SEE YOU IN HEAVEN - 2

SEE YOU IN HEAVEN - 2


.


ELTY LUHLUL AUG HNAMTE


.


A kut min rawn pe tu mipa chu khawvel mipa piang tawh zing a ka hmeichhe nihna tichhuak thei awmchhun ala ni ang. Ni e, ani hi mi hausa a ni. A hausak leh hmelthat vang a mi hriat hlawh a ni. Jonah Ramropuia a ni. Apu sumdawnna a rochun vang a hausa ringawt a ni lo. Ama thiamna vang a Hospital lian tawk tak nei a ni. Doctor a ni bawk. Tin, nupui hmeltha zet a nei bawk.


.


" I na em?" a aw chu a mawi kher mai.


.


" Ihhh... Awww... Aih, englo, ka tha" ka ti bah nawk nawk a, ka thlan bawrh bawrh thei hial a ni.


.


" A that chu. Nidang ah chuan i kalna i en uluk tawh dawn nia" tih pah chuan ka mit ah tak a en a, a inher a, a kalsawn nghal hmak bawk. Polite tehchiam lo hle mai.


.


Ka hna pawh ka tan tawh. Ka pu chu ka rinai daihin hrawn a nuam. A P.A nih chu a hrehawm hran loh. Bakah midang tumah an rawn lang ngai vak lo. Ka nu U mipa erawh alo lang veleh zauh thin. Karhnih ka awm ve ta a, thawhpuite an fel a, bakah lehkhathiam rual kar a han awm chu a nuam phian mai.


.


" Lt, vawiin ah ka doctor alo kal dawn a, mahse alo kal hun tur a kan tih kha meeting pawimawh a awm dawn avangin min lo nghah a ngai dawn a, ka be tlang thei lo a, ilo buaipui mai dawn nia. A tul leh eitur te ilo lamsak anga, i kut ah ka dah mai e" ka pu in a tih chuan ka lo buaipui tur thu ka hrilh vat a, meeting na ah puih a ngaih loh tur thu a sawi leh hnu chuan meeting room lam ah a lut zui nghal. Ka pu hi ka pu diktak ni lo se chuan ka ngaina viau in ka ring. Amah ngawr ngawr hi chu a tha lo a ni lo. engvang a ka nu kha tuithlar tawp thei nge anih ka hrethiam lo.


.


" Pu Nghakliana doctor ka nia" ti tu lam chu ka hawi a, ka phu lehpek. Jonah bawk kha maw?


.


" Aaa... nang.... Eng lo, ka pu chu emergency meeting a nei a, lo nghak tur che in a duh a" min hria ang a a awm loh avang chuan hmanni a thil thleng kha a hre zui lo tih ka chiang.


.


" Anih chu. Helai ah hian lo thu ila a pawi em lovang chu maw..." tih pah chuan sofa chu a kawk a, a lu a thle buk bawk. A luhlul ngawt in ka ring.


.


" Pawi lo e. Coffee i in duh angem?"


.


" A theih chuan thingpui hang ka lo duh zawk ang"


.


" A sen nge a paw?"


.


" A sen hang" van tih chi tak. A sen hang te chu ka dawhkan ah ka lum thei hlauh.


.


" I thawhna ala rei vaklo em ni?" thingpui ka pek rual chuan min zawt a, hmanni a a mizia ni awm a ka rinai chuan a tawngduh ve deuh. A khabe ruh kual chu mawi ka ti tak zet.


.


" Thla 1 ala tling lo deuh"


.


" Anih ka ring. Ka thingpui duhzawng ila hre tlat lo a ni" a nui hak a, a duhtu tan chuan a duhawm in a pa hluah hluah ang. Mahse keichu min sut hnu atang khan keimah a a thawh ang kha a bo nghal vek thei.


.


" Next atang chuan tihsual a awm tawh lovang" ka nuisang a, ka induhtawk hmel viau bawk in ka ring.


.


" I lawmawm reuh riau. Ka hming chu Jacob ania, engtinnge ka koh ang che" makti zetin ka en a, ani kha chu Jonah a ni sia.


.


" Maw?" mawl hmel zet a ka tih chuan a nui hawk a.


.


" Ka phirpui zawk i hria anih hmel. Jonah kha ka U zawk ania, keihi a ruk a doctor ka ni ve mai. Just only for ur boss"


.


" ooohhh... Anih chu. Lti ti in min ko thin" tiang em em a in ang hi ka la hmu ngai lo. Phir pawh ni se phir dang te chu an hmel hmai ah danglamna tlem tal a awm thin. Anni erawh an hmel atang ringawt chuan danglamna pakhatmah a awm lo.


.


" In lo inkawm thei em?" ka pu a rawn lang ve ta hlawl a, a hnung ah chuan patling pakhat a ding ve bawk.


.


" I P.A thar chu kawm a nuam khawp mai" Jacob chuan alo ti vat a, a ding zui nghal bawk.


.


" Keihi chuan mi tha apiang ka nei thin alawm" nui hak hak a a tih chuan ka lo ner sawk. Khawvel a mihring tha ber ka nu, ama fanu ngei kha a hnawl anih kha.


.


Ka pu te luh hnu chuan ka pu hnung a ding pa chu sofa-ah chuan a thu a, a hmel chu a nelawm loh hran loh. Mahse min en duh dan atang chuan ka ngaina hran lo.


.


" Nula, eng veng ah nge i awm?"


.


" Dinthar ah"


.


" Anih chu. Helai a thawh chu a nuam awm em?" min biak tlangnel a tum viau nangin ka ngainat chi a ni mawlh lo.


.


" Nuam khawp mai"


.


" I pu hi mi tha tak ania, i vannei khawp mai" a nui sang a, pa hmelchhe tak a ni lo. Mahse hlauhna riau ka nei tlat pek.


.


" Nia. Ka vannei khawp mai" ka nui ve tho nangin a zat miau loh a nuih chu harsa ru ve viau.


.


Ka pu leh jacob an lo chhuah chuan engmah a sawi zui lem tawh lo. Ka pu leh Jacob chu an rawn nui chhuak hawk hawk a, thian inkawmngeih tak an ang zawk.


.


" Lt, hei, kan doctor hian zanriah kilpui che min dil a, rem i ti em han hrilh teh" ka pu in nuisang a a tih chuan ka thin a ur ru teuh. Tu mipa mah ka la chhuahpui ngai lo.


.


" Aaaa.... Thil tih tur ka lo nei tawh sia, remchang dang ah ni mai se" dawt sawi hi ka thiam loh lam ni mahse a hun ah chuan ka sawi ve thei tlat.


.


" Chu, Pu Nghak, min hnawl tihna ani ngei ang" Jacob chuan mit min siai zauh chung chuan nui var var in a ti a, nuam lo ka ti ru angreng khawp mai.


.


" Remchang dang ala tiam che chu. I nupui tur buai in kan buai mai si a, nanglah i he ti roh a, nula mi hek lo che" ka pu in nui hawk hawk a a tih chuan ka lo nui ve nasa mai.


.


Ka phone ri rang rang chu ka en vat a, ka number hriat ngai loh a ni. Rampuii bak biak ka nei ngai lova, tumahin min be ngai hek lo.


.


" Hello"


.


" Tunge inih ka hria. I hnathawhna hmun hi chhuahsan in Mizoram hi chhuahsan ang che" mipa aw in a rawn tih chuan ka phu nasa kher mai.


.


" Tunge i nih?"


.


" I hriat a ngai lo. Ka thusawi hi uluk tak in ngaithla rawh. Nang hian i nu phuba lak nan a i hna hi thawk i ni tih ka hria, i chung ah thil thalo a thlen hma ngeiin inthiarfihlim ang che" a sawi zawh chuan phone chu a off zui nghal hmak. Call back ka tum a, a in switch off zui nghal. Ka hlau em ka hre lo. Mahse ka rilru hre thei ang mai a a rawn tawng chu mak ka ti. Rampuii takngial pawh ka hrilh lo ania, engtinnge kha mihring khan a hriat theih? Tunge anih ang?