SEE YOU IN HEAVEN - 1

SEE YOU IN HEAVEN - 1


.


ELTY LUHLUL AUG HNAMTE


.


Ka hma a nunna nei tawh hauh lo a mu ka nu chu ka en tlawk tlawk a, a fair lo. Ka neihchhun asin. Kha natna tihbaiawm tak, cancer-in a luhchilh hma kha chuan khavel ah hian engdangmah kan ngai bik lo. Pathian zar ah sawrkar han sang vak lo a thawk a, kan nufa ei khawp chu a thawkchhuak ve. Keiin ka zirlai ah ka insawrbing bawk a, Doctor ka la ni ngei ang. Ka nu duh ber hna a ni miau a.


.


" Nula, khawngaihin min lo zui lawk thei angem?" ti tu Doctor chu ka en hu a, ka mawl vek ti ila a dik ber ang. Mahse ka harhfim kur tho bawk si.


.


" Thiannu, va kal lawk la" ka thiannu, ka thian neihchhun tak meuh meuh, Rampuii chuan ka dar ah a rawn vuan a, naupang thuawih thei ang maiin ka tho nulh a, chu Doctor, ka nu huntawp thleng a dawmhlumtu awmchhun chu ka zui mawl tawp a, a room chhung ah chuan lehkha pawimawh ni awm tak chu min sign tir a, a sawi ang ang chuan ka sign mawl tawp tawp a ni ber mai.


.


AFTER 3 MONTHS


.


" Thiani, ilo in enkawl uluk lovang tih ka hlau emai. Ka zuk tifel anga, ka rawn let lehnghal ang" ka thiannu, Rampuii chuan min ngaihtuah takzet tih ka hria. Ni e, ka nu boral hnu ah class ka kal chhunzawm peih lo ani ber mai. ka nu boral khan ka nu unaupa neihchhun ka Putea chiah hi kan chhungte ah hmuh ka nei. Ni e, ka nu hi hmeichhe luhlul tak a ni. Ka pa ka hre lo. A chhan chu ka pa hian min duh lo a ni awm e, Ka nu hian kum 18 ka tlin ni in min hrilh a, keipawhin ka nu mitmeng ka en khan tunge ka pa tih hi hriat ka duh ngai lo. Kei min pai avang a ka nu kha tuithlar a ni. Kohhran Upa tunu ka ni tih hi in awih kher lo mai thei. Mahse ka ni miau si a ni.


.


' Min ngaihtuah suh" tih pah chuan ka nui sak a, mahse ka ngaihtuahawm zia chu keimah pawhin ka hai lo. Ka nu a chauh zual hma deuh khan doctor zir tur in ka tling tih kan hria a, mahse ka nu boruak khati kha anih avangin Doctor zir lam dahtha in Hotel management lam ka zir ta kha ania, mahse rei erawh ka kal hman ta lo.


.


" Class kal chhunzawm la ka duh. Anih loh chuan ila tlai chuang lova, doctor zir tur chuan kal leh mai la ka ti" ka thiannu hian min ngaihtuah tih ka hria. Mahse doctor zir chu ka duh tawh lo bur. ka zirchhan ber tur min laksaktu hi ka dem bawk. Pathian hi ka hua a ni. Ni e, ka neihchhun, ka engkim ka NU in laksak miau alawm. Ka mamawhna san zia a hria, engvang a min laksak nge anih? Ka nu thih hnu hian vawikhatmah ka tawngtai leh ta lo.


.


Ka insiam a, hna ka neih a ngai tih ka hria. Ka nu min hnutchhiah hian rei ka daih hauh lovang. Tumah kan chhungte ti a pan ngam ka nei hek lo. Ka putea ve lah khan ka nu pension chan tum in hma ala a, a hlawhchham a, a bak chu ka hmuh ah a rawn lang leh ta lo. Darthlalang ah ka in en a, ka hmel dawldang lutuk chu thup bo nan ka hmai chu ka hnawih tai a, ka hmui pawh pan te in ka hnawih ve ngei e. Ka nu damlai a ka hmel tai tak thin kha hmuh tur keimah ah a awm lo tih chu tu sawi mah ngai lovin ka hmu chiang ve ta e.


.


" Laltlanmawii, i lut thei e" ka hma dawhkan a hmeichhe hmel fel vang thu chuan min rawn ko a, ka zam em ka hre lo. Ni lo, zamna ka nei hran lo. Keimah hrim hrim hi ka chawmawlh vek tawh a ni. Tawngtai ka rilru ah a rawn awm zawk a, mahse ka nu ka mitthla ah a rawn lang zawk a, ka lu ka thing a, inringtawk zet chuan kawngka ah chuan ka lut zui nghal. Mahse ka hma a Putar lo thu ka hmuh chuan ka phu zawk thei. Ka nu pa, ka pu ngei mai chu alo thu a, ka nu nen an in ang kher mai. Min hriat ka ring lo. A chhan chu vawikhat pawh an tunu hmu tur hian ka nu chhungte kha an rawn kal miau lo a ni.


.


" Nula, lo thu rawh. Laltlanmawii maw inih kha?" dam dup a a tih chuan ka pum chu a so bulh thei. Ka nu khan alo chhun hle a ni. Engtinnge ka pu a ni tih ka hriat in ti em? Keichuan min duh lo mahse ka nu chhungte hi ka hre vek. An in ah ngei pawh ka va kal tawh miau a ni.Mahse an tu nu ang ni lovin, an tu nu Lalbuatsaihi thian, school kalpui ang zawk in. Ka Putea erawh in hrang chang anih tawh bakah a nupui vangin inpui an kalngai vak lo tih ka hrechiang em em bawk.


.


" Aw, ni e" nuisang a tih pah chuan ka pu hma a thuthleng ah chuan ka thu a, a hnar a tuai zauh a,ka nu tihdan thin tho. Ka luak a chhuak up up thei.


.


" Le, khawi veng ah nge in awm ve le?"


.


" Bungkawn veng ah"


.


" Engvang a he hna hi rawn dil nge i nih le?"


.


" Ka mamawhna vangin"


.


" I tui zawng a ni hrim hrim em?"


.


" Ka hre lo. Mahse ka mamawh anih chuan tuiloh chhan tur a awm ka ring lo" dawtsawi ka duh loh bakah tlin ka duh lo.


.


" Chhungkua in em ni in awm?"


.


" Ni lo e. Ka nu in min boralsan tawh a, keimahin ka awm" ka sawi zawng a ka thin tawt up up chu ka thaw chhuak ham ham a, ka kut ka hum ruh hle bawk.


.


" Ka tawrhpui hle mai che. I kal thei tawh e. I tlin leh tlin loh chu i contact dah ah hian kan rawn hrilh leh mai dawn che nia" a hmel ah chuan min tawrhpui hmel tak tak a ni. A fanu chungchang kan sawi tih a hria angem ka hre lo. Mahse Kohhran Upa ve meuh mahni fanu tuithlar thei anih avangin a fanu chungchang kan sawi tih pawh a hre nek lovang.


.


In ka thlen chuan Rampuii nen kan inbia a, lo let a tum hun a pel tawh. Mahse a zirna tur ah pawimawh a tam avangin a tum ang in a awm thei lo a, ka hrethiam lutuk. Nitin kan inbia a, amah chiah hi khawvel ah ka awm ve tih hre tu awmchhun a ni ngei ang. Ka inluahna te erawh an fel khawp mai. Rampuii nen kan inbiak zawh chuan mutthilh zawk ka tum a, ka mit ka chhing chiah chu ka pu hmel kha ka mitthla ah a rawn lang uarh uarh thei. Tunah chuan sumdawnna lian tak an nei tawh a, ka nu U mipa in bul a tan a ni. Police officer a ni. Ka nu hnawtchhuak tur a phusa ber pawh a ni. A nupui, MLA thin fanu nasa zetin ka nu a huat em avangin a nupui duhdan in ka nu kha thehchhuak an ni tih pawh ka hria. An fanu neihchhun pawh tuithlar duhkhawp a nu leh pa tenawm neitu ka nu ka lainatna hi a nasa tulh tulh a ni ber mai.


.


Zing chaw ka ei ngai lo. Thingpui ka in a, ka hna interview tumna pakhat chu call ka tum a, mahse an pick up theih loh avangin phone lawk lo a kal mai chu ka rilruk. Ka pu te hnen aiin hlawh chhe zawk mahse ka tlin hlauh chuan thawh ka thlang zawk. Nitin mai a ka nu thisen zawm te hmuh chu ka zuam chiah lo a ni.


.


" hello" ka phone ri ka pick up rual chuan ka ti nghal a, nichin a ka call tum te kha an nih ka ring ngawt.


.


" Laltlanmawii i ni em aw?" ka pu aw ngei chuan a rawn ti. Ka phu nasa kher mai.


.


" Aw ni e. Khawi atang nge le?" ka pu aw chu ka hai miah lo. A chhan chu ka nu nen an thluk dan zawng zawng nen a in ang vek tlat a ni.


.


" Nimin lam a i rawn interview-na, JK Industries atang khan ania. I hna dil ah i tlin thu rawn hrilh che ka tum a. I hman chuan vawiin chawhnu dar 1-ah ka office lam ah min rawn hmu dawn em ni niang?" ka beisei mawlh lo. Nimin khan hna chungchang kan sawi hauh lo. Ka mimal nun bak min zawt hman meuh lo kha ania.


.


' Aaaa, nia... aw.... nia, ka lo kal dawn nia" ka thusawi chu hriat pawh ka hrechiang lo a ni ber mai. Ka kal tur thu ka sawi hnu chuan lawmthu a sawi a, phone a dah zui nghal.


.


Ka helhhawlh nge ka hre lo, ka insiam hleithei lo. Hna ka hmuh vang a phili ka ni lo tih ka chiang. Dar 12 a rik chuan ka insiam zo a, ka hna hmuh tharna hmun lam pan chuan ka kal a, ka thlen chuan dar 1 a ri deuh der mai. Hun tiam vawn dik ka duh vang a kal hma ka ni. A vawikhatna atang a ka tlai chuan thil tha ber ni in ka hre lo.


.


" May i come in sir?" ka pu room kawngka kik pah chuan ka ti zui nghal a, ka tha a khur lek lek mai. Ka interview dawn a ka inrintawkna kha ka nei leh ta hauh lo mai.


.


" Lo lut rawh. Hun i vawng dik hle mai. Ka duhzawng tak i ni" ka pu chuan nui sang a alo tih chuan ka khur pawh chu a ziaawm veleh ta deuh.


.


" Ka lawm e"


.


" Counter-a thu tur chuan ka duh viau nang che in ka P.A tur hi ka mamawh dawn tho a, i awm zawk hreh em?" a tih chuan ka phu nasa kher mai.


.


" Ka lo ngaihtuah ngai miah lo a" thudik tak a ni ka sawi ni.


.


" Lo inngaihtuah ta che aw.... I duh loh pawhin ka hnial lo che. I duhthlanna a ni e. Hlawh erawh a in ang lovang" a tih chuan ka nui sak a, ka mamawh chu a hre kher mai.


.


" Ka lo inngaihtuah ange"


.


" Appointment letter chu hei hi ania, naktuk atang hna ilo zawm thei anga, naktuk i rawn kal hun ah i thutlukna hriat ka lo beisei ang. Kan company rules chu lehkha ah khan a awm a, ilo en mai dawn nia. Vawiin atan chuan lo va inbuatsaih la, naktuk ah kan inhmu leh dawn nia" a tih chuan ka lu ka bu nghauh a, lawmthu ka sawi zawh chuan ka chhuahsan zui nghal.


.


Ka dar a min rawn su pawp tu ka en chiah chu ka taksa a sa pup thei.