SOLO TU

SOLO TU
.
ELTY LUHLUL AUG HNAMTE
.
Ka hma a mipa ding chu ka en ngawt ngawt a, ka na a ni. Ni e, ka na ngawih ngawih. Kum 3 zet kan inzui hnu ah ka rinloh lutuk in inhauhna awm hauh lovin min then tawp anih kha! Kum 3 zet ilo zui tawh khan inhauhna awm hauh lovin then ve che se na i ti ve tho in ka ring.?
.
" Rin, he thil hi i ti thei lovang, innei mai tur kan ni tawh sia" beiseina tlem ka la nei. A mitmeng a onthiam lohna ka hmuh chu a ni.
.
" A pawi ka ti. Mahse kan inthen a ngai miau a ni" tah vak ka chak a, mahse ka mittui erawh a hul hiau thung.
.
" Inngaihtuah tha leh rawh"
.
" Tete, karhnih chhung ka ngaihtuah hnu a ka thutlukna a ni. Ka tina che tih ka hria, mahse ka kal a ngai a ni" a tukhum ah a kut a suih a, van lam a en a, ka awih phal lo.
.
" Enge ka tih dik loh? Insiamthatna..."
.
" Diklo chu keimah ka ni e. Nupui ka neih a ngai" makti etin ka en a, a nupui ni tur hian vawi tam tak min nawr tawh a, keipawhin neih mai ka hnial tawh hauh lo.
.
" Anih chuan tinge palai..."
.
" A theih loh a ni. Rinsangi a rai" chu thu zet chuan min ti na kher mai. Rinsangi chu Rintea nen kan nih tirh atang a ngaizawng char char tu a ni. Kan inngaizawng tih hrereng chung a ngaihzawng dang neih tum miah lo a ni.
.
" Chuan?" ka en haw a, thudik sawi se ka tih rualin ka ngaithla ngam miah lo tih ka pha lo mai ange.
.
" Ka mawhphurhna ka hlen a ngai a ni" a sawi zawng pawh chuan harsa a tih hmel kher mai. Ka hmai ka hup a, ka luak a chhuak nghal up up bawk. Ka dar ah a rawn vuan a.
.
" Min khawih hauh suh" ka tawng ring hran lo, mahse hnial chi anih loh zia hre turin he mihring hian min hrechiang lutuk tlat.
.
" Ngaihdam ka dil ngam lo che. Mahse...."
.
" Mahse tih a awm lo tur ah ka ngai. Ka lawm e" tih pahin ka tho a, min au zui bik lo. Keipawh ngawirengin ka kal zui nal nal/.
.
Rintea leh rsi inneihna chuan min ti tlawm a, khawlai ka chhuak ngam lova, ka inkhawm ngai hek lo. Ka chhungten min hrethiam a, min dawm hneh em em thung. Rintea nu mawlh mai hmuh hrehawm ka ti. Alo leng a, a tap hial a ni! Ni lo, kan tap dun a ni ber mai. Anu nen chauh a khawsa an ni a, anu nen kan inkawmngeih em em bawk. Mahse a tu lo piang tur chu a hmangaih ve lo thei lo. Bakah a fapa in neih a tum miau a, a dan theih a ni lo bawk. Thutlukna dik tak an siam tih ka pawm thlap.
.
" Mami, i Pu Mama te an damtha lo a, awmpui an ngai dawn a, i tan pawh veng dang a awm chu a nuam rih zawkin ka ring a, i U in vawiin lam ah ava dah phei dawn che mi niang?" ka nu in zing chaw ei lai a a tih chuan ka hnial lem lo. Ni e, boruak thar dawn ka mamawh miau a ni.
.
Pu Mama te in ka thlen chuan Pitei alo lawm khawp mai. Anni nupa hi fa nei lo in kum 14 lai an innei tawh a, an nupa nun hi a awhawm ka ti fo thin. An inhmangaihna hi a ropui ka ti em em bawk. Ka awm phei zing bawk a, room hran ka nei thlap bawk. Pitei zawk a nuam lo a, ani hi a hrisel vak lo a, Rintea nen khan damdawiin a kan kalpui hi a tam angreng viau. Pu Mama hi police a ni a, in a awm tam lo bawk nen, Rintea nen khan Pitei hi chuan min thlamuanpui der ve viau thin a ni.
.
" Mambawih, I Pu Mama a night dawn sia, zan in chu kan room ah ilo mu daih mai dawn em ni?" Pitei'n a tih chuan pawi ka ti lem lo. Ka room a fal deuh avangin engemaw thleng thut se ka hriat loh palh ka hlau ve tho a ni.
.
Pu Mama pawh ni 3 an in a ka awm phei hnu ah hna pawimawh avangin a zin a ngai a, Pitei nen chauh a kan awm tur chu a ngaihngam chiah loh avangin Pitei unaunu fapa, Rina ve tho, Rinliana chu riak tur in a sawm a, ani hi a hming chiah ka la hria a, a hmel ka la hmu lem lo. Phai ah Doctor zirin a awm reng a, a thawk tawh hial zawk. A chawlh hmang lo haw lai a ni awm e. Mipa awmpui ka chak viau lo nangin hnial thei erawh ka ni lo tih ka hria.
.
Kawngka kik ri ah chuan ka va hawng vat a, amah a ni ngei ang. Mipa lian tha tak, fresh vang mai, mitmeng zim lampang, mahse meng fiah kak si a ni.
.
" Tetei i ni ang chu maw?" a ding nuih zawng a a ha to thuah lo lang chu a mawi kher mai.
.
" Ummm..... Rinliana ami?" ka ti ve vat a, a thle bak a, Rintea ka hrechhuak zawk.
.
A room tur ka kawhhmuh a, ka room bul chiah, mikhual room ah a ni. Pitei a mutthilh avangin ka kaitho duh hran lo.
.
" Thingpui i in duh em?" sitting room ah lehkhabu alo chhiar a, a bawp se thlerh thlawrh chuan Maengi Ralte Story ziah zing a a changtupa pakhat, Jordan min hriatchhuah tir zawk mai.
.
" Ka lo pui ang che. Nutei chu ala muhil em ni?" tih pah chuan a rawn tho a, a lakah chuan ka te chem chem a ni ber mai.
.
" Aaaa.... Aw, nachhawkna a ei a, a khawsik a reh a, a muhil tui ve rih aniang. Rawng i bawl thiam em?" ka zawhna chu a ho angreng viau nangin behlawi buhbai ka thiam lutuk loh avangin lo thiam hlauh se ka ti. A chhan chu Pitei'n a ei chak tih a sawi tlat a ni.
.
" Mai thei. Thingpui chu in phawt ila" tih pah chuan kitchen lam a pan vut a, a hnung ah dar san ak in ka zui ve ta ngawt.
.
Pu Mama zin ala rawn haw mai thei lo, Ni 4 zet an cham tawh. Pitei erawh Rinliana'n a enkawl bawk a. a tha tawh khawp mai. Mahse a taksa ala chak lo viau thung. Rinliana nen pawh a hma ai ngawt chuan kan innel ve ta deuh. Mahse kan awmdun hian ka zam tlat zel thung. A tawng tam lo a, mahse Pitei nen erawh an awmdun chuan sawitur an ngah viau thung. An nui dun leh hawk hawk thin.
.
Pu Mama a rawn haw dawn a, Pitei pawh a dam tha ta viau. Rinliana nen bazar turin kan chhuak dun a, ka chhungten chaw rawn ei an tum bawk. Chawhmeh kan lei zawh chuan MC lam ah a thil pawimawh lam a ngaih avangin motor-ah kan bazar kan dah a, kan chho dun a, dawr pakhat ah a thil lam tur a lam zo kan chhuak chiah chu Rintea kan tawk hlawl mai. Ka ding dat a, Rinliana chu a rawn hawilet vut a, Rintea a ding bawk.
.
" I dam maw?" Rintea chu a rawn tawngchhuak hmasa zawk a, Rinliana chuan maktih hmel zet in min en bawk.
.
" Dam e" tih pah chuan kal pel mai ka tum a, mahse Rintea chu ka kalna dalin a rawn ding thung.
.
" Kan in be lawk thei angem?" a hmel ah chuan ka hnial loh a beisei tih ka hria.
.
" Sorry. Hun ka nei rih lo tlat" ka ti nghat a, kan inbiakna chhan tur ka hre tlat lo a ni.
.
" Tete..." ka ban ah a rawn vuan a.
.
" Hun a neih loh thu a hrilh che in ka hria" Rinliana chu ka sir ah a rawn ding a, Rintea chu Rinliana lak ah chuan te tak a ni.
.
" Tunge i nih ka va...."
.
" Tetei vengtu ka ni e. Hmeichhe dang lak a fa neihsan ve ngailo tu tur" Rinliana chu ka en haw a, mahse min melh hauh lo. Rintea chu a melh ngar a, Rintea lah a mengrum nasa mai.
.
" A tha e. Thla 2 em pawh ala liam lova, vengtu i nei tha e" Rintea chuan ten hmel zetin min melh a, mahse mak tak maiin ka hlim ve tlat.
.
" Engtinnge i hriat?" Rintea kalliam hnu chuan Rinliana chu ka en a, ka chanchin engtinnge a hriat ka hre lo, mahse Pitei hnen atang a hre ve thei tho a ni.
.
" A pawimawh lo. Mahse khatiang mipa tan kha chuan i uiawm mah mah" tih pah chuan a ding nuih sak a, a nuimawi lehpek asin!
.
" Mahse..."
.
" Enteh, ani ai khan ka tha zawk in ka hria" a ding a, ka ding bawk. Mi kal an tam lutuk, mahse a thusawi vang chuan ka bing mawpin ka hria.
.
" I mawl ami?" tih pah chuan ka chum ak a, ka lai nasa mai bawk. A hmel a thutak ngang mai si.
.
" Ka mawl mai thei. Mahse tun atang chuan ka bialnu i ni ang"
.
" Teh..."
.
" Thisen a inzawmna kan nei lo, bakah mipa dangin an bum leh ai che chuan ka tan rinawm la a tawk" kan piah a ding te lo nui hak ri chuan min ti zak zual. Ni e, a tawng zawi hlek lo, tin, a hmel a serious em em bawk.
.
Thla 4 kan inngaihzawnna a ni ta. Mipa tak a ni ka ti mai. Min be huam lo, mahse a hunawl ah erawh kan in be hram thin. A hnathawhna lam ah ani a kal leh tawh a, min ringngam a, keipawhin ka ringtawk bawk. Rintea ka ngaihna a reh fel ka ti lo. mahse a ai a awh zo takzet a ni. Ka nat tawhna vawikhat min sawichhuah tir a, abak erawh sawi nawn a duh lo a, vawikhatmah a sawi ri leh duh tawh lo bawk. Hunawl a neih loh zia hrereng chung a ka vui changin dawhthei takin ka vuina a ngaithla a, chumi zawh ah min hrilhfiah chauh thin. Ka hlauhthawnna a hrethiam a, mahse hlauthawng lo tur in min hrilh ngai lo. Mahse keimah ka in control theih nan min fuih zawk mai thin. a REI EMAW, REI LO EMAW, INNGAIHZAWNNA HI KHAWVEL THAR A MIN CHENTIR TAM TU BER A NI. He mihring hi ka tawng lovang tih ka hlauhna ber chu ka nunhlui ah a buai lova, ka tawrh tawhna hrereng chungin midang rinngam lehna thinlung min tuhsak a, rinawmna hlut zia min hriat nawn tir fo tu a ni tlat a ni.
.
( He story hi request na a rei tawh bawk a, true story kar ah ka duhthusam pakhat ka zep tel thung. April ni 15 hi an thla 5 inngaihzawn champha anih avangin leh tunah Rinliana hi Aizawl lam ah hna a hmuh thar avangin ka lawmpui ve nen ka rawn thailang ta a ni e. True story ziah hi a har ka tia, ziah tur khawl khawm ka la ngah avangin thenkhat story ka accept theih rih loh avangin ngaihdam ka dil nghal bawk e. Ka iah tur enihsa ho hi ka hman chang changin ka rawn ziak phawt anga, tha thar in ka lo accept leh char char dawn nia. Chuan, ka fanu school chawlh chhungin short story ziah kan in el dawn a, ka blog ah ka fanu kutziak ka dah ve thuai dawn a, in lo chhiar sak ve theuh zel dawn nia u aw...)