SEE YOU IN HEAVEN - 8

SEE YOU IN HEAVEN - 8


.


ELTY LUHLUL AUG HNAMTE


.


" Lt" chu awri ka hriat chuan ka thaw huai mai. Jacob lo kal phei chu ka lo kuah chawt a, ala inthlak lo ani ngei ang. Mahse overcoat kha a ha si lo a.


.


" Tunge i nih?" tih pah chuan ka pe tek dawrh a, current a rawn awm leh chiah. Ka hma a ding chu Jacob ni lovin Jonah zawk a ni.


.


" Nang... Khawnge Jacob?"


.


" A haw tawh. Chuan, fimkhur turin ka hrilh che ani lawm ni?" a aw chu a ngaihnobei lo kher mai. A hmel a rum hle bawk.


.


" Engtinnge..." ka buai vek thei.


.


" Ka nupui leh i bialpa hi an inngaizawng a, chuan, hre rawh, ipi tunu neihchhun a ni. Tichuan a chiang tawh em?" ka dang sawp sawp thei. Ka hre vek rawh emaw ka tia, ka lo hre vek hauh lo. Mahse engtinnge a thlen theih?


.


" Maw?"


.


" Zanin hian lo kal lo ila ka unaupa kut ah i thi ngei ang. Hre rawh, inthiarfihlim tur a ka tih lai che khan ka thu awih la buaina i nei lo tur. Tunah chuan talchhuak tur in kawng i nei tawh lo. Nang leh kei hi kan inngaizawng tawh ang. A chiang em?" au vak mai ka duh. Engtinnge ka rin theih ang? Mahse dawtsawi hmel a pu eih lo.


.


" Dawt i sawi leh sawi loh ka hre hauh lo" ka thinlung chuan a thusawi chu awihna a nei chiang em em thung.


.


" Enteh, nanghi ka ven tur i ni lo. Mahse ka kawng i tihhnawk tawh miau avangin engtikawngmahin ka kaltir mai mai lovang che. Ka thu lovin Jacob emaw, Joana emaw pawh mi se i hmu tur a ni lovang. Mi mai mai i hmachhawn lo tih inhria ang che. Nanghi ka bialnu i ni, mi hmuh ah pawh kan inkawp ngei ang" a aw chu a ring hran lo nangin ka sawifiah thiam dan ber in a nghet a ni ber mai. Hnial ngam tur hmel a pu eih lo bawk.


.


" Thil awmzia hi engmah ka man lo e" keimah leh keimah ka inbia ani ber mai.


.


" Ka ngaihdan chuan mu phawt la a tha in ka hria. Naktuk hna i kal a ngai lovang. A chhan chu i pu nupui hmasa thihcham a nia, a mamawh lovang che. Zing ah an rawn hrilh tho che in ka ring. Khawvar hun ah engemaw chu ka hrilhfiah dawn che nia. Mu phawt la, ka lo veng ang che" a tih chuan mak ka ti lehpek! Ka pu hian nupui hmasa a nei tih ka hre hauh lo.


.


" Mahse...."


.


" Ka hria. Mahse mu phawt rawh. Chuan, i khum ka tawmpui che i duh loh chuan va mu vat rawh" tih hluk pah chuan tukverh lam a pan a, tah chuan Jacob hnen a pyjama hak tur ka pek chu sofa-ah ala awm tih ka hmu chiah. Huiham, ka bo mawp mawp. Mahse Jonah hi zawt turin a nelawm thlawt loh. Bakah a sawiduh chin bak ka zawt chhuak theiin ka ring lem lo bawk. Lungawi vak lo chung chuan ka room lam ka pan ta nge nge.


.


Ka harh chuan khua alo eng tawh a, ruah erawh ala sur. Ka lu na bur avang chuan ka thochhuak peih lo kher mai.  Sana ka en a, ka inperh tho rang kher mai. Dar 10 a ri tep. Ka phone ka ban a, ka pu miss call alo awm nual. Jonah! Lalpa leh! Ani kha. Ka khum atang ka zuangthla a, mahse kitchen lam atang a rimtui zet rawn chhuak avang chuan ka nuisak a, eng story emaw a a changtupa in rawng alo bawl vel ka ngaihtuah chhuak zawk a, story ami ni awm maiin ka inhria.


.


" Good morning" kitchen ka va lut phei chu apron alo ha ut a, a lan dan ah chuan a inbual tawh anih hmel.


.


" Morning... Thawh ka hai a..."


.


" A pawi lo. Thingpui i duh dawn nge i intifai anga chaw kan ei dawn?" a aw-ki a zang vah a, a inhmeh lo hial zawk.


.


" Chaw ei nghal pawh a pawi lo" nuam ti chiah lo mahila ka tilang duh bik lo.


.


Ka intihfai zawh chuan chaw kan ei nghal a, chaw ei lai chuan kan tawng em em lo. Ka rinloh dan takin a rawngbawl ala thiam em em zui. Chaw eikham chuan thingpui hang ka lum sak a, thleng ka seng zawh chuan ka pu ka va phone a, chawlh anih thu min lo hrilh bawk. Nizan ah Jonah in a sawilawk tawh avangin ka phone hmanhmawh over lo bawk a, hahdam takin in ah ka awm thei tawh ang chu.


.


" I haw dawn lo ami?" mi pasal awmpui reng chu nuam ka ti hauh lo. Jacob emaw, joana emaw pawhin min rawn be miah lo chu mak ka ti deuh. Jacob pawh vawikhattal a rawn insawifiah ka rin vei nen, Jonah thusawi kha a dik ni a rinna ka nei hial a ni.


.


" La dawn lo. Vawiin hi kan misual rual ho chet ni a ni. Tihian in ah kan awm ang. Mahse i nu thlan erawh tlawh ka duh viau mai" a awmdan chu mak ka ti tulh tulh. Ka nu thlan hi a boral hnu ah vawikhat chiah ka la kal. Mak ti suh u, ka nu an zalhna hmun kal hi ka thei ngang lo. Beisei tur awm tawh miah lo beiseina hi keimah ah a thi thei miau lo a ni.


.


" Ruah a sur hi...." chhuanlam tur ka hre lo kher mai.


.


" Ruahsur hnuai ah pawh i nu khan i tan a ke a pen chhuak ziah asin"


.


" Enge ka lak ah hian i duh?" ka ti ta khawl. Engmah min hrilhfiah bawk si lo.


.


" Chu chu nakin ah kan la hria ang. Tunah chuan i nu hnen ah thu i tiam tur a ni. Kan hmelma te chu i pi, i putea, Jacob leh Joana te an ni. Chu chu hrereng ang che" a ti nghut a, ka thil hriat tawh thenkhat nen chuan engemaw tak chu ka hrethiam. Joana hi ka pi tunu diktak zawk maw? Khawvel hi a buai nuaih chu anih ber hi.


.


Enge tih a tum ka hre lo, mahse rinna nghet tak ka nei miau a, ka nu thlan tlawh tur chuan ka insiam ta nge nge. Ka insiam chhungin phone a hmang a, a driver a bia ni ngei tur a ni, a thawmhnaw rawn dah tur in a hrilh a, he mihring hian ka in a chen ve a tum tihna em ni? Cheng lo se ka duh em ka hre lo, mahse mi hmuh ah a mawi hauh lo tih ka hre ve thung.


.


" I hman chuan kal ila. Taka, motor hi a hnawk angem?" ka in luahna kawt hi a zau tha a, a hnawk ka ring hran lo.


.


" Chhoh pahin kan hrilh dawn nia" ka ti ve mai a, thlanmual ah motor ken a ngai lo a, ke a kan kal ve ngei hmel. A inhmeh lo khawp ang le.


.


Thlanmual kan thlen chuan ngawirengin ka nu thlan chung ah chuan ka ding a, tah loh hram ka duh. Ka mittui hi a tla tur a ni lo. Mahse ka insum thei ta ngang lo. Ka mit ka chhing a, Jonah chuan min rawn kuah a, ka mittui chu a kut chuan a rawn hru a, ruah ala hmi seng seng bawk.


.


" Tun bak hi i mittui tla hmuh nawn ka duh lovang. I duhtawkin tap la, i nu phuba i lak zawh hma chuan he hmun hi tlawhna hun i nei tawh dawn lo ania" ka lu a fawp zauh a, pafa inhnem kan ang ber in ka hria. Engvang a min pui nge anih ang? Ni lo, ani pawhin phuba lak tur a neih ve tho kha maw. Min pui ni lovin lamtang a neih belh zawk mai a ni. Engvang a phuba lak duh nge anih ka hrechhuak ngei ang.


.


" Haw tawh ang" tih pah chuan min kuahna atang chuan ka talchhuak a, mahse ka ruak huaiin ka hria. Rinchhan tur mihring ka mamawh zia ka inhre thar. Jacob khan ka ring lo a ni lo. Mahse amah ah khan feeling ka nei tak tak lo. Mahse tinge Jonah ber kher? Jacob U ania, mi pasal a ni bawk.


.


In kan thlen chuan ka in kawt ah a driver alo awm a, bag in thil a khai bawk. Min hmuh veleh Jonah chu a pan a, a mitmeng ah engemaw sawi duh nei ni in ka hre bawk a, ngawirengin ka luhsan nghal.


.


" Lt, tumah hian i pu a thalo a, kan kal a ngai a ni" kawngka a rawn luh rual chuan a ti nghal a, angaihna ka hre lo tawp. A chhan chu zing ah khan ala tha viau sia.


.


" Mahse..."


.


" Vawiin hi i pi diktak thih champha ania, i nu in atang a hnawhchhuah anih champha a ni bawk. Inthlak a ngai lovang"


.


" Oooh... engkim hi..."


.


" Hun in ala hrilhfiah ang che. Kan hmanhmawh a ngai. Chuan, ka lak atang engvangmahin i pu te in ah i kalsawn tur a ni lo" thupek a ni. Ka hrethiam chiah em ka hre lo, mahse zawm ngei a ngai tih erawh ka hrechiang em em thung.


.


Ka pu te in kan thlen chuan an awmpui nula in min lo chhawn hmasa ber a, ka pu room-ah min hruai lut a, ka zam a ni. Jonah chuan ka kut ah a vuan a, a ding dat a, tawng tum a a ka a ang zuau lai chuan room kawngka atang ka pi a rawn chhuak chiah bawk. Kan pahnih a min hmu dun chu a meng buai nak a, mahse a insiamtha leh vat thung.


.


" In lo kal ani maw? In nu pawh a awm kha, lo va lut ru" a tawng chu a tluangtlam angreng viau nangin ka rap tlat tawh.


.


" Aw le" Jonah chuan a ti nghut a, room kawngka chu a hawng zui nghal.


.


Room chhung kan lut chu Joana, Jacob leh patling pakhat an lo thu a, min hmu dun chu makti hmel an pu hran lo. Ka pu erawh a muhil ni ngei tur a ni.


.


" Ka pa, nang maw?" Jonah khawng deuh luh chu ka hre thei. Ni lo, ani hi ka pa, ni lo, Jonah pa.... Ka awih thei lo. He mihring hi ka pa chu maw? Thil ni thei a ni lo. Ani hi ka nu boral tum a min hnem tur a lo kal, tunge anih ka hriat si loh kha a ni. A hming takngial pawh ka hre lo, ka nu thian tha thin anih thu a sawi bak engmah hriat ka nei lo. Vawikhat chu ka tah vangin a mittui a tla ve anih kha. Mahse ka nu boral atang karhnih hnu ah erawh alo lang tawh ngai lova, keipawhin ka hre zui tawh chuang hek lo. Engemaw change rawh chuan ka rilru a alo luh chang chu a awm ngei mai.


.


" Lo thu rawh u. Lt, ilo kal ve thei animaw?" dam dup a a tih chuan ka kawchhung a fan rawih rawih thei.


.


" In pahnih kher chuan ka lo...." Joana a ni.


.


" I beisei apiang pe tur che ka ni hauh lo" Jonah chuan a ti hmuk a, ka lo ip chawih thei. Jacob erawh kan lam hawiin vawikhatmah ala rawn awm lo.


.


" Nupui te chhanna atan chuan a zialo lam hret lo maw? Mi hrang bul ah lehnghal" ka pi chu engtiklaiin nge alo luh ka hre hauh lo. Ka hnung mai ah chuan a ding a, ka lo ip leh chawih pek. Boruak awmdan hi a hrehawm tawp a ni mai. Kan kal chhan ber ka pu leh nikhaw hrelo in a awm bawk si.


.


" Mi hrang tumah kan awm ka hre lo" Jonah bawk chuan a ti leh nghut a, zep thu cheng lo. Au vak a, tlanchhuah mai ka duh tawh. Ka ipik ngawih ngawih.


.


" Jonah, i duhtawk thei angem?" Joana bawk.


.


" Aih, helai ah hian Lti hi a pu damlo kan tur a lo kal a ni. Tin, apu diktak a ni bawk. Mi hrang a ni lo tih sawi nawn ngai tawh suh se" a luhlul hmel tak zet a ni.


.


" Ka inchhung ah hian buaina a awm ka duh hauh lo. Nangpawh engvanga lo kal ngam nge i nih?" ka pi chuan min ti lehnghal. A hrehawm tak zet. Jonah chuan ka tlanchhuah hlau ni awm fahran in min vawnna chu a hma aiin a ti nghet zual sauh a, a manganthlak tak zet a ni.


.


" Apu hmu tur a lo kal chu a tan thiang ...."


.


" Duhtawk rawh u. Ka haw ange, engkim avangin ka tihpalh ni rawh se" ka tawngchhuak ve ta nge nge. Mahse thildang zawng aiin ka pa chuan ka mit a la zawk.


.


" Ngaihdan tha tak anih ka ring" ka pi zet chu a tawngthei ka ti ve tlat ta.


.


" Jo, kan kal leh mai dawn mi?" tih pah a Jonah chu ka melh zauh, makti deuh a min en hu chu ka nuih saih a, tunge ka nih a lang ve tan tawh ngei ang le.