ECCITATO - 16

ECCITATO - 16


ELTY LUHLUL AUG HNAMTE


`Chu lo pawh`Noah hmel chu a hlauhawm tih piah lam a ni.


`Tumah....`


`I patea pawh alo kal miah lo amaw?` a au in a au a ni ber tawh. Maktizetin ka en tawn a, Liani hlauthawng hmel zet a a meng chu ka hmu hman, mahse a reh leh nghal vat thung.


`I sawi awmzia ka hre miah lo` a hmel ah chuan zamna ka hmu lo. Tin, an thusawi awmzia hi engmah ka hre lo bawk. Ka U an sawi a, tunah Liani patea ani veleh thung bawk si.


`Tunah hian i sawi dawn nge police kut ah ka hlan zawk dawn che?` Noah hmel chu a ngainatawm lo satliah mai pawh a ni lo, thihna rim a hnai ka ti mai.


`Enge thil awmzia hi?` ka ti chhuak a nge nge.


`Nimin ah khan ka nu hmu tur hian i U leh Spi pa chiah kan in ah an kal. I U erawh chu rei a awm lo, a kalchhan pawh chiang takin ka hria. Keini pahnih min hmuak tur a ka nu kal ve duh leh duh loh zawtin a kal. Spi pa hi Liani pa unaupa a ni. Ani kha ka nu kutthlak a inchung atang lum thla ang a sawitu a ni. Chutah he hmeichhe tenawm zet hian i U puh ala tum cheu a, amah a inpuan ka nghak viau na in tihian police kut a hlan mai a tha zawk anih hi` Noah in a tih chuan makti zetin Liani chu ka en reng ringawt. Heti khawp a duhsak a duat tu te chung a a thiltih hi rapthlak ka ti lutuk.


`A finfiahna i nei hauh lo` zam miah lo chuan Noah chu a en kal a, tunah chuan a hmaikawr a inhlip ta takzet e.


`CCTV hian dawt a sawi ve ngai lo. Tunah chuan i hun pum chu jail lam ah i hmang ral tawh dawn nia` Noah chu a inher vut a, kawngka ava hawng a, pawn ah chuan Police an lo awm thap a, Liani chu an hling nghal a, mahse mak ka tih em em chu a mitmeng ah inchhirna emaw, zamna emaw hmuh tur engmah a awm lo chu a ni. Ka nu nen khan an inkawmngeih em em a, ka nu hian duat pawh a duat, engkim mai hi alo inthlunzawm vel vek mai chu anih hi.


Liani police ten an hruai hnu chuan kan nupa chauh chuan kan awm ta ran a, Sofa ah chuan ka thu hnak a, kan huntawn chu a ipik thlak takzet a ni. Mut pawh a chakawm tawh thlawt loh. Noah chu ka bulah a rawn thu a, anipawh a chau tih a hriat ngawih ngawih. Ka kut a rawn hum a, a lu chu sofa nghenchhan ah chuan a nghat a, a mit a chhing a, a in a alo let leh hmasak ber ah hian a huntawn hi a duhawm loh takzet a ni.


`Kan mu dawn ami niang?` ka ti sap a, diktak chuan keipawh ka chau takzet a ni.


`Lo va intifai la, in tur ka rawn siam ang` zawi zet chuan a rawn meng a, mut dawn a thingpui emaw, juice emaw tal in hi a sim thei lo chu anih hi.


`Keiman ka lo siam dawn mi?`ka tih chuan a thu tha a, a lu a thing mut a.


`Aih, lo han inbual rawh` a ti leh mai a, hnial ka tum hran lo. Mipa tak ni mahse ei leh in siam hi a thiam ve fu tih ka hria. Chutihrualin mi hmuh leh hriat ah a siam mai mai ngai lo thung.


Ka inbual zawh chuan Noah pawh juice siam sa nen sofa-ah alo thu a, kitchen lam bathroom a hmang tih chu a lo fai vang tawh atang chuan hrilh kher ka mamawh hauh lo.


`Lo in la, kan mu hahchawl dawn nia` ka inthlak zawh chuan alo ti vat a, nichin a pa nelawm loh tak kha a bo leh hmak tawh.


`Englo, enge thil awmzia diktak ka hrethiam lo a`


`Ni e, engmah hrilhna hun che ka la nei lo a. Liani hi kan in a lo awm tur hian ka nu rawn hruai luh ania, rinhlehna ka nei hran lo. a chhan chu tette atang a awmpui nei thang kan ni miau a. Mahse nang nen kan inneih hnu khan zankhat chu i mu tawh a, ka mu thei lo kha kitchen lam ah ka chhuk a, chutah chuan pawnlam a tawng thawm ka hriat avangin ka chhuak a, kawt ah chuan Liani alo ding a, min hnungchhawn zawng a a din avangin min hmu lem lo. Tahchuan ania anihna ka hriatchhuah tak. Ka nu pawhin a nihna a hrereng, mahse ka nu khan khatihlai khan khehpuam ah hian alo inrawlh daih tawh alo nia, ka hriattirh chuan ka na lutuk. Dan ang a hremtir kha harsa ka ti tlat a, ka nu zawk kha ka chhui ru ta tlat a, amah man theihna kha thil tam tak ka chhuichhuak ta reng bawk. Mahse min hringtu anih miau avangin man tir tur khan huaisenna ka nei thei tlat lo. Chubakah nangnen in inmil em em bawk nen, khatihlai khan ka nu kha mantir ta ila a tuar ber tur chu nangmah i ni tih ka hria. Tin, ka hmangaih miau che avangin min haw tur kha ka tuar zo dawn in ka hre lo bawk.


Tichuan facebook lam ah ka chanchin chu fake account siam in ka chhuah ta a, remruatna fel tak nen a ti ka ni. Khami boruak ah khan ka kalbo anga, ka nu chauh ni lo, khehpuam kaihhnawih tupawh ching chhuak turin ka nunna ka thap mai ang tih kha ka rilru a ni. Diktak chuan dam a ka chhuah ka inring lo hrim hrim. Mahse Kimkimi bawk kha ka vanneihpui leh ta hlauh. Kalsan che kha ka hreh lutuk, ka chhuahsan dawn che a tui tak a i muhil hmel kha ka phone ah hian ka la dah reng. Mahse mahni hmasial takin Mizo thalai suattu te kha haiderin ka awm thei ngang lo a, Pathian hnen ah nang hi khawvel ah ka tawng tawh lo che anihpawhin vanram ah tal min intawntir leh turin ka dil hial a ni. Tunah chuan ka tum hlen in hahdam takin kan awmdun thei tawh ang` a sawi zawh meuh chuan ka lo tang teuh. Khang zawng zawng kha amah hringtu a nu thiltih thalo vang a rilru na tak chung a alo tih vek alo nihchu.


`Atir ah engkim min hrilh la chuan nangmah chauh a i paltlang a ngai lo tur` ka no ken chu ka dah a, a kawng ah chuan ka ban pahnih ka va rawlh a, a awm ah chuan ka be chial a, a dinhmun lo hrehawm dan tur ka ngaihtuah a, ka khawngaih takzet a ni.


`Khatihlai khan hrilh ta che ila i nunna kha a derthawng dawn tih ka hrechiang em em. Tu mipa in nge a hmangaih tak chu dinhmun derthawng ah dah duh tehlul ang? Min haw rih mahla pialral ah tal ka la hrilhfiah thei mahna che tih bak kha beiseina ka nei lo. Mahse tunah chuan engkim i hrefiah tawh alawm tiraw?` ka lu ah a fawp zauh a, he mihring ka lo nei hi ka tisual hauh lo tih ka chiang telh telh.


Chanchinbu lam ah kan chuang nasa a, mahse a mawi lo zawng erawh engmah hriattur a awm lo thung. Ka nu erawh vanduaithlak takin damdawiin ah karkhat leh ni 2 a awm ni ah chiah min peih loh san ta thung. Noah reng a lainatawm. Apa te nupa an lo chho a, a tuar na tih a mitmeng, a chezia engkim ah a hriat. Chutihrual erawh chuan puitling takin a hma a tihtur awm erawh a hlenchhuak vek thung. Ka pa te an cham rei lo a, a chhan chu Hotel buaipui an ngaih bakah an naute lak kha an rawn kalsan bawk nen, lo kal leh vat min tiam chungin min letsan a, ka khua a har ngei mai. Noah lah a tawng tlem zual bawk si, diktak chuan a bul a awm a nuam lo lam lek lek a ni. Mahse a hun ah erawh min ngaihsak em em tho.


Ka nu boral atang thla 4 zet a liam leh tawh. Noah pawh a hna ngai ah a let leh tawh a, a lusun pawh a zia tawh khawp mai. Inleng pawh an tin fel tawh bawk a, awmpui erawh lak kan ti ta lo. Chutihrualin ka pa cousin fanu a fa, lehkhazir kan awmpui a, ka khawhar tur erawh a hnem viau thung. Ka U te naute ka la phei ve deuh reng bawk a, anu in hnute tui a ngah loh avangin formula a hne nasa a, chutah ala tlei em emzui bawk nen, chhunlam ah ka va la phei a, tlai ah Noah lo ban hma in ka va dah leh mai thin. A chang chuan alo haw hnu ah kan nupa in kan va dah phei thin bawk a, naute ka awt ve takzet tawh a ni.


`Vawiin chu naute lo la phei lo mai la, zanriah eichhuahna tur kan nei a, thawmhnaw ilo va bazar dawn mi niang?` zing chaw ei lai chuan a ti bauh a, thawmhnaw thar lei meuh ngai khawp chu eng ang a pawimawh nge maw anihle.


`Khawi hmun ah nge?`


`Micky te in ah ania. Kan hnathawhna a kan pu ber alo zin a, kan kawppui te nen theuh zanriah kil a rawt a` a tih chuan ka phur kher mai. a chhan chu Micky pawh ka hmu lo rei tawh a, ka nu boral lai khan hna avangin a awmbo lai ania, phone ah min rawn be fo nangin amah a awm loh chuan a khawharthlak viau a ni.


`Ava phurawm dawn ve`


`Nia, thawmhnaw hi theme ang in an ti ve a, kawrsen hak vek tur an tia, i kawrsen ho saw ka duhthu a sam chiah lo. Jasmine boutique ka lo bia anga, thui sa an neih kha i fit tawk turin i siam tir dawn nia. Hmanni ah ka en tawh a, ka lo hrilh sa dawn nia` a tih chuan ka melh haw ringawt. Hmeichhe kawr an en ve tur chu ka nuih a za ru kher mai. Mahse ka nuichhuak duh lem lo.


Jasmine boutique ka thlen chuan Noah sawi ang ngeiin alo phone fel thlap tawh a, a kawr thlan lah chu a nalh em em lehnghal. Fit that ngai miah lovin ka ta tur reng a siam ni awm takin ka tawk vei thlap lehnghal. Kawr ka lei zawh ah bazar lam ah ka chhukthla a, ka pa te dawr lam tlawh kawi duh viau mahila ka sam khawih tir ka duh avangin Zemabawk lam ka pan lehnghal thung. Bazar lam ah parlour tha tak tak awm mahse Sangsani Parlour kher hi ka pan ve ziah tawh. Ka nu in a duh ber miau a, a fanu ka ni tlat. Bakah dawr a nuamin idea a nei tha thei bawk nen, midang ka pan ta miah lo.


Noah lo haw chuan ka lo inpeih ap tawh a, ama hak tur ka lo dah fel thlap tawh bawk. Nalh min tih thu a sawi chuan ka hlim kher mai. A insiam ve sawk sawk a, thil tihna hmun tur a nghah ngai mihring nih duh lo anihna kha ala vawng reng bawk. A inpeih veleh Micky te in kan pan nghal a, kan va thlen chuan an lo la thleng kim loh bakah an pu ber pawh alo la thleng lo bawk. Chaw eikhawm satliah kan ni dawn lo tih hriat takin in an lo chei nalh phian lehnghal. Rawngbawl ni se pawnlam ami an lo order vek a, Micky nupui pawh alo nalh zeih zawih khawp mai. An naute pawh anu te in lam ah alo dah ve thlap a, Noah lahin program danglam bik anihthu a sawi bawk si lo a, ka rinaiin a puithu hmel hrep mai.


`Hey` Micky chuan min rawn pan vat a, an thawhpui thenkhat nupui te nen kan lo thu ho a, kan lo ti ti laih laih.


`Hey, ilo thlen pawh min hrilh ve duh lo a` vuihmui pu deuh chuan ka lo ti vat a, he mihring hi ka ngaina ve takzet a ni.


`Sorry. Kan buai ve bawk nen, bakah vawiin ni tur atan kan inbuatsaih nasa ve deuh a. Ka lo kal ni in ipa i tlawh ni alo ni bawk nen` a ti vei duah a, ni dawn tak, kan pa in alo kal thu a sawi tak. Ka pa a nawm meuh loh avangin ka va kan a, chaw ka ei nghal ni kha a ni tak.


`Ok. In chei nalh khawp mai` an nu bul a ka sawi ang chiah. An chei nalh bawk em a ni.


`Ka lawm e.`


`Helam ah in lo awmkhawm vek a` Noah chu ani leh ni lo angin a rawl a rawn ring ve viau. Mahse thinrim lam ni lovin hlim vang zawk tih erawh a hriat.


`Hey, in nu hi min ankhum lehnghal char char ania. Inchung lam ah an la awm hlawm ami?` Micky chuan alo ti vat a, an innel thawkhat tih hi chu an inbiak dan atang a hriat vek.


`Anihkha. Tak a, Boss in lo chho lawk teh se a tih kha` a tih chuan Micky chu a ding vat a, inchung lam panin a chho zui nghal.


`Noah, in nu hi chu i thlang fuh ngawt mai` kan piah a thu, an thawhpui zing a mi pakhat nupui chuan kan pa chu alo fiam zauh a, kan nui dar dar.


`Spi kha i nei mai dawn emaw kan lo ti hman a` kilkhat a pakhat chuan alo ti vat a, chu erawh ka nuih aza hran lo. Ka thik a ni lo a, a nunhlui ami te sawirik kher kha tul ka ti tehchiam lo a ni.


`Ani ai chuan kan nu hi a duhawm zawk alawm` nuisang a a tih chuan ka lo khi ve suk ringawt. Tingemaw mi hi thil tullo sawi hi an peih vau thin ni tih ka ngaihtuah phah hial.


Noah inchung lam a a chhoh leh hnu chuan Micky nupui ho chuan kan ti ti leh mam mam a, rinai takin kan inkawmthei hlawm phian bawk. Mi pangai chin nupui ni pha hlawm thah an ni bawk a, an bul a awm a nuam phian. Nichin a Spi rawn sawichhuak tu erawh a tawng tlem ta pharh thung. Ka khawngaih ru viau nangin a sawi tullo a sawi vang a hremna ah ka ngaihsak maI.


`Hello` ka phone chhang tur chuan kan thutkhawmna atang ka kalsawn deuh a, a chhan chu ka pa phone a ni tlat.


`Bawihi, i buai em?`


`Buai lo e. Engenita?`


`Englo ania, nizan atang khan i U Partei hi a awm a nuam thei lo a, a tha leh mai dawn emaw kan tia, hei, chawhnu lam atang khan thi in a luak reng mai a, damdawiin lam ah kan tlanchho a, an lo admit a` ka pa in a tih chuan ka thin a phu dup dup thei. Ka U nupui ni mahse ka pianpui unau an chiahin ka en. Ka thuruk tam tak min vawnsaktu ani bawk.


`Anihchu. Tinge min lo hrilh vat loh. Noah kan hrilh anga, kan rawn kal nghal dawn nia` ka tih chuan ka pa chuan an ngaihtuahawm a rin loh thu sawi mahse thi meuh a a luak tawh chuan an ngaihtuahawm loh hauh lovang tih ka chiang a ni.


Inchung lam ah ka chho a, Noah ka hmuh a ngai a ni. An thutkhawmna ah ka va kal a, mahse Micky nen inchungzawl a an awm thu min lo hrilh vat a, lawmthu hrilh pah chuan inchung panna step lam ah ka chho zui nghal. An inchung chhohna ah hian kawngka a awm leh a, kawngka chu alo inhawng deuh a, au tum a ka ka ka ang chiah chu Micky thusawi chuan min ti tawp chawt thung.


`He thu hi i hrilh vat anihloh chuan a hriatchhuah hun ah engtiang chiahin nge a huat ang che tih ngaihtuah rawh. A hmangaih che asin`