ECCITATO - 10

ECCITATO - 10


ELTY LUHLUL AUG HNAMTE


`Noah, khawngaihin dawt min hrilh belh tawh suh` a thusawi chu awihna ka nei tlat lo. Ni e, Hmingliana te leh Kimkimi te hi inhriat chhan tur an neih ka hre lo. Noah hi Hmingliana unaunu hmangaih a ni tlat.


`I awih emaw, awih lo emaw, ani miau si a ni` a ti nghut a, a ner sawk bawk.


`Nachhawkna i mamawh angem?`


`Ngaithla rawh, tun bak hi ka sawi nawn tawh dawn lo. Tunah hian ka dinhmun hi a hlauhawm tan tawh a, Kimkimi hi Hmingliana boss nupui a ni. Tum nei ran in a rawn chhuak chho a, mahse a tum chu ka lo dal a, dal theih loh chin erawh ka nei ngei ang. engmah thil diklo ka ti hauh lo` a hmel ka va en a, dawtsawi hmel a pu lo. Mahse engvang a tun ah chauh min hrilh nge anih?


`Chuan?` ka kut ka kuangkuah a, khum mawnglam ah ka ding than bawk.


`Min ring turin ka ngen dawn lo che. Nunhlui chu kan lo nei dun ngei tawh alawm, mahse ka nun ah midang an lut tawh a, ka nunhlui chu ka hman tangkaina tur anihloh chuan ka tan hlutna a nei tawh lo` a ti leh nghut a, a hman tangkai loh chuan a tan engmah hian hlutna a nei lo aniange. Mihring mahni hmasial lutuk mai.


`Mu hahdam tawh rawh. Hetah hian ka lo tluzal anga, i nawmloh emaw, ammawh i neih chuan min ko mai dawn nia` tih pah chuan khum pakhat awm ah chuan ka lawn vat a, tunah tak hi chuan engmah sawidun ka peih miah lo. Mak min ti mai thei, mahse hunrei ve tawk tak nupa ni chung a inpawhna eih nei lova kan awm tawh vang nge ka hre lo, amah ngainatna em em hi ka nei tawh tlat lo.


Noah pawh ngaihtuahawm leh na lutuk a ni lo hlauh a, ni 3 a awm hnu ah kan chhuak veleh nghal mai. Mak tak maiin kha ni 3 chhung khan a zia a danglam em em a, a tawng mang ngai lo. Chutihrualin phone a hman duh erawh chuan pawn ah min chhuahtir loh chuan amah a kalsawn ziah thung. Eng ang pawhin ka lak a zep duh a nei anihpawhin buaina ka nei lo. Hna ka chawl rei tawh erawh kan boss lak ah ka inthlahrung viau nangin U Puii a awm a, ani in min lo hmui hneh mai bakah tlai ah hna ban ah min rawn tlawh kawi ziah bawk. Kimkimi nen engtinnge an inhriat zawh chak viau mahila ka hreh deuh tlat thung, bakah hna ka zawm hun ah ka zawt thei tho a, lo zawh thawt thawt kha a tulna a awm in ka hre lo.


`Vawiin chu bazar ah kawi ila` U Puii chu ka dawhkan hma ah a rawn ding a, vawiin hi Noah damdawiin awm a chhuah leh hnu a hna ka zawm leh hmasak ber ni a ni. Noah erawh thla 1 chhung chawlh a la a, in ah a awm thung.


`A pawi miah lo. Ka nu khan sangha a ei chak a, ka leikawi ang ka lo ti hrim hrim a` ka lo ti vat a, haw hma ka chak hran lo. Pasalte damloh lai ilo ti ani mai thei, kan nupa nun ah hian inthlakhlelhna tur a awm thlawt lo a ni. Mualpho aiin ti in kan inthen lo a chuzawngchu a ni mai.


In ka thlen chuan khua a thim chhelh tawh a, ka nu motor a awm loh dan ah ala haw lo anih hmel. A chang chuan ka nu hi a tlai ve thin viau, hna laklawh a awm te hian zo lo a haw hi a duh ngai tlat lo a ni. Kitchen ah Liani alo awm a, ka thil khai min lo chhawk vat a, sangha chu chhum nghal turin ka chah a, kan room lam ka pan san zui nghal. Room ka luh chuan alo thim thap a, light ka on chuan ngawirengin tukverh bul ah chuan Noah chu alo ding a, ka phu nasa lutuk chu ka au that.


`Enge i tih?` ka ti zui hlak a, min ti phu nasa lutuk chu ka thin phu a rang ngei mai.


`Vawiin ah Hmingliana a rawn kal a` chu thu chuan a hma aiin ka thinphu a ti rang lehzual. Hetah thleng a rawn kal ngam a maw?


`Enge alo tih?` ka thin ka dawm vang vang.


`Ipa leiba rulh nan nanghi an duh a ni` a ner nawk a, keierawh ka nui hawk thung. Ka pa hian leiba rulh tur a neih ka hre hauh lo. Dawr bungrua pawh payment lo in a la ngai lo a, bat ai chuan neih loh a thlang zawk thin tlat a ni. A thusawi chu a awihawm loh takzet.


`Enteh, i bialnu vang a kan chhungkua tih mualpho kher tum hi a tha ber lo ania`


`Ni lo, i ngai diklo a ni. Ipa hnen ah zawt la, eng leiba nge a neih i zawt thei ang` chair-ah chuan a thu a, a hmel chu a chauh hmel viau nangin engpawh hmachhawn huam hmel a pu thung.


`Enge kan chhungkua ah hian i duh?` ka kut ka kuangkuah a, amah chu ka melh vang thung.


`Ka duh chu ka nei che alawm` a nui suk a, ka beng chawrh chak lutuk.


`Anih chuan ka pa lehzel chu hmer tel tawh lo la, i duh chu i bulah ka awm alawm` ka ti ngat a, ka pa dawt a puh kher chu ka lawm hauh lo.


`Ipa a fihlim i duh chuan Hmingliana chu i pan dawn tihna em ni?` a bawp a khawkherh a, a kiu chu chair ban ah nghat in a kut chuan a hmui a nuai a, diktak chuan mipa hmeltha tak leh hmeichhe duh chi tak a ni, Kimkimi bul a a nuih ang khan ka bul ah nui ve ta se hmeichhe vannei tak ka ni ve tur.


`I bialnu nen a inneih chu i chak viau tawh anih chuan min dil la, chumi hnu ah ka chhuahsan ang che`


`Nangnen a inbiak hi chu hun khawhral thlawnna mai a ni. Intifai la, chaw ei ka lo siamtir ang. Ka nu chu hmundang ah hna thil avangin a riahchhuah a ngai a, nghah chi a ni lovang` ka nu lo haw hma chuan chaw ka ei san ngai lo tih hi a hrechiang ve tlat a ni.


Noah thusawi chuan ka rilru a tinuam miah lo. Mahse ama hriat ah erawh ngaihven lo ang in ka awm ve tlat thung. Engkim hi a buai nuaih ni berin ka hria. Ka pa ka biak ngei a ngai tih ka hria. A pawilo, naktuk ah hna ban ah ka kal kual mai aniang chu. Keimah ngeiin enge thudik chu ka zawnchhuah a ngai tih ka pawmthiam tawh. Tunah chuan ka awm mai mai thei tawh dawn lo anih hi.


`Zanin khan ka hrilh. A lakah hian thup in ngah lutuk lo maw................ Ka hria alawm. Mahse ka nupui a ni a, i fanu a ni bawk. Engpawhnise engkim hi a hriat a hun tawh. Hetiang a inhrem reng hi ka tlin tawh lo......... Ni lo, ka thei lo. Ka nupui phatsan turin min nawr tawh suh, i fanu ani tih i theihnghilh em ni?` Noah phone hmang chu ngaihthlak ruk ka tum miah lo, mahse kawngka a khar lova, balcony ah phone a hmang a, ka zan zung tur in ka hre palh a ni. Tunge a biak tih chu hrilh nawn ka ngai lo. Ka kehsawm tak meuh meuh a ni. Ka pa chuan thil diklo tih a nei a, chumi thupbo nan chuan kei a fanu hi tawktarh ah min hmangin ka pasal ngei chu a fanu phatsan turin a nawr a maw? Ka mumang ah pawh ka la mang chhin ngai lo.


`Tho tawh rawh le` ka dar a sawina avang chuan muangchangin ka meng a, Noah chu inbual zo tawh tih hriat zetin a sam ala hnawng chap a, alo nui var var bawk. Bang a sana intar ka han melh a, dar 8 a ri tep tawh, ka zuangtho rang ngei mai. Nizan khan ka mu mang lova, tah erawh ka tap lo. Noah awm lai a tah tumna ka nei tlat tawh lo. Ka pa, ka ngaihtuah zawng pawhin ak kawchhung a so bulh thei. Eng chiah nge a tih hre tur in ke ka pen a ngai tih hre mahila bultanna tur erawh ka la hre miah lo thung.


`Thawh ka hai chiang hle mai` ka nui sak a, tunah chuan ka pasal hi engvang a ka lak atang a hla tlat nge anih ka hre tawh a, ka hlat tawh dawn lo. Mahse ka lak a thup a neih avang erawhchuan hremna a tawk lo hauh lovang.


`I mu tui lutuk a, ka kaitho ui che a. Tho la, chaw ei ila, i hna i tlai ange` zing dang ang lo takin anipawh a hlim hmel phian lehnghal. A kut a rawn phar a, ka lo vuan vat a, kan inneih hnu a kan zingtho hlim ber tum ani hial ang.


`I damdawi i ei tha em?` chaw eikham chuan room-ah kan inzuichho a, nidang ang a ka awm loh avang chuan makti deuh hlek chuan min en hu a.


`Ei tha e. I tha em?` a makti hmel chu ka nuih aza ru kher mai. Mahse ka nui chhuak duh lo thung.


`Tha e. Tak a, tlai ah i peih chuan min lo hruai la` ka scooty tlan loh ni ania, nidang ah chuan driver in min thlah loh chuan taxi ka la mai thin.


`Maw?`


`Tlai ah i chhuah peih leh min lo hruai la, ka scooty tlan loh ni ania` ka ti leh mai a, khum bul ah chuan hawihai deuh chuan a ding a, ka nuihzat ruk zia chu.


`Englo.... E, aw... nia, aw, ka lo hruai ang che` a tawngbah ve nawk mai. A nui suk a, mahse a hmel a maktihna chu a reh chuang lo.


Ka kal dawn chuan lo in enkawl tha tur leh thil lo ei tha turin ka chah a, min chhan nachang pawh a hre lo. Ni e, nimin lawk ah pawh nupa inhal tak, inbe mang lo kha ka mizia a dang thut a, kan hun hmalam a kan inngeihlohna lang miah lo a ka awm chu a tan a mak dawn em asin.


Hna ka thleng chu ka mood a dik thei thlawt lo. Ka pasal bulah hlim awm takin lang mahila ka pa ka ngaihtuah a, engtia hmalak tur nge ka hre ngang lo. Thawhpui dangte pawh vawiin chu ka be mang lo. U Puii meeting avangin a rawn kal tlai dawn bawk nen, ka seat ah ka thu a, hnathawh pawh a lang lo. Stock ka check a, a bak erawh ka rilru ah a lut mawlh lo. Ruatkimi ka phone a, ani hi engkim ka hrilh ngam ti ila kan nupa kar erawh ka hrilh lo thung. Nupa kar chu nupa kar a ni. Ka pa chungchang ka hrilh a, min thawng ang aiin anierawh a thawng ve vaklo in a lang.


`Thiani, ipa chuan thil a tisual ve thei lo a ni lo. A pawimawh ber chu a khawvel hun hi a tam zawk a hmang tawh a, a hun hnuhnung lam hi chu hahdam tak a a hman theih nan engemaw i tih a ngai a ni. He thil a pui thei tur che awmchhun chu i U hi anih ka ring. Ani nen engkim sawidun ula, ipa hi hahdam tak a dah a hun in ka hria. I pasal hi ringtawk la, a phatsan ngai lovang che, a hmangaih che ania.`


Tlai ah Noah chuan min lo hruai ta ngei a, a hmel a nungin damkawr tih pawh a hriat loh. Khawiahmah peng lovin kan haw tlang nghal a, ka nu pawh alo haw tawh. Kan nupa hlim deuh a kan inzuilut min hmu chu mak a tih hmel ve tho, mahse ka nuih var var avang chuan a nui ve a, kan chhungkaw boruak chu a hahdamthlak phian leh ta mai. Chaw ei lai te chuan ka ti ti siam siam a, kan pa erawh a maktih ala reh mai lo tih hriat takin min en leh vung vung thin, mahse ka ti ti erawh a rawn zawm ve zauh zauh. Ka nu nen inchung pangpar huan zauh dan tur kan sawi a, ka nu pension a hnai tawh a, in ah awm mai mai a peih dawn lo tih ka chiang, chuvangin pangpar lakkhawm sak ka tum ve tlat a ni.


`Hetah i rawn mu dawn lo ami?` kan mu tur chu Noah chu sofa a mu tur a a mutbu a lakchhuah chuan ka lo ti vat a, a hawi buai leh ta nak. Ni e, nupa nun hlim tak a kan hman hnuhnun ber kha khum khat a kan mutdun hnuhnung ber a ni. Muthran pawh ngai ah kan nei dun tawh hial a ni.


`I chiang em?` a mutbu chu a pawm a, a ding run bawk.


`Nupa muthran reng chu a hlim theih loh an tia lawm` ka nui hak a, ka chhungril ipikna chu kan nupa kar ah tihlan ka tum lem lo. Ka pasal hian min phatsan ni a ka lo ngaihna zawng zawng ah khan min phatsan miah lo ani tih hi ka thinlung hian a pawm tlat tawh a ni.


`I hria em? Induhtawnna awm miah lovin nupa a insiam mahniila kan inneihna hi a lem ani lova, tinge kan inhrem reng ang? Nupui tha tak ka ni ngai lo tih ka hria, mahse kan nunhlui dahtha in bultan tha turin ke kan pen thei alawm` min kuah hlun a, thil tam tak kan sawidun a, naupanlai nun te sawiin kan ti ti tui dun em em bawk.


`Keipawh pasal tha tak ka ni bik lo. Tunah erawh i tan innghahna tlak ni turin theihtawp chhuah ka tum ang` ka biang ah a rawn fawp zauh a, nuam ka ti em ka hre lo, mahse pasal ten duat tak a min kuahna chu a hrehawm miah loh tih erawh ka hrechiang ve ta.


`Muhil tawh rawh. Zingah i harh hmasak chuan min kaitho tawh rawh aw` ka tih chuan a rum nghut a, ka dar a fawp zauh a, kan ngawidun ta.


Kan nupa kar chu a tha takzet tawh. Noah pawh hna a kal leh tawh a, Kimkimi pawhin tan a la leh viau tawh. Mahse ka U nen kan inbe tawh a, hma kan la dun mek a, Noah pawh engkim kan sawidun a, min pui nasa em em, hmeichhe dang lak ah rinhlelhna ka nei tawh ngai lo. Min hmangaih ani tih hi a theih ang ang in a tilang a, min duat takzet a ni. Engemaw chang a inlakbing tlat chang erawh a nei zauh zauh, mahse a hna vang ah ka ngai, a hna hi a hahthlak a, ngaihtuahna sen nasat a ngai a, chutiang hun ah chuan kan inbe tlem mai a, ka tibuai ngai lem lo.


Nilengin hna ah kan buai a, U Puii pawh Kimkimi a hriatna ka zawt a, alo dawr thin a, Kimkimi khan ka hnathawhna a hria a, U Puii thawhna a hria a, chuta tang chuan Noah accident ni pawhin alo phone alo nia. Ka zawh chhan min zawt lem lo, a chhan chu an chanchin kha Mizo zing ah hre lo mang an awm tlat lo a ni. Mahse tunah chuan khatiang thuthang kha sawirik a awm tawh ngai lo thung. Kan in lampang ka tlawh tam lova, ka U nen erawh kan inhmu zing viau thung. Noah in kal a rawt pawhin ka pa hmuh ka hreh rih tlat a ni. A chhan chu a thil lo tih tawh ka ngaihtuah a, a hmel ka hmuh chuan na ka ti tahr leh dawn tih a hria. Chubakah a thil tihsual thup nan a min tawktarh avang hian na ka ti ngawih ngawih bawk. Noah hi tawng ta lo ila Hmingliana kha min neihtir ngei anga, ka pa sumdawnna hi an kut ah a awm vek anga, sumdawnna phen ah drugs an tawlh ru ngei bawk ang. Hmingchhiatna thleng se ka pa hming a chhe bawk ang.


`Ka rawn thleng.....` ka hma a Spi kawrhnuai phelh niah a Noah dawhkan a lo thu mu leh Noah in alo bawh uaih ka hmuh chuan ka tawng lai chu ka tawp chawt a, ka taksa chu a hik chhuak mawp thei.