ECCITATO - 9

ECCITATO - 9


ELTY LUHLUL AUG HNAMTE


`SUMDAWNG HAUSA PU LIANMAWIA MAKPA NI LAI CHUAN NUPUI THLAK A TUM TIHNA EM NI?`


A caption atang ringawt pawh chuan ka khur dar dar thei. Thlalak an phochhuah chu nimin lam ami anih hmel, Kimkimi leh ka pasal, inngeih hmel tak a pool kam thutthleng a inngheng rial a an thudun lai a ni. A chhung thu ka chhiar a, ka nghing dawt dawt thei. A bialnu hmasa a theihnghilh theih loh avang a kan nupa in nupa nun pawh kan la hman loh thu te, sumdawng hausa fanu lainatawm ka nihzia leh mi inkar a tlazep ka nihna te, kan inneih zan ah pawh ka pasal chu Kimkimi nen an awmdun dah thu te, an thuchhuah ah chuan thudik aiin dawt a tam zawk. Mahse ka mualphona chu a tih hniam phah chuang hauh lo. Ka kawchhung chu a so bulh bulh ani ber mai, ka phone chu ka switch off hmak a, diktak chuan au nghek ka duh. Mahse au turin ka awrawl ka chhuah thei thlawt lo.


.


Kan room kawngka ri rak ah chuan ka hawichhuak a, Noah rawn lutu chu ka hmu zui nghal. a thawmhnaw atang nizan a rawn haw lo tih hrilh nawn ka ngai hran lo.


.


`Kan inbiak a ngai` a tawng a ring lo a, mahse mahni inrintawk lohna erawh a lang tel ve tlat a ni.


.


`Tunah chuan ni rih lo ve` ka tho a, tunah atak hi chuan engmah sawidun chakna ka nei lo. Tin, inthen a duh anihpawhin tun ah ni lo zawk le. Tun dinhmun ah hi chuan ka sual duh ngei dawn tih ka hria, chu chu ka duh hauh lo.


.


`Kha thil kha....` a aw chu a dam dup, mak ka ti zawk.


.


`A pawi lo. Chaw eikham ah kan sawidun dawn nia` bathroom ah ka lut zui nghal. Rilru fim pu tur in darthlalang hma ah chuan theihtawkin thawk ka la a, social media ah meuh kan nupa kar thuruk thin phochhuah a ni chu ka zak ngawih ngawih. Heta mawhphurtu ber chu ka pasal a ni. Ka haw takzet, ani khan sawiri lo se tumahin an hre ngai lovang.


.


Chaw ei lai chuan ka nu min biakna ka chhan bak ka tawng lo. Noah lah ngawirengin a ei mawlh mawlh bawk. He thuthang hi ka nu chuan ala hre ve lo tih ka hrethiam. Hrilh kher ka tum lo, a thleng tur chu thleng mawlh mawlh mai teh se.


.


`Enge i tih?` chaw eikham chuan room-ah ka chho vat a, Noah lo luhlai chuan ka thawmhnaw chu ka lo thlep fel mek a ni.


.


`I hmuh ang hi a ni mai` ka ti nghat a, thawmhnaw ka la thlep mawlh mawlh.


.


`Enteh, kha thil kha i ngaih ang a ni lo ania` ani leh ni lo ang in a inrintawkloh hmel em em lehnghal.


.


`Enge ka ngaihdam ka hre lo. Mahse then che ka tum lo` ka nui sang a, ka thawmhnaw thleh sa chu ka thawmhnaw bawm ah ka khung malh malh bawk. Ni e, then ka tum reng reng lo, an tan a hnawksak nih hrim hrim pawh ka tum tlat a ni.


.


`Maw?` maktih hmel zet chuan min en a, ka lo nui sak. Mahse a zat vang erawh a ni hauh lo.


.


`Thil sawi nawn reng hi ka peih vak lo. Chuan, hna ka thawk ve tawh dawn tih a hmingin ka hrilh che nihchu` a thaw hawk chu ka hria, mahse ka ngaipawimawh hran lo. Min dal han tum vaih teh se, engpawh ka huam tlat tawh a ni.


.


`I thu thu le. Mahse rilru fim tak hmang ang che` a ti ve mai a, ni e, min hnial ngam lovang tih ka hre miau alawm.


.


Zawhna tam tak ka dawng a, ka chhungte atang ngei pawh. Mahse tumah chhanna mumal ka pe thei lo. Ka pa in ka haw duh leh duh loh min zawt a, mahse ka U in a remti lo bur thung. Eng ang pawhin thup mahila tunah chuan ka chhungte lakah ka zep reng thei ta lo. Nupa pangai ang a inngeih pangai tak a awm ang a min ngaih laiin rinloh lam ah thu a rawn irhchhuak ta sia, ka nu rilru ana tih ka hria, mahse tihtheih ka nei tlat lo a ni. Hna pawh rinloh takin ka hmu ve vat a, Noah in engmah a sawisel lo, ka nu pawhin min lawmpui zawk. Ka nu hi ka khawngaih thin a ni. Kan boruak a hre ve vek, haw lo turin min ti ngam lo tih ka hria, mahse ka haw erawh a hlauthawng tih pawh ka hria. Noah awmloh laiin ka hawsan loh tur thu ka sawi chuan mittui tla zawih zawihin min kuah a, hetiang ang a pasal a nu te nen a inpawh hi Mizo ah an tam ka ring lo, hmeichhe vannei tak ka nihna chen a awm ve tlat a ni.


.


`Rs, in pa te an accident a, an be tlang thei lo che` hnathawhna a ka thawhpui ti ila ka chung ami ani mah zawk, ka thawh tirh atang ani nen hian kan inkawmngeih nghal em em a, nula senior lam tawh, tawng duh leh nuih duh tak a ni. Kan in ah pawh alo leng ve zauh zauh a, ka nu nen an inkawmngeih em em bawk. Mi chanchin a chhe zawngin a sawi ka hre ngai lo. Mi zawng zawng U Puii a ni deuh tawp mai.


.


`Khawi ah nge?` ka buai chuk lo a, ka chhungril erawh a nuam chiah bik lo. Khang boruak chhe zet hnu ah khan Noah nen hian kan inbe tlem lehzual a, in ah a awm tam ta deuh nangin kan awm hun a in ang em em lo.


.


`Insiam la, Ebenezer hospital ah va kal rawh. Khangkha chu ka lo tifel mai ang. Boss alo kal dawn sia, ka lo awm a ngai ang. Nangchu ka lo sawifel mai ang` a tih chuan ka bu nghauh a, a sawifel ngei ang tih pawh ka ring thlap. A chhan chu he company a dintirh atang kan boss hian a rin ber a ni miau a, keipawhin ka hna chungchang ah chuan ka innghahna ber a ni, ka thiamloh zawng zawng pawh ani hian min zirtir vek a ni ber mai.


.


Ka nu ka phone vat a, a aw atang a hlauthawng tih ka hria. Hospital ka pan nghal tur thu ka hrilh a, anipawh a hnathawhna atang Ebenezer a pan ve nghal tur thu a sawi a, ka scooty ka la chhuak a, scooty ka khalh chiah chu ka hlauthawng zui ve nghal. Mahse mahni in control thei lo khawp a buai erawh ak ni lo. Damdawiin ka va thleng chu casualty kawt a ka va thleng chu Kimkimi ka hmu hmasa ber. Ka ner nawk a, ka nu alo la thleng lo.


.


`Ilo thleng maw? Englo ania....`


.


`Ilo awm chu a lawmawm e. In pahnih in a mi?` a tawng laklawh lai chu ka pawtchat hmak.


.


`Aw, hna chungchang ah mi hmuh tur kan nei a, kan kal zo kan let leh lam in a nia, motor hran ve ve kan keng a, amah su tu te kha an tlan tlang daih a, an motor number number ka chhinchhiah hman lova` ka ner nawk mai. Engvang a motor hran a kal nge annih tih ka ngaihtuahna ah a lut nghal zawk.


.


`Noah Lalruatfela chhungte in awm em?` Kimkimi ka chhan hma chuan casualty kawngka atang chuan nurse pakhat rawn dak a.


.


`A nupui ka awm e` Kimkimi che vat chu ka tawng khalh nghal hmak. A nui hak a, lang si lo a indona tenau a ni ringawt mai. Nurse chuan lut tur a min tih chuan ka va lut vat a, damdawiin khum a Noah lo mu chu ka pan vat a, a lu an tuam lak a, a hmai tlem a zawng a khem bawk.


.


`Cabin hi pakhat a awl a, a kawchhung lam hi naktuk lam ah kan enchian a ngai dawn a, ward pangai ah nge cabin lam ah in awm duh ang?` amah en tu Doctor in a tih chuan cabin kan lak tur thu ka hrilh nghal vat a, tunge anih an hria, chuvang a cabin min offer nghal pawh an nih ka ring.


.


Ka nu alo thlen chuan kan awmna tur cabin lam ah kan lut fel hman tawh. Noah erawh ala harh rih lo a, mutna a an chiu vang anih thu nurse in min hrilh a, ka nu lo thlen hnu lawk ah ka chhungte an lo thleng chawpchilh ve nghal. Hrilh nachang ka hre lo nangin ka nu zawkin alo hrilh thu ka pa in a sawi a, ka nu nge nge, puitling zawk tih tak ah ka tluk lo deuh chu a ni.


.


`Nang hian hetah enge i tih ve?` kil khat a Kimkimi lo ding chu ka nu chuan a melh chat a, Kimkimi a awm ve tih ka lo hre leh tawh hauh lo.


.


`Nu, a accident lai a a bul a awm ve ania` ka lo ti vat a, keichuan kaltir mai ka la tum hauh lo. A chhan chu he accident na hi tihpalh anih rinlohna ka nei tlat a ni.


.


`Kan lo tibuai lawk thei che u angem?` cabin kawngka a Police pahnih dinna am chu ka en vat a, ka nu lo thlen hma khan ka phone a, ka kal theih loh avang a ko ka ni. Ka pasal hming ka sawi rualin min hnialna an nei miah lo, kan pa hi mi mai mai a ni lo tih tilang chiangtu ah ka ngai hmak. A vawikhatna atan ka pasal ka hmang tangkai ve a ni mai.


.


`Lo kal ru. In lo va thleng hma ve` ka lo ti vat a, ka nu in zawhna mitmengin min en a, ka nui sak ringawt. Ka nu leh pa erawh engmah an la sawi hran lo.


.


`Nangmah hi em ni Pu Noah nupui chu?` police pakhat zawk, bel hnih bel, hmel patling zawk chuan a ti vat a, a tawngka chhuak hriat a nuam fu bawk.


.


`Aw ni e. Ka rawn kal thei si lo a, in buai dawn nen ka rawn tibuai che u sia, lo thu rawh u` ka lo ti vat a, Kimkimi ka va melh a, a mitmeng ah chuan hlauhthawnna ni awm tak ka hmu a, mahse a hmel ah erawh a tilang hran lo.


.


`Buai lo e, kan hna alawm. Chuan accident lai a awm ve ni awm kha i rawn sawi a, a tu ber hi nge ni e?` a ti dam leh duam a, pa tha tak a nih ka ring ve ngawt.


.


`Keimah ka nia. Englo, hna thil ah Hlimen ah kan kal a, kan haw lam kha ani a hmasa ah a tlan a, ka hnung ah Bolero a rawn tlan a, chak deuhin min rawn lehpel a, chuan Noah motor hi an va su a, a tir chuan a let mai lo, ka hlau lutuk kha ka motor ka din tir tawp a, chuan ka awmna atang a hla vaklo ah chuan an su nawn leh a, tahchuan Noah hian kopang a su a, Bolero chu a tlan tlang nghal bawk a`


.


`Khawi kawng ah nge in haw a?` police naupang zawk chuan alo ti vat.


.


`Ka sawi theihnghilh. Kan kalna ah khan chhun thingpui kan in hman lova, World Bank Road lam ah kal a thingpui in phei tum kan nia` alo ti leh vat a, mahse a chetsualna kha Zampuimanga thlan thlen hma, Saikhamakawn lam road ah a ni thung.


.


`Anihchu. Bolero number chu i chhinchhiah hman lo tihna maw?` Police upa zawk chuan a ti leh nghut a.


.


`Aw, englo, ka hlauthawng lutuk kha number chhinchhiah lam ka ngaihtuah lo hrim hrim a` Kimkimi chuan a ti leh vat a, Police naupang zawk chuan Kimkimi chu a en chik hle tih ka hre thei.


.


`Nihleh i hriat hmasak berin tunge i hrilh hmasak ber?`


.


`Aaaaa, englo, Rsi hi biak ka tum a, ka be tlang thei lo a, a thawhpuinu ka phone a, chuan hospital ah ka tlanpui nghal` mak ti zet chuan ka lo meng. U Puii min hrilh hun leh ka damdawiin thlen hun ka ngaihtuah a, U Puii a phone zawh ah chak tak pawhin tlan pui se keiaia thlen hmasak theihna chance a awm in ka hre tlat lo.


.


`Aw le. Pi Ruatsang, abakchu kan office lam ah kan la chhunzawm leh dawn nia` tih pah chuan paper pakhat min pe a, Police leh Kimkimi inbiak chhung zawng keini ho kan tawng lo. Paper ah ka hming ka sign a, Kimkimi chu a tul thut a koh theih tur a lo awm turin an hrilh a, a phone number an la bawk a, an tihtur an tih zawh chuan dam vat tur a duhsakna min hlan hnu chuan min chhuahsan zui veleh nghal.


.


`Ka fapa damdawiin ilo hruai thleng a, ka lawm e. Tunah chuan hetah tihtur i nei tawh lo, min lo va hawsan tawh mai rawh` Police te chhuah hnu chuan ka nu chuan Kimkimi lam hawi chuan a ti chang fak a, a hmel chu ka khawngaih letling zawk. Engmah sawi tawh chuang lo chuan a kal chhuak ta nal nal a, kei erawh ka ngaihtuahna a buai ve det. Kimkimi khan thudik thup a nei tih ka ring nghet tlat.


.


Noah ala harh har dawn tho avangin ka nu chuan ka mamawh va la turin min ti a, amahin a tir chuan riah a tum zet a, kan nupa boruak a hre ve vek a, a inthlahrung tih ka hria. Mahse ka riah tur thu ka sawi tlat avangin alo harh hma a ka mamawh lam turin min ti a ni. Hmanhmawh zetin ka tlan haw a, ka rualin ka nu leh pa an kal ve nghal bawk. Tih theih em em a awm lo a, anni pawh ka let leh hun nghah an duh viau nangin in ah U Partei te nufa chauh an awm avangin ka nu in a tir haw lui ve tho a ni. Damdawiin ka thlen let leh hnu chuan ka nu chuan min hawsan veleh nghal a, zing ah erawh chaw min rawn kentur thu a sawi a, a ngai ka ti viau lo nangin a rilru dam nan ka hnial lui duh ta lo.


.


Noah alo harh chuan ka lo muthlu lek lek tawh. A taksa che hrut ah chuan ka meng vat a, sana ka en nghal a, dar 11 rik nan 10minutes ala awm.


.


`I tha em? Na i nei em?` ka lo ti vat a, a chet zawng chuang a then sak bawk.


.


`Ka tha` tih pah chuan dawhkan a tui awm chu ban tum in a che a, rangzetin ka lo ban khalh a, bottle chu hawngin ka in tir a, buaipui ngai a a awm chu a inhmeh chiah lo tih ka ngaihtuah a, ka nui sak ringawt.


.


`Chaw i ei em?`


.


`Ei e. I ril a tam em?`


.


`Tam hran lo. Ka tibuai hle mai che` a tawngdan chuan min ti awm nuam bik lo.


.


`A ho lutuk. Na i nei lo tak tak maw?`


.


`Nei lo e. Kimkimi...` a harh chauh a, a nupui in a enkawl a, mahse a bialnu a lam hmasa leh ta tho a.


.


`A haw tawh, kohsak tur che in min duh em?` ka ti nghat a, ka aw ah erawh ka lawm loh zia a hria ang, ka thup buai peih lo.


.


`Ni lo e. Kimkimi kha Hmingliana boss anih kha`