ECCITATO - 14

ECCITATO - 14


ELTY LUHLUL AUG HNAMTE


Pu Dinga te hnen atang thil tam tak ka hriat belh a, chumaibakah a fapa nupui ka nih ang in min duat thiam em em bawk. Ka nu khan engvang a nei lo nge anih ang tih ka ngaihtuah hial zawk. Pa tha tak anihzia lanna tam tak ka hmu a, pangai tak a ka hmuh vawikhatna ni mahse ka chhungrilah ka ngain nghal em em bawk. A nupui Pi Sawmi lah nu dam dap mai, rilru tha tih hriat zet mai ania. An sawidanin Pu Dinga nu hi vai a ni awm e. Apa in a neih duh loh avangin chhungte tuithlar tawkin a fapa hi a tulpui a, Mizoram a piang leh seilian, thlahtu atang Mizoram a awm an ni a, chuvangin Pu Dinga nu pawh hian Mizotawng engmah a pai lo a, Pu Dinga pawhin Mizotawng a hmang vek bawk. Pu Dinga a neih hnu ah central atang hna a hmu ve a, Kolkata ah hian a fapa chu a in benbel pui ta a ni. A thisen ah chuan Mizo diktak a ni tihna anihchu.


`Pa tha tak a ni` kan haw kawng ah chuan Micky nen chuan kan ngawidun reng a, ka tawngchhuak hmasa ta zawk.


`Pa khawngaihthlak tak a ni bawk`


`Tinge?` makti deuh chuan ka lo en haw a.


`Tuna a nupui hian nau a pai thei lo a, Noah hi a neihchhun ania, mahse anu in hnaih a phal si lo a, bakah i nu hi dan phal loh thil a khawih nasat avangin Pa Dinga hian Noah tan a tha lo ti in lak a tum viau a, mahse engvangnge ka hre bik lo, Pa Dinga hi a inhnukdawk leh ta a ni` ka nu hi eng ang chiah a nasa nge anih ang tih ka rin phak bak a ni.


`Mahse sawrkar ah hna lian tak a chelh bawk sia`


`Sum hian thil a ti thei em a ni. Ni lo se chuan inu hi hman ah a tang tawh ang. A chenpui a fapa ngei pawhin a manchhuak thei bik lo anih hi` kan chuanna motor a ding dat a, fare te kan pek zawh chuan Hotel lam ah kan lut dun zuinghal.


`Darkar 1 vel hahchawl ila, ipa kan va hmu dawn mi niang? Zan lam ah party na tur kan nei ania` ka room ka lut tur chu ka ding dat a, ka pa va hmuh chu ka chak khawp mai.


`Khawi lam ah?`


`Holiday Inn lam ah ah invitation kan hmu alawm. Kan sihal pitar-i pawh a pasal awmna lam a let ai helam a inpenparh ala chak ani mahna!` ka nui hawk. Kimkimi hi a ei lo tih chu kan in a chaw an lo ei khan ka hrethiam daih tawh.


`A lawmawm dawn chu. Kan haw hnai tawh si a, vawikhat dam ve man ah party te chu kan kal ve ang chu` ka tih chuan a nui vur vur a, room-ah ka luhsan zuinghal.


Micky nen ka pa kan va hmu a, a hmel a mawiin a lo harh that hmel tawh khawp mai. Ka pa hi dam tha se, zawhna tam tak zawh tur ka nei a ni. A chhanna hi a kawl teuhin ka ring bawk. Ka nu chu chhawk a duh leh duh loh ka zawt a, alo duh lo nasa mai. Diktak chuan ka kal ve hi ka tangkai ve na ber chu Doctor biak leh an ei leh in tur ngaihtuahsak a ni deuh ber. Cabin ah kan awm bawk nen, nupa inngai tih tak ah midang an mamawh lo phian. Ka pa lah a treatment lak a ngeih bawk nen, a changin an pahnihin Hospital area tho, pawn lam phul inphah duai ah te chuan an thuchhuak dun a, nuam an ti dun thei phian thung.


`I nalh kher mai` party tur a kan chhuak tur chu Micky chuan kawngka ah min lo nghak a, ka thawmhnaw chu zan in a tan bik a ka pa kan va tlawh zawh a ka lei haw a ni.


`Ka lawm e.` ka nui var var a, tunge fak lawm lo awm ang?


Party na hmun tur kan thlen chuan alo eng nalh chuaih chuaih khawp mai. Khualchhawntu in min lo ngaihven vat a, ka hriat ngai em em an awm lo. Kimkimi a rawn chhuah chuan min rawn pan ding chat a, a nalh lehpek tawh kher mai. Tin, a hmel a nung sar bawk a, a bulah hmanni a thingpui dawr a ka hmuh vaipa kha a awm bawk.  Micky chuan ka ban ah a rawn kai a, a kut lehlam chuan ka ban chu a rawn vuan nghal a, chu chu hahdam tur a signal min pekna a ni tih ka hrethiam. Ka insangmar teuh chu thawk ka la hak a.


`In lo kal thei chu ka va lawm ve. Lo kal ru, indawm ve duh ang chu ka ti ngawt a` a hmui sen ham chu mipa tam tak tan chuan tawrh a har ve khawp ang.


`Nangmeuhin i pasal thu hnial a party i buatsaih a sawm nih te chuan kal loh phal chi ani dawn ami?` Micky chuan alo ti ve vat a, mawng sawi naw in Kimkimi chu a inher a, zu awmna lam a pan a, Micky chuan min kai phei ve nghal. Nulat lai khan beer in ve fo mahila ka ko a tihtur a inchhawp hnu khan vawikhatmah ka in leh tawh lo thung.


Party boruak chu ka ning takzet tawh. Micky chuan zu a dawm ve a, mahse tih tham a in lem lo thung. Kimkimi chuan mi hrang hrang min inhmelhriattir a, tu te mah chu ka ngaina lo. An zavai mai chuan min en uluk em em vek maiin ka hre bawk.


`Ladies & gentleman, min lo hrethiam lawk ula, zanin a kan party chhan lam hawi ve zawk ila. Zanin hian mi pawimawh tak, he hotel a kalchhoh zel dan tur a a neitu nihna chelhtu thar, Mr.Noah Lalruatfela hi ka inhmelhriattir ang che u` ka thisen chu a khang vek ni maiin ka hria. Dawhsan lian vaklo a mipa rawn dingchhuak ka hmuh chuan ka vai ruai a ni ber mai.


`I tha em?` Micky chuan min rawn sawi a, khawvel pawnlam a ka chenna atang chuan khawvel ah ka let leh riai riai.


`Micky, amah kha` ka va hawi phei a, chiangzetin min lo en a, a mitmeng ah chuan engmah ka hmu thiam lo.


`Hello, Good evening. Zanin a helai a lo kalkhawm zawng zawng te, inzavai chung ah ka lawm e. Zanin party hi nuam tak a hmang turin duhsakna ka hlan che u. Naktuk a lo thleng tur tumahin kan hre lawk lo, chuvangin a hunlai hian nuam i tihdan ang ber khan i awm dawn nia` a aw-ri te, a engkim mai chu engmah ala danglam lo. A danglamna awmchhun chu a khabe hmul tlem alo to siar chu a ni. Tunhma kha chuan a inmet fai vang thin a, tunah erawh chuan a inzuah ve deuh a, mahse alang zahawm zual thung.


`Rs, i incontrol a ngai dawn ania, tu mit pawh i chung ah a fu thup a, heng ho hian tumlawk sa an nei a, pawl khat ami vek an ni, fimkhur ang che` Micky chuan ka beng bul ah a rawn ti sup a, diktak chuan au tuarh tuarh mai ka chak. Noah hmel ka hmuh chiah khan ka lo hmangaihzia ka inhriatchhuah belh bawk. Hlimtak a kan awmdun lai kha ka mitthla ah a rawn lang zut zut mai.


`Micky, Rs, kan Hotel neitu thar chu han chibai ve ula` hnunglam chu kan hawi nghal a, ka hma ah ngei chuan Noah chu a ding a, a vun alo thim ve deuh tih pawh ka hmu nghal. A suit hak chuan a tilang zahawm hle bawk.


`Ka lawmpui a che` Micky chu a tawngchhuak hmasa ah a tang hlauh.


`Ka lawm e` a ner nawk a, Micky kut phar chhuah chu a hmu lo der hmak thung. Keierawh tawng nachang reng reng ka hre lo.


`Dear, anni pahnih pawh hi inneih an tum hla hauh lovang tiraw?` Kimkimi`n Noah ban ah a vuan a, Micky erawh a nui hak thung.


`Min hrethiam ula, tihtur kan la nei a, tunah chuan kan party chhan a zo ta bawk a, kan kalsan phawt mai ang che u` Micky chuan min rawn en a, a nuisak bawk. Keierawh ka kawchhung a so balh balh thung.


`Ngawiru, kan la zo hleinem. Reilote min lo nghak ula, kan Hotel neitu thar nupui tur pawh inhmu ve ang che` engkim mai chu a mak vel vek.


`Kim, a tawk` Noah chuan alo ti hmuk a, Kimkimi erawh chuan a ngaipawimawh lem lo.


`Raj, Sora kha lo hruai rawh` kan piah a vaipa chu a au a, chu hming chu ka hriat hnu ni in ka hria.


`Lo kal rawh Sora, kan mikhual te hi lo welcome ve la` Kimkimi hawina lam ka hawi chiah chu ka khawng awt thei. Kan hma a hmeichhe ding nen chuan kan in ang lutuk. Make-up a hmang nasa tih a ni mai. Chuan kei ang lo takin a sam a kir thung.


`I che chak char char char hle mai. Sora, ani hi i unaunu Ruatsangi anih hi` Micky a tawngchhuak ve thung. Sora an tih chu ruih nei hmel a pu a, a meng chiai lehnghal.


`Ka hria. Min duh lo a ani chauh an lo thlan chhan chu a hriat theih mai alawm` Sora chu a nui hak a, Noah ban ah ava vuan a, ka luak lo chauh. Noah erawh a mit chu ka lak atang a kalsawn miah lo, a hmel erawh saruh ai pawhin a ruh ang tih tur a ni thung.


`Maw?` ka aw chu a ri chhuak chang chang a ni ber mai. A thusawi duhdan chu ka hrethiam lo takzet.


`Ka nu leh pa... ohhh, i nu leh pa ten an hrilh ve na che nge? Aaaaa, a awm tho e, unaunu, ka lawmpui a che` a ban a phar hliai a, a nui nangin a mitmeng a na tak tuar anihna chu a hmuh hmaih theih chuang loh.


`Sorabawihi, i unaunu hian engkim a hre vek tawh a, nang rawn zawn chhuah che a tum chuang hlei lo a. Mahse kan bulah i hlim a, i him tho a, ani lo mi?` Kimkimi chu pawhsawm vek ka chak kher mai. Ka nu leh pa ten an duh lo ni lovin Spi nu in a thleng ru zawk ani reng sia.


`Ni lo, i pian hlimin min chhartu in nang leh naute thi a thleng ru zawk a ni`


`Hahaha.... Ka awih i ring em? Min chhartu chu ka hrechiang e. Amah ngeiin ka nu leh pa in min duh loh avang a hetiang a fahrah chho hi ka nih thu a sawi chiang khawp e. Nangni Serafim ho hian dawt hmang a ka rilru hneh rawn tum lo ula ni mai. Tak a, i pasal hlui hi ka pasal ni mai tur ani sia, buaina a awm lo tur ah ka ngai` Noah ka va en a, mahse min lo en duh hauh lo thung.


`Ka pasal hlui ni lovin ka pasal ni lai mek zawk a ni` ka aw chu a nghet charh a, heng ho game play ah hian talbuai tur ka ni bik lo. Tin, ka thusawi chu dawt a ni hek lo.


`Wow! Chu, pasal pawmlai nei chungin mipa dang nen hotel ah in thleng dun vel tihna ami?` Kimkimi chuan a kut alo beng vel a, ka va han ten tak em!


`Hotel ah hian room tam tak an siam chhan hre tur khawp chu i ni in ka hria` ka kut ka kuangkuah a, Micky alo nui hak bawk.


`I pasal in a tlanbosan hma che pawhin ani nen hian in inkawp tawh ni in ka lo hria a. In in a chaw kan eikhawm zan a ka thil hmuh te kha...`


`A tawk. Dawt hmang ringawt a nun hi sim teh` a tawng laklawh lai chuan Micky alo inrawlh ve thung. Kan boruak chu tang tha at at tak a ni.


`Mike, kal ang. Heng ho bulah hian kan hun hlu tak i khawhral lo teh ang. Noah, nangpawh, dan ang a kan inthenna tur tifel turin i hun ilo seng ve dawn nia` Micky kut ah ka kai a, party hall zu rim nam hum hum kalsan turin kawngka lam kan pen zui nghal.


`Engtinnge khang zawng zawng kha ngawireng a a thlir theih?` car ah chuan ka thu lut hnak a. Zanin hian Micky hian Hotel car a hire a, amahin a khalh bawk a ni.


`A mitmeng kha ilo hmu em? Phuba lak chakna hlir a khat` Micky chuan car steering chu a chum nghat a, thaw a pik a ni e. Hun rei tak kan lo zawn tawh chu kan hmu ta cheng a, mahse hmuh kan tum ang a ni ta si lo.


`Enge kan tih leh hmasa ber tur ni ta ang?` ka beidawng takzet. Kan duh kan hmu a, mahse kan beisei ang engmah a thleng si lo.


`Engmah. Ti kha chuan anmahni zawkin min rawn pan a ngai tawh ang. Ngaithla rawh, i pasal hi Dan lam a mi thiam tawp a ni. Inthenna engmah in la nei lo a, chuvangin thubuai sang tak a awrh thei a, inthenna tifel tur a alo pan ngei che a ngai dawn tho tho a ni`


Inthen chu ka duh chiah em ka hre lo. Mahse ka sawichhuak hmasa tawh a, a rawn kal a inthen a duh anihphawt chuan ka hnial theih a ni lo tih erawh ka chiang. Engkim hi a buai nuaih a, ka nu leh pa sawipui duh viau mahila ka pa dinhmun atang ka harsatna te chu sawi chi a ni rih lo tih hrethiam rual ka ni ve tawh. Ka pa hospital atang kan la chhuak a, naktuk ah haw nghal kan tum bawk. Ka nu leh pa hmuh ah nui mahila ka chhungril erawh a hul phak thung. Engmah ka phur lova, Micky pawhin min tihhlim a tum viau nangin ka nui hleithei lo chu a ni ber e.


`Lalruatsang` airport lian tak, thawm bengchheng nuaih nuaih kar a ka hmingpum a min ko tu aw chu ka hai thlawt lo. Hnunglam ka hawi vat a, kan hnung lawk a Noah lo ding ka hmuh chuan ka thaw hak a, ka beisei aiin min rawn um rang.


`Enteh, i duh ang chuan inthenna lehkha chu ka sign ang. Mahse ka nu leh pa ka hrilhfiah zawh min nghak thei lo ami?` ka bul a rawn thlen chuan ka lo ti vat a, a huhang vang nge ka hre lo, ka tiril a khur nasa em em bawk.


`Mimawlnu, engvanginnge ka then ngawt ang che. Ka hrilhfiah hman tawh lo che. Haw chho la, i hna i bansan tawh tho a, Micky nen karhnih hnu ah rawn let leh ang che u. Chumi hma chu ka chungchang hi ka nu in rawn sawipui che a tum anihpawhin i ka lo chip ang che. Kal rawh, ipa chu dam vat turin duhsakna ka hlan e. Micky chu phone in ka rawn hrilhfiah dawn nia` ka mumang em ni? Ni lo, enge thleng hi? Kolkata ah kan let leh dawn maw?


`Noah...`


`Aw, keimah. Kal rawh, inthlawhna i nang hman lovang. I tan ka la awm reng, in enkawl tha ang che` ka chal ah a rawn fawp zauh a, a inher a, mipui kar ah a bo zui nghal.