ECCITATO - 1

ECCITATO - 1


ELTY LUHLUL AUG HNAMTE


`Hey, i bag hi i dahsawn thei angem?` ka hma a mipa ding chu ka en kal a, a bag lian zet chuan ka kalna a dal miau a ni.


`Sorry, mahse hmunawl dang a awm tlat lo. Tin, hei hi kalkawng ni lovin bag dahna area ani` a pa len tehreng nen ava sual tak. Ka pa ang a ni hauh lo.


`Ka luggage a rit alawm` inchhung a ka lal vei nen hepa zet chu min va dah nil chiang ve le!


`I kalna lam a kal ve tur tho ka nia, ka hnung ah khan lo kal ve mai rawh` tih hmuk pah chuan hmalam min hawisan hmak bawk. Sual lutuk!


Flight ticket Delhi atang ka chan miau loh avangin Kolkata thleng train in ka kal a, Train ah he mihring nen hian kan chuang dun hlauh, a phone hman atang Mizo ani tih ka hria. Mahse biak huphurhawm khawp a hmel ngainatawm loh a ni. Vawikhatmah kan inbe lo.


Train atang a kan chhuah meuh chuan ka thaw huai mai. Chu mihring chu ngei viau mahila a hnung a ka kal chu ka vanneihpui zawk tlat a ni. A chhan chu vai hmelchhe chuhhelh lutuk ho in min nek vel tur min vai kian sak ani deuh ber mai. Ka car book sa driver chu ka phone a, stand-ah min lo nghah tawh thu a sawi chuan platform no.22 lam chu ka pan a, kan misualpa pawh ka hmu tawh hran lo.


Airport ka thlen chuan mizo an tam ta khawp mai. Mahse ka danglam phah eih lo. A chhan chu Delhi ah Mizo kan tam lutuk tlat. Ka pa ka phone a, ka nu erawh alo bazar avangin ka be ta lem lo. Ka pa a phur hle a, min hruai turin motor a rawn tir a, anmahni lo kal an tum viau nangin kawng ah savawm seh chhoh ka duh avangin kal ka phal lo bur. An chauh ka hlauh zia ka sawi duah lehnghal. U mipa pakhat ka nei a, nupui neiin Bangalore lam ah SBI ah manager ni in an nupa in an awm a, fa erawh an la nei lo thung.


`Pu Lianmawia fanu i ni em?` min lo be tu lam chu ka hawi a, keimah ang rual hmeichhia, hmeltha zet mai, zahzum hmel zet a ni.


`Ni e, ka va hre mai lo che` tih pah chuan ka earphone vuah chu ka la thla a.


`Hre kher lovang. In chhungkua te chu in lar em alawm` a nui hak hak a, a hmel chu mahni hmeichhiatpui mahnise tha ka tih zawng tak a ni.


`Naaa.... Awihawm loh. Ruatsangi ka nia, Rsi tih pawn min ko tho. Nang ve?`


`Lalsangpuii ka nia, Spi tihin min ko. Kan flight a in ang ang chu maw? Keichu Air India ania, nang?`


`Kan in ang anihchu` sawi tur em em ka hre tawh lo. Ka bul ah chuan a rawn thu a, a hmeltha viau nangin ka ning leh der tawh. Thian kawm hi ka peih tak tak ve lo. Ka duhaiin a tawng peih hrep lehnghal.


`Hey, Ludo, nang hetah maw?` Spi au chel ri ah chuan ka hawi chhuak a, kan hma ah chuan kan misualpa ngei mai chu alo ding a, a nui ve suk lehnghal. A hming chu ka games khelh thin hming ang chiah ala ni zui.


`Hi... I haw ve dawn ami?` Spi chu a en a, keierawh min hre ang pawhin a awm eih lo. Keipawhin hria ang a awm ka tum bik lo.


`Aw, enteh, hei Pu Lianmawia, sumdawng hausa lutuk fanu thuhruk anih hi. Rsi ania` Spi zet chu ka duh aiin a tawngtam mah mah. Ka pa larna hi keichuan engah teh vak ka ngai hran lo. Amah ang a rim hian mi hian thawk ve se engvanginnge an hausak loh tehlul ang?


`Anihchu. Thil i ei tawh em? Ka ril a tam riau a` min ngaihsan hmel bik loh hle mai.


`La ei bik lo. Keipawh ei ka hreh lo. Rs, nang i ei ve duh em?` Spi tawng peih lutuk tlanchhiatsanna hun ka nei chu ka lawm nasa mai.


`Sorry, keichu ka tam lo. Va kal ru` anmahni pawh ka en peih lo. Kan misualpa hmel ka hmu peih eih lo.


`Nihchuan Ludo, va kal ila. Rs, ka bag hi ka kalsan tawp mai dawn, ilo en peih angem?` huiham. Ka ril a tam ve reng, mahse an bul a kal ka peih loh vang a tam lo der ka nia, mawl leh lutuk.


`Aw, ka lo en ang` ka earphone ka vuah a, ka mit ka chhing zui nghal hmak. Hmeichhe nu tak ka ni lo. Mahse ka pangchang ru em em thung. Ka thawmhnaw duhzawng pawh a nu lem lo khawp mai. Kekawr ka ngainat lutuk avangin ka pa min zilhna ka dawng tam khawp mai. Mahse a fanu duatlai hi thinrim khawpin min la hau ngai lo a, min hau awk lovang tih ak hriat avangin nuihtlawn chungin ka ha leh nge nge zel.


Lengpui airport kan thlen chuan ka luggage ka la a, Spi min rawn biak leh hlau in ka innawr chhuak vat bawk. Misualpa lo kal chu ka vanneihpui leh ta zawk a ni e. Ka hne em em laiin ka saltanna tang min khaichhuak miau alawm le. Driver in ka bungrua a hlan fel hnu chuan car seat hnunglam ah ka thu thak a, savawm um 2 ka phawrh sa nghal. Driver tan pakhat ka dahchhuah sak bawk. Kan driver hi chu ka haw apiang a min hruai tur a ka thlan thin a ni. A chhan chu savawma  duh ve em a, kan in chho dun thei miau a ni. Kan driver dang 2 erawh an upat deuh tawh bakah an bulah chuan ka in ngam tlat lo.


Aizawl ah karhnih ka cham tawh. Dawr ka nghak tluk tluk a ni mai. Thian ka ngah hran lo, ka thian neih ve te lah hmundang ah an awm bo ve vek bawk nen, a awmchhun Ruatkimi nen kan inzui hle. Ani hi kan thian ho ah a naupang fal deuh na in a puitling ber thung. Ka savawm in hi min nghak ve mai peih zel. Ani erawh chuan a in ve lo thung. Private school ah a thawk ve a, an bang hma thei sia, nilengin dawr min nghahpui ve mai zel. Ka pa lahin hlawh alo pe ve ngei zel bawk a, nuam kan ti dun phian.


`Rs, ka rawn lang ve tawp` a awri ka hriat chuan ka ner sawk thei. He mihring hi ka ngaina thlawt lo.


`Lo leng rawh. Khawnge i kal a?` Spi nuisang chu ka en a, ka be peih lo ngei mai.


`Parlour-ah ka sam ka khawih tir a, lo kawi a rem em a, i awm pawh ring ngam chuang lovin ka lo kawi mai mai. Engtiknge i chhuk leh dawn?` Ruatkimi chuan ka be chak lo tih a hrethiam aniang, a rawn thu phei vat a, mi hi a hrechiang teh e.


`Ka hre lo le. Thingpui in rawh aw` haw vat se ka duh avangin thingpui ka lam vat reng a ni.


`In lovang. Enteh, Ludo kha ila hria em? Mizoram ah an sawn hlauh a, dinner kan ei dun dawn a lawm nan` a hmel chu a nung sar a ni mai. Ludo... Ummm... ka lo ngaihtuah leh tawh hauh lo.


`Anihchu. Nuam iti awm` ka nui sak a, ka rilru erawh chuan vanduai ka ti khawp mai. Khatiang mipa vawt lutuk te phur pui chiam tur ka hre lo e a.


`Nia. Enteh, mahse amah hi pawh a harsa tawp. Vawiin pawh ka nu in min sawm sak vang chauh a lo kal ni in ka hria. Tinge maw mipa induh lutuk hi ka atchilh tlat le...` a hmel chu a ngui leh nghiai a, ka nuih a za tlat pek. Nu te buaipui sak ngai khawp a mipa han duh mai chu a zia ka ti thei lo tawp mai. Ka nu hian a ti ve angem tih ka ngaihtuah a, a chhanna chu TEUH LO MAI.


`Anihchu mawle. Ala hmangaih ngei ang che` engvang a chutia sawi ve ngawt nge maw ka nih le.... Love line ah hian tawn hriat ka nei lo khawp mai. Cas chu 2 ka nei ve tawh, mahse in kiss ka peih loh em avangin kan inthen leh ve ve.


`Ka beisei. Ka kal phawt ang. Present tur ka la lei lo a, hun a vawngdik thei sia, ka inpeihfel hman lo palh ang. Nidang ah ka lo la kal leh dawn nia` tih pah chuan a tho hliai a, ka ui bet der lo chiang khawp mai. Duhsakna hlan chungin ka bye bye hmiah.


`Khanu kha in inhria ami?` Ruatkimi a rawn tawng chhuak nghal.


`Hria ti ila Airport ah kan inhmu a, chuzawngchu. Tinge?`


`Mak ka ti deuh mai mai mawle. Tunlai a lar deuh, khehpuam lalpa an tihruk thin Pu Rosanga fanu anih kha. A nu nen an huai rap mai mawle` a nui hak a, mi chanchin sawi a inhmeh thlawt lo, a mawi lo zawng lehnghalin.


`Nihchu. Vawiin tlai chu chaw eichhuak ila. Ka pa kan phone ange. Scooty i keng tho tiraw?`


`Keng e. Keipawh pawi ka ti lo. Ka nu kan be ve ange` min thlawp thei zel mai hi ka kawmngeih em em na chhan thuruk a ni. Engkim ah chungnung larh nih duh thin kha ka ni miau a ni.


Zarkawt a dawr lian vak lo, tui deuh si ah chuan kan ei a, kan chaw eikham haw nghal ka peih loh avangin savawm ka stock sa chu ka keng a, WB road lam pan in kan tlan phei a, View ah savawm ka in a, Ruatkimi`n min nghak leh ran. Thla kan la dun vak vak a, mipa tellohna hmun hi keini tan chuan a nuam ber zawk miau a ni. Dar 7 a rikin Ruatkimi coffe in chak chu Bon Appetite restaurant ah kan inkhalh thla a, anni hi an coffee hi tui an ti em em a, keipawhin a rimtui ka ti. In ve thei ngat ila chuan ka in zing khawp ang. An dawr kawt a kan din fel hnu ah savawm can 1 ka in leh hlak. An rik laih laih avangin ka in in huai hmasa phawt. Mi tamna deuh a kal hi nuam ka ti em em lo. Ka pa vang hian mi hi an hre hlur hlawm a, pawn chhuah ka peih loh phah vek.


Kan zuk lut thla chu rin ang chiahin an lo awm nual mai. Table 2 alo awl a, kawngka hnaih lam ah chuan kan thu a, engmah ka ei chak loh avangin Ruatkimi coffee in chu ka nghak a, helai kal hi chu a nuam thin ngawt mai. An staff te an fel a, hemi chhung a thawk hrim hrim ngainatawmloh tumah ka hre lo. Be teh lua lo mahila dawr nuam ka ti ve hrim hrim. Dan felfai takin an nei a, an dan chuan tumah a thliar ve hauh lo tih mit in a hmuh theih thlap bawk. Savawm ka va inruk zinna ber an ni. Tunge ka nih a, tu fa nge ka nih ah an buai ve lo, an tan chuan an customer te hi VIP ang khat vek kan ni ber in ka hria.


`Kan inhmu leh ta maw?` huiham, Spi bawk. Hetah an kal ang tih rinngaihna ka hre lo.


`Anih hi` ka nui der sak a, ka hne hle a ni.


`Ludo kan ko ange, lawmpuina te hlan ve la` a sawi zawh rual chuan cabin lam a pan nghal a, hnialna hun a awm eih lo. Ka chaklo nasa mai.


`Hey, Ludo, Rsi hian lawmpuina a hlan ve duh che a` ka duhaiin a kal thui mah mah. Ka hlan duh thu ka sawi eih lo, amah zawkin hlan turin min ti a ni sia.


`Ka lawmpui che` sawibelh tur vak ka hre lo.


`Ka lawm e. Min lo zawm ve ula` a mawi hawih ah min sawm tih ka hrethiam ve lutuk.


`Kan lawm. Haw hnaih kan ngai tawh a, nuam deuhin lo hmang rawh u` Spi chuan zawm ve turin min sawm ansa viau nangin ka hnial fithla thak thung. Ka duhaiin henu hi a za mah mah deuh chu a ni.


`Kha kha maw Ludo chu?` Ruatkimi nen bridge-ah kan ding khawmuang leh a.


`Ummm... A hming thin zia kha, ka games khelh thin hming ang` ka nui hak a.


`Amah kha i hre miah lo ami?`


`Nope. Train ah kan lo chuang dun a, kan inbe lo. Airport-ah Spi nen an inhmu a, chuzawngchu`


`Nang tak hi chu aw.... Mizoram fa chuam anih kha. Hmeltha, sexy, hausa, hna nei tha bawk si anih kha. Advocate tha lutuk anih kha` henu pawh chu engtinnge alo hriat reuh ni. Keilahin tunge anih ka hre eih lo.


`Nihchu. Ka lo hre ve hleinem. A hmelchhia chu ka ti lo, a sexy na ka hre lo e a, a vawt ropui si` ka ti hlak a, a ngeiawm zia hre ve lo tan chuan a lo sexy ani mahna!


`Kha tak kha lawm hmeichhe duh chi anihna. Ngaihzawng a ngaihsak lo si. Mahse Spi chuan alo kherh thlu ta nge nge anih hmel. Ka va ui tak!` ka thiannu thusawi chu ama ka atang a chhuak atan chuan a inhmeh hlawl lo.


`Kha ai chuan i bialpa Muanmawla a tha zawk daih` ka tih chuan min beng awk a, kan nui dun kiah kiah. A bialpa hi an inkawp rei ve tawh viau a, a fel em em a, an inhmeh viau. Ruatkimi a duh lutuk vang hian khua a hmu lo fo thin a, a thusawi apiang a awih em em a ni ber mai. Muanmawla ka tih phah a, a lawm lo thei asin.


Ka zing tho chu ka lu ana kher mai. Nizan lam ah savawm ka seh hnem mah mah bawk a ni. In kan thlen hnu ah 1can ka seh leh hram a, ka tih laklawh hi chuan ka tawp mai thei lo. Ka tih loh erawh chuan awm eng ang mahse ka chak ngai eih lo thung. Ka pa in chaw ei laiin min zilh zauh a, ka thinrim in chaw ka ei nghek bawk. Dawr nghah ka ngaih loh avangin leh ka nu in sam tih kir a duh avangin ka nu chhuahpui turin ka insiam mawlh mawlh a, thil tui tak kan ei leh ngei dawn tih ka chiang. Ka nu chhuahpui nawmna em em chu eitur tuina hmun a hre hneh viau. Amah pawhin a siam thiam em em bawk. Kan driver a hman loh avangin ka pa in motor khalh turin min ti a, ka lawm lo viau. Lirthei hi ka lawm lo khawp a, nei ve dul in khalh thiam mahila a theih hram chuan mi khalh a chuan ka thlang zawk ziah.


`Nu, Mama te hi engtiknge an lo chhoh ve dawn tak?` Zemabawk lam kan pan mek. Ka nu hian parlour pan bik a nei a, Zemabawk ah daih a ni. SANGSANGI BEAUTY PARLOUR tih ania, a neitu hi a felin dawr a nuam em em a, keipawh ka kal fo. Ava piah deuh avang hian kal peih loh chang nei mahila a tam zawk ah chuan ka pan ve tho. A neitunu a hmeltha bawk nen, ka nu duhzawng tak ania, midang a pan ngai miah lo. A kawm a nuam a, tupawh hi a dah VIP thiam em em reng te hi a fakawm ka ti. Sumdawng chhungkua a seilian ka ni bawk a, mihring dawr nuam leh nuam lo chu hre hrang tak ka ni ve in ka hria.


`Chawlh a lak theih chuan karleh lam ah an rawn chho thei ang. Tak a, Mambawih, i thil zir hi exam i zawh chuan ipa sumdawnna lam hi enkawl chho tawh la tih i pa nen kan lo sawidun a, ipa hi a kum a upa deuh tawh bakah a lung lam hi a insawisel leh zauh zauh tawh a, i U heti hi a ni si a, i rilru i pek tan deuh ava tha tawh ve mawle` ka nu in a tih chuan ka nui sak. Ni e, ka thil zir hi exam chiah ka hmabak tawh a, keipawhin ka nu leh pa ngaihdan chu ka ngaihdan ve tho a ni. A chang chuan ho viau mahila kan chhungkua aia dah pawimawh ka nei ngai hauh lo.


`Nia, exam turin ka zuk chhuk anga, ka lo let lehnghal ang tih ka lo rilruk a. Mahse nu, U Partei hi helam ah awm ve se ka ti. Mama hi sawn dan ka pa in a hre miah lo ami?` kan monu hi ka ngaina a, ani pawhin min ngaina tih ka hria. Bangalore atang Delhi ah min tlawh tur a lo kal zauh zauh a peih ve bawk. Mo ang in ka en lo a, ka U ai mahin ka pawh zawk nghe nghe.


`Ka hre lo le. Ipa hi zawng, minister te dawr ve tur a ka tih lahin a duh lo bur mai a, Pathian rorel dan ah kan lawm mai zel tur a ni` ka nu in a tih chuan ka nuih a za zawk. Ka pa tluk a sumdawng ni si a mi dik cherh chawrh hi an tam lo khawp ang. Duh se chuan ka U hi Aizawl ah a awm thei tih ka chiang. SBI lam ah ka pa tlaktlum zia leh an dah pawimawh zia ka hre ve tlat.


`Yes Thiani` Ruatkimi a ni tlat. Ka nu sam khawih tir ka ning leh viau tawh. A duh uluk leh phunchiar ang aiin Sangsangi chuan a dawhthei em em a, an nui dun ang hawk hawk a.


`I buai em?`


`Ka nu sam khaiwhtir ka nghak mek. Nge ni ta?`


`Iva awm hla si tak` ka nu pan thin hi a hrechiang ve tlat.


`Sawi la, an zo har tawh dawn lo`


`Enteh, Muana te chhungkua in buaina an tawk a, a hma atang daih tawh ania, an thenawm ten anmahni ram ah in an rawn sa tel a, englo, an rawn nek anih chu. Aaaaa, ka sawifiah thiam lo. Noah kha rawih an duh a...` tunge Noah chu? Ka hre map lo.


`Tunge chu chu?` makti zet in ka phone chu ka melh a.


`Awww, nizan a Spi kalpui kha.... I games khelh hming ang nei kha` ka nui chhuak hawk. A hming chu a danglam hrep mai.


`Chuan engtin?`


`Spi nen in inhre tho a, Muana hian biak a duh a, min lo kalpui teh a` ka tanpui a ngen vawikhatna a ni. Mahse a thil ngen ber kher hi mak ka ti, Ludo nge Noah, a engpawhnise keimah kaltlang a biak a duh chu mak ka ti.


`Ngawt a che. Ka hmelhriat pawh ani ngawt lo` ka vin hlak a, min rawn nuihtlawn nghal zaih thung. Ka thinchhiatzia hretu te chuan ka vin hi an ngai haw hran lo.


`Spi kha min hmuhpui la, ani in Noah kha min hmuhpui thei hrim hrim ang` a tih chuan ka thaw hak ringawt. Vawikhat ka puih min dilna ania, Muana lah Delhi atang pawh ka tirh zarh zarh thin a ni bawk nen, Spi va hmuh chu thil harsa lo tawp a ni tih ka hre ve kar bawk. Min hmu chak mah mah zawk hial in ka hria.


`A tha alawm. Mahse khapa hmuhna ah chuan ka tel ve peih miah lo ania` a khek raih dan ah a lawm hle anih ka ring.


`Thanks. I nu sam inkhawih zawh ah indawr ah kan lo nghak ang che. E, tak a, ka scooty tlan loh ni ania, Muana bike a chhe bawk. Motor i keng tih ka hria, i motor kan ring nghal dawn` he mihring te hi chu a thluak a tha thlawt a ni.


Dawr kan thlen chuan Ruatkimi te pahnih pawh an lo thu vang tawh. Ka pa nen an lo ti ti a, an lo sawitui nasa mai. Khawi bialtu Pastor emaw an inhriatsiak mek bak a ni leh lovang.


`Bawihi, in lo let maw. Kha, i nu chu beram note ava ang chhip chhep ve` ka pa chuan min lo biak pahin ka nu chu a fiam zauh a, ka nui a teu hlar thung. Ka nu leh pa tluk a inchhaih a infiam nasa hi an tam lovang. Ka pa hian ka nu chhaih thinrim a thlem leh hi nuam a tihzawng tak ania, ka nu lah hi ka pa in a chhaih tawh chuan tihtauh ngei ngei tum tlat a ni bawk.


`Pa, ven fimkhur a ngai viau ang. Ruat, in thlenna a rei tawh em?` Ruatkimi bul ah chuan ka thu ve nghal a, ka nu erawh thlem ngai tih hriat takin a thu fal deuh nalh. Ka pa a tho tuah tuah a, ka nu bul ah chuan va thut pahin a khuh zauh. Hmuh an nuam thin teh e!


`Rei lo e. Mahse kal nghal ang u. Pa Mawi, Rsi chu ka ru chhuak dawn nia` Ruatkimi chuan ka pa chu a rawn nghal a, an lo sawidun tawh tih ka hrethiam mai.


`E, va kal rawh u. Bawihi, Noah kha nangpawhin va kawmngeih tum la, apa kha a kal hma ta em a, ka thianpa ve ber thin asin` ka pa in a tih chuan ka dar ka san zauh. Ka pa meuhin ka thianpa ve ber a tih chuan an inkawmngeih viau in ka ring.


`Soi te in ka hre ve lo ania. Kawng sawi mai ru` kan tlanchhuak chiah chu ka ti nghal zat. An lar, mahse ka hre ve tlat lo. Lar vang a mi zawng zawngin hriat chhan tur awm bik hek lo.


`Ka lawm lutuk ania Rs` Muana chuan alo ti bauh a, ka ner nawk. Thian tha kar a lawmthu inhrilh vel hi ka lawm ve lo.


`A ho. Pawimawh zawk chu seat hnung pocket ah khan zipper kha hawng ula, savawm ka dah, min lo hawnsak teh u. Kan mi hmuh tur hi savawm tello chuan ka hmachhawn peih lo` ka tih chhunzawm zat a, Ruatkimi phun bal bal chu ka nuih tlawn vat a, Muana nuih alo za ngang mai. Ka savawm in hi min hau nasa, mahse ka thlah phah chuang der lo, sakei ka seh ngai chuang hleinem le. Drinks ching ho hi chuan chhuanlam fahrah deuh hi kan nei ve tham hlawm lehnghal.


Spi te in kan thlen chuan a ropui nangiang mai. Apa hi Police constable pakhat ve mai ni si a ropui mah mah chu a ni. Alo la tho lo zui, a tlai tawh tehreng nen rapthlak reuh mange. An awmpui pakhatin a kaitho a, ka hming ka sawi tir ngat. An awmpui te hmel ah kaitho mai tur a kan tihin hlauhna awm tlat hek. Ka hming an lam phawt chuan alo tho fuh viau ang tih ka chiang ngam sak.


`Awi, tehthut cheu chuan` darkar chanve lai kan nghah hnu chuan make-up dikthlapin a rawn nui chhuak sang thei. Fake lutuk!


`Nia, iva mu rei em em` ngampa zet chuan ka lo ti ve hmak.


`Ka tho hma lutuk a, ka mu nawn leh mawle. nizan ka lu na ka mu tha thei lo a` a dawtsawina hmui chu mawi viau mahse nuih a ti za pha tlat. Mahse kaan mamawh miau a, insum ka ngai tih ka hre ve tlat.


`Ava zialo tak. Ka rawn tibuai leh bawk che sia` inthlahrun hmel tak a ka tih chuan Muanmawla alo nui huk. Hepa hi chu nuih hun a hre thlawt lo.


`A pawi lo. Engenita teh thut?`


`Englo ania, Ludo oh Noah kha hmuh kan duh sia, han biakpawhna tur kan hre lo bawk nen, a zawnawlna kan rawn pan hmasa` mit siai zauh a ka tih chuan a nui ar ar a, ka thusawi chu a thawk tha hle tih ka hre nghal.


`Awiii, iva ho tak. Tak tak a, a chhan ka zawt lo mai ang che u. Engtikah nge hmuh induh a?`


`A theih chuan vawiin ah ni se kan tia` Ruatkimi alo inrawlh vat. Ka thaw huai mai. Zawh lawk nachang hre hek lo.


`Kan phone chhin ange` a phone chu a la kang a, a biak lai chuan kan ngawi thap a, an inbiak dan ah hmuh a harsat hmel loh.


`In ah a awm a, Hotel Floria ah kal turin min ti nihchu. Awi, vawiin ah ka hmu thei dawn lo maw ka tia, in lo kal chu ka van lawm` ka nuih za lutuk chu ka nui chhuak hawk ringawt.


`Anihchuan ka va drop ang cheu. Kal nghal ila` hmuh ve ka tum eih lo.


`Lawks, kan inthlak lawk. Ani hmu tur chuan ka dress hi a simple mah mah` huiham. Tipawh hian a nalh tawh eltiang nen, eng dress nge maw hak ala tum cheu ni.


`Ka hman e` a rawn chhuak leh chu a ropui teh e. Ngawirengin kan inzuichhuak a, motor a keng ve dawn maw tia ka motor ah a lut ve thak. Haw lam ah thlah ngai tawh lul suh se.


Hotel Floria kan thlen chuan motor a ka lo nghah tur thu ka sawi chuan Spi chuan a phallo nasa mai. Tihtakte a min sawm avang chuan peih lo zetin ka zui leh ta nge nge. Hnunglam a Ruatkimi min rawn nuih chu rum zetin ka melh a, ka ngei kher mai. Ka duh loh dan hlir a ka awm ngai chu phuba ka la khawp ang. Noah lo thutna lai chu kan pan nghal a, a thawmhnaw chu a inhmeh kher mai. Velvet kekawr dum a ha a, jeans puan nem kamiz paw duk a ha a, a kamiz ban a thlep bawk. Tin, a lang fresh em em bawk.


`Lo thu ru. Tihtur ka nei pah a, in a lo kal ai chuan hetah a rem mai ka tia` a hma ai chuan a nelawm ta deuh. Mahse min melh tlat avang chuan ka confi lo kher mai.


`Ludo, enteh, kan mihausa fanu in a mamawh ve tlat che nihcu.` Noah bul a va thut pah chuan a ri nghal hawrh a, mi hausa a lawm hmel takzet a ni.


`Enge min hmuh duh chhan ber ni le?` a hna ah a chian hmel ka ti.


`Englo ania, keimah zawk ania hmuh duh che. Kan ram chhung ah kan thenawm ten an in an rawn zauh a, tha tak a dawr kan tumin an theih tlat loh a, court kal an ngam zawk tlat a, an ukil rawih hi Pu Michael ania, ka pa in nangmah hi rawih che a duh a` Muana chuan alo ti vat a, Noah chu a bu nghut.


`Anihchu. In LSC a fel em?`


`Aw, mahse anmahni khan LSC an neih thu an sawi ve tho bawk sia`


`Chutichu a buaithlak ve nek anihchu. ENgtiknge in court hun tur?`


`Thla thar ni 7 ah ania`


`Hei ka card ania, ipa nen remchang hmasa ber ah lo kal ta che u aw.... In LSC nen ni se, kan inrawih dan tur te kan sawifel dawn nia` tih pah chuan a card chu a pe a, Muana chu a lungawi hmel khawp mai.


`Thil ei ang u. Menu kha lo en ru` a tih zawm zat a, ka ei chak hran lo.


Kan thil ei chhung chuan an ti ti bawrh bawrh a, kei erawh ka tawng mang lo thung. Ka tang mar auh reng, a chhan chu Noah mit chuan khawdang a melh tlat lo a ni. Spi lah chuan Noah chu a nek leh talh thin a, zaklo kan ti khawp a! Hmeichhia thenkhat hian tiang hian an mipa duh te hi an lo bawh ngam tih rin ngaihna ka hre lo. Noah lah chuan a ngaihven em em hran lo lehnghal a!


In ka thlen chuan khua a thim lek lek tawh. Ka room ah ka luttlang a, ka mu vang vang chak. Noah bul a kan awmchhung zawng ka insangmar teuh reng a ni ber mai. Haw kawng ah lah Ruatkimi te pahnih in a fel an tihzia leh a pa an tih zia an la sawi reng zui, ka hne lek lek zawk. Ka thawmhnaw ka hlip sawk sawk a shower ka inphuh tir a, ka mit ka chhin apiangin a hmel ka mitthla ah a lang ziah zui. Ka inbual zo chu ka ril a tam loh avangin ka nu ka au a, chaw ei lo a mut ka duh thu leh ka lu a nat deuh avangin min kaitho lo tur a ka chah hnu chuan ka mu zui nghal a, ka chau ve ngang aniang, ka muhil zui nghal bawrh bawrh.