih chi ka ni lo tih a hrethiam. Keipawhin an buai phah dan tur zia ka hre bawk. Ka khawngaih em em bawk. Mahse ka thinlung hian ka thiannu hnen a ka kal a ngaih zia min hrilh miau a, chu chu tihhlawhtlin ngei ka tum tlat a ni.
Kan pu nen chuan rem kan ruat dun a, ka haw phawt anga, ka aiawh tur ka zawn sak dawn a ni. Keichu ka let leh mai thei dawn lo tih ka chiang. Ka thiannu hi thla 1 chhung lek in a rilru leh taksa a dam hman dawn lo tih ka chiang. Pathian leh a chhungte tih loh ah chuan keihi ka pawimawh tih ka hria. Chuvangin ka theihtawp chhuahsak ka tum nghet hmiah a ni. Vanneihthlak takin Madinga haw na tur flight-ah ticket ka chang ve hlauh a, a to erawh a to tha talh talh. Mahse chulam ai chuan ka haw thei tur chu a pawimawh zawk.
Madinga pawh a tum dan thulhin naktuk a Mumbai pan lovin Sunday zan ah Mumbai kan pan dun anga, Airport-ah tlang nghal in Monday zing ah Aizawl pan in kan thlawk dawn a ni. Naktuk leh Sunday-ah chuan ka inluah leh bungrua te kan tifel anga, Madnga pawh Hotel atang ka in lam ah a rawn insawn lut rih dawn a ni. Pathian remruat hi a mak thin asin, ka in luah leh bungrua vel tihral nan hun kan neih tlem zia hria in Pathian in Mizo tho, mipa, Nashik a lehkha rawn zir tur, inluah tur zawng mek chu facebook-ah ka hmu ta nawlh mai. Rangzetin ka va be nghal a, phone number te in pe in a tuk lam a inhmu tur in kan intiam zui nghal. Tunah chuan hah a dam ta deuh.
Zamtei chu a khup hnuai deuh atang a ke chu an tan sak a, kha motor khalh tu kha hmuh a a fimkhur loh vang a ka thiannu in a ke a chan hi ka thinrim zia fah hrep ka chak tak zet a ni. Muana hlei hlei a lainatawm. Larson nen kan in be reng a, Muana chu a rilru a buai thu leh a thiante pawh a hriat loh thu a rawn sawi chuan ka lainat ngei mai. Madinga chuan ei rawng a bawl a, kei erawh phone ka hmang char char a ni ber mai. Ka chhungte nen kan in be bawk a, Zamtei chhungte ka be bawk a, Larson nen chanchin kan inhrilh char char bawk.
" Chaw ei hma in ka bungrua kan va la chhuak mai dawn mi niang?" Madinga'n a tih chuan ka tho vat a, ka inohihfai sawk sawk a, ka hmai chu tlem ka chei leh hram. Ka tahna lam ah ka hnar a sen hman vek a, ka mit a bui vek bawk.
Madinga bungrua te kan va lakchhuah hnu chuan ka in ah kan awm dun ran a, inngaihzawn lam pawh a lang ta meuh lo. Kan boruak chuan min uap tlat a, ka hlim der thiam ngang lo. Mahse a fel hlauh a, min tih nuih dan te te chu a hre ve phian. Chaw te kan eikham hnu chuan movie en a rawt tlat a, ka chak lo tih pawh a hria, mahse ka rilru lak pen tir a tum tlat a ni. Movie en hma in a mutna tur ka phah sak a, a mutna ka phah ah chuan bawkkhup chungin laptop chu kan hmachhawn dun ran a, ka mut chiah chuan ka taksa chauh hman zia ka hre chiah.
Kan movie en lai chu engtiklaiin nge ka mutthilhsan ka hre lo. Ka harh leh meuh chuan ka khum ah ka lo mu tawh a, puan pawh ka sin tha vek. Madinga khan min lo sawn a ni ngei ang. Sana ka en vat a, zinglam dar 6 a ri tep tawh. Ka mutna bul tukverh puanzar chu ka keu a, kawl pawh a eng tan lek lek tawh. Ka zun a chhuah avangin ka tho a, Madinga mutna ka va en chuan alo awm hauh lo. A mutbu pawh a inthlep thlap a, ka ngaih a tha lo ngei mai. Rangzetin ka hawi kual a, a hmel hmuh tur a awm bawk si lo. Hlauhthawnna hian ka thau ah min man a ni ber mai. Ka room lam ah ka tlan let vat a, ka phone chu la in Madinga number chu ka dial nghal a, a pick up thei der lo lehnghal. Ka kawchhung chu a so bulh bulh a ni ber mai. Ka taksa chu a khur nasa lutuk. Khawnge a awm tak ang?
Mangang tak a ka phone nawn leh ah chuan a rawn pick up ta hram a, a hah hmel em em lehnghal.
" Khawnge i awm?" ka tap pur tawh. Ka insum hman lo. Zamtei boruak nen, hlauhthawnna in ka khat tlat a ni.
" Ooohh... Exer la in ka chhuak a, ilo harh hman ka ring lo asin" inthiam loh hmel zet a a rawn tih chuan ka thaw huai mai.
" Anih chu. Min ti hlauthawng hman lutuk alawm" tap tiau chung chuan ka lo ti vat a, a nui hak a.
" Ka tihpalh lutuk. Ka rawn thleng nghal" a tih zawh rual deuh thaw chuan kawngka a rawn ri rak a, a rawn lut zui ve nghal. Ka insum hman lo, alam pan chuan chak zetin ka tlan phei a, ka va pawm chawt ringawt. Duat deuh a min lo kuah let ah chuan ka lung a chhe thar leh a, ka inhnit hlap hlap.
" Ka tihpalh lutuk. Ala hma deuh sia, ka kaitho duh lo che alawm. I chau bawk sia. Va mu leh rawh. Ei rawng ka lo bawl ang" a tih chuan ka lu ka thing mat mat a.
" Ka mut a chhuak tawh lo. Lo va inbual la, i inbual zawh ah keipawh ka rawn inbual ang" tih pah chuan ka tawlhsawn hrat a, min kuahna erawh ala thlah chuang lo.
" Inbual rual ila" nui vur vur a a tih chuan rangzetin ka en a, a hmel ah a uang tih ka hriat chuan a awm ah ka chum taih a, zo deuh a min pawm kangin min vir pui a, inchhai hma ve tak chu kan ni.
Madinga inbual zawh chuan ka inbual ve nghal a,ni chhuah hma a inbual hi tih peih chuan nilengin kan mood a fuh duh in ka hria. Ka inbual zawh chuan Madinga chuan rawng alo bawl malh malh a, amah en in rawngbawl a inhmeh viau lo. Mahse a chet vel dan chu a zei thlap bawk sia. Hnunglam atang chuan ka en reng a, vannei ka in ti. Kei, fanu fel tak ni lem lo hian hetiang mipa ka han tawng hi chu ka vannei em asin.
" Hnunglam atang a min en reng lo khan ka hma ah lo ding la, rawngbawl a nuam sawt dawn alawm" lo hawilet miah lo a a tih chuan ka phu nasa lutuk. Engtinnge ka en reng tih a hriat thei zawk ni?
" I hnung kha nau puak nan a tha dawn em tih ka lo endik alawm" zah zel ah chuan ka lo ti ve vat a, rawn inher in a nui hawk hawk a. Mipa nui uarh uarh thin hi ngaihzawng atan ka duh miah lo. Thian atan erawh chuan ak duh viau tho si. Madinga erawh a nui uarh uarh ngai lo. Mahse a nui ri hi a ngaihnawm ka tia, a nui hmel hi a sexy ka ti bawk.
" Naute nei tur in i inpeih der tawh ami?" mit ko san ak a a tih chuan ka hamhaih lutuk chu ka en haw a.
" Chutiang ka sawi reng reng lo" hmai sen tan a ka tih chuan a nui ka hriat tawh ah chuan a nuih nasat ber anih ka ring.
" Anih chuan i kawr hak kha va thlak rawh. Exer la zo chiah ka nih hi" a tih chuan ka kawr chu ka melh zauh a, ka awm chu ka ban chuan ka hliah nghal vat. Mahni a awm thang tih tak ah ka lo in ha bul deuh mah mah a ni.
Rang zetin ka room ah chuan ka lut a, a nui zui hak hak ri chuan min ti zak zual. Ka kawr chu phelhin t-shirt pangai ka ha a, kawrhnuai erawh ka ha peih chuan hlei lo. Kawrhnuai hak hi ka thatchhe lutuk a, ka nu hian min hau zing tawh khawp mai. Ka sim thei lo chu anih ber hi. Choka lam a ka va luh leh chuan Madinga chuan phone alo hmang mawlh mawlh a, an inbiak dan atang Mumbai lam a a thiante a bia a nih hmel. a tum dan a thlak chhan te, kan haw dan tur te chu a hrilh a, ka inthlahrung reuh khawp mai. Mahse tihngaihna vak a awm si lo a.
Zing chaw ei hma in Zamtei chhungte ka han bia a, ala harh chhuah loh thu leh an zai hlawhtlin thu te, ngaihtuah lutuk lo tur te chuan min ti nangin a nu erawh chuan ka haw tur thu ka hrilh chuan a lawmthu a sawi tawp. Nia, kan chhungte hian kan inkawmngeihzia an hria, ka hna bansan in ka haw dawn tih erawh ka sawi duh lem lo. A chhan chu a nu a inthlahrung leh dawn lutuk a, ka haw hun ah an la hre chawp ve mai ang.
Chaw kan eikham chuan Mizo tlangval zirlai chu ka bia a, dar 11-ah kan inbul circle a kan lo nghah tur thu ka hrilh hnu chuan phone dah in in chu ka tifel sawk sawk a. Madinga'n a theih ang ang in min lo pui bawk. Tih tur em em a awm lo a, kan tifel zo thuai a, kan insilfai hnu chuan kan mi hmuh tur chu hmuak turin circle lam chu kan pan thla nghal. Rei pawh kan awm hma in ani pawh chu a rawn thleng ve nghal a. Tetea anih thu leh hostel-a ala awm thu te, inluah tur a hmuh mai loh avang a a buai zia thu te chu a sawi ve nghal mawlh mawlh a, tlangval fel tak anih ka ring.
Ka in a kan luh chuan nawm hmel a tih thu te a sawi ve luam a, ka luahna zat te ka sawi a, landlord ka biak pui tur thu leh deposit chu ka la let lo anga, ani in ka kut ah min pek mai tur thu te kan sawi a. Mahse landlord hnen ah erawh ka nau ang a ka sawi tur thu ka hrilh chuan kan nui dar dar. Ka haw chhan tur te min zawt a, ka sawi chuan Zamtei chu alo hre ve viau a ni awm a. Whatsapp group pakhat a an awm ho thu leh hmeichhe fel tak ni a a hriat thu te, a vanduaina tawh chungchang a a khawngaihzia te a sawi luam a. Chutia thian in ang nei ta chu kan innel phah sawt lehnghal. Madinga lah alo hre nasa mai bawk. A awm tho e, Mizoram a sumdawng lian ber te zing ami kha an ni miau a.
Chawhnu lam ah lunch ei zawh chuan landlord kan va hmu a, pa fel tak hi a ni rauh a. Ka nau anih thu leh lehkhazir a a rawn awm tur thu te, kei erawh chhungkaw thil avang a haw ka ngaih thu te, Tetea hming a engkim kal tawh mai tur a ka duhthu te ka sawi chuan pawi a ti lem lo a. Inkuahman erawh Rs.500 in a san ta talh tho a. Chu erawh Tetea pawhin pawi a ti lem lo. A chhan chu ka in luah hi a nuam a, tui a awlsam a, thenawm te an fel bawk. Tin, kan building hi family pangai hlir awmkhawm an nia, buaina neuh neuh engmah a awm ngai lo.
Landlord kan hmuh zawh chuan Tetea chu zanriah kil ve nghal tur leh naktuk lam a kan inthiar luh pui tur thu ka sawi chuan a hnial lem lo a, mipa tawngduh leh fel tak ni in ka hria. Tin, a mizia a smart em em bawk. Ka inluah kan thlen meuh chuan khua a tlai tawh angreng a. Vawksa rep siam loh tlem la awm chu zikhlum nen ka chhum nghal a, mipa 2 erawh thutkhawmna ah an ti ti thung. Ka choka chu ka thlir kual a, ka lung a leng dawn khawp mai. Kum tam fe ka lo chettlat tawhna hmun, ka khawhar a ka tahna, ka hlim a ka nuihna, ka chauh chang a ka chawlh hahdamna hmun ni thin kha ka kalsan hlen dawn ta chu a nia. Engtikahmah he in ah hian ka let tawh awm si lova.
Chaw ei lai chuan Tetea chu ka bungrua ho chu ka hnutchhiah tur thu ka hrilh chuan a lawm khawp a, mahse cooler erawh a man chanve a lei a tum tlat thung. Pek tel ka tum thu ka hrilh pawhin a duh tlat lo. A chhungte a han bia a, in chungchang a han hrilh chuan an lawm ve hmel khawp mai. Pawisa pawh ka account-a an lo thun tur thu leh ka accoun no thawn mai tur a an tih chuan ka account no chu ka pe a, a han thawn ve nghal a. Engkim mai a kal fel ang duak duak a. Ka lung erawh a leng lawk.
Tetea haw hnu chuan Madinga nen chuan kan ti ti a, ka feeling a hrethiam khawp mai. Zamtei chu zan dar 11 vel aha harh thu an rawn sawi a, mahse a ke an tan thu erawh ala hre lo. A harh tih hian harh chiang nghal ni lo in tui a rawn lam a, tui an pe a, an chiu mu lehnghal a ni awm e. A harhchhuak hrim hrim pawh chu a lawmawm tawh hrim hrim. Larson ka han be vat a, damdawiin ah alo riak ve a, Muana pawh a zia ve hret hret thu te a rawn sawi a. Ka haw tur a thlamuan zia a sawi chuan keihian pawimawhna ka lo nei ve tak tak anih hi tih ka hrechhuak chiah. Engmah han tih theih ka nei lo, mahse ka thiante leh Zamtei chhungten ka haw tur an lawm zia an sawi atang ka lo nep bik lo, hlutna ka lo nei ve tih a chiang. Mahse ka haw chhan tur erawh hi chuan ka lung a ti awi hlawl lo.
Mut hma chuan ka bungrua kan pack fel a, KK Travels-ah Mumbai Airport panna tur cab kan book bawk a, haw duh viau e ti lo chuan ka huphurh tlat pek. Inchhung chu ka en kual a, hunrei tak mahni a ka lo chen ve tawhna chu ka ngai veng veng nghal. Madinga mutthilh tawh hnu pawh chuan ka muhil mai thei lo a, khawhar tak te hian ka khua a har tlat pek anih chu. Ka inngaihtuah veng veng laiin ka lo muhil ve sek a, ka harh chuan choka lam a rim rawn lut chuan ril a ti tam kher mai. Madinga che rak rak thawm chu ka ngaithla a, tihian nupa han ni tawh mai ila a nuam awm reuh. Sana ka en a, dar 9 alo ri tep tawh. Rangzetin ka tho a, ka inthiam lo kher mai.
" Good morning" chawhmeh kan lo chawh suah suah pah chuan choka ka va lut chu nuisang in min lo wish a, zing tin hetiang hi ni thei mai se a nuam awm amnge.
" Morning. Ka lo mutui lutuk a. Khilam atang phone call i dawng tawh em?" ka tih zawm zat a, ka inthiam chiah lo, ka thawh tlai avangin.
" Zingah khan Nu Liani ka han bia a, nizan chu an mu tha a, zinglam ah a rawn harh a, na a rawn tia, mahse an chiu mu leh rih a ni awm e" a tih chuan ka nghilh dup thei. Ka thiannu chuan a ke a bul a ni tih a hriat hun ah ava tuar na dawn em! Ka ngaihtuah ringawt pawh hian ka lo na ngawih ngawih.
" Pathian in awmpui mawlh rawh se" thawk hak pah chuan ka ti sap a, intifai tur in bathroom ka lut zui nghal.
Tetea chu dar 11 vel ah a bungrua nen a rawn thleng phei a, bungrua a ngah lem lo a, Auto lian chi a rawn hmang phei a, a rawn inkengkim nghal bawk. Eng tehvak mah hawn tur ka nei lem lo a, ka thawmhnaw a tam lutuk lo bawk a, bungrua ni se ka hnutchhiah vek dawn bawk. Ka bed cover vel erawh ka leina ala rei loh bak ah a nu deuh bawk nen, ka hawn tel thung dawn a, rizai erawh ka pe nghal thung. A lawm thiam em em lehnghal a. Mi thil tihsak a lawm thiam deuh te hi chu tihsak man an awm bik ngawih ngawih. Zanriah erawh kan ei ho leh dawn a, chawhnu lam ah class kal a ngaih avangin a intifai sawk sawk a, min kalsan thung. Madinga nen kan chhuak zawk a, haw tak ah chuan ti in chhungte hawn tur neuh neuh kan lei a. Ka hnathawhna ah kalin ka thawhpui te ka mangtha a, ka kalchhun ka hlawh pawh kan pu ka account-ah a rawn thun fel thlap bawk. Vairam ka kal tirh atang a ka thawh tawp thleng a ka thawhna awmchhun ka hnathawhna hmun pawh hi ka ngai khawp ang le.
In kan thlen chuan Tetea alo haw tawh a, rawng alo bawl tan der tawh. A hmeichhia ber hian mipa an awm chuan ka bawl ve hman meuh lo chu anih hi. Ka inbual fai a, ka luggage ka check a, ka inkhung kim tawh bawk a, Tetea rawngbawl chu Madinga inbual hlan in ka lo pui bawk. Zan dar 9-ah min rawn lam dawn avangin hun kan ngah vak tawh lo. Tetea chuan Zamtei kan nan Rs.2000 lai min thawn bawk a, fel ka ti khawp mai. Hmel la inhmu lo mahse thian tak tak ang ah a ngai ve tih a hriat a, ka hnuk a ulh zawk.
Chaw eikham chuan dar 9 a ri dawn der a, Tetea chhungte pawhin ka pawisa tur an rawn thun fel thlap bawk. Tin, a nu thil tur min thawn ve bawk a, chhungkua kan inchhar thar a ni ringawt. Mi puitling tak chhungkua an nih ka ring. An fapa fel dan ah an chhungkaw hlimthla a lang thuak alawm. Kan chuanna tur cab alo thlen chuan Tetea chu bye bye-in kan tum ram hnaih zel tur chuan Nashik chu kan chhuahsan tan ta. Madinga awm ngheng rialin ka thu a, nidang a ka haw tur nen chuan a danglam vel vek a ni. Min hmuak tu a danglam ang bawkin ka bul a thu pawh a danglam ta. Vai bul ah ka thu ta lo e. Ka pa te ka bia a, kan chanchin ka hrilh a, tluang tak a kal tur a duhsakna min hlan pahin an lo tawngti tur thu leh chanchin sawi zauh zauh tur a min tih hnu chuan phone kan dah thei hram. Zinchhuak a kan kal chhuah hi chuan kan chhungkua hi kan inngaihtuah zual thin. Motor chuan hi kan huai hawrh lo a, ka huai ber. Ka zin tam ber miau a.
Mumbai airport-ah darkar 4 zet kan thut hnu chuan Kolkata lam pan in kan thlawk ta vung vung mai le. Madinga bul a thu hnen ah inthut thleng kan dil a, nutling fel tak alo ni hlauh a, kan thu dun thei hlauh. Kolkata kan thlen in Larson ka bia a, 12:30 vel a kan thlen tur thu ka hrilh chuan Lengpui ah min lo hmuah an tum a, ka pa te bia in min lo hmuak lo mai tur leh damdawiin lam a ka tlang tur thu ka hrilh a, pawi an ti lem lo.
Lengpui kan thlen chuan Larson leh kan thian dangte chuan min lo hmuak thap a, tumah hlim hmel pu an awm lo. Nia, kan inhmuhkhawwm dan hi a hlimawm hauh lo. Madinga pawh a chhungte lo hmuak lo tur a a hrilh avangin Larson car-ah chuan kan chuang a, midang erawh bike an rawn keng hlawm a, kan in chhawm chho tham tham a, nidang ang chu ni se kan in au kuk ruih ruih in a nia ka rin. Mahse vawiin chu a dan a dang thlawt a ni.
" Lar, sawi tur ka nei a" ka tih chuan Larson chuan min en a, sawi rawh ti ni awm takin a lu a thle buk a.
" Tei nen hian kan inngaizawng a" ka sawi hma chuan Madinga chuan a rawn ti khauh a. Ka sawi tum tak anih loh avangin ka phu zawk nghe nghe.
" wOW! Thu lawmawm tak a nih chu. Hun dang ni se lawm a chakawm vei nen" Larson chuan car darthlalang atang chuan min rawn nuih sang a, min lawmpui ang tih ka ring. Mahse a hun hi a fuh hlawl lo a ni.
" A pawi lo. Lawm kher a ngai hleinem. Chuan, ka hna ka bansan a" ka tih chuan Larson chuan car chu kawngsir rem lai ah a din tir a, midang ho pawh chu an rawn dingkhawm ve nghal a. Car atang chhuak in kan ding khawm a.
" I uang em ni?" Larson chuan a ti nghat a, mak a tih hmel em em bawk.
" Aih, ka uang lo. Zamtei hi ka hua emaw in ti mai thei. Ka lungawilohna kha chu ka lungawi lo a ni mai. Mahse ka thiannu a ni a, thian satliah a ni lo. Thian satliah ni se ka hna ka kalsan phah lovang. Tichuan a chiang em?" ka tih chuan Tluanga chuan min rawn kuah a, mipa mittui a tla ta anih chu. Mipa meuh pawh an mittui a tlak chuan kei mittui tlak hlau a insum tang tang chu a tla lo thei bik lo.
" Ka lawm e" Larson chuan Tluanga min kuahna chu min rawn kuah chilh veleh nghal a, insum lek lo in kan tah tak ngheng kha.
" Aw le, kal leh tawh ila. Zamtei hmuh vat kan ngai a ni" Madinga'n a rawn tih chuan kan inthlah hlawm a, mittui hru hul sap sap in Zamtei awmna Civil Hospital lam pan chuan kan tlan leh ta vang vang.
Civil Hospital Cabin kawt ah chuan kan ding thap a, Zamtei nau in min rawn hmuh chuan a rawn tlan vat a, tap par in min nghahhleh zia thu a sawi chuan ka lo kuah vat a, ka mittui chu tla lo turin ka insum nasa hle. Ka nu leh pa pawh an lo awm ve ran a, mahse tunah chuan anni buaipui hmasa hman ka ni lo tih an hrethiam. Ka pa chuan a lu alo bu nghauh a, ka nu chu ka nuih seih a, Cabin kawngka chu ka pen lut nghal.
Khum a Zamtei lo mu ka hmuh chuan ka khawngaih kher mai. A bul ah Muana chu khum bawhin alo mu nghiai bawk a, min va run dun tehreng em! Zamtei nu in min hmuh chuan a thutna atang alo tho vat a, min rawn kuah a, a tap tur insum chu a taksa a khur ngat ngat a, ka va lainat tehreng em! Apa erawh in tha takin min lo dawng sawng a, mipa nge nge.
Ngawireng chuan Muana thut lohna lam ah chuan ka thu a, Zamtei engmah hre lo a muhil sak sak chu a kut ka vawn sak a, a dang bei bawk si. A kut rawn che hret chu ka hria a, a lu a rawn chet leh bawk. Muangchangin a rawn meng a, anu chuan Doctor ko turin a tlanchhuak nghal a, min hmu chu mak ti leh hlauh hmel zet in min en a, hrehawm ka va ti tehreng em! Engvangin nge min hlau tur khawp a alak a ka lungawi lohna ka lo tih lan le? Ka bul ah chuan Madinga a rawn thu vat a, ka rilru hrethiam ni awm takin ka kawng ah min rawn kuah a, Zamtei lahin a meng vai zui lehnghal mai bawk. A mit a chhing leh tur chiah chu ka hming a lam sap a, ka insum hman lo. Ka tap hawk ringawt.
Doctor rawn tlan lut chuan a endik vat a, a awmdan an lo hrilh nghal a, chuta doctor thusawi chuan min ti hah hluah hluah nghal.



CHAPTER -6

  Ka thiannu chu tun atang a darkar 3 a liam chuan a rawn harh chhuah pangai tawh tur thu leh chumi hun ah chuan a ke hi tan a ni tih hrilh anih tawh tur thu Doctor-in a sawi chuan ka ipik vek a ni ber mai. A harhchhuah theih loh hlau em em si khan a harhchhuah kan huphurh leh em em lawi si.
" Alo harhchhuah hma in ka va inthlak fel phawt anga, ka rawn let leh dawn nia" Nu Liani hnen a ka tih chuan a lu a bu nghauh a, ka kalsan rei a hlau tih ka hrethiam.
Madinga chu an in ah Larson nen kan thlah hmasa a, tumah tawng tur kan awm lo a ni ber. Kan rilru erawh hmun khat ah a awm thung tih kan ngawih rengna chuan a hrilhfiah chiang em em thung. Kan in kan thlen chuan ka nu leh pa chuan min lo thlen khalh a. Damdawiin ah khan inbiakna hun a awm loh avangin kan la in be miah lo. Larson chu min lo nghak tur in ka ngen a, ka nu leh pa ka biak zawh chuan ka room-ah kal in inthlakna tur ka tifel nghal a, muangchang hman ka ni lo tih ka hria. Traffic tawt zet kar a tlan chhung a rei lutuk tlat a ni.
Ka inbual zawh chuan ka nu in eitur engemaw alo siam a, kan ei zawk zawk a, rei hman kan nih loh avangin kan ei zawh chuan kan tlanchhuak zui lehnghal. Damdawiin kan thlen chuan Madinga chuan min lo thlen khalh leh hman a, cabin kawt ah chuan thu in Zamtei harh hun kan nghak a ni deuh ber mai. Tetea pawisa min thawn kha ka hrechhuak thut a, Madinga chu hrilh ruk zauh pah chuan ka tho a, a piah deuh a Zamtei pa lo ding chu ka va pan a, a awmdan ah chuan a rilru a pik zia a hriat theih. Pa tawng tam lo, zaidam zet, Pathian tih mi tak a ni. Ka khawngaih em em bawk. A fanu hmangaih em em ramtuileilo in a awm tawh dawn a, tu pa nge rilru hah lo awm ang?
" Pa Mawi, thil sawi lawk ka duh a" inthlahrung deuh a ka va tih chuan ka lam alo hawi vat a, za lo tak chuan min nuih suk a.
" Engenita? I chau awm si a, i awm hahdam hmasa lo a ni"
" Chau lo e. Englo, Zamtei thian pakhat hi ka hnathawhna ah khan alo awm thar ve a, zirlai a nia. Hei, Zamtei kan nan tih in pawisa min thawn a" tih pah chuan pawisa chu ka lek chhuak a, Pa Mawia hmel chu a hamhaih hman lek lek.
" Aw... Ava lawmawm ve. I thiannu ve chu kawm tlak a awm tawh dawn der si lova" hnukulh teuh chuan pawisa lak pah chuan a ti sap a. Ka khawngaih kher mai.
" Pa Mawi, kawm tlak lohna awm dawn hleinem. A thim zawngin thlir lo hram ang u. Mahse..."
" Ni e tiraw... A puitling ber tur hi ka zuau leh thin. Tei, thil pakhat ngen duh che ka nei a" a tih chuan ka en vat a.
" Engenita? Ka theih zawng ah chuan ka tlanchhe hauh lovang" ka lo ti vat a. A thaw hak a.
" Mami hi a ke chungchang hi nangmahin hrilh la kan duh a ni" a tih chuan ka phu zawk thei. Ka lo ngaihtuah miah loh thil a ni. Ka ti thei in ka ring lo.
" Pa Mawi, mahse... Doctor pawh in...."
" Doctor te nen kan sawi ho a nia. Nanghi keini a nu leh pa tih loh ah chuan a engkim a engkim i ni tih kan hria. Doctor pawhin i hrilh hmasak a that a ring tho a. Doctor nen inhrilh dun dawn tihna anih ber chu. Ka ngen che a ni" a tih chuan a sawi awmzia ka hrethiam. Mahse ka va huphurh si em. Ka lu ka bu nghauh a, ka tha erawh a khur nasa kher mai.
Pa Mawia ka kalsan hnu chuan thiante lo thutkhawmna lam chu ka pan phei chhat chhat a, ka hma a thil ka tih tur chuan min delh rit kher mai. Madinga chuan ka hmel ah a hrethiam aniang, min rawn pan vat a, thil awmzia ka hrilh chuan min khawngaih ve hmel khawp mai. Mahse Zamtei nu leh pa leh Doctor ngaihdan chu tha a tih pui viau thung.
Tlai lam dar 6 a pel hret tih chuan thiante ho chu chaw ei tur in an haw hlawm a, Madinga pawh zan lam a lo kal leh tum in min haw san ve nghal. Kei erawh ka chhungte ka bia a, ka U in chaw min rawn pek a tum a, Mahse Zamtei nau in chaw min rawn kensak a, haw lo in Zamtei harh hun ka nghak ngawt ngawt a ni. Dar 7 a rik chuan pawn a Zamtei chhungte nen kan thut lai chuan Zamtei nu chuan min rawn ko a, ka va huphurh tehreng em!
Room chhung ka luh chuan Zamtei chu alo meng diar diar a, a bulah chuan ka zuk thu a. A mit erawh ala meng chiang chiah lo. Pa Mawia chuan Doctor ava ko vat a, Doctor pawh a rawn phei rang kher mai. Zamtei chuan tui a duh thu a rawn sawi sap a, rang fahran a nu chuan tui tlem chu alo tulh a, nurse chuan nachhawkna in alo jection nghal vat bawk a, kei erawh tih ve tur ka hre lo kher mai. Ngawirengin ka thu a, Zamtei kut erawh ka vuan tlat thung.
" Te, engtikinnge ilo haw?" a aw fiah kak a a rawn tih chuan kan phu tlang hlawm teh e.
" Vawiin ah ka lo thleng a. Enge i an?" pangai thei ang ber chuan ka lo ti let vat a, ka aw khur erawh ngaithla uluk tan chuan hriat loh chi a ni lo.
" Ka tha. Ka kawng chin hnuai lam hi a chawmawlh vek. A ruh tliak a awm emawnile?" tih pah chuan thawh kan a tum a, rang zetin ka lo nem mu leh vat a, a na ti then sak chu hmuh a nuam hlawl lo.
" Hahdam rih rawh. Chesawn thei ila ni rih lo ania" ka lo ti vat a, a nui sak a.
" I kalna ala rei si lova, tinge ilo va let leh hma ve?" zawhna tam tak a nei dawn chauh si a.
" Nia. Ka ngai che a" tih pah chuan a kut chu ka vuan a, ka nuih var var a. Ka chhungril erawh a nui miah lo.
" Min ngaidam tawh ami?" a tih sap chuan hrehawm ka va ti tehreng em! A rawn harhchhuah ah pawh chu bawk chu a rawn sawi leh a nia. Keihi eng ang thian nge maw ka lo nih le?
" Chutiang sawi a ngai tawh lo. I dam veleh hremna min pe dawn nia" ka lo ti vat a, ka nuih var var bawk. A hmel a hahdam huai hmel ka hmuh chuan ka inthiamlo zual tak zet a ni.
" Muana pawh a lawm ngawt ang" a ti sap a, hrehawm ka ti tulh tulh mai a ni. Hetiang em em a rilru hliam a siam tur hian enge maw ka nih bik vak le?
" Zam, thil sawi duh ka nei a..." ka tih chuan kan bul a awm ve Zamtei nu leh pa leh doctor chu an lo che deuh siau a, ka va huphurh tak em! Zamtei chu a bu nghauh a.
" Ihmaw, motor in a sut dawn che khan enge i rilru ah awm?" ka sawi ngam thlawt loh avangin thudang ka pehhel leh ta nge nge.
" Umm... Ka hre tawh lo. Bang a min sut chilh kha chu ka hria, a bak engmah ka hre chhunzawm lo" a hmel chu a rawn dang sawp sawp a, ka zawhna chu a fuh chiah lo tih ka hrethiam. Anih chuan a ke a bulh thu hi engtinnge ka sawi ngam tak ang?
" Mu hahdam rih rawh" kan ti ngawt a, mahse Doctor a rawn kal hnai ta tlat. Hrilh rih lo mai tur chuan ka ngen a, a chhan chu amah a chau tawh tih a hriat lutuk. A awri ni se a ri chang chang tawh a, a taksa fit deuh hun nghak se ka ti tak zet.
" Zamte, engemaw sawi ho lawk ang u hmiang" Doctor in a rawn tih chuan kan insangmar teuh hlawm. Zamtei ka en chu mak tih hmel deuhin a nu alo melh a, anu lahin alo en let tha ngam der lo. Thaw ava pik duh tehlul em!
" Thil diklo a awm em ni?" Zamtei chuan a ti sap a, a awri ah chuan hlauhthawnna a lang chiang kher mai. Ni e, kan awmdan chuan a ti hlauhthawnawm lehzual ang. Tumah kan inthup hleithei meuh lo miau a ni.
" Zamte, englo ania. I vanduaina tawh avang khan loh theih lohin i ke kan tan a ngai a..."
" Dawt" Zamtei te that chuan min ti na ngawih ngawih. Thawh a tum a, ka lo kuah bet nghal. Apa in a rawn vuan bawk. A nu erawh beisei chi a ni lo. Kil khat ah a tap khur ngat ngat a ni ber mai.
" I tan chuan awih a har ang. Mahse puitling tak in awm hram hram la. I taksa ala chak tawk loh avangin i taksa i duat a ngai dawn ania aw.." Doctor in a tih leh chuan Zamtei chu tap tur pawh a awm tawh lo. A zawi vek a, a thaw kawk kawk a ni ber mai. Doctor in Zamtei awmdan a hmuh chuan nurse a ko vat a, a bp te check in an chiu nual bawk. A tan chuan a thu hriat kha a na em asin. Nikhua a hre lo zui lehnghal.
Pawn ah chuan Doctor chuan a nu leh pa leh kei chu min ko chhuak a, nurse in Zamtei chu alo awmpui thung. Pawn lam ah Zamtei chanchin ngaichang an awm ve nual avangin Doctor room-ah kan lut a, Doctor chuan thu tam tak a sawi a, Zamtei chu a rilru lam ah nasa tak in a nghawng ngei dawn a, chumi atan chuan a rilru ti thawveng zawng a kan awm a ngaih zia thu a sawi uar em em bawk. Tin, ke lem pawh ala hman theih mai a rin thu te a sawi a, Nu Liani chu a tap char char ti ila ka sawi sual kher lovang. Pa Mawia erawh a pachang khawp mai.
Doctor room atang a kan chhuah chuan ka thian te ho pawh an lo thleng tawh a, Doctor inzan in atan chuan a harhchhuah rih a rin loh thu a sawi avangin keipawh chu duh lo viau mahila haw tur in min ti lui a, Larson te ho erawh chu awm tlang an tum thung. Madinga nen chuan kan haw dun a, ka chau tak zet a ni. Ka taksa chauhna ai chuan ka rilru chauhna chu a na zawk mah in ka hria. Thil ka ei mumal lo nen, in kan thlen chuan Madinga chuan thingpui a rawn in kawi zawk a, ani pawh zin haw chauh ania, a chau ve khawp ang.
Inngaizawng hlim e ti lo chuan hun thawl kan nei ngang lo. Zamtei pawh a tha chho ve zel a, a ke bul ta erawh a nun a tih hnual phah khawp mai. A demawm hran loh e. Ka hna ka bansan tih an hriat ni chuan Zamtei te chhungkua chuan hrehawm an ti kher mai. Hrilh ka tum hma in Larson in alo hrilh hman thawt thawt si a, ka bansan chhan alo sawi mai si. Thup ngaihna vak awm ta hek lo. Zamtei a inthlahrun phah nasa bawk, keimah tak pawhin nuam ka ti lo kher mai.
" Naktuk ah hna pawimawh ah ka zin dawn a, vawiin tlai chu ka tan hun i dah thei angem?" Madinga msg ka hmuh chuan ka inthiamlo zawk kher mai. Zamtei bul a awm tam ka duh lutuk na lam ah ka bialpa ka lo mangnghilh tep alawm le.
" Tehreng mai. Ilo leng dawn mi?"
" Ka rawn hruai chhuak zawk dawn che"
" Umm... Ka pa ka lo dil ang"
" Ka hrilh tawh. Chuan, dinner pawh in dawr ah kan ei nghal ang. Mahse chumi hma in kan leng chhuak phawt ang"
" Ok"
" Dar 5-ah ilo inpeih dawn nia. Chumi hma chu Zamtei i awmpui thei. Vawiin chu ka rawn lang hman lovang"
Ka insiam sawk sawk a, Zamtei te in lam ka pan a, damdawiin atang a chhuah tawh avangin an in lam ah kan in awm chawt a ni mai. Mahse tunhma a hmeichhe hlim thei tak kha hmeichhe nun zawi, tawng tlem tak a ni ta. Hemi nun atang hian ka theihtawp chhuah a pawh let ka tum a ni. Thian dang te chu mahni hna ah an buai ve hlawm avangin chhun lam hi chu an rawn lang hman meuh lo. Keierawh chhun zan zawmin ka awm a ni deuh ber. Mahse pawi ka ti lo, ka thiannu tan a ka tih theih ve chhun a ni mai a.
" Te, nitin ilo kal a, i tan hun in pe ve rawh. Keichu ka ngaihtuahawm loh" Zamtei chuan a khum bul a thu a phone ka khawih neuh neuh lai chuan a rawn ti chhuak phawng a, ka phone chu dahin ka nuih sak a.
" Ka tan hun ka in pek vang alawm nitin i bul a ka awm" tih pah chuan a kut chu ka tuai zauh a, a ti mam thal thin kha a vuai zo a, Muana ni se a rawn lang ngai hauh lo. A chhungte erawh an rawn lang reng a, Muana lo lan loh chhan erawh Zamtei kan hrilh ngam lo. A damlo ve tho tih bak kan sawi ngam lo. A rilru a buai tih hrilh ta ila Zamtei hi kan hloh phah ve thei tlat a ni. Nitin Muana dam hun tur min zawt a, a khawsik a reh theih loh avang leh a awm a nat tel avangin Doctor in amah hnaih a awm a phal rih lo tih chu kan sawi dan a ni.
" Ka bul ah i awm reng thei dawn lo. Chuan, Te, ka lawm e. Keimah ang lo tak a i ngaihzawng neih thu min hrilh nghal avangin" a tih chuan ka ner khum zauh a, alo nui sak a.
" Ka hrilh hmasak ber i ni. Larson te chu Madinga hrilh a nia" ka tih chuan a nui sen sen a, a mittui rawn hnam chu ka hmu lo der tlat. A chhan chu a tah nasat ka hlauh vang zawk.
" Ka tluk lo bik ngawt mai che. Engvang a thup tlat nge ka nih kha ka hre miah lo" a lu a thing nar nar a, a kut ah ka vuan a, ka nuih var var a.
" A pawi lo. Liam tawh chu i liam tir ang. Chuan, vawiin chu ka haw hma deuh a ngai dawn a, zan lam pawh ka rawn phei hman dawn lo a" ka tih chuan a nui ver ver a.
" Khati tur kha alawm. Ka tan i hun zawng zawng i seng ral a, Madinga tan i hun i hman a ngai ve tawh alawm" a tih chuan mak ti deuhin ka en a, a hre lawk ti dawn ila ka ring chiah si lo.
" Engtinnge Madinga nen kan inhmu dawn tih i hriat?" ka ti hau a, a nui nasa ngei mai.
" Te, nang hi chu aw.... I chhungte vang anih loh chuan Madinga bak a ni dawn lo. I chhungte ni se min rawn be hmasa leh ngei ang. Anih chuan tudang vak nge i hmuh a ka rin ang?" a tih chuan ka thiannu hi a ke bul mahse a thluak erawh keiaiin a chak daih zawk reng ang. Ka kuah a, ka hmangaih thu a vawikhatna atan ka hrilh ve ta.
Dar 4 vel ah Zamtei te in atang ka haw phei a, ka inpeih meuh chuan Madinga'n min nghak ran tawh. Ka pa a awm loh avangin ka nu chuan min en liam a, Madinga nen chuan an innel kher asin.
" I nu hi a nulat lai tawng hman ila ka chhuah miah lovang" car khalh chung chuan a ti zauh a, a nui vur vur bawk.
" Keipawh ka pa..."
" I pa nen hian in lenlai inrual se in inngeih loh dan tur chu" min lo tih khalh a, ka dang chiang khawp mai. A sawi dik in ka ring. Kan inngeih hlawl lovang.
" Khawnge kan kal dawn?" ka tih chuan Zarkawt lam kan pan mek tih ka hre chiah. An in a min hruai loh hram ka beisei.
" Ka dawr thar hmu tur pawhin hun i nei thei si lova, dawr khar dawn ah hmu ve zawk la ka duh a" a tih chuan ka inthlahrung lek lek zawk.
" I hawn ni kha Zamtei damdawiin chhuah ni kha a ni sia" ka ti niah niah a, a nui hak hak a.
" Ka hrethiam che alawm" alo ti sup a, ka nuih tlawn hai ringawt. Ka inthiam bik hauh lo. Mahse Zamtei ka ngaihtuah em a ni. Ka pa pawhin dawr tlawh ve zauh zauh tur in min ti tawh a, mahse ka la zawm thei mai lo chu a nia.
Car chu parking ah a park a, car atang a kan chhuk chuan a dawr lian zet chu alo ding luah a, hnathawk ho chu haw tur in an lo insiam tan sap sap tawh a. Kan luh chuan an boss ber kal ta chu an lo phe siau a, an manager ni ve awm tak chuan min lo dawng sawng vat a, hmeichhe hmeltha tak ni in ka hria. A hmel chu ka hriat hnu a ang bawk. Mahse ka hrechhuak mai thei lo. Madinga chuan min kai kual a, a manager chuan min rawn zui ve bawk a, an bungraw zawrh ho chu min hrilhfiah kual hlawm a, an inbiak dan ah chuan an innel hmel viau a ni.
" Ka hriat hnu a ang" car a kan tlanchhuak chiah chu ka ti nghal a, ka vei ngang aniange.
" Mai thei. Aizawl hi a zim ve em a ni. In dawr lam kan pan nghal dawn nge?" a tih chuan sana ka en zauh a, ka rinaiin dawr ah khan kan awm rei. Dar 7 a pel tawh a, kan dawr a tlang nghal pawi ka tih loh thu ka sawi chuan car chu falkland lampang hawi chuan a tlan nghal a, mak deuhin ka tawng peih tlat lo. Ka zawhna a chhan dan ah khan ka lungawi kim chiah lo. Mahse zawh nawn erawh ka tum lo bur.
Kan dawr kan thlen chuan ngawirengin kan inzui lut a, ka U chuan min lo chi-au vat a, cabin ruak a awm mai rih loh avangin lo nghak lawk tur in min tia. A rin aiin kan thleng hma deuh a, cabin a lo dah ruah hman loh thu a sawi chuan ngawirengin ka U thutna chair bul a chair ah chuan ka thu a, Madinga erawh sofa-ah chuan a thu a, ka U nen chuan an ti ti bawrh bawrh a, ka mood chu a dik thei tlat lo.
Cabin chu 20mins hnu ah a ruak thei hram a, staff ten an tihfai zawh chuan Madinga chuan lut turin min sawm nghal a, phur lo zet chuan ka zui ve nghal. Min hrechiang em em tu ka U chuan dar san ak in min lo melh a, ka nuih khum sak ringawt.
" I mood ava dang ta ve. Ka bul a awm nuam i ti chiah nange?" Madinga chuan kan thut fel hnu chuan a ti sup a, ka kut a rawn vuan nghal bawk.
" Dang lo ve. Engemaw ka lo ngaihtuah mai mai a" nui lui sak chung chuan ka kut chu ka la sawn vat a, zahzel ah ka bag chu ka hai ringawt pek.
" Enge hlim lohna tur awm min hrilh rawh le. Chhan awm lo va lungawi loh ngawt tur thu a awm lo"
" Ka lungawi lo hleinem. Thil ka ngaihtuah tui lutuk ka tih kha" ka lo ti bak hlak a, ka mood off zia erawh ka thup hleithei ta hauh lo thung.
" Tei, i mizia chu ka hria. I lung a awi lo tih pawh ka hria. I lungawi loh chhan min hrilh mai la, hetia a chhan ka hriat si loh a min tihtauh khum dawn chuan thlem ngaihna che ka hre dawn hauh lo a nia" nui vur vur chuan a ti leh a, a nui nangin a thu tak em em thung.
" Khanu kha tunge?" ka ti ta nge nge. Ka hriat hnu ni in ka hre si, ka hrechhuak mai thei si lo. Ka zawhna a chhanna lah a tawi viau bawk si. Ka lung a awi chiah lo reng a ni.
" Chuvang chu maw?" a nui hak a, keilah ka lungawi lo tulh tulh thung.
" Min hrilh duh loh chuan min hrilh a ngai lovang. Theihnghilh rawh" ka ti ta hmak. A sawi hreh viau anih chuan sawi lo tawp mahse pawi ka ti hlek lo.
" Naupang chhia lutuk. Ramtei nau a nih kha" ka khawng zawt thei. Tawng ngaihna pawh ka hre lo. An inkar a tawp tawh a, mahse a nau chu a chhawr leh tho a. Enge thil awmzia ka hre nek lo ve.
" A that chu" ka ti tawi tak mai. Current chu eng tha deuh se chuan ka hmel ah ka lthinrim zia a hmu thei ngei ang.
" Ngaihthatlohna tur engmah a awm lo a nia. Ahma a ka lo tiam tawh anih avangin ka chhawr a ni" a tih chuan ka lo nui lui hak a, mahse tu tan mah hriat hmaih chi loh, ka nuih dan chu lawm vang a nui a ni lo.
" I thu tiam chu i vanwg tur alawm. Eitur an va rawn dah har ve. Ka ril a tam tawh" tih pah chuan kawngka lam chu ka melh a. Eitur hi ka U hnen ah kan order lawk tawh a ni.
" I lung a awi lo tiraw?"
" Awi loh thu ka sawi hleinem. Eitur pawh alo thleng ta alawm" waiter in eitur a rawn ken luh chu ka lo ban vat a, Madinga thaw hak ri chu ka hre reng. Mahse ka hre lo der tlat thung a ni. Inhnial ka peih lo. Tunah kan inngaihzawnna pawh ala rei lo a, inhauh nghal ka peih lo.
Thil ei chhung zawng kan tawng lo a, kan boruak chu a uap ru kher mai. Hetiang tur tih hriat a lo chhuah loh tawp tur. A dawr kha lo tlawh lo tawp ila kan hlim zawk ngei ang. Mahse thleng tawh a ni, kan tidanglam thei lo. Ngaihtuahna mumal tak ka neih vat a ngai in ka hria. Thil kan ei zawh chuan ka U chu kan haw san a, haw kawng ah pawh ti ti a tum viau a, mahse ka tawng tam peih thlawt lo. Ngawirengin in kan thlen in car atang ka chhuk a, min mangtha na pawh ka chhang liam puat ringawt. Mahni a awm a inngaihtuah phawt ka duh a ni.
MAdinga nen kan inhmuhna pawh kar 1 a liam ta. Zamtei te in ka kal tlem ve deuh a, Muana a tha chhuak leh tawh a, normal tak la ni lo mahse Zamtei bul a a awm in a dam ber a, Zamtei pawhin thil awmzia a hre vek tawh a, kan hlauhthawn ang aiin a puitling zek lehnghal. A kebul zawkin a hmangaih chu a enkawl zawk ti ila a sual lo mai thei. An pahnih a hun tam zawk hmang tur a kan duh avangin keini pawh kan kal tlem reng a ni. Mahse nitin erawh chuan kan tlawh ziah tho. Madinga erawh a reh vang vang a, a zin pawh rawn haw a hun daih tawh. Chanchin engmah min rawn hrilh lova, ka biak hmasak bik chhan tur ka hre bik lo. Tu reh thei thei kan ti a ni ber. Tunah tak hi chuan inthen mahila pawi ka ti hran lo. Larson erawh chuan chanchin min zawt zauh zauh a, tha takin ka hrilh ve mai. Ani pawhin min vui pui viau mai. Whatsapp group lam ah a rawn lang ngai maih lo bawk. Read erawh a read vek zel thung.
Ka pa in a pheikhawk siam tir lam tur a min tirh avangin Tluanga sawm ka sawm a, Larson a hman loh avangin Tluanga nen kan kal a, Dawrpui ah pheikhawk kan lam zawhin Madinga te dawr bul ah Tluanga'n thil lei tur a neih avangin kan kal kawi a, hmuh loh hram ka in beisei. Tluanga thil lei ka nghah lai chuan Madinga dawr atang chuan Ramtei a rawn chhuak zan zan a, a nalh lehpek tawh hle. Tin, a hlim hmel em em bawk. Hei vang hi anih dawn hi min biak a mamawh hauh loh. Ka sa pup a, mahse car glass chu ka up nghal. Madinga erawh ka hmu ve chuang lo. Darw chhung ah a awm ani mahna!
Karkhat dang a liam leh tawh. Keipawhin ka ngaihven lo tial tial bawk. Inngaizawng ang ah pawh ka inngai tahw lem lo. Zamtei birthday anih avangin an in ah chaw kan eikhawm dawn a, Muana pawh a pangai chak khawp mai. Keichu zing atang ka phei sa a, zing chaw pawh ak ei nghal nghe nghe. Zing chaw eikham zawh ah office chawlh a ni bawk a, Larson te ho an rawn thleng bawk a, chawhmeh bazar tur in kan chhuak a, rinaiin kan hlim phian bawk.
Chawhmeh kan bazar zawh chuan present lei turin kan kal ho leh dam dam a, keichuan Zamtei ngainat em em, teddy bear lian chu ka la a, midang pawh chuan tarmawi chi hrang hrang an la bawk a, kan tuam tir nghal bawk. Kan thil lei kan tuam tir lai tak chuan Ramtei chu a rawn lut ve hlawl mai. Madinga nen kan inkar hre lo ang hmiah in min rawn be bawrh bawrh hlawm a, lo biak chhiat vak theih pawh a ni bik chuang lo. Madinga a hman loh avangin Zamtei birthday present tur a en ve thu a sawi chuan ka thaw a chham lo chauh a ni. Larson chuan ka kut ah a rawn kai vat a, midang ho chu kan thil tuam tir lo nghak tur leh thil en tur kan la neih thu sawiin min kai chhuak nghal a, au nghek nghek mai ka chak zawk. Tenawm lutuk. Tin, sawm pawh a ni ve lo. Ti ila group ah sawmna siam a nia, sawm loh chu a ni bik lo. Mahse engvang a Ramtei kher tir nge anih?
Chaw ei dawn tep ah chuan Madinga chu a rawn thleng ve hlawl bawk a, a hmel chu a cher deuh a, a hah hmel em em bawk. Ramtei thil rawn lei ngei mai keng chuan a rawn lut a, keichu choka lam ah ka lut hmak. Midang erawh chuan alo kal ve avang a an lawm zia an lo hrilh sap sap a, Larson erawh chuan a be miah lo tih ka hria. Choka lam ah a rawn lut zui ve nghal daih bawk.
" In lawm vak lo tiraw?" tih rikna lam chu Larson nen chuan kan hawi vat a, Madinga chu thatchhe zetin choka lihna tur ah chuan alo ding a, angaihna kan hre lo dun kher mai.
" Lawm lohna tur a awm hleinem. I ril a tam tawh em?" Larson chuan a ti tha ve mai a, kei erawh ka tawng peih hlawl lo. Ka lawm lo tak zet a ni.
" Chaw ka ei hman ka ring lo. Ka rawn lang zawk. Zamtei ka hmu tawh a, ka kal lehnghal mai ang. Motor ah min nghak an awm a" Larson chhang si chuan keimah min en ngar a, a nui lek lek bawk.
" Anih chu mawle. I thian pawh chu lo ko la, kan ei ho ang chu mawle" Larson chuan alo ti leh vat a, Larson chu ka ngei zawk. Sawm luih ngai pawhin ka hre lo e a.
" Chutia in rem tih te chuan pawi ka ti chuang lo a. Pawn lam a chaw ei ai chuan thiante bul a chaw ei chu nuam zawk daih ang" a tih chuan ka fian ken chu ka hum ngawt ngawt. Zaktheilo ka ti kher mai.
" Nia. Va ko rawh. Hei, kan peih tawh a, kan ei thei a ni mai" Larson in a tih chuan Madinga chu a inher vut a, pawnlam a pan nghal. Keiin Larson ka hau thung. Kha mihring hmel kha ka hmu chak hlawl lo. Mipa ah pawh ka chhiar hrep lo ve.
Madinga te lo luh chuan sitting room lam ah kan lo awm thap a, a mi rawn hruai ka hmu chiah chu ka zuang tho lo chauh. Ramtei chu nuisangin a rawn lut a, Larson pawh chu a phu ve zawk tho. Mahse mipa nge nge, a insiamrem thuai a, tha takin a lo bia a, kei erawh ka ngawireng. Chhuanlam siam in Zamtei room lam ah ka lut hmak a, Zamtei chuan ka hmel ah ka dikloh zia a hrethiam nghal a, min lo zawt vat a, mahse ka chhan hma in Madinga leh Ramtei an lo lut ve nghal tlat. Ramtei a hmu tel chu Zamtei pawh a hmel a danglam nghal vek. Mahse Ramtei'n tha deuh a a rawn wish tak ah chuan tha deuh chuan alo chhang tho a, a bak erawh a be zawm bik miah lo.
" Ramte, khawngaih Madinga hi biak ka duh a, midang bul ah ilo va nghak thei angem?" Zamtei'n a tih chuan hnial chi a ni lo tih a hrethiam aniang, lungawi hmel deuh tho chuan a chhuak ve mai a, kei erawh an rawn luh tirh atang ka la chesawn lo a, tawng phei chu ka la tawng miah lo. Kan 3 chuan kan ngawi thap a, Zamtei chu a rawn khuh kharh a.
" Mading, enge thil awmzia ka hre thei angem?" Madinga, chair-a thu chu a melh a, kei erawh ka thinrim lutuk vangin ka kut ka hum ru8h ngat ngat thung.
" I sawi awmzia ka va man lo ve" Madinga chuan alo ti nghut a, nichin a nui sang a Zamtei be tu kha a ni leh tawh lo. Mipa tih har zet hmel a pu leh tawh.
" I hria tih chu ka hria. Mahse a ruh lang rawt a sawi i phut anih chuan Tei nen in inkar hi a nia ka zawh che" Zamtei'n fiah kek kawk a a tih chuan ka lo ip chawih thei.
" Ooohh... A ni maw. Tihsual palh vang anih kha. Tunah chuan thian kan ni leh tawh alawm" awlsam zet a a tih chuan ka ding hluai a, ka khur nasa kher mai.
" I thian nih hi ka duh tawh ngai lo. Mipa tenawm" ka ti tuarh a, Zamtei'n thei leh thei lo in min lo ban tawk tawk pawh chu ka ngaihven hman tawh lo, rang zetin room atang ka tlanchhuak a, tumah be lovin kawngkhar lam chu pan in chak zet in ka tlan a, Larson chuan min lo umzui tih reng reng ka hre lo. Ka tlan theih chin tawk ka tlan hnu chuan kawng ah chuan ka thu hnawk a, ruah mal rawn tla siar siar chuan ka taksa chu a rawn ti huh siap siap a, mahse chulam ka ngaihven lo. Thian kan nih thu a sawi lai a a hmel chapo larh leh min nuihzat hmel kha ka mitthla ah a chiang tulh tulh. Engtinnge a theih zawk?
" Te, i damlo palh ang. Ka thlah haw ang che" Larson chuan ka dar ah a rawn kuah a, ka insum hman lo. Ka lo tahkhum nghal. Thiante bul ah hi chuan pangchan a nuam ve asin.
Larson chuan a car-ah min kai lut a, ngawirengin anmahni in lam min pan pui a. A chhungte an awm loh avangin a room a bathroom-ah chuan ka inbual a, ka thawmhnaw a huh vek avangin a thawmhnaw chu thawl deuh chuan ka ha a, ani erawh Zamtei bia in Madinga te haw hnu a kan let tur thu a sawi chu ka ngaithla reng a, keimah vangin birthday party nuam lo tak an hman a ngaih phah a, ka inthiam lo kher mai. Zamtei nen chuan kan inbe ve zawk a, hrehawm ti lo tur leh puitling tak a hmachhawn tur a min tih chuan lawmthu ka hrilh sap a, phone kan dah zui nghal.
Ka khum ah chuan mu in kar hmasa a Zamtei birthday kan lawm ni chu ka ngaihtuah let a, tlawm ka in ti tulh tulh. Khatiang em em a hmuhsit kha ka la ni ngai lo. Engvang a khatiang a min ti leh si tur si chuan inngaihzawn kha rawt nge anih? Ramtei nen an inthen thu a sawi a, mahse tunah an inzui leh viau tawh si. Tenawm lutuk. Ka khum atang chuan tho chhuak in tunah chuan amah vang a tawm-im kha ka sim ang. Tunge ka nih chiah a hre ve ngei ang.

CHAPTER -7

 Ka U damloh avangin dawr ka nghak a, ruah a tla cherh cher bawk. Zamtei birthday kan lawm atang thla 2 lai chu a liam leh tawh. Madinga pawh ka hmu ngai lo a, a chanchin sawi pawh ka peih hek lo. Group ah ni se a rawn ri ngai lova, keini pawhin kan ko ngai lem lo bawk. A chhan sawi duh lova mak sak tak a a chet dan hian min ti hamhaih a, min ti thinrim em em bawk. Mathana min rinawmloh san hnu a mipa ka vawn leh hmasak ber a nia, ka chanchin hre sa vek a inngaihzawn rawttu a ni bawk. Mahse a thutiam a hlen zo ta bik lo. Mathana nen enge an danglamna vak ni ang?
.
Mahse mak tak maiin heng ka hun kal ta te avangin bawksawp ka tum hauh lo. Hmalam pan tur ka ni tlat a ni. Ngaihzawng pawh ka la nei leh ang, anni vang a ngaihzawng neih tawh loh tih vel ka ngaihtuah duh hauh lo. Mi dawihzep ang a harsatna inbawhbeh tir ka tum nawn tawh lo. Mathana vang khan ka hnungtawlh ve nasa a, mahse tunah chuan a thleng nawn tawh hauh lovang.
.
" U Tei, cabin no.2 ami sawn in manager va ko rawh a tia" kan staff zing a naupang ber, zakzum deuh, Puipuia chuan counter a story ka type mual mual lai chuan min rawn ko a, thatchhe zet chuan ka hawichhuak a.
.
" Enge thil diklo thleng a awm ami?"
.
" Chilly Chicken a chah a, kan pe a, a sawisel a" Puipuia chuan inthiamloh hmel deuh chuan a ti sap a. Ka thutna atang chuan tho in a hna va thawk chhunzawm tur a ka tih hnu chuan Cabin no.2 lam chu ka pan nghal a.
.
" Excuse me. Min ko ni in ka lo hria a, puih theihna che ka nei em?" kawngka a va dah luh pah chuan ka va ti nghal a. Mipa pakhat hi amahin alo thu a, ka tawng thawm ah chuan muangchangin a rawn hawi chho a, a hmel lah chu ngainatawm loh hrep. Hmelchhia erawh a ni lo.
.
" Eng ang cook nge in neih? Chilly chicken hi dry lo in in siam thiam lo em ni?" tih pah chuan a eitur order sa chu a hma ah chuan a nawr sawn a, polite loh hmel ngei mai.
.
" Sorry. Order i siam dawn in dry i duh lo tih i sawi lo ami?"
.
" Kha waiter laktlak loh zet khan min zawt miau hek lo"
.
" A thar kan lo siamsak dawn che nia. Kan tihpalh lutuk a ni e"
.
" Ka hun inkhawhral tam mah mah a ni e. Siam duh lo mai rawh u"
.
" Ka pu, lo nghak lawk rawh. I duh ang ngei a tui a siam turin ka lo hrilh dawn nia" inngaitlawm tak a tawng hi harsa ka ti tlat zel. Hei vang hian alawm dawr ka nghah that peih loh.
.
" In owner hi tunge? Hetiang a restaurant lian siam ve si chuan staff tha deuh hlek te lak ve tur alawm" a tih leh chuan ka ngaihdan a pel ve ta zak mai. Tawngkam tha hmang thei lo chu tawngkam tha dawn a phu bik in ka hre lo.
.
" Enteh, kan tih dikloh ah chuan ngaihdam ka dil che. I eitur man hi i pek a ngai lovang. I duh ang in kan siam sak leh ang che ka tih kha" thinrim deuh hlek chuan ka ti let ve hrak a, min ngaihpawimawh loh hmel zet chuan a hmui a ner sawk a.
.
" In customer te in biak dan chu leh! In owner number min han pe teh. Manager leh staff thlak tur in kan hrilh ange" alo ti leh hmak a, ka va han chum chak chiang tak em!
.
" Keimah hi owner chu ka nih hi" ka ti ram hmak a, muangchang chuan a rawn ding chhuak a, a palian kher mai. A rim lah a tui vung vung. Tiang hian inhmachhawn lo ta ila chuan chhelo ka ti phian mai thei.
.
" Nang owner i nih chuan hei hi ka thurawn ang che. I customer te lungawina hi sumdawng i nih chuan a pawimawh ber tih theihnghilh ngai suh" mit zim sun chuan min melh chhuk run a, hmeichhe no deuh chu ni ila a mitmeng ringawt pawh chu zamna tham a ni.
.
" Ka lawm e. Ka lo hrereng dawn nia. Chuan, hei hi ka thurawn ve ang che. Mi in polite tak a an bia che anih chuan polite takin chhang ve thin ang che. Khawvel ah hian nangmah chauh hi harsatna tawk i awm lo. Tha tak a sawifel theih thil ah buaina hmachhawn tum kher zel mi i nih tawh loh ka bei sei. Kan dawr a ilo chawlh ve avangin ka lawm e" nuisang chuan ka ti let ve hmak a, mahse ka tawngkam ah erawh hmel nui pu mahila ka lawm loh zia a hriat thung.
.
" Mahni a sumdawnna khawih thei, hmeichhe chapo tak hi ka ngaina miah lo"
.
" Keimah i sawina anih loh hram ka beisei"
.
" Midang awm ve an awm em ni?" tih pah chuan a hawi kual vel a, a chet dan chu ngeiawm piah lam a ni. Setana tirhkoh zing ami ni mai awm a ni.
.
" I hmel kha a dur vek tawh a nia. Khawi maw in eitur chu min han pe leh chhin ula, khatiang a owner ber a lungawi dawn loh ai chuan thil manto tak pawh a ni hleinem" a tih chhunzawm leh zat a, ka va han beng chak tehreng tak em!
.
Choka lam ah pheiin order chu siamk leh nghal turin ka hrilh a, sumdawn chu alo namai lo emai a. Hetiang chuan rei ka nghak peih pawhin ka ring lo. Counter-ah thu in family restaurant lam a chawl ho chu ka thlir a, naupang chetla hi hmuhnawm ka ti thin. Mahse harh uchuak ang hi ka ngaithei bau lo thung. Thawk ka la hak a, ka thil tawn chu inhneh tir loh tumin ka story ziah lai chu ka chhunzawm amlh malh a, mahse ka rilru ah erawh a lut hleithei meuh lo.
.
" I thurawn pakhat ka zawm chu ka tifuh hle mai" story type a ka kun ngul chu ka hawi chhuak a, khapa ngei kha a ni.
.
" I duhzawng tak i ei ngei ka beisei" tih pah chuan za lo zet in ka nui a, a nui ve suk tho. A nui hmel chuan engemaw ti takin min khawih riau lehnghal.
.
" A neitu nu mei alh ang mai a a alh phat hnu chuan a dik thlap mai alawm" tih pah chuan pawisa min pe a, chhang tawh lem lo chuan ka nui tawi tak ringawt.
.
Ruah tla bawk nen, customer an tam lo kher mai. Tlai dar 5 a rik chuan phone call atang cabin 3 an rawn book hlauh mai a, ka thaw huai thei. An ei duhzawng an rawn sawi nghal thlap theih avangin ka awm ve loh lai a kan customer thin tawh te an nih ka ring nghal bawk. Hnathawk ho chu eitur lo inbuatsaih lawk tur in ka hrilh nghal a, anni pawh phur takin an che nghal sang sang. Keipawh thu mai mai bik lovin customer hlawm kan neih dawn avangin room ka endik zung zung a. Hookah an zu tel duh dawn tih an sawi lawk avangin hookah pot leh flavor leh charcoal chu ka endik nghal vek bawk.
.
Booking ti lawk te rawn thlen chuan dar 7 a pel hret a, customer tlem azawng an awm sa bawk. Cabin hi 4 chiah kan neih avangin a ruak lo chiang khawp mai. Mahse cabin bul ah hian thutna chu a awm nual tho a, sound proof vek a ni bawk a, family restaurant lampang nen chuan thawm a inhriat lem loh. Rinaia kan buai leh si avang chuan keipawh eitur sem in ka phe zak zak reng a, mahse nuam ka ti zawk. In la boss tak a counter-a thut hmuk reng hi ka thiam zawng a ni vak lo.
.
Buai zualpui a reh hnu chuan counter-ah bawk chuan ka thu leh a, ka chet tam loh ve em avangin ka chau ve hman tep a ni. Ka U lo hah dan tur zia ka ngaihtuah neuh neuh a, keihi chu tawng lam a rorel chi ka ni hi chu ka vanneih phah lel thin. Ka pa erawhin min khak tam phah thung. Mu ar ar a rorel zet zet hi ka ching khawp a. Vairam a awm laiin mahni a awm ka lo ni nen, mahni thu a kaltlang pawp ka la ching reng hi a chang chuan sim ka duh ve thin khawp mai.
.
" Eheu! Ka tum loh deuh ka hmu tlat mai" rawn ti tu lam ka hawi chu ka phu nasa ngei mai. Atea leh hmeichhe pakhat hi an rawn lut dun a, min hmu chu mak a tih hmel viau. Keitak hian ania mak ti. Ani ang te kan dawr ah an lo kal ve a, ka awih thei lo zawk.
.
" Awi, tehhlawl che chuan. Cabin a ruak miah lo a, khawnge in thut ang?" ka lo ti vat a, a hmel chu a nelawm in a hmeichhe hruai pawh a nui sang bawk. An inhmeh kher mai.
.
" Aaaa, cabin hauh ah khan kan tel ve alawm. I thawk ami?"
.
" Thawk a ni ve mai ang chu. Keimahni ta a nia" ka tih chuan a nui hawk hawk a. A hmeichhe kalpui pawh chu alo nui ve bawk. Mi nelawm tak chu a ni chiang e.
.
" Wow! Ka lo hre reng reng hleinem. Bhaia pawh hi sawi ve awm a nia" a tih chuan ka lo ip chawih. Madinga chungchang sawi ka chak hauh lo. Mahse Atea nen kan inhriat ve tak tak na chu Madinga zar ah a ni miau si.
.
" Kan va lut phei ange. Dawr in neih nawmzia ka hrilh theihnghilh dawn che lawm. Hetiang ang hi Mizoram thalai te hian kan mamawh tak a ni. Duhsakna ka hlan che u" tih pah chuan cabin lam chu an pan a, mipa fel tak ava ni chiang tehreng em!
.
Dawr kan khar fel meuh chuan zan dar 11 a ri thuak tawh. Larson ka chah lawk avangin min rawn lam a. Atea te haw tur pawh tha takin kan inthlah a, discount pek ka tum viau na in a duh bau lo. Thian tha te tih vang a tlawm phut a nih loh thu a sawi tlat a, nidang a lk kal leh fo tur a kan inthlah hnu chuan kan in mangtha zui nghal. Thian tha ti a midang bul a min sawi ri ringawt pawh kha ka lawm tawk em em. I ngaihsan zawng deuhin thian tha ti in mi bul ah chhal che se, i lawm lo bik hian ka ring lo.
.
" Te, vawiin chu i U a nawm tawh tho chuan Seling-ah min lo kalpui teh" Larson chuan phone atang a rawn ti lang lang a. He mihring hi chu thian tha nih a tlin thlawt. Ka mamawh laiin a awm reng a, Zamtei ni se a thlahthlam chuang hek lo. A mi sawmna pawh chu hnial ngam tur ka ni lo tih ka hria. Hnial pawh ka tum eih lo. Mahse ka pa dil hmasak a ngaih thu ka sawi chuan amah chuan ka pa alo bia a, ka pa pawhin a phal ve mai bawk. A chhan chu ka U damloh chhung zawng zan tin ka dawr nghak min rawn hruai a, in ah min dah leh thlap thin. Ka pa pawh a chung ah a lawm viau bawk.
.
Larson nen chuan Seling lam chu kan pan dun a, a hna thil ah engemaw buaipui a ngaih vang a kal tur kan ni. Kawng ah chuan kan hmanhmawh teh chiam lo bawk. Savawm in ka rawt erawh a phal lo bur. Zin kawng a zu in a that loh zia min fah hrep a, ka hawi lawl lawl asin le.
.
Seling chu chawhma dar 11:30 vel ah kan thleng a, a tih tur pawimawh a ti nghal char char a, Thingsul Tlangnuam lam ah kan inpui ber a awm avangin helai thlen chhooh tawh rau rau ah chuan ti in tlawh nghal ka rawt a, a hnial lem lo. Ka Patea ka phone chuan huan an kal thu leh an haw har loh tur thu a sawi a. In a lo awm tur a min tih chuan Larson nen chuanchawhnu dar 2 vel ah ka Patea te in kan pan phei nghal.
.
Tlai lam dar 4 vel ah ka Patea te nupa pawh an rawn haw ve a, tlai chaw ei tur a min tih tlat avangin ka pa ka zuk phone a, alo phal nasa mai. Mahse zan tlan haw tur kan nih avangin fimkhur tur erawh chuan min chah nasa thung. Tlai chaw kan eikham meuh chuan khua a thim chiang tawh hle. Patea te chuan riak tur in min ti nasa viau nangin Larson mitmei ka veng deuh bawk nen, kan haw lui ta tho a. Tlangnuam kan pel phei tep tih chuan ruah nasa em em in a rawn sur ta. Patea'n min rawn phone. Let leh mai tur a min tih chuan Larson pawh chuan pawi a ti lem lova, kan tlan let leh ta ringawt. Patea'n ka pa a bia a, ka pa lahin ruah sur hnuai a tlan alo remti lo a, Larson chhungte kan be bawk a, an remtihna in kan riak ta nge nge.
.
Kan zan mu tur chu ruah a bang duh si lo, thli leh khawpui nen, tek ri nen, rapthlak zawk. Mikhual room hranpa a awm loh avangin sitting room lam ah chuan thutthleng sei ah kan mu ve ve a, Patea te pawh an muhil tawh. Keini erawh khaw awmdan ka hlauh avangin ka muhil thei lo a, Larson chuan min menpui a, ka thla a ti muang kher mai. Kan ti ti dun mawlh mawlh a, ka mutthilh lai reng reng ka hre lo. Ka harh meuh chuan Larson mutna chu alo ruak hiau tawh a, ruah erawh ala sur char char thung. Nizan lam aiin a chet nat leh hmel reuh lehnghal.
.
" Hey, mutduh. Khaw awmdan hi a huphurhawm hrep mai a" Larson chuan mutthilh leh mai ka tum lai chuan ka bul ah a rawn thu a, thathchhe zet chuan ka meng a, alo intifai vang tawh.
.
" Kan haw thei tho ang chu" ka rilru tak chuan haw loh pawi ka ti lo zawk. Mahse ka chhungte in zawk ania, a rilru tur ka ngaihtuah tel ve a ngai. Tin, ani chu hna kal ngai a ni bawk.
.
" Maybe. Khaw awmdan a zir aniang chu" a thaw hak a, a feeling tur ka hrethiam lutuk. Mahse kan thu a ni bawk si lo.
.
" Lungngai suh. A tha leh mai ang. Thingpui ka va lum ang aw" a rilru tih zangkhai nan chuan ka lo ti vat a, a nui suk.
.
" Yessss. Va lum rawh" a tih chuan ka nuih a ti za zawk.
.
Thingpui ka lum zawh chuan Patea te nupa leh naupang ho chu an rawn tho ve a, thingpui chu ka lo thlit sak hlawm a, Nutei pawhin nuam a tih hmel khawp mai. Patea chuan khaw awmdan en phawt tha a tih thu a sawi chuan Larson pawh chuan alo hnial lem lo. Haw lui ta ila kawng ah leimin leh harsatna dang vangin kan buai ve thei tho tlat a ni. Nutei nen chuan rawng kan bawl dun a, naupang ho erawh school kal tur in an insiam sang sang a, Larson chuan a car a a thlah tur thu a sawi chuan an lawm hlawm nasa mai.
.
Chaw ei kan peih chuan chaw kan ei vat a, khua a that duh loh em avangin naupang ho pawh school chawlh an dil a, an zirtirtu te chuan chawlh an lo puang tawp alo nia. A awm tho e. Hetiang ang a khua a awm chuan kal luih chi ni in ka hre lo. Nidang ang chu ni khua a eng uarh tur a nia, mahse khua chu a dum khup ti ila a dik ber ang. Kan chhungte lam pawhin khua ngaichang tur a min rawn tih hnu chuan Larson chuan an office lam a bia a, an pu chuan alo hrethiam khawp a, rilru a hahdam huai mai.
.
Chutia engmah tih theih tak loh ah chuan kan thukhawm thap a, kan ti ti ho a. Patea te chuan Larson chu ka bialpa emaw an la ti zui. Mahse thian kan nih thu ka sawi chuan kan nui ho dar dar a, Patea te in ah hi chuan ka vawk lal len ti ila a dik ber ang. Ka naupan lai in ka Patea bulah hian ka awm thin a, duat pawh min duat. Abulah hi chuan tumahin min hau tha ngam lo. Thil tih tur awm se keima thu a ka ti anih loh chuan tumah in min tir ngam lo. Ka lungawi loh chuan tupawh a tawng mai thin a, nuam ka ti thei ham ham ania. Keipawhin ka pa te unau ah chuan ka ngai ber.
.
Chawhnu lam ah khua a rawn that tak deuh avangin kan inkhalh haw lui a, tluang tak chuan kan thleng thla ve mai bawk. Larson chuan kan in ah min dah hmasa a, rei thu lovin a haw ve nghal. Ka inbual sawk sawk a, ka motor chuang ka ruih chhuanlamin ka mu kak a, ka phone khawihin thianho group-ah kan zin report ka pe nghal zat zat. Zamtei nen rei deuh kan intext bawk. Ka nu in chaw ei tur a min rawn koh chuan ka tho vat a, chhung inkhawm kan hman zawh chuan chaw kan ei nghal.
.
" I U hi i chhawk deuh a ngai ang" ka pa in a tih chuan ka peih lo kher mai. Ka nau kut ah dah vek theih ni bawk si loh.
.
Ka pa sawi ang in ka U chu dawr ka nghahpui ve ta tauh tauh a, Atea te pawh an lo kal zing viau mai. Mahse kha hmeichhia kha a rawn hruai tawh ngai miah lo. Hmeichhia hrim hrim a rawn hruai tawh ngai lo. Mipa hlang an lo kal a ni deuh ber. Achang chuan amahin alo kal thin bawk. Ka nau pawh ama pual deuh tur in dawr chhung ah tho Foot&Back Massage tihna tur kan siamsak chu rinawm takin a nghak ve bawk. Staff hran la lo in amahin a handle mai a, a buai changin ka pui ve mai bawk. Ama tawk ah a luck ve hrep mai.
.
" Naktuk zan ah Mualpui-ah Charity concert a awm dawn a, kan band-n kan perform dawn a, lo kal ve ta che" Atea chuan an thil ei zo bill a rawn pek lai chuan a rawn ti a, ka phu nasa kher mai. Ka awih lo zawk.
.
" Aaaa, ka tibuai palh ang che u" ka lo ti vat a, a thianpa chu alo nui hak a.
.
" Bhaia hlauh tur i nei tawh lo tih ka hria a nia" a tih chuan ka sen awp awp thei.
.
" He he"
.
" Ka uang miah lo. Ilo kal ve theih chuan ka rawn lam ang che. Thian pakhat i hruai thei ang" a ti leh a, a hmel chu a thutak em em mai bawk si.
.
" Mipa hruai ta ila" ka ti ve ta nge nge. Larson bak hruai tur ka hre lo. Zamtei kal ve thei a ni tawh si lo.
.
" I thian anih chuan" awmze nei deuh chuan a nui sak a, angaihna ka hre lo tulh tulh. Nidang ah tiang hian min be ngai miah lo.
.
" Thian bak pawh a awm thei" ka ti leh zauh a, ka sawi dan hi Larson chuan hria se min hnek duh mai thei a ni. Mahse Atea chu chaih ka chak ve tlat. A awmdan danglam chu mak ka ti riau alawm.
.
" Thian bak hruai phal ta lo ila"
.
" Ka lo kal thei dawn lo tihna nih chu" ka ti leh ngat a, a thianpa chu a sir ah alo nui put put bawk.
.
" I thu thu le. I rilru i thlak tak in" tih pah chuan order kan ziahna paper te chu la in pen a pan nghal a, a phone number a ziak mawlh mawlh a.
.
" Hei hi..."
.
" I rilru i thlak anih chuan tah hian min lo be thei ang. Mahse naktuk tlai dar 5 hma in aw" tih pah chuan a nui sak a, a inher a, a thianpa nen chuan an chhuak zui nghal. A chetdan chu mak ka ti tulh tulh. Hetiang hian min la be ngai lo. Thian pangngai biak bakin kan inbe ngai lem lo.
.
Zan ah chuan Larson in min rawn lam chuan ka lo hrilh a, a nui ve huk huk tho. A tuk nileng chuan ka inngaihtuah a, kal ve chu ka chak bawk si. Ka pa chuan a phal dawn lo tih ka chiang. Ka U ka bia a, zan ah dawr lo nghah a peih leh peih loh ka zawh chuan a chhan min zawt a, tul a ti viau lo nangin aw min pawh ta tho. Atea ka be vat a, ka kal tur thu ka sawi chuan dar 5-ah min rawn lam tur thu a sawi a, a buai avangin phone a dah vat a, ka rin aiin ka phur daih.
.
Dar 5-ah chiah Atea a rawn thleng a, a inchei dan chu ka duh reuh lutuk. A dress code hi a danglam lem lo, mahse thawmhnaw ngai a ha nawn ka la hmu lo thung. Tin, a fai thei em em bawk. Ka U alo thleng tawh bawk a, kan kal nghal. A chetdan chu smart hrep lehnghal. Kawngah chuan an program te min hrilh ve bawrh bawrh a, ka kal ve duh avang a a lawm zia a sawi mawlh mawlh bawk.
.
Mualpui kan thlen chuan mi an lo la awm vak lo. Atea chuan an band ho awmna lam ah min kai phei a, an bandmate te min inhmelhriattir a, 3 chu ka hria. 1 erawh chu hnunglam min chhawn avangin a hmel ka hmu thei lo. An fel hlawm em em bawk. Atea chuan thutna tur min kawhhmuh a, ka thu a, an hmanrua chu an check mawlh mawlh a. concert pawh a intan tawh. Zaithiam an tam in mipui lam pawh an thahnem khawp mai. A khat tawkin Atea chuan min rawn ngaihven zauh zauh bawk a, mipa smart tak a ni.
.
" Hetah hian Restaurant neitu ka hmuh ka lo ring miah lo a" ti tu lam ka hawi chu ka insangmar teuh thei. Kha mi chapo zet bawk kha.
.
" Sawisel tur zawngin ami hetah i kal ve?" ka ti let sak a, mahse ka thusawi chu a ngaihpawimawh loh hmel thiam khawp mai.
.
" Sawisel tur ka hmuh chuan ka sawisel zel ang" a tih chuan ka haw tak zet. Tawngkam lah hi a tlachham hlek lo lehnghal.
.
" Mapui, helam ah ilo awm daih elaw?" ti tu awri ka hriat chuan ka insangmar nghal teuh thei. Chu awri chu ka hrechiang khawp mai. Muangchang chuan Mapuia melhna lam chu ka hawi a, ka thil hmuh chuan min ti thinur lehzual. Madinga chu Ramtei nen chuan an lo inkai leh chial tawh. Luak lo turin ka insum hram hram. Atea lo kal se ka ti kher mai.
.
" Nang..."
.
" Tei, ilo khawhar tawh em?.... Eheu, nangni meuh in rawn lang a" Atea chuan Madinga leh Chapo-a te a hmuh chuan ka bul a rawn diun pah chuan a ti zawm nghal vat a. Alo kal hun chu ava han fuh chiang em!
.
" In inhria elaw?" Chapo-a chuan Atea en chung chuan a ti nghal a, mak a tih hmel nasa mai. Madinga leh Ramtei erawh an ngawi reng a, chu chuan hrehawm min tih tir zual. Tinge maw ka lo kal ve kher ni? Larson ka ngai kher mai.
.
" Ka thiannu anih hi. In inhre zawk ami?" Atea chuan nuisang chuan Chapo-a chu alo chhang a, engmah a hre ve miau si lo alawm le.
.
" Thian maw in lo nih tawh?" Madinga zawk chuan alo ti nghut a, a tawngdan ah chuan min nuihzat ni in ka hre ber. Awmngaihna ka hre lo a ni tawp mai.
.
" Ni der tawh e. Kan perform a hun dawn. Te, lo kal rawh, i thutna tur ka tifel tawh" tih pah chuan min kai nghal a, ka thaw huai mai. Madinga te kan kal pel tur chu Ramtei chuan nui sawng in min lo en a, madinga erawh a tum hmak thung.
.
Atea te zai chu mumal pawhin ka hre lo. A chhan chu ka bul ah Chapo-a kha a rawn thu veleh pek a. Hmun dang ah thutna tur a tam tehlul nen, ka bul ah kher. Atea te zai zawh chuan zaithiam hrang hrang an zai leh a, an zaithiam hlawm khawp mai. Atea te chu an rei phian lehnghal. Chutah ruah a rawn tla zui. Mipui lam chuan pawi an ti lem lo ni in a lang. Kalsawn dawn ila tawmhulna tur a awm hran chuang lo. A vawt chu ka ti ve tan reng. Ka huh ve lo thei tawh si lo. Atea lah a rawn lang thei bawk si lo. Ka kal ta chu ka inchhir tawh viau a ni.
.
" Car-ah va thu mai ang" tih pah chuan Chapo-a chuan ka kut a la lawk a, hnialna hun a awm lo. Bakah ka khua a sik deuhin ka hre bawk.
.
Car chhung lum ka tem chiah chu ka thaw ham ham a, driver seat-a Chapo-a a rawn thut luh chuan ka zam thar leh. Engvang a a car a min hruai nge a nih? Hlauhthawnna ka nei thut.
.
" Hlau suh. Mapuia ka nia, i hming chu ka hre tawh. I khua a sik anih hi" ka chal a rawn deuh chuan vawt tih avangin ka khur dar dar.
.
" Atea kha khawngaihin min kohsak thei angem. Haw mai ka duh" ka ti tham chal a, haw ka duh tak zet. Damdawi ka ei vat loh chuan ka damlo vak ang tih ka hlau a ni.
.
" Ka thlah ang che. Anni chu an la buai ang. In veng awm sawi la" a tih chuan ka hnial buai peih lo. Atea chu a buai ang. Mahse hmelhriat loh han inthlah tir ngawt chu ka hreh deuh.
.
" Ka phone chhin phawt anga" tih pah chuan ka phone ka phawrh a, Atea number chu ka dial a, mahse a pick up thei lo. Beidawng zet chuan ka phone ka en reng a, duhthlan tur dang ka nei ta lo.
.
" Ramthar North"
.
Car ti nungin a tlan chhuak nghal a, kawng ah chuan thil a sawi ve nual a, a hma a ka lo hriat dan, nunchang chapo zet kha a ang tawh lo kher mai. Kan in awmna lai ka hrilh hnu chuan kan inkawt thleng min thlah a, inchhung erawh a rawn lut lo thung. Inchhung ka luh chuan ka U alo la haw lo a, tihchi phian. Ka inbualfai sawk sawk a, ka U chu text-in ka haw tawh thu ka hrilh a, damdawi ka ei a, mut tum a ka inbuatsaih lai chuan atea'n min rawn bia a, a inthiam lo kher mai. Mahse inthiamlo lo tur leh a buai zia ka hriatthiam thu te, in ka thleng him tih ka hrilh a, Mapuia hnen atang ka haw dan alo hre thlap tawh. Rei inbe lovin kan dah thuai a, keipawh ka damdawi ei nen, khawsik deuh nen ka muhil zui nghal.
.
" Lo insiam la, i hna kal tur ka rawn thlah ang che" ka number neih ngai a ni lo. a whatsapp DP ka en a, a thlalak a hmang bawk si lo. Tu tak ni maw?

CHAPTER -8

 Zing chaw eikham chuan hritlang pik deuh lak chung chuan dawr nghak tur in ka insiam mawlh mawlh a, ka U in hna dang tih tur a neih avangin chawhma chhung chu dawr a awm ka ngai tlat a ni. Ka nau chu a zing kal tawh avangin peih lo zet chuan room atang ka chhuak a, khawsik in min tham er er reng avangin ka nu chuan nachhawkna min lo pe a, ka ei zawh chuan kan in ka chhuahsan ve nghal.
.
Kan inkawt ka chhuak phei chiah chu Larson chu bike-in a rawn ding ve chiah a, mak ka ti ang reng. Ka ding a, taxi chan ngai lo in min thlah theih hlauh chuan tihchi dawn e ti ru chung chuan ka lo nuih sang bawk.
.
" I office dawn lo mi?"
.
" Nizan ah Madinga nau in concert-na atang a thlah haw che tih ka lo hria a" hmel thutak deuh a a tih chuan ka phu nasa ngei mai.
.
" Tu maw?" ka hamhaih lutuk chu ka ti ringawt a. Kha mihring kha maw Madinga nau kha. Mapuia tih khan a nau hming kha a sawi tak asin. Ka ngaihtuah let a, in anna tak pawh an nei. An nuih dan mawlh kha. Lalpa leh!
.
" Ka rin dan chiah. Mualpui in chhuahsan tur kha ka hmu che u a, ka rawn ko cheu a, in hre pha lo a. Ka rawn chhuah ve meuh chuan in tlan chhuak hman chiah a" a tih chuan ka thaw hak ringawt.
.
" Ka hre miah lo" a bak sawi tur ka hre hlawl lo. Ka hre lo tak zet a ni.
.
" Ka va thlah ang che. Chawhma chiah office ka kal dawn a, chawhnu lam ah min bazar pui rawh" a tih chuan ngawirengin bike-ah chuan ka chuang a, tawng tur ka hre lo. Kan tlanchhuak tur chiah chu Mapuia car a rawn thleng chiah a, Larson chu tlan tlang tur chuan ka ti hrawk a, enge alo kal ve ngawt chhan? Ni lo, keimah min hmu tur a ni tawp lovang. Ka lo inngaihbel ve ringawt chu ka zak leh hnuhnawh viau mai.
.
Dawr kan thlen chuan alo la reh riai a, Larson chuan lassi a in zawk a, engmah sawi chhunzawm lo in hna kal tur in min chhuahsan zui nghal. Ka rilru chu a buai map map ngei mai. Mahse enge pawi? Kan inngaizawng pawh ni hlei lo, ka bialpa hlui nau nen a haw rual chu a pawina viau a awm em ni? Ka lu ka thing nawk a, customer lo lut chu ka lo chhawnchhaih nghal vat. Ka U lo kal hma chu buai char char ila ka ti ngei mai.
.
" Khapa kha i bialpa em ni?" ka whatsapp msg chu ka en a, tukin a msg min lo thawn tu bawk kha.
.
" Tunge aw?"
.
" Mapuia" ka thin a phu dut dut thei. Engtinnge ka number a neih ka hre lo. Ka reply duh tawh lo a, engemaw tih fel tur awm chu ka tifel chhunzawm daih. An unau mizia hi a mak ka ti emai.
.
" Hmeichhe induh ve tawk tak hi chu i ni chiang a ni" tih ri ka hriat chuan ka hawi chhuak vat a. Huiham. Enge keimah ah hian a duh niang le? Tinge min umzui tlat le?
.
" Cabin lam ah nge hall-ah?" a thusawi chu hai derin a thut duhna hmun ka lo zawt hmak thung.
.
" Cabin lam ah ni rawh se" dar san ak pah chuan a hmui a ti sawi zauh a, a U nen an in ang ka ti ta tulh tulh.
.
Cabin lam a a phei hnu chuan staff zing a pakhat chu order va la tur in ka tir nghal a. Sana ka en a, ala hma viau bawk si. Enge a duh ber ni ta ang? A U nen kan inkar kha chu a hriat ka ring lem lo. A chhan chu piang hmun an ni lo a, bakah mipa hi chuan thil an sawi em em lo bawk. Madinga nen kan inkar lah a reilo lulai bawk nen.
.
" U Tei, nangmah a ko che" order la tur a va kal chuan a rawn tih chuan ka thaw hak. Ka bu nghau a, ka tho zui ve nghal. Mipa chimawm tak chu a ni ve chiang a ni.
.
" I vawihnih lo kal na ah min koh tir ve ve a, enge i duh?" tawngkam nem vaklo chuan ka ti nghat a, hnathawhna hmun a intihbuai hi ka huat zawng tak a ni bawk. Vairam ka awm lai khan kan hnathawhna hmun ah hnathawh hun chhungin thiante an lo leng in kan hnathawh tihbuai ang kha a awm ve tlat lo a, Mizo ten kan chin tha lo tak ni in ka hria.
.
" Zing chaw ei lo in ka chhuak a, pork salad leh thingpui min lo pe ta che" ka tawng ngaihsak lo tih hriat zet chuan alo ti leh hmak a, nawmloh nen ka thin a ur tak zet a ni.
.
" Chungte chu nichin khan ilo sawi thei alawm. Lo nghak la, ka rawn dah tir dawn nia"
.
" Iva hrilh zawh ah lo phei leh ang che" ka kal tur chu ka ding chat. Min zahloh dan hi enge ka tihsual?
.
" Enteh, hetah hian nang kawm tur che in ka kal lo. Ka hnathawk min rawn tibuai tawh lo la ka lawm khawp ang" sehchilh nak nak a ka tih chuan alo nui hak thung.
.
" Nizan vang pawh khan lawmthu sawi i tum lo em ni? Polite lo hle mai" nui sawng a a tih chuan a hma aiin ka lungawi lo zual. Lawmthu sawi a phut vang a nih chuan ka sawi hreh reng reng lo.
.
" Oooh... Chuvang chu ni maw min rawn tihbuai kher? Nizan avang khan ka lawm lutuk e. Tikhan a tawk em? I order chu ka rawn dah tir dawn nia" tih pah chuan ka kal hmak a, a nui hawk hawk ri chu ka hre zui nghal. A U nen an in ang tulh tulh mai.
.
Mapuia pawh a chhuak tawh a, ka U a rawn thleng tawh bawk. Ka khawsik pawh a awm leh tawh rih lo a, mahse ka taksa erawh a na them thum in ka hria. Chawhnu dar 2 vel ah Larson in min rawn lam a, hlawh a la chu ni in. Thawmhnaw ka en pui a, a duhzawng kan lei zawh chuan ka lu a nat deuh avangin kan in ah kan haw vat a, damdawi ka ei zawh chuan ka room lam ah kan thian dun chuan kan awm dun a, khum ah ka mu a, ani erawh tukverh bul ah thu in zial a zu hlat hlat thung. He mihring hi ka thian a ni lovang tih hi ka va han hlau ngawih ngawih tak em!
.
" Madinga nen kan inbia a" ka phone ka khawih mawlh mawlh lai chuan a rawn ti chhuak phawng a. Muangchangin amah chu ka va en a.
.
" Chuan?" ngaihpawimawh loh hmel zet chuan ka phone ka en lehnghal a.
.
" Ramtei nen an innei dawn" chu kher chu ka awih thei lo.
.
" Maw?" ka au thawt a, ka tha a khur nghal. Tinge hetia ka awm ngawt? Ani chu min kalsan tu, ka theihnghilh tawh kha a ni lawm ni?
.
" Anu duhdan a nia" a thaw halh a, Larson awmdan chu mak ka ti deuh.
.
" Amah pawhin a duh tho alawm" ka lo ti sep a, mahse ka thinlung hi ala na tho.
.
" A hmangaih chu nangmah hi i ni asin"
.
" Lar, dawt sawi a hun lo. Chuan, engtikah nge an tih dawn?" a thusawi chu thudik ni se ka tih rualin ka awih lo bur. Min hmangaih ni se khatiang khan a awm thut lovang. Chhan awm lovin min kalsan hauh lovang. Keiaia a thlan ngei chu a nei dawn ta alawm.
.
" Thil hi engmah i hre lo a ni. Te, madinga hian a nau tan a ni Ramtei a neih dawn?" Larson thusawi chu ka hrethiam lo tulh tulh.
.
" Khawngaihin sawichiang teh"
.
" Mapuia leh Madinga hi unau dik tak zawk an ni. Tun a Madinga nu nau fa te an ni. Madinga nu hian a fanu a neih hian a chhul an paih sak a, tichuan fapa neih loh chu ngaingam lovin chhungkaw remtihna ang in Madinga hi an fapa ang in an enkawl a, Mapuia erawh a nu in a enkawl thung"
.
" Lar, i sawi hi engmah ka hrethiam lo. Chumi avang chuan Madinga chuan Ramtei a neih a ngai tihna maw? Min hmangaih reng chungin maw? Tu dawt phuahchawp nge i hriat?" ka ti vak vak a, ka awih lo hul hual thak.
.
" Te, i tan chuan a awihawm loh mai thei. Mahse thudik a ni. Keipawhin ka awih bik lo, mahse Madinga ngeiin min hrilh a, chuan, Madinga pa hi ka Patea a ni bawk" Larson in a tih chuan ka ka hau ringawt. Thil awmdan teh nuaih chu ka hrethiam thei lo.
.
" Pa Mawia kha maw?"
.
" Aw, ni e. Madinga nu nen khan an innei lo. A chhan chu Madinga nu te lam chhungkua hi mi hausa an ni a, ka Patea kha an duh lo a, ka Patea pawhin chutia duh lo ngawih ngawih chu ti in ka Nutei hi a neihsan ve ta a ni"
.
" Mahse chumi vang chuan maw Ramtei a neih dawn?" ka la ti hram. Ka thu hriat chuan min thawng tak zet a ni.
.
" Ni mai lo deuh. Lo ngaithla phawt la chumi zawh ah i duh i sawi dawn nia. Madinga hi chuan engkim a hre vek a, Mapuia erawh chuan a hre lo thung. Madinga leh Mapuia hi phir an ni. Mahse Mapuia hian anu te lam a chhun zawk a, phir ah rau rau chuan an in ang lo khawp mai. Madinga an lak hian Madinga hi kum 4 a ni tawh. Tichuan fapa ang tak takin an enkawl a, Madinga takngial pawhin a nu leh pa an ni lo tih a hre mai bik lo.
Tichuan vanduaithlak takin Mapuia nu chu motor chesual ah a boral a, Mapuia chu a kalsan ta a. Madinga nu leh pa te chuan Mapuia chu an enkawl seilian veleh ta a ni. Mapuia nu a boral hian anni unau chu kum 14 an ni ve tawh. Tichuan Madinga chu chhungkaw fapa angin a awm zui a, Mapuia erawh anu fa a ni zui zel thung. Mapuia zia chu a danglam deuh bik a, anu in a mal khalh avangin luhlul pawh a luhlul deuh zawk bawk.
Kum 21 an nihin Madinga hian tihpalh tak meuhin a nu leh pa chu amah hringtu te an ni lo tih a hrechhuak a, ama sawi dan takin a awih duh chuang lo. A chhan chu an fapa anih lohna tur an enkawl dan ah a hre tlat lo a ni. Mahse nikum hmasa lawk khan Mapuia hi vairam a a awm laiin bike accident a tawk a, a kidney chu chhia in thlak a ngaih phah a, chutah chuan a ni Madinga chuan unau dik tak an ni tih a pawm ngam na chu.
Mapuia kidney pe tur chuan Madinga chu a in pe a, mahse vanduaina thuah hnih. Madinga chu heart problem alo neih avangin Doctor ten risk an la ngam lova, tuna Madinga nu hian a pe ta a ni. Mahse Madinga nu hian Madinga a blackmail ta tlat mai. A fapa ang a a enkawl seilen chu a hrin a nih loh thu a hrilh ta. Hetih lai hian Ramtei hian Madinga hi tih tak te in a ngaizawng a, mi hausa fanu a ni bawk. Tin, Madinga te sumdawnna kawng ah Ramtei pa hi mi pawimawh tak a ni bawk. Ramtei chu nupui a a neih dawn chuan a unaupa tan a kidney a pek sak tur thu a hrilh ta a ni awm e.
Madinga rilru na bawk si, mangang bawk si chuan a nau nunna atan a hringnun chu a hralh ta a nih chu. Chuta tang chuan a nun a hlim lo a, mahse tumah, apa ngei pawhin an hre lo thung. Nu rapthlak tak a ni. Tichuan Mapuia pawh a rawn damchhuak leh a. Mahse Madinga erawh a danglam ta vek thung. Anu nen pawh an inkar a danglam ta vek a, mahse tumahin an hriatpui lo thung. Tichuan Madinga chuan a hnathawhna atang a alo khawl ve chuan sumdawnna a bei ta a, anu lak atang a tal hran chu a duh ber a ni ta. Mapuia chu a ngaihtuah lo. Apa in an sumdawnna a enkawl tir dawn tih a chiang.
Mahse hmeihhe rapthlak chuan Madinga inthiarfihlim dan chu a hmuh hmaih bik hauh lo. Chutah Ramtei chu hlatin ngaihzawng dang a nei tih a hre leh zel. A awm mai mai ta bik hauh lo. Madinga chu avawihnihna atan a blackmail nawn leh ta. Ramtei kalsan a a invawm hrang anih chuan engkim Mapuia a hrilh tur thu a sawi leh ta. Madinga tan chuan kawng a ping viau mai. Mapuia chuan unau an ni tih hre lo se a ti lo. Mahse Madinga'n hre reng chung a a hrilh loh avang erawh chuan a unapa chu a haw dawn tih a hre sa reng bawk si. Chuvang a Ramtei hi nei tur a ni ta a ni. A tan kawng a awm lo. Mapuia mizia a hrechiang" Larson chuan a sawi zawh chuan a thaw hawk a, kei erawh ka thaw thei mang lo thung. Chutiang chu thawnthu ah bak ka la hre lo. Engtinnge a tak ah a thlen theih zawk?
.
" Ka awih thei lo" ka ti sap a, ka mittui a tla lek lek bawk. Tinge min hrilh mai loh le? Min hrilh se heti lo hian ka kal tir tur ania le.
.
" A awihawm loh zawk asin. Mahse ka Patea ka zawt a, a hre ve lo nangin a ring hmiah. Madinga nu nen an inneih loh chhan ah khan tun a Madinga nu hi a inrawlh nasa ber anih thu a sawi nghe nghe asin"
.
Mihring hi heti em em hian alo rapthlak theih tih ka hre lo reng reng. Madinga chu ava mangang thin dawn tak em! Keilahin engmah hre lo in ka lo haw ve em em a, ka indem zawk.
.
" Madinga chu ka va lainat tak em! Hmuh ka duh" ka tih chuan Larson chuan a lu alo thing nar nar a.
.
" Hmu lo mai rawh. Tihian kaltlang zawk rawh se. A hmuh leh che chuan a rilru kan tibuai tam zawk dawn a ni. Tumah hrilh loh ka tiam a, mahse nang erawh a hmangaih zia che hrilh tur erawh chuan min duh thung" a tih chuan ka lukham ah ka hmai ka phum a, ka tap hawm hawm thei. Mawla, engkim min hrilh la heti lo deuh hian kan awm thei ang mawle.
.
Larson chu ka bul ah rawn thu in ka hnung a rawn chul a, min khawngaih tih ka hria. Tinge hringnun hi a fair loh em em le? Ka tap ka ban hnu chuan Larson malchung ah chuan ka lu ka va nghat a, ka tahna lam ah ka lu na a zual lehnghal. Ka khawsik pawh a rawn awm leh vang vang tawh. Kan thian dun chuan kan ngawi vang vang a, kan rilru ah erawh Madinga te unau an awm ve ve ang tih erawh ka chiang. Ka lu rawn na tluk tluk chu ka hre ruai ruai a, abak ka hre chhunzawm ta lo.
.
Ka harhchhuah leh chuan ka mit ka meng a, ka khum ah mu in drip min lo khai a. Ka khum bulah chuan ka chhungte leh Larson leh Madinga an lo awm thap a. Madinga ka hmu chu mak ka ti ngang mai. Nui snagin min lo en a, mahse a hlim lo tih erawh ak hrechiang em em thung.
.
" Bawihte, ilo harh tawh maw? Na i nei em?" ka nu in alo tih chuan ka lu ka thing a.
" Nu, MMadinga hi ka be lawk duh a, khawngaihin min chhuahsan lawk thei angem?" ka tih chuan ka pa ho chuan min chhuahsan vat a, Madinga erawh a thutna ngai ah thu in a ngawi ngal thung.
.
" Engvangin nge min hrilh mai loh?" tah aw tiau a ka tih chuan a khuh kharh a, a che sawn hret a, ka kut a rawn vuan a, a kut chu a khur dar dar tih ka hre thei.
.
" Engkim hi Pathian ruat a ni. Lawm takin ka tih tur chu ka tih theih nan duhsakna min hlan zawk rawh" a tih chuan ka kut chu ka la sawn vat a.
.
" Mipa dawihzep tak ilo ni. Mapuia chu keimah hian ka hrilh mai ang" ka rilru ni miah lo chu ka sawi pek.
.
" I ti dawn lo tih ka hria. Te, tunah chuan engkim peihfel a ni tawh. Khuanu rorel hi kan dan theih a ni lo a ni" ka kut chu a rawn hum nawn leh a, kei erawh ka mittui a tla leh tawh. A fair hlawl lo.
.
" Ka hrethiam e. Hlim takin nupui i nei dawn nia. Chuan, haw la, min rawn hmu leh tawh ngai suh ang che. Ka haw tak zet tawh che" ka tap hlawp hlawp a, ka insum peih lo.
.
Ngawirengin Madinga chu a tho a, lehlam ka hawi tlat a, a chhuak tur kawngka a hawn rik te chu ka ngaithla reng a. Kal lo tur a dan ka duh. Mahse keia dan theih a ni si lo. Kha ramhuainu kha awm lo se tunah te hian kan tap hauh lovang. Aw, hmeichhe rapthlaknu, i unaunu fa te ngei chu bang kil ah nawr chepin i hmingthat zel nan hremhmun ah i paihthla zel chu ani sia maw? Fa pawh i nei ve a, eng ang nu nge maw i nih le?
.
Tunah chuan Madinga te pawh an inneih fel ta. An inneih ni khan engmah ka ti peih lo a, Larson leh Zamtei an rawn leng thung. Zamtei chu Larson in a car in a rawn phur phei a ni. Hlim luih chu ka tum ve viau, mahse ka hlawhchham chiang hle thung. Ka thiante 2 hi ka tan an hlu zual bik asin. Ka tap a, ka mittui an hru hul a, min hrethiam em em bawk. Tawng mang lovin nilengin ka bul ah an awm peih anih kha.
.
Mapuia pawh kan dawr ah lo kal in kan inkawmngeih ve tulh tulh a, a chang chuan mipa nuih duh tak a ni ve thin. Sumdawnna a enkawl chungin a hunawl chu kan dawr ah a rawn hmang hram hram thin. Min ngaina tih pawh ka hria. Mahse a U vangin keichuan unau ang bakin ka en meuh lo. Hmeichhe tha tak a phu a ni.
.
" Tei, naktuk hi ka birthday a nia, ka U nen kan birthday a in ang a, kan in ah chaw rawn ei tur in ka sawm duh che a" Mapuia thil ei zo chu counter-ah a rawn ding kawi a. A thusawi chuan min ti phu nasa ngei mai.
.
" Awi, keini ang te chu a. Bakah..."
.
" Khawngaihtakin 'Aw' ti hram rawh" a tawngkam thiam loh ngaihtuahin min ngen ngawl hle tih hrethiam thei turin kan inkawmnel rei ve thawkhat tawh.
.
" Ka lo ngaihtuah ang. Ka pa te dil phawt a ngai dawn a" ka ti ta nge nge. Ka chhan dan ah chuan a lungawi ve aniang, nui var var in min mangtha a, a haw zui nghal.
.
Larson sawm ve ka duh thu a tuk chhun a Mapuia phone a ka va hrilh chuan alo phur ngang mai. Larson nen hian an innel viau tawh. Mahse in cousin an ni tih erawh a hre ve lo thung. Larson ka va sawm chuan a chak vaklo nangin Mapuia tih hnual ka hreh tih a hrethiam a, aw min pawh ta nge nge. Ka pa ka be leh a, ka pa chuan haw har lo tur a min hrilh hnu chuan dawr ah chuan ka insiam mawlh mawlh a, ka U leh ka nau an awm tho bawk a, ka free ve thei chiang alawm.
.
Larson chu chawhnu dar 3 velah min rawn lam a, bazar ah kalin present tur kan lei kawi a, Madinga ta tur in Larson chuan a lei a, keiin Mapuia ta tur thung. Kan va thlen phei chuan dar 5 a ri dawn hnai tawh a, mi pawh an lo awm ve nual bawk. Madinga hmuh ka huphurh lutuk chu Larson chuan hrethiam in awmdan tur min hrilh char char a, hepa hi chu thian tha ava han tling chiang em!
.
Mapuia chuan an gate bul ah min lo hmuak a, a hmel chu a nung sarh a, kan kal avang chuan lawmthu a sawi mawlhmawlh bawk. Ka hriat tirh a mipa cool leh chapo zet kha a nih lohna a rei ta. Mipa akwm nuam tak a ni. Engemaw chang erawh chuan a bung leh nghut thin. Chuerawh ka hrethiam lutuk. Madinga nau anih vang hrim hrim pawhin ka ngaina zual tawh a ni. Ngaihzawng lam erawh chuan ka en ngai hauh lo thung.
.
Inchhung kan luh chuan cake an lo zai tawh alo nia. Chaw ei an lo tan der tawh zawk a ni. Hall lam ah min hruai phei a, ka huphurh ber a chhungte hmuh chu ka hmachhawn dawn ta. Madinga leh Ramtei chu an lo ding vat a, inhresa kan ni tih erawh tumahin kan tilang hauh lo thung. An nu ber erawh min hnungchhawn zawngin midang nen an inkawm a, apa kan chibai zawh chuan a nu chu a ko a, a rawn lehhawi chiah a ka hmel a hmu chiah chu....



CHAPTER -9

 " Nang"
.
" Ka nu, hei ka thiannu Tei ania, ani hi Larson anih hi" Mapuia chuan a nu tawng zawh hma chuan alo tih khalh a, a nui sang bawk.
.
" Anih chu a" tawi tak a Nu Biaki (Madinga nu. A hming hi Larson min hrilh a ni) chuan a ti bung nghat a. A hmel hi ka lo la hmu ngai lo a. A hming atang ringawt pawh a hlauhawm tawh naklaiin a hmeltha tak phen a a mitmeng chu hlauhawm tak a ni. Nutling, mahni induhtawk tak anih zia a hriat em em bawk.
.
" Kan inhmu chu ka lawm e" tih pah chuan ka kut ka phar chhuak a, enge ka hriat ka hre lo. Mahse chibai ka chak tlat pek. Mahse ka kut chu ka phar chhuak thlawn chiang khawp mai. Lehlam hawiin a mi biak te chu min biak san leh hmak. Min hre sa tawh anih ngei dawn hi. A mitmeng en khan min huat zia a hriat. Mahse hlauhna engmah ka nei lo.
.
" Te, chaw kan va ei tawh dawn mi niang? Ka lo nghak cheu a. Ka U te nupa pawhin an la ei lo. Va ei ang u" Mapuia'n a tih chuan Madinga te nupa an awm ve tih ka hrechhuak leh chiah.
.
Kan chaw ei lai chuan Mapuia leh Larson chu an tawng mawlh mawlh a, kei leh Madinga te nupa erawh kan ngawi ran hlawm thung. Chaw eikham chuan rei thu khawmuang lo in Larson chhuanlam siam remchang a la in ka haw san vat thung. An inchhung kha a ropui a, nawm pawh a nuam. Mahse a chhung a thil inthup rapthlak tak kha keichuan ka zo meuh lo chu a ni. An pa ber khachu pa fel tak anih ka ring. Tin, an fanu neihchhun pawh a fel bawk. An nu in hetiang khawp a thil rapthlak hi a ti tih hria se an pafa chuan an zak ve khawpin ka ring.
.
" A hria che tih a chiang" Larson chuan kan in kan thlen hnu a thingpui kan in lai chuan a rawn ti chhuak phawng a, ka lo ngaihtuah ve lai mek tho.
.
" Anih hmel. Mahse enge buaina tur a awm ami?" ka lo ti sam et a. Mahse keipawhin ka zawhna chu a chhanna ka hre ve tho. Buaina chu a awm khawp ang. A fapa hmangaih ka ni a, keimah vangin a fapa chu a blackmail a ngaih phah a, a duh ang tak a nupui a neih tir tawh hnu ah a fapa te zawk nen thian kan lo ni lehzel bawk nen. A fapa meuh pawh blackmail duhtu chuan keichu min nghaisa hreh hauh lovang tih a chiang reng.
.
" I fimkhur dawn nia. Keipawh tu fapa nge ka nih a hrechhuak vat ngei ang" Larson in a tih leh chuan ka thaw hak a. Eng buaina ah nge ka inhnuhluh tak ka hre lo. Mahse tlanchhiat ka tum hauh lo. Ka nun ah hian thil tha ka ti tam lo. Tunah hian thil tha tihna hun tha ka hmu ah ka ngai. Min hmangaihtu, keipawhin ka duh ngawih ngawih mipa chu a tawrh tawhna bak tuar chhunzawm lo tur a venhim ka tum ta tlat a ni.
.
Mapuia birthday hnu atang karhnih a liam leh tawh. Nitin deuh thaw Mapuia nen kan inhmu a, mahse a hma ang in a hlim sarh lo tih a awmdan ah ka hria. Chutihrual erawh chuan min hmuh chuan hlim ang takin a awm thin. Mahse a der a nung thiam lo mipa a ni tlat. Nidang ah chuan alo kal hma deuh a ka U in dawr a nghah ve tho chuan bazar-ah te kalin kan bazar dun ve zauh zauh thin. Mahse tunah chuan ka sawm pawhin chhuanlam a siam ta fo mai a, anu a che tan tawh a ni ngei ang.
.
" Tunlai chu i mizia hi a danglam riau mai" khum a mu chung chuan Mapuia chu ka va msg a, a online reng. Mahse min reply lawk lo thung. Min chhang chaklo anih ringin ka phone chu ka lu bul ah dah in mutthilh tum chuan ka mit ka chhing a. Ka muhil siar siar tan tawh tihin ka whatsapp tone a rawn ri zauh a, rang fahran chuan ka hawng nghal a. Mahse ka tum loh zawk Madinga a ni tlat. Nupui a neih hnu ah kan inbe leh miah lo a, Mapuia birthday ni kan inhmuh bak kha kan inhmu ngai lo bawk.
.
" Tei, i tanpuina ka rawn ngen duh a ni" ka chhiar zo chu mak ka ti khawp mai. Ani meuhin ka tanpuina a rawn ngen chu.
.
" Eng thil nge ni ta?"
.
" Mapuia hian ka rilru ang a pu a ni" ka thaw hak a.
.
" I ngaihdan mai mai anih ka ring" chhan dan vak ka hre lo.
.
" Ka ngaihdan ringawt ni lo in ka hria a ni"
.
" Anih chuan enge ti tur a min duh?"
.
" Pui rawh" teh tawp mai a.
.
" Amah pawhin engmah min hrilh hleinem" ka ti leh talh a, ka rilru erawh chuan puih ka tum daih tawh thung a ni.
.
" Keiangin a rilru a tilang kher lovang. Mahse chance pe thei la ka lawm khawp ang" a rawn tih chuan chhan ka tum tawh lem lo.
.
Karkhat zet chu Mapuia ka hmu tawh lo. Min be ngai lova, ka phone call a pick ngai lo. Msg phei chu ka thawn peih tawh lo hial zawk. Larson hnen a ka hrilh chuan hlat turin min duh ve tlat thung. Buaina a inhnuklut tur in min duh lo a ni tih chiang takin min hrilh tlang nghal hmiah. Zamtei pawh ak hrilh a, Zamtei erawh chuan Mapuia chu be pawp a, nun bul tan thar pui turin min duh thung. Ka thian tha ber te pahnih ngaihdan a in ang ta lo phawt. Ka chhungte chuan engkim hre ta se hlat turin min tih ngei ka ring. Mahse ka hrilh duh hauh lo thung.
.
" Ka phone call leh msg chhang hman lo khawp a buai chu a lalna ram ah kalchhilh mai tur tih hi ka ngaihdan a nia" Mapuia dawr a ka va luh chuan a thutna hma ah dingin ka va ti nghal ngat a. Muangchang a rawn hawi chhuakin mit ti zim san in min en a, a hmel tla kuam chu hmuh hmaih chi a ni lo. Mahse chu chuan a tilang puitlingin a tilang pa zual tlat thung. Ka thutlukna hi ka tihsual loh hram ka beisei.
.
" Taxi-in ami i rawn kal?" ka thusawi chu chhang lo in zawhna min zawt let nghal hmak a. Midang chu ni se ka lungawi lohna ka tilang ngei ang. Mahse chu chu ka ti thei rih hauh lo.
.
" Anih mai loh chuan" tih pah chuan an dawr chhung chu ka hawi kual a, a lian teh e. Tin, hnathawk pawh an awm nual dan ah sumdawnna lian tawk tak tih a hriat em em bawk.
.
" Pawn alm ah inbia ang" tih pah chuan a rawn tho a, ka ban ah kaiin kawngka bul a patling tawh lampang lo ding chu a chhuah a ngaihthu leh lo enkawl tha tur a hrilh in min kai chhuak hlawk hlawk a. Hmeichhe thuawih thei tak angin min kaihna lam ah chuan ka kal ve dawr dawr tawp mai a ni.
.
A car a min thut tir hnu chuan amah pawh a rawn thu lut ve nghal a, chak zetin chhim lam hawiin a tlan chhuak zui nghal. Kan tlan thui tulh tulh a, Ngaizel kan pel phei, a reh phei tial tial. Vawikhatmah ala tawng lo. Keipawh tawng ka tum bik lo. Min hruaina tur hmun ah min hruai se, chutah chuan ka tawng chauh ang. Kawng peng ah tlan lutin metal loh a ni. Thui valo kan tlan hnu chuan veilam ah a peng leh a, 1km vel kan tlan hnu chuan in pakhat, luah lum vak loh tih hriat zet, lian lutuk lo, thing hmang vek a sak kawt ah chuan a ding dat a. Ngawirengin a chhuk a, keipawh rang zet chuan ka chhuk ve nghal.
.
Chahbi la chhuakin in chu a hawng a, a chhung a kan luh chuan a nuam reuh kher mai. Bungraw manto a awm lo. Mahse a in nen a inhmeh tur takin bungrua erawh a awm ve biai thung. Ka hawi kual a, in hnung lam ah chuan zawl zau vak lo a awm tih tukverh atang chuan a hmuh thei.
.
" Engvang a min hmu tur a lo kal nge i nih?" rei tawk fang thutthleng sei a inhmatawn a kan thut hnu chuan a rawn ti nghut a, a hmel chu hriatthiam har tak a ni.
.
" Engvang a min be duh miah lo nge i nih ka hre duh a ni"
.
" A chhan chu ka be chaklo mai che a ni" a lawmawm lem loh khawp mai.
.
" Anih chuan engvang a helai hmun a min hruai nge i nih?" ka ti let ve hmak a. A hmel buai nak chu reilo mahse ka hmu hman ve tlat thung.
.
" Min nei duh em?" a thusawi chuan min ti phu nasa kher mai. Ni e, ka rinloh lutuk thil daih a ni a sawi ni.
.
" Mapui, enge i ngaihtuah a? I thusawi...."
.
" Ka thusawi ah ka chiang. Min nei duh angem? I duh loh chuan ka nun atang kalbo in rawn inlan loeh tawh ngai lo la. I duh anih chuan hun ka nghak thei lovang" a thusawi tin mai chuan min ti phu dawrh dawrh a ni ber mai. Inngaihzawnna pawh akn la nei lo a, inneih han sawi mai chu a lutuk mah mah in ka hria.
.
" Bungrua emaw min ti ami? Inngaizawng pawh akn la ni lo a. Bakah..."
.
" Tunah hian kan inngaizawng nghal. Thla 2 hun i nei. Thla 2 hnu ah palai ka rawn tir ang. Harsatna i nei em?" ka sawi zawh hma chuan a rawn ti leh hmiah. An unau puih ka tum dan chu a hlawhchham titih der mai. Enge tih tur ka hre mai rih lo.
.
" Chutingawtin pasal ka nei thei lo. Tin, min hmangaihtu leh ka hmangaih ve theih tur lo chu pasal ka nei hauh lovang" ka ti ve ngat a. A lo nui hak a, mahse hlim vang a nui ani lo tih erawh ka chiang em em thung.
.
" Thla 2 chu inhriatchian tawn nan leh inhmangaih nan a tawk i ti lo em ni?" a tih chuan a aw chu a nem ta deuh a, a mitmeng erawh a ngainatawm chuang hauh lo thung.
.
" Engvang a min neih duh nge i nih?"
.
" A chhan chu ka hmangaih che" awlsam te chuan alo ti mai a. Mahse a hmel chu a thutak em em thung. Madinga thusawi kha ka hrechhuak zawk. Mahse min hmangaih a min nei duh anih pawhin tha takin a sawi thei lo em ni le?
.
" Lo hmangaih ve ta lo che ila" a rilru hriat tum tak chuan a mit ah ka en ran a, mahse ka thusawi chuan a shock tehchiam lo a ang.
.
" I tum dawn alawm" a ti leh nghut a. Ka nuih a za lek lek zawk. A zei lo nge a tihdan ve hrim hrim niang le?
.
" Inngaihzawn chhin chu ka tum thei ang. Mahse thla 2 hnu ah inneih lam chu akn la sawidun leh dawn nia" ka ti sap a. A thaw huai ri chu a hmel en duh lo a hnuai lam ka bih chungin ka hre tho.
.
Mapuia nen chuan kan inngaizawng chu a ni ta der. Larson ka hrilh chuan a lungawi chiah lo nangin ka thutlukna siam erawh min zah der sak thiam khawp mai. Mahse a zia erawh a dang ta deuh. Ka dem lo. Thisen a a cousin te an ni a, chutah a thiannu ber buaina ah ka inhnuklut mek bawk si, chu chu a duh lo a ni ve mai. Min hlat deuh ka tih hian inhua kan ni lo. Mahse buaina ka nei anih erawh chuan ka tan a awm reng dawn thu erawh min hrilh thung.
.
" Ka nau chungchang ah ka lawm e" Madinga msg a ni. Inbiak ka chak lo. Amah a ka rilru puthmang hi ala danglam hauh lo. Mapuia hnen atang an nupa an hlim vakloh thu chu tlem azawng ak hre ve. Mahse min hrilh tam lo. Min hrilh chhan pawh a U nun hlim lo lutuk mak a tih vang leh a ngaihtuah vang a ni.
.
" Lawmthusawi a ngai hleinem"
.
" Buaina ka thlen ta teuh che a, pawi ka ti"
.
" Mapuia nen kan inkar hi buaina ah ka ngai lo. Ka duh vang reng a inkawp akn ni" ka tih hnu chuan min rawn chhanglet ta lo. A dinhmun khawngaih viau e ti lo chuan achang chuan han tihnat let ve salh ka chak leh thut thin. Mi tha famkim ka ni bik tlat lo alawm le.
.
Karhnih kan inngaihzawn tlin hnu chuan Mapuia pawh kan in ah a rawn leng zing ve ta viau. Madinga nau anih thu pawh ka sawi a, ka pa chuan min hau lem lo nangin a tui vaklo tih erawh ka hria. Mahse Madinga nen kan inkar kha a hlawhtling lo tih an hre ve deuh reuh tho a, thian ang in kan inkawmzui ang in an ngai. Tunah a nau nen akn inkawp chu a ni leh ta reng mai chu ania. Mahse Mapuia a fel hrim hrim a, an ngaina ve thuai thung. A U nen an zia in anna tam tak a awm a, ka pa ngainat chi a ni tlat a ni.
.
Dawr kan khar fel hnu chuan ka U leh ka nau chu an haw hmasak avangin Mapuia chuan min rawn lam a, kan inngaihzawn hnu hian a mizia a danglamin min care em em a, ka duh loh zawng thil engmah a ti ngai lo. Mahse an in ah erawh min hruai a tum lem lo. Chuerawh pawi ka ti hauh lo. Inneih chungchang pawh ka ngaihtuah a, ka hnial lem lo. Tin, Mapuia hi ka hmangaih theih pawh ka inring bawk. A chhan chu mipa tha tak a ni miau a. MAdinga kha ka hmangaih ka hre lo. Mahse ka duh a ni. Hmangaihna leh duhna hi a in ang hauh lo. Chubakah, Mapuia hian thudik a hriat a ngaiin ka hre bawk. Madinga lahin a hrilh dawn der lo tih ka chiang. A hmangaih loh vang ni lovin a hmangaih lutuk vang zawk a ni.
.
" Karkhat chiah hun a awm ta" Mapuia chuan car khalh pah chuan a ti sup a. Min bia nge a rilru a awm a sawi ve tawp pawh ka hrethiam lo.
.
" Engtikah nge palai i rawn tirh dawn?" ka tih chuan car chu a tiding dawt a, makti zet chuan min en a, keilah ka lo nuisang thung. Ka thutlukna ah hian ka chiang a ni. Hringnun hi game a ni a, chu game chu kan khel reng a, keipawhin game phurawm tak leh huphurhawm tak ka khelh belh dawn ah ka ngai.
.
" I inpeih tawh chuan ka pa ka lo be dawn nia" tih pah chuan ka kut a rawn vuan a, a kut chu ka lo hum let vat a, a nui suk a. A U nui nen ava han in ang tehreng em!
.
Engtinnge Mapuia chuan apa a hrilh ka hre lo. Mahse kan inngaihzawn thla hnihna a tlin chiah in palai hmel kan hmu ta. Ka pa te an phu nasa. Mahse ka duhthlanna a ni a, min zah sak. Larson a lawm lo lehzual ngei mai. Chung zawng zawng aia lawm lo tur chu Nu Biaki a ni dawn a ni. Entinnge a chet dawn ka hre hauh lo. Mahse engpawh ti se ka hmachhawn zel ngam tlat a ni.
.
Rinloh takin Nu Biaki a che hauh lo. Kan inneihni pawhin tha takin min lo lawm a, mahse a mitmeng ah erawh thil awm a awm a ni. Ka chiang bawk. Ka pasal neihni chu Mizoram chhung a sumdanwg lian ber mai fapa nupui neihni a ni bawk a, a ropui mep mep e. Madinga erawh inneih inkhawm zawh a ka hmuh bak ka hmu mang lo. Ka thiante pawhin min tawiawm tha a, ka chhungte lam pawh an lo kal thahnem khawp mai. An sawidanin Mizoram inneihna awm tawh a pui ber pawl an ti hial a ni. Ni e, a pui ang. Ka pasal neih chhan pakhat pawh a pui alawm. Chuerawh nakin lam ah a hre turin an la hre mai dawn a ni.
.
Karhnih ka mo ve ta. Mapuia pawh a felin min duat thiam khawp mai. Ka nu pawh ala tha khawp mai. Mahse min be tam lem lo thung. Madinga te nupa chu chaw ei laiin kan inhmu tawk a ni ber mai. Ka rilru ti na em em tu chu, Madinga chuan zu in alo ching ve tawh tih ka hria chu a ni. An nupa chu an hlim lo tih a hriat em em a, Ramtei chu in ah a awm tlem em em a, a awmchhun pawhin min be ngai lo bawk. Keipawhin biak en ah ka en bik lo. Min be chaklo anih chuan biak luih talh ka chak bik chuang lo. Mapuia hriat ah erawh tupawh akn inbe tha em em thung. Ka pa mawlh hi a fel ka ti. Min duat a, min ngaihsak em em bawk. In a ka awmpui tam ber anih avangin ngainat pawh ka ngaina ber bawk.
.
" Te, naktuk ah sumdawnna thil ah Delhi kal ka ngai a, i huphurh em?" Mapuia chuan a thawmhnaw hak hlip mawlh mawlh pah chuan a ti a, mipa tha tak a ni. Min ngaihsak a, min duat bawk a, dawr a a kal anih loh chuan ka tello in a chhuak ngai lo.
.
" I rei dawn em?" tih pah chuan a thawmhnaw chu ka lo dahfel sak malwh mawlh a. diktak chuan ak ngaina tawh lutuk tlat. A tello a lo awm chu ka chak zawk zawk lo.
.
" KKarkhat chu cham ngei a ngai dawn anih hmel. Sawrkar lam in office building sak thar ami tur khawl pawimawh an rawn order a, ka buaipui a ngai dawn a" tih pah chuan inbual tur a towel veng chung chuan a thawmhnaw ka dah fel lai chu ka kawng ah a rawn kuah a.
.
" Thu lawmawm tak anih chu. Mahse ka ngai ngawt ang che" tih pah chuan a kut chu ka lo vuan a. Ka rinaiin kan nupa hi kan inrem phian a ni.
.
" I hreh deuh chuan ipa te in lam ah ilo va riak thei ania" a tih chuan a lam hawiin ka in her a.
.
" Min zinsan hmasak ber atang ka pa te in ka pan anih chuan a lehpek a chawh zel ang. Ka lo amw thei lutuk ang. Min ngaihtuah duh suh" tih pah chuan a hmui ah ka fawp zeuh a, duhthawh zet chuan min lo fawp let nghal.
.
Mapuia zin ni chuan ka pa chuan ka khawhar hlau in min ngaihsak em em a. Kan nula te lah inchhung chet ka tih va an phal bawk si lo. Nilengin ka pa nen kan ti ti dun a ni ringawt. Ka nu erawh dawr lam ah a awm a. Ka pa aiin ka nu hian dawr awm a taima zawk a ni. Madinga lah a dawr a nghak bawk a, Ramtei chu an inneih hnu lawk ah a hna a bansan a, mahse nitin an pa dawr nghak ava veng thin thung. Chaw ei rual kan nei mang lova, a chang chuan tlai tak ah an nupa in an rawn haw a, Madinga chuan zu rim a rawn nam haw ngei ngei thin. Mahse rui lutuk ang chuan a awm ngai lo thung. Min be em em lova, keipawhin ka be ngai lem lo. A chang chuan Ramtei nen chuan han ti ti ve zauh chang chu kan nei.
.
" Tei, kan room lam ah min rawn zui teh" ka nu chuan dawhkan a pangpar awmna lai ka tihfai lai chuan a rawn ti a. vawiin hian ka nu hian nuawm loh chhuanlam in ka pa dawr nghak turin a ngen a ni.
.
" Engenita? Ka nu" ka nu te room-a ka va luh chuan ka nu chu sofa-ah thu in a hmel a nelawm loh kher mai. Tunah chuan game diktak kan tan dawn tih ka hrethiam nghal.
.
" Aw le. Ka fapa upa zawk i chan loh hnu ah ka fapa naupang zawk hi engvang a la rawn nei lui talh nge i nih?" nelawm loh zet chuan min melh a, thenkhat tan chuan zam ngawih ngawihna tham a ni.
.
" I sawi awmzia ka man hauh lo mai" angaihna hriat loh hmel zet chuan ka meng kual vel a, chu chuan a ti thinur khawp mai le.
.
" Pawisa i duh anih chuan sawi la, ka pe ang che. Mahse Mapuia lo let hma ngeiin he in hi chhuahsan thung ang che" thinrim insum tak chuan a ti leh nghat a. Nu namai lo tak ani chiang alawm.
.
" Ka nu, sum vang a pasal nei ah min ngai anih chuan pawi ka ti. Ka pasal hi ka hmangaih a, ani pawhin min hmangaih a ni" ka ti ve ta. Mahse ka thusawi chuan a nuih tir ta ar ar mai le. Angaihna hre lo zet chuan ka en a.
.
" I pasal hian a hmangaih che emaw i ti anih chuan i tisual hle ang. Hmangaih pakhat chiah a nei. Apa in a duh pui loh vang a apa rilru dam nan a nupui nei chauh a ni" a tih chuan ka na ve sak mai. Mahse chu chuan ka intihb uai tir tur a ni lo.
.
" Hmangaih hmasa neih chu a thiang alawm. Tunah chuan a nupui ka ni tawh a, chu chauh chu ka ngaihtuah a ni bawk" ka tih chuan a hmel chu a hamhaih deuh a. Kei erawh ka nui sak thung.
.
" Hmangaihna ropui tak a nih dawn chu. I pasal chuan hmangaih che ni se tunah hian a hmangaih hmasa chu hmu turin chhuanlam a siam hauh lovang. Khawnge a awm a? Tu nen nge an awm? Heng hi i hmangaih anih chuan hriat i tum mai dawn nia. I chhuak thei tawh ang"
.
Hei hi ka nu nen a kan inbeih tanna chu a ni. A thusawi erawh chuan min ti na ve lo thei lo. Enge ka tih hmasak ber ang ka hre mai lo. Tunge ka pun ang? Madinga ka rilru ah a awm hmasa ber a. Mahse ani chuan a nu a beilet ngam loh avangin a hmangaih ni lo nupui ah a nei tawh a, tunah pawh a ngam chuan ka ring lo. Larson lah ka tibuai ngam miah lo bawk.
.
Mapuia lo haw nan nikhat chiah a awm ta. Kan in be reng tho a, mahse a kal hma kan boruak ang erawh kan kar ah a awm ta lo. Chumi vang erawh chuan ka biak ka thulh ngai hauh lo thung. Ka nu nen kan boruak lah sawi theih si lohin a rit em em bawk. Mo thar ve chauh a, boruak rit han tawn nghal chu a hahthlak ve duh khawp mai. Mahse hemi hresa a nei ka ni bawk a, ka tuar thei viau bawk.
.
Mapuia rawn haw ni chuan hmuah ka tum viau nangin ka pa hnen ah hmuah a ngaih loh thu leh office-a dawr nghal tur thu a rawn sawi avang chuan tumahin kan hmuak ta lo a, ka rilru erawh a nuam miah lo thung. Madinga chu a nawm loh deuh avangin in ah a awm a, ka nu leh pa dawr ah an kal ve ve bawk si, Ramtei lah dawr a nghak daih bawk. In a awmdun e ti lo chuan nilengin kan inhmu lo a ni. Chhun thil ei hun ah an room-ah eitur an han pe a, keipawh ka pasal lo haw tur atan ka inbuatsaih ve nasa khawp mai. Ka nu sawi kha thudik ni turin ka dah phal lo. Thudik ni ta se a tan a ka beihna hi engmah lo a ni dawn si a. Nge Mapuia tan nge ka beih Madinga tan? Ka inhrethiam teh nuaih tawh lo e. Ka tih loh tawp tur thil ka ti ni in ka inhre ve tan ta.
.
Mapuia a rawn thlen chuan a chauh hmel in biak a nuam tehchiam lo kher mai. Kan nupa room-a kan pahnih chauh a kan awm hnu ah pawh tawng hmasak tumna a nei lo aniang, a ngawi reng a, lehkha pawimawh ni awm tak a khawih a, min ngaihsak lo hrim hrim.
.
" Tihsual ka nei em ni?" a bul a va thut pah chuan ka ti ta nge nge.
.
" Khawngaihin ka buai a, hunthawl min lo pe rih ta che" min en miah lo chuan min tihkhum leh hmiah a, ka thaw hak ringawt. Ka nu khan a sawi dik ngei ang.
.
" Aw le. Muttui le" tih pah chuan khum ah chuan lawn kaiin ka mu ta hmak a. A chhan sawi lo a min biak chak loh chuan keipawhin ka be chak bik lo e.
.
" Naktuk ah i nu te in lam ah riak phei rih la, karkhat hnu ah ka rawn lam dawn che nia" ka muhil tep tawh chu a rawn ti hmak a, ka thu chhuak rang ngei mai.
.
" Enge thil awmzia?"
.
" Hunthawl ka mamawh a ni. Ka rawn lam leh ngei ngei ang che" a hmel buai nak chu ka en reng a, thil awmzia ka hriat ngei a ngai a ni.
.
" A chhan hre lo chuan ka kal miah lovang"
.
" Tei, ka sawi tawh kha. Hunthawl ka mamawh a ni" a awmdan ah chuan a rilru a buai hmel tak tak a ni. Ka pasal hi mi luhlul tak ni mahse rilru no tak a ni a, ka hrechiang a ni.
.
" I duh loh a i paih chhuah leh tur in engvang a min nei nge i nih?" ka thusawi avang chuan a bek chu a pawng talh talh a, ka cho chhuak chiang khawp ang.
.
" Ka duh loh thil ka nun ah ka seng lut ngai lo"
.
" Anih chuan i nupui ka ni a, i ta chu ka ta ani. Mi hrang ang mai a sawn chhuah mai mai theih ka ni lo" ka ti ve ngat a, a kut hum ruh tlat chu ka hmu reng, mahse hlau lo ang a ka chhan let a ngai rih miau si a ni.
.
Kan nupa nun chu sawithiam si loh chuan a tang at a, chutih karin ka nu lah in tawngkam mei nei min hman khum zauh zauh bawk. Mahse chuerawh chuan min tibuai hauh lo. Mapuia zu in ching ta erawh chuan min ti na fo thin. Madinga te nupa lah a langin an hlim lo tulh tulh bawk. Ramtei'n huat hmel zet a min melh thin chu hrehawm ka ti thin kher mai. Ka pa meuh pawhin an nupa in a khak ta zauh zauh. Madinga erawh chu a ngawireng zel. Keini nupa lah hlim lo bawk, inchhung hrehawm tak chu a ni chiang a ni.
.
" Vawiin chu ka pa te dawr ah ka va kal ve teh ang" Mapuia dawr kal tur insiam lai chuan ka ti a.
.
" A pawi hleinem. Mahse ka va thlah hman awm lo che ve"
.
" Keimahin ka kal thei alawm"
.
" A that chu. Ka kal nghal dawn ania" tih pah chuan a chhuak zui nghal a. Kan inneih hlim a kan hlim lai kha ka ngai ve vang vang thin.
.
Ka chhuak tur chu Madinga kal tur nen kan chhuak rual a, Ramtei erawh a nawmsam loh avangin apa te in lam ah a riak thung. Falkland lam ah a kal dawn tho avangin a rual a kal ve tur a min tih chuan ka hnial duh lem lo.
.
" Mapuia hi a zia a dang riau in ka hria" Madinga'n motor khalh chung a a tih chuan ka dar ka san ak a. Hrilh tur nge hrilh loh tur ka hrethiam lo. Lehlamah an nupa kar ah pawh a buai tam tawk viau mai a, han tihbuai belh leh chu tha in ka hre meuh lo.
.
" A hnathawk nasa hi a chau ve deuh aniang"
.
" I tan hrehawm khawp a a chauh loh hram ka beisei" a tawngdan chuan min ti amw nuam lo. Min ngaihtuah hmel lutuk chu ka duh lo nge ka inthlahrung ka hre lo.
.
" Ka tan chuan a tha reng alawm. A tawng tam lo ve hrim hrim bawk anih hi" ka ti sap a. Nupa nun pawh kan hmang dun lo rei tawh tih chu sawi kher a ngai ka ti lo.
.
" A that chu. I chung ah ka lawm khawp mai"
.
" I lawm nan a ti ka ni lo. Khatiang zawng chuan sawi lovang. Ramtei chu a zia deuh tawh em?" kan ti ti chu thlak ka duh. Ka pasal neih hnu a pangai tak a kan ti ti dun hmasak ber anih ka ring. Diktak chuan kan in hel hram hram thin a ni.
.
" Ka hre lo" teh tawp chuan.
.
" U Mading, ka sawi tur ani em ka hre lo a, khawngaihin zu in tawh suh. Mapuia in pawh tih tawh laiin nang lehzel chuan in ve tawh suh" ka tih chuan chiang deuhin min rawn en zawk a, hmalam a hawi lehnghal.
.
" Ka tan chuan khawhar hnemna awmchhun a ni rih tlat a ni" a ti nghut a, a thaw hak bawk.
.
" Fa nei ula" ka thusawi avang chuan ka inchhir leh chiang kher mai. Kei ngei pawhin a rukin indanna ka ei ve tho sia. Mahse keichu ka ei chhan a awm. Ka pasal te unau veng tur chuan fa ka la pawm thei lo a ni.
.
" Nupa kar ah pawh pahnih in kan duh rual loh chuan a neih theih ngawt bik loh anih hi" tih pah chuan a rum kawk a. Tunge neih duh lo zawk ang le?
.
" Kan thleng e. I haw har dawn em?" ka pa te dawr kawt kan lo thleng der tawh.
.
" Dar 2 vel ah ka haw ang chu ka tia. Nang?"
.
" Keipawh chutiang vel ah chuan. Ka rawn alm kawi leh dawn che nia" a tih chuan hnial ka duh zet a, mahse ka hnial leh duh ta lo. Unau kan ni tawh a, ka tlanchhiatsan zel tawh dawn lo. A nun khawhar zia ka hrethiam ta bawk.
.
Ka unaute nen kan han inhmu chu kan hlim dar dar khawp mai. pasal nei bik lutuk ti in min fiam fo thin. A chhanc chu thla 5 kan innei ve tawh. Kan in lam ah vawihnih bak kan la leng lo. Chupawh ka nu damloh vangin kan nupa in kan va tlawh a ni. Phone a kan inbiak reng hlawm tho avangin ka ngaihdan ah chuan pasal neih hnu a mahni in lam a kal sek hi tul ka ti lem lo a ni.
.
Dar 2 rik hma hretin Madinga a rawn thleng a, ka U nen chuan an ti ti luam a, rei thu lovin kan haw zui ve nghal. Mahse a bak zawngin kan tlan ta tlat. Ka ngaih a tha ta lo. Madinga khawhar hian thil tha lo a ngaihtuah ka hlau tak zet a ni.
.
" Hey, khawnge kan kal dawn?" hlauthawng zet a ka tih chuan a nui suk a.
.
" Huan ah kawi lawk ang. Hlauthawng suh. Ka nau i nih tawh kha" a tih chuan rilrubet lo zet chuan ka nui ve sek ringawt.
.
Huan kan zuk thlen chuan huan enkawltu te chu an naute a damthat loh avangin a nu in alo entir daih a, an pa chiah alo awm. Madinga chuan Theihai um tur a duh avangin min lawhsak lawk tur chuan a ngen a, Pu thuama pawh chu phur deuhin theihai lo tur chuan a kal ve nghal bawk. Inchung ah chuan thu in a polythene khai chu dawhkan ah a rawn dah a, savawm alo lei reng chu ni in. Khawlum nen, a inrem khawp mai. Mahse pasal ka neih hnu hian ka la in leh miah lo a, in loh hram ka duh a ni.
.
" I duh ve tho ka ring a, ka rawn lei kep che. Hlauthawng suh, in pa ka hrilh lovang" a tih chuan ka nui ringawt.
.
" Tei, thil pakhat lek min tihsak thei angem?" Savawm chu kan dawm dun a, keichu ka in khat avangin ka kai deuh chiai a, mahse rui tih a sawi em em chi chu ka ni chuang lo.
.
" Enge?"
.
" Ka nau tan hian fa hrinsak hram rawh" a thusawi avang chuan ka savawm in chu ka chawl dat a, ka beisei loh lam lutuk a ni.
.
" Chu, fa nei duh lo ang ah min ngai deuh tihna em ni?" ka kai deuh tawh avangin ka thin a chhe leh deuh tar tawh.
.
" Aih. Chutiang lam a ni lo. Nangni talin fa nei ula ka duh a ni" a tih chuan amah chu ka va en a, hmalam melh in a mitmeng ah chuan rilru natna tak nei a ang takzet. Keia kai deuh twh chuan ka khawngaih thar leh thut.
.
" Pathian in rem a tih chuan kan la nei ang chu. Mahse tunah ni lo" ka ti ve ta nge nge. Makti deuh chuan min rawn en a.
.
" Enge tunah ni lo i tih chhan chu?"
.
" Tunah rih chuan hna pawimawh tak ka la nei a ni"
.
" Ni lo. Tei, ka nu hi bei let hauh suh. Khawngaihin. Kan unau chu tihian kan nung thei. Mahse fa in nei anih ngai chuan ka nu leh pa thlazar hnuai atang engmah la lo se ka duh a ni. Keichuan fa ka neih ka ring lo a" a tih chuan makti zet chuan ka lo en ve nghal.
.
" Engvangin?"
.
" Ramtei hian fa neih a duh lo a ni" a hmel ah chuan na a ti tih a hriat ngwih ngawih. Ni e, mipa a ni. An unau dam khawchhuah nan nupui a nei a, a lerhsan ka hre hauh lo bawk. Huaisen takin a hma a awm chu a hmachhawn a, mahse a hmangaih min kalsan na berin fa neih a duh ta lo chu a nia. Ana khawp ang le.
.
" Ooohh... Ka tihpalh"
.
" Tihsual i nei em ni? Kan nupa hi zawng, engtikahmah kan hlim thei in ka ring lo. Ka nu fanu ni amw zawk tak a ni" ner sawk aph chuan a ti nghat a, ani pawh a kai deuh tawh in ka hria. Kei erawh chu ka thu hriat avang chuan ka harh kawk thung.
.
" Pu Thuama chu ava rei ve" tih pah chuan ka ding hluai a. Madinga rilru na hmel chu ka en duh tawh lo a ni. Mipa nep tak ang in inhmu mai thei. mahse a nep lo ania aw. An unau tan a nun a hlan a, hmangaih miah loh nupui ah neiin a nupuiin fa neih a duh lo bawk. A tawrh ang hi tuar ve ta ila ka intihlum hial tawh in ka ring. Mahse ani chu mipa a ni tlat a ni.
.
In kan thlen chuan tkai dar 5 a ri thuak tawh. Inchhung kan luh chuan kan nula te chuan rawng an lo bawl zo tep tawh a. Ka nu leh pa erawh ka pa unaunu nawmsam loh avangin chaw ei tur in an kal thung. Kan room-ah lut in ka inbual nghal a, ka inbual zo ka chhuak chu Mapuia chu kan room sofa-ah alo thu a, a lo thlenna ala rei loh hmel in a hmelc hu a nelawm loh kher mai.
.
" Ilo haw tawh a ni maw? I chau em?" tih pah chuan a t-shirt, sofa ban a a ban chu ka va ban a, mahse min chhang hauh lo. A mit a chhing a, a chauh hmel kher mai.
.
" Mapui, na i nei ami?" ka tih leh chuan min chhanna chuan min ti phu nasa kher mai.
.
" I hmangaih nen a nileng hun hman dun chu a nuam khawp ang maw?"



CHAPTER -10

 " I sawi awmzia ka va hre lo ve" ka ti nghat a, mahse a sawi ni awm chu ka hria. Mahse engtinnge a hriat ka hre lo.
.
" Engchen nge i zep dawn?" ka mit ah tak chuan min rawn en a, enge ka sawi ang ka hre mai lo. Engchen nge a hriat ka hre lo.
.
" Enge i hriat duh ber?" a mit a en ve kal chung chuan ka ti ve hmiah. Hetiang a inhauh hi ka chak lo. Tin, Mapuia mitmeng a natna chu ka hmuchiang em em bawk.
.
" Ka U nen in inkar hi engtikah nge min hrilh i tum?" ban chat a a tih chuan ka thaw hak. Ni e, a hriat hi ka hlau hauh lo. Mahse hre lo se ka duh zawk fo thin.
.
" Khawi atang a i hriat nge?"
.
" Khawi atang nge ka hriat tih aia pawimawh chu i pasal ka ni chungin ka unaupa nen a in inkawp hi a pawimawh zawk" a hmel chu thinrim avangin a dur khup thei.
.
" Nang nen kan intawn hma thil a ni e"
.
" Tichuan ka U vangin keihi min nei a? Engang mihring nge ni a i inhriat? Tenawm lutuk" a tawng ring lo. Mahse a thinrim zia erawh awri atang a hriat vek thung.
.
" Dawt a ni" sawi tur pawh ka hre lo. Engtinnge a hriat ka hre lo. Mahse tunge hrilh ang tih erawh rin dan ka nei chiang e.
.
" Ka nu hian dawt a sawi tih sawi i tum anih chuan theihnghilh nghal rawh" a tih nghut ah chuan ka rin dan chu a chiang ta chiah e. Min ti phu eih lo. Ka nu mizia ka hre ve viau tawh. A landan ah chuan nu tha tak a ni. Mahse chumi phen a a mizia chu ramhuai ai pawhin a rapthlak zawk ngawt ta ve ang.
.
" Engtikah emaw chuan ala hrilh ngei che ka ring reng a ni. Mahse thudik vek chu a sawi hauh lo" ka kut kuangkuah in a hma ah chuan ka ding ngar. Mak ti zet chuan min rawn en a, ka khawngaih letling zawk.
.
" Enge i sawi awmzia chu?"
.
" Delhi a i bialnu i zuk hmuh tum khan ka nu chuan U Madinga nen kan inkar hi min hriat nawn tir leh tak asin. Mahse hei erawh ka chiang, nang nen kan inhriat hma in i U nen kan inkar chu a tawp hman vek a ni" dam dap a ka tih chuan a ka a ang hau ringawt.
.
" Engtikin maw ka bialnu chu ka hmuh?"
.
" Karkhat thangbo a sumdawnna chhuanlam a i zin tum khan. A chiang em?" ka ti ve ngat a, a tir a ka lo sawichhuak lo kha ka lawm ta let ling zawk.
.
" Dawt anih chu"
.
" Anih chuan dawt ve ve kan hria tihna anih chu"
.
" Ka U nen inchungchang hi sawibo tum hlek suh"
.
" Mapui, min rin leh rin loh chu thuhran. Mahse thudik chu U Madinga nen hian nang nen kan inhriat hma chuan engemaw chu a awm ngei, mahse ilo lan ve hma khan engkim a tawp hman. Chuzawng chu a ni e" tih pah chuan a t-shirt ka thleh chu dah fel tum in wardrobe lam chu ka pan a, mahse min rawn pawt let pawp mai. Ka phu chiang teh e.
.
" Vawiin ah khawnge i kal?"
.
" Ka pa te dawr ah. Chumi zawh ah U Madinga nen huan ah theihai kan la" a hmel chuan min tihlau ve tho nangin hlau hman ka ni lo. Ka nu zawk hmachhawn ka duh laiin ka pasal zawk ka hmachhawn hmasa ta si.
.
" Engtia awm nge i duh?"
.
" Mapui, pasal atan ka nei tawh che a, thihna chauh lo chuan kan inkar pawh then ka tum lo. Min rin ngam hun ka nghak ang che. A bak chu i duh duh ti rawh. Mahse ka then dawn lo che" ka ti ve ngat. Ni e, then ka tum lo a, phat buai pawh ka tum hek lo. Tunah chuan ka pasal hian unaupa a nei tih a hre har tawh hauh lovang.
.
Thla 2 hnih lai a liam leh ta. Kan nupa nun chu Madinga te nupa nen a in ang ta deuh reng. In ropui tak ah kan cheng a, mahse a chhung a cheng te erawh kan ropui lo hlawm khawp mai. Mapuia chu in a awm tlem a, a awmchhun pawhin kan inbe khat khawp mai. Madinga pawhin a chhan min zawt fo a, mahse a rilru nawmloh ka duh loh avang leh kan nupa kar ang anih avangin ka sawi tha duh lem lo.
.
" I pasal pawhin a ngaina ta lo hle mai che maw?" inchung zawl a pangpar awmna ka tihfai lai chuan ka nu a rawn chho a, midang tumah an awm lo.
.
" Ka nu, i thawk tha e. I kidney man chu a to talh talh hle mai maw?" ka thil tih lai chu dah in ka nu thuthlengsei a thu chu ka va melh a, ka ding chhuak nghal. Ka thusawiin hna a thawk tih lanna chu a meng bial kawk chu a ni. Nu hmeltha tak anih vei nen a chhungril kha lutuk chuan a ti hmelchhe zo vek.
.
" Enge i sawi kha?" a ti that a, ka lo nui sang zui.
.
" Eng ni lo ve. Thingpui i in duh em?" ka lo tih san hmak thung.
.
" Nichin a i thusawi kha a ni ka hriat leh duh" a hmel chu rapawm tak a ni.
.
" Ka nu, eng chen nge kal i tum? Mi hmuh a zahawmna duh vang a i fapa te natna hi i hmu thei miah lo em ni?"
.
" Nanghi...."
.
" Aw, ka nu, kei hian engkim ka hria. Engvang a ngawi tlat nge ka nih i hriat duh takin, he chhungkua hi a kehdarh ka duh lo a ni. Madinga rilru na in i dah tawh a, duhtawk tawh rawh. Mapuia hi chu hahdam takin awm tir rawh" ka ti ta hrawk a, ka nu hmel chu hmu ve ula in rap ngawt in ka ring.
.
" Lalramliani chuan a ka a veng zo ta lo a ni maw?" a tih chuan mak ka lo ti nasa mai. Ramtei'n he thil ah hian tel ve na a neih reng reng ka hre lo. Mahse hre lo ang a awm ka tum hauh lo. Ramtei chungchang hriat belh ka ngai leh ta thung.
.
" Tun a i duhtawk anih loh chuan Mapuia hian thil awmzia ala hre thuai ang. Chutih hun ah chuan Madinga hi a zalen tawh anga, i chan tur han ngaihtuah ve teh. I chhunzawm zel anih chuan keimah ngeiin i thuruk hi ka puang chhuak ang" ka ti leh sak a, mahni pasal nu te tawngkhumna atan chuan a rapthlak deuh in ti mai thei. Mahse ngawihrengna hian rah tha a chhuah theih loh chuan anihna ang sawi mai hi a finthlak zawk tlat a ni.
.
" Nang hian khawi ah mah i sawi hauh lovang. I pasal leh i bialpa hlui natna tur chu engmah i ti hauh lovang" ka nu chuan a thinrim hmel paihin hneh tu in ti zet chuan min rawn melh a, a sawi dik reng. An nat ka duh hauh lo. Abikin Mapuia ngat phei chu.
.
" Ka ti thei. Ka ti ngei bawk ang. Ka pasal te unau hi zalen tak a i awm tir lo anih chuan ka ti khawp ang. Thla 1 hun ka pe ang che. Chumi chhung chuan an duh dan ang takin an nun phalsak ang che. I ti duh lo anih chuan ka pa thlengin he thuruk hi an hre ngei ang" ka ti leh hmak thung. Diktak chuan ka puang ngam angem ka hre lo. Mapuia'n Madinga a dem tur zia leh a nun thleng a a tawrh dan tur ka hmu thiam vek. Mahse ka nu hma ah chung ka ngaihdan chu tih lan ka tum hauh lo.
.
" Nang hmeichhe rapthlak lutuk. Fa i pai hma hian ka inchhung hi chhuahsan rang rawh" a ti tuarh a, min thah chak hmel a pu hial a ni.
.
" Lungngai suh. Ka pasal leh a uanaupa hi an zalen hma chuan fa ka pai hauh lovang" ka tawngkam tin mai chu mak a tih hmel ngawih ngawih. Keipawhin ka duhaia thui ka sawi tih ka hria. Mahse pawi ka ti lem lo.
.
" Chu, i pasal fa pai hlau chuan ilo indang vel amaw?" ka nu chuan rapthlak tih hmel zet chuan min en a, ka nui sak thung.
.
" Ni e, a hun hma chuan ka pasal fa hi pai ka tum reng reng lo. A chhan awm chu i hriatthiam ka ring. Ka la indang rih chu anih hi" nui sawng chuan ka lo ti let leh sak. Kan nupa kan hlim lo a, chupawh ka nu vang a ni. KKan nupa kar tichhe tu chu ka zah bik lutuk thei hauh lo. Kan nupa kar vang chauh ni lo pawhin ka haw tlat tawh a ni.
.
" Laltlanmawi" ka pasal rawn au thawt ri ka hriat chuan ka nui lai chu ka tawp chawt a, ka nu nen chuan inchung chhohna step lam chu kan hawi rual thawt a, Mapui hmel rum lutuk ka hmuh chuan ka ip chawih thei. Eng chen tak rawn hria ang maw?
.
" Room-ah min rawn hmu ang che" tih pah chuan a inher vut a, zui mai loh chu tih theih ka nei lo. Ka nu lah a hawi buai nasa bawk.
.
Room ka zuk lut chu tukverh bul ah ding in a kekawr ipte a zen a, min lo en run bawk. A thinrim insum tih hriat tak mai leh rilru na hmel chu ka hmu hmasa ber.
.
" Ka thu hriat kha a dik em?"
.
" Mapui...."
.
" Ka fa pai i duh loh avangin ilo indang tih kha a dik em?" a au tuarh a, ka phu nasa ngei mai.
.
" Mapui, ka hrilhfiah thei ang che"
.
" Thudik a ni em sawi rawh" a hmel chu a sen vek a, a kut a hum ruh ngar ngar bawk.
.
" Ka duh loh vang che a ni lo"
.
" Anih engvang nge? Engvang a ka fa pai chu duh lo nge i nih? Ka U vang hi a ni tiraw?" ka lam a rawn pan a, ka khur nasa ngei mai. Engtinnge ka hrilhfiah tak ang? Engkim sawi ta ila a ngaithla duh in ka ring si lo. Lalpa min pui lul rawh.
.
" Mapui, khawngaihin min ngaithla hram rawh" ka bul a rawn thleng a, ka ban tawn tawn ah min man bet a, a na ngei mai. A palian nasa mai si, ka tal ve a, mahse ka chet chuan a na mah zawk in ka hria.
.
" Tenawmnu, eng ang hmeichhia nge i nih? I pasal unaupa vangin i pasal fa pawh pai duh lo in i indang amaw?" a au tuarh tuarh a, ka nu rawn tlan lut chu fiah lo tak in ka hmu a, a bak engmah ka hre chhunzawm ta lo. Ka ral riai riai ni ber in ka hria.



CHAPTER -11

 Ka harh leh chuan khum ah ka lo mu a, ka nu (MIL) chu khum bul ah thu in khum bawhin alo awm a, midang erawh ka hmu miah lo. Ka che hret a, ka nu chu rang zetin a rawn hawi chhuak nghal a, a hmel chu hriatthiam a har ka ti.
.
" Engtia rei nge ka mut tawh?" midang zawh tur awm ngang lo chu haw hle mahila ka zawt lo thei si lo.
.
" Darkar 1 chu a tling lovang. Enge i an?" pangai tak chuan min chhang ve mai a, mahse a awri chu a zuai em em thung.
.
" Ka tha. Khawnge Mapuia?" ka pasal in hmer vang a hetia awm hi ka ni tih ka hria. Mahse amah ber a awm leh tawh bawk si lo.
.
" Ka nu, kan nupa a kan inbiak a ngai tlat mai" tih ri lo chhuahna lam chu ka nu nen chuan kan hawi rual thawt a, Mapuia chu pawr phang hian room kawngka ah chuan alo ding a, a thawmhnaw ala thlak lo tih pawh a lang nghal.
.
" Engtia awm nge i duh?" a kekawr ipte zen chung chuan khum mawng lam ah a ding a, min en run bawk. A landan chu a hlauhawm in pawisak a neih loh hmel em em bawk.
.
" Ka then dawn lo che" ka aw chu ka rinaiin a fiah tha. Dik tak chuan then ka duh lo, a thu hriat kha a awmzia a hriat fiah hmasak phawt loh chuan min ma anih loh chuan ka then dawn reng reng lo. A awmzia a hriat hun ah erawh min then ala duh cheu anih phawt chuan ka hnial bik tawh lovang.
.
" A tha alawm. I duh duh dan in i awm thei anga, chutiang chiah chuan keipawhin ka duh dan dan in ka awm ang. Kan nun ve ve kan hmang anga, mi hmuh a nupa kan nih chuan a tawk ang. Chu chu a ni lawm ni i duh? Ka pawm thlap e" dam dap a a tih chuan ka lo ip chawih chawih thei. Engtinnge chutiang chuan a sawi theih zawk?
.
" Mapui, thil engmah hi i hrethiam lo a ni"
.
" Ni e, i thil tum ka lo hrethiam lo a ni e. Dem tur chu keimah chiah. Ka lawmpui a che. In enkawl tha la, mamawh i nei anih erawh chuan min hrilh hreh lovang che. Ka pa in a hriat loh nan erawh room khat ah kan la chen a ngai dawn a, chu chu pawi i ti em lovang chu maw?"
.
Ka mit ka chhin san a, a chhuak lai thawm chu ka ngaithla reng. Tunah rih chuan hrilhfiah tum eng ang mah ila awmzia a awm lo tih ka hrethiam. Hun kan mamawh a ni.
.
Zan lam ka mut that loh avang leh ka luhai a reh theih loh avangin zing chaw ei lai chuan in entir ka duh thu ka sawi a, ka pa chuan Mapuia chu min hruai tur in a ti tak nangin ka lo hnial thung. Madinga erawh a ngawi reng a, nimin kan boruak hre awm pawhin a awm lo. Mahse a nau a melh lai a a mitmeng erawh ka va lainat tak em! A nau a hmangaih zia ka hrechiang si, a nau lahin a haw tawh nasa mai si.
.
" Nau i pai leh pai loh i test tawh em?" ka Doctor-in min tih chuan ka phu nasa ngei mai. Ka awihlo hul hual bawk. Indanna ei reng chung in engtinnge ka pai theih ang?
.
" Engtinnge ka pai ang? Indanna ka ei char char" ka ti vak a, ka awih tlat lo a ni.
.
" Engpawhnise Gynea lam ah ka refer che anga, a chiang mai ang"
.
Clinic kawt ah chuan ka ding vang vang a, ka lu te chu a hai muai muai in ka hria. Ka ngaihtuah let a, ka hrechhuak mai thei lo. Lo pai ta ila Mapuia rilru tur ka hrethiam lo. A U fa ah a ngai angem? Tun kan dinhmun ah chuan chutiang a ngaih chu thil awm lo pawh a ni hauh lo. Mahse ka pai loh hram ka beisei.
.
" Tlanmawii maw? He hian i zun lo va test la, i zawh ah i rawn phei lehnghal mai dawn nia" ti tu ka doctor Dr.Mamawii chu ka en hau a, ani pawh chu a. Indanna ka ei tih ka sawi mawlh malwh sia.
.
Ka zun ka test zo chu ka au that. A positive ta tlat mai. Lalpa, enge i duh? Lawmna leh hlauhthawnna in min rawn tuam nghal a, ka beisei loh lutuk thil a ni bawk si.
.
" Indanna ei loh palh i nei anih ka ring. Mahse ilo ei chhunzawm si chuan ultrasound-a i naute hi kan en vat a ngai dawn a. Chaw ei tui loh te i nei hrim hrim em?" Dr.Mamawii'n a tih chuan ka lu ka thing ringawt. Chaw ei tui loh em em ka nei lo tlat a ni.
.
" Anih chuan khum ah sawn lo mu la, ultrasound-in kan en lawk ang che" tih pah chuan khum lam chu min kawhhmuh a, ani pawh chu a tih tur a buaipui chhunzawm nghal. Ultrasound-a min en lai chuan zawh duh ka ngah. Mahse ka tawng thei tlat lo. Ka rilru a chawmawlh vek a, ka mitthla ah erawh Mapuia alo lang char char thung. A hriat hun ah engtinnge a awm ang?
.
" Ummm.... I naute chu a tha e. Mahse indim deuh i ngai dawn anih hi. Thla 2 a pum ve tep tawh anih hi" a tih chuan ka nui sak a, mahse ka nuih erawh a za hauh lo. Ka hrechhuak thut, thla hmasa khan ka thla bi hun chhiar a slip tak e. Mahse ngaihthat lohna ka nei lem lo. Indanna ei hian thi neih a buai ve thin an tih kha ka hre ve tlat a ni.
.
" Damdawi ka la chawh danw lo che a, mahse eitur tha erawh i theih ang a tam i ei dawn nia. Chuan, inchhung chet khawih tam lo la, insuk, chhuatnawh, hmunphiah tih vel ah indim hram hram ang che. Chuan, rilru hah a awm loh hram hram tur aw" Doctor-in a tih chuan ka lu ka bu nghauh nghauh a, ka rai tih ka hriat hnu khan engmah ka la sawi leh lo. Ka chi-ai nasa lutuk a ni.
.
Ka pasal neih hnu ah a vawikhatna atan Larson ka mamawh ta. Ka mamawh ngai lo ni lovin ka pasal neih tur kha a lung a awi lo a, kan inneih ni pawhin a rawn inkhawm zawk a, a bak chu hmuh tur reng reng a awm lo. Min be ngai lova, keiin ka be pawp ngam si lo. Thian ho group lah ka tlawh ngai hek lo. Zamtei nen erawh nitin kan in be thung.
.
" A tawp ah chuan min hrechhuak ve ta hram alawm" Larson lo thlen chuan MC chhak, MUP waiting shed ah chuan ka lo thu a, ka chau ngawih ngawih bawk.
.
" Lar, ka ngai che" ka bul a a rawn thu chu ka tah khum nghal ringawt. Ni e, ka ngai a ni.
.
" Hey, enge awmzia?" Larson chuan min lo kuah vat a, ka lung a chhe zual sauh. Mi veivak an awm lem lo bawk a, a awm ah ka hmai phum in ka tap ta nghek mai. Ka tah chhung zawng engmah a sawi lo a, min kuah hle hle tawp mai a ni.
.
" Enge thil awmzia ni ta? In pa nen in boruak a tha lo em ni?" ka tah ban hnu chuan Larson chuan min zawt a, kan buaina intan dan atang nimin thil thleng zawng zawng ka hrilh ta vek a, a lu a tuai a, a thaw hawk ringawt.
.
" Te, kha vang khan alawm Mapuia kha nei lo la ka duh em em chhan. A nu saw nu namai lo a ni ka tih ngaiwh ngawih chhan i hrethiam tawh em? Tichuan engtia awm nge i tum?"
.
" Ka then thei lo a ni"
.
" Fa pawh in la nei lo a, khawngaihin nangmah inhrem belh tawh lo teh. I thian ka ni a, i nat hi ka duh tawh lo a ni"
.
" Lar, ka hrethiam alawm. Mahse ka rai a ni" Larson chuan maktih hmel zet in min en a, chutah a hmel thlakin a nui var var a.
.
" Then loh nan chuan chu chu a chhan a tan a tling tawk e. In pa chu a lawm ve khawp ang. Ka lawmpui che" nui var var a a tih chuan ka tah a chhuak lehnghal.
.
" Mahse Lar, Mapuia hian a pawm duh angem ka hre lo. Madinga nen min ringhlel miau sia" ka lu ka thing nar nar a, ka chiang ngam tlat lo a ni.
.
" Lungngai mah ta che. A pawm emaw, a pawm lo emaw, thudik chu a hma ah ila pharh mai dawn alawm. Tin, a fa anih phawt chuan pawnlam ah pawm duh lo mahse chhunglam atang a fa a nih zia a hre dawn tho tho. Chak tak leh huai takin i awm tlat dawn nia. I tan ka awm reng a ni tih theihnghilh lo la" ka thianpa in a tih chuan ka thla a muang huai mai.
.
In ka thlen chuan Mapuia in ah alo awm ve teh mial a, mak ka ti deuh hlek. Ngawirengin room-ah ka lut a, ani erawh sitting room lam ah a awm thung. Ka inthlak mawlh mawlh a, hrilh nghal tur nge ka hrethiam lo. Hrilh ila engtinnge a awm ang ka hrethiam lo.
.
" Inbe lawk ang" ka ngaihtuahna kawm a tukverh bul a ka ding chu ka phu nasa ngei mai. Ka insiamtha vat a, muangchangin a lam ka hawi a.
.
" Englo..."
.
" Naktuk ah hian Delhi ka kal leh dawn a, mahse ni 2 chiah ka cham ang. Ka lo haw hun ah inthenna ti fel thei tur in i rilru ilo inpuahchah dawn nia" ka khawng awt thei. Ka en reng a, tanwg nachang pawh ka hre lo.
.
" Chuan, i duh chuan i nu leh pa in lam ah ilo va awm thei ania" tawng nachang ka la hre chuang lo. Ka hik chhuak vek ni ber in ka hria.
.
Ngawirengin room atang min chhuahsan lehnghal a. Awmdan tur ka hre lo. He game-ah hian keichu a chaklo zawk ka ni ta a ni e. Ka nu meuh chu ka lo khing hneh lo ah ka ngai hmiah e. Mahse ka naute hi engtinnge ni ta ang?
.
" Mapui, inbe lawk ang" Mapuia muhil lai chu a dar ah ka va sawi a, thatchhe zet a rawn mengin a thu chhuak a.
.
" Engenita? Mut tam ka mamawh ania" bung nghut a a tih chuan ka rilru a buai kher mai.
.
" Inthen i duh tih chu ka hria, mahse ka duh ve lo a ni"
.
" Chu te chauh chu maw? Ka U nen hunthawl zawk inneih theih nan a ni ka then dawn che. Lawm hle zawk tur i ni. Uire reng chung a pasal neih hi nuam ilo ti viau em ni?" a awri chu a nelawm loh tih piah lam a ni.
.
" I ngaih ang hi a ni lo. Inthen thei kan ni lo" ka sawichhuak mai ngam thlawt lo a ni.
.
" Inthen thei kan nih lohna chhan chu han sawi la. Nge kan inthen chuan ka unaupa nen in inkawp hi mi hriat inhlau zawk em ni?" elsen zet a min tih chuan ka khur dar dar thei. Hetiang em em hian a rilru alo dik lo ang tih ka ring pha lo.
.
" I unaupa nen hian engmah kan inkar ah a awm tawh lo. Nangnen kan intawn hma thil a ni. Ka pasal U a ni bawk" ka ti ve ta khawl mai. Ni e, khanwgaihna ngen pawh ni ila awmzia a awm dawn lo. Tun hun hi sawichhuahna hun remchang a ni miau a ni.
.
" Min bum ila tum zel amaw? Tenawm lutuk. Engtinnge nupui atan ka lo neih theih zawk che ni?" tih pah chuan a mu tha nghut a, puan in a in lukhup zui nghal hmak bawk. Mahse ngawih mai mai ka tum tawh bik lo. A na dawn anih pawhin an rawh se.
.
" Ngaithla rawh. I U hi i phir pui a ni. Abak chu i U i zawt thei ang. Chuan maw, i U nen kan inneih loh chhan hi i nunna atan a ni. Kidney i mamawh lai khan i nu hian i u vau betin kei min then a, Ramtei a neih dawn chuan a kidney lehlam pek che a remtih thu a hrilh a, i U chuan a nau damchhuah leh theih nan a hmangaih chu min kalsan ta a ni. I U hi a fair lo ngai lo a, keipawhin ka uire san ngai hek lo che. Engvangin nge ka neih che i hre duh em? I nu lak atang hian humhim che ka duh mai a ni. I U min ngenna a ni bawk.
I U pathlawi chhan hi i hre duh em? A nupui in fa a neih duh loh vang asin. A nupui tan khan a rinawm a, a nau nupui ka nihna ang in min duat a, a bialnu hlui, a hmangaih thin ka nihna hi a tilang ngai lo. Engkim ah a tha ber i tan a duh thin asin. Tunah hian engvang a he thu hi hrilh che nge ka nih i hre duh ang tiraw? A chhan chu i fa ngei chu ka pum chhung ah a awm vang a ni" Muangchangin a inkhuhna puan chu a rawn inhawng a, a hmel ah chuan mak tihna, awih lohna, phurna a inpawlh nuaih a ni ber.
.
" Heng zawng zawng hi ka hre vek asin. I rai thu chauh lo chu. Mahse kan inthen tho a ngai a ni" mak ka ti lutuk chu ka thaw tha hlei thei lo. A hre vek maw? A ni thei lo. Anih chuan engatinge? Ka buai nuaih mai.
.
" Maw?" ka aw ah chuan mak tihna te, awih lohna te a lang tel nawk ang.
.
" Ni e, ka hre vek. Ka nu hi min hringtu nu unau nu diktak a ni lo tih pawh ka U nen hian inhre lo bawk. Engkim ka hria asin. Mahse nang hi ka then lo che anih chuan ka nu ro hi ka la let thei dawn lo che a ni" a hma aiin mak ka la ti lehzual.
.
" Enge i sawi awmzia chu?"
.
" He in leh sumdawnna zawng zawng bul tanna hi ka nu asin. Ka nu kha a tetlaiin ka pi leh pu in an boral san a, tun a ka nu nu leh pa te hian an enkawl seilian ta a. Mahse ka pi leh pu te kha mi tha tak an ni. An dam han sei deuh se chuan tun a ka nu hian ka nu ro hi a chhuhsak hauh lovang. Ka nu pawh kha ala dam ngei ang. Mahse ka pi leh pu te kha an damrei leh ta bik lova. Tun a ka nu kut ah hian ka nu dik tak kha a awm lo thei ta lo a, mahse tun a ka nu hian rilru verther tak mai alo pu si. Ka nu nu leh pa diktak te kha sumdawng hausa an ni ve a, he in leh sumdawnna hi ka nu hming in a awm vek a, mahse tun a ka nu hian tenawm takin a chhuhsak ta a ni.
Ka hriatchhuah dan min zawt duh anih chuan, ka nu boral lai khan kan la te lutuk. Mahse khatihlai khan ka nu khan thian tha tak mai alo nei hlauh a, ani hnen ah chuan ka nu khan engkim alo hrilh hre vek a, a chhan chu ka nu khan tun a ka nu hian nuai bo a duh tih alo hre vek miau a ni. Ka pa dik tak erawh tunge a nih ka hrechhuak thei ta lo. A chhan chu ka nu khan a thiannu hnen ah khan tunge tih a hrilh hman ta lo a ni. A thiannu kha ka nu in min neih lai leh a boral thleng khan hmun dang ah pasal neiin, hnathawhna avangin vairam ah an awm daih vang a ni.
Ka U nen hian hlim takin innei ula, ka fa ani tih ka pawm thlap e. Mahse keiaiin ka U in a enkawl tha zawk ngei ang. Hun erawh in la mamawh dawn a, he in hi ka nu tan ka lak let hma chu hmingchhiat lo khum phawt ula, chumi hnu ah chuan hlim takin in la awmdun ngei ang tih ka tiam a che u" ka mittui chu a tla nasa kher mai. Kan hriat bak alo hre vek a, mahse tinge min neih tho le?
.
" Engkim hre si a min neih chhan hi ka hrethiam lo a ni"
.
" Heh. Nia, hriatthiam tum lo la a hahdam zawk ang. Naute tan taksa hahdam i mamawh ania. Muhil tawh rawh" tih pah chuan amah chu a mu tha leh hmak a, a nui nangin a mitmeng kha a hlim mawlh lo. A fa ka pai tih a hria, a nupui ka la ni bawk. Mahse a U tan kan nufa hi engtinnge min hlan tawp theih? Ka ngaihdan pawh min zawt hauh lo bawk.
.
" Inthen chu ka tum lo a ni. Engpawhnise, tupawhin engpawh sawi se ka then dawn lo che. Kan fa lo piang tur tan hian theihtawp ka chhuah anga, i rilru inthlak hun ka nghak zawk ang. Chumi chhung chu inthen lovin hetah hian ka awm ve tawp zawk ang" ka tih chuan min chhang tawh lo.
.
Mapuia zin tur chu ka thlah liam lui a, tha takin kan in be thung. A hlim lo a, ka ngaihtuah em em bawk. Chhun ah chuan ka nu nen chiah kan amw dun a, ka nu hi ka rap ngawih ngawih tawh. Hrtiang mihring hi engtinnge an lo pian ve theih le? Larson ka msg a, hmuh ka duh thu leh Madinga pawh biak ka duh thu te, chhuanlam siam a hmun lo ngaihtuah a lo hruai tur in ka ngen nghal bawk. Ka nau pai thu chu engmah chhungkua ah ka la sawi ri duh lo a, a chhan chu ka nu hian chet a lak ka hlau a ni.
.
Larson remruat ang in Zamtei te in ah dar 2-ah ka thleng phei a, anni pawh an lo thleng ran tawh. Zamtei chhungte chu lungphunna lam ah an kal a, Muana leh Larson chu Zamtei ho in room lam ah an awm a, Madinga nen chuan sitting room ah kan thu dun ran thung. Sawi tan mai dan ka hre lo kher mai. In khat ah cheng ho mahila kan inhmu tlem in kan inbe tlem khawp mai bawk si.
.
" Min koh tir anih ka ring a" Madinga chuan a rawn ti hmasa ta nge nge.
.
" Nia, kan inbiak ngei ngei a ngai ani" tih pah chuan nizan lam a Mapuia thusawi ho chu zep awm lo in ak sawi ta vek a, a bek a thisen zam rawn pawng talh talh ah chuan a thinrim zia hai rual a ni lo.
.
" Chung zanwg zanwg chu ka nu thil tih vek maw?" ka sawi zawh chuan a rawn ti hrak a, a hmel chu a hlauhawm kher mai.
.
" Mading, thinrim in thil ti lo hram ang che. Tha ber a ka hriat chu, Mapuia nen hian sawidun ula tha ka ti. Keichuan ka pasal duhdan hi ka zawm dawn lo a, nangpawhin i duh hauh lovang tih ka hria. Tin, tunah hian a fa ka pai mek a ni" ka tih chuan makti zet chuan min rawn en a, chutah a nui ta var var a.
.
" Ka nghahhlelh em em chu a thleng ta. Rilru hahdam takin awm la, nang chuan i naute chiah ngaihtuah ang che. Ngaithla la, keichuan nupui neih leh tumna ka nei tawh lova. Ka nau fa chu ka fa a ni mai. Kan thlah chimit tur min tih tawp sak avangin ka lawm e. Ka pa in fanu hlir alo nei bawk si. Fa tha tak in hring la, i mamawh apiang sawi ang che" dam dap a a tih chuan ka nui sak a, an unau inhmangaihna hi a hmuhnawm ka ti. Intihnat an hlau em em reng a, hlim reng se an induh ve ve bawk a ni.
.
" Mapuia chu alo haw veleh bia la ka duh a ni"
.
" Lungngai suh. Engkim a tha leh vek mai ang. Mahse i nau pai chhung erawh i pa te in lam ah awm la tha in ka ring. Mapuia pawh zanah ka lo bia ang. Nau i pai tih ka nu in a hre rih tur a ni lo" ka hnuk a ulh zawk. Ti em em a nu rapthlak hi engtinnge an awm theih le?
.
Madinga nen kan haw rual a, ka nu chuan maktih hmel zet in min lo melh a, mahse ka hre lo der hmiah thung. Ka pasal hrilh a chak leh et et tawh in ka ring. Mahse tunah chuan hlauhthawn tur ka nei tawh lo. Ka nau pai hi hre rih lo se tih erawh ka duhdan ve tho a ni. A chhan chu hre ta se engemaw a tih duh mai ka hlau ve tho a ni. Chu chu Madinga hlauhthawn pawh kha ni in ka hria. Mapuia pawhin a sawichhuah loh dan ah a hlauthawng ve tho in ka ring.
.
" Pasal te zin chu a nuam viau a ni maw?" ka inthlak zo ka thawmhnaw ka dah that lai chuan ka nu chu kan room-ah a rawn lut a, mahse engah vak mah ka lo ngai lem lo.
.
" Engtikah nge report i pek leh ang tih ka lo ngaihtuah lai takin?" amah lam hawi chuan ka ding a, ka nui sang bawk.
.
" I pasal uire san reng ai chuan in mualpho hma in inthen i tan a tha zawk lo maw?"
.
" Inthen lam thu reng reng ka lo ngaihtuah ngai lo a. Hun in engkim hi ala rawn hril aniang chu"
.
" Hmeichhe rapthlak lutuk. Uire nu"
.
" Ka nu, i fapa oh i unaunu der oh i unaunu fapa nupui tawngkhum na atan chuan a lutuk mah mah lo maw?" ka tih chuan a meng tal nasa mai.
.
" Nang hian eng chen chiah nge i hriat?" a hmel chu hlauhawm tak a ni.
.
" I hriat chin bak hriat ka nei lo. Tak a, Mapuia nu, ka nu kha a accident khan tu motor ah nge a chuan khah?"
.
" Laltlanmawi, enge i hriat duh chu ni? Enge ka inchhung ah hian duh i neih?"
.
" Engmah dang duh ka nei lo. Ka pasal te unau chanvo dik tak bak duh ka nei lo" chiang fek fawk a ka tih chuan ka nu chu a dang sawp sawp a, thinrim zet in kan room atang chuan a chhuak a, keipawh khum ah ka thu hnawk mai. Ka chau tak zet a ni.
.
" Ka nu kha engtinnge i tih?" Madinga nen chuan inchung zawl ah kan thu dun a, tunah chuan kan inhnaih ve ngam ta.
.
" Engtin ti lo e. Ngatinge?"
.
" In room atang a a rawn chhuah khan a thinrim hmel lutuk a, sitting room ah ka lo thu a"
.
" Hehe. Tunah chuan ka dinhmun hi a derthawng tulh tulh dawn in ka hria. Mahse ka thla a muang tawh tho e" ka tih chuan a bu nghat nghat a, a phone a rawn rik avangin min thawhsan a, sumdawnna thil a nih hmel.
.
Mapuia rawn haw ni chuan hlim deuhin ka lo hmuak a, ani pawh a kal hma a a mizia kha a rawn pu ta hauh lo. An unau in an inbia anih ka ring bawk.
.
" Naktuk chu i pa te in lam ah chaw kan ei phei dawn nia" a inbual zo chu khum ah a mu a, kawr a ha lo a, half pant erawh a ha thung.
.
" Tak tak maw?" ka phur lutuk chu a bul ah ka zuk sawt thla auh a, rang lutuk in min lo pawm a.
.
" Indim rawh. Ka naute kha i tihnat vaih chuan hrem i ni ang" a tih chuan nui har har in ka kuah a, hmangaih hmel zet in min lo kuah let a, nuam ka ti kher mai. Hetiang hian kan awm lohna a rei tawh lutuk a ni.
.
" Ih, inthen..."
.
" Ka U nen kan inbia a..."
.
" Ka lo hrilh avang khan min hau dawn anih pawhin tha ni a ka hriat vang a hrilh ka nia. Bakah then che ka duh lo a ni" ka lo ti vat a, ka chal ah a rawn fawp zauh a.
.
" Nupui rem hre tak ka nei hi ka vannei viau in ka hria" a tih chuan ka nui ver ver a, ka kuah nghet ve sauh bawk.
.
Tlai chaw kan ei lai chuan ka rin loh lutuk in Mapuia chuan nau ka pai thu chu a sawi chhuak ta thut mai. Ka phu nasa, Madinga lah a meng kawk bawk. Chu ai mah chuan ak nu mak ti hmel mawlh mai kha. Ka pa erawh a lawm kher mai. Tu a neih ve tawh tur thu sawiin a phur suah suah ngei mai. Ka nu erawh in min lawmpuina thu sawi a harsat kher asin.
.
" Ka pa, Tei hi nau a ken chhung chuan apa te in lam ah pawh tal dam deuh se ka duh a ni. Ka nu hi dawr lam a kal ve zauh zauh a ngai si, nu kut tluk a awm lo in ka hria. Enge i ngaihdan?" tih pah chuan Mapuia chuan ka pa chu an zawt a, ka nu erawh chhete mahin a rawn der eih lo thung.
.
" Ekhai, a pasal i nia, tha i tih dan kha keini chuan kan pawm thlap. Ni e, i nu pawh a indaih lo si a, eng pawl pawl ah emaw hian a inhmang ve nasa si a, Tei tan tak pawh a nu bul a han hahdam deuh kha a pawi lo reng reng" alo ti vat a, ka nu erawh a ngawi ngal thung.
.
Chaw eikham chuan ka nu chuan nawm loh chhuanlam in room lam ah min luhsan vat a. Keini ka pa ho in Madinga leh keini nupa nen ka nau pai lawm nan ti in thingpui kan dawm ho a, ka pa phur lutuk chuan Mapuia farnu pasal nei tawh chu ava hrilh vat a, ani pawh a lawm thiam kher mai. He in ka lawi luh hnu a hlim tak a kan thutkhawm vawikhatna a nih hial ka ring. Ka nu erawh in kan hlimna min tawmpui ve chak lo aniange.
.
" I sawi dawn tih min hrilh lawk miah lo a" Mapuia ban lukham in ka mu a, ka pangchang thar leh khawp mai.
.
" In zavai a surprise che u ka duh alawm" tih pah chuan ka biang chu a rawn nul zauh a, ka va han hlim chiang tak em!
.
Ka pa te in a kan chaw ei pawh kan surprise chiang bawk a, ka nu pawh lawm avangin a tap zawih zawih reng mai. Ni e, an fanu zing a khawlh ber, beiseina sang pawh an neih ve ngam ngai lohna kha ka ni miau a. Pasal ka nei pawh an tih tawh naklaiin nau kan keng ve ta chu a nia. Tin, an rin aiin ka pasal te in ah ka tlei hrep mai bawk si. Ka tlei chhan erawh an hre hauh lo thung. An fanu hi ka puitling ve tak tak tawh tih an hre lo mai mai a ni.
.
" Ka zin chungchang min zawt miah lo a" kan haw kawng ah chuan kawng sir awl lai ah chuan kan ding a, a hmun a reh tha a, tin, a hma tawh loh avangin min vei vak an awm tawh lem loh avangin boruak dawn a nuam kher mai.
.
" Sumdawnna chungchang aniang chu ka tia" inthiam lo zet chuan ka en a, ka la zawt miau lo a ni. Mahse nidang ah pawh ka zawt vak ngai lo hrim hrim bawk.
.
" Ni lo e. Kan in chungchang ah hian a nia. Khatihlai a ka nu biak thin ukil kha hnamdang a nia. Delhi ah a awm tawh a, chu chu ka zuk hmu a"
.
" Chuan?"
.
" Thil a harsa dawn khawp mai. A chhan chu ka nu dik tak zawk hming sign a awm tlat a, mahse fake anih leh nih loh erawh ka ukil hnen ah lo buaipui turin ka hrilh a ni" tih pah chuan a thaw hak a, min rawn kuah a, keipawh chuan a kawng ah ka lo kuah let vat.
.
Ka naupai an hriat hnu chuan kan chhungte chuan chaw eikhawm an rawt a, ka nu phur lo lutuk hmel hmuh hi nuam ka ti ve tlat. Ka pa lah a phur nasa mai si. Ka pa rawtna angin kan in ah kan eikhawm a, ka chhungte pawh an rawn thawk rip viau mai. Mapuia lahin nuam a ti in a hmel hmuh a hahdam ngei mai. Madinga erawh a hlim hmel viau nangin chik tak a en tu tan erawh a khawharna hmuh hmaih theih a ni lo. Ka thiante pawh Mapuia'n a sawm vek a, Zamtei pawh Muana nen an ran kal ve a, Madinga'n ava hruai thlap a ni. Anni pahnih hi Muana hian inneih a duh a, Zamtei'n a duh tak tlat loh avangin Muana hian Zamtei te in hi in pui ah a nei a ni ber tawh. Zamtei pawhin hmeichhe ang nei tur in a ti nasa. Kei ngei pawhin ka be tawh a, mahse nawr luih chi a ni lo tih ka chiang. Tihian an hlim a, tudang mah an ngai bik lo a ni. an chhunte ve ve pawh an in pawhin chhungkhat ang tak tak in an awm a ni.
.
" Te, Zamtei te hi keimah in ka va thlah teh ang. A hnen atang thurawn te pawh ka mamawh in ka hria" Mapuia chuan nui hak hak a a tih chuan ka lo aw ve vat a, kei erawh ka kal tel ve lo. Mapuia hian min ngaihtuah over a, motor chuan vak vak a remti tlat lo pek. Duhaiin min duat mah mah hlawm. Ka chhungte pawh an lawm hmel viau bawk. Ka nu pawh a hun ah chuan alo tha thiam khawp mai.
.
" Iva lungleng awm ve" inchung a Madinga lo thu chu ka han pawh chho a. Mapuia alo la haw loh avangin lo nghah ka duh hrim hrim bawk.
.
" Leng lo e. Lo thu ve rawh. In pa ila nghak em ni?" alo ti vat a, thla a eng that avangin current kan on lem lo.
.
" Aw, alo thleng tep ang. Thingpui i in duh em?" tih pah chuan a bul a chair ah chuan ka va thu a, a lu a lo thing mat mat a.
.
" Tei, i hnen ah hian sawi duh ka nei a. Ka ngenna che ti hlawhtling a ka nau hlim tak a i siam avangin ka lawm a ni. Thil pakhat..."
.
" Eng thil nge ni ta?" ka lo ti vat a, a hmel chu a thutak em avangin ka awm a ti nuam lo lek lek.
.
" Ramtei'n min rawn bia a..." a ngawi leh dat a, kei erawh thu hriat chak zet chuan ak lo melh bawk a.
.
" Ngaihdam min rawn dil a...."
.
" A tha alawm. Nupa in ni tawh a...."
.
" Mahse ka ngaidam thei ta lo a ni" mak ti zet chuan ka en a, mahse ka hrethiam tho mai.
.
" Ka sawi tur a ni em ka hre lo. Mahse a inchhir tak tak anih chuan tinge chance i pek mai loh vang?"
.
" Ni lo e. Ala reilo lutuk. Bakah kan unau hmachhawp hi a hlawhtlin hma chuan ngaihdan ka siam thiam rih lo a ni" a tih chuan a kut ka va vuan a, ka hrethiam tih lantir nan ka chul zauh a.
.
" Chu, Mapuia alo thleng aniang. Chhuk thla ila, mut a hun tawh alawm" ka tih chuan a tho ve mai a, mipa vanduai tak ava ni chiang em! Keichuan Mapuia ka nei tawh a, ani erawh ala mal reng mai si. Ka khawngaih tak zet a ni.



CHAPTER -12

 Cicil Hospital nau veina room-ah chuan ka then chak chak a, keima nu in min awmpui a, kan pa leh midang pawh pawn lam ah an awm thap bawk. Ka rai hun chhung khan harsatna hran ka nei lem lo a, kan chhungkua ah pawh boruak danglam em em thleng a awm hran lo. Ka nu nen erawh kan in be tlem hle thung a. In check-up chhuanlam in phai lam ah a kal zing em em thung. Ka pa in kal pui a tum erawh chuan hnial tak te in a hnial ziah thung a. Thla 9 chhung khan vawi 4 ngawt a zin hman a ni.
.
" Fapa duhawm tak i nei e. 4kgs lai a lian a ni e" ti tu nurse chu ka nuih sak a, nikhua ka hre lo zui nghal.
.
Ka fapa muhil sak sak chu ka thlir reng a, tunah chuan thla 7 lai a ni ve ta. Duat rawn a ni na vang hian a fel phian reuh a, nau min awmpui tur nula pakhat kan pa in min lak belh sak leh tlat bawk a, nau pawm ah chuan ka hahdam phian mai. Ka nau pai lai khan khel ruh na ka nei tan a, ka nau neih hnu ah pawh reh a hnekin a zual emaw tih tur hian ka awm fo bawk nen, nau awmtu neih pawh chu pawi ka ti lutuk duh bik lo a ni. Mahse a tam zawk ah erawh chuan keimah vek in ka khawih thung.
.
Ka fapa kum 1 a tlin ni chuan ropui tak a lawm kan tum a, kan inbuatsaih nasa hle. Kan pa erawh nasa lehzual a hna a thawh hnu hian kan inhmu tlem a, mahse kan awmdun tum erawh chuan kan hlim viau thung.
.
" Te, naktuk hunserh zawh veleh Delhi pan a ka chhuah a ngai dawn a ni" kan fapa mut hnu chuan kan pa chuan a ti sup a, ka lungawi lo kher mai. A fapa piancham ah lehnghal!
.
" I fapa piancham vawikhatna a nia, enge chutiang em em a hmanhmawh ngai chu ni ta?"
.
" A pawimawh a ni. Ka cham chin tur ka sawi thei dawn lova, mahse ka theih ang a rangin ka lo let ang tih erawh ka chiang a ni" ka lungawi lo chu lehlam ka hawi tau hmak a, mahse tum dang a ka titau min thlem ang in min thlem hauh lo. Lungawi lo zet chuan ka muhil ta nge nge.
.
Kan fapa birthday hunserh kan hmang zo a, Mapuia pawh a tum ram pan in a liam zui nghal. Engmah sawi lawk a awm loh avangin kan chhungte mit meng ah chuan zawhna tam tak a awm. Mahse keipawhin a zin chhan ka hre bik tlat lo a, chhanna fumfe ka pe thei lo a ni.
.
Ka fapa birthday kan lawm atang chuan ka pasal chu a mizia a dang em em a, a tawng tlem a, a hlim lo bawk. Tin, kan nupa inkar pawh sawithiam si loh hian a hla du ti ila a dik ber ang. Ka nu erawh mak tak maiin ka fapa chu a duat thar em em thung. Mapuia sawipui ka duh viau nangin min hlat tlat si a, engma sawipui theihin a awm ngai lo. A zin nasa em em bawk a, mahse sumdawnna chauh a nih ka ring ta lo. Facebook-ah ka en thin a, a relationship status a hide tih ka hriat chhuah ni chuan ka thinlung hi a na vawng vawng teh e.
.
" Engvang a Facebook-a relationship status hide nge i nih?" ka pasal hnathawk bang inthlak lai chuan ka ti ta khawl a, ka insum thei tawh bik lo a ni.
.
" A pawimawh viau lo. Mi hmuh a inphochhuah vak hi ka duhzawng a ni lo"
.
" Enteh, inngaizawng pangai kan ni lo a, ka pasal i ni. Tunlai hmeichhe thenkhat nasat tawh zia ka hria, chuvangin pawmlai nei i ni tih hi i tilang tur ah ka ngai" ka thinrim vang a ka aw khur dar dar chu thup pawh ka tum buai peih lo.
.
" Chhuah leh ka ngai a, chaw ei min lo siam sak dawn mi niang?" ka thusawi hai der a thudang a sawi kher chu keia rilru na sa tawh nen chuan a inrem ta tlat lo.
.
" Enge tihsual ak neih? Ka thusawi kha i hre lo em ni?" ka ti ve ta tuarh mai le. Ka rawl a ring bawk a, sitting room lam a ka nu leh pa te TV en pawhin an hriat phak ngei ka ring.
.
" Hmeichhe te vak vak thin hi ka ngaithei hauh lo a nia" a hmel rum zet chu nidang ang chu ni se ka hlau leh khawp ang. Mahse tunah chuan ka hlau miah lo. Ka thinrim lutuk chuan hlauh nachang ka hre miau lo a ni.
.
" Keipawhin pasal, mi hma a min zahpui tur neih hi ka duh bik hauh lo" ka ti va ta ngat mai le. Ka tawngkam chuan eng chen nge a nghawng dawn tih lam ka ngaihtuah lo. Ka thinrim tlat a ni.
.
" Anih chuan i tan kan in kawngkhar hi a inhawng reng e" chu thu meuh chuan min deng dawt mai le. Ka rin loh lutuk thu a rawn phuhchhuak chu tawng ngaihna reng reng ka hre lo.
.
Ka pasal chhuah hnu chuan room-ah ka awm a, ka fapa a muhil tawh bawk. Sana ka melh chhen a, zanlai dar 12 a pel tawh, a thawm reng reng hriat tur ala awm lo. Ka tlaivar ta nge nge. Zankhua in a rawn haw lova, zing ah pawh a rawn haw chuang lo. Mahse a whatsapp ka check a, zing dar 7-ah pawh a online a, a dam tihna. Engvang a mize danglam ta nge anih ka hre hauh lo.
.
Zing dar 9 rik hma in ka pa a rawn bia a, hna chungchang ah dawr a a riah thu leh vawiin pawh thingtlang lam a a zin tur thu a rawn sawi a, kei erawh min be hauh lo. Ka rilru a na a, mahse tihngaihna ka hre chuang si lo. Ka bia nang nge be lovang tih ka ngaihtuah vang vang a, mahse biak kha ka tlawm la ta tlat pek. A chhan hriat si loh a a mize danglam ta erawh a chhan keimah ngeiin zawnchhuah erawh ka tum tlat thung.
.
" Tei, Bawiha leh Manuni( nau awmtu) nen in 3 in zanin chu Basketball khel en ang u hmiang. Mapuia a awm si lova, in khua alo har palh ange" Madinga chuan chaw kan ei lai chuan a rawn ti chhuak a, ka hawi a deuh hman. Ka beisei loh lutuk lam thil daih a ni.
.
" Ni e, vak khawthawng ve rawh u. Tei pawh, i tawm nasa lutuk a, hetiang hi chu a tha ngai lo. Rilru tih harh ve te hi a ngai thin a nia" ka pa chuan alo ti vat a, hnial chi a ni lo tih ka hria. Bakah pawi ak ti tehchiam lo bawk. Ka chhuak vak khat lutuk a, khawvel ning khawng pawh ka hre meuh tawh lo. Ka khawvel chu ka fapa hi a ni deuh ber mai.
.
Basketball khelhna hmun kan zuk thleng thla chu ka rinaiin mi an lo tam phian lehnghal. Tu te nge in tum tur pawh hre lo chuan kan kal ve mawp mawp a, Madinga chuan Bawihtea a kai a, Manuni nen an hnung ah kan zui bawk. Bawihtea hi a inla tlangval ve tawh a, pawm te, puak te hi khawlai ah chuan a duh bik thak lo zel.
.
Hall chhung kan lut chu inkhel tan hma in zai an lo ko chiah a, ka rinloh lutuk in Atea, G'nie leh hmeichhe pakhat chu stage-ah an lo ding thap a, karei leh! Ka hla duh em em ' ONE TEAM ONE DREAM' ngei mai chu an rawn thlawh pek anih kha. Ka lo zawm ve zuah zuah a, nutling tih a mawi leh mawi lo lam ka lo ngaihtuah leh tawh lo. An zai zo chu Madinga ka va en a, uluk mangkheng in min lo en ve chiah bawk, ka fapa a pawm bawk si. An in ang ka ti thar viau mai.
.
Kan en lai te an khelh zawh chuan Bawihtea'n a nin deuh avangin Apa Madinga hnen ah chhuah a ngen a, keini pawh zun ram thiar kan duh avang chuan Manuni nen chuan kan zui ve nghal. Pawn ah chuan mi an lo tam khawp bawk a, hetiang em em hian Mizo te hian Basketball kan lo ngaina tawh tih ka lo hre miah lo.
.
Keini Manuni nen hmeichhe lam zun na a kan zung zo kan chhuak chu ka phu nasa lutuk. Hall kawt, light in a chhun phak chiah ah chuan ka pasal, ka fapa pa ngei mai chu hmeichhe pakhat nen induh hmel zetin an lo inkai a, min hmu hauh lo tih ka hria. Ka tha khur nasa lutuk chu chetsawn ngaihna ka hre lo.
.
" Papa" mi tam tak zi nuaih nuaih kar a ka fapa in a pa a auh ri chu ka hrechiang ngei mai. Mahse apa erawh chuan a hre hauh lo anih ka ring.
.
" Tei, i haw ang u" Madinga'n ka dar a rawn vawn chuan ka phu zawk a, kan zavaiin kan hmu chiang a ni.
.
" E... Aw... Aaa... Nia" ka tawng bah nuaih a, ka fapa erawhin apa chu a au leh lauh thung. Mahse thawm a bengchhen em avangin a hre lo anih ka ring.
.
Madinga'n Bawihtea pawm chung a min kalpui hlawk hlawk chu Manuni'n hnunglam ah min rawn um ve dar dar bawk a, mahse ka rilru a chawmawlh vek thung. Engtinnge khatiang khan a awm theih? Ka pa meuh pawh a bum thei amaw? Alo khatih vang kha a ni ngei ang a mizia a danglam chhan. Ka awih phal lo a, mahse kha aia fiah kha a awm si lo.
.
In kan thleng chu ngawirengin Madinga chuan room-ah min hruai a, ka nu leh pa erawh thenawm mitthi tep an awm avangin an lo kal daih a, a tihzia phian mai. Manuni chuan Bawihtea chu a ti mu a, kei erawh kan nupa khum ah thu in ka en ngai ka en tlawk tlawk. Ka hmangaihna chu hetiang zawng hian maw min lo rulh dawn a? Na ka ti ngawih ngawih a ni.
.
" Inchung lam ah thu chho lawk ang hmiang" Madinga'n inthlahrung tak a kan nupa room kawngka a a rawn dah chuan ka bu nghauh a, ngawirengin ka zui ve nghal.
.
" Tei, sawi tur ava vang em!" Madinga chuan kan pahnih chauh a inchung thutthleng a inhmachhawn zawng a kan thut chuana rawn tichhuak sap a, keipawhin sawi tur reng reng ka hre lo.
.
" Thildang zawng zawng chu ka ngaidam thei. Mahse min rinawm loh san kher hi chu hriatthiam har ka ti a ni" 10mins vel engmah sawi lo a ka awm hnu chuan ka ti chhuak ta nge nge.
.
" Engtia tih nge i duh?" Madinga'n a tih chuan makti zet chuan ka en a.
.
" Engtia tih mah a ngai lo ve. Ka pasal anihna a bo chuang hleinem" ka tih chuan keimah ngei pawh mak ka in ti zawk. Tinge then lam hi ka ngaihtuah theih reng reng loh le?
.
" Alo haw hun ah keimah ngei in ka lo bia ange"
.
" Aih, ni lo. A ngai lo. Amahin a sawi chhuak anih loh chuan he thu hi ngawih bo pui rih ka duh a ni"
.
" I hmangaih a ni tiraw?" Madinga chu ka melh zauh a, hrehawm ka ti. Mahse chiang tak a ka hriat chu, tunge ka hmangaih ka hre lo hi a ni.
.
" Nakin ah pawh, engpawh ti ila ka lam i tang ang tih min tiam rawh" ka tih chuan Madinga chu a hawi buai tulh tulh. Ni e, ka pasal a ni a, nupui in pasal a hmangaih dan tur thlapin hmangaihna pawh ka pe alawm. Mahse min chhan letna hian min ti na a, chu natna chu a tha lo zawngin a kal ta anih leh kan na tlang dial dial mai aniang chu.
.
" Enge tih i tum?"
.
" Engmah. Ka pasal hi then ka tum lo" ka nui sang a, mahse a za hauh lo.
.
" A tih ang hi ti ve tur in ka phal hauh lo che ania. I fapa ngaihtuah ang che" ka phu zawk. A vawikhatna atan ka fapa ka theihnghilh ve lek lek alawm.
.
" Lungngai suh. Mu tawh ang" tih pah chuan ka tho a, inhnuai ah chhuk in kan nupa khum ah ngei chuan mal in ti takin ka mu ve ta! Nu thenkhat, an pasal te lerh avang a zan hun huphurh em em thin te dinhmun ah ngei chuan ka ding ve ta chu a nia.
.
" I zinna hmun chu a nuam em?" Mapuia lo haw chu tha takin ka lo bia a, a fapa nen chuan inchhaihin khum ah an tal dun a, kan hlim lai chu ni se hmuhnawm ka ti khawp ang le.
.
" Nuam a ni mai aniang chu" tih pah chuan a fapa chu a chhaih zui lehnghal a, min ngaihsak miah lo chu ka hrethiam tawh tlat a, ka vui peih lo.
.
" Manun, bawihtea chaw tur hi lo siam la, ilo hrai dawn nia aw" sitting room-a Manuni awm chu ka au a, kei erawhin kan pa thawmhnaw chu ka dah fel sak thung.
.
" Nangmah hian chaw i hrai ngai lo em ni?" Bawihtea Manuni'n chaw hrai tur a a lak hnu chuan buaina chu kan tan dawn anih hmel.
.
" Chu chu engvang a min zawt nge i nih?"
.
" I fapa a ni a..."
.
" I fapa pawh a ni"
.
" Laltlanmawi, min chhan dan kha fimkhur ang che" ka pasal hmel chu hmuh a nuam lo kher mai.
.
" Dawt ka sawi em ni?"
.
" Hei hi maw i pasal zin haw i hmuah dan chu. Hei vang hi..."
.
" Ka pasal chu Basketball khel en tur a zin chhuah a ngai bik tih ka lo hre lo hi nupui mawl tak, neih hrehawm tak ka nih phah ta tih i sawi dawn chu a ni em lovang chu maw?" ka pasal hmel chu a dang nghal vek.
.
" I thusawi fimkhur rawh"
.
" Hman ah khan i sawi tawh a tiraw? Mahni nun ve ve kan hmang anga, tumah kan intibuai lovang. Ka mamawh erawh ka dil thei ang che i tih kha ka a hre reng a nia. Tun atang chuan keipawhin ka zawm tawh ange. Nangmah chauh a i zawm te chuan a fair bik hleinem tiraw?" ka chhungril natna chu a hriat loh nan ka insangmar nasa hle bawk.
.
" Enge i hriat a?"
.
" I hriat zatve pawh kha ka hre lo. Mahse ka hriat a ka hmuh chin kha ka tan chuan a tawk viau a ni" ka ti leh nghat a, a hmel chu inthiam lo hmel a pu ve ta deuh. Mahse ka thinlung a khawih pha tlat tawh lo.
.
" Mi thusawi...."
.
" Tu thusawi mah ka hre lo. Ka mit ngei hian ka hmu che a ni. I fapa in a auh lawm lawm che pawh hre lovin i hmeichhe kawp nen induh hmel tak a in inmelh lai khan inbul ah khan ka awm reng tih hre law law rawh. Tunah chuan a tawk ta viau e. Kan fapa vang hian inthen ka duh lo. Mahse nupa ang a awm zui a tulna ka hre lo thung a ni. I duh chuan min MA thei ang. Mahse keima thu erawh chuan ka chhuak dawn hauh lo ania" ka thawl hawk in ka hria. He thu sawi tur hian ka inngaihtuah nasa bawk a ni.
.
" A tha alawm. Kan inthen lovang. Mahse i duh dan dan in i awm dawn nia" tih pah chuan a tho a, room atang a chhuak zui nghal. Lawm viau tur ka ni in ka hria, mahse ka lawm hauh lo. Engvang a mize mak tak nei tlat nge anih ka hrethiam lo a ni.
.
Kum 1 zet chu kan nupa pawh kan mu dun ta lo. Mahse a fapa erawh a ngaihsak em em a, keipawh pawnlam hmuh ah chuan min duat der thiam em em bawk. Mahse mi awmloh ah erawh kan inbe ngai hauh lo. Min biak chu a duh thin, mahse biak theih a awm ka tum lo. Cheng dun reng mahila mi hrang ang hmiah kan ni thung. Kan fapa hriat ah erawh nupa inngeih tak ang kan ni.
.
" I pasal ngaihzawng neih hi i enliam mai mai zel dawn em ni?" ka pa beng meuh a thleng ve ta chu hrehawm ka ti tak zet a ni.
.
" Ka pa, pawi ka ti. Ka tih theih bak hmun ah a lut tawh a ni" ka kun lap a, ka pa hmel chu ka en ngam lo.
.
Ka pa in kan nupa kar a hriat hnu chuan inchhung ah pawh a der in kan nung ta lo law law. Mahse mak tak maiin ka nu alo inrawlh ve eih anih chuan Mapuia chuan min chhan leh em em thung si. Ka nu hian vawi tam tak min chhuahtir tum in tawngkam a nei fo a, mahse Madinga leh Mapuia hi hemi kawng ah erawh an tangrual em em bawk. Ka chhungte beng pawh a thleng tawh. mahse tawrh chhuah ka tum tlat ka tih avangin min hruai haw ngam bik lo a ni.
.
" Zanin hian chhungkua a thil sawi ho tur kan nei a, tumah leng chhuak lovang che u" ka pa in tlai chaw ei lai a a tih chuan kan ngawi thap a, tumah in kan hnial lo bawk.
.
Chaw eikham chuan Bawihtea chu Manuni'n a ti mu a, Bawihtea room lam ah a mut a, kan awmpui dangte pawh mu tur in ka pa in a ti vek bawk. Ka pa thil tih dan ah chuan mahni theuh zawhna kan inzawt hlawm in ka hria.
.
" Zanin a thil sawi ka duh hmasa ber chu hei hi a ni. Lawmsangzual, i nupui leh i fapa tap a an rum mek lai hian ka rinloh dan ber in nangin ngaihzawng neiin i tal hiar a, hei hi sawifiah tur in ka duh che a ni" ka pa in a tih chuan tupawh mai chu kan phawk hra vek mai in ka hria. Mapuia lah a ngawi ngal a, ka pa chu chhan tum ang pawhin a awm lo.
.
" Lawmsangzual, ka thusawi chu i hria em?" ka pa in vin tak a a tih chuan muangchangin a rawn hawi chhuak a.
.
" Hei hi chu kan nupa kar a ni. Puitling ka ni ve tawh" a chhanna chuan min ti phu nasa lehzual. Hetiang hian ka pa hi tumahin kan la chhang ngai hauh lo.
.
" Mapui...."
.
" Nangkha, lo tawng suh. I tenawm lutuk avang a kan unau tawrhna hi en ta che. Pawisawi chung a i thil tih hi en rawh. I hlim em?" ka nu tawng tum chu a kawk a, kan phu nasa ngei mai.
.
" Enge thil awmzia?" ka pa chuan alo ti vat a, ka pa hian engmah a hre lo tak zet a ni.
.
" Ka pa, ka sawi duh loh sawi tur a min nawr kher hi a tul hauh lo asin. Mahse kan sawi pawp ta sa sa, ka sawi ang. Ka nu..."
.
" Mapui, a tawk tawh e" Madinga chu a rawn tawng chhuak ve ta.
.
" Ka U, ala tawk lo. Tinge ka tan i inhlan ral bik ngawt ang. Min lo khap hauh suh ang che. Ka pa, i hriat loh thil tam tak hi ka nu hian a ti asin. Nanghi chu khawvel a PA tha ber a ni. Mahse ka nu erawh min hringtu nu ngei mai min thah sak a, ka U nun nghaisa tu a ni asin" ka pa chu a hawi a ngei mai. Sawi ve tur reng reng ka hre lo. Ka nu hmel chu hlauhna hlir in a khat thung.
.
" Ngaithla tur in ka inpeih e" ka pa chuan a ti ban ta chat mai. ka nu mangang hmel chu a hmuhnawm ka ti letling phian mai.
.
" Ka pa, Mapuia hi...."
.
" Mading, sawi tir rawh" ka lo ti ve tlat. Ka pa in makti zet in min rawn en a, ka nu erawh chuan huat hmel zetin min lo melh thung.
.
" Ka U, min lo hrethiam ang che. Ka pa, keini hi in fa lak kan ni tih chu i hria a, mahse ka U nen hian phir kan ni tih kan hrechhuak tawh tih erawh i hre ve lo tih ka hria. Kan nu dik tak kha tun a ka nu unau pianpui a ni lo tih hi i hriat leh hriat loh ka hre lo a, mahse he in leh lo hi ka nu dik tak ta kha a ni asin. He ka nu tenawm tak hian ka nu, hmeichhe rilru tha tak kha accident ang a lan tir in a that a, a in leh lo neih sakin ka nu hming sign alo zir vek bawk.
Tichuan keini unau min lak dan chu sawi ngai ah ka ruat lo. Ila hria em? vairam a accident ka tawh lai a ka kidney thlak a ngaih tum khan, khatih lai khan ka U leh tun a ka nupui, Tei hi an inngaizawng a, an inhmangaih em em bawk. Mahse khatihlai khan Ramtei khan ka U kha a atchilh ve miau a, ka nu lahin kan chhungkaw sumdawnna atan an pawimawh zia hria in ka U chu keimah hmangin a blackmail ta a ni.
Tei then a, Ramtei a neih loh chuan ka nu khan kidney min pe lovang tih a ka U a vau avangin ka U chuan a hmangaih em em kalsan in ka nunna atan Ramtei a nei ta a nih kha. Heng zawng zawng hi Tei ka tawn tirh hian ka hre lo a, mahse ka U hian mi dik tak a hmangaih avangin ka vanneih phah ta a ni. Ka U chuan ka nu thuruk hi ka hre lo emaw ti in min chan a hlauh avangin thudik thupin Tei hnen ah kei min nei tur in a ti ta a, mahse khatihlai khan engkim ka hria tih an hre lo.
Tei mizia hi ka ngaina a, ka U ngaihzawng hlui a ni tih hre rengin ka ngaizawng ve ta tho a, Tei erawh chuan khang hunlai khan min ngaizawng ve hauh lo. Mahse a hmangaih ber te unau chhan nan kei min neih kha a ti tlu ta a ni. A chhan chu ka U kha ka nu thuhnuai ah a awm lo thei lova, keiin engkim ka hria tih an hre si lova, ka nu lak a min veng turin Tei hian min nei ta a ni. Mahni hma ka sial viau a ni mai thei. Mahse tunah chuan ka thei ta lo a ni e. Tei hi ka kal tir anga, ka U nen hlim takin awm dun se ka duh a ni. Ka fapa hi chu ka U kut ah ka ngaih a ngam tawk a, kei erawh he in chhuahsan hian ramdang ah ka kal dawn a ni" Mapuia thusawi chhung chuan ka pa chu a che lo hrim hrim. A thusawi tawp lam chuan min barakhaih nasa ngei mai.



CHAPTER -13

 Kan inchhung chu a reh tlawk tlawk a ni ber mai. Mapuia lah a sawi duh a sawi zo a, a ngawi hmak mai bawk si.
.
" Thanglian, a dik em?" ka pa chuan ka nu chu a en run a, ka nu tan chuan a zam-awm duh khawp ang le.
.
" Bawihi Pa..."
.
" Ka zawhna chu min chhang rawh. A dik em?"
.
" Ka vin e te min tia law? Nang, nupui te sum leh pai a zahawmna nei ve mai hian min vin hlek suh" ka nu tawng ah chuan kan phawk nasa hlawm ngei mai. Ka pa pawh a hamhaih zia a hriat.
.
" Engmaw i sawi a?" ka pa chu a tawng ring lo, mahse a hlauhawm dan erawh a danglam hauh lo.
.
" Aw, ni e. Ka sum leh pai, ka ro thil vang a zahawm ve chauh i nih hi. He chhungkaw tan hian enge...." ka nu hmai ri chawrh chuan a zui nghal. Mahse ka pa erawh kutthlak tu a ni lo. Ka rin loh ber mai Madinga a ni ta tlat.
.
" Ngaithla rawh, nang ramhuai tenawm. Ka pa, i pasal meuh pawh zah zo lo a sum leh paiin a bual at hmeichhia hi ka nu tih in ka ko leh tawh ngai lovang che" ka nu chu a kawk sawk sawk a, ka pa erawh a ngawireng thung. A thu hriat khan a thawng viau tlat a ni. Ka nu hi sual ve hle e ti lo hian ka pa hi a lang ah chuan a zahder thiam em em tlat a ni. An nupa hi an inhau ngai lem lo. A chhan chu ka pa hmuh ah hian a inthup thiam em a ni.
.
" Laldingnghet, i zak em? Keihi awm lo ila nangni sawn unau hian khawvel ah vahvaih bak in hmabak lo tih i hria em?" ka nu rapthlak dan chu awihawm loh hial zawk a ni.
.
" Nu Thang, ka hrilh ang che. Ka nu in leh lo chhuhsak a ka nu i thah hnu a i hmingthatna atan a kan unau min hmang hi ti tha i in ti anih chuan keini phei chu perfect kan ni ang. Tun atang chuan i tawngkam fimkhur tawh ang che" Madinga thinrim aw khur dar dar chu ka lo khawngaih kher mai. Mapuia erawh a inhumruh nasa ngang mai. Ka vuan bet tlat a, a chhan chu a U aiin a che na dawn tih ka hrechiang tlat a ni.
.
" Bawiha, sawi tur reng reng ka hre lo a ni e. Keihian PA ka ni emaw ka lo in ti a, mahse in tan PA nih ka lo tlin reng reng lo alo ni. Min ngaidam mawlh ang che u" ka pa rilru na lutuk chu ka khawngaih ngawih ngawih.
.
" Ka pa, nang hian engmah tihsual i nei lo. Khawvel ah hian piang nawn leh dawn pawh ni ila nangaia pa tha kan hmu chuang lovang" Madinga chuan a ti leh nghut a, mahse ka nu vang a a thinrimna chu ala reh lo tih hriat takin a aw-ri erawh ala chang viau tho.
.
" Ka nu, hei hi hre rawh. I duham na avang a pawi i khawih hian jail bang a zut tir thei che asin. Kan unau a thinlung ser i siam hi engtia siam that nge i tum?" Madinga chuan a ti leh nghat nghat a, ka nu erawh zam hmel eih ala pu chuang lo.
.
" In unau ka enkawl seilenna che u hi jail bang zut na a nih chuan i nu thlarau chu a lawm khawp ang" zam map lo a ka nu in a tih chuan Mapuia chu a ding uaih a, rangzetin ka pawm bet a, kan ri ta nuaih nuaih mai. Diktak chuan kan awmpui te pawhin kan thawm an hre lo thei ta lo.
.
Kan nupa chuan kan mu ngawireng a, kan chhungkaw boruak chu a hahthlak tak zet a ni. Ka nu lah tlawm tum bik si lo. Chu chuan ka pasal te unau a ti hel zual sauh bawk si. Ka pa reng a lainatawm teh e. A beisei loh ber thil in a deng a, a fapa leh a monu hma ah ka nu in tlawm tak in a siam bawk a, mi azawng a mi tha ber mai rilru chu ava na dawn tehreng em!
.
" Tei, ila muhil lo tih ka hria. Thil sawidun ka duh a ni" Mapuia'n a rawn tih chuan ka che hrat a, a lam hawiin ka in her a.
.
" Kalbo kha i sawi leh dawn anih chuan kan nufa in kan zui zel ang che"
.
" Ni lo e. Ka U bulah hian in him tawk tih ka hria. Keichuan ka U hmangaihna zat che hi ka pe zo ve lo che a ni"
.
" I U hmangaihna sawi ka tum lo. Kan nufa hian min hmangaih la, kan tan rinawm la, chu chauh chu a ni kan mamawh. Tin, Pathian hma ah nupa kan ni tawh a, thihna vang lo chuan nang then che hi ka tum ngai lova, tunah pawh ka la tum chuang lo. I nupui ka ni a, ka pasal i ni. Chu chu kan tan a tawk" ka ti ve ta. Ka rilru dik tak pawh a ni.
.
" Mahse Tei..."
.
" Mapui, i nupui ang takin min lo en ngai miah lo em ni? I fapa hi i fa ang ah i ngai miah lo ami? Apa U ni lovin nangmah, apa ngei hi alawm a mamawh che. Inthen hi sawi reng tawh suh"
.
" Engmah hi i hrethiam lo a ni"
.
" Enge ka hriatthiam loh chu min hrilhfiah ta che"
.
" Tei, he in hi kan nei let leh tawh lovang. A chhan chu kha ka nu hming sign kha a lem a ni tlat lo a ni. Ka nu(Nu Thangi) hian engtinnge ka nu kha a tih ka hre lo, mahse hming sign kha a lem a ni tlat lo. Chuvangin he in ah hian ka awm reng thei dawn lo a, ka U chuan mahni in sumdawnna a nei tawh a, a hmangaih ang tho che in ka fapa pawh a hmangaih ang tih chu chiang sa a ni. Chuvangin a hnen ah awm ula, keichu ramdang ah ka kal anga, thlamuang takin kan awm theuh thei tawh ang" ka pasal ngaihdan chu a diklohna engmah a awm lo. Mahse hriatloh a nei a, chu chu ka hmangaih tih hi a ni.
.
" I ngaihdan atang chuan kan nufa tan a tha ber ni a i hriat i ngaihtuah tih ka hrethiam a, mahse hriat kim loh i nei a ni. Mapui, i U ni lovin nanghi ka hmangaih leh ka pasal chu i ni. Engpawh thleng se ka zui zel ang che. Tin, khawiahmah i kal ka phal lovang. Tinge bul chu kan tan ve mai loh vang?" ka tih chuan Mapuia chuan min en ha a, maktihna hmel hlir in a khat a ni.
.
" Min hmangaih maw?" a hmel chu maktihna, awih ngam lo, naupang chhe hmel pu tak chuan min en a, a beisei miah loh thu ka chhakchhuak miau a ni.
.
" Aw. Ka hmangaih che"
.
" Lalpa, ka lawm e" ka pasal in lungchim tak a min kuah chuan keipawh ka hlim khawp mai. Ka lo sawi har deuh pawh hi pawi tihna ka nei ta lo. A mamawh hun tak ah ka sawi ni in ka hria.
.
" Tichuan ka nu chu engtia tih nge i tum?"
.
" Ka U duhdan in he in hi kan chhuahsan phawt aniang chu"
.
" I U duhdan tih engtinnge i hriat?"
.
" Ngaihzawng ka nei ni a in hriat khan ka U in phone in min rawn bia a, nang kalsan che ka duh vang a khatia awm kha ka nih thu tlang takin ka sawi a, mahse ti tawp tur leh patling tak a awm a, he in chhuahsan a bultan tha turin min ti a, mahse ka ngaihtuah a, min hmangaih ve chuang lo ni a ka hriat avangin vairam a lehkhazir a ka awm lai a ka thian kawm ve ber, Russian mi in company thar a din ve a, thawk tur in min rawn sawm a, nangni nufa kalsanna tha tak ni a ka hriat avangin kal ka ti tlu ta a. Mahse ka kalsan dawn che u tih ka sawichhuah dan erawh ka tum hauh loh thil a ni"
.
" Engvang a min rawn miah lo a chu thutlukna chu siam nge i nih? Kei hian ka hmangaih ve lo che a i ngai anih chuan ka thiam loh a ni. Mahse tunah chuan i hre ta a, i kalbo lovang tih min tiam rawh" ka pasal chu ka va kuah a, ka hmangaihna lantir nachang ka lo hriat tawk loh avang a ka pasal rilru ka lo ti rethei lutuk chu hrehawm ka ti ve tak zet.
.
" Engtinnge bul kan tan ang?"
.
" Pathian kut ah dah ila, engkim min rel fel sak mai ang"
.
" Ka pa, i ngaihdan a ni em ka hre lo a, mahse keichu he in atang hian ka chhuak tawh dawn a, keimah ngeiin bul ka tan tawh dawn a ni" chaw ei lai a Madinga'n a rawn tih chuan kan phu nasa hlawm ngei mai.
.
" Bawiha...."
.
" Ka pa, min hnial lo hram tur in ka ngen che a ni. He in ka chhuahsan dawn avang hian i fapa ka nihna a bo dawn chuang lova, mahse he in ah hian ka awm thei tawh lo a ni"
.
" Ka zak hle mai. Ka fapa, ka hrin ang chiah a ka en te in ni a, mahse ka beisei loh thil vang in ka chan dawn ta che u chu a nia. Keichuan in duhdan hi hnial ngam tur ka ni lo" ka pa chuan a ti dap dap a, mahse a tawngdan atang chuan a rilru a na hle tih a hriat vek. Ka nu erawh a ngawi ngal a, engmah a sawi ve duh hauh lo.
.
" Ka pa, ka chhuah avangin ilak atang ka kalbo dawn tihna a ni lova, mahse rilru na chung a awm reng ai chuan mahni a ke pen ka duh tawh zawk a ni. Ka thih thleng in ka pa i ni reng tho ang" Madinga chuan alo ti leh vat a, tumah chaw ei tui reng kan awm lo.
.
Nileng chuan Mapuia chu a chhuak a, dawr ah erawh a kal lo tih ka chiang. Kan nufa in a thu rawn hawn kan nghak tawp mai a ni. Nep min ti in awm mai thei. Chhungte nei reng chung pawhin pawh in ti mai thei. Mahse pasal ka nei tawh a, a chhan chu engpawhnise ka pasal hi ka hmangaih a, ka fapa ka hmangaih bawk. Chuvang chuan inthen lam hi ka rilru ah a awm ngai lo hrim hrim a ni.
.
Thla 3 a liam meuh chuan kan chhungkua pawh Zarkawt atang Electric veng ah kan awm ve ta. Sum leh pai ah Madinga zar ah harsa lutuk lovin sumdawnna bul kan tan leh thei a, loan te kan la bawk a, hrehawm lutuk chuan kan awm bik lo. Manuni ni se hlawh pek kan tan a harsat tur thu kan hrilh a midang hnen a awmna zawng tur a kan tih lahin hlawh beisei hauh lovin kan hnen ah a awm zui a, kan tan chuan a hlu tak zet a ni. Madinga erawh alo inbuatsaih sa thlap avangin Bazar bul lawk ah flat alo lei fel hman vek tawh a, amahin a awm ve bawk a ni.
.
Kan hun tawn a ni chuk chuk bawk a, ka nu pawh engmah ti lovin kan en liam tawp a, mahse Mapuia erawh chuan bansan a tum hauh lo tih a sawi a, a bansan ka ring lo bawk. Madinga nen pawh an unau inkar a tha em em a, ka tan tak pawh a hahdamthlak viau a ni. Mahse hei hi kan buaina tawpna alo la ni hauh lo.
.
Nikhat chu ka fapa leh Manuni chu Madinga'n a dawr ah a hruai a, hei hi chu a tih fo thin dan a ni. Bawihtea hi a atchilh ti ila a dik ber ang. Mapuia pawhin thik lam ah a la ngai lo. Kan nufa a min hruai chhuah lawp lawp chang pawh a awm fo, mahse buaina a awm ngai lem lo. Chutia keimah a in nghak a in ka lo tihfel mawlh mawlh lai chuan kawngka kik ri ah chuan ka va hawng vat a, ka rin loh tak maiin Larson alo ding a, makti zet chuan ka en hau a, kan inhmu khat em em bawk.
.
" In in thar ah chuan leng tur pawhin min sawm i tum lova" vui hmel deuh chuan min en a, kawngka hawng zau in nui var var chuan thupha ka chawi mawlh mawlh a. Ni e, kan buai em avangin ka thian te pawh ka thlahthlam viau tih ka hria.
.
" In pa in dawr a nghak ami?"
.
" aw. Ilo lang ve teh hlawl a"
.
" Nia. Sawlai lawk ah sawn thil ka ti lawk a, ka rawn lut kawi. Madinga hnen atang in inluah ka hria a" a tawngdan ah chuan a vui zia ka hrethiam. Ka inthiam lo tak zet.
.
" Ka tihpalh lutuk. Thingpui in rawh aw"
.
" Aih. Ka rawn in tawh zawk. Thil sawipui che ka duh a" a hmel chu a thutak em em bawk si, ka ngaih a tha lo ta tlat pek.
.
" Engenita?"
.
" Ka Patea chungchang hi a nia"
.
" Engthil nge ni ta?"
.
" Mapuia te unau hi hmuh a duh a?"
.
" Aw, chungte chu thu lawmawm tak ania lawm. Mahse Mapuia hi a pa dik tak kan la hrilh lova"
.
" Ka hre daih tawh alawm" Mapuia chu alo luh lai reng reng ka hre lo.
.
" Engtiklaiin nge ilo haw?"
.
" In lo ti ti tui deuh a. Tichuan ka pa chuan min hmuh a duh ta i tihna em ni?" Larson chu a en a, a hmel ah chuan engmah ka hrethiam lo.
.
" In hmuh duh chuan a lawmawm khawp ang"
.
" Ka pa chu lo hrilh la, ka U ngaihdan erawh ka hre lova, keichuan ka hmu dawn lo tih ilo hrilh dawn nia"
.
" Mahse...."
.
" tei, hei chu pafa inkar thil a ni. Khalehchen kha min hmu turin hun a nei. Mahse min hmu em? Tunah min hmuh a tulna ka hre lo ve" a ti ta hmak mai. Larson lakah chuan ka inthlahrung kher mai.
.
" Ka hrethiam e. Unaupa, mipa dik tak ngaihdan tur a ni e. Tei, hrehawm lo ti suh. I pasal ngaihdan chu i tawmpui tur zawk a ni" Larson chuan alo ti vat a, a nui sang bawk.
.
Larson haw hnu chuan Mapuia chu dawr kal tum leh hmel pawh a pu lo. Ngawirengin room-ah a awm a, a bul a ka va kal pawhin min be lem lo.
.
" Mapui..."
.
" Ka pa chungchang i sawi dawn anih chuan min kalsan rih rawh" alo ti hmak a, sawi luih chi ni in ka hre lo.
.
" Dawr i chho tawh dawn lo anih rau rau chuan kan pahnih in ei rawng bawl dun ila"
.
Ka sawmna chu hnial lovin rinloh tak maiin hlim deuh chuan ei rawng kan bawl dun a, Madinga bia in kan in a chaw ei ah a sawm nghal bawk. Tlai chaw kan ei kham chuan Bawiha mutchhuak chu a chiau hiar ve deuh a, room lam ah mut puiin Manuni chuan chaw ei na vel a tifai a, Mapuia leh Madinga erawh thu pawimawh an sawi dun tih hriat takin an ti ti a, an tawng rin loh avangin enge an sawi phei chu ka hre lem lo.



CHAPTER -14

 Mapuia'n a pa a hmu duh lo chu Madinga nen tihngaihna vak kan hre bik lo. Madinga erawh chuan ava hmu ngei a, mahse mapuia erawh kan ti lui ngam meuh lo a ni.
.
" Nu Thangi ukil nen kan inhmu a" zan a kan mu chu Mapuia chuan min rawn kuah a, a ban ka lo chul ve bawk.
.
" Chuan?"
.
" Thuneitu sang zawk hnen ah Nu Thangi lak ah thubuai ka thehlut dawn a ni"
.
" Mapui, tul i tih leh tha i tih ang apiang chu ka pawm. Mahse Madinga i hrilh em?"
.
" Aw, amah nen engkim kan ruahman dun a ni. Ka nu kha tihluihna a hming sign tir anih thu Nu Thangi ukil khan a sawi a, mahse evidence erawh kan nei tha meuh lo a, bei nge sei run dung kan ti ang chu"
.
" Tih theih enge ka neih ve?"
.
" Tihian ka nupui ni la, min hmangaih reng la, kan pafa tan hian awm reng ang che. Chubak adang ka mamawh lo" tih pah chuan min rawn kuah a, hmangaih tak chuan min fawp vawng vawng.
.
Nu Thangi( ti hian ka sawi zel tawh ang) lak a thubuai thehluh ni chuan ka pa a rawn lang ve ta tlat mai. Mahse Mapuia te unau dinhmun hrethiam takin engkim a sawi a, pa tha tak chu ava ni chiang em!
.
Thla 3 teh meuh thubuai chai anih chhung khan rilru hi ava han hahdam lo thin tak em! Nu Thangi lah tan theihpatawpin a tang a, tam tak ah chuan kan tan khin hneh chi a ni lo. Mahse vanneihthlak takin khatihlaia a ukil thin khan Mapuia te unau kha a khawngaih ta tlat a, Nu Thangi tan chhan ber a ni bawk si nen, Mapuia te unau tan kawng rawn hawn sak in Nu Thangi thil tih kual vel dan zawng zawng chu court-ah a sawichhuak ta vek mai le. Nu Thangi hmel chu a dang sawp sawp thei. Court chuan thil awmdan a enkual hnu chuan thutlukna puangin Nu Thangi chu tualthat, blackmail leh dik lo tak a mi thil chhuhsak ti a puangin hremna pawh a nep lo khawp mai. Damchhung lungin tang tur a hrem a ni ta.
.
Ka pa reng a khawngaihthlak. Kan thubuai chuan Mizoram a chiah hneh kher mai. A awm ve reng e. Mizo zing a sumdawng lian ber mai pawl in a khatiang thubuai han neih kha chu mi sawi chak zawng tak mai alo nia. Ramtei erawh kha chu vanneihthlak tak in Nu Thangi khan Madinga a neih duh chuan ti in alo blackmail ve tho alo nia, court pawhin ngaidam in Madinga te unau phei chuan thubuai siam sak ve ngai a an hriat loh avangin an siam sak ve kher lo bawk. Nu Thangi erawh a ze ngai bawk, ala zam miah chuang lo. Upa ten ' Hmeichhe huaisar laklawh chu an sim mai thei lo' an lo tih ang kha a ni tak tak in ka hria. An fanu erawh a lainatawm khawp mai. Mahse Madinga te pawhin huatna an nei lo a, an unaunu ang thlap in an la en ve thung.
.
Mapuia duhthusam a thleng ta bawk a, a nu in ngei mai chu a hming in a awm ta vang mai le. Madinga nen a insem a duh viau nangin Madinga erawh chuan in a neih tawh tho avangin a hnial tlat thung. Ka pa chu kan hnen a awm tur a kan ngen nasat avangin min awmpui a, bungrua pawh engmah kan khawih danglam lo. Sumdawnna erawh ka pa in tih ral a duh tlat thung a, Aizawl pa hausa zet pakhat in a lei ta thung. Kan thubuai avang a eirukna inhailang pawh a nasa na ngiang e. Mahse kan ram ah ve zawng, eiru te hrem ngam lohna dan hi a awm emaw tih mai tur hi a nia, hrem an nih thu hriattur a awm hauh lo.
.
Kan in hlui, kan in thar ni ta ah chuan Nu Thangi tello chuan kan awm ho leh ta chu a nia. Kan dawr pawh hma a sawn ve zel a, kan fapa leh a pu an in awm thei a, keipawh dawr lam ah kan pa puiin ka kal ve ta zauh zauh. Mahse nitin erawh ka kal lem lo. Kan fapa enkawl tam ka duh avang in ka theihtawp a tam in ah ka awm a, Mapuia zin chang erawh chuan khel lovin dawr ah ka awm thung. Ka pa ber hi a inthlahrung ang tih kan hlau ngawih ngawih a, engkim ah kan rawn a, a thutlukna tello in thu tawp engmah kan siam ngai lo. Amah pawh a lawm thiam ve em em bawk. Mahse an nu vang a a tawrhna erawh chuan a taksa chu hmuh theihin a tlahniam thung. Thla tin jail lam ah a zuk tlawh tho a, Mapuia'n a hruai hman loh chuan Madinga'n a hruai thlap thin.
.
Nikhat chu Mapuia zin lo haw avangin in ah kan awm thap a, Madinga pawh a rawn leng phei ve bawk. Sitting room-ah thu in kan ti ti mam mam a, hetiang a kan thutkhawm tawh hi chuan kan hlim dar dar thin viau. Door bell ri ah chuan ka tho vat a, kawngka ka va hawn chuan ka rin loh lutuk in Larson leh Mapuia pa an lo ding. Mapuia pa hi Mapuia te unau ka hriat hma daihin ka hre tawh a ni. A chhan chu Larson Patea a ni tlat a ni.
.
" Tei, tu te nge a?" Mapuia chuan kawngka lam rawn pan pah chuan a rawn ti lang lang a, kawngka a lo ding te a hmuh chuan a ding chat a, a ngawi ta hmak mai le. Awmdan tur ka hre lo kher mai.
.
" Mapui, kan rawn tlawh zawk dawn cheu a" Larson chuan pangai tak chuan a lo ti vat a, kei leh Mapuia pa chu kan ngawi reng. Thunphu dep dep a Mapuia tawng kan lo ngaihchan lai chuan Madinga a rawn phei veleh hlauh.
.
" Ekhai! Ka pa, Larson, in lo kal elaw? Lo lut ru. Tinge pawnah indin reng" Madinga'n a rawn tih chuan tlem chuan ka thawveng ta deuh. Mahse Mapuia hmel mawlh chuan min ti mangang a ni.
.
Madinga chuan sitting room lam ah chuan a hruai phei a, ka pa chu a hmelhriattir a. Mak tak maiin ka pa chu a thawng hauh lo. A awmdan a danglam eih lo bawk. Tha takin alo welcome a, hre sa a ang mah zawk.
.
" Enge in rawn tih dawn?" Mapuia chu a rawn tawng chhuak ta nge nge. Apa dik tak a lawm lo hi dem ngawih ngawih bik tur chu a ni miah lo.
.
" Bawiha, han thu phawt teh" ka pa chuan alo ti vat a, Mapuia chu ngawirengin a thu ve mai bawk.
.
" Hei, Pu Zuala te hi keima koh an ni a. Larson a maw khah? Aw, ani zar ah hian Pu Zuala pawh tha takin kan ti ti dun thei a. Tlangval, ka lawm e.
a hmasa in, ka fapa te 2 chung ah hriatthiamna ka dil e. Vawiin hian Pu Zuala hi keima koh a ni a, in lung ka ti awi lo anih chuan min hrethiam hram hram dawn nia. Mapui, khawvel ah hian hringtu PA chu pakhat chauh i nei a ni. Chu chu Pu Zuala hi a ni. I pawm emaw, pawm lo emaw thudik chu a danglam phah dawn chuang lo a ni. Hetia in pa ka koh avang hian ka hmangaih lo che u tihna a ni lova, hunrei tak Pu Zuala dinhmun tur ka luah tawh a, tunah chuan puitling in ni ve tawh a, naupang rilru pu lovin he thil hi kan pawm ngei a ngai a ni.
Mading, i pa ka hmuh hma a ilo va hmu tih ka hriat khan ka lawm tak zet a ni. In pa hian tihsual engmah a nei lova, a bul ber chu ka nupui a ni tih in hriat kha. Khang hrehawmna in tawrh tawh zawng zawng kha ka rul let thei hauh lo che u. Mahse Patian rawn chung a ka tih tur tha ber ni a ka hriat chu in pafa ho a hruai khawm che u a ni. In hma ah hian ka tlawm ngawih ngawih a, lo hria ni ila nangni unau hian chhungkua diktak in nei ngei ang. Mahse Pathian remruat kan dan theih a ni lo a ni. Ka nupui aiawh in in pafa chung ah hian ngaihdam ka dil ngawih ngawih che u a ni" ka pa chuan a mittui a hru zauh a, Madinga chuan ka pa kut a vuan vat a, Mapuia erawh ala ngawireng thung. Mahse a hma a a hmel nur erawh hmuh tur a awm ta lo thung.
.
" Ka pa, engmah tihsual i nei lo. Nanghi min hringtu ni lo mahla PA awt miah lo a kan unau chung a PA nihna dinhmun min luahsak avangin lawmthu sawi mawlh mawlh tur zawk kan ni. Mapui, enge ila nghah? Ka pa (Pu Zuala) kha i chibai dawn lo em ni?" Madinga chuan Mapuia chu a rawn melh a, Mapuia hmel chu hriatthiam a har kher mai. Larson leh kei leh Pu Zuala chu akn la ngawi reng. Sawi ve tur a vang em asin.
.
" Mipa i ni lo em ni?" Mapuia rawn tawng chhuak chuan min ti phu kher mai. Pu Zuala chu a en ngar bawk a, mahse Pu Zuala erawh a hmel a danglam miah lo.
.
" Mapui..." Madinga leh ka pa chuan an lo ti rual thawt a.
.
" Hmeichhe pakhat hlau a patling in a fate fahrah lai a hahdam tak a awm thei mihring hi ka pa ti a koh ka tum lo ve" Mapuia thusawi chuan min thawng hlawm ngei mai. Pu Zuala chu a kun ngal a, a kut a hum ruh nasat dan ah a rilru a na hle anih ka ring.
.
" Mapui, khatiang..."
.
" Ni lo e. Pu Mawi, Mapuia hian a sawi dik chiah alawm. Ka fate leh Partei humhim zo lo mipa ka ni a, ka ni reng bawk ang. Pu Mawi, i fapa te tan a i inpekna ah hian ka lawm lutuk. An pa diktak chu nang hi i ni e" Pu Zuala chuan ka pa tawnglai chu pawtchat in a ti ta dap dap mai le. Madinga leh ka pa chu an thaw hak a, Mapuia hi zawng, Madinga ang lo takin a luhlul ngung bik a ni.
.
" Kan phei phawt ange. Mapui, Mading, pa tha tak in nei a, thlahthlam miah suh ang che u aw... Keipawh ka rawn lang leh tawh ngai lovang. Mahse min mamawh emaw, min hmu duh anih erawh chuan engtiklaipawhin ka inchhung saw in tan a inpeih reng tih min hriatsak dawn nia. Larson, i haw ang hmiang" tih pah chuan Pu Zuala chu an tho a, Larson pawh chu a ding ve nghal a, tumah rengin sawi tur kan hre lo.
.
" Ngaihdam min dil dawn lo em ni? Ka pa" Pu Zuala ten kawngka lam an pan lai chu an ding chat a, phawk zet in Mapuia chu ka en a, Pu Zuala chu a en ngar a, a hmel ah chuan engmah chhiar thiam theih a ni lo.
.
" Ka fapa, ka tihpalh a ni e. Engkim ah khan ka tihpalh tak meuh meuh a ni e" Pu Zuala chuan tah aw deuh a a tih chuan Mapuia thu lai chu a tho a, apa chu pan in ava kuah chawt a, patling an tap ta. Mahse lawmna vang a ni.
.
Pa leh fapa te inkar pawh a tha ta. Pu Zuala pawh demna tur a awm lo. Nu Thangi alo rapthlak bawk em a ni. A chhan erawh puanzar atan a rapthlak mah mah deuh a, hei chu an chhungkua thuruk ah ngaiin sawi lang lo law law mai ang.
.
Mapuia te pafa za an inhmuh that atang thla 2 lai chu a liam ta. Kan in len pawh tawn a, Pu Zuala nupui, Pi Siamtei pawh nu fel tak a ni. A pasal harsatna a hrethiam in Mapuia te tan nu nih a tling em em a, Madinga ai mahin Mapuia nen an in ngaina ta zawk lehnghal. An unaunu thar te lah kan innel in Bawihtea an lawm em em a, Bawihtea lahin sual chhuah hauh lovin a pa farnu te chu a ngaina ve nghal mai bawk. Riahpui te pawh an riah pui hial a ni.
.
Ka pa mawlh mai hi a ni ka fak ni. Nu Thangi tan theihtawpin a tawngtai a, a thlahthlam ngai hauh lo. Inchhung ah erawh a chanchin a sawi tam duh lova, mahse chu chu kan nupa in kan hrethiam kar a, keimahni zawkin a inthlahrun loh nan an mamawh tur ni a kan rin te kan ngaihtuahsak a, engtikah emaw chuan Nu Thangi chu ala inhmuchhuak ngei ang tih ka ring tlat a ni.
.
Madinga pawh a dawr a lian tulh tulh a, a buai in alo lang khat em em bawk. Mahse chanchin erawh kan inhrilh tawn reng thung. A zin anih loh chuan a dawr ah a bur ngar ngar a ni ber mai. Bawihtea a fel tawh bawk a, keipawh ka awl thawng ta viau mai. Ka pa te in lam pawh kan leng zauh zauh a, mahse dawr lam ah ka kal tam mah zawk. Ka unaute nen a ti ti ho te hi nuam ka tia, bakah huan kal pah a dawr kawi hi a rem bawk nen, huan a theirah vel lak pah hian ka kawi fo ta a ni. Tunah chuan kan chhungkaw nun a nuam tawh a, ka chhungte in lam pawh ka tlawh zing ve ta zut e. Ka nu lahin min lo khak ve fo thung. Pasal neih hnu a mahni in lam kal sek a phal loh hi a sim lovang. A hnen atang hian thil tha tam tak ka zir chhuak reng a ni.
.
" Ka pa, ka kohkhawm chhan che u hi in thin a thawng viau mai thei a, mahse ka ngaihdan min zahsak hram ka beisei a ni" Madinga sitting room-ah chuan keini chhung leh Ka pa(Pu Zuala) te chhungkua chu kan thu thap a. Vawiin lam ah ka pa te ve ve bia in Madinga hian min ko khawm a ni.
.
" Ekhai, Bawiha, enge han sawi teh khai. Ka hriat chak ang tho in i nu leh pa te pawhin an hre chak tawh ngei ang" ka pa chuan alo ti vat a, ka pa (Pu Zuala) te nupa pawh chuan an lo tuihnih vat bawk.
.
" Englo, Ramtei'n ngaihdam min dil nasa a, ngaidam thei lo khawp a mi tha ka ni bik lova, insuihzawm leh zai rel ila ka ti a ni" Madinga'n a tih chuan ka lo lawm veng veng. Ni e, Ramtei kha hmeichhe sual tak a ni bik lo. A pasal in midang a hmangaih reng chung kha chuan an nupa kar ah khan rinna zawng zawng a tan nghah a harsa ve dawn tlat a ni.
.
" Ekhai! Thu lawmawm tak anih chu. Keichuan hnialna che ka nei lo ve" ka pa in a tih chuan midang pawh chuan tha kan tih thu kan sawi sap sap a, Mapuia pek chuan a U chu a fiam zuk zuk pek. Madinga chu a lai ve nasa mai.
.
Tunah chuan Ramtei leh keipawh nau kan pai ve ve a, kan neih hun tur a inrual teuh hle bawk. Nu Thangi pawh ka pa in a tlawh reng tho a, a inchhir thu la sawi lo mahse a nun erawh a danglam em em thung tih min hrilh ve a ni. Kan sumdawnna in hmalam a pan zel a, Madinga te sumdawnna phei chu Mizoram ah a ber an ni tawh hial a ni. An nupa an inlungrual em em a, Ramtei pawh a nun a hlim tih hriat takin rai kawh luah chung pawhin a sen suah mai. Kei erawh tun tum chu nau pai ka haw deuh a, ka chhuak vak peih meuh lo. Bawihtea erawh school te a kal ve tawh a, Manuni nen an la inchhawm tluang zel e.
.
" Min nei tur a thutlukna i siam ni khan i thutlukna i sut leh ang tih hlau khan ka tawngtai hnem teh asin" ka pasal in duat tak a khum a min kuah chung a a tih chuan ka nui sak a.
.
" Luhlul kha ilo chhuah lui tlat lovang tih ka hlau a ni"
.
" Khawvel a mipa vannei ber thlang dawn ila kei aia thlan tur chuang an awm bik in ka ring lo. Tlangval vannei an sawi ai pawhin ka vannei zawk"
.
" Ka hmangaih che"


A TAWP TA.