HNAM DANG (Short Story)

Ka phone a music chu ka ngaithla kual a, ka hla duhzawng ka dahkhawm chu ka ngaithla malh malh a,ka mu chu ka mit ka chhing diar diar a, ka rilru chuan nunhlui a chhuilet a, tleirawl pakhat vang a ka then tak, ka bialpa hlui chu ka ngaihtuah a, kan inthen dawn khan na kan ti  ve ve. Mahse ka rilru kha ka siamfel thlap tawh a, thutawp ka sawi dawn khan ka tawng buai miah lo. Na ti viau mah ila midang ten kan inkar a inrawlh an ngam chin tawh ah chuan  tuemaw zawk zawk kha inrawlh ngam in kan khawsa tihna ang ah ka ngai. Kha hmeichhia khan min tawng khum ngam dan ah ka bialpa pawh a dik bik lo ah ka ngai nghal hmiah. A chhan chu hmeichhe luck lo ngawih ngawih ka ni bik lo. Min be ve neuh neuh tu awm mahse tumah beiseiawm in ka siam ngai lova, ngaihzawng nei lai ka nih thu ka sawi mai thin. Harsatna ka nei ngai lo.

Ka la na alawm, ka theihnghilh theih mai ka inring hran lo nangin kan pahnih a kan hla duh em em thin ka ngaihthlak leh chiah hi chuan ka la dam loh zia ka hrechhuak thar leh ziah thin.

Chumi vang erawh chuan hnungtawlh tumna ka nei chuang lo. Ka hmalam ka pan lui ve tang tang zel tho. A nui hmel ngaihawm tak te chu ka mitthla ah alo lang a, ka duh loh avangin ka lu ka thing sawk a, mitchhing reng chung chuan ka nui lui sak a, hei hi amah ka mitthla a a lo lan apiang a ka tih thin dan ani. Ka hla play chu ka next a, zai vak vak ka duh a ni. Chu chu ka lunglen apiang a ka tih thin dan ani.

' Bawihdeee, ka tihsual ah min ngaidam tur in ka ngen ngam lo che. Mahse keimah vang in intina lo la, ka tihnat che avangin min haw rawh. Ka hmangaih chu ala ngai reng'

Chu voice messege chu ka ngaihthlak apiangin ka tiril hi a khur thin ani. Ka tho tharh a, ka earphone chu ka dah a, woofer ah ka phone chu ka fit ang sauh sauh a, ring lutuk maiin hla ka play a, ka zai ta vak vak a, thenawm te chuan mak min ti ve khawp ang. Mahse thenawm

phunchiar lo tak an nih avangin min sawisel chuang lovang.

In a tawm reng chu rilru a hrisel lo duh ka tih avangin ka insiam malh malh a, kal tumna em em pawh ka nei chuang lo. Chhuak ve phawt ila, hun khawhralna mai tur chu a awm leh mai ang chu. Ka jeans kekawr lei thar chu ka ha a, adidas t-shirt ka lei thar tho chu ka ha a, ka vans, jeans puan tho chu ka bun a, darthlalang hma a ka in en chu ka lungawi tawk viau. Ka mit ka hnawih dum lo erawh ka lan mak deuh avangin ka inhnawih chawp leh zawk a, ka lungawi tawk veh vawh khawp mai.

Kan in bul kawngpui ka chhuah thlak chuan ka hawi kual a, rickshaw tlan lai chu ka melh kan a, a chhan chu circle bul a stand awmna ami te hi kan chuan thanna an ni tlat. Kan tan an   rinawm em em bawk. Ka ban ka phar zauh a, kalna mai tur hre hawt lo chuan ka bul a   Rickshaw a rawn din dat chuan ka lut nghal a, ' Sanjay Uncle, City Center Mall-ah aw' ka tih chuan a bu nghauh a, ka earphone chu ka beng ah vuah in hla ka ngaihthlaksan lehnghal. Biak lum lam vak a mamawh loh ang bawk in keipawn ka mamawh lo bur.

Ka kal tumna ka thlen chuan Mall kawt ah chuan ka ding vang vang a, Pantaloons vel a discount vel enkual chu ka tum ta. Movie en dawn ila mahni chauh chuan ka peih lo. Luh chiah veilam   ah chuan Pantaloons a awm a, ka lut zui nghal. Thawmhnaw ka enkual diat diat a, lei tumna  em em ka nei hran lo. Mahse ka kawr duh tur chi a awm anih chuan lei ka hnial hran lo.

Hawikual vual vual chung chuan hmeichhe thawmhnaw an zawrhna lam chu ka pan a, tuemaw  hi ka su chawrh a, en mang hlei lo chuan ngaihdam ka dil a, ka kalsan zui nghal. Vai pakhat nen kan insu palh ve ani mai. A hmelchhe awm tho emai, ka en buai peih lo.

'  Excuse me, Miss' ti tu lam chu ka hawi a, ka ning thin. An customer care tha lutuk hi ka ning thut thin. Mahse an fakawm ka ti. Mizoram nen ka khaikhin ru fo.

'  What?' tih pawh a min be tu ka en chu Lalpa leh! Ava han chhelo chiang tak! A hmel chu a vai viau lo a, mahse a hrisel hmel in a mitmeng fiah kak mai chu a nalh takzet.

'  Hei i thlauh a' tihpah chuan ka purse chu ka lam ah a rawn lek a, ka thlauh tih pawh ka lo hre miah lo.

'  Ooohhh... Thanks' tih pah chuan purse chu ka ban ve nghal a, a kuttin fai zia pawh ka hmuchiang tawp. Ka nui sak a, ani pawh chuan tawi te in min nuih a, a biangsum lo lang zeuh chu a inhmeh kher mai. Vai thenkhat ang lo in masala rim a nam hlek lo tih pawh ka hnar ka   len ruk atang in ka hre mai. Min be zui chuang lovin min kalsan zui lehnghal a, a pheikhawk bun pawh a faiin a class viau bawk. A hnunglam atang chuan ka nuih sak a, ka hma a kawr chu ka  en zui veleh nghal tho.

Darkar khat dawn ka in enkual hnu ah chuan kawr 2 ka lei ta hram. Chupawh 50% discount lai ania, ka lei ngam ve riau alawm. Bill ka pe zo a, hmanhmawh lo zet in gate luh chiah a coffee dawr-ah chuan ka lut a, ka duhzawng ka order hnu chuan inchhunglam chu vainu an thut tam avangin nuam ka ti dawn lo tih ka inhrechiang a, pawnlam a thutna an dah ah chuan ka thu a, ka in tur order chu nghah pah in ka phone chu ka hmet niap niap a, facebook-ah lut in Swagliana page ka tlawh a, post thar a awm loh avangin ka out lehnghal. Whatsapp-ah group

ka lut kual zuaih zuaih a, nawina ah ka va nawi zawm ve mai a, thutak group ah ka inla mi tak leh viau. Music group lam ah ka hla duh ka va request nghal zat bawk. Music group hi ka ngaina em em, a chhan chu admin leh creator an fel a, kan hla request hi min pek loh an nei ngai  mang lo. Tin, Mizo tawng ziah dan ah tan an la nasa em em a, hei vang tak hian nuam ka ti zual.

Ka coffee alo thlen chuan ka in malh malh a, sana ka en zauh a, ala hma bawk a, muangchang in haw ila, Big Bazaar lam ah engemaw enkual leh ila ti chung in ka coffee chu ka in pawp a, a lo sa hrep. Ka lei kang chu ka chhuah deuh a, ka hnunglam a nui ri ka hriat chuan ka phone ka hmet a, camera chu selfie lam a dah pah chuan ka han en a, nichin ami bawk kha ka hnung chiah thutna ah chuan lo thu in min lo nuih a, ka zak kher mai.

'  Mahni a ngaihtuahna hmang veng veng chi i nih hmel riau' nui hawk hawk chuan ka thutna  hma a chair awm ah chuan a rawn thu ve nghal a, nidang ang chu ni se, ni lo, midang chu ni se ka hau leh ngei ang. Mahse hauh nachang pawh ka hre lo.

'  Hi, Manish Choudhury ka nia' tih pah chuan a kut a rawn phar chhuak a.

'  Nutei Renthlei' a kut chu lo vawn sak ka tum lem lo. Vai thenkhat hi chu an zia ka hre ve viau tawh. Mizo mizia nen an mizia hi a in ang lo tlat. Friendly tak a an bul a awm chi ani vek kher lo tlat.

'  Khawi atang nge?' a dar san ak chung chuan a kut chu a la let a, ka nuih alo za ru tlat pek.

'  Hla tak atang' ka chhan dan chuan a nuih a ti za nge a nui hawk a, mahse ka lo nuih ve lem loh avang nge a nui tawp chat a, uluk zet chuan min melh a, ka zam ve lek lek.

'  Lehkha zir in nge hnathawk in nge lo zin mai mai?' zawhna a ngah hle mai. Zawhna ngah lutuk mihring hi ka ngaina hlawl lo.

'  A engemaw ber kha ani mai' ka lo ti leh hmak a, chutah zet chuan ani pawh a inthlahrun hmel ta viau mai. Mahse pawi tihna pakhatmah ka nei lo.

'  Sorry, ka tibuai che anih chuan min ngaidam dawn nia. Ka thutna lam ah kan let ange' tih pah chuan a tho a, mahse a mitmeng chu lungawi lo mitmeng a ang ka ti. A hawiher, a incheina leh a tawngkam chhuak, a aw phawi atang mi hnuaihnung tak anih loh zia chu ka hrethiam ve. Kei ka lo induh ve larh mai bawk ne, a lungawi lo anih pawh in a awm tho e.

'  It's ok' ka ti sap a, ka coffee in chu ka chhunzawm lehnghal hmiah. A thutna a a let hnu chuan phone a hmang a, a bialnu erawh a biak loh hmel. Hna chungchang an sawi rik ka hriat chuan  ka beng a verh riau. A chhan chu an company sawi hming chu ka awmna khua a company thar deuh, ti ila kum 1 vel chu ani tawh. Company thang chak leh India ah na na na chuan mi hriat hlawh ve tawh tak a ni. An product pawh ka hmang ve ta nual a, make-up lampang vek a ni.

Ka coffee ka in zawh chuan ka tho a, min en reng tih pawh ka hria, mahse ka en lo lui ve  hmak. Chhelo viau mahse ani buapui hman ka ni lo. Coffee dawr atang ka chhuah hnu chuan rickshaw ka la a, Big Bazaar lam ka pan zui nghal. In ka thlen meuh chuan tlailam dar 5 a ri thuak tawh. Rawng ka bawl a, mahni a awm hi a chang chuan a awlsam viau rual in a khawhar thlak tih chang ka ngah mai. Ti ti pui tur awm miah lo chu ka zai leh luah luah zel mai chu  ania.

Mizoram a ka chawlh hmang pawh ka let leh tawh. Ka hna ka zawm fel leh tawh a, hunawl neih a har leh ta viau. Vanneihthlak tak in ka chawlh hmang haw khan ka vawi tam tak mahni a min tah tirtu lak ah khan ka rilru ka siam peih et awt phah a, ka hlawk haw khawp mai.

Karkhat ah vawikhat chawlh ka nei a, ka chawlh apiangin Mall-ah kal in zawn bik nei lovin zawn erawh ka nei ru ziah thung si. Kha mihring kha anih ngei ka ring. A chhelo em alawm.

'  kum 1 a liam meuh chuan ka hmu leh hlawl mai che' rawn ti tu awri chu ka hrechiang kher mai. Puma show room-ah ka zing tlan pheikhawk tur ka enkual lai tak in ala ni zui.

'  Eeehh.. Aaahh... Nia' ka ti bah nak a, a nui hmel chuan min fiam a chak tih a tilang. Tinge hepa hma ah hian ka laih tlat zel ni.

'  Min la hria ang tiraw? Nute Renthlei' Ka hming a rawn sawi chuan ka phu nasa lutuk. A hre rei kher mai.

'  Aw, hria a. Mr.Manish Choudhury' ka tih chuan a lawm hmel kher mai.

'  Perfect girl. Coffee kan in dun thei angem?' a tih zawm zat a, hnathawk te chuan min en duh hlawm nasa mai. Manish lah chu an ngaihsan hmel bawk sia, VIP ang mai in an en in ka hria.

'  Sorry, Doctor in coffee in lo tur in min ti a' ka tih chuan mak tih hmel zet in min en a.

'  Why?'

'  Heart problem ka nei a, insum ka ngai a' ka ti ve mai. Hetiang hian tumah ka hriatchian loh lak ah ka natna ka sawi ngai miah si lova, keimah ngei pawn mak ka in ti zawk.

'  Ooohh... Sorry. Nihleh lunch tal chu kan ei dun thei ang tiraw?' a ti lehzel a, tinge min hnaih a duh tlat chhan hi niang? A hmel en in kei aia hmeichhe nalh leh tha tam tak a hmu dawn sia. A sawmna chu han hnial vak dan ka hre tawh si lova, lunch chauh te chu keipawn rem ka ti ve mai.

Ka pheikhawk lei tur bill kan tihfel chuan ani pawh chu a in lei nual a, chhawng chung lam a

restaurant ah chuan kan inzui chho nghal. Amah a palian sia, a fresh bawk si, mi reng reng chuan min en duh hlawm kher mai. Mak deuh mai chu vai dang te ang lo tak in a dress a simple in a western tlat. Mizo duhzawng nen pawh a inmil hle. Half-pant hring duk a ha a, T-Shirt var, a hlaf-pant mil zet a in print a ha bawk. Vans, a thawmhnaw mil tak a bun bawk a, a body a nalh bawk sia, hmuh a nuam tak zet a ni.

Restaurant chhung kan luh chuan a kal thang hle tawh tih hriat tak in hnathawk te chuan min  lo welcome tha hle a, thutna bik a nei tih pawh hnathawk pakhat in min hruai dan ah a hriat theih bawk. Kan eitur kan chah fel hnu chuan kan ti ti dun a, keipawn a hma ang lo deuh in a zawhna pawh ka chhang ve ta e. Amah pawn a chanchin te min hrilh ve a, company pakhat a a thawh thu te a sawi a, a hma daih a a phone hman atang a company hming a sawi erawh ka lo theihnghilh hmin leh der tawh.

Hemi hnu atang hian phone number te in pe in kan in be ve ta zauh zauh a, mipa smart tak a  ni. Ngaihzawng lam chanchin kan sawi ngai lova, mahse kan lengchhuak dun ve zauh zauh thung. Hnamdang anih vang hian a chang chuan biak tlem te ka duh a, mahse inngaihzawnna lam kan sawi ngai miau loh avang in han kawm tlem chhan tur vak a awm lo. Ngaihzawng neih leh hi ka inpeih tawh chiah em ka inhre lo a, inpeih leh tawh pawh ni ila hnamdang nei tur in   ka rilru ka siam lo. Kum 1 dawn chu thian kan ni ve ta, chumi chhung chuan thil tam tak kan ti dun a, ka mamawh laiin min phatsan ngai lo. Mahse kan hnathawh chungchang hi kan sawi tlem em em thung. Kan offday-ah hun kan hmang ral dun a, a chang erawh chuan a hna thil a a zin avang in keimah chauh a chawlh hman chang pawh ka nei. Kan hman dun tawh chuan khawimaw lai, dawr thar emaw, eitur tuina hmun ah kan kal a, Car chhung ah thu in kan zai  dun vak vak thin. Thian tha tak ani ka ti ngam sak.

Zawi muang in ka nunhlui ngaihawm loh tak pawh in min kiansan ve zel a, hmeichhe inkharkhip tlat thin kha Manish puihna zar ah hmeichhe harhvang leh rual kawm nuam ti tak ka ni leh ta! Facebook leh whatsapp lam ah pawh ka regu leh viau tawh a, Manish hian nun thar tam tak  min pe ani tih a inhre hauh lo. Mhase min pe miau ani. A nundan simple leh changkang tak, smart tak hi ka ngaina tak zet a ni.

'  Nute, naktuk khi thian kan nih champha vawikhatna ania, chawlh i la thei angem?' Manish chuan a rawn tih chuan ka lo hre ve lo hrim hrim tih ka hre chiah. Ka thianpa hi chu tlukloh rim ava nam bik thin tak em!

'  Ok. Ka thawhpui te ka lo dil anga, chawlh ka lo inthleng pui mai dawn nia, an remtih chuan' ka tih chuan a kuk raih a, hetia lawm avang a a kuk raih hian ka lawm tlat zel. Mipa naupang ang mai hian a awm leh thin.

'  Nihchuan ni 2 law law dil la'

'  No. A theih loh. Ka hna vang aia pawimawh thildang a awm thei lo tih ka hrilh che kha' ka ti vin thak a, a nui kur kur a, hetia min chhaih thinrim hi a ching em em. Keilah hi ka sawi tawh ang bak a awm duh miah lo ka ni bawk a, ka thinchhe bawk si hi min chhaih kawlh fo thin reng ani.

'  Ok. Anih chuan zan ah hna ban ah ka lo lam ang che. Manas Resort-ah celebrate ang' a tih chuan ka tim det. Manas Resort chu a to tih ka hria. Vawi 2 ka kal tawh, chupawh ka thiante lo zin in kal an tih tlat avang in ka kal ve a, nuam viau mahse kei inhlawh chawp tan chuan a to mah mah hret a ni.

'  Hmun dang ah a theih loh ami? Bakah zan riah kher chu mi ngaihdan a dang thei' ka ti bauh a. Dawt ka sawi lem lo bawk.

'  Oh... C'mon, hahdam rawh. Room hran ve ve ah kan awm dawn. Tin, hmun hran ai chuan a nuam zawk bawk. Keiman ka tum vek dawn' a tih chuan nuam ka ti lo lehzual. Mi neih ring a kal ka duh hauh lo.

'  Nangman i tum dawn chuan nangmah in va kal rawh' ka lo ti hmuk a.

'  Hey, ka sawi awmzia chu tun tum chu riak chhuak a kan chhuah dun hmasak ber leh kan inthian thatna champha ania, keiman tih vek ka duh a' ka thinrim hlau zet chuan a rawn ti leh a, a sawi awmzia chu ka man vek. Mahse ka ngaihdan ka sawhsawn chuang lo.

'  Anih chuan kan inthian thatna chu nangma mawhphurhna bik ani lo. Intum sem ang' ka tih chuan a thaw hak a, a chang hi chuan luhlul mah mah min ti ve fo.

'  Thil pakhat ti ang. 70% ka tum anga, 30% tum la. Tha em?' a tih chuan ka ner sak a.

'  Aih. 50-50 lo chuan ka duh lo' ka ti leh talh.

'  A theih loh. A chhan chu ka surprise dawn che a ni. Chumi chu ilo tum ve a thiang lo' a tih chuan hnial chi ni in ka hre ta bik lo. 30% tum ve chu ka remti ta hram.

Kawng tluan chuan tawng kan inchuh leh a, kan zai bawk a, hetiang em em hian hnamdang  mipa hi ka kawmngeih ka inring ngai lo. Mahse ka kawmngeih ta miau sia. Mihring hian hma hun kan hriat loh zia chu Manish nen thian kan nih atang hian ka chiang lehzual. A hmun kan thlen chuan mahni room ve ve-ah hnathawk ten min hruai nghal a, tun tum chu ka thian te nen kan thlenna room ang lo tak in a privacy hrep. Lal in te pawh a ang ka ti rum rum mai. Ka room tur a kan luh chuang ka ka ka ang pham ringawt. A chhung chu a ropui mah mah. Ac a awm vek a, engkim a awm vek ani ringawt.

Khum ah chuan ka let nghal tap a, hetiang khum te chu nei ila hna ka thawk thei pawh in ka inring lo. Ka mu reng duh hial ang. Ka phone a rawn rik chuan Manish alo nia, intihfai zawh ah engemaw a buatsaih avang in awmhmun thawmhnaw lutuk lo ha tur a min duh thu a sawi   chuan ka lo aw ve mai a, phone ka dah hnu chuan ka inbual nghal a, bathroom te chu ka inluah tiat vel ani. Bathtub ah chuan inchiah veng veng ka chak viau nangin Manish khan a sawi pawimawh hmel ang reng sia, shower-a ka in phuhtir zuaih hnu chuan ka duhtawk vat a, ka thawmhnaw chu ka inbel malh malh a, ka sam ka tihro lai chuan Manish chuan min lo call leh   a, keipawh ka room ka chhuahsan nghal.

Ka room kawngka bul ah chuan alo ding a, zan dar 11:30 a ri der tawh. Mikhual dang tam zawk chu an room lam ah an awm tawh tih hriat tak in an reh thap hlawm a, thenkhat, nula leh tlangval erawh swimming pool bul ah party tenau an nei tih hriat tak in an lo la ri ve a, mahse bengchheng tak erawh an ni lo. Min kalpui zel a, veilam ah peng in hall-ah min luhpui a, hall kaltlang in Restaurant lam ah chuan min kaltlang pui a, a lai tak ah chuan dawhkan pakhat leh chair 2 alo inhung a, light chu a eng riai riai a, a boruak chu a cool dap mai. Manish chuan ka kut ah a rawn vuan a, mahse ka lawm hauh lo. Hetiang hi inngaizawngte tihdan ani. Thian leh thian inkar ah hetiang ang boruak hi a awm thei lo.

'  Manish, eng thil nge i tih?' ka ti vawt raih a, mahse Manish chuan nuisang in min en thung.

'  Khawngaihin thu phawt ang' a tih chuan hnathawk te 3 lai min vil tur an awm ve bawk avangin thuawih hmel tak chuan ka thu ve mai a, mahse ka lung erawh a awi viau lo.

'  Manish, heng hi chu inngaizawngte tihdan thin a ni. Nang leh kei chu thian kan ni tih kan hriat kha' kan thu fel chiah chu ka ti lehnghal.

'  Nute, reilote chiah min nghak leh thei angem?' a hmel chu a thutak tawh nasa mai. Ka hrethiam lo takzet a ni.

Ngawireng chuan 15mins vel chu kan awm a, Manish chuan tawng tum ang pawh in a awm lo. Keipawh in sawi tur ka hre lo. Sana in zanlai Dar 12 a kawk chiah tih chuan...

'  Happy Anniversary, Nute. Kum 1 lai ka thian tha ber ni a min thlah loh avang in ka lawm e' Manish in a rawn tih chuan ka hamhaih zawk.

'  Happy Anniversary, Manish' nuisang chuan ka ti let ve a, a hma a ka lo lungawi loh rukna chu ka inthiamlo ru viau. Hetiang em em a thian thatna ngaipawimawhtu thian ka nei tih ka lo inhrethiam har deuh a ni.

'  Thil pakhat ka dil thei che angem?' Manish chuan a ti sup a.

'  Tehreng mai' zangkhai vah chuan ka lo ti nghal a, tun ah tak hi chuan ka rilru a in hawng viau tawh a ni.

'  Tun atang hian ka thian chauh ni tawh lovin ka bialnu i ni thei angem?' Manish in a tih chuan ka ka hau ringawt. Ka beisei loh lutuk thil a ni.

'  Manish, eng thil nge i tih hiii?' ka thle haw a, manish chu ka en ngawih ngawih. A hmel ah a ti mai mai lo tih a hriat nasa mai si.

'  Nute, Thla 8 leh ni 13 chhung ka enthla che a, i chanchin ka chhui bawk. Kan intawn atang thla 8 leh ni 14 na ah chiah nang nen kan intawng nawn leh a, tichuan kum 1 chhung i thian ang in ka awm ta. Tun ah chuan i ngaihzawng nih ve ka duh takzet tawh a ni' a tih leh chuan mak ka ti lutuk. Kan inhmuh hmasak ber atang kei hi min lo zir ru char char alo ni.

'  Engvang a min enthla nge i nih?' dam dap in ka ti let a, ka thinrim hran lo.

'  Kan inhmuh hmasak ber kha Pantaloons-ah min rawn su tih ila hria em? I purse i thlauh a, i  hre lo. Ka rawn pek let hnu che khan i mizia kha ka lawm riau a, i mitmeng fiah kak ah khan natna a awm bawk ani. I hnung ah reilote ka kal a, i zai rat rat a, khata i hlasak chu ' The Fool  ' Lee Ann Womack hla kha a ni. Ka hla duh ber thin a ni bawk. Chumi hnu ah coffee dawr ah i hnung ah ka thu leh a, kha hla tho kha ila ngaithla tih ka hria. A chhan chu i beng ah earphone vuah in ila zai pui rat rat a ni. Duh chhan nei lovin i ngaithla ngar ngar lovang tih ka ring. Ka rawn kawm ve dawn che a, min ngaina loh tih hriat tak leh mahni induhtawk tak a min chhan zel avang khan hmeichhe dang aiin i danglam tih ka chiang ngam sak. Chuan, ka vei zui viau che. I mitmeng fiah kak hi ka mitthla reng thin.

Thian kan nih hnu khan ka hloh leh che ka hlauh avang in ngaihzawng ang a biak che ka duh lova, ka thian i nih reng a, ka hnaih reng theih che kha ka duh bawk. Mahse tun ah chuan i bialpa nih ka duh ani' a tih chuan ka thaw hak a, a hmel ka en. Keipawn hmeltha ka ti. Mahse hnamdang ani miau a, ka tan chuan a harsa a ni.

'  Manish, ka ngaina lutuk che. Mahse ka hnam erawh ka hmangaih a ni. Tin, inngaihzawnna ai chuan thian thatna hi keimah ah chuan a thuk zawk a, a hlu daih zawk bawk a ni' ka ti sap a, a hmel buai nak chu ka en a, hrehawm ka ti.

'  Mahse ka then tawh dawn hleinem che. I hnam duh dan ka zawm mai ang' a ti nghet charh a. Nia, a zawm thei em em ang. Mahni tih loh tur sawi chi mihring ani miau lo a lawm.

'  Manish, ka hnam duh dan chu lo zawm pawh ni la Mizo i ni thei miau si lo a lawm. Kan inthian thatna hi eng nen mah thleng lo zawk ang' ka tih chuan harsa tih hmel zet in min nuih a, ka lainat kher mai.

Kum 3 a liam ta, Manish nen pawh thian tha tak kan ni zui zel. Vawiin hi Manish nupui neih ni tur a ni. Lehlawk, Manish hi ngaihzawng a tan ka hnar hnu ah a office-ah min hruai a, tah  chuan LITMA Company owner ani tih ka hre ve chiah. Hetiang khawp a sumdawnna lian nei hi a nundan hi ava simple si em! Ka ngaisang leh sawt a, a thian ka ni thei hi ka lawm. Ka bialpa a  ni lo pawh ka lawm bawk.

'  Hey, i inpeih tawh em?' phone atang a Manish rawn au lang lang chu ka ngaithla a, a phur  hmel em em bawk. Ka lawmpui a ni. Hmeichhe hmeltha leh fel tak nupui a neih dawn avang in. Mahse a hma ang erawh chuan kan inkawm in kan inzui viau thei tawh dawn lo erawh ka lung a leng lawk.

'  Ready tawh e. Duhsakna ka hlan a che' ka ti let vat a, Manish te inneihna hmun tur lam pan chuan rickshaw in ka kal ve nghal. Min rawn hruai tu tur rawn thawn a tum viau nangin ka duh bik lo. Ka lakluh mil tawk rickshaw a kal hi ka zak miah lo.

Nupa thar te chu ka kuah a, duhsakna ka hlan a, an ni pawh an lawm tih a hriat. Midang in an rawn koh ve avang in min kalsan a, mahni te in ka ding a, mahse ka hlim tho e. Ka thianpa nupui hi nge vannei a ka thianpa hi tih erawh chu khuarei ah ala hriat zel ang chu. An vannei ve ve in ka ring. Kei erawh ngaihzawng lam ka la ngaihsak lo tluang zel a, ka hna ah chiah ka rilru ka dah a, Mizoram pawh ka haw zen zen lo. Nula senior hausa nih ka tum ta ber in ka hria. Ka Bawihdeee erawh ka la ngai ve thin reng.

A TAWP E.