ECCITATO - 12

ECCITATO - 12


ELTY LUHLUL AUG HNAMTE


`Eng thil nge i tih?` ka nu mitmeng chu ka mo hnu a ka hmuh vawikhatna.


`Nu, englo....`


`Kha kha pasal te tihdan tur ni in i hria em?` hrehawm ka ti tak zet a ni.


`Ka tihpalh lutuk. Ka...`


`Ilo hetih vang hi anih hi i pasalin a lerhsan tak che ni` ka nu thusawi chuan min deng na dawt dawt ngei mai.


`Ka nu` Noah chuan a ti tuarh a, mahse ka nu chuan a fapa chu a hmachhawn ta ran mai.


`A tawk. Engkim ka hre tawh. He i nupui nasa tak hi engvang a nei nge i nih ka hre vek tawh` ka nu mitmeng min huat hmel tak chu hmuh ava hrehawm tak em! Ni e, kan chhungkaw buaina avang a a fapa duhlai hetiang dinhmun a a awm ta mai hi nu tan chuan tawrh a har khawp ang. Mahse engtinnge a hriatchhuah theih?


`Ka nu, hei hi chu kan nupa kar a ni` Noah chuan vin miah si lo, fiah tak si chuan a ti nghauh a, sawitur reng reng ka hre lo. Engkim hian min surprise a ni ber mai.


`A tha e. Mahse heng chhungkaw laktlak loh tak lak atang hian inthiarfihlim la ka duh ani` ka nu chuan a ti lehnghat a, min rawn melh a, tenawm min tih hmel zet chuan a ner nawk bawk. A duat nih a nuam a, a huat nih hrehawm dan tur zia chu hun reilote ah chuan ka hrethiam nghal vek.


`Rs, room-ah lo han chho rawh` Noah in a tih chuan naupang thuawih thei ang maiin ka kal nghal nal nal. Ni e, ka nu awmdan khan min thawng a, sawitur reng reng ka hre lo.


Darkar chanve vel zet hnu ah Noah a rawn lut a, keierawh ka awmngaiin tukverh bul ah ka lo la ding reng thung. Ngawirengin khum ah chuan zangthal zawngin a rawn mu a, a thawkhalh dan ah ka nu nen an thu a in rem lo anih ka ring nghal hmiah.


`Khawi atang nge a hriat?` ka rilru a awm hmasa ber chu ka sawichhuak hmasa ber.


`Amah zawh mai a tha zawk ang. I ril a tam tawh em?` a thusawi leh kan mood inhmeh lo lutuk chu ka nui chhuak hawk thei.


`Min then i duh vangin i hrilh a ni tiraw?` ka thusawi chuan min ti tlawm vawng vawng teh e. Mahse chumi bak ah chuan ka nu in a hriat theih dan tur ka hre miau lo a ni.


`Ka ti hauh lo mai. Tin, then tumna che ka nei lo` ka lo ner nawk. Ka pa ro chu alo awt hle anih dawn hi.


`Sum tam tak i thawk chhuak a, tinge midangten hah tak a an thawhchhuah...`


`Hah tak nge thianghlim lo tak`


`I ngaih ngaihin ngai la, a bultanna chu lo thianghlim lo pawh ni se tunah chuan hah takin alawm an thawh` ka pa nunhlui chuan zahna min thlen nawn leh ta! Mahse he mihring hma ah hian zak ang a awm erawh ka tum hauh lo. Ka pa chuan a nupui fanau ei hmuh ve a mi awt lova an awm loh nan a theihtawp a chhuah a, tihsual a nei palh a ni mai. Anierawh chuan a nupui hmuh lai ngei pawhin hmeichhe dang a awmpui a, a hmeichhe kawp ten zahna an nei miah lo bawk.


Ka nu in min huatzia a tilang mawlh mawlh a, Noah nen lah kan inbe ngai mang lo. Kan inchhung chu sawiphak bakin a hrehawm. Mahse pawnlam ah erawh awhawm tak kan ni thung. Kan boruak chhia hria ni awm takin Spi lo len zauh zauh a ngam tan ta bawk. Ka nu a be tha thiam a, a mak ka tih chu a nu nen an rawn lengdun ngam chu a ni. An rawn lendun tawh chuan kan nula in thingpui a lum ngai lo, ka nu in keimah kher min tir a, ka hna kalloh ni lah hi an han hre thei em em lehnghal.


`Naktuk kha Spi nu birthday an lawm dawn a, Bawiha, kan nufa in min rawn sawm a` tlai chaw ei lai chuan ka nu chuan a ti a, keihi awm va ang pawhin min en ngai tawh lo. Ni lo, min haider lui zawk a ni.


`Ka hman ka va ring lo ve. Rsi nen tihtur kan lo nei a` makti zet chuan ka en a, a mit min lo siai khum. He mihring nen hian tihtur kan neih ka hre lo. Sawrkar chawlh ni mahse kei ka chawlh a ni ve lo. Private-ah ka thawk miau a, mahse saturday leh sunday erawh ka chawl thung.


`Mahse...`


`A pawi lo. Kaldun rawh u, keini chuan nakin ah kan tidun thei tho alawm` ka lo ti vat a, Noah chuan min rawn melh hrawk a, ka hmu lo der hmak thung.


`A that chu. I duh chuan ipa te in lam ah i ei thei tho a` ka nu chuan alo ti vat a, Noah tan hnialna hun a awm ta lo.


`A ngai lo ve. Mahni in tluk a awm hleinem` ka lo ti vat a, ka nu chuan min melh zawk a, mahse a hawisawn leh vat thung.


Nileng chuan ka rilru ah Noah a awm nileng thak. Engvang a ka nu rawtna kha hnial a dawtsawi nge anih ang? Ka nu nen kan inmil ta si lo a, tlem talin min khawngaih ve pawh a ni mahna. Ka hna ka rilru ah a lut lova, min lo biak rinna ka nei tlat a, ka phone ka bihsek a, mahse a hnen atang phone call emaw, msg takngial pawh alo thleng lo. Keihi engvang a beiseina nei ve ngawt nge ka nih ka hre lo. Ka lu ka thing nawk a, ka mawl zia ka inhrilh a, keimahin ka nuichhuak hak ringawt.


Ka hna bang chu bazar ah ka kawi a, ka rinloh lutukin ka bialpa hlui, thian ang a ka kawm tak, tun a Rural bank a Manager hna chelh lai mek nen kan inhmu a, ka high school boyfriend thin a ni. Thingpui in pui ah min sawm a, hna kan ban hma avangin ka hnial lem lo. Bakah ka tihtur ka ti zo tawh a, in a haw ka chak em em hran lo. Kan chhungkaw boruak chhiat zual atang khan ka hna bang hi bazar ah kawina ka zawng ngei ngei. Diktak chuan thian ka nei lo lutuk hrehawm ka tihchhan ber a ni. Ruatkimi ni se fa a pawm tawh avangin leh mi in a mo anih ve tho avangin va kal sek nuam ka ti lo. Bakah anni nupa inngeih tak kar a kan nupa hlim lohna te, kan chhungkaw hlim lohna te va sawi kha nuam ka ti thlawt lo. Anizawng a vannei a, a pasal chhungte alak ah an tha a, ka awt ta fo mai. Ka nu khan khang thil a hriat hma kha chuan keiaia vannei an awm ka ring lo hial thin a nia, tunah zawng hremhmun temlawkna a ni ringawt tawh.


In ka thlen chuan pawn ah Noah motor ka hmu a, mak ka ti deuh. Sana ka en zauh a, tlai lam Dar 5 pawh ala ri lo. Inchhung ka lut a, alo reh thap. Sitting room lam ka phei tlang a, Liani`n TV alo en a, min hmuh veleh a ding nghal vat a, mahse buaipui ka ngaih loh thu ka sawi vat a, room lam ah Noah a awm thu a sawi chuan ka dar ka san zauh a, engmah sawi lovin room lam ka pan chho nghal.


`Iva lo let hma ve` sofa-a thu chungin TV alo en a, ka bag ken chu a dahna ah ka dah zuinghal.


`Vawiin a i chhuahpui kha tunge?` ka kawr ka phelh lai chu ka chawl dat a.


`Opa nih kha. Min hmu ami?` ngaihsam hmel zet chuan ka ti liam puat a, a rum dat ri erawh ka hriat hmaih lo chiang ngei mai.


`Pawn ah mipa zui tawh suh. I duh anihchuan hetah lo kal in inkawm mai rawh u` ka nui hawk a, a thu chu ka zawm dawn lo tih ka chiang.


`Hetah emaw, khawi hmun ah pawh ka duh duh ka kawm thei. Ka nun a ni` ka pheikhawk bun ka dahfel zui nghal.


`Tunbak hi ka sawi lovang. Pawnlam a mipa dang nen ka hmu leh che u anihchuan tunge inih theihnghilh thak khawpin ka siam ang che u`


.
.
.
.
.


`Lalruatsang, hetiang hi ani maw i pasal a nu i zah dan lantirna` ka nu aw fiak thak ka hriat rual chuan ka ding chawt. Ka hna bang ka haw kan room lam ka pan tur a ni. Min haw viau mahse hetiang em em hi chuan min la vin ngai miah lo.


`Enge thil awmzia?` ka hawilet a, a ding a, a taksa khur dar dar dan ah chuan thil pawi engemaw tak a awm ngei tih a hriat. Angaihna erawh ka hre hauh lo.


`I hria em? Noah hi apa fa a ni lo tih hi engvang a Facebook a tidarh nge i nih?` a thinrim lutuk chu a tawngri hleithei lo. Keilah mi a ang maiin ka hawibuai. Ni lo, dawt a ni.


`Ni lo. Chutiang....`


`Dawysawi buai tum suh. Hetiang em em a hmeichhe rapthlak hi i nih ka lo ring ngai lova, tenawm lutuk. I hria em? Ka fapa chuan min chhuahsan tak hial hi. Nang hian enge hetah ila tih, ka vuak chhuah hma che hian chhuak nghal rawh` ka nu mitmeng chu ramhuai mitmeng nen danglamna ka hmu lo. Hmangaih tak a min en thin tu kha ava danglam tawh tehreng em! Noah, ni lo, khawnge a kal ang?


`Khawnge Noah chu?` ka aw chu a ri chang chang a ni. Engkim mai hi mumang ang ruaiin ka hria a ni ber mai. Noah pa chu tunge ni ta ang?


`Nang ramhuai vang hian engkim hi a chhe zo tawh. Ka fapa nun i tichhe zo tawh a ni` ka nu tawng chu ka hre ruai ruai a ni ber mai. Ka ngaihtuahna a vai a, ka bul ah enge awm ka hre hek lo.


AFTER 2 WEEKS...


`Mami, engemaw tal ei tum teh?` kan in ah ka let leh tawh a, ka nun chu a mumal lo piah lam a ni. Ka hna ka bansan a, khawlai ah ka chhuak ngai lo. Chaw ka ei thei hek lo, ka nu anhla zawng zawng te kha ka beng ah a ri nawn awn awn reng a, Noah lah biak theihin a awm hek lo. Vawi tam tak biakpawh kan tum a, mahse tumahin kan be pawp thei lo. Ka mang a ang a, enge tih tur lah ka hre hek lo. Ka nu leh pa theihtawpin hma ka sawn nan a beitu te ka tibeidawng bawk. Ni e, inhua in, inngeih lo leh inbe ngai lo pawh ni ila ka pasal ani miau a, bakah ka chhungril hian a hmangaih takzet a ni. Engtik atang a intan nge anih ka hre lo, mahse hei erawh ka chiang, thehhmeh ang hmak a a bo tak ah hian ka hmangaihzia ka inhrechiang tulh tulh a ni.


Chanchinbu tin phek hma luahtu chu Mizo advocate lar leh tha bo thu a ni ta. Ngawirengin ka hma a chanchinbu chu ka melh a, ni e, a manganthlak a ni. Ka nu rilru tur ka ngaihtuah a, ka lainat takzet. Noah bo thu ringawt a ni lova, a bo chhan pawh a nupuiin a nu thuruk, Noah hringtupa kha Noah in apa ni a a hriat thin kha apa anihloh thu a tlangzarh vang anih thu a inziak tel kuau bawk.  Kan chhungkaw hmachhawn tur chu ka rin hriat theih nghal. Ka nu leh pa tan zahna lian tak ka thlen a ni. Mahse facebook chungchang te, Noah pa chungchang te engmah hriat ka nei hauh lo.


`Kan inkawt ah chanchinbu mi tam tak an awm a, zawhna zawh che an duh anih hmel` ka pa chu ka room ah a rawn lut a, a hmel chu ka hmu tar bawih thei. Ni e, kum upat lam a an thil tawn hi a harsa lam deuh bawk a ni.


`Ka tihpalh. Keimah vangin...`


`Ni lo ve. I tihsual engmah a awm lo. Intifai la, chak tak a i awm a ngai tawh. Tin, i pasal ngei pawhin a mamawh tawh ang che, hetia i awm reng zawngin a tha ngai lo ve` ka pa in a tih leh chuan dik ka ti viau mai.


Kan chhungkua chuan mualpho vawihnihna kan tawk leh ta. Tun tum zet zawng ka nu a che mah mah ta a ni e. Dan ang a inthenna engmah kan la nei lo, bungrua ka la duh bik lova, mak a kal turin ka pasal a awm hek lo. Ka pa nunhlui rawn phawrh kher hi chu ka ngawi mai thei dawn ta lo. A duh chuan keimah min bei rawh se, a pawi ka ti lo. Mahse ka pa nunhlui phawrh zawng a a che erawh keimah min hmachhawn tak tak tawh ang.


`He inchhung ah hian tihtur engmah i nei lo` ka nu nen chuan choka ah kan inhmachhawn ran a, hlauhna pakhatmah ka nei lo.