ECCITATO - 17

ECCITATO - 17


ELTY LUHLUL AUG HNAMTE


Damdawiin ah chuan ka chhungte an lo awm thap a, ka thawmhnaw hak nen chuan ka kalna hmun chu a inhmeh chiah lo nangin chutiang ngaihtuah hman pawh ka ni lo. Ka rilru erawh a nuam thei thlawt lo. Noah leh Micky ti ti kha ka hre tluan ta lo a, Noah pawh ko buai lovin keimahin taxi ka zawng chawp a, ngawirengin ka kal ta daih bawk a. Mahse an thusawi atang chuan Noah khan fa a nei thei lo tih erawh ka hre hman ta tho. Min thawng em ka hre lo, mahse na erawh ka ti viau thung. Fa ka lo awhruk em em thin chu kan tan beisei a bo tihna ani dawn a, engtikahmah naute ka nei ve thei dawn lo tihna a ni mai. Ni e, ka pasal then a midang nei a fa nei thei ka nih thu i ngaihtuah mai thei, mahse chu chu ka ngaihtuah chhin duh eih lo. A chhan chu ka pasal hi fa vang a nei ka ni tlat lo a ni.


`Va haw tawh rawh u, in hun pawimawh kan rawn tibuai vek che u a` ka pa aw-ri ka hriat chuan ka ngaihtuahna ram atang ka harhchhuak zawk a, engtiklaiin nge Noah chu alo thlen ve ka hre miah lo. Ka pa nen kawngka ah an rawn lut dun a, kei leh ka nu erawh U partei muhil mek bulah chuan kan thu thung. Mama erawh Doctor hmu turin a kalchhuak thung.


`Duhleh zanin chu in in lam ah kan lo riak ange, naute a ngaihtuahawm lutuk ang` Noah thusawi avang chuan ka kawchhung a so bulh thung.


`Aaaa, in lam a ngaihtuahawm loh ang maw?` ka pa chuan a ti leh bauh a, riak tur chuan min duh ru deuh tih chu ka hria, mahse a inthlahrung tih ka chiang.


`Buaithlak loh e. Bakah naute pawh hmuh a chakawm tawh alawm` a nui hak a, mahse a chhungril natna chu ka va hriatthiampui si em!


`A pawi lo khawp ang. Bawihi nu lah hi a kum alo tam ta deuh a, Partei nu a rawn kal dawn nangin anipawh rin tawp chi a ni dawn mang si lova` ka pa chuan a ti ta nge nge. Noah lakah ka lawm rualin ka khawngaih ngawih ngawih thung.


`Kan va inthlak anga, in lam ah kan tlang phei nghal mai ang` Noah bawk chuan a ti leh a, awih a har ka ti takzet zawk. Amah em chu a rawn riah ve ka ring miah lo. Mahse a rawn riak ve dawn miau si.


In kan thlen chuan kan intifai sawk sawk a, Noah chuan ka hrilh hmasak loh avang a vuina thu engmah a sawi hran lo. A chang chuan nelawm lo viau thin mahse mi hriatthiamna a ngahna tak hi ka chhuan em em na leh ka fak em em na thin a ni. EEngchennge kan awm ang ka hrethiam lo, U Partei dinhmun kha a tha lem lo tih chu damdawiin kan chhuahsan hma a Mama rawn let khan a sawi miau avangin thawmhnaw inken dan tur ka hre lo viau, mahse lak leh mai theih anih tho avangin hakthlak pahnih ka keng a, chhuahna tur thawmhnaw 2 ka keng bawk. Scooty ken ka duh viau nangin ka pa te in lam ah U Partei scooty a awm tho bawk a, Noah motor kan keng dawn tho bawk a, ka keng duh ta lem lo.


In kan thlen phei chuan ka nu alo haw tawh a, ka pa erawh kan driver nen UU Partei nu lo thlen an la nghak thung. Thingtlang a awm an nih avangin motor an rawn hire a, U Partei nau pakhat nen an rawn kal a, apa erawh a boral tawh a ni. Noah nen chawhmeh kan lei nual a, naute ka la nghal a, rinaitakin a tlei phian lehnghal. Nau ka ti mu a, Noah erawh a hna pawimawh a khawih thung a, ka nu leh an nula in rawng an bawl a, ka pasal neih hma a ka room thin ah naute nen kan mu thung.


`Harh tawh la` ka dar a sawi pah a ka beng bul a rawn tawng ri ah chuan ka meng a, ka lo muhil ve daih tih ka hre lo reng reng.


`Ka lo muhil ve daih a....` ka tawng ka tawp chat. Noah chuan naute alo pawm a, naute lah chuan Noah nghawng kuah chialin hnunglam alo en ve bawk. Keiaimahin fa a awh tur zia ka hria, ka tah a tichhuak.


`A tap ri ka hria a, ka lo kal a, ilo muhil tui lutuk a` a nui suk a, chutah naute rawn te that ah chuan naute chu a pawm kang deuh hlek a, a hnung a ben thuk thuk pah chuan a din pui vat a, fa nei ta ila ava duat dawn tak. Ni lo, a hnual zawngin ka ngaihtuah tur a ni lo.


`Ka lo la dawn ami?`


`Ni lo e. A fel lutuk. Inphihfai la, ipa te an lo thleng tep ania, chuan, ka nupui hian thingpui ka induh leh duh loh min la zawt miah lo` vuihmui pu deuh chuan min melh a, mahse a thinrim vang a ni lo tih erawh ka hria.


`Ummm.... Mahse chaw kan ei dawn tawh lo ami?` ka pum a ri rak a, ka riltam zia ka hrechhuak chiah. Nia, thil kan eina a rei tawh bawk a ni. Noah pawh a tam tawh ngawtin ka ring.


`A dik tho mai. tak tak a, nichin ah i nu nen kan in a, inphihfai rawh lem. Naute pawh chaw an hrai tawh a, khatiang a i mut burh burh te chuan tunge naute hi enkawl ta ang?` a nui hak a, ka lo nui ve tawp. A sawidik, naute awm tur ber ka mu ang chiah chiah a, a dik thei tlat lo a ni.


Inhnuai lam ka chhuk chuan ka nu in naute alo pawm a, ka pa te an rawn thleng chiah bawk. U Partei nu leh a nau chu hmundang a thlen ka pa in a remtih loh avangin an rawn haw pui a, an hmel ah an chauh zia a lang. Ni e, zinkawng thui tak an rawn zawh a, chutah an fanu/unaunu an ngaih em em lah a dinhmun a tha vaklo bawk nen, an chauh a thuahhnih dawn lutuk a, ka lainat tak zet a ni. An awmna tur room ah ka luhpui a, mikhual room mahnise a chhung ah bathroom kan dahtel vek a, toilet nen, khum pahnih a awm bawk a, hahdam deuh a an awm theih hram ka beisei. Rilru lam hahdam lo mahse an taksa tal hahdam se ka duhpui takzet. Keipawhin U Partei hi dam leh vat se ka ti, a chhan chu ka mo ni lovin ka unaunu neihchhun a ni tlat a ni.


Chhung inkhawm ka pa in a hmang a, chaw kan ei zui nghal. Kan boruak chu a ipik churh ti ila a dik ber ang. Ka pa in enkawlna tha ber U Partei chuan a dawn tur thu te, a thluak a thisenzam pakhat a puar thu leh a puakkeh ang tih a hlauhawm thu te, phai lam a kalpui turin a natna a rang mah mah a, helam ah doctor tha chahchhuah an tum thu te chuan U Partei nu, Nu Mawii chu a hrilh mawlh mawlh a, mahse thla erawh a phang ru tlang a ni. Diktak chuan a natna hi a rang lutuk a, chhan tlak a awm meuh lo tawh zawk a ni. Ka rindan tak phei chu ka sawi ngam lo zawk. Hetiang ang hian hman ah, vairam kan awm laiin kan awmna a awm ve, vainu, kan zir pui pakhat a awm tawh a, rei a daih tlat lo a ni. Mahse engkim chung a roreltu Pathian nung neitu te kan ni miau a, theih loh engmah a awm lo.


Chaw kan eikham meuh chuan dar 8 a pel der tawh. Naute a tlei tha duh lo tan a, formula awm mahse anu hnute nge nge atan a awm lo. Min lakchhawk an tum viau hlawm nangin api, Nu Mawii leh a nutei chu a duh der lo. a awm lo hran lo ve, an inhmu ngai lo ve bawk em a, naute tan hmuh ngai loh han nel viau tur thu awm hek lo. Ka nu lah vawiin lam a ka pa a tal hah deuh avangin ka pa a mutpui a, kan ngaihtuahawm loh thu ka sawi avangin hahdam takin mu se ka duh. Noah lakah erawh ka inthlahrung viau.


`Naktuk hna kal i ngai sia, lo mu rawh. A muhil tep a, kan lo mu ve vat ang` nau chu ka awi darh darh a, a tap nasa bawk nen, a chau ve aniang, mutthilh tumin a chhing ve suar suar tawh.


`Chawlh ka la thei alawm. Chawhnu lam ah ka va kal zawk ang, min ngaihtuah duh suh`


20mins hnu velah chuan Bawihpuia pawh a muhil nghet ve ta. Khum ah chuan dimte in ka nghat a, diktak chuan ka zei thlawt lo. Mahse nuam ka ti em em thung. Ni e, keini hian fa kan neih theih hmel si loh a, ka vahte hmangaih tak a kuah hi ka theihtawk a ni. Hrehawm ka ti reng reng lo. Ka kawng erawh a na ve hrep. A hnute hnek tur khum bul ah ka nu in a dahfel thlap a, kan mamawh tur ang engkim min chhawpsak lawk vek bawk. A vawikhatna atan naute buaipuiin ka riahpui ve dawn ta chu ania, ka nu chuan ka zei loh dan tur a hrechiang khawp ang le.


Naute tap ri ah chuan ka harh zawk a, ka mumang ang mai ni in ka hria. Ka thuchhuak hlawl a, khum bul a Noah leh naute lo in awi hlu hlu ka hmuh chuan ka thaw huai thei. Sana ka en zauh a, zinglam dar 2 a ri tep. Darkar 3 dawn chu kan muhil ve hman.


`Ka lo mutui lutuk a` inthiam lo zet chuan ka tho chhuak vat a.


`Shhhhh.... a muhil leh tep` Noah chuan mit min siai zauh a, chutah a naute pawm chu hmangaih tih hriat zetin a en zui lehnghal. Kan pahnih a fa ni ta se engtiang chiahin nge a duat ang tih ka rilru ah a rawn lut nghal zat.


`I muhil lo tih ka hria` naute a mutthilh hnu fe ah chuan Noah chuan a rawn ti sup a, ni e, ka muhil lo chiang. Ka ngaihtuahna a vak thui lutuk tlat.


`Ummmm`


`Thil sawipui che ka duh a....` nidang a a inrintawkna ang kha amah ah hmuh tur engmah a awm lo.


`Sawi la...`


`Englo ania, fa hi i awt ve em?` ka insangmar nghal at thei.


`Ka hre lo, a hahthlak dawn e....` ka rirlu ni miah lo ka sawi thung. Ni e, ka pasal hian mahni insitna a neih ka phallo. Kan chhungkua min humhim a, kan tan a nun pawh hlan phal tu hian ka duhzawng vang a mahni insitna a neih a thiang lo. Hei hi vawiin nileng a ka rilru a awm lian ber a ni.


`aaaaa, chutiang zawng ni lovin....` hetiang em em a Noah inringtawklo a a awm hi ka la hre ngai lo.


`Fa hi kan nei emaw, nei lo emaw, Pathian thu thu a nia, keichuan a engpawhnise ka ngaipawimawh lo, ka duh ber chu damchhung leh pialral ah pawh i nupui nihzel ka duh` naute a harh hlau zet chuan ka inher a, a kawng ah ka va kuah a, anierawh alo insangmar teuh thung.


`Fa ka nei thei lo` a hul hek hawk khawp mai. Sawichhuah harsa a tih hmel bawk.


`Ka hria alawm. A pawi lo, Pathian in kan chung a a rel dan hi keichuan lawm takin ka pawm` ka kuah nghet sauh bawk.


`I hria maw?` a aw chu a lawi rut a, ka thusawi chuan a thawng ani mahna le.


`Aw, vawiin khan Micky nen inchung a in sawi lai khan damdawiin a kal a ngaih thu lo hrilh che ka tum a, mahse insawi laklawh lutuk a, ka rawn pawh duh ta lo cheu a` an thusawi ngaithla ru ang a min ngaih erawh ka hlau viau thung.


`Fa ka neihpui thei dawn lo che chu pawi iti lo ami?` a thawhalh a, pawi ka ti lo ani tih hi ka rintir a ngai tih ka hria.


`Kan inneih dawn khan kan mu dun ang tih rinngaihna pawh ka hre lo a, kan mudun a, fa lam ka ngaihtuah ngai miah lo. Chuan, kan awt ta ngang anihpawhin tinge nu leh pa mamawh fahrah tam tak an awm a, chungchu kan fa ah kan siam mai loh vang` hei hi chu ka ngaihtuah lawk miah lo, mahse ka rilru ah a rawn lang tlat miau a ni.


`Ni lo, i chhungte pawhin...` a ngawi dat a, chulam ka lo la ngaihtuah ngai hauh lo. Mahse an pasal ni lovin ka pasal a ni. Fa a neih theih loh vang a an iai anihchuan keipawh an fanu atan min iai ve tihna ah ka ngai. Nakin hun ka ngaihtuah lo, mahse hei erawh ak chiang, ka pasal hi ka hmangaih a ni.


`Ka kut ah dah la, harsatna engmah a awm lovang. Muhil tawh rawh, i chau lutuk ang` ka tih chuan a rum nghut a, ka kuahna ka kut chu a rawn vuan a, a thaw hak a, a ngawi zui ta.


Kan buai chu ala intan dawn chauh tih ka pa in Doctor a hmuh hnu chuan kan hrethiam. U Partei chu damdawiin an luh hnu atang ala harh pangai leh ta miah lo a, vawiin hi ni 3-na a ni ta. Naute erawh vanneihthlak takin a tlei ta phian thung. Mahse kan inkuah hneh vang nge, tuma in min lakchhawk hleithei ta lo. Ka nu in a la zauh zauh a, zanlam ah erawh Noah nen an inkuah deuh chawt thung. Hnute tui chak a a tap ve zeuh tih loh chu buaina em em kan nei lem lo. U Partei erawh that lam aiin hniam lam a pan tlat thung. Doctor tha tak phai atang alo chho a, mahse anipawhin beisei a san loh thu leh a natna ang hi a vang a, lo dam leh ta pawh ni se a taksa hi a zeng tawh dawn a, a hriatna a hloh then bawk ang.


Mama hmel pawh hmuh theihin a hniam. Ni e, a awm lo hauh lo. Noah hi U Partei dinhmun ah hian ding ta se ka tlusawp tawh hialin ka ring. Nu Mawii leh Sangtei(U Partei nau) pawh kan thu hriat thar chuan a ti ngui hle a, Nu Mawii phei chu a tap ru deuh reng tawh a ni ber. Noah mawlh a ni fakawm chu. Engkim ah a che ah a tang a, ka pa lah han che a ro han rel zung zung turin a chak tawk tawh miau lova, chutah ka pa te in lam ah min awmpui thlap bawk a, hei bak a pasal tha an awm dawn chuang em ni?


`Mami, in in lam pawh a ngaihtuahawm tawh mange` chaw eikham chuan sitting room lam ah kan thukhawm a, chaw hi kan ei hma lem loh thin avangin chaw ei hma in Bawihpuia a muhil hman tlangpui a, chuan zanlai ah a harh leh a, darkar 1 vel kan awi a, abak chu a mu tlang ve thei mai zel. A diaper thlak pawhin a harh tawh ngai lem lo.


`Naktuk chu ka va enfel dawn emawni ka ti deuh a` ka lo ti vat a, Noah erawh bathroom lam ah a lut thung.


`In pa lakah pawh a inthlahrunawm tawh khawp mai. Naute lah i tello chuan a tlei tha duh tawh mang bawk si lova` ka nu zawk chuan alo ti vat a,a dik reng. Min hmuh loh chuan tah a tum ruai zel tlat a ni.


`Mutna ah ka lo sawipui chhin dawn nia. Bawihpuia pawh hi haw pui ta ila harsatna a awm ka ring lem lo` ka ti ve mai a. Diktak chuan ka ta chei a ni ber tawh. Ka U te nupa en in Bawihpuia han ngaihsak thei tur an awm ngang si lo a. Bakah ka fa ah ka ngai deuh reuh tlat tawh.


`Ihhh, kan in lam a haw phei lam hi kan ngaihtuah ve tawh dawn mi niang?` Bawihpuia chu a mu nghet tha viau. Noah ban ka lukham a, ka kuah chial bawk.


`Helam an ngaihtuahawm lutuk ange. I inthlahrung ami?` ka lu a rawn fawp zauh a, hei hi alawm nuam ka tih em em thin.


`Aaaaa, Bawihpuia hi kan hruai phei anga, sawta tang pawh kan buaipui thei tho a` han sawi vak dan ka thiam lem lo. Diktak chuan a fel lutuk, mahse mahni in a ni lo tih hi amah a chetkhawr deuh tlat thin na ah hian ka hrethiam ve tho.


`I nu leh pa i rawn tawh ami?` a tawngdan atang chuan haw a chak ru ve tho tih ka hrethiam.


`Aaaa, ka sawi thawi tawh a, Bawihpuia ber kan haw pui chuan an tan buaina a awm lo ani mai a`


`Rawngbawl te...` ka nui hak. Ni 3 chhung lek khan ka puitling hman bik tlat lo alawm.


`Ka ti thei ang` mak deuhin kan nupa leh Bawihpuia te nen chauh a awm chakna ka nei tlat pek. Chhungkua ang mai in!


`Naktuk lam ah kan sawi dawn nia. Duhleh ni 2/1 vel va riah ve zawk chu a pawi lovang` a tih tak ah chuan ka nui ver ver a ni mai. Chhungkua tak tak ang a awm chu ka chak tak tak a ni.


Chhungkaw in rawn khawm ang in kan in lam a zan 2/1 va riah chu kan ti tlu ta. Mahse ka buai lutuk loh nan ka nu te nula kan chhawm phei anga, Sangtei a awm tho a, ka nu te lam chu harsatna a awm lem lo thung. Noah hna ban ah min rawn lam dawn a, chumi hma in naute ka nu in alo awmpui a, Noah rualin damdawiin lam ka pan thung.


`Bawihpuia ka hruai phei dawn a` Mama chu a cher kuam tawh. Damdawiin an luh atang vawikhat chiah alo la haw, chupawh Bawihpuia a ngai lutuk a, a rawn hmu zuaih a ni mai.


`In buai phah awm mange` a ti sup a, ka khawngaih takzet a ni.


`Aih, teuh lo. Nuam ka ti lutuk. Thil i ei tha lo tih ka hria ania` tih pah chuan ka bag a a eitur ka leisak ka dah chu ka la chhuak a, a khabe hmul lo to siar te, a mitkhur tla dak mai te chu hmuh a nuam thlawt lo.


`Ka ei chak l.....` a ka ah chuan ka han hnawh thut a, a meng awk, keilah ka lo nui thung.


`I chak leh chak loh ka ngaihtuah lo. I nupui enkawl tur hian chaw tha tak a i ei a ngai tih theihnghilh suh` chu thu chuan hman ah min tawngkhum tawh. Noah bo lai khan.


`Lo harhchhuak leh ta se in tan hnawksak ani lovang tiraw?` chu thu kher chu ka lo la ngaihtuah ngai lo. Bakah mi pha lo tur pawhin lo harhchhuak leh se ka ti ngawih ngawih. A tha zawk chu duh mahila mihring ngaih ah chuan beisei a bo miau si a ni.


`Engtinnge chutiang te i sawi theih? Ka unaunu neihchhun hi eng mi pawh rawn ni se a hnawksak ngai lovang` ka mittui a tla tep. Ka U hi thil ngaihtuahna hun kan pe tam mah amh ni in ka hre bawk.


`Ka lawm e. Bawihpuia chuan harsatna a siam lovang cheu maw?` hetiang aw-ri ang chiah khan Noah khan fa a neih theih loh tur thu a sawi tawh. Ka nun ah mipa 3, ka pa, ka pasal leh ka unaupa te chiah hi an pawimawh. Mipa ka mamawh te awmchhun an ni. Ka mamawh dan a in ang lo vek thung.


`I dinhmun ah hian keimah hi ding ta ila ka fa chu engtinnge i enkawl ang?`


`Ka hrethiam e. Ka tihpalh aw....` a mitui tla tur chu a khap kir sak a, rangzetin ka kuah a, mipa a mipa zo ta lo. Ka dar ah a khabe a nghat a, a tap chhuak ta nge nge. I hria em? Khavel ah unau pakhat chauh nei la, rilru beidawng leh mangang lutuk in i dar a khabe nghatin tap ve ta se engtinnge i awm ang?


`Engkim a tha leh vek dawn alawm. Bawihpuia chu lo ngaihtuah lo la, a fel lutuk ania. Chuan, eitur i ei that loh chuan i lakah ka lungawi dawn lo ania. ka lungawi loh a ka tihdan chu i hriat kha` ka nui hak a, a zat vang erawh a ni hauh lo. ka U rilru tihthawven nan chauh a ni.


Kan in kan thlen chuan Bawihpuia chu a tlei meuh lo a, a mutchhuak tawh bawk nen, awmna sawn bawk nen, zankhatna chu kan mu meuh lo. Noah reng a fakawm, ka chau ve tawh tih a hria a, zing dar 3 vel ah nau a awi lauh lauh a, amah a palian sia, a nuihzatthlak letling zawk. Kan nula hruai erawh kan pawt buai duh hran lo. Chhun lam ah an in awrh nasa a, a chauh pawh a chau ve ang.


`Good morning` ka biang ah a hmui vawt thlarin a rawn fawh chuan ka meng vat a, alo inbual fel thlap tawh.


`Remi`n(ka nu te nula) chaw a hrai mek` ka rilru hria ni awm takin alo ti vat. Sana ka en a, dar 7 alo ri vah tawh. Ka nu te in ah lem ka harh hma theh vei nen. kan nupa room hi chu curtain kan zar chhah avangin khaw en lai pawhin zar phui that chuan a thim khup thin tlat a ni.


`Vawiin chu chawlh ania, kan vaiin damdawiin ah kal ila, chumi zawh ah naute mamawh bazar in MC ah kan kal dawn nia` Noah hmel phur sarh mai chu ka en a, ka lainat ngawih ngawih.


`Tak tak?` phur hmel zet chuan ka tho kang nghal a, a nui hak ri chuan min tihlim a ni.


`Remi pawh lo kal ve zel se, a chawhmeh siam nuam tih ho te kan lei nghal anga, Lobster kan hmeh hmel` mitko san zauh pah chuan min rawn ding nuih suk a, Lobster ka duh zia a hria, khawi ami nge a hmuh bik ang le.


`Dawt min hrilh miah suh aw....` awih deuh, awih chiah lo chuan ka en a, a nui suk duh chauh lehnghal.


Kan chaw ei te chu chhungkua kan ang lutuk tlat. Noah hmel zang vah leh Bawihpuia chair tur nimin a alo lei lawk a Bawihpuia thu ve vang mai chu ka en kham thei thlawt lo. Chawi eikham veleh kan insiam a, damdawiin lam kan pan nghal. Cabin chhung ah erawh Bawihpuia luh ve remtih anih loh avangin pawn ah apa in alo pawm a, an pafa han inpawm hmuh chu a nawm rualin mittui a kochhuak lo thei lo. Rei erawh kan awm lo a, chhuanlam siamin Noah chuan min haw pui vat a ni. Bawihpuia mamawh tur chu ka rinaiin Noah chuan alo hria. A mamawh ti ila Noah dream zawk ani hial ang. Chumi zawh ah Remi kawr tur a leisak a, Remi a lawm ngei mai. Chawhmeh ni se a duhzawng a thlan tir mai a, ka nulat lai atang a kan in a awm tawh ani bawk a, ka duhzawng leh duh loh zawng a hre hrang vek bawk. Noah lah duh loh em em nei lo ania, uih erawh a uih ber ah saum bawl bak a duh lo thung.


#  #  #


`I pasal chi hi a in recover leh thei`