ECCITATO - 11

ECCITATO - 11


ELTY LUHLUL AUG HNAMTE


NOAH POV*


Kawngka a ka nupui rawn lut ka hmuh rual chuan ka insiamtha hman tawh lo. Hrep tak hian! A mitmeng a maktihna te, natna te, huatna te chu ka hmuh hmaih hauh lo. Ka hamhaih lutuk vang nge chetsawn nachang lah ka hre hek lo. Min rawn hmuhdan chu a tuihnai lo takzet a ni.


`Rs...` kawngka lam pan a chak tak a a tlanchhuak chu ka au tuarh a, mahse a ding lo. Ka hma a Spi inphelh darh nuaih chu ka vai kiang lawp a, ka nupui tlanchhuak chu ka umzui nghal.


Kan office gate thleng chuan ka tlanchhuak a, khawiahmah hmuh tur a awm lo. Ka mangang leh beidawng lutuk chu ka hma a bawlhhlawh bawm chu ka chhuih pawp a, enge ka tih tak ang? Kan nupa in hmalam kan panchho ve tan a, ka nupui lah min duhna sa nei miah lo mahse a pasal ka nih ang in nupui ten pasal te lak a an tihtur ang zawng zawng tih loh a nei miah lo. Ka hmangaih a ni tih hi ka la hrilh ngai lo, mahse ka chezia ah erawh ka tilang hreh ngai hauh lo thung.


`Alo kal ka ring miah lova` ka room-a ka let leh chuan Spi chu alo in ha tha thlap tawh a, diktak chuan hnek chawrh ka chak ber.


`Khatiang thil kha vawikhatmah tih tum leh tawh ngai suh ang che` ka aw chu a ngainatawm hauh lovang. Tipawh hian ka inthunun hram hram a ni.


`Mahse ani nen khan inhmangaih a innei pawh in ni lova, apa rosum i duh...`


`Ngawi hmak rawh` ka au thawt a, kutthlak lo turin ka insum nasa teh e.


`Kawngka kha chhuahna tih i hriat ka ring` ka chair-ah chuan ka thu hnak a, tunah tak hi chuan ka hma a lehkha pawimawh, ni lo, engkim mai chu vai chhiat vek ka chak ber mai.


In ka thlen chuan alo reh thap a, ka nu hna thil ah a zin a, a pension hnaih tawh avangin tunlai chu a zinkual nasa thin viau. Choka-ah ka lut a, Liani pawh a awm lo. Sitting room lam ah ka phei a, tumah an awm chuang lo. Ka dar ka san uk a, kan room ka panchho zuinghal.


`Bawihi, kha kha...` ka nupui tukverh bul a ding ngawireng chu ka pan a, ka lut thawm ah pawh a rawn hawi eih lo.


`A ngai lo ve. Engkim hi duh i neih vang a ti i ni. Mahse hre rawh, engmah hi ka lak atang leh ka pa lak atang hlawkna i hmu ngai lovang` a din ngai rengin a ding a, a thusawi chuan min thawng em em hran lo. Spi alo che hman a ni tih ka hrethiam.


`I ngaih ang kha engmah a awm lo` ka coat hak ka phelh a, sofa-ah chuan ka thu a, engtinnge ka hrihfiah ang ka hre lo takzet a ni.


`Engmah sawi a ngai lo. Chuan, a hma ang bawkin ka then dawn chuang lo che ania. Uire na hi ngai a ka neih thiam erawh a tha khawp ang` a rwn inher a, a hmel chu a dam thlap a, mahse chumi kar a a rilru sak tak erawh ka theihnghilh hauh lo. Tunah hian hrilhfiah dawn ta ila a ngaithla hauh lovang tih ka hrechiang a ni.


.


RSI POV*


Ka thil va hmuh khan min thawng lutuk kha tawngchhuah mai nachang ka hre lo. Noah hmel pha dui leh Spi intithei hmel ka hmuh chuan ka harhchhuak zawk a, chak zetin Noah room atang chuan ka tlanchhuak a,khawilam nge ka pan pawh ka ngaihtuah lo, ka hma ah chuan ka tlan pawp pawp ni berin ka hria. Thui tawk ke a ka tlan hnu ah ka ding a, ka rilru fim nan thawk ka la kawk kawk a, kawng a kal ve te chuan min en duh hlawm viau tih ka hria, mahse ka ngaipawimawh lo. Ka mitthla ah Spi kawrhnuai inphelh niaih hma a Noah mitmeng hur zet kha a lang chiang ngang mai. Ka ten lutuk chu kan uak leh pawp phawt a, mahse chutihrualin ka thinlung chhungril ber chuan ka pasal chu ka hmangaih a ni tih a hre tlat thung.


In ka thlen chuan kan nula in apitei a damloh thu leh damdawiin a a awmthu te, riahpui tur an awm loh thu te a sawi chuan riahpui tur a a kal theih thu ka hrilh a, a lawm viau mai. Damdawiin a riahpuitu neih loh hi a hrehawm ka ring thin, chuvangin anipawh ka kaltir a ni. Zing ah pawh chaw eikham a lo haw mai turin ka hrilh a, a tan zingkar a lo haw kha a chakawm ngawih ngawih dawn loh miau a ni. Bakah a mizia in a zir bawk a, ka duhsak ve viau a ni.


Noah lo haw chuan ka rilru a fim hman tawh a, tunah chuan engvangmahin ka rilru pek leh ka tum tawh lo. Ka pa rosum duh vang a min neitu hi hremna pe lo va chhuah ka tum hauh lo. Chutihrualin ka nu ka tihnat tel a ngai tur erawh hrehawm ka ti lawk viau a ni. A inthlahrun hmel ve duk a, mahse engahmah ka ngai bik lo. Inthlahrung awm a ni. Kimkimi pawh kha ka pa a chhuanlam nangin ka ring zo ta meuh lo.


`I pasal hi i tihlim zo lo anihchuan ka kut ah dah mai rawh` ka hma a Spi ding chu ka melh ngar a. Vawiin hian Noah thawhpui pakhat nupui neih ni a ni. In ah meuh kal ve tur a min sawm tlat avangin chawlh ka la a, Noah rualin ka kal ve ta nge nge. Hetiang vel a kal hi ka thil peih loh zawng tak a ni.


`Pasal te pawh ni lo tihhlim tum a buai sek hi nula tan a mawi chiah em tih ngaihtuah ve chhin teh` ka nuisang a, kan bulhnai ah tumah an awm lo. Inneih zawh ah chaw ei a ni nghal a, chaw eikham ah thian tha zual party na ah Noah ngenna in kan kaldun leh a, ka hnial vel peih lo.


`Mahni pasal te hlimna pawh pe thei lo nupui nih hi a zahthlak zawk viau lo maw?` a heh sen vam ham chu a khi ve sak a, khalehchen a bikbo hnu a a rawn lang leh anihchuan tum engemaw tak a neih ngei pawh ka ring, chutah Noah a rawn zuan lehnghal chat bawk.


`Mipa chu sakeibaknei ang an ni a, a hma a i dawrh reng te chuan mualphona an tan engmah a awm ve lo, hmeichhe tan erawh a zahthlak zia haider i duh leh duh loh a ni mai` ka bul a thutna awm ah chuan ka thu a, ani a zahloh a hnu zah chhan tur ka hre hauh lo.


`Midangin an tawmpui i remti ah ka ngai e` tih pah chuan a inher a, ka chhang zui peih lo. Remti in remti lo pawh ni ila a thleng tur chu a thleng vek tawh tho a, tu hmeichhia in nge mahni pasal te midang tawmpui duh tehlul ang? Eng ang pawhin huaisen mahila ka dan theih loh thil anih miau avangin enge ka tih chuang ang?


Inchhung lam boruak ka tem peih loh avangin pawn ah chuan ka thu ta reng a, favang a intan tawh a, boruak pawh a nuam in a dai dap a, thla eng riai chuan ka awmna bul a thingkung chu a rawn chhun sung a, hetiang hmun hi keichu nuam ka tih zawng tak ania. Duhdan tak phei chuan earphone in zai ngaithla ila a mood a chen a nuam zual.


`Hetah nangmahin maw?` lo ti tu lam chu ka hawi vat a, Micky a ni. Ani hi vawikhat chiah ka la hmu, kan in a chaw an rawn ei ni khan, mahse a hmel erawh ka chhinchhiah chiang viau. A chhan chu bmipa ngainatawm leh rilru tha tak ni a ka hriat vang a ni.


`Inchhung boruak ai chuan helai hi a hahdamthlak zawk ka tia` ka lo ti tha ve mai a, ka bul ah a rawn thu thla ve nghal.


`Keipawh ri luih luih hi ka ngaithei bik vak lo` a nui hak a, hmeichhe tam tak tan chuan a duhawm ngawt ang. A chhan chu a palian a, a dam duam bawk.


`I nula hruai a khua a har ange`


`Hruai tur neih loh chuan khawhar tur an awm chuang lo` nui hak a a tih chuan ka lo ner nawk. Ani ang mipa fel tak hian a hmu teuh ang tih ka ring tlat.


`KKa awih i....`


`Hlim hmel viau mahula ka lo pawtchat thei cheu ngem?` ka tawnglai pawtchattu ka pasal aw-ri lo chhuahna lam chu ka hawi vat a.


`I duhtawk tawh ami?` hul hak chuan ka lo ti a. Nia, ka be chak hran lo. A hmei nu nen a inhmuh zawh hnu lawk a pasalte hmuh chu tawng dam dap a har a lawm.


`Keichuan duhtawk e. nangni zawk?` a aw-ri ah chuan lungawi lohna a nei tih hai rual ka ni lo. Mahse a chhan erawh ka hre hran lo.


`I duhtawk chuan kan haw thei thihna anih chu. Micky, kan hawsan phawt ang che. Remchang ah ila rawn leng dawn nia` tih pah chuan ka tho zui nghal a, mipa pahnih erawh an ngawireng thung.


`Ani nen khan eng inzawmna nge in neih?` kan haw kawngtluanin kan inbe lo. Mahse pawi tihna pakhatmah ka nei lo. Amah a tawng loh chuan ka tawng chhan tur ka hre nek lo ve.


`I tan a pawimawh viau em?` ka coat hak chu ka hlip a, ka pheikhawk ka phelh zui nghal bawk. A zawhna chu zawhna atthlak tak a ni.


`Eng inzawmna nge in neih ka hre duh` a necktie a phelh a, khum ah a vawm phei zui nghal.


`II hriat duh chuan amah kha zawt la ti nia` ka puan bih chu ka phelh a, ka thlep pah mek bawk.


`I hnen atang ani ka hriat duh` tih pah chuan ka puan thleh lai chu a rawn phihthla lawp a, chhuat ah avawm hlawm nghal hmak bawk.


`Enteh, nangpawhin i duh duh i kawp thei a, keipawh chutiang ang chiah chu` engvang a thudik hrilh mai lo nge ka nih ka hre lo. Mahse ka thinlung ah chutiang a sawiduhna chu a lian zawk tlat a ni.


`Thlah nghal ang che` a thinrim insum hmel hmuh chu nuam ka ti tlat pek. A hma ang chu ni se hlauhna ka nei ngei ang. Mahse a office a Spi nen ka hmuhdun hnu kha engmah hi hlauh tur ka hre tawh lo, a thinrim ngei pawh.


`Chuzawng ka thu thu` tih pah chuan ka puan, chhuat a a paihthlak chu ka chhar a, thlep tha in inbual turin bathroom lam ah ka luhsan zui nghal hmak.


Khami ni atang khan kan nupa nu chu sawi phak bakin ahahthlak zual a, ka nu pension thlahna chaw eikhawm ni kha a rual a kan nuihdun leh awmchhun a ni. Chupawh a der vekin ala ni zui a. Mitin mahni hna ah ve ve kan kal a, keiaiin a haw hmasa tlangpui. Ka nu erawh chuan engmah a hrethiam lem lo. A pangpar huan a buaipui em em a, ka rinaia a tuipui avang chuan ka lawm phian. Noah erawh in ah a awm tam vak lo a, a awmchhun ah erawh ka nu nen an inkawm tam viau thung. Ka nu nen an inkar a tha chho ta chu ka lawmpui viau, a chhan chu hun an nei rei tawh dawn lova, keihian nakin lawk ah ka pasal tenawm tak hi mualpho takin ka la siam dawn a, chumi hun ah chuan ka nu hi a kehsawm ve thung dawn a ni.


`mate, in pa a zin ami?` Ruatkimi a ni. Nimin tlai ah kan pa a zin, hna thil anih thu a sawi bawk.


`Aw, tinge?`


`Aaaa, englo, i whatsapp msg lo en teh` a tih chuan ka whatsapp ka en nghal a, Ruatkimi photo min lo thawn chuan min ti phu chiang kher mai. Ka pasal ngei chu khum nawm hmel zet ah thawmhnaw mumal pawh ha lovin Spi nen an mu a, an chauh dun hmel em em bawk.


`I hmu tiraw?`


`Ummm...` ka aw-ri chu a chhuak chang chang. Ni e, inhal in hmeichhia a kawp tih hrereng mahila mit a han hmuh meuh chuan dang a ro halh thei.


`I tha em?` min ngaihtuah hmel tak a a rawn tih chuan ka nui hak a.


`Ka tha. nakin ah ka rawn be mai ang che` min chhanna pawh ka nghak hman tawh lo, phone chu ka off hmak a, ka dawhkan ah chuan ka bawk a, ka chau takzet tawh.


`Hello` ka pasal phone chu hmeichhia in a rawn la a, mahse Spi aw-ri a ni hauh lo.


`Khawnge ka pasal?` ka thinrim ka insum hram hram a ngai tih ka hria.


`Aaaa.... Englo, ihhhh...`


`Tu nen nge an awm?` ka aw a dam dap a, mahse chumi phen a engpawh ngam tu ka nihna erawh a hriat theih ka ring.


`Ka pi, englo ania, Spi nen hna pawimawh an sawidun a, tihbuai a rem lova` bah nawk a a tih chuan ka sa pap thei. thil pawimawh! Ka nui hawk.


`Tunge i nih?`


`Asawmi ka nia, nakin ah an zawh hun ah ka lo hrilh mai dawn mi?` ka hriat ngai mi a ni hauh lo.


`Aaa... Ngai lo mai. Ka lo phone tih hrilh kher a ngai lo. nNakin ah ka rawn be mai dawn nia` tih pah chuan phone ka off hmak a, khanu kha tunge ni ta ang?


Ka hnunglam a min kotu lam chu ka hawi a, Micky lo nui var var ka hmuh chuan ka nuihlet vat a.


`I bazar elaw?` tih pah chuan min rawn pan phei a, nizan ah Noah zin alo haw a, sangha a ei chak thu a sawi avangin hna ban ah bazar ka kawi a ni. Haw viau mahila hremna ka pek tuar tur a a taksa tal a fit that a ngai miau a ni.


`Nia, enge i tih ve zawk?`


`Khulai deuh ah khuan ka client pakhat ka hmu lawk a. Scooty i keng ami?`


`Keng lo. ka tlan loh ni a nia`


`Anihchuan ka rualin lo haw la, i hman tawh chuan. Inveng ah lehkha lam tur ka nei a` a tih chuan ka hnial lo kher mai. A chhan chu ka nu fruits ei tur ka lei nual bawk nen, ka rit reuh phian a.


Micky chuan kan inkawt thleng min lo thlah a, thingpui in tur a ka sawmna erawh haw tlai lutuk dawn a a inhriat avangin min hnar thung. Ka bazar ho chu ka khai a, inchhung ka luh chuan Liani`n min lo chhawk vat a, ka nu erawh inchung ah a awm ngei ang. Noah alo haw tawh tih pawn a a motor awm avangin ka hre thung. Liani chu ka nu pangpar chi pek chhoh a ngaih avangin inchung ah min chhohsan vat a, Liani inchung chho tur leh Noah choka rawn lut chu an inpel a, keierawh ka thil hawn ka en vat thung. nizan alo haw pawh khan vawikhatmah ka be lo, ka luak a tichhuak ngawih ngawih tlat a ni.


`Tupawh kawp dawn la, mi pasal kher chu kawp lo teh` chair pawtchhuakin a thu a, a thusawi avang chuan ka then sak thung. Micky hi mi pasal a ni tihchu ka hrechiang khawp mai. Kan inngaizawng emaw a tihna hi ka lawm ah a tla thung. Micky hian a hriat hun ah a lawm lo viau angem tih erawh ka ngaihtuah ve thin tho.


`Nula mahin mi pasal an kawp duh a hnu a pawina vak a awm ami?` ngaipawimawh lo zet chuan ka thil lei ho chu ka dahfel a, a rum nghut ah chuan a lawm lo hle tih ka hria, amhse ka hlauh chhan tur ka hre bik tlat lo.


`Ka sawi hi zawm rawh. Nula chu nula, pasal nei lai nen a tehkhin chi a ni lo` dawhkan a chum dap a, a tawngkam chuan min ti thinur ve thung.


`Ani ai chuan min lo dahhniam hle a ni maw?` ka thinrim avnag a ka aw khur dar dar chu ka thup thei thlawt lo.


`Ni lo, ani nen a tehkhin chi i ni lo ka tihna anih chu`


`A tawk. I hmei nu aia i dahhniam hi engvang a min then mai lo nge i nih?` ka insum thei tawh lo. Ka chawhmeh dahthat tur chuan ka vawm a, alo thle zauh a, ka nu te that ri in a zui nghal.