I'M WAITING FOR U... ONLY U (Complete)

Ka mitmu lian kelkawl chu ka dum belh hlak a, ka sam dum sei tha tak, a bu tha tak chu ka khuih mam zan a, ka hmui chu lipgloss ka hnawi a, darthlalang a in en pah chuan ka nui suk a, confi zet chuan ka chhuak nghal.

Dawhkan a juice leh fruits inchhawp chu ka ei bawrh bawrh a, ka bag ka ban a, ka hnathar chu ka thawh chak em em vang ni lovin ka nu mitmeng avang zawkin phur viau lo chuan ka thawk  ve dawn ta nge nge. Ka nu hi chu a hneawm chiang alawm. Awm mai mai thei ka nih vei nen a phal thak lo a, ka pa ro min thihsan hian ka awm nuam ve thei tawk. Mahse awmpui neih pawh a phal lo. Nitin lang a lo kal 2 kan nei a, a bak chu zanlam ah chuan tihtur a awm anih chuan keiman ka ti vek ani mai.

Ka hnathawhna hmun ka thlen chuan ka kal hma hle tih ka hria. Ka thawmhnaw ka thlak a, kan uniform zet chu ka va han haw tak em! Ka hnute nalh tak mai a khuhbo hneh kher mai. Bakah   a pum ut a, tuiawm loh ngei mai a!

'  Tahkhan i ding reng dawn nge customer te saw coffe ilo va pe dawn?' chu awri zet chu a! Nia, ka thlen hnu lawk atang customer kan nei nghal a, coffee bar lian lutuk chu ani lo, mahse an coffe hi a tui bakah customer caring ah an quality a sang vah vah bawk a, an buai reng ani. Ka nu coffee dawr ngainat ber leh a thianpa ta ania, engvangin nge min thawhtir tih erawh ka ngaihtuah apiangin ka thin a rim ani.

'  Ka hria. Ka lo kal' melh kawk pah chuan ka kal nghal a, amah lah chu ala nui suk duh chauh lehnghal.

Coffee leh chhang thlum ka pek zawh chuan sana ka en a, ka thianpa biak a hun tih ka hria. Rangzetin dawr hnung lam chu ka pan a, ka phone ka phawrh a, ka thianpa nghal zet, bialnu ngah zet mai chu phone nghalin zan lam a chhuanlam siam tur chuan ka va hrilh nghal a, ka off lehnghal.

Ka phone ka ak a, ka inherchiah chu mipa pakhat, tlangval anih chuan upa lampang tawh, smart zet chuan uluk fahranin min lo melh a, ka phu nasa kher mai.

'  Hnathawh laiin phone khawih phal ani lo tih i hriat ka ring' a hmel ah chuan a lungawi hmel viau loh.

'  Sorry. Mahse tunge i nih a?'

'  Tunge ka nih hrelo staff ka lo nei reng anih chu. I phone kha Manager bul ah dah la, i hna va thawk chhunzawm ang che' a inher vut a, a kal nghal nal nal. Ka va thinrim tak.

Manager chuan min lo en a, a nui sung a, vawm chawrh mai ka chak. Ka phone chu ka ak lui leh ngat a, mahse ka tifuh viau lo.

'  I beng a chhet ami? I phone kha manager pe rawh' ka hnuglam atang chuan a hma a awri bawk kha.

Muangchangin ka hawilet a, min lo melhrun mai bawk si. 'Tunge i nih a? Ka phone hi ka ta ani, i thu emaw, tu thu mahin tu kut ah mah ka dah lovang' ka mize thalo lai a chhuak leh ta. Ka nu chu awm se min sik chiang ngawt ang.

Ka ban ah a phih lawp a, dawr hnung lam ah chuan min pawtchhuak nghal a, ka phu nasa kher mai. Tumah lah chuan min chhan an tumloh hmel bawk sia.

'  Enteh, hmeichhe kawlh hi ka ngaithei lo ania. He dawr neitupa hi ka ni e. Tichuan a tawk em? I phone kha manager i pe dawn nge keiman ka laksak ang che' a awri chu a thinrim pawh a ang tawh lo. A hram ni berin ka hria.

'  Sorry. Mahse tu kut ah mah ka phone hi ka pe lovang. Chuan a tawk em?' ka pa fanu luhlul chhuanvawr hi chuti mai a phone laksak chi ka ni hleinem. '

'  Min hnial suh' a khabe ruh chu a kal talh a, ka mitko ka san ak ringawt.

'  Hnial loh che duh viau mahila ka phone kher hi chu tu kut ah mah ka dah lovang. Chuan, i dawr atang hian ka bang nghal e' ka khabe ka poh vah a, kawngka lam ka pan nghal.

'  I nu hmel chu hmuh nuam iti viau lovang' ka ding dat a, ka nu lam reng reng ka lo ngaihtuah tawh lo.

'  A pawi lo. Min hnawtchhuak daih se ti nia. Nun free tak ka mamawh' ka dawtsawi chu keimah pawh ka nuih aza. Ka nu chuan min hnawtchhuak vaih se chuan ka khawngaihthlak ngawt ang.   ' Iti tak tak amaw?' a aw ah chuan nuihzatna ka hretel thei.

'  Enteh, min nuihzat viau suh. Ka nu chuan min hnawhchhuah phah lovang. Ka phone hi ka nunna ani tih hre tur khawpin min hrechiang' ka nu in ka phone khawih a ninzia hrechiangtu ber ka ni chiang... hahaha

'  I nu in ka bul a a sawidan nen ava inpersan ve. Engpawhnise va haw chhin ta poh che.... I nu awmdan tur hre turin zanriah ka rawn ei hmel bawk a.....' nui vur vur chung chuan min rawn kalpel a, ka va han haw tak. Ka nu awmdan tur ka ngaihtuah a, ka phur chiam lo kher mai a!

 I'M WAITING FOR U....... ONLY YOU - 2

Ka bag ka la a, kan in lam a haw hmasak ai chuan ka thianpa te hnathawhna lam chu ka pan a, ani hi engechang a ka hauh ngam ber leh min duat ber tu ani. Nichin a ka phone ngei mai kha.

'  Hey, i hnathawhna building hnuai ah ka awm. Lo kal nghal rawh' ka phone chu ka off nghal a, reilote ah Lalrintluanga aka Terina chu hmanhmawh zetin a rawn tlan thla a, ka lo la nui vur vur zui!

'  Enge i awmzia? Harsatna i nei ami?' min ngaihtuah hmel zet chuan an ti ve ngei a, ka nuih ati za zawk.

'  Khawi, i in chahbi. Ka hna ka bansan a, ka nu min hauh hma in i in ah ka inla thawveng duh. Chuan savawm i stock em?' thawveng zet chuan ka tawng a, a nui tawp. Hepa hi chuan min hrechiang ve thawkhat alawm.

'  Kha.... strong a awm lo ania. Bakah i haw hun ah i nu in a hau dawn tho che a, in vak suh. Asa leh dawn si' chahbi min pek pah chuan a ner sawk a, ka nu mizia hre tur khawp a ka nu hauh ngun ani ve tho a...

'  ka hria. Thanks, buddy.... Chuan zan ah min haw pui la, mikhual kan nei dawn a, ka peih viau lo'

'  Ka hman lo. Date ka nei. Chahbi chu a ngai ah lo dah leh mai rawh. Tunge in mikhual tur chu?'

  ' Ninawm. Lerha, ti hi chuan kawitin ah fa ila nei duah ang. Ka hnathawhna boss mawle. Ka nu thianpa ania, ka haw takzet. Amah vang a bang ka nia' lei chu ka chhuih a, Terina lah chu a  nuih a zat hmel ngang mai.

'  Hahahaha..... I nu thianpa chu maw? Wow! Ka lo kal peih teuh lo mai, i nu an hla ka ngaithla peih lo' a nui huah huah a, ka ngei kher mai.

'  Hmela, min phatsan dawn amaw? A tha alawm. I savawm chu ka in zo vek anga, i chhuat ah   ka luak vak bawk ang. Chuan ka be leh tawh ngai lovang ch' ka thinrim chuan tihian ka hau vak zel. mahse ka ti tak tak lovang tih a hrechiangtu ber chu amah bawk hi.

'  Hahaha.... Ok2, ka lo haw hma chu lo haw suh. Ka hruai haw ang che. Chuan i kai tak tak hma in i nu chu chaw ka ei ve tur thu hrilh ang che. Chuan, nangmah vangin zanin hian chicks chhelo zet ka kuaithal thei dawn lo tihna ania. A man i pek angai ang' nui vur vur chuan a ti nghal a, ka thawhuai mai. Hepa hian min phatsan ngai lo. Mahse hmeichhia a duh lutuk hi chu ka haw thin.

'  Hna ka neih loh hiiii...... Chaw tam tawk, tui zet i ei anga, kan intlak ani mai' phur zet chuan ka kuah a, hepa ang thian ka nei hi chu ka lawm takzet ani.

'  Chu chauh chu ka duhtawk lo mai thei. Kal rawh le. Music lo play ring lutuk lo la, thenawmte hauh ka tuar peih viau tawh lo ania' ka biang a fawh zeuh pah chuan min nawrsawn hret a, ka hlim takzet. Ka nu in min hau mahse Terina a awm chuan a zia deuh. Ngaihdam min dilsak leh mai dawn ani.

Savawm um 2 ka in zawh meuh chuan music pawh a ring tha ngang mai. Keichu drinks lam ka tih chuan mahni a music ringtawk a ngaihthlak hian nuam ka ti ber. 'I'm not the only one' chu ringzetin ka play a, he hla hian ka tleirawl chhuah tirh a ka ngaihzawng neihchhun, ka rin em em in min phatsantu min ti hrechhuak thin. Ka ruih lai hian ka tahpui ziah bawk.

Ngaihzawng hi 1 chiah ka la nei a, ka ringtawk bawk a, mahse min lo kawp a, ka hratchhuah meuh chuan an lo kalthui mah mah tawh a, theihtawp a pawhlet ka tum pawn awmzia a awm ta lo a, a tawp ah ka rilru zawng zawng sawh danglam a mipa zawng zawng rinlohna rilru min siamsak ta ani. Heta tang hian mipa reng reng hi ngaihzawng en in ka en leh ta lo ani.

'You say i'm crazy

'Cause u don't think i know what you've done But when u call me baby

I know i'm not the only one'

Ka tap pur a, ka va inhmeh tak emmmm........ Kha mihring kha ka hua, ka hmangaih bawk in ka hria. Ka la naupang ve a, mahse ngaihzawng ka nei hma thung. hehehehe

Terina lo haw chuan ka lo inti harh hman tawh a, ka awmdan tur a hrechiang sa bawk a, engmah min zawt lem lo. Ka ruih reng reng chuan khapa bak kha ka ngaihtuah ngailo tih a hrechiang bawk em ani.

'  Hetiang tur hian ka beisei ngai lo che' ka nu hmel chu a alh ani ringawt. Kan mikhualpa alo la thleng lo ani ngei ang.

'  Mahse enge? Ka phone kher kha midang kut a dah turin min ti anih kha' ka diau duh bik der lo. Terina lah a ngawi hmak rih. A tawng ala hun lo tlat ani. Ka dikna ka sawi zawh hun ah ka nu hnen ah ngaihdam min dilsak leh mai dawn ani.

'  I phone vang hian vawi engzatnge ka hauh tawh che. Phone nei lo a awm hi i tan a tha zawk ani' ka nu thusawi chu ka hlauthawng kher mai. Phone nei lo ila ka thi deuhthaw thei ang.

'  Nu Ngaih, Tetei hi chu a a ngawt alawm. Mahse phone nei lo a han awm chu tun ang lai ah a chi loh ang. Mahse Tete, nangpawh inu thu hi zawm la, hna pawh chu thawk leh rawh' ka thianpa min lo chhanna chu ka lawm ru kher mai. Chhan tum a ka an zuau lai chuan....

'  Mi nufa inhauhna kar a lo inrawlh turin enge chnvo i neih?' kawngka lam chu kan hawi rual thap a, kekawr ipte zen chung a kitchen leh sitting room in luh pawhna kawngka a lo ding pa ka hmuh chuan ka rum nghat a, a lo luh lai tuman kan hre lo anih chu.

'  Ui, Ruatkim, ilo thlen lai ka lo hre miah lo a, lo thu rawh. Ka fanu thluak thawl lutuk hi ka lo zilh mek anih hi' ka nu chuan a thianpa chu alo be sawt sawt a, keilahin rum zetin ka lo melh nghal bawk. Terina lah chu a tawnglai tihtawp sak anih avang chuan a thinrim hmel kher mai.  ' Mi in a ngawireng a luh hi a polite loh thlak' ka thutna atang chuan ka tho nghal a..

'  Zothansang, khatiang khan inlengte be tawh ngai....'

'  Nu Ngaih, a pawi lo. Dawr ah khan a mizia tur ka hrethiam vek alawm. Kawngka kik hre thei lo fanu nula i nei hi ka khawngaih che' min tihelna tawngkam chu ka haw kher mai. Ka nu chu awmlo se ka zuan nghal duh ang.

'  Terin, ka room ah awm ang. Movie thar ka nei a, en ang' Terina chu ka kai a, ka room ka pan pui nghawng nghawng a, ka nu chu a thaw hak a, tihngaihna min hriat loh hmel kher mai.

Chaw ei lai chuan hna ka zawm leh tur thu leh lunch break lai anih loh chuan phone reng reng khawih ka tan a remloh thu te, ka thawh that viau chuan thla 3 hnu ah ka hlawh a san tur thu te chu ka nu chuan min hrilh a, kei leh Terina erawh kan ngawireng. Dawhkan hnuai atang chuan ka ke in ka va kheuh thin a, kan inmelh a, kan nui tut tut.

Chaw eikham chuan ka nu te thiandun chu an titi dun a, an inkawm hi an inhmeh hlawl lo. Ka nu aiin a naupang a, mahse a puitlin hmel zawk. An inngaizawng lo tih chu ka chiang, a chhan chu he mihring pa hi ka nu first love ani miau a. Ka nu chuan an vanglai chanchin te a hrilh a, an nuidun nasa khawp mai. Keichu Terina a haw hma avangin computer hma ah ka thu a, ka fb a, ka list ami te status chu ka like kual dun dun ringawt.

Keihi, tunah kum 24 ka hmang mek. Ka nu hian ka pa nen an inneih atang a kum 8 hnu ah min nei chiah a, min duat lo hi kan ti khawp a. Ka pian hian ka nu chu a thi a hul chhunzawm nghal tih ka hre ve...hihihi

'  Tei, i Pa Ruatkima hi i room thlang a room awl ah khan mu ve mai se. Zanin chu kan chelh ange, amah in a awm a, a khua te pawh a har ang. Lo han siamsak la, chuan keini pawh mut zai kan rel ve tawh mai dawn em niang....' ka nu chu ka van ngei tak. Hetiang mihring hi riak ah ka duh lo. Ka hua.

'  Sofa-ah mu mai se' ka sawi tum ka sawi zo hman lo. Ka nu mitmeng ah chuan warning na ka hmu nghal. Ruatkima lah chu alo nui suk a, hmelchhe si.

Ka tho a, ichung ah hmelchhepa mutna tur siam tur chuan ka chho a, ka per ring kher mai. hahahah.... Ka thinrim hrikthlak dan ani miau a...

Ka khum ah chuanka mu meng kar a, thlang lam a mu pa chu muhil thei lovin engtinnge ka siam ang? Ka nu room atang chuan phone hmang pawh ni ila a hriat vak loh. Mahse ka nu bul ah min hek ta se ka chan a chhe dawn si. Ka nu hi chuan nungchang tha ka neih nan min enkawl dan pawh a khauh khawp mai. Mahse ka pa damlai khan ka pa khan min duat sual hman tlat ani.

TTerina ka phone a, ka nui vak vak a, ani lahin ka thil tum alo hrethiam nghal a, kan inbe rei lui khawp mai. A chang leh kan duat kual vel a, kan nui nasa ngei mai.

Ka room kawngkhar kik ri ah chuan ka tho a, kan hawng chu kan hmelchhephaka chu hmel tur ngo hian alo ding a......

I'M WAITING FOR U..... ONLY YOU - 3

'Enge i duh?' kan in ani bawk a, ka hlau lo nasa mai.

'  I bengchheng mah mah lo maw?' a awri chu a bung vut a, ka hlau ve hman tep ani.

'  Enteh, hei hi kan in ani. Chuan, i beng kha hnawh mai rawh' kawngka khar tum chuan ka tawlhhnung hrat a, mahse a rawn pen lut ve nghal.

'  I nu ka ko mai dawn nge ka thu i zawm dawn?' huh! A zaklo ve asin.

'  Enteh, hei hi i coffee bar ni lovin ka in anih hi. Thu min pe lovin va mu teh'

'  Naupang zaktheilo lutuk' a phun sup a, a inher vut a, a hnunglam chu na zet chuan kan melh ringawt pek a!

Breakfast ei tur a ka nu in min kaihthawh chuan ka haw kher mai. Ka mumang ah mipa hmelthat hmel deuh, pian nalh deuh ka hmu laklawh asin le.... Mahse ka nu chu hnial chi ani lo. Mikhual kan la nei tlat.

'  Ipa Ruatkima rual hian kal la, nungchang mawi lo leh zahpuiawm ka beisei nawn tawh lo che ania' hmmm... Ka va peih lo tak em! Hmela lah chu a thil ei lai chiah a ngaihtuah anih hmel. Vawk riltam thil ei te pawh a ang e a!

Kawngtluan chuan kan tawng lova, ka phone ami hla ka ngaithla mai mai a, ka hla duh deuh, Adele-Hello ngei mai. Hna kan thlen chuan ka inthlak sawk sawk a, nimin mai a bang vawiin a kal leh mai ka nih dan ah ka thawhpui te chuan eng tak ngaihtuah ang maw? Kan pu ber rualin ka kal bawk si. Ho emai a, he ramhuai hi an han zah em em khawp lehnghal a!

'  HHna ban ah ka lo sawm kawi ang che. Mi hmelhriattir tur che ka nei' Terina msg chu ka en a, ka nuih aza. Hepa hi chuan kartin hian hmeichhe hrang hrang min hmelhriattir ve ziah.

Thenkhat chu an fel rualin thenkhat erawh min ngaithei lo hmel pu an awm zauh zauh. Mahse chung ho chu min hmelhriattir zawh tuk atang Terina biak an hlawh tawh ngai lo. A chhan chu lo ngaihtuah ve mai ru.....

Hna pawh tha takin ka awm tluan a, mahse ka hne hle. Hmelhriat an lo kal palhin mak ti hmel zet a min en khan nuamlo ka ti lek lek. A chhan chu ka hna hi mi awh em em ani kher lo.

Mahse ka nu in thawk turin min duh miau a, thlan tur dang ka nei lo miau ani.

Hna ban ah ka nu ka phone a, dinner chu Terina nen kan ei tur thu leh ka haw har deuh tur thu ka hrilh a, a tawng ve hma in ka off hmiah. Ninawm, a phun leh dawn a, ka peih lo. Haw hun  ah min hau mai rawh se.

'  Hei hi Mapuii ania, Mapui, hei hi Tetei, ka sawi ve ziah kha ania' ka kut ka pe chhuak a, kan inchibai a, a hmeltha kher mai. A fel hmel bawk. A nui sang a, ka ngainat chi tak ani.

Terina in ah dinner tur kan order a, drinks pahin kan inkawm khawm a, nuam ka ti kher mai. Mapuii chuan Terina nen han awmfal duh hmel a pu hran lova, a chezia chu a high class hle bawk. Terina ai mahin kan inkawm nasa a, Terina pawh a vui lek lek zawk. Mahse a bialnu leh a thiannu, mite tan a ngainatawm loh zet kan han inkawmngeih chu atan hmuh nuam a tling ang. Kei takngial pawn ruih ka hlau ve tlat.

Zan ah dar 10 vel ah ka haw a, ka nu ala meng tih ka hre nghal. Ka va peih lo tak em! Kan inchhung ka lut chu ka tum loh deuh ka hmu. Ka mengphar awk mai!

I'M WAITING FOR U.... ONLY YOU - 4

Sitting room-ah chuan ka bialpa hlui chu alo thu kur a, ka nu nen chuan an lo titi anih hmel. Ka nu hian ka tawrhnatzia min hriatpui vek a, ka lut pawh chu beidawn hmel zetin min lo en ani.

'  Enge i rawn tih dawn?' ka tawngkam chu a ngaihnobei chiam lo tih ka hria. Mahse amah kalsan tur a min tih lai khan ani pawh a tawngkam kha dawn harsa ka tih ber te zing ami ani.

'  Te, ka be duh che' a hmel chu alo cher deuh tawh a, a hmelthatna erawh a hma aiin a zual zawkin ka hria.

'  Hun ka nei lo. Chuan, kawngka awmna lam i hriat kha' ka room lam pan turin inchhung chhohna step ka rap zui nghal zat a...

'  Mate, inleng te chung ah mawi lo tak a awm loh tur' ka nu hi chu han sawisel thin mahila hmeichhe perfect tak ani. A hun ah chuan a in control hneh em em a, a zahawm thlap bawk ani.

'  Ngawirengin ka let a, sofa-ah chuan ka thu hnawk a, ka hma a thu chu ka hmangaih em em thin, mahse hmeichhe dang hnen a min phatsan tu chu ka en ran a, tunhma a ka zahder em em thin ang kha pakhatmah ka nei tawh lo. Phatsantu hi chu ka ten a, ka haw ngawih ngawih ani mai.

'  Ka lo han mutsan ang che u' ka nu chu a tho a, ngawirengin inchunglam a pan nghal a, keini pahnih chu kan ngawi vang vang.

'  Enge min hmuh duh chhan?'

'  Min ngaidam turin ka ngen ngam lo che a...'

'  Ngaihdam theih loh thil iti miau a' a tawng lai chu ka lo pawtchat nghal a, mahse thinrim awm pawn a awm lo.

'  Khang kum 3 liam ta chhung khan hrehawm ka ti takzet ani. Ka hnaih ngamlo che a, i hnen a lo let leh kha ka chak ngawih ngawih a, mahse min pawm theih ka ring tawh lo a'

'  A dik. Ka pawm nawn leh tawh ngai dawn lo che. Chuan naktuk inkhawm ka duh dawn avangin mut hma ka duh viau mai'

'  Te, min la haw reng ami?'

'  I kephah vuan chung a min then lo tur a ka ngen lai che khan huatna thinlung min tuh talh lo  la chuan ka haw lo mahna che. I haw tawh mai dawn ami? Sawtna awm tawh lo tur sawi a hun leh chilper sen chu a ho ka ti viau' ka hmai chu ka pho vah a, kum 3 hmalam kha chuan hepa awm ngheng a awm kha nuam ka tihber leh ka thlakhleh ber ani thin. Mahse kum 3 a liam tawh.

Sunday zing ah chuan ka nu rinloh takin kaihthawh ngai lovin hma tak ah ka tho a, inkhawm turin ka inbuatsaih ve tlat. Ka nu makti mengphar vel chu hmuhnawm reuh phian! hahahah.... Hetiang a ka tihloh na chin hi ka hre tawh lo. Inkhawm dawn hi chuan ka kua te hi a tha vaklo tlat thin a...hahahha

Ka hnathawh pawh nuam ka ti viau tawh. Ramhuai alo kal ngai vak lova, alo kal pawn min be ngai hran lo. Vawikhat chu hmeichhe hmeltha zet a rawn hruai a, chu erawh ka ning viau. A phunchiar ropui sia, ka coffee ken lai a a hmai manto tak chu theh mai ka chak ania. Terina te pawh rinloh takin an inkawp nghet viau. A hmeichhia khan a zir bawk a, Terina nun pawh hmuh theihin a danglam a, kan 3 in kan chhuak ho zeuh zeuh a, min ngaithei lo ngai lo. Ka hmeichhe duh chi tak ani. A chhan chu a bialpa thian a ngaitheih dan ah hmeichhe sual ani lo tiha hriat tlat ani.

'  Zanin chu ka birthday advance party neih kan rel a, nang, kei leh Terina' Mapuii msg chu ka chhiar a, ka phur viau. Henu hi chuan min tilawm thiam chiang alawm.

'  Yes, khawi ah?' ka inthlahrung der kual ngai lo.

'  Kan U in ah. I chung zawl ah kan 3 in naktuk zan lam dan tur zir ila... hahaha.....' ka phur chiang alawm.

Hna ban ah ka nu ka phone a, Mapuii kan kawm atang a kan thian dun nungchang ziaawm sawt zia hrechingtu ania, ka nu pawn a remti ve mai. Phur tawkin Mapuii U te in lam chu kan pan a, savawm chiah kan lei. A chhan chu Mapuii hian sakei chu a in ve ngai tlat lo ani.

'  Dinner tur chu ka U in alo hawn dawn ania, rawngbawl a ngai lo ania. Chuan inchung ah  drinks in pahin thu ang u... Tete, Dp tur shot nan a tha raps ania.....' Mapuii chu a ri bawrh bawrh a, Terina nen chuan kan innuih sak a, kan kalna in nawmzia chu sawingaihna a awm lo. Curtain black colour vek, inchhung ah meichhemna ala awm zui a, sitting room chu carpet hmul thup mai a inphah a, tun an thlasik intan chho ah chuan in cool leh sexy tak ni in ka hria. Inchung kan chho chu inhnuai ai mahin ka duhdan a chikim zawk. Green house alo nia, a chhung chu naupang leh tleirawl te dream thin ang deuh hi ani mai. Pangpar nalh deuh deuh a awm teuh a, mahse falfai takin a inrem vek. Veilam sir ah chuan dawhkan bial a awm a, chumi hual chuan chair 2 a awm bawk a, a piah leh deuh a mahni a thutna nawm hmel deuh a awm bawk a, ava han nuam chiang tak.

Mapuii chuan current chu ahma aia eng deuh turin switch pakhat chu an on belh leh a, ka thi lo chauh. Ka te chel chul a, Terina leh Mapuii chuan thla min laksak mawlh mawlh a, nuam ka van ti chiang tak!

'  Mapui, i u hi patling nge tlangval? Mo ah min duh mai teh u..' nui uarh uarh chung chuang ka tawng zuah zuah a, Terina alo nui nasa mai.

'  Ka U hi i hrelo ami?' Mapuii chuan maktih hmel deuh chuan min lo en a, keilah chuan a zawhna chu ka ngaithla em em hran lo.

'  Hre nang. In chhungkaw chanchin engmah ka hre hleinem. I sawi ngai si lo a...' nui ver ver chuan ka lo chhang a....

'  Terina hian a hrilh ve tur ah che ka lo ngai a lawm le.... Ih, englo ania, Ka U chu tun a.....'  ' Keimah hi ka nia' lo ti tu lam chu kan hawi thap a, ka thaw kawk mai lawm le....

I'M WAITING FOR U.... ONLY YOU - 5

Inchung kawngka luhna ah chuan Pu Ruatkima alo ding nui vur vur a, ka phu nasa kher mai. Mapuii lah chu a rak chel chul a, Terina ka va en a, min lo nuih vur vur a, ka va ngei tak. Min hrilh lawk se chuan ka kal hauh lovang.

'  Kan party chu ava nuam dawn ve.... Rik hulh hulh hma a cool party neih hmasak hi nuam alawm. Tete, nangpawh nuam deuhin aw.... In ah chuan thian vek kan ni e' dam dup chuan a tawng a, mahse nuam ka ti chuang lo. Mahni hnathawhna a pu te nen a han party ho chu ka chak viau lo.

'  Nia... hehehe' sawitur mai pawh ka hre lo.

Mapuii chuan min rawn kai a, inhnuai lam ah kan chhukthla ho a, Savawm kan talh a, ka insangmar teuh chu a zia ta deuh. Mahse ruih ka hlau tawp. mahse tinge ruih ka hlauh ve ngawt?

Sitting room-ah chuan a tuk birthday lawmna tur vel chu kan sawikhawm a, mahse keichu engmah ka ngaihtuah peih lo. Hna ban ah bak ka kal thei dawn chuang lova. Thawmhnaw erawh ka hak tur ka inngaihtuah fel vek tawh. Kawrfual ka hak ngai loh avangin kekawr dum leh coat orange colour ka ha anga, boot wedge sang tha vehvawh tak ka bun bawk ang.

An unau chu an inkawmngeih hmel khawp mai. Mahse an tawngdan ah in khat ah an cheng ho lo tih a hriat. Zawh erawh ka zawt duh ta lem lo a, Terina nen pawh an inkawmngeih hmel tawh phian. lalterina hi a chak lovang. Engmah min hrilhmlawk loh avangin.

Dinner kan ei zawh chuan ka nu in min lo phone tawh avangin thu khawmuang lovin haw ka  rawt vat a, mahse wine tlem ka lem belh avangin ka lu a hai teuh khawp mai. Ka mut a chhuak rai riai.

'  Mate, Terina chu va thlah mai a, Tetei ka lo thlah anga, Terina in ah min lo nghak dawn nia. Ka rawn lam phei ang che' ka duhdan ava ni lo e awwww...... Mahse hnial thei kan ni hauh si lo. Mapuii lah chuan alo phur pui viau. Hemhuam mai.

Car-ah chuan ka thu ngawireng a, ani pawh chu a tawng bik chuang lo. Ka lo muhil daih a, ka harh chuan ka khum ah ka lo mu tawh. Ka nu leh Pu Ruatkima inbe mawlh mawlh thawm ah ka harh a, ka harhchhuak zawk. Car atang khan engtinnge ka khum ah ka mut? Lalpa leh!

Ka thochhuak ngam lova, an in mangtha thawm chu ka room tukverh atang chuan ka hre thei a, ka lo zak ve tawp.

Kartluan in Terina ka hau a, Mapuii pawh ka hmu duh lo. Boss phei chu ka hel tluan zak ani ringawt. Inrinni zan ania, scooty ka keng a, keimahin ka tlankual mai mai a, ka ril a tam deuh avangin eitur ka parcel tir a, hmun fianrial ve deuh lam chu ka pan a, ka kaltumna hmun ka thlen chuan ka eitur pai chu ka phawrh a, ka ei malh malh a, ka nunhlui ka chhut let a, tunah chuan khawharna tak tak ka nei ve tan. Terina lahin ngaihzawng nghet a nei ve ta bawk sia, ka mal kher mai.

'Zan a mahni a kalna chi ani viau dawn ami?' ka aw hriatna lam chu ka hawi a, boss...

'  Nia, ka hna ban khan ka kawi lawk a, ka haw tep. Enge i tih a?' ka lo inngaihtuah nasat avangin ka zia chu a cool ve ruih mai.

'  Keipawh ka teikual mai mai anih hi' ka bul ah chuan a rawn thu a, thla eng hnuai ah chuan a hmel chu hmuh a nuam ruih mai.

'  I nupui hlui i ngai ami?' ka nui sak a, ka va en chu a hmel a danglam eih lo. Enge a danglam ngawt ang?

'  Ni love. Ani chuan a duhtak a nei tawh alawm' a nui vur vur a, ka hamhaih ang reng.  ' Ngaih chang ila nei ve tho em?'

'  Nei ve tho e. Mahni a awm chuan a khawhar thlak alawm' '

Nupui nei leh mai la...'

'  Ka nupui tur chu a nu in neih ala phal lo a...'

'  Tunge? Ala naupang nge pathlawi inih vang?' ka zawhna atthlak zia chu ka hre miah lo ania.   ' Hahahha..... A naupang tawh lo, mahse a rilru ala naupang a, pathlawi tih vel ah anu chu a buai lovang' a nui vur vur a, a hlim hmel tawp.

'  Nih chu...... In inneih ni ah kan chawl ang tiraw?' ka zawhna vang nge a rawn nui chhuak huk a, mahse makti deuh a ka lo en vang nge a insum leh ta deuh a...

'  Chawl ang chu mawle. Puitlin lam pan ve deuh bawk la, ka hmanhmawh ru viau ania' a thutna atang chuan a tho a, keipawh chu ka tho ve nghal a, intiamrual ang hrimin mahni lirthei ve ve chu kan pan a, ka hnung ah a rawn tlan a, kan inchhawm ta reng a, ka khawhar pawh ka lo theihnghilh hman lek lek alawm.

In ka thlen chuan ka nu chuan min lo hau leh hlak a, mahse ka thin a rim hran lo. Ka intifai a, ka mu zui nghal. Ka mumang ah boss ka hmu chiam a, alo nui var var lehnghal. Ka vei ru deuh anih hmel. Mahse ka demawm hran loh. A chhelo em alawm.

Zing pawh ka tho hma in ka mood a fuh rem rem. Mahse nupui hual a nei tlat. Ho eeee..... Mi pawn an star ve trho alawm. Hna kal tur chuan tukdang aiin ka chhuak hma a, ka nu makti hmel chu ka nuih aza. Tin, a vawikhatna atan ka chhuah dawn ah ka nu biang ka fawp zeuh.

 I'M WAITING FOR U.... ONLY YOU - 6

Hna ka thlen chuan nidang aiin ka thleng hma bawk aniang, ka thawhpui dang ten min lo en thap a, ka nuih kual var var hlawm a, mak an ti lehzual. Nia, nidang ah chuan ka nelawm loh a, hna hi ka ning em em a, tu vak mah ka be ngai lo.

Nileng chuan kan pu chu a rawn kal lova, tlai lam ah chuan ka mood a off tan tawh. A hmeichhe sawi bulah khan a kal anih ka ring. Ka rilru chuan chu nu chu anchhia ka lawh sap a, Pathian in min ngaidam se.

'  I nu ka dil tawh a, chaw ilo ei dawn' Terina msg chu ka en a, nidang chu ni se ka phur viau ang. Mahse tun tum chu ka phur lo. Mapuii a tel leh ngei anga, ka mal bik riau in ka inhre tan. Hna ban veleh ka inkhalh chhuak a, Terina in pan hma in ka tlan kual duh ani. Kan boss chu ka vei telh telh hian ka hria a, mahse beisei a bo ve sia. Mapuii hnen ah ka zawt chhin ang, tunge a hmeichhe duh chu.

'  Pawngi, iva rei ve. Kan nghak thap tawh che ania' Terina awrawl chu a ring ngei mai. Ka nui sak a...

'  Pawnga, min lo nghak rawh u ka tia mi? Ka lo thleng tep' phone ka off a, Terina in lam chu ka pan nghal a, ka phur viau lo.

Terina leh mapuii chuan rawng anlo bawl peih diam tawh a, savawm kan dawm ho a, kan titi tui phian. Mapuii chu ka zawt chak khawp mai. Mahse engtinnge ka hriat? A u nen kan inhmu fal ah a ngai thei. Hmmmp, zawt leh lo mai ang.

'  Ka lo thleng tlai viau em?' kawngka lam chu kan hawi rual thap a, nileng a ka ngaihtuah mihring ngei mai chu alo ding a, nuisang chung chuan min lo melh a, ka tuiral chiang ngei mai. ' Tlai love. lo thu ve nghal mai rawh. Te, U Ruatkima hi ka lo hrilh theihnghilh daih che, amah hian ania vawiin chaw eikhawm hi rawt' Terina chuan a mitmeng chuan hriatthiam min dil nghal. pawi ka ti lo nasa mai.

'  Nih chu mawle. boss te nen a chaw eikhawm fo chu a nuam miah lo ania' ka kai deuh tawh a, ka tawngduh ve deuh e.

'  hahahhaa.... a ho lutuk. Tuman an hre hleinem. Bakah pawnlam ah chuan min boss chei viau lo la' a nui huah huah a, a ha var rual that mai chuan a hmel ati tha zual hian ka hria. Mahse mi ta tur.

'  U, savawm kan in a, i duhleh in ve mai la' Mapuii chuan alo ti vat a, Pu Ruatkima pawh chuan fridge ami chu a la chhuak ve nghal mai a, nuam reuh phian.

'  enge kan chaw eikhawm chhan hi?' ka rilru a lut ang ang hi ka sawichhuak mai zel a...   ' I thlengsil lai ka hmu chak' Boss chuan nui miah lo in min lo en a, ka hamhaih ang reng.

'  Hmmmp, a ho emai a. Hei chu Terina in ania, Mapuii silna tur. Keichu kan in ah' inla thawfuh zet chuan ka hawi vah a, an lo nui nasa hlawmmkher mai.

'  Zan in chu ka kut ana a, chaw pawh ka bar thei lovang' a kut tuamna chu mapuii chuan a  rawn tilang vah a, keiai mahin hnehtu chan chang a intih hmel zawk. Mipa pahnih chu an lo nui nasa zual sauh.

'  Pawnga, ka sil ai sil la hlawh lakah thil ka lei ang che' Terina lam chu ka va hawi a, ani lah anuih alo za tullh tulh mai.

'  Nangmah in i sil anga, ka lo pui ang che' Pu Ruatkima chuan alo ti bauh a, ka hawi phawk tawp.

'  Thlengsil tur chuan i chal tawh emai a' ngaihtuah chiang mang lo chuan ka lo ti leh hmiah a, Mapuii nuihza lutuk chu a khur ngar ngar a, keiin nuihna tur ka hre ve der lo. A upa tawh ka ti ani mai a.....

'  Kum engzatnge ka nih a?' a chal chuar nung chuan min en a, a mitmeng ah chuan a nuih a zat ve hmel tho.

'  35 vel chu inih ka ring'

'  I ring dik tep. 37 zawk. Mahse thlengsil chu ka thiam tho ania' a nui var var a, ka rinaiin ala upa zui. Mahse a hmeltha tho.

Mapuii nen chaw ei kan siam malh malh a, mipa pahnih anlo titi a, mak ka tih deuh chu Pu Ruatkima hi kan rualpui ang mai hian a titi bawrh bawrh a, chuan an hausak ang aiin a nau bialpa hi hmuh hniamna a nei hran lo. Mapuii lahin a bialpa a zahpui bawk hek lo. Mi rilru tha tak an nih ka ring. Ka nu first love fate hi,...... Kei ve hi...hihihihi

Chaw kan ei lai chuan ka mit la ber mai tu chu ka bul ah a thu a, ka tha a khur hialin ka hria. Mahse ka chaw ei zat erawh a buai chuang hauh lo. Vai buh na na na hi chu a hlauhawm loh em ani.

Kan haw dawn meuh chuan dar 11 a ri tawh a, kan titi tui tlang hlawm ani e. Mahni a inkhalh haw chu ka phur viau lo. Mahse Pu Ruatkima chuan rem a ruat a, amahin min thlah anga, ka scooty in Terina'n mapuii a thlah anga, naktuk ah scooty chu hna ah an lo dah mai dawn ani. Tuman kan hnial lem lo. Keiphei chuan hnial lo tak ka ni.

'  A vawt itih chuan glass kha up daih rawh' ka thut tawm chel avang chuan min khawngaih deuh aniang.

'  a ngai chuang lo. nangma tan a nuam kha ani mai' ka tawngkam chu danglam ve sawt rapsss.....

'  I tan a nuam kha alawm ka duh' tih pah chuan amah chuan glass chu a up a, ka thaw hiai mai.

Vawt ka ti reuh em alawm....

'  Kum engzatnge i nih khah?

' ' 24'

'  Pasal neih te i tum ve lo ami?'

'  Aaaaa, ka hrelo. Min duhtu an awm lovang' amah hi ka dream ber ani tih a hre der si lova. 

' Awm ta se i nei duh dawn tihna ami?'

'  Ni ngawt lo. Ka duhzawng anih ve a ngai alawm'

'  Nih chuan chance ava tam si lo ve. i nu duhzawng ni ta se?'

'  Ka pasal tur chu ka nu neih tur ani lova, keimah ngeiin ka pawm thlap loh chuan nawrluihna hmang a neih ka tum lo. Hindu ho ang mai' tehduah a.....hahahah... Nia, kaa ngaihdan diktak ani miau a.

'Hahahha...... Nihleh min nei duh angem?' ka melh nghal kawk a, a uang ni in ka hria, mahse a hmel a thu takin hmalam a melh tlat bawk si.

'  I uang e a' ka aw chu a hul hak a, tak tak nise ka tihzia chu ka aw ah a lanchhuah loh hram ka beisei.

'  Uang lo ta ila' motor chu kawngsir zau lai ah a din tir a, min en a, a mitmeng de sawr chu ava han nalh tak em!

'  Boss, khatin min fiam suh. Tak a, i nupui neih tum kha enge a chanchin zel?' ka lai lutuk chuan ka sawichhuak ta ringawt a....

'  Khanu kha tun a ka bul a thu mek hi anih hi' ka phu dawrh in ka hria. ka awih lo bawk si......  ' Kal ang. Infiamna hmanrua atan chuan ka la induhtawk e'

'  Infiamna ini lo. I nu i zawt thei ang. I tleirawl chhuah atang ka hre tawh che. Ka hmuh hmasak ber che chu ka nupui neih hlim a i nu nen bazar a kan inhmuh khan i nu bul ah i kal ve ani. Kei leh ka pa kan kal dun a' a thaw hak a, a mit a chhing vang vang a, sawi mai tur ka hre lo ani.

'  Ih, englo, mahse i sawi nu kha ala naupang chhia iti sia. keichu ka upa tawh alawm. Bakah ka nu in engmah a sawi si lova....'

A rawn nui chhuak hawk a, ' Tete, i kum chu a upa tawh ngei alawm. Mahse i rilru hi ala naupang chhia em a, i puitlin ve theih hun ah i nu hi ka dil tha leh ang ka tia. I nu chuan min hnial hauh lovang. A fapa ang mai a a en ka ni miau a'

'  Chuan ka nu hmangaihna che chu remchang ah ila dawn tihna ami?' a thusawi dan kalhmang chu ka haw kher mai.

'  ni lo e, i ngai diklo anih kha. I nu chuan ka rilru ka pek dan che a hre vek alawm. Chuan, keihian ka enkawl hneh ang che tih pawh a ring ang. A chhan chu i nu hi ka nu ang chiahin ka hmangaih. A chhan chu ka nu boral khan kan unau tan hian nu ani reng thin. Mahse ipa lakah erawh a rinawm reng thin. Ipa pawh khan min hmangaih ve tho' ka hrethiam neih nuaih lo e a.....

I'M WAITING FOR U.... ONLY YOU - LAST EPISODE

'  Chuvang ringawt chuan maw min neih theih i inbeisei?' keimah ah hian luhlulna riau leh mahni induhtawkna hi a sang ve larh larh thin ani.

'  Ni chiah lo. Nangmah pawn min duh avangin' ka phu deuh zawk. A hrethiam ami? Ni lo, a risk bak ani tawp nang.

'  i hre hauh lo. Hmeichhe tam takin an duh che avangin ka duh ve tur ah che i ngai ani mai thei'  ' Chuan min duhlo ami?' ka tawnglai chu a pawtchat hmiah. Polite lo lutuk. Ka melh kawk a, amah lah chuan min lo en kur zui.

'  Aaahhh, ih..... englo...' ka duh lo tih mai chu ka tum a, ka ti hleithei tlat lo. Ka va in haw reuh tak.

'  Kha maw.... Min duh tih ka hria. Chuan, nangnen hian kan innei vat ang. Chumi hma chu hna i kal a ngai tawh lo. Buaipui ngai zawng zawng chu ka lo tifel anga, i nulat hun neih tlemte hi chen rawh. Mahse ka thinrimna tur ni lovin' ve ringawt a. Ka nei duh leh duh loh pawh a hre tawp si lova.

'  Hey, i mawl ami? Ka ngaihdan pawh min zawt lova, i ngaihtuahna mai mai kha rak pui chiam suh' diktak chuan ka nei duh. Ka duh ngawih ngawih. Mahse a duh dan dan a a tihkual theih ka ni lo. Bakah a tihdan teh thut hi min surprise mah mah.

'  Oh! Ni dawn tak. Naktuk chu hna la kal leh si rawh. Chutia sawm kher i phut anih chuan hnathawk ho hma ah ngat ka sawm ngei ang che' a mitmeng a nuihzatna lo lang chuan a ti hmeltha zual kher mai.

'  Mawla, chutiang ka sawi lo. Pasal ka neih duh leh duh loh i hre lo. Ka nu pawh ka rawn der ve angai' sawi mai tur ka hre lo det.

'  I nu chu ka dil vek tawh. Ka hmanhmawh viau bawk. In ngaihtuahna hun ka pe thei lo che.

Nang hi ka mamawh takzet tawh che' a mitmeng ah chuan uang mitmeng a awm tawh lo.

Ka pasal neih ni chu mumang ang mai ni hian ka hria. Mahse ka nu hlim hmel leh U Ruatkima hmel zangvah chuan min tihlim takzet ani. Ka inrinloh laiin pasal ka nei thut a, mahse ka inchhir ka ring lo. A chhan chu ka pasal hi Lallawmkima, min bumtu leh min phatsantu dawt a ka mipa duhleh hmasak ber ani miau a. Nupa nun chu a tluang reng thei lo, mahse keini nupa chu a hun leh hmun kan hriat chuan kan hlim reng thei in ka ring ani.

'  Iva han nalh tak em!' ka pasal in duh hmel tak a min melhna chu ka enlet ngam lo. Ka lai tlat pek.

'  Tikhan min en reng suh' ka bul a lukham awm chuan kan vaw kawrh pek a, amah lah chu a nuih aza em em lehnghal.

'  Min va dimlo deuh ve, keipawh zanin chu ka dim viau lovang che. naktuk chhun nen chuan i hah deuh pawn phun awih loh' a mitmeng chimawm zet a min melh pah chuan ka taksa chu a chul thla dan dan a, ka va khur nasa tehreng em!

A phone ri chuan kan inchhai lai chu a titawp a, ka ui ve det. Mahse ka pasal chuan alo let lehnghal tur thu sawi zauh pah chuan phone chu a la nghal a, a tawng phei lawng lawng chu ka ngaithla a, ka ngaih ava han ngam tak em!

Engtiklaiin nge ka lo mutthilh ka hre lo. Ka pasal phun bul bul thawm ah chuan ka harh a, phone alo la hmang a, tukverh bulah chuan pawnlam hawiin a ding a, ka tho them them a, a pian chu a nalh thlawt alawm. Hepa hi ka kham thei dawn hian ka hre lo. Naktuk ah hna kal a tumloh avangin mut pawh a hmanhmawh lo tih ka hria. Mahse ka lo mutthilhsan daih sia....hihihi

A kawng ah chuan hnunglam atang ka va kuah a, phone hmang reng chung chuan ka lam a rawn hawi a, fawh cho zetin ka lo melh a, ka hmui a chuk zeuh pah chuan phone chu a dah a, duat tak a min pawm hnu chuan khum ah min mut a, kan hlim dun leh ta...

AFTER 4 YEARS.....

'  Ka nu boral atang hian i zia a danglamin min ngaihsak tawh lo e...' ka pasal bul ah chuan chaw ei laiin ka vui niah niah a..

'  Duhtak, ka hna vang ani. Ka tihpalh. Engtiknge naute kan neih dawn?' kan thusawi intuha lo lutuk chu...

'  Ka hre lo' ka aw hul hak chuan ka nun ruak ruk zia a tilang in ka hria. Nia, ka nun hi a ruak takzet. Terina leh Mapuii pawh an innei a, fa an nei tawh. Mahse keini chu tun thlengin fa kan la nei lo. Hei vang hi ami ka pasal hi a danglam tak em em?

'  Ok. Vawiin ah Sialsuk ah hna thil ah ka kal dawn a, ka lo haw ah in entir a ngai anih chu. Indanna i ei em?' a zawhna min zawh duh dan chu ka rilru ana ru ve det.

'  Ei lo' ka tho a, ka chaw ei lai chu ka thawhsan a, ngawirengin huan lam ah ka lutthla a, ka pasal awmdan hian min tina takzet ani.

'  Terin, kan inhmu thei angem?' ka thianpa chu ka phone a, ani lahin ka awri ah ka diklo tih a hrethiam nghal. Mahse an in ah kal ka duh lo. Mapuii hriat ve zel ka la duh lo. Mapuii chuan min tan ang. Mahse ka thianpa biak phawt ka duh.

Eitur kan order zawh chuan Terina chuan min en vang vang a, ka mit ka tahna avang a bui lak chu thup nan ka mit ka dum a, ka biang chu ka titai bawk a, ka inchei ve hle ani.

'  Khati khawp a chhe tur khan i pasal in i chungah enge a tih?' thu zep si se ngai lo a inkawm kan ni miau ani.

'  Terin, ka hre lo. Fa ka nei thei lo aniang' ' i in entir tawh em?'

'  Aw, doctor chuan tha ati vek' '

Anih in pa?'

'  Ka hrelo. Ka hriat theih chin ah chuan a in entir lo aniang'

'  In entir ve se a that dawn chu. A lerhsan che em?' ka chhan hreh ber min zawt ta nge nge, nia, kan pa hian hmeichhe tleirawl kawp anei alawm...

'  Ummm..... Terin, hria ang in awm suh aw.... Min duat lutuk tho. Fa kan neih har vang aniang. A sim ve mai ang' tinge maw ka la chhan tang tang ni.

Thinrim avang a Terina bek pawng talh talh chu ka hmu reng a, hrehawm ka va ti tak em! Ka thianpa hian min khawngaih ang tih ka hria a, ka hrilh ngai lo reng ani. Mahse tun tum chu inbunruah ve hawk hawk ka duh. Ka nu ka sun zo chiah a, a ruang pawh ala dai hman mang lovang tihtur ah ka pasal chu hmeichhe dang nen nuam min tawlsan a, ka mamawh ngawih gawih laiin ka tan a awm hman lova, ka mal asin. Ka nu tal la dam se hei ai hian ka tuar thei deuh tur.

Mapuii'n min hmuh duh thu a rawn sawi chuan ka chak hran lo. Ka nawmsam meuh loh avangin in ah lo kal mai tur a ka duh thu ka sawi a, pawi ati hran lo. Mapuii ka fakna em em chu, pasal a nei a,anmahni aia sum leh pai lam a neilo daih zawk a nei a, mahse a nunphung a buai phah miah lo. A pasal a zah thiam a, nei le lu lo mahse chhungkaw hlim tak ani ni. Mapuii chhungte lamin puih an duh pawn Terina hian a duh loh avangin Mapuii pawn a hnar mai thin. AAn in lam ah pawh a kal zen zen lova, kan in ah ngei pawh chaw ei a kan sawm anih loh chuan a rawn leng zen zen lo. Mahse nitin chuan kan inbe ve in duhsakna kan inhlan ziah thung.

'  Ka U hi a zin nge?' kan nupa room ah chuan kan thu dun a, a mitmeng chu a vawt raih a, mahse keimah vang anih ka ring lo.

'  Aaaa, zin chiah lo. Hna lam an buai lutuk a, tlaivarin thawh a ngai thin a' ka dawtsawi chu a awih lo tih a mitmeng ah ka hrethiam.

'  Tete, i pasal hi engtik thleng nge i thup dawn? Ka hrelo amaw ti suh. Engkim ka hria. Tinge keihi i unaunu ka ni lo ami?' a aw chu a fiah kelh kawlh kher mai.

'  Mapui, ih, englo ania. Ni lo, nangbak hi unau ka nei lo...' ka sawi zawm thei lo. Ka mittui lo tla chu khap kirna hun pawh ka nei lo.

'  Tete, ka hria asin. A hmeichhe kawp chungchang leh in khat ah an cheng dun a, ka U hian khanu kha in a luah sak a, tichuan a chang changin a rawn haw thin tih pawh ka hre vek. Min hrilh hun ka nghak a, mahse nangin engmah sawi i tum si lo. Nizan ah khanu in ah khan ka va kalchilh a, ka U ngei pawh alo awm a, ka duhaiin ka hau na ta deuh bawk a....' Mapuii thusawi zawng zawng chu kanhre vek, Nia, ka pasal bak hi khawvel ah neih ka nei lo.
 ENGTINPAWH AWM SE KA TUAR CHHUAK NGEI TUR ANI KA TI VE THIN.

'Mapui, ka tihpalh ani. In rilru tihhah ka duh lo a, pawi ka ti lutuk. U Ruatkima chu alo let leh mai ang. Ka tuar chhuak thei ang. Min ngaihtuah suh' keimah ngei pawn ka awih lo, ka tuar chhuak zo angem tih hi.

'  Tete, pawi ka ti. I unaunu hian i tawrhna ka hrechhuak tlai lutuk leh hma ka la tlai lutuk hi. Ka khawngaih takzet che ani. Mhase tuartu ini reng bik lovang. Tunah hian eng ti turin nge ka lo kal i hria em? Ka rawn hruai dawn che' Mapuii thusawi chuan min ti hamhaih kher mai..

'  Mapui, enge i sawi/ Ka thei lo. U Ruatkima lo haw ah tunge lo ngaihsak ang? Tunge a chaw eitur lo siam ang? Min hmangaihna ah ka lawm. Mahse ka tibuai thei lo che u. Min la hnawtchhuak em hleinem. Ka awm ve ala phal a, hei bak a hlu hi ka tan a awm lo'

'  Iva han khawngaihthlak tak em.... Tete, hetiang tur tih hria ila hman ah khan nei lo tur che in ka dang tur. Ka zah tak meuh che ani. I duh hun hun ah kan in kawngka saw i tan a inhawng reng ania aw...' Mapuii chuan khawngaih hmel tak chuan min kuah a, a tap ani.

Ni e, keipawh ka tap. Ka nu boral hnu a thinlung bawhawk a ka tah leh hmasak na ber ani. Ka mal a, ka pasal in min phatsan khan ka tap thei lo. Ka tap mai mai ngai lo bawk. Tunah erawh hmangaihna tak tak a min kuahtu ka pasal nau, ka thianpa nupui ni bawk hma ah hian ka insum thei tawh bik lo.

'  u Ruatkim, i mi hmangaihna kha khawnge a awm tak? I tan hnawksak ka ni tih hrereng chung pawn ka kalsan thei si lo che. Ka tan ilo let leh ang tiraw? He in ah hian, nangmah nen ngei kan hlimdun leh ang tiraw? I nupui hian nang chauh, nangmah chauh ani ka nghah ni'

I'M WAITING FOR U.... ONLY YOU PART-2

Kum 2 zet ka pasal ngaihzawng neih chu ka tuar ve ta, ka na ani. Mahse khawvel ah hian chhungkua ti a belh tur ka nei ve lova, ka chhungkaw neihchhun chu amah chiah hi ani. Ka nu ka ngaih thin zia hi chu tuman min hriatthiam pui phak hian ka ring lo.

Tukin ka zing tho chu ka lu a hai miai miai a, U Ruatkima chu ka bulah a muhil bawrh bawrh a, ka en vang vang a, hman a min duat em em tu kha ava ang lo tak em! Nia, tunhnai hian in a awm tam ve deuh a, ka pasal a chhungten a awmdan an hriat tawh avangin zilh pawh an zilh nasa a, ka chung ah pawwh a tha ve ta deuh. Nupa nun pawh kan hmang ve zeuh zeuh a, mahse a bialnu erawh a thlah chuang lo.

Rawng ka bawl lai chuan ka luak a chhuak em em mai a, bathroom ah ka va luak teuh a, ka chau kher mai. Mahse ka pasal chuan engahmah a ngai lo. A rawn tho a, karkhat chhung hna thil avang in phailam ah a awm dawn tih a sawi a, ka ngawireng. Ka tawng dawn apiang chuan ka luak a chhuak a, ngawih ah ka ram tang ani ta ber e.

Chaw eikham chuan a zinna a a mamawh tur ka siamsak mawlh mawlh a, ani chuan laptop ah eng eng emaw a khawih a, kan inbe lem lo. A tho nulh a, inbual turin min luhsan a, a laptop chu ka en chak kher mai. Ka zuk en dek dek chu a facebook account chu alo log out lova, msg hi alo awm dal a, chuta mi pakhat chuan ka mit ala tlat. Kan hawng chhin chu a bialnu kha alo nia. An pahnih a zindun an lo tum anih chu! Min bum leh ta, mahse ka na peih tawh lo.

Ngawirengin kitchen lam ah ka phei a, ka inngaihtuah ngun kher mai. Heti ringawt ai chuan ka nu in kan in kha ka tan a dah ve a, mi ka luahtir a, inhnuai a ruak a, ka awmhrang ve tawh mai dawn mawni tih ka rilru ah a awm ve ta. Ni e, hna ka thawk anga, inluahman nen chuan ka eikhawp chu a awm ve mai ang. Mi nun tibuaitu nih reng hi hrehawm ka ti takzet ta.

Ka pasal zin tur chu duhsakna ka hlan a, mahse chhanletna erawh ka hmu hran lo. Ka beisei miah lo bawk. Ka luhai lutuk chu sofa ah ka thu hnak a, lang a kan chhawr chu a rawn thleng  a, in a tifai malh malh a, ka nawmloh em avangin vawiin chu ka be lumlam peih thlawt lo ani. Kan pa chuan a thlenchin engmah min hriattir lova, keipawn zawh ka tum hran lo. A chhan chu ka phone a pick up ngai mang lo tlat ani. Bakah an hlimna tihbuai ka duh lo. A hlim chuan ka tan a tawk viau tawh ani.

Ka luak nasa lutuk chu kan nula chu a ngaih a tha thei lo, ' I rai ani lo maw?' ka phu nasa lutuk. Nia, kan pa nen nupa nun kan hmang zeuh zeuh a, ka thi neih lohna hi thla 2 lai ani tawh.

'  Lalpa leh! Ka lo ngaihtuah miah lo a.... Test na min lo leisak' ka chhungril chu a phur em em a, ka pasal ka hrilh hun ah chuan kan inkar a that phah ngei ka beisei. Lalpa, min rai tir hram tawh teh.

Kan nula chu hmanhmawh fahran in a kal a, a kalchhung te chu rei ka ti kher mai. Alo let   chuan ngawirengin ka laksak a, toilet ah lut in kut khur dar darin ka test na chu ka en a, Lalpa! Ka va lawm em! Ka rai ve ta! Kum 7 dawn hnu ah ka rai ve ta anih chu!

Ka pasal ka hrilh nghal ang nge alo haw ah ka surprise ang? Hrilh nghal chu ka duh zawk a, a hlim ve hi ka ring ani. Ka chhuak a, khum a ka phone dah chu ka la dawn chiah a, ka phone a rawn ri a, ka pasal hnen atang ani. Phur zet chuan....

'  Hello' ka aw te chu a khur titih....

'  Ka lo haw hma in in kha chhuahsan turin ka duh che ani' ka taksa chu a khawng vek. Eng thu nge a sawi? Min hnawtchhuak anih chu. Tawng nachang ka hre tawh lo. Khum ah ka thu hnawk a, ka en ngai ka en tlawk tlawk. Hetiang hi ka beisei loh asin le.

Tumah hrilh nachang ka hrelo. Ka thawmhnaw chu ka siam malh malh a, kan in ruak ka pan dawn nge Terina te ka pan hmasa ang? Nilo, Terina te ka pan chuan engkim a buai vek ang. Mi chhungkua tihbuai belh ka duh lo ve.

Kar 2 zet chu kan inhnuai ah chuan ka awm ve tawh. Ka pasal chhungte chu an thin a rim em em a, U Ruatkima pawh an hau nasa ani awm e. Mahse kan inkar chu a chat tawh, tu hnen ah mah ka nau pai chu ka hrilh duh lova, mahse lan hun ala awm dawn tho tho si.

Ka tleirawl chhuah a ka kawm ve thin Nutei chu engtintin amaw a phone no ka nei ta hlauh mai. Mumbai a Hotel pakhat ah hna tha tak chelhin alo awm tawh a, zah pawh ka dawn thei lo. Ka nau neih thleng a hnen a zuk awm ka dil tawp a, ani lah chu alo phur phian.

Ka naupai thla 3 a tlin chuan Mumbai pan in ka tlawk thla a, ka nu khan pawisa min hnutchhiah thahnem bawk a, ka huphurh lo. Pachang tak a ka awm angai ani.

Ka nau neih hun alo thleng a, fanu duhawm zet mai ka nei a, ka thiannu lah chuan nuam hi an ti khawp a, thla 1 zet chawlh ala a, kan nufa in min awm ani ringawt. Thian tha hi inkawm reng leh inhmuh zin ringawt alo nih loh zia hi ka hrechhuak uarh uarh.

Terina te nupa ka ngai thin viau nangin ka be pawp ngai lo. Ka kalna tur pawh ka hriattir lova, min ngaihtuah viau ka ring nang in tu khawngaih mah nih ka duh lo.

Ka fanu pawh thla 5 hmel a hmu ve ta. Ka lo plan lawk ang in ka fanu nen Mizoram let leh kan tum ta. Nutei chuan a phallo takzet. Ni e, kan nufa tello chuan a khua a har ve ngawt ang.

Mahse thil tum ka nei a, bakah heta kan awm reng chuan ka pawisa neih sa ka hmang zo mai dawn a, hna ka thawh ve a ngai tawh.

Airport-ah chuan mittui nen Aizawl a inhmuh leh ngei intiam chungin Nutei chuan kan nufa chu min vai liam a, ka mittui a tla nasa ngei mai. Ka fanu chu ka en a, ka awm ngheng a tui tak a a mu chu ka thlir bang thei lo.

'  Bawihte, kan hmachhawn tur hi ala hautak dawn a, ipa chanchin hi min zawt ngai lo la ka duh dawn ani. A chhan chu ani chuan khawvel ah i awm ve tih a hre lo a' ka fanu muhil chu ka be sep a, thlawhna chu a thlawk chhuak ve nghal.

I'M WAITING FOR U.... ONLY YOU

Lengpui airport atang a kan in lam pan a kan kal chu ka fanu chuan nuam atih hmel dar dar. Ka awm nghengin a bei chial a, taxi tukverh atang chuan pawnlam a thlir ve dauh dauh a, a pa a chhun reuh em em lehnghal.

In kan thleng chu tumah hmuak tu kan nei ve tawh lo. Mahse ka rilru ka buatsaih lawk thlap avangin ka in control hneh viau e. Kan in luahtu te chu an rawn lengthla a, thingpui te chu anmahni zawkin min lumsak a, ka fanu chu an en thin a, zawhna min zawt hreh tih ka hria. Keipawhin engmah sawi ka tum lo. Ka awmbo hlan in ka pasal hlui alo kal thin thu leh ka awmna a zawh nasat thin zia leh an hre si lo a awih loh zia thu te min hrilh a, tlem chuan ka chhungril a nghawng ve det.

Ka fanu chaw tur ka siam sak a, hnute tui ka ngah loh avangin cerelac hi tuiril deuh in ka pe tawh a, ala duh em em zui a, kan nufa chuan kan hlim tawk ve em em ani. Diktak chuan ka chungril hi a dam kim thei lo. Mahse ka fanu hmuh turin mitmeng dul reng reng ka pu ngai lo. A chhan chu naute hian thil an man chak a, anu hi nu hlim theilo tak ni a min hriat ka duhlo bur. Mutna kan sawn tak vang nge ka fanu chu a muhil duh lawk lova, mahse pawi ka ti hran lo. A chhan chu tap chung a ka letna in hi ka chhuahsan hnu a ka let lehna hmasa ber ani a, mahni a inngaihtuah lungpumna hun neih ka duh lo zawk. kan nufa chuan kan inchhaih nui ar ar a, dar  12 pelh hnu hret ah ka fanu pawh a muhil ve ta.

Ka chauh deuh vang nge zing ah chuan ka fanu thawm ah ka harh a, kan en chu amah te chuan tlei em em in ka sir ah chuan alo tal ve bat bat a, ka nun ava tihlim tak em! Hnute ka pek  zawh chuan kan nufa chuan kan tho a, boihtei pawh Mumbai atang a ka lei haw, a walker ah chuan a zun te thli a ka tihfai zawh chuan ka thuttir a, nuam ati chu a khek deuh raih raih  reng a, keiin rawng ka bawl a, ka fanu chu thian ang chiahin ka be mawlh mawlh a, midang  kan ngai bik hauh lo. Ka nu erawh ka thinlung chuan a ngai kher mai.

A tunu hi hmu ve se a hlim dan tur te ka ngaihtuah a, ka mittui a tla lek lek. Ka inthing harh a, ka fanu chu chaw ka eitir zawh chuan ka inthiar tir a, a walker ah chuan ka dah leh a, chaw ka ei zui ve nghal. Ka rin ai takin ka ei hnem phian a. Chaw ka eikham chuan ka fanu ka bual a, inchungnu ka au thla tawp a, ka intifai zui ve nghal a....

\

Kan nufa a kan intihfai zawh chuan ka hna hmasa ber tan turin ka insiam malh malh a, inchungnu chuan ka chhuah rei dawn loh chuan boihtei chu lo awmpui a hnial loh thu a sawi na a kalsan ka huphurh tlat avangin lawmthu hrilh pahin ka hruai zawk tur thu ka hrilh a, kan chhuak chho ho a, ka fanu tlei dan em em hi Pathian in single mom ka nih avangin ro min  relsak thiam hi ka ti khawp a....

Mumbai ka awmlai atang a ka biak lawk tawh, bazar a thawmhnaw dawr tihral an duhna lam pan chuan kan nufa chuan taxi in kal kal a, boihtei nuam ti khek raih raih reng chu hmuh nuam ka ti takzet ani.

Dawr neitu te nen kan inhmuh chuan ka insawi a, tichuan karkhat hnu a inhlan fel turin kan inbe nghal a, karkhat chhungin kan nufa chuan Aizawl kan fangkual hman dawn anih chu. An dawr nghak nula chu ka chhawm nghal dawn a, awmpui tur nula ka mamawh dawn ani. Mahse dawr neitu te chuan min lo ngaihtuahsak tur thu an sawi a, ka lawm kher mai.

Kan inbiak fel chuan ka fanu chuan a ning ve ta deuh nge a te ve deuh that that reng a, dawr chu chhuahsan in khawlai a kan kalpui chu nuam hi an ti leh si khawp a, a hawi ve vat vat reng mai.

'Zothansang' chu awri chu ka hai mawlh lo. Ka ding dat a, muangchangin ka inher a....

'  Ka be duh che' ka ban ah a kai a, ni e, Terina ani. A thin a rim khawp ang. Engmah hrilh lovin ka bo a, engmah hrilh lo bawkin ka let leh a. Mahse ka dinhmun in a zirlo em ani.

Ngawirengin ka zui a, boihtei lah chu mutchhuak tih hriat deuhin a tlei lo tan em em lehnghal. Ka fanu chu a melh a, a mitmeng chu zawhna hlir in a khat. Mahse engmah ala sawi lo. Car pakhat ah min nawrlut a, hnial tumna ka nei lo. Min tih ang ang chuan ka awm a, motor   chhung a ka thut rual chuan ka fanu chu hnute ka pe zui nghal a, a rawn thulut chu a hmel chu mak tih avangin a danglam vek. Ka lo nuihsak a, ka in lam a kal zawk ka duhthu ka sawi a, ngawirengin motor a khalh a, boihtei pawh a muhil zui nghal.

Kan nufa chuan min en leh zauh thin a, a insangmar tlat chu ka hre thei. Hrehawm ka ti takzet. Tawngchhuah a tum loh avang chuan ka tawng hmasak ngei angai.

'  In nu te an tha maw?' zawi sep chuan ka zawt a, diktak chuan tahkhum vak ka chak kher mai. Ka thianpa hi ka ngaih thin zia chu tuman min hriatthiampui phak hauh lovang.

'  Aw' a bung vut a, ka va melh chu a hmalam alo melh ngar a, a hma ai chuan a inthlahdul ta deuh.

In kan thleng chu ka fanu chu khum ah ka mut nghal a, sitting room lam a ka phei leh chu

Terina chu tukverh bul ah ngaihtuah muk hmel zetin alo ding a, ka thawm a hriat chuan muangchangin a rawn inher a, a mitmeng a zawhna zawng zawng chu ka hmu thiam vek. 'Thu ila' thutthleng ah chuan ka thu nghal a, ani erawh ala ding reng.

'  Engvang nge? Ka zawn nasat zia che i hria em?' a aw chu a khur dar dar a, muangchang in ka hmazawn ah chuan a thu a, uluk takin min melh a. A hmel chu alang upa ve ta deuh.

'  Ka tihpalh' a bak sawi mai tur ka hre lo. Bakah ka tah chhuah mai ka hlau ani.  

' Naute kha?'

'  Ka fanu anih kha'

'  Chuvang ami i tlanbo' ka thianpa hi chuan min hrechiang ani. Ka lu ka bu nghauh a, ka tah chhuah loh nan ka heh ka pet fan a..

'  Mimawlnu, keihi i tan enge ka nih? Hetiang khawp a serious hi engtinnge ka lakah i thup theih?' a awri ah chuan min huatna ni lovin mahni inthiamlohna ka hre thei ani.

'  Min ngaidam rawh. Tumah kha hrilh ka duh lo ani. A chhan chu ka pasal khan min duh lo a, a fa ka pai tih ka hriat ni in min hnawtchhuak a, amah pawh ka hrilh lo. Min laksak ka hlau ani' thawhak chuan ka sawi a, min melh vawng vawng.

'  Engtinnge ka tello a i paltlang theih? Tunge i mittui hru? Mimawlnu, i thian chauh ka ni lo. I unaupa ka ni tih ka sawi lo ami? I unaupa hi i tan inhnemna tlak ka lo ni lo ami?' a kut a humruh a, mipa mahnise a mittui a tla ve tlat ani. Hrehawm ka va ti tak em!

'  Ka hria alawm. Terin, keima thiamloh ani. Rilru fim pu hman lo in thutlukna ka siam a, Mumbai ah ka thiannu Nutei hnen ah ka tlanchhe ta ani. Ka ngai thin lutuk cheu asin. Mahse tihbuai tel ve zel che kha ka duh tawh lo ani' ka rilru diktak ani ka sawi.

A rawn tho thut a, ka inrin hma in min rawn beng a, mahse min huat vang ani lo tih ka hria. He pa hian unaunu hmangaih tak takin ani min hmangaih ni. Hmangaihna avang a min beng ani tih ka hria.

'  Min tibuai ngai ami? Khawvel ah nang chiah chhungkua ka nei a, i tlanbo khan ka nun hi a kehchhe tak meuh asin. Zantin khawlai a hmuh che inbeiseiin ka chhuak a, i inluahtu te ka  zawh lahin an hre bawk si lo. Mimawlnu, zan engzatnge nangmah vang a ka tah i hria em?' ka hma a thingthi nuaih chung chuan min hau a, ngawirengin ka zuk kuah a, ka tap chhuak thei lo. Ka taksa hi a khur ngat ngat ani mai.

Muangchangin a reawn ding chhuak a, engmah sawi tur kan awm tawh lo. Thutthleng ah chuan kan thu dun a, duat takin min kuah a, ka lung a chhe tulh tulh. A awm ah beiin a vawikhatna atan ka pasal in min then hnu a thinlung bawhawk a ka tah vawikhatna ani. Min kuah hle hle a, min thlem a tum lo. Ani erawh a tap tawh lo. Ka fanu te deuh that that ah chuan kan ding dun zawk a, ka mittui hruk hul mawlh mawlh pah chuan room ka pan nghal a, ani pawn min rawn zui nghal.

Ka fanu chu mangchhia emaw a mang ve aniang. Tui em em in alo muhil zui lehnghal a, khum ah chuan kathu a, ani pawh chu boihtei sir lehlam ah chuan a thu ve a, hmangaih hmel tak chuan a thlir vang vang a...

'  Apa a ang kher mai' ati sap a, min rawn nuih var var a, ka lo nui ve sak a....  

' Nia. Mahse sawirik ka duh lo ania'

'  Ok. Ka hrethiam alawm. Chuan zanin chu kan chhungkua in hetah chaw kan ei ang. Ka va hruai anga, chawhmeh ka rawn bazar ang. Ka chhungkua ka hmulet a, tunu ka nei bawk a, ka tunu welcome party hi ka buatsaih ngei angai' awki zang vah chuan a rawn tia, mahse ka chhungril a hlauthawng leh nghal.

'  Ni lo. A theih loh. Terin, Aizawl ka awm hi thuruk ni se ka duh' ka fanu melh ran chuan ka ti sap a...

'  Hlauthawng mah ta che. Kei leh ka nupui chuan i lam kan tang a, kan nu pawn a hmu chak ngawt ang che. Nitin i tan tawngtaina a nei ziah a, nitin kan in kawngka i rawn penluh ring  hian a awm thin asin. U Ruatkima chuan engmah a hre rih lovang. Hlauthawng miah suh' ka thianpa te nupa in min lo ngaihtuah zia leh min hmangaih zia ka hriat chuan ka hnuk a ulh thar leh. Ka tho a, Terina lam chu ka pan a, ngawirengin ka kuah a, ka thinlung chuan lawmthu a sawi mawlh mawlh. Mahse ka tawng chhuak thei lo.

Terina haw hnu chuan ka intifai a, Mapuii lo hmachhawn chu ka huphurh kher mai. Ka fanu chungchang mawlh hi ani. Ka intihfai zawh chuan boihtei pawh a rawn harh ve tawh a, ka pawm tho a, hnute ka pe nghal a, ka mit ah a enkiau a, anu hi min thlamuanpui hle ani tih hriat takin hnute hne pah chuan min nuih ver ver a, ava han hmeltha tak em!

Boihtei ka thlak a, ka thuamlum zawh chuan a chaw tur ka siam mawlh mawlh a, ani erawh a walker ah chuangin khek raih raih chung chuan a walker hma tarmawi ho chu a beng ve vak vak a, nuam a tih hmel kher mai.

Pawnlam a rawn ri thla nawk nawk thawm ah chuan kawngka ka va hawng nghal a, Mapuii nen kan inhmu chiah chu engmah sawitur kan awm lo. Min kuah thlawp a, a tap khur ta ngat ngat a, Terina chuan an fate 2 chu inchhunglam ah, ka fanu awmna lam ah chuan a hruai vat a, reitawk fang kan inkuah hnu chuan muangchangin min thlah a, engmah keipawn ka sawi thei bik lo.

'  Lalpa, ka lawm . Min pe let a' ti septu Mapuii chuan a thinlung tak takin min lawm ani tih ka ringhlel thlawt lo. Ka lak atang a a mit la sawn in a vahnu leh a fate lo inlawm ri lam chu a  hawi a, muangchangin a pan phei a, ka fanu hma ah chuan a thingthi niaih a, a en tlawk tlawk. Ni e, hai theih miah lohin a pa nen an in ang a, a ni khuavang neihna a hmui bul ah chuan khuavang a nei ve bawk a.

'  Darling, midang iti hrilh hai dawn' Terina'n a nupui a zuk kuah chuan mapuii chu harhchhuak thut tih hriat takin a mittui a hru hul thuai a, a bag chu an pa pek pahin Boihtei chu a walker atang a pawm chhuak nghal a, an va in ang reuh tak.

Ka fanu leh ani in pawm chu ka en vang vang a, an in ang reuh tak tak ani. Terina fate pahnih chu ka kuah ve ve a, an lo lian ve tawh lutuk. A naupang zawk chuan anu in boihtei a pawm chu a thik ve deuh aniang, a en kar a, mahse apa chuan boihtei chu a nau anih thu chu a hrilhfiah thlap a, chumi hnu chuan a nui ta ver ver a, a cute takzet ani.

'  A hmeltha tak zet ani' Mapuii chuan a vahnu chu a en vawng vawng a, a hlim hmel takzet ani.  ' Chawhmeh hi siam ila' Terina chuan min rawn melh zauh a, ka lu ka lo bu nghat a, Mapuii chuan rawngbawl lam pawh min ngaihtuah pui thei lo. A fate leh a vahnu chu a kawi khawm a, an hlim ri chuan min ti lungchhe lek lek ani.

'  Tun ah chuan engmah enghelh ka nei ta lo e. Ka hmu let che a, ka tunu ka hmu bawk a, ka   thu lovin khawi ah mah in kalbo tawh tur ani lovang' Terina chuan salad kan chan dun lai chuan a rawn ti sap a, ka lo nuih ver ver. Keipawh ka hlim ani. Hetiang em em hian Terina hian min   lo ngaihtuah ani tih ka hrethiam pha lo a.....

'  Ka lawm e aw.... Khawvel ah hian ka mal ngawih ngawih amaw ka lo ti thin a' ka mittui tling pap chung chuan lawmthu ka hrilh a...

'  Mimawlnu, i pasal neih hma pawn ka ngaihsak lo ngai che mi? I luak zawng zawng pawh keima then thin anih kha i hria em?' ka chal a lo kuk det pah chuan a nui var var a, he mihring tak hi chu aw..... Mapuii nen hian an va inhmeh dun tak em! Rilru tha dun si....

'  Ka chal a kuk hi sim tawh teh. Nutling leh patling kan nih ve tawh hi' hmel nur nang chuan ka tia, amah lah chu a nuih aza em em lehnghal a.

'  Tete, boihtei hi a chaw ka lo pe dawn ami?' Mapuii chuan sitting room atang chuan min rawn au lang lang a, ka tho vat a, ka fanu chaw tur chu ka siam malh malh a, zanin tlai zet chu nuam ka va han ti tehreng em....

Mapuii chuan ka fanu chaw a hrai a, keiin an fate ka lo hrai a, Terina chuan kan rawngbawl alo vil bawk a, a vawikhatna atan ka pasal then hnu a nuam ka tih ber ni anih ka ring. Hun hi chelhdin rih mai ka duh.

'  Tete, i tan kan awm reng tawh dawn alawm. I duh hun a piang ah min lam anga, keini hi i chhungkua kan ni alawm' Mapuii chuan ka rilru hrethiam tak chuan tukverh bul a ka ding chu min rawn hnem a, ka dar a a kut a rawn nghah chu ka lo vuan let a, lawmthu sawi dan ka thiam lo. Ka nui sak a, Terina'n naupang alo awmpuina ah chuan kan phei zui ve nghal a.

Boihtei chu dar 8 vel ah ani in a awi mu a, keiin an fapa te zawk chu ka awi mu bawk a, nuam kan ti tlang ani. Riak ve mai se ka ti, mahse mutbu ka nei si lo. Bakah chhuat a mut an ngai dawn sia, ka sawi ngam si lo. Haw rih lo se ka ti takzet ani.

'  Te, mutbu hawh la, kan lo riak ang' ka rilru hrethiam ni awm takin Terina chuan a rawn ti thut a, ka zuang lo chauh. Mahse ka inthlahrung.

'  Tak tak? Inchungte ta ka han dil belh mai ang. Sin tur ka nei tha a, a phah tur hi a tlem deuh a, chhuat a mut in hreh lo ami?' ka hmel a phurna leh inthlahrunna lo lang chu an hmuh hmaih tawp lovang.

'  I neih ang ang ah chuan mu zawk ila, hawh chawp ai chuan. Chhuat a mut ka chak lutuk'

Mapuii chuan phur zetin a rawn tih chhunzawm nghal a, sawi mai tur pawh ka hre lo. Ka va han hlim tak em!

'  Tihdan ka hria. Naupang ho zawng hi khum ah mu se, keini puitling ho zawng khum bul chhuat ah mu ho ila' hepa tak hi chu aw....

'  A tha ngawt ang. Kan pa laitat ila, duhtawk in kan titi thei dawn alawm' Mapuii hlei hlei alo phur. Awmdan tur pawh ka hre lo. Min lo en hran loh zia ka hmuchiang telh telh zel ni ber in ka hria.

Phur zet chuan mutna kan siam a, naupang an mu kim tawh bawk a, keini pathum chu kan mu tlar a, kan titi tui hlawm khawp mai. Nuam ka van ti tak em! Ka thiante nupa chu ka hmalam hun atan dawr lei ka tum thu te, karkhat hnu a kan inhlan fel tur thu te ka hrilh a, min lawmpui kher mai. Naupang men laiin thu puitling kan sawi hman meuh lova, hrilh hun tha ber anih ka ring ani.

'  Te, i tan hriat a nawm ka ring lova, mahse hre ve hrim hrim la ka duh a, ka U kha alo cancer a.....'

Mapuii awri chu a zawi hle nang in ka hrechiang ngang mai.

'  Tinge? Engtin?' ka aw chu a khur dar dar a, ka thu chhuak nghal a, an ni nupa pawh an rawn thu ve nghal. Terina chuan ka kut a rawn vuan a, ka khur nasa kher mai.

'  Pathian hremna ani ngei ang. I kalbo hnu lawk khan a cancer tih kan hrechhuak a' Mapuii chuan ati leh sap a...

'  Chuan?' ka lo ti bauh a. Han sawi mai tur ka hrelo. U Ruatkima, mipa hrisel tha tak, hmeltha leh ei leh in a fimkhur em em, ruihtheihthil a insum thei tak thin chu a cancer ve thei amaw?

'  Nia, a thil tih tha lo tak avang khan Pathian in a hrem ve ani mahna le. A hrawk alo cancer a, tichuan a aw bawm thleng a khawih thlen hman avang in an zai a, mahse Pathian in a nunna  em chu a zuahsak a, tunah chuan a tawng thei tawh lova' meng khup lap chuan a sawi a, min  va thawng tak em!

Tawng chhuak tur ka awm lo. Terina chuan min kuah a, Mapuii a tap bawk a, kan boruak chu a ipik churh thei. Ka tho a, ka fanu tui tak a a muhil lai chu ka zuk en a, khawvel kal dan chu  mak ka ti takzet ani.

'  Tichuan kumkhua in a tawng thei tawh lo anga' tumah ka be lo. Ka fanu chu ka en a, ka mittui pawh a tla thei lo. Ka tha a khur der der thei.

Terina te nupa chuan min hnem mawlh mawlh a, mahse enge an sawi ka hre lo. Ka awmdan  chu ka sawithiam lo. Khati khawp khan min tina mahse hetiang tur em chuan ka la phal chuang lo. Zan kan mu miah lo ani ber mai.

Zingkar ah chuan Terina te chhungkua chuan min hawsan a, kan in chu a reh ruih mai. Boihtei pawh a khua a har ve aniang. Nileng mai chuan a tlei duh vak lo a, mahse ka buaina khawp chuan a sual hran lo.

U Ruatkima chungchang chu ka ngaihtuah thin a, ka khawngaih takzet. A bialnu kha a nei em tih ka zawt miah lo. Ka fanu tui tak a a muhil sak sak chu ka thlir reng a, alo len hun ah apa hi ala hre ve duh ngei ang. Thil tam tak ka ngaihtuah a, ka rilru chu a chiri vek maiin ka hria.

Karkhat a liam hnu chuan ka dawr thar ah chuan kan nufa leh Terina te chhungkua chu kan awm thap a, Pathian hnen a hlanna kan neih zawh chuan dawr nghak nula chu chaw ei ah ka sawm a, Terina te chhungkua nen kan hlim ve khawp mai. Nula awmpui tur pawh min hmuhsak vek a, tunah chuan chhungkua tak tak kan ang ve ta. Pa ber awm lo mahse....

'  Te, inhmuh ka duh mange' Terina chuan phone ah min rawn bia a, dawr khar hun ah min rawn lam phei turin ka lo ti ve mai bawk a.

Ka fanu chu a chang zeuh zeuh in dawr ah ka hruai thin. A chhan chu nileng a dawr awm hi a peih lo a, a tlei loh phah tlat zel a, kan nula a fel a, nau awm a thiam bawk si. An lo in awm thei viau bawk.

Kan thiandun chuan Plaza restaurant ah chuan inhmachhawn in kan thu dun ran a, Terina chuan engemaw vei nei hmel a pu ani.

'  Enge ni ta?'

'  Te, i thin ti rim miah suh aw....' a ngawi dat a, ka lo nuih sak a.

'  U Ruatkima hi vawikhat chauh tal hmu la ka duh ani. A inchhir takzet a, tunah hian a fa neih pawh kan hrilh lova, i thu hmu lova sawi kan duh lova. Mahse ngaihtuah teh...'

'  Min hnawtchhuah lai khan vawikhat chiah ka tawng ngaithla ve se fa a nei dawn tih a hre ve tur alawm' ka lo tawng khalh fak a, diktak chuan ka ngaihtuah let hian ka la na vawng vawng thin ani.

'  Ka hria alawm. Amah ang mai a nunrawng i nih ve ka duhlo ani. Vawikhat chiah hmu la, fa a neih thu hi hrilh la, ani pawn a beisei ngam tawh chuang lovang che. Khawngaihtakin' ka thianpa hmel chu ka khawngaih kher mai.

'  A tha alawm. Mahse a in ah ka kal dawn miah lo ania. Ka in a alo kal pawh ka duh hek lo' ka thianpa hmel chu a hahdam huai mai.

'  Ka lawm e. Kan in ah ani mai alawm. Naktuk ah dawr kal lo la, keipawh chawlh ka lo la anga, U Ruatkima ka lo va hruai anga, nangni nufa erawh taxi rawn la mai ula'

'  A tha alawm. Mahse hrilh lawk ang che. A fanu hi a rosum rawn pek tum lo se, vawikhat a hmuh chuan duhtawk bawk rawh se' a hma a hmeichhe induhtawk tak ka nihna kha keimah ah alo la nung reng ani.

Zan ah chuan ka muhil thei reng reng lo. Ka fanu leh apa an inhmu dawn a, kei ngei pawn. Ka fanu muhil sek sek chu ka en a, apa ang chiah. A mutthilh hian a duhawm zual em em ani.

Terina te in kan thlen chuan Mapuii chiah alo awm a, naupang chu in pui lam ah an lo dah phei alo nia. Terina pawh U Ruatkima lam turin alo chhuak tawh a, Mapuii chuan lawmthu min hrilh sep a, boihtei chu min lak chhawk nghal. Sawi tur ka hrelo kher mai. Ka rilru chu a so bulh bulh ni mai hian ka hria.

Kawngka inhawng thawm ah chuan ka tha a khur der der. Terina leh U ruatkima rawn inzui lut ka hmuh chuan lo hmachhawn dan tur ka hre lo. U Ruatkima chu alo lang upa ve tawh hle mai. A sam chu a tla ve nasa tih a hriat a, samtuak a lang phauh phauh bawk. Mahse a hmel erawh ala tha reng tho mai.

'  I lo tha maw?' a tawngtheilo tih ka theihnghilh palh. A lu a bu nghauh a, ka inthiamlo kher mai.

Terina chuan Mapuii awmna lam, an nupa room lam ah min luhsan a, U Ruatkima nen chiah kan awm ta. Ngawirengin ka bul ah a rawn thu a, ka kut a vuan a, laksawn tumna ka nei hran lo.

Min melh vawng vawng a, ka khawngaih takzet ani.

'  I natna tawrh avangin ka khawngaih che. Pawi ka tihpui lutuk che' sawi mai tur ka hre lo. Tawng a tum a, mahse a ri chhuak thei si lo.

'  Tawng a ngai lo. I fanu i hmu duh em?' ka thusawiin a thawn zia chu a hmel ah a langchhuak vek. Terina ten an lo la hrilh lo tih ka hrethiam chiah. Ka nuisak a, ka tho a, Mapuii te awmna lam chu ka pan nghal.

'  U Ruatkim, hei hi nang leh kei in a kan fa anih hi' ka fanu ka pawm a, a bulah chuan kan ding a, kan nufa chuan min en a, a hmel chu ramhuai hmu ang mai ani.

A rawn ding a, mahse a taksa a chaklo tih a hriat takzet. Ka biang a rawn chul a, a kut a khur ve nasa kher mai. Boihtei chu a en a, a mittui a rawn luang ta, U Ruatkima mittui tla ka hmuh vawikhatna. A taksa a khurh nasat avangin thutthleng ah chuan ka thutpui a, boihtei lah chuan a nello aniang, ka awm ah a hmai a phum tlat.

I'M WAITING FOR U..... ONLY YOU

U Ruatkima chuan kan nufa chuan min en ngawih ngawih a, diktak chuan kuah a, hnem ka duh ve lutuk. Mahse ka thinlung hliam ser hi a reh thei ngang lo ani. Boihtei chuan ka awm atang chuan apa chu a bih dek dek a, mahse a ngaina rih ngang lo aniange....

'  I natna avang hian pawi ka ti takzet. Pathian hnen ah ka lo tawngtaipui thin dawn che nia. Boihtei hian a ngaina lo che anih pawn hriatthiam I tum hram dawn nia. Chuan fanu I nei tih ka

hriattir loh che avang in min dem lo tur in ka duh bawk che' ka thinlung ah chuan a fa ka pai thu hrilh tum a phur tak a ka awm lai a min ma kha a rawn lang iarh iarh a, ka lu ka thing nak a....

Min en vawng vawng a, a mitmeng ah chuan tlawm hliah hliah mitmeng ka hmu. Hetiang hian min la melh ngai lo. Ka khawngaih rualin ka vahvaihna hringnun liam tawh kha ka hrechhuak lo thei lo ani.

Terina leh Mapuii an lo chhuak a, eng eng emaw kan sawi hnu chuan U Ruatkima chuan Boihtei chu pawm a tum a, Boihtei lah chuan alo duhlo in alo hlau nasa mai si. A tap tuarh tuarh a, Mapuii chuan min rawn laksak vat a, U Ruatkima dar a zawite a khawih pah chuan Boihtei chu  a kalsawn pui a, kan boruak chu a uap kher mai.

'Tete, zan in chu hetah chaw min ei pui la' Terina chuan boruak dang rawn vawrh a tum a..

'  Aaaaa, kan nula ka hrilh lawk si lova, nidang ah le' diktak chuan U Ruatkima huhang chu ka zo lo. Tawng thei ve tal se ka ti takzet ani. A hmel lo tla kuam mai te, a Sam tuak pheuh pheuh te chuan min tina takzet ani e.

Hetia kan chhungkua kan inhmuhkhawm hnu hian U Ruatkima chanchin hi ka hre zui tam lo khawp mai. Mapuii te Nupa lah in engmah an sawi ri duh si lova, han buaipui vak na hun ka nei lem lo.

Ka fanu chu khum ah ka chhaih nui ar ar a, a tawng thei ve tawh reuh lutuk. Kum a tlin hma in a tawng ve nak nak tawh mai. Thla thar mai khi a kum 1 tlin cham alo ni ve dawn ta. Diktak chuan ropui deuh a lawm ve ka chak. Mahse chhungte ti a koh tur hi Terina te bak ka nei lo.

Anni chhungkua leh kan inchung luah te ka sawm a, kan dawr nghak nula leh a bialpa ka sawm bawk a, ka inbuatsaih ve tho mai.

'  Apa hi I sawm ve dawn em?' Terina te chhung chu boihtei birthday hma zan atang riak tur in ka sawm a, chaw eikham thut khawm laiin min zawt thut a, ka hamhaih kher mai.

'  Aaaa, IH, englo ania.... Englo.....' ka tawng bah niaih a...

'  Tete, a ngai kher hleinem' Mapuii chuan min lo chhan vat a, ka inthiam lo kher mai.  ' Ka tihpalh ani' ka ti sep a, hrehawm ka ti ru kher mai.

'  A ho lutuk' Mapuii chuan hrehawm ka tih a hlau ve tak tak aniang. Amah tak zawk hi ka zah ru ngawih ngawih.

Naupang ho chu an ri le lu a, nuam an ti kher mai. Keipawn nuam ka ti. Ka fanu hlim hmel hmuh tluk a nuam tih ka nei lo.

Zingkar ah ka tho a, midang an la mu a, ka inthlak sawk sawk a, ka chhuak nghal. Khawlai chu a vawt ve sur mai. Taxi ka chang a, alo kal hmasa ber ah chuan lut in ka kalna tur ka hrilh a, ngawireng in min kal pui nghal.

Kawngka ka kik dat dat a, thawm rawn ri rak rak chu ka hria a, ka thin a phu ve zawih zawih mai. Kum a liam ta, he in atang a ka chhuah hnu a ka let leh na hmasa ber ani. Mahse awm hlen tur ni lovin ka fanu vang chauh a kal ka ni.

I'M WAITING FOR U..... ONLY YOU

Kawngka inhawng ri rak ah chuan thawk ka la kawk a, nu upa ve lam tawh hi a rawn dak a, ka

hmuh ngai ani lo. Mak tih hmel deuh chuan min en a...

'  U Ruatkima a awm em?' bul han tan mai dan ka hre lo ani.

'  Awm e, engenita? Lo lut rawh' a chezia ah chuan an chhungte chu anih ka ring lo tawp mai. Kawngka min hawn sak zau hnu chuan kan lut a, ka sawithiam lo. Keimah ah effect ala awm ani. Tap chung a hnawhchhuah ka nihna in ah chuan ka lut leh chu ani ta a, ka tha a khur ru der der. Kan inneih lai a kan nupa room lam chu min pan pui a, ngawireng in ka zui ve mai. Kawngka a hawng zau chu U Ruatkima lo mu bam chu ka hmu nghal a, a hrawk ah chuan engemawni a invuah a, Boihtei nen kan hmuh hnu khan ka hmu leh tawh miah lo a, a hma ai chuan a hmel alo kang ve ta deuh. Min hruai lut tu in a inleng ka nih thu a sawi hnu chuan min chhuahsan nghal a, keichu ngawireng in ka la ding.

'  Vawiin hi Boihtei kum 1 tlinni ania, ka rawn hriattir duh che a' ngawireng a min en reng avang chuan bul han tan dan mai ka haihchham ani.

'  Thu la' a rawn tawng chhuak anih chu. Mahse a awri chu khawl a tawng ang chiah hi ani mai. Ka phu nasa lutuk chu a nui sak a....

'  Engtinnge? Ni lo, ka sawi awmzia chu...'

'  Tlem tlem chuan ka tawng ve thei tawh a' ka tawng lai chu a rawn pawtchat a, mahse a awri chu hriat a harsa lek lek ani.

'  I nghawng ami kha i tawng na tuir a i vuah tir ani maw?' ka zawhna mawl zia chu ka hre ve tho. Mahse mak ka ti em ani. Tuman hemi chungchang hi min hrilh lo. Ka sawi awmzia chu Terina te nupa in ania ka tih.

'  Umm..... Ka tawng tam thei rih lova, chuan ka fanu chu kum 1 maw anih ve tawh dawn?' a hmel ah chuan inchhirna leh hlimna inpawlh chu ka hmuthiam.

'  Ka fanu zawk. Ni lo, kan fanu, mahse min chuh tum miah suh' ka tawngdan chu a atthlak ka ti viau. Mahse ka fanu chan ka hlauh zia hi tuman min hriatthiam pui pha hauh lovang.

'  Ka hria alawm. Min rawn hriattir ve avang in ka lawm e' a hmel ah chuan natna ka hmu a, mahse pawi ka ti lo. Hmeichhe dang lak a nuam min chen san lai khan eng ang zat in nge ka nat ang tih a ngaihtuah bik lo.

'  Apa i nia, i hriat ve chu a ngai alawm. Terina te chhungkua nen chaw kan eikhawm ve ang. Chuan, i lo kal ve duh em?' han sawm loh tawp chu dik thei in ka hre lo. Bakah ka chhungril hian ka fanu kum 1 tlinni hian apa ho a lawm ka chak tlat pek a, ka inhaw ru kher mai.

'  Ni lo e. Ka doctor hmuh ka ngai dawn a, bakah inhlimna tihchhiatsak cheu ka duh lo e. Kan fanu chu duhsakna min lo hlan sak la, ka hmangaih ani tih hi min lo hrilh sak dawn nia' a tawng tam ta deuh tih hriat takin a khuh that that a, ka va dawm hman teuh tak em.

'  Awle, i dam vat theih nan duhsakna ka hlan a che. Ka lo kalchhan ber ka ti tawh a, nangpawh hahdam tawh rawh, ka kal ange' ka inher nghat a, ka chhuak zui nghal.

In ka thleng chu an lo tho ve hlawm tan a, Terina chuan uluk takin min lo en a, ka zahzel ah ka nui sak a, kan nula rawngbawl chu ka pui nghal a, Mapuii chuan Boihtei te unau ho alo buaipui bawk a, Terina chuan a mitmeng in zawhna tam tak a nei. Mahse a hun lo ani.

Zing chaw eikham chuan Terina chuan Mapuii hnen ah nau lo kilkawi tur leh min chhuahpui zawk a duh thu a sawi a, Mapuii lah chuan alo remti nasa mai. Cake lak pah a ngai bawk a, ka chak lo kher mai. Terina min biak duh chhan chu ka hre ve kar a, ka peih thlawt lo.

Dar 11 a rik chuan thingpui dawr pakhat ah chuan kan thu dun ran a, ka tawng hmasa duh miah lo. Terina chuan thingpui a chah nghal a.

'  Zing ah khan khawnge i kal?' ka hlauh ang ngeiin... '

 U Ruatkima ka va hmu a' dawt a chhan ka tum lo.

'  Chuan a tawng ve thei tan tih pawh i hria anga, enge iva hmuh chhan?

'  ' Boihtei piancham ani tih ka va hriattir' ka inthlahrung kher mai.

'  Ka lawm e. Te, diktak chuan puitling tak a i thil tih hi ka lawm ani' ka ka hau a, angaihna ka hre lo kher mai.

'  Enge lawmthu sawi angaihna? Apa ania, hriat ve chu a phu alawm... Engmah lawmthu hrilh ka ngaihna ka hre lo'

'  A ngai alawm..... Mi thenkhat, dawn tawi tak te, tihsual nei ngai miah lo ang a in hmu te ang mai a mahni hmasail tak rilru kha i put ve ka duh lo ani. Eng ang pawn apa chu lo che khawlo  in lo tina che pawh nise i natna avang ringawt khan i fanu hian apa a hlat in an pafa inkarah daidanna bang i siam ka remti lo ani. Chutiang chu ti lova rilru puitling tak a i tih avangin ka chhuang takzet che' min nuih var var a, keilahin a sawi awmzia chu ka man tehchiam kher lo.   ' i ho e a. Nangmah vang chauh ani an pafa an inhmuh theih chhan. Min nawr tlat lo la ka fanu hian apa ala hmu kher lovang' amah dem lek lek chuan kan la ti zui zat a, ani lah chu alo nui mai a.

'  Chumi rilru chu alawm ka duh loh. I fanu hian tihsual a nei lo, apa pawn i fanu lak ah tihsual a nei lo. I lak ah erawh nasa takin a tisual. I na tih pawh ka hria. Mahse i natna chu i fanu ah bel tel kher suh. Ka sawi awmzia i man em?' ka hrethiam chiah e. Ni e, ka natna avang khan ka  fanu leh apa inkar ka tichhe kher tur tihna ani hauh lo. Hei lo hi pa a nei chuang lo. Ka thianpa hi chuan alo va ngaihtuah kim thin tak em!

'  Blehhh... Cake lam a hun tep ania' kan thingpui in lai chu hmanhmawh deuh in kan in a, a man kan pek fel hnu chuan cake lam tur in kan kal nghal.

In kan thlen chuan Mapuii chuan chik deuh in an pa alo en chu ka hmu a, ka nuih aza ang reng. Hemi te nupa han in man em em dan hi. Terina'n a nuihsak chuan Mapuii chu a thaw huai mai. Min ngaihtuah nupa takzet ani. Ka fanu chu alo bual fel vek a, kan dawr nghak nula leh a  bialpa pawh an lo thleng tawh a, Boihtei leh a u te chuan inchungte an ko a, ka intihfai zawh chuan cake kan zai nghal a, ka fanu hlim hmel chu hmuh nuam ka van ti tak em!

Tlai dar 4 vel ah hian mi pakhat hian present lian pui keng hian alo kal a, kan bangbo ang reng khawp mai. Mahse lehkha inziak ka en chuan U Ruatkima rawn dahtir ani tih ka hre ta. ka  lungni viau lo khawp mai. Mahse Mapuii a awm ve a, lungawi lo ang a awm a chi si loh. Kan han hawng chu Toys chi hrang hrang leh thawmhnaw alo awm a, toys chu boihtei chuan an lawm  em em khawp a, engkim mai chu a tha chi vek ani ringawt.

'  Tete, i lo dawn duh avngin ka U aiawh in lawmthu ka hrilh che' tlai chaw ei hma a room a ka kawr ka thlak zo ka din khawmuan lai chuan Mapuii chu a rawn lut ve a.

'  A ho lutuk. A fanu ani ve tho a, a duh a a rawn tihsak ani mai. Mahse khawngaihin min lo hrilh sak la, hetiang beisei hian ka hrilh lo ani tih hi'

'  Awle, ka lo hrilh ang. I beisei chu a ring bik ka ring lova. Hmanni a a hrawk a khawl an vuah hnu khan khawl vuah hi a duhleh chhan chu vawikhat tal a fanu hi hmaichhan a biak ve a chak em vang anih thu a sawi a....'

'  Helam ah awm reng suh u, naupang ril a tam tan. Nu chet hun' Terina chuan a rawn ti lut bawrh bawrh a, ka thusawi lai pawh kan chhunzawm tawh lo. Kan chhuak ve nghal.

Chaw te kan eikham hnu chu kan tifel a, Terina te pawh a tuk lam a hna kal a ngaih avangin min haw phei san a, kan nula leh keini nufa zawng kan awm leh ta. Boihtei chu a chau ve deuh aniange, a muhil zui vat a, kan nula lah a phone buaipuiin a buai ve nasa bawk. Keimah te chuan ka tei rek rek a, ka nin deuh hnu chuan ka facebook ve ta ngawt a.

I'M WAITING FOR U..... ONLY YOU

Facebook-ah hian han tihtur thlawt ka hre lo. Biak em em ka nei ngai lo bawk a, ka fanu muhil lai chu thla ka laksak a, kan upload ve ngawt a, fa te hi chu mi tan engmah ni lo mahse an lo tha ve em ani.

'  Ava han duhawm tak' Boihtei photo chu mi pakhat in a rawn comment chu ka nui ver ver a.....

'  Kan nufa in kan lawm e'

'  Keipawh ka lawm e' a polite hmel tawp. A hming chu a maksak reuh tawp. A profile chu ka check chhin a, a hmeltha rauh tawp...hahahah

Chhan dan mai ka hre tawh lova, ka out zui daih a, ka fanu kuah chuan ka muhil chhunzawm ve nghal. Ka mumang ah chuan U Ruatkima ka lo hmu nasa khawp a, ka mang a tha nge tha lo  pawh ka hrethiam lo... hihihihi

Dawr bungrua alo thlen avang in ka haw tlai ang reng viau a, ka fanu pawh alo chiau hiar ve viau tawh. Ka intifai thuak thuak a, chaw ka ei hma in Boihtei ka ti mu hmasa a, a mut ngheh hnu chuan kan nula in chaw ei min lo siam sawk sawk a, riltam tawh bawk nen, ka ei hnem kher mai. Chaw eikham ah ka inbual fai sawk sawk a, bungrua man chhutfel chuan ka bur leh ngar ngar a, rin ai takin ka inhralh ve thei reuh a, Pathian malsawmna ani chiang e.

Vawiin chu Boihtei'n min ngen deuh tlat avang in ka hruai chhuak a, October thla ani. Boruak a nuam tan tawh khawp mai. Dawr ah kan la buai lutuk lo a, kan nufa chuan dawr thenawm ah kan leng kual a, Boihtei pawh mi lawm a hlawh ve reuh khawp mai. Amah lah hi a tet deuh lai  a a khirh ang aiin tun ah chuan mi han duh loh tih vel a nei hran lova, tupawh mai hian an lawm nui uarh uarh thei tawh. Min chhun aniang...hahahah

'  Hei hi engzatman nge?' chu awri chu ka hriat hnu a ni chiang lutuk. Rang fahran chuan ka   hawi chhuak a, kan nula nen an lo indawr malh malh a, a hmel chu kan kawr khai chuan a hliah deuh a, ka hmu chiang thei lo.

'  U Tete, 1800 in kan pe thei em?' kan dawr nghak chuan min rawn zawt a.

'  Lo ha chhin se, a tawk chuan tihdan kan zawng dawn nia' a hmel ka hmuh chak em avang in chutiang zat chuan tumah kan la pe lo, mahse a hmel hmuh ka duh ani.

Chupa chu a rawn lehhawi chiah a, ka thawhawk mai. A ni lo. Ka hmuh tum ani lo. Ka lawm zawk kher mai. Boihtei chu ka sir ah a thufel at a, trial room-ah chuan a lut zui nghal a, a hmel a tha tawp.

'  Ka duhtawk chiah' tihpah chuan min rawn en nghal a.

'  Tumah khatiang zat khan ka la pe ngai miah lo a, i inhmeh kher mai. I la mai dawn nia' nui var var chuan ka lo ti a, ani pawh a nui sak. A nui hmel lah chu a pa em em lehnghal.

" Ka lawm lutuk ania' pawisa min pek pah chuan a ti zui a, pack sak mawlh mawlh pah chuan ka lo nui var var a, a nui ve leh sak a, a ha chu ava han var mawi tak em! Ka lerh reuh tawp.

A chhuah hnu chuan kan dawrnghak chuan a chhelo a tihzia a sawizui nghal a, ka nuih aza ru tawp. Nia, a chhelo chiang alawm. Boihtei chu a apple ei tur ka siamsak a, ka bul ah chuan a ei hlap hlap a, a nuam ati takzet tih ka hrethiam. Nia, ka hruaichhuak tam lova, a chhan chu  bazar boruak hi naupang hip ah ka duh vak lo ani.

'  Boihtei i hruai ami?' Terina hi chuan a tunu hi a ngaihtuah takzet ani. Mapuii pawn.. ' Aw, vawiin chu min ngen tlat a..'

'  A that chu. Vawiin tlai ah chaw ei a sawm cheu kan lo tum a, in ah Boihtei ka lo va hruai hmasa anga, ka rawn hruai leh ang che ka tia, in nula in alo sawi sia'

'  Min lo phone hmasak ve awm che alawm'

'  Ka ngaihtuah a thui lo ve thin tih i hriat kha... hahaha' he mihring hi chu aw.....  ' I nihna hi chu i hai lo mawle...hahaha'

'  Ngawi mai mai teh. Tlai ah chuan ka rawn hruai ang cheu. Boihtei chu Ani Mapuii'n han la hmasa rawh a tia, a duh angem?'

'  Aaaa, vawiin chu ni lo mai rawh se. Tlai ah min rawn lam dun zawk mai rawh. A inla pangchang ve deuh a'

'  Awle. A pawi chuang lo. Dar 5 vel ah ka rawn lam ang cheu. Bye'

Boihtei chu Apu Terina te in ah chaw kan ei dawn tih ka hrilh a, a phur ve lutuk. Kan nufa a kan chhungkaw neih ve chhun te hi kan ngaina dun chiang alawm. Anni lahin min duat em em mai bawk si...

'  Ma, papa' ka fanu chu dawr kawngka a ava ding chuan min lo au a, a thusawi chuan min ti phu nasa kher mai. Ka fanu dinna lam chu ka va pan a, kan dawr piah ah chuan U Ruatkima chu alo ding a, mahse a rawn hawi lem lo.

Ka fanu hian apa hi vawi 2 chiah ala hmu, vawikhat chu Terina te in ah khan, mahse a hlau anih kha. Vawikhat leh chu Mapuii'n min dil nasat em avang leh Mapuii lak a ka inthlahrun avang in apa in ah an va lenpui nileng tawh bawk. Apa chu alo hre ve kar anih dawn ni.

'  Boihte, inchhung ah lut ang lem. Aputea alo kal tep ania' Boihtei chu ka pawm a..

'  Papa' ka fanu chu ka rinloh lutukin a au ring kher mai. Ka hawilet zawk a, U Ruatkima chuan min rawn hmu ta, a hrawk chu a tuam tlat a, mahse hma a sawn hle tih a hmel ah a hriat. Kan lam pan chuan a rawn phei nghal a, ka tha a khur ringawt mawle...

I'M WAITING FOR U..... ONLY YOU

Boihtei chuan apa chu a melh kar a, keilah tawng mai ngaihna ka hre lo. U Ruatkima chu a nui sak a...

'  Hei hi ami i dawr chu?' a hma aiin a awri te chu hriat a nuam daih tawh zawk.

'  Aw, nih ve hi. Iva tha chak ve' ka mitmei chuan lut tur in ka sawm a, min zui lut ve nghal bawk a. Boihtei chuan alo ban vat a, thisen inzawm nge nge, inhmuh vak loh pawn pa leh fanu chu an lo innel hle tih a hriat. U Ruatkima chuan alo la vat a, mak ka ti letling.

'  Enge i tih a?' ka thutna ah chuan ka thu a, anni pafa chu chair awl ah chuan an thu a, kan dawr nghak nula Sangtei chuan min entawn zak zak a, pawn ah a chhuak ta daih a, an pafa inpawm chu an hmuhnawm ka ti ru kher mai.

'  Ka damdawi lam turin sawlai damdawi dawr ah sawn ka kal a' mi pawh a en chuang lo. A fanu bak a en lo hrim hrim.

'  A nih chu. Enge i an zel?'

'  Ka tha ve zel e' min ngaihsak hlawl lo. Boihtei bak a ngaihsak lo. Boihtei lah in apa bul a awm chu nuam a tih hmel nasa mai bawk si. Kangawi ta reng a.

'  In ah ka lo leng thei angem?' ka phu zawk. Ka ngaihtuahna hmundang daih a ka dah lai alo nia.  ' Aaaa, thei lo. Ih, englo ania, hmundang ah chaw kan ei dawn a'

'  U Ruatkima chu helam ah ilo leng ve alaw?' Terina awri ka hriat chuan ka thawhuai mai.

'  Nia. damdawi ka lei dawn a, Boihi hian min lo hmu fuh a' Terina chu alo chhang vat a, a sawi duhdan chu ka ngei tawk alo tling.

'  Anih chu mawle. Mapuii pawn rawn len phei a sawi a, Boiha a hritlang leh reuh sia, kan chhuahpui ngam ta lo alawm. Ticket chu ila fel tawh ami?' Terina thusawi awmzia chu ka bo hu a, mahse ngaithla lo ang in ka awm tlat.

'Nia, la fel tawh. Ni 20 ah ka kal ang' Boihtei chuan min rawn ngen tak avangin ka lo ban vat a...

Anih chu...... Hei, Tetei te nufa chaw ei ah ka sawm a, lo tel phei ve mai la....' Terina chu ka melh kawk a, ani lah chuan min hmulo der hmiah.

'  Ni lova, ka kal hma in an in ah ka la leng zawk ang' hman a mahni inringtawk zet mipa zia kha a pu leh tawh.

A chhuak zui nghal a, Terina lah chuan engmah a sawi zui duh lo. Boihtei a pawm nalh a, ka intuai puat puat hnu chuan Sangtei kut a dawr ka dah hnu ah kan kal zui ve nghal a. Boihtei chuan a putea pawm chu nuam a ti tih hriat takin a nui ar ar reng a, ka fanu hlim hmel hi chuan min va han tihlim thin tak em.

'  Ka lo kal thei angem?' U Ruatkima msg chu ka chhiar a, ka rilru a buai ru kher mai.  ' Enge lo kal a ngaihna?'

'  Ka kal hma in ka fanu leh nangmah hmuh che u ka duh'

'  Boihtei chu Mapuii'n a rawn hruai mai ang. Kei hi hmuh ka ngaihna ka hre lo ve' ' Min hnial lo hram teh'

'  Ka hnial ngai loh vang che ani lawm ni NUTHLAWI dinhmun a ka dinna chhan' a vawikhatna atan amah ka demna a hnen ah ka tilang ve ta.

'  Ka tihpalh takzet ani'

'  Chu chuan hun kal tawh kha siamtha thei se a lawmawm ngawt ang' ' Tete, tiang hian awm lo teh'

'Naktuk chhun ah rawn kal ang che. A bak chu beisei nawn tawh lovang che'

'  Ka lawm e' ka thil tih tum hi chu hria se lawmthu min hrilh kher hian ka ring lo.

Boihtei chu Mapuii hnen ah min lo awm sak lawk turin ka ngen a, ani lah alo lawm zamah zawk. Kan nula nen chuan motor in an phei dun a, keichu U Ruatkima lo kal tur chu rilru in peih sa at in ka lo nghak a. Alo thleng tlai lo kher mai. Alo luh chuan a mitmeng chuan Boihtei a zawng tih ka hrethiam nghal. An chhuah rih thu leh lo thu tur chuan ka hrilh a, a thu ve nmghal a.

'  Engvang a ko che nge ka nih i hria em?' a mit tak a en kal chung chuan ka ti nmghauh a, ka mizia chuan a ti phu ve chiang tih ka hria.

'  Ni e, Tete, ka ngen vang che anih ka ring. Boihtei ka hmu anga, in nufa nun ah ka rawn

inrawlh tawh ngai lovang' ami chhan dan chuan min ti hamhaih leh hle bawk.

'  Ni e, rawn inrawlh tawh ngai suh ang che. Nun bul ka tan a, nangmah vang a ka vahvaihna khawvel kha hriatchhuah nawn fo ka duh lo bawk' ka mittui chu ka khap let sak a, ni e, ka paltlang kha ka mitthla ah a rawn lang leh tlat pek ani.

'  Ka tihpalh takzet. Thiam thu sawi tur pakhatmah ka nei lo'

'  Anih chuan ka fanu nun ah pawh rawn inrawlh tawh lo la ka duh ani'

'  I nun atang chuan ka kal thei anga, mahse ka fanu erawh ka damchhung in ka kalsan thei angem tih ka chiang lo ani'

'  Anih chuan keimahni kan kalbo zawk mai ange' a mizia hi ka hrethiam lo fo thin. Tun ah pawh kan nufa nun a inrawlh loh min tiam hnu ah tihian a sawi leh si. Keichu min kalsan thei bawk. A chhan chu min hmangaih ngai miau lo ani.

'  Ni lo. Harsatna ka siam lovang che'

'  Boihtei hmuh i duh na ringawt pawh hi ka tan chuan a hnawksak' ka sual viau. Mahse ka tawrh ang kha tuar ve ula in ti ve tho lo maw?...

'  Ka tihloh tawp tur ani ka lo tih' a tho thurh a, ka hamhaih kher mai. Ngawireng in kawngka a pan a, auh din nachang pawh ka hre lo. A kal liam tur chu ka thlir tawp.

A liam hnu chuan ka en ngai ka en reng a, min lo hmangaih ngai miah lo tih chu ring thin   mahila pawm harsa ka va ti tak em! Kha leh chen nupa kan lo ni ve tawh a, a tan khan ka lo va ninawm awm thin. Ka tlawm ngawih ngawih hian ka hria.

Hemi hnu hian vvawikhat mah U Ruatkima ka hmu tawh lo. Mak deuh maiin Mapuii chuan min hlat sawt riau a hriatna ka nei. Mahse a tilang chuang pawn ka hre lo. Nidang aiin min lo be khat a, Boihtei erawh engemaw chang chuan ala rawn la phei ve reng tho. Mhase a hma ang khan kan in pawh ta lo hian ka hre tlat. Terina erawh a pangai reng.

Nikhat chu erina te in ah sawi lawk lovin kan nufa chuan kan va kal a, pawn atang chuan  Terina te nupa in hau thawm ka hria a, let leh mai ka tum lai chuan ka hming an lam rik avang chuan ka ding a, a mawilo tih hre mahila ka ngaithla ta reng a, mak ka va ti tak em!

Ngawireng in ka let a, in kan thlen chuan kan nula chuan Boihtei chu alo kai hrang vat a, ka hmel ah tihbuai ka chi loh tih a man thiam ani. Ngawireng in room ah ka lut a, khum ah chuan ka mu hnak a, Terina chuan keimah vang in a nupui a beng amaw? Chupawh ka hma chiah ka sial avang a pafa inhmuh leh tawh ngai lo tur a ka siam avang in.

Terina chu ka phone a, engmah hrelo ang in ka awm a, in a min lo tlawh turin ka ngen ani. Ani pawh chuan alo kal tur thu a sawi a, ka in thing harh a, Boihtei chu eitur ka hrai puar hnu ah chuan kan nula nen chuan TV an en dun a.

Aputea awri a hria chu a in perh tho at a, kawngka lam ah a tlan phei nghal a, an putu chuan an inchhaih nui ar ar a, an rawn inpawm phei a, ka bul a nghah pah chuan zawhna mitmeng chuan min en nghal a, ka lo nuih ringawt.

Boihtei chu kan nula nen chuan inchung ah an leng chho a, Terina nen chauh chuan kan awm ta ran.

'  Enge min koh chhan ni ta?'

'  U Ruatkima kalna ka hre duh a' a mitmeng ah chuan mak tihna ka hmu nghal. ' Engatan nge?'

'  Ka hmu duh ani'

'  Te, i tlai tawh. A thil lo tih tawh avang khan hrehawm a ti lutuk a, hmanni ah ilo hau ve deuh emawni, khata tang phei kha chuan Aizawl awm nuam ati tawh lova, chhuahsan hlen turin a  kal tawh' ka thu hriat chu ka hriat sa tho ani.

'  Nichin a Mapuii nen in inhau kha ka hria a, lo len kan tum a, mahse kan let leh ta anih kha. Terin, keimah vang in i nupui kutthlak tawh ngai suh aw....' ka mittui a tling pap a, Terina chuan ngawireng in min en a.

'  I tawrhna hi tuman an hriatthiam pui phak lovang che. Nangmah dem zawng a thusawi hi ka duh lo' a aw chu a bung nghut a, he mihring hian a farnu ang tak in min hmangaih takzet ani tih ka hria. Ka tho a, a bul a thut pahin ka kuah a, lawmthu ka hrilh sep a, a ngawireng.

'  U Ruatkima chu zawn hmuh ka duh ani. Tisual thei lo mihring kan awm lo. Keima tawrhna chiah ngaihtuahin thutlukna ka lo siam a, sim a tihtak zet a ngaihdam diltu chu Pathian pawn a ngaidam thei alawm. I mi hmangaihna ah ka alwm a, U Ruatkima chu min auh let sak la, a fanu nen hian pa leh fa inkar a hmangaihna chu in pe tawn tur in zalenna a nei ani tih min hrilh sak ang che'

Terina chuan mak ti zetin min en a, keilah chuan ka lo nuih var var a, engmah a sawi lo. Ka kut ala a, a hmer vawng vawng.

Kum 1 a liam ta. Ka fanu pawh apa bul ah a riak phei a, keipawn a hma aia nasa zawk in hna  ka thawk a, pasal neih leh lam ka ngaihtuah lo. U Ruatkima hnen a let leh pawh ka duh hek lo. Ser nung nen a in pawm leh ai chuan kan theihtawp ve ve a kan fanu neihchhun chu hmangaih rawn ka duh zawk ani.

Vawi tam tak Terina pawn min sawipui a, mahse inneih leh kher chu ka thinlung hliam hian a zuam tawh lo ani. Tuman min nawrlui ta lo a, Mapuii pawh ka thutlukna ah a lawm thiam em em a, a vahnu leh a u inkar ah daidanna bang ka phelh a, an duhtawkin an duat ve ngam tawh a, mahse a uchuak erawh ka remti hauh lo thung.

U Ruatkima pawh a tha chak em em a, hmuh theihin a hmel a mawi chak a, ka lawmpui hle  ani. Boihtei hian a hrawk a khawl vuah hi khawih a chak thin a, a buaithlak theih zia thu te nui hawk hawk in min hrilh a, tun ah chuan nupa ni thin kha thian tha tak ang in kan inkawm ta. A thil tihsual kha ka ngaidam vek a, mahse ka ngaihdam avang khan inneih leh ka duh phah lo tih tlang takin ka hrilh a, ani pawh in lawm takin a pawm ve bawk. Kan fanu tan a tha ber zel ni a kan hriat sawidun thin in thian tha tak kan lo ni ta ani.

A TAWP TA