ECCITATO - 18

ECCITATO - 18


ELTY LUHLUL AUG HNAMTE


`Vawiin chu doctor va hmu dun ila ka tia` chaw ei lai chuan ka ti a, a duh loh ka hlau em em bawk. A thu in fa a nei thei lo tih hre mahila keichuan doctor hmuh phawt ka duh ve thung a ni.


`Aw le` a chaw ei lai chu a chawl dat a, a insehruh viau dan ah chuan a duh lem lo tih ka hria. Mahse ka nawrlui ve thung dawn a ni.


Chaw eikham ah ka nu a rawn phei a, Bawihpuia alo awmpui dawn a ni. Ka chhungte hi ka la hriattir lem lo, bakah hun ala awm lo bawk. Tin, keimah ngeiin Doctor thusawi ka ngaithla hmasa phawt duh miau a ni. Hospital kan thlen chuan ka Doctor biak sa, keimah pawhin ka rawn ber thin Dr.Mamawii chu kan pan ding nghal a, nimin lam ah ka be lawk vek a, kan kal hun tur a hresa bawk a, nghah kan ngai lem lo.


`Infertility treatment lak hi inngaihtuah tawh ngai em?` kan hma a Doctor thu chu ngawirengin ka en a, Noah erawh a thu khawng lah thung.


`Aih...Aw... Aaaaa, englo, diktak chuan ka la ngaihtuah ngai miah lo` Noah chuan a ti bah nuaih a, kei erawh sawi tur reng ka hre lo.


`I chi hi nung miah lo ani lo a, mahse fa nei turin chance i nei tlem viau thung. 0.9% ang vel bak chance a awm lo. Mahse treatment hi ila anihchuan engemaw chen ah a pui thei ang che. Ayurvedic treatment hi la hmasa la, i hmasawn dan azirin injectables hormones kan ti leh dawn nia. Mahse thil pakhat, fa i nei thei ngei ang tih ka tiam thei lo che, nei thei tur erawh chuan nasa takin a pui ang che`


`Nihleh treatment chu nangmahin i pe thei nghal ami?` rangzet chuan ka lo ti vat a, ka phur alawm. Mahse ka tan ni lovin naute a awhzia ka hmuh avang a phur zawk ka ni.


`Keichuan ka thei lo a, mahse a pe thei tur erawh ka kawhhmuh dawn che u nia`


`Inngaihtuahna hun ka mamawh` Noah hmel ka va en vat a, thinurna te, huatna te, natna te, beidawnna te ka hmu vek maiin ka hria. Tinge inngaihtuah a ngaih chhan ka hrethiam pha hauh lo. Treatment chu lak a duh mai ka ring a, mahse ka rindan ang in a duh nghal mai hauh lo.


`Enge awmzia?` makti zet chuan ka en a, a ni erawh a mit a sen ram a, min en hauh lo thung.


`Ni e, han inngaihtuah la, i chi kan lak atang kha chuan treatment lak hian beiseina min pek ka ring deuh bawk a. Hahdam deuhin awm la, in nupa in in lo sawidun leh dawn nia` Doctor in dam dap a a tih zawh chuan Noah chu a tho vut a, a chetdan chuan min ti hawihai lutuk a, thawh ve mai nanchang pawh ka hre mai lo.


`Hun a mamawh in ka hria` Doctor in a tih chuan ka harhchhuak chiah. Rangzetin ka tho ve nghal a, lawmthu pawh hrilh nachang ka hre twh lo, ka pasal chhuahna lam kawngkhar chu ka pan nghal hlawk hlawk. Pawn ka va thlen chuan Noah chu ka hmu hman tawh lo. Motor dahna lam ka pan thla nghal a, mahse motor pawh alo awm tawh lo. Engvang a khati tak mai a lungawi lo ta nge anih ka hrethiam hauh lo bawk. Ka phone ka hmet nghal vat a, a ring char char nangin a pick up lo.


Taxi la a in ka thlen chuan kawt ah Noah motor alo awm vang tawh a, ka thaw deuh hawk. Diktak chuan ngawireng a min kalbosan leh kha ka hlau takzet tawh a ni. Rangzet chuan in ah ka tlan lut a, kitchen ah Remi`n rawng alo bawl a, be lem lovin sitting room lam ka pan tlang nghal a, sitting room ah ka nu leh Bawihpuia an lo in pawm muhil a, ka kaiharh duh hran lo. Kan room lam ka pan chho nghal a, room pawh alo ruak hiai, mahse bathroom lam atang a thawm a awm avang leh a thawmhnaw hakchhuak khum a alo leh ngat dan atang a inbual anih ngei ka ring.


`Engemaw kan sawidun thei angem?` a inbual zo a inthlak fel chuan ka lo ti vat a, hmachhawn dan tur ka thiam chiah lo, mahse ka sawipui ngei chu a ngai tih ka hre si.


`Sawi la`


`Treatment kha i duh lo anihpawhin tih kher a ngai lo ania`


`Ka la dawn alawm. Ka kalsan daih che avang khan thupha ka chawi e`


`A pawi lo. Keipawhin i rilru tur ngaihtuah miah lo in Doctor bul ah ka hruai che a`


`Ni lo. Ka hrethiam alawm i rilru tur chu. Treatment chu ka la ang, mahse chumi hma chuan thil pakhat min tiam la ka duh` a aw chu a khur ve deuh. Bakah khua a lum loh nen a thlan a chhuak tlat bawk.


`Engenita?` a rilru dam theih dan tur ber chuan ka tawng dam a, amah ah hian harsatna a lian lutuk a, mipa inringtawk tak thin kha a hlauthawng hmel ka hmu ta fo bawk a, chu chu pawm har ka ti.


`Treatment chu la ta ila, awmzia awm ta si lo se min kalsan lovang tih min tiam rawh` a tih chuan rangzetin ka va kuah a, min kalsan zawk ang tih ka hlauh zia hi engtinnge ka hrilhfiah theih ang? Amah a hlauhthawnna awm hian min tih nat rual in min tilawm si a ni. Ka tello a nun hman hi a huam ang tih ka hlau zawk daih a ni.


`Engtiklaimahin kalsan che ka tum lo. Chuan, engpawh thleng se nangmah zawk hian min kalbo san tawh suh aw.... I tello a nun harsat zia kha hriat nawn ka duh tawh lo` ka tih chuan a rum nghut a, ka khabe ah dawmin duat zetin min rawn fawp a, hetiang a hunthawl tak a han inkuah a han inchul hi kan nei khat ta viau. Rangzet a lo fawp letin a nghawng ah ka kuah a, a duhthawh tulh tulh, keilah ka bang bik lo. Tumlawk pawh awm hauh lova nupa nun sofa chung a han hman mai chu alo nuam phian.


`I nu ril a tam tawh ang a` zawi zet chuan min rawn fawp leh zauh a, he a thil chin hi alawm ka kham theih thin loh. Nupa nun hman zawh zawi lai tak a min fawh hian lung a awi kim nge nge ka ti mai.


`Intifai ila, chhuk ila. Bawihpuia pawh alo harh tawh ka ring` tih pah chuan a malchung atang chuan peih lo zetin ka tho a, ka mawng a a ben taih avang chuan kan ngur leh chhar a, a nui hawk a, mawng ben ka huat zia a hriat avang hian mi chhaih nan hian a hmang ziah thung.


Chaw eikham in ka nu pawh Noah in ava thlah a, Bawihpuia a mu laklawh bawk nen, keieawrh Bawihpuia buaipuiin ka buai ve em em thung. Remi erawh naktuk lam chawhmeh tur a siam lawk a, hei hi chu kan tihdan than a ni. Siam lawk theih ang hi kan siam lawk a, zing lam ah buai chuk a chet a ngaih loh nan kan ti a ni. Kawngka kik ri ah chuan ka hawichuak vat a, Remi chuan a hawnsak tih ka hre thei, an inbiak dan atang Micky ani tih ka hre nghal.


`Hey, ka rawn leng hleithei lo a, khawnge in pa?` sofa ah chuan a thu hnak a, Bawihpuia walker chuang chu a fiam zui nghal.



`Ka nu ava thlah a. Eng thli chhia in nge lo chhem lut ve teh khiah che a` ka lo ti ve vat.


`In inpiah deuh ah sawn ka rawn kal a, hna thil ah ania`


`Anihchu. Alo haw tep tawh ang, a kalna a rei veleh tawh a. Tak a, in nu te an tha em?`


`Tha e. Engtikah nge treatment chu laktan in tih?` a tih chuan ka hawi buai deuh hman. Vawiin ah Doctor kan hmu a, Noah chuan a thianpa alo va hrilh ni ngei tur a ni.


`Aaaa, ka hre lo le. Amah a inpeih hun a ni mai aniang chu`


`Ka lawm e aw Rs`


`Timaw?` makti deuh chuan ka en ha a.


`Ka thianpa beidawnna khur atang i chhanchhuak a. Diktak chuan kha hmeichhe nasa lutukin dawt hlir hmang a a fa pai ang a a insawi lai khan fa a nei thei lo tih reng a hre lo a, a fa emaw a pai a ti char char a, mahse a ni lo tih tunah chuan a chiang ta. Fa a nei thei lo tih a hriattirh khan a Doctor rawn khan infertility hi a neih tanna a sawi thei tlat lo a, mahse hmanni khan Doctor pakhat kan hmu dun a, anichuan a naupan lai a a damdawi ei chi khat vang a lo intan ta anih thu alo sawi hlauh mai a, anihchuan kha hmeichhia fa pai kha a fa ani thei hauh lo tihna ania. Mahse treatment erawh doctor khan alo sawi miah lo a, tunah chuan beiseina chhete kan nei leh thei ta alawm` a tih chuan mak ka ti nasa mai. Ka pasal hian ka hriatlohin alo buai ru ve hle anih hmel, ka va lainat reuh tak.


`I lo kal elaw?` ka chhan hma chuan Noah a rawn lut hlauh a, pawi ka ti lo viau. A chhan chu engmah ka hriatpui lo tih sawi kher ka duh lo a ni.


# # #


`Insiam la, naute pawh, damdawiin a kal a ngai` Noah chu dar 2 vel ah a rawn haw a, a hmel a phelh phang bawk.


`Tinge?` ka hlauthawng nghal. A chhan chu tiang hun ah Noah hi lo haw in damdawiin a kal turin min hruai tur a alo haw anihchuan U Partei dinhmun a tha lo tih hrethiam turin ka upa ve tawk tawh.


`Aaaaa, Bawihi, zawhna inzawh hun a ni lo. Naute khan a tawpna tal a hmuh a ngai a ni` ka kawchhung a so bulh a, ka tha a khur nghal.


`Ni lo`


`Pachang takin awm rawh. Remi, naute hi lo siam la, nangpawh lo insiam pah ang che` Noah chuan a ti zung zung a, keierawh chet nachang ka hre lo. Bawihpuia hi nu tello a a awm a ngai tawh dawn tihna ania.


`Bawihi, lo kal rawh le` Noah chuan ka ban ah a kai a, room ah min hruai chho a, keimah pawhin ka insiam thei lo. Noah chuan ka thawmhnaw  athlak bawrh bawrh a, a phone a ri sek tawh bawk.


`In ah kan rawn kal dawn nia` chu thu chuan min ti harh zawk.


`Ni lo, Bawihpuia`n a nu a hmu hamn tur a ni` ka ti nghal a, Noah erawh a lu a thing a, min chhang lo. Tap turin ka chawmawlh vek, inhnuai ah ka tlan thla a, Noah min um zui pawh ka hria. Remi`n Bawihpuia a lo siam zo chiah. Noah chuan Remi chu kawngka kalh fel turin a hrilh a, keini erawh motor lam panin min hruai nghal thung.


`Bawihi, i hriatthiam a ngai. In ah kan kal anga, Partei pawh in ah an rawn haw pui ang. Bawiha hi kan hruai thei lovang, in ah ilo awmpui a ngai a ni` motor khalh pah a a tih chuan hnial chi a ni lo tih ka hria, mahse pawm har ka va ti tehlul em!


In kan thlen chuan mi an lo pungkhawm tam tawh viau mai. Ka nu ka pan nghal a, Remi`n kan hnung ah min zui bawk. Ka pa erawh damdawiin lam ah a awm thung. Ka nu in min lo hmuh rualin min tahkhum nghek a, Bawiha lah chutia api tap ah chuan a tap ve tuarh tuarh bawk. Noah chuan Bawiha ala vat a, ka nu nen chuan kan tap dun tlawk tlawk. Remi lah a bang bik lo. Kan inchhung chu tahna hmun a ni ta hawt e. Kan monu duatlai, mo ang pawh a kan en loh, ka unaunu chuan van kohna min chhan san a, a na vawng vawng. Thihna hi zawng ava runthlak tehlul em!


# # #


Kan lusunna pawh thla 2 a liam ta. Kan chhungkua chu kan ngui nghiai reng ta. Noah a fakawm. Ka pa a chak tawh lova, ka U ni se rintlak eih loh kar ah makpa tihtur a hrechiang a, pa ber nih a tlin em em bawk. Kan in lam a kan haw hnu ah pawh nitin kan phei a, naute kan awmpui chawt a, a treatment lak pawh ka buaipui hman lova, mahse ning hmel emaw, vui hmel emaw a pu ngai lo. Min ngaihtuah em em reng a, ka U ni se a hruai chhuak zauh zauh a, Bawihpuia lah a duat bawk nen, ka tan chuan Angel a ni tawp mai.


`Naktuk ah Doctor hmuh ka ngai a` Bawihpuia a mu hma a, kan khum bul ah a khum tur kan siam sak a, kan khum bul chiah ah a mu ve thin.


`Ka lo kal ve ang`


`Bawiha hi....`


`Ka nu ka va phone anga, alo awmpui thei mai ang` ka tih chuan min hnial lem lo. Ni e, a treatment lak a zo a, test a neih hun a ni tawh a, amah mai chuan mipa mahnise a huphurh ve ngei ang.


Ka nu in Bawiha a rawn awmpui a, Noah pawh chawlh ala a, Doctor hmu turin kan kal a, kan nghah lai chuan Noah chu a nervous tih hriat takin a bawp a ti che sek a, kei ngei pawh ka normal bik hauh lo. Noah hming an rawn lam chuan a thaw hak a, a ding a, keipawh ka ding zui ve nghal. Doctor room ah chuan kan lut dun a, a doctor hi ka hmuh ve vawikhatna a ni. A treatment lak lai zawng kha kan chhungkaw buai lai anih avangin ka kalpui ve hman ta lo a, pa upa lam, zaidam hmel zet a ni.


Test tur a laboratory a a luh hnu chuan Doctor nen chua kan lo ti ti a, beisei a san loh thu chiang takin min hrilh tlang nghal. Ni e, diktak chuan beidawng leh tur si a dawt inhrilh ai chuan anihna diktak sawi mai hi ka duhdan a ni. Noah lo chhuah leh hnu chuan darkar 2 nghah kan la ngaih tho avangin kan chhuak leh rih a, fruit salad zawrhna dawr lam chu kan pan a, fruit salad ka ngainat zia a hria a, kan chhuah dun chuan min kalpui ziah bawk.


Kan result lam tur a kan let leh chuan in entir tur an lo tam viau tawh. Mizoram ah hetiang em em hian infertility vang a buaina tawk hi kan lo tam ang tih rin ngaihna ka hre lo. Enge a chhan ni ang tih ngaihtuahna ah a lut vang vang thei. A tlangpuiin Noah ang rual an tam ber. Harsatna in ang kan ni hlawm bawk a, kan ti ti rual thei phian hlawm bawk. Kan hun alo thlen chuan kan lut nghal vat a, Doctor hmel ka en a, engmah ka hrethiam lo.


`Thu lawmawm. I Pasal hi a chi a in recover leh thei a ni. Tunah hian hma a sawn a, treatment hi a aia chakin kan kaltir anga, beiseina sang tak kan nei a ni`