ECCITATO - 8

ECCITATO - 8


ELTY LUHLUL AUG HNAMTE


Ka intifai zo ka let leh chuan a phone hmang pawh alo zo tawh. Nichin lawk a inpawh tak nupa nun hmangdun kha ka ten ngawih ngawih a ni ta ber mai. Ngawirengin khum ah chuan ka mu a, anipawh a mood a danglam leh tawh tih a ngawih ngul dan ah a hriat theih. Nupa nun hmang zo hlim lo ber kan ni hial awm e.


`I pasal hi a kal thui mah mah tawh lo maw?` Ruatkimi chuan phone call ah a rawn ti a, ni e, ka hria. Kimkimi nen langsar takin an inkawp tawh miau a ni.


`Ama thu a ni e` ka thaw halh a, ka thiannu ber pawh a rawn tawngchhuak ve tawh anihchuan ka hriat aia nasa hian a thang ngei ang.


`Nangmah i tha em?`


`Ka tha. Engtiknge i neih dawn khah?` nau a pai ve tawh a, a rit tawh bawk nen kan inhmu khat khawp mai.


`Thla leh mai a ni tawh. Min rawn awmpui ve ang chu` diktak chuan ka awt a ni. An nupa hausa lua lo mahse an hlim em em a, Noah in naute neih a rawt lai khan lo hnial lo ta ila tunah hian keipawh ka nei ve tep tawhin ka ring.


`Tehreng mai` ka ti sap a, ka awh zia hria se chuan min lainat ve tho in ka ring.


Vawiin chu ka nu in bazar lam ah a damdawi en pah a chawhmeh bazar tur a min tih avangin ka insiam mawlh mawlh a, ka pasal lah zingkar ah a chhuak daih tawh. Driver ka nu in a mamawh avangin a hruai a, peih lo viau mahila scooty ken ka ngai ve ta nge nge. Ka nu damdawi tur ka lei a, chawhmeh ka bazar zawh hma avangin haw nghal mai ka peih em em hran lo. In ah khawhar zetin ka awm leh anga, chu ai chuan ti in ka sam te khawih ka lo duh ve deuh tawh bawk nen, ka nu parlour duh ber SANGSANGI BEAUTY PARLOUR lam pan chuan ka inkhalh phei ta zawk.


Hun ka ngah angreng phian a, ka chawhmeh lei lah siam nghal tur a ni lo bawk nen, ka hmanhmawh lem lo khawp mai. Duhtawk a ka intihnalh zawh emuh chuan khua a thim la, lek elk tawh a ni. Ka nu ka phone vek tawh tho avangin ka rilru pawh a hahdam. Noah chu zanlai vel ah bak a rawn haw leh chuangin ka ring lo. Nupa inbe tlem ber thlang dawn se pakhatna kan hauh ngei ang. A tul tawp ah lo chuan min be ngai lo a, kei phei chuan ka be hmasa ngai mang lo. Pawisa ah erawh ka duhtawk hman turin ka account ah a dah tawp zel thung. Hmanna tur erawh ka hre viau lo. Ka nu erawh ka tan ala tha reng a, min hmangaih tih ka hria, kan in lam a let ka duh chang apiangin ka nu ka ngaihtuah a, zan a amah chauh a TV a en tur te, kan in lian leh reh tak a mahni a a chetla tur ka ngaihtuah apiangin hawsan thei ka ni lo tih ka inhrechhuak ziah. A fapa laktlak loh zet hian a nu hi hmu in enchiang se, a hmeichhe kawp leh avang a a chhiat chak zia hi a hmu thiam tur.


`Chu chen chen khawnge i chhuah?` in ka thleng ka thil hawn ka dahfel zo room ka lut chho chu ka rinloh lutukin Noah alo haw ve tawh tlat.


`Pawimawh ah ka chhuak` ngaipawimawh lo zet chuan ka bag ka theh thla a, khum ah chuan ka thu a, ka pheikhawk ka phelh zui nghal.


`I pasal hnathawk lo haw lai a in a awm loh hi pawi i ti lem lo a ni maw?` TV a en a, min melh chuang hek lo.


`OOOhhh.... Kimkimi bul ah i awm khaw tlai leh ka ring a` ka nui hak a, ka thin a rim miah lo.


`Awm ila hetah ka awm nang. Naktuk ah kan office ho in picnic kan rawt a, kawppui te hruai tur ania` a sawichhan ka hre lo. Keichu min hruai ka beisei lo tawp. Kal chakna pawh ka nei hek lo.


`Anihchu` ka dar ka san ak a, inbual turin ka inbuatsaih zawm nghal.


`Zing ah thawh hma a ngai ang. Tuichenna thawmhnaw i keng dawn nia`


`Maw?` makti zet chuan ka en haw a, keimah hi min hruai a tum tihna em ni? Ka hresual ani hial ang. Kimkimi alo lan hnu hian keihi engahmah min hruai chhuak ngai lova, an thawhpui pakhat, a thianpa ni bawk kaisan an lawm pawhin kei ni lovin Kimkimi zawk a hruai a, FB lam ah pawh a lar viau anih kha, ka nu ngei pawhin Noah a khak hlak bawk. Mahse engahmah a ngai lo thung.


`Ka kawppui ka hruai loh in tunge ka hruai anga` a ti nghut a, a TV en lai ala en ngar thung.


`Kimkimi i hruai dawn lo mi?`


`Ani sawitel a ngai lo` tih pahin a tho a, kawngka lam ah a chhuak zui nghal hmak bawk. Ngeiawm lutuk. Ka kal hlek lovang. A duh duh a a kawih kual tur ka ni bik lo chiang emai.


Zan ah pawh mak tak maiin a chhuak lova, ka nu te nen kan 3 in TV kan en a, ka nu nen erawh an inbe miah lo. Ni e, ka sawi tawh kha, Kimkimi a kawp leh atang hian ka nu hian a be ta miah lova, kei erawh min en dan a dang ngai lo. Kan in pawh em em a, ka hawsan a hlau tih pawh ka hria. Haw chu ngaihtuah fo thin mahila haw tumna tak tak ka nei lo. Ka pasal in a nih miau avangin he in hi ka in a ni. Inthen a duh anih pawhin ka pawm mai dawn hauh lo. Kan chhungkaw buaina avang a innei mai mai mahni ila Hmingliana te ho an reh hmak a, ka phirpui lah a rukin zawng ve tho mahila ka la hmu der lo thung. Rosa pawh a reh hmak bawk.


Zing ka harh chuan ni alo lang iarh tawh a, ka bul a Noah muhil sak sak chu ka en a, a chang chuan nupa inngeih tak nih ve hi ka chak thin. Mahse keiaia thlan a nei a, bakah inngaizawng ngai miah lo kan ni bawk nen, ka tan nupa hlim tak chu van a rah ang a ni. Kimkimi lah zahna nei map lovin ka pasal a zui deuh reng bawk.


`Min en reng dawn ami?` a muhil emaw ka tia, a rawn tawng thut ah chuan ka phu nasa ngei mai.


`Dawn lo` tih pahin ka tho nghal vat a, bathroom lam ah ka lut chhunzawm nghal.


Chaw ei tur a ka han koh chuan alo tho chhuak ve tawh a, zingkar thingpui in hman lo a thawh hi a inhmeh lem lo. Vawiin hi sawrkar chawlh a ni, nidang chawlh ah pawh zing hi a tho tlai ngai meuh lo. A chhuah hma dawn pawhin a in hram zel. Tukin chu a inthlahdah ve deuh aniange. Chaw ei tur a kan kil thap lai chuan picnic tur hrereng in ka nu hnen ah ka pa te in lam a kal ka ngaih thu ka sawi a, ka nu in rem alo ti nasaa mai. Noah erawh a chaw ei lai chu a ei malh malh a, engmah a sawi lo thung. Min hnial miah lo chu ka hawihai letling zawng. A chaw ei lai a ei zo a, ngawirengin a tho a, ka nu in mitmeiin min rawn zawt a, ka lu ka lo thing thung. Diktak chuan min hnial se, ngeiawm tak a ka kal dawn loh thu ka hrilh ang chu tihnaklaiin engmah a sawi lo chu a lunghnur leh viau thung.


`Ka rawn haw hma lovang` chaw eikham a room ka luhchhoh chuan alo insiam mawlh mawlh a.


`Ok, keipawh chaw ka ei nghal ang. Zan pawh ka riak thut mai thei`


`Chaw chu i ei thei ang. Riah erawh a theih loh` a ti nghut a, a ding a, min en nghal bawk. Hlauhna engmah ka nei lo.


`Ka thu thu. Nangpawh i duh duhin awm rawh, kan nun ah hian inrawlh lo ve ve ila a tha` a mit ah tak ka en siah a, a hmel insehruh tlat ah chuan ka ti thinrim tih ka hre nghal. Keierawh ka lawm ru phian thung.


`Enge i duh?`


`Engmah. Kan nun ah ve ve inrawlh lo ve ve ila a ni mai` tih pah chuan ka thawmhnaw hak tur chu ka la chhuak a, amah dodal ngai lem lo thin kha ka danglam thut chuan a ti hamhaih ve ani ngei ang, a thaw hawk a.


`I duhdan anih chuan le` a ti ta nghut a, a mizia chuan min ti hamhaih ta fo mai. Picnic ngaipawimawh lo a ka awm tawh hnu ah tunah heti hian a awm leh a, chu chuan min ti thinur hial zawk.


`Ka duhdan ni lovin i awmdan vang zawk a ni. Khanu kha i tan eng ang fakau a hlu nge? A kalsan tawh hnu ah che pawh nupui i neih hnu ah ila um duan duan a, ka ten lutuk che` ka au a ni ber. Ni e, kan nupa kar hi siamthat ka duh alawm. Ka duh takzet, mahse min hlat tlat a, keiaiin a hmangaih hmasa a buaipui zawk a, a nupui ni chung a pasal khawih theih miah loh, ti ti pui theih miah loh, hmeichhe dang buaipui tlat neih chu a tlawm thlak vawng vawng asin. Kan bultanna chu engpawh lo ni rawh se, nupa nun thlengin kan hmang dun tawh a, ka thianghlimna pawh ka remtihna tel hauh lovin min laksak a, mahse abak erawh min hlat tlat thung si.


`I duhtawk thei tawh em?` a thin a rim ve lo va, a lungawi hmel chuang lo. Tawngka vin erawh a hmang lo thung.


`Aih, duhtawk lo. Nang mihring ka ten lutuk che. Ka hua che` mahni tlawm intihna nen, lo induhtawk ve tak thin thinlung kha a chhuak ni ber in ka hria. Ka insum thei thlawt lo.


`Duhtawk rawh` tih thawt pah chuan min rawn pawm bet a, ka ka a hup zui nghal. Ni e, vawikhatmah ka nu hriat ah kan la inhau ngai lo. Min pawmbehna atang keiin talchhuah ka tum, kan insual a ni ber mai. Mahse kei ang nu lian lo tak hian ani ang pa lian tawk tak hi hneh ngaihna a awm lo. Ka tha a zawi thleng rak min pawm bet a, ka zawi hnak ah chuan khum ah min theh thla a, ka thlan a sa phang thei.


`Hmeichhe kawlh lutuk` a ti sup a, amah pawh chu khum ah chuan a rawn letthla zui ve nghal. Ni e, anipawh a hah ve ang, ka tha tawp a bei ka nih miau avangin a tan pawh tha sen a ngai ve miau a ni.


Ka pa te in ka thlen phei chuan ka nu leh U Partei leh ka vahpa an awm a, ka U erawh ka pa puiin dawr lam ah a kal thung. Office chawlh ah chuan ka pa puiin dawr a kal ngei ngei a, pffice kal ni ah pawh ban ah a awm zui nghal thin. U Partei erawh naute ala sen avangin ka nu nen in ah an awm deuh tawp a, kan monu mah ni se kan chhungkua ah chuan ka biak pawh tam ber a ni. Thu pawimawh em em sawi lo mahila chhun ah te ka vahpa thlalak te min lo thawn a, kan inngeih dan em em hi piang hmun ni awm zawk tak kan ni.


`Bawihi, tunlai thuthang hi i hre ve em?` ka nu inchung lam ah pangpar buaipuiin a chho a, a tan chuan a pangpar te hi a khawvel te an ni.


`Min la thehchhuak em hleinem` kan pa leh a bialnu chungchang bawk. Ka hne viau tawh, mahse chhel tak a mi sawi hi ka tawrh a ngai tih ka hria.


`A hmeichhia hi ka hriat mi ania. Englo.... kan veng ah an awm thin a, mahse an insawn tawh a` naute tap chu hnute a pe a, ka thaw huai mai. An pahnih chungchang ngaihthlak leh chhiar te hi ka kham ve lutuk. Mahse mi sawi duh chi ber chanchin neitu chu ka pasal a ni miau a, tihsual nei lo mahila pumkhat kan nihna ang in ka tawrh tel ve a ngaihna chin a awm miau a ni.


Nilengin naute ka pawm a ni ringawt. Chaw eikham in ka U in min thlah a tum viau nangin scooty ka keng ve tho a, keimahin ka haw ta zawk. Ka riah tur thu kha ka sawi anngin ka rilru tak tak erawh a ni miah lo. Ka nu khawhar dan tur ka ngaihtuah a, haw pawh ka haw hma reng bawk. Kawng ah ka nu in serthlum a ngainat em avangin ka eli haw pah a, min hringtu ka nu nen ka ngainat dan hi a in ang thuak a ni. Kan lak a tha te lak a that chhuah loh har zia hi ka nu lak atang hian ka chiang em em a ni.


Dar 9 vel thleng ka nu nen TV kan en dun a, mahni mutna lam kan pan zui ve ve. Khum ah keimahin ka thu a, ka khawhar chang a ka khelh thin games ka khel a, Noah lo haw hma a mutthilh hman hram ka duh ber, mahse a chhuak eih lo. Dar 11, ala rawn haw ta chuang lo. A haw tlai tur thu kha a sawi sa nangin picnic ni ah tiang em em hi an awm dawn lo tih ka chiang. Keilah ka mut a chhuak lo tulh tulh. Movie ka en leh a, ka en zawh ah pawh ala rawn ahw ta chuang lo. Zan dang ah chuan dar 12 ah hi chuan a rawn haw tlangpui a, tunah dar 2 a ri thuak tawh, ka awm a nuam tawh hauh lo. Ka phone ang nge phone lovang tih ka ngaihtuah vang vang a, a phone number ka hmetchhuak a, ka cancel leh thin, rilru erawh a nuam thei chuang lo.


Ka phone ri ah chuan ka harh a, nizan khan ka mutthilh lai ka hre miah lo. Zan ti ila zing dar 3 thleng kha chuan ka la meng, Noah ka phone a, a pick up lo. Khami hnu khan ka lo muhil zui ve nghal a ni ngei ang.


`Hello` Ruatkimi a ni tlat.


`Ila tho nange?`


`Nizan ka muhil thei lo a. Engenita zing zing ah?` zingkar ah hi chuan min be khat khawp mai. Ka tho hma lutuk lo tih hi tupawhin an hre vek miau a ni.


`FB-ah lut rawh. News group hrang hrang enkual teh`


`Eng thil nge ni leh ta?` mutchhuah naklaiin chutiang mai mai rawn sawi chu ho ka ti angreng viau.


`Lut rawh. Ka sawi peih lo` tih pah chuan phone a off zui nghal a, ka phun zui hlak.


Peih lo zet chuan ka phone chu ka hawng a, FB ka lut nghal a, ka home page-a lang chu ka meng phar awn thei. Engtinnge he thil hi a thlen theih?