ECCITATO - 19

ECCITATO - 19


ELTY LUHLUL AUG HNAMTE


Ka au that a, Noah ka va en a, a hmel confi lo zet chu ka va nuih a, ni e, kan dinhmun a ding ve tan lo chuan he thu mawi tak, beiseina kan la nei thei ani tih tluk a thu mawi hi a tam lo khawp ang.


`Chuan?` Noah aw khur chu ka hrethiam thlawt.


`Mahse thil pakhat, 100% in a tha ang ka ti lo, beiseina kan chhem mit ngawt lovang ka tihna zawk a ni. A hma aiin i chi hi a tha tawh ka tihna anih chu. Hma kan sawn tihna a ni ber e` a tih chuan ka nui ver ver a, Noah hmel lo nung ta deuh chu ka hmuh hmaih mawlh lo.


Doctor kan hmu zo kan chhuak chu Noah hmel pawh hmuh a hahdam leh ta sawt mai. Ni e, nupui pasal inneih tawh chuan tunge fa neih duh lo tehlul ang? In kan thlen chuan Bawihpuia pawh alo fel mual mual khawp mai. Min hmuh veleh min lo ban nghal a, ani hi awm lo se inngaihtuahna hun kan ngah anga, kan nun a nguai khawpin ka ring. U Partei awm ta lo erawh rilru hian a hrereng a, ka ngai thin tak tak a ni.


`Mambawih, zanin chu Bawihpuia hi lo phei se ipa in a ti deuh a, i U in a lam ve sek tawh a, enge in ngaihdan?` ka nu chuan kan i nthlak zo sitting room kan chhuk chuan alo ti vat a.


`In tih dan dan ani mai alawm. Mahse zan a mu duh lovang tih ka hlau mange`


`Noah, nang enge i ngaihdan?` ka nu chuan Noah chu a en a, ka chhungte ka fakna em em chu, ka pasal hi engkim ah an rawn der thlap zel a, ka psal an tih zahawm bakah keimah ngei pawh ka pasal alk ah ka lang zahawm bawk ka ti mai.


`A pawi hleinem. Mahse a mut duh loh tak aleh min rawn phone mai anga` a ti ve mai. Tawngka in min pe lo mahse U Partei damloh lai atang tawh a ka kuahchawt avangin kan nupa kut ah an dah tam zawk a, U Partei chhungte lam lahin engmah sawiselna an nei hek lo.


`Remi, i duh chuan Bawihpuia hi zui phei mahla a pawi lovang, ipi te an upa deuh tawh a, zanlam ah a sual palh hlauh chuan i awm ava ngai awm ve` ka tih chuan Remi chu a phur hmel kher mai. Ni e, U Partei damloh lai a kan bul a a awm hnu khan kan la awmpui tlang zel a, hrehawm a tih vang ni lovin ka pa te in lam hi a ta neih tawh miau avangin kan in lam ah hian 100% in a bet lo tih ka hriatthiampui.


`A reh ruih mai a!` chaw eikham thleng vel ka tihfel hnu chuan kan nupa in sitting room ah TV kan en dun a, Bawihpuia a awm loh meuh chuan Noah pawh a khua a har ve ta tlat.


`Nge lakphei i phal vei ni` ka lo ti vat a, kei ngei pawh ka awm thiam ta meuh lo.


`Phal loh chi a ni hleinem. Apa in a ngaih thu a sawichhuak tawh anihchuan apa pawh a pangai chho tan tihna ania, a fapa a hmuh hun ah chuan a chak leh sawt zawk ngei ang` alo ngaihtuah kim bik thin mange.


`Englo, Micky khan Kimkimi naute kha i fa anihloh thu a sawi a` he thu hi sawidun ka duh takzet a ni. Sawina remchang ala awm lo a, remchang ka hmuh rualin ka sawichhuk ta nge nge. Ka tisual angem ka hre lo.


`Chuan?` a aw chu a zawi sup a, ka va en phei vat a, mahse a hmel ah a thinrim leh rim loh ka hrethiam hauh lo.


`Ihhh, aaaa, ka sawitum tak zawk chu, kha thil vang khan nangmah inthiam lo tawh ngai suh tih ka duh a` ka ti ta niah niah.


`Theihnghilh rawh. Kal tawh chu kal tawh ni se, hmalam chauh kan en tur a ni` a tih tak ah chuan a thinrim lem lo tih ka hria.


Kan nun chu pangai takin a kal chho bek bek a, Bawihpuia pawh ka U remtihna thlapin kan hnen ah a awm nghet ve ta. Ni e, ani hna a kal a ngai a, ka nu lah nau enkawl turin a upa tawh. Ka pa lah a sumdawnna a buaipui a ngai bawk nen, Remi erawh kan hnen ah a awm zui ta lo a, nula thar kan la thung. Noah rengin fapa kan nei ta chu nuam a ti. Kan hrin ni lo mahse ka unaupa fapa a ni miau a, kan fapa tho a ni. Kan chhungkaw nun chu a hahdam thlak hliah hliah. A chang a Noah hna thil a a zinchhuah pawhin ka khawhar hnem turin Bawihpuia a awm tawh a, engkim mai hi a hahdam thlak vek mai a ni.


# # #


`Mama, papa alo haw tep tawh angem?` Bawihpuia chuan Computer a thil ka chhut lai chuan ka bul ah a rawn kal a, tunah chuan a lawmawm lehzual tawh. Kum 3 mi a ni ve tawh a, a nu leh pa ah min ngai a, chu chu kan duhdan a ni. Pa pahnih a nei erawh a hrethiam lo viau thin. Thil hrethiam rual anih hun ah kan la hrilhfiah ve ang chu.


`Haw tep tawh ang. Papa chu i ngai tawh ami?`


`Ummm... Mama, juice ka in duh` a juice heh lutuk hi a awm na in a ngeih lo a, kan inkhap fo mai. Apa a awm chuan khap hleih theih a ni thin lo a, kan in hauh phah fo mai.


`No. Snacks ei zawk rawh aw...` ka nuih tlawn a. Tunge maw a chhun ni ka ti fo mai. A chhan chu a ngaihdan anih loh chuan a let bat a, a nuar kawi ve nasa thin.; Chutiang hun ah chuan apa chauhin a control thei thin a, a buaithlak thin viau. Mahse hmangaihna thinlung atang erawh a lawmawm lam ah a kal thung.


`Aih, mama, duh lo` a men tan nghal a, thlem leh hauh kan kawp leh dawn tih chiang takin ka hria. Kum 1 mi anih lai khan Pneumonia vangin thi lek lek in a awm tawh a, chuvangin thil tuiril lam in hi ka remti ta lo a ni.


`Papa, alo haw tep a, pawn ah kan va hmuak dawn mi?` a rilru lakpen nan chuan ka nuih var var a.


`Aih. Mama, juice in duhhhhh` chhuat ah a thu nghal rap a, Indo kan tan leh dawn.


`Aih. Naktuk ah i in dawn nia` ka ti zawh rual chuan chhuat ah a let tap a, mahse vanneihthlak takin apa motor ri in Indopui a rawn thiat ta hlauh.


`Papa....` rang deuh a thawh pah chuan kawngka lam a pan nghal a, naupang rilru thianghlim lutuk hi chu aw.....


Pawn ka va chhuah ve meuh chuan apa nen an lo in pawm vang tawh a, hek chhiat ka tawk fel hman der tawh tih an pafa hmel ah chuan ka hai hauh lo. Apa in a duat zia hria a advantage a la thiam thin hi ka ngei thin. Apa meuh pawn phal loh ngah tih in min khak ta fo a, fapa phakar tak a ni.


`Mama, juice in i phal lo ami?` apa chuan min en a, a nuih a zat hmel viau bawk.


`Aw, naktuk ah chiah a in theih` ka lo ti vat a, Bawihpuia hmel ka va en chu alo thinrim hmel nasa mai. Naupang dang ang lo takin a lungawi lohna hi a hre rei tlat thin a, min chhunna ni in ka hria.


`Aih, papa, tunah ka in duh lawmmmm` apa nghawng ah a kuah a, a ke a leng bat bawk.


`Ok, my boy, Mama thu chu tinge kan awih mai loh ang? enteh, sawta Papa te in ah kan kal dawn a, api hnen ah dil leh chhin ta la a tha mai angem?` a fapa hnung ah a beng thak thak a, Bawihpuia nawrh tum pawh a reh lehnghal hmak. Apa thu a awih dan hi mak ka ti zawk thin. Thisen ah inzawmna nei lo mahse anni tluk a pafa dang hi an awm bik chuang lovang.


Ka awm a nawm loh avangin Bawihpuia pawh ka ngaihven tha peih lo. Khum ah ka mu a, Seni`n Bawihpuia a hrai puar a, ka bul ah a rawn mu a, a ti ti siam siam a, a muhil zuinghal. Ni hnih chhung zet chu ka pum lam a nuam tawh lo a, ka eng ei mah a tui hek lo. Mutthilh ka harsat a, mahse Noah bul ah ka sawi duh lem lo thung. Pumpui ulcer hi ka tleirawl chhuah khan ka nei ve a, alo chhuak leh anih ka ring ber.


`In va mu tui awm ve` ka chal a fawh pah a Noah tawng ri ah chuan ka harh a, room chhung chu alo thim vek tawh. Chhun lam ah ruah a sur avangin khua a vawt surh bawk.


`Ilo haw na rei tawh em?` ka sir a Bawihpuia muhil sak sak chu ka va en pah zauh a, mut lam ah hi chuan min chhun bawk a, a muhil awlsam phian zel.


`Rei lutuk lo ve. I nuamsam nange? Engmah i sawi si lo va` min rawn kuah a, a rim atang chuan a inbual hman tawh anih hmel, ka inthiam chiah lo ngei mai.


`Engmah a ni lo. Ka ulcer a chhuak anih ka ring a` tih pah chuan min kuahna a ban chu ka ka chul a, diktak chuan hman atang tun thleng hian min kuah hlun hian ka thla ala muang reng.


`Naktuk ah Doctor hmuh a ngai anihchu. Bakah naktuk hi chawlh ania, kan chhung in kan teichhuak ve thei ang. Bawihpuia pawh kan hruai chhuak khat tawh emai` a tih chuan ka hnial hran lo. Chhungkua a bazar hi nuam ka tia, mahse hun kan neih loh em avangin duh ang in kan chhuak hman thin lo.


`Hey, nanghi, fa i nei tih min hrilh miah lo` ka rinloh lutuk in Rinsanga, ka bialpa hlui, ngaihzawng neih leh chak miah lo khawp a min ti na tu chu kan hma ah a ding a, a hmel chu a puitling tawhin a hmeltha lehzual tawh. Diktak chuan kan inngaihzawn lai pawh khan a lerh chhan ber chu a luck lutuk vang ah ka ngai. Hmeichhia in an duh em em a, mi hausa fa a ni bawk. Chubakah basketball a thiam em em bawk.


`I dam amaw?`


`Dam alawm. Pasal i nei tha bawk a, fa pawh i nei tha hle mai` ka pasal neih chu alo hre ve thlap chu anih hmel.


`Ka lawm e` Rinsanga hnung a Noah lo phei ka hmuh chuan ka thawhuai mai. Diktak chuan Rinsanga ka hmu kha ka ipik mup a, khatih hunlai, a tan a rinawm tak a ka awm lai a hmeichhe dang min kawpsan a, min kalsan lo tur a mittui nen ka ngen chung a min nuih a, min kalsan a, hnunglam atang a nuihza siam nan a min hmangtu, ka hmangaihna infiam nan a hmangtu han hmuh leh chu thawk a harsa talh mai.


`Noah, ani hi...`


`Nang i ni maw? He lam ah i awm elaw?` ka rin loh lutuk in Noah chuan Rinsanga chu a bia a, inhmelhriat satliah pawh an ang lo, an inhre tha hle tih a hriat tlat a ni.


`Nia, kumin chu helam ah ka awm ve ang. Nupui i nei tha hle mai` a mit a siai zauh a, ka luak a ti chhuak nghal nghulh thei. Engtia inhria nge an nih ang?


`Bawihi, ani hi ka thianpa, Micky first cousin anih hi. A naupan lai atang a chimawm tawh ania, Rinsang, ani hi ka nupui Ruatsangi anih hi` Noah chuan nui var var in min inhmelhriat tir a, sawi mai tur pawh ka hre lo. Ka nui hak ringawt.


`Khawi lam ah nge in kal dawn?` Rinsanga chuan Noah chu a en a, kalsawn vat ka chak tak zet.


`Kan nu hi a pum lam a sawisel deuh a, in check up pahin kan tei chhuak ve anih hi`


`Noah, kan tlai dawn ania, kal ang` mawi hawih pawh ka zawng peih tawh lo, ani hi kalsan vat ka duh ber tawh.


`Kan kal phawt ange. Remchang ah ila rawn leng dawn nia` Noah chuan Rinsanga chu a nuih var var a, ka lawm hlawl lo. Ni e, khang hun harsa ka paltlang zawng zawng te, amah vang a Mizoram chhuahsan a chhungte leh thiante awm lohna hmun a ka zirna chhunzawm tur a ka kal tak te, khawhar hnem nan a beer ka in tak vak te, engkim mai kha ka mitthla ah a rawn lang chuaih chuaih. Hmuh palh pawh ka duh tawh lohna khawvel hi alo zim a ni, Micky cousin alo ni zui a!


`Aw le. Chuan, a chhang tur in pai leh tawh ani lo maw?` nuih vur vur pah chuan a kalsawn nghal a, vawm zui chawrh ka van chak tak.


Doctor kan hmu zo a, damdawi min chawh nual. Pregnancy test pawh min chawh nangin chuerawh ka ring hauh lo. Noah pawhin a ring lem lo aniang tester lei pawh kan sawi ri eih lo bawk. MC vel ah kan teikual a, khua a rawn dur avangin lei tur em em kan nei lo bawk a, kan haw hma vat thung. In kan thlen in Bawihpuia ka thlak sawk sawk a, a mut a chhuah tawh avangin a chiau hiar tan viau bawk. Ka pum a no nghulh reng a, engmah ka ei chak lo. Khawsik in min tham er er reng avangin an pafa in an in ti mu a, keierawh thutthleng ah ka tlu zal thung. Tlai lam deuh ah ruah a rawn sur nghek a, an pafa a an rawn thawh pawhin ka la tho kang peih chiah lo.


`Mama, chaw ei tawh ang` Bawihpuia`n ka dar ah a rawn sawi a, peih lo zet chuan ka tho chhuak a, ka ril erawh alo tam tawh viau thung.


Seni`n chaw ei a siam a, kei ka inphihfai a, Bawihpuia te pafa sitting room lam ah an awm. Seni`n chaw ei a peih thu a sawi chuan dawhkan lam kan pan thap a, chaw kan ei tur chu chaw rim chuan ka luak a pawt ta tlat. Ka uak thawt a, rangzet a tho in bathroom lam ka pan nghal a, ka insum hman ngang lo.


`I tha em?` Noah aw-ri ka hriat tak ah chuan ka hawi chhuak a, min ngaihtuah hmel tak a min lo en kar ah chuan a sir a Bawihpuia thlaphan hmel zetin alo ding bawk.


`Ka tha. Ka pum no lutuk....` ka ngawi dat. Thla hmasa ah thi ka nei hauh lo. Tun thla ah lah ka la awl bawk, thla tawp a ni tep tawh bawk.


`Ni lo.... Noah, test ka duh` hlauthawng deuh chuan ka en a, ka ring ngam lo. Mahse thil ni thei a ni tlat.


`Maw?` Noah hmel a chian ngam lohna leh phurna awm si chuan min ti hlauthawng zual.


`Ka chiang ngam lo. Mahse...`


`Aw le. Min lo nghak lawk` tih pah chuan a in her vut a, alo let leh chuan pregnancy tester a rawn keng va bawk.


`Nanghi....`


`Aw, Bawihi, test vat rawh` a phurna chu a thup thei bik lo. Tester chu ka la a, Noah chuan Bawihpuia chu a hruai sawn a, kawngka ka khar zui nghal.


`Kha` bathroom atang a ka chhuah chuan kawngka bul ah an pafa in an lo ding ran a, chaw ei lam pawh an lo ngaihsak tawh bik lo.


`Tak tak ami?` Noah hmel chu ava han confi bik lo tak. Ni e, kum 2 chhung kha kan in test zauh zauh a, mahse kan beisei ang kan hmuh ngai loh avangin kum 1 chhung chu test pawh kan intest tawh lo, treatment pawh ala duh tawh hek lo.


`Ummm... Pa tak tak i ni ve tawh dawn` ka tih chuan min rawn pawm kang lawp a, ka nau pai vang a ka hlimna ai mahin ka pasal hlimna chuan min tihlim zawk mah.


`Mama, naute chu ka nei dawn mi?` Bawihpuia`n a rawn tih chuan Noah chuan rangzetin chhuat ah chuan min dahthla a, Bawihpuia chu a pawm vat a.


`Aw, Bawihte, mama hian nangma nau tur a nei dawn alawm` a tih chuan Bawihpuia chu a khek raih a, nau a lo duh ve tih ka hrethiam chiah.


Doctor hnen ah a tuk ah kan kal nghal a, nau chu ka lo pai tak tak. Kan nupa chuan awmngaihna kan hre lo a ni deuh tawp mai. Noah lah a hna kal tur ka dul khawih lovin a kal ngai lova, a chang phei chuan hna a awm loh deuh chuan a rawn haw hma ziah bawk. Vanneihthlak takin nau pai ka haw lutuk lova, thla 1 vel chu chaw ka ei thei lo ngei, mahse fruits lampang ka ei nasa a, keimah ah ka chaw ei theih loh a lang lem lo. Ka nu leh pa mawlh mai an hlim a, chutihrualin Mama erawh a hlim ve thei tlat lo.


`Mam, kan inbe thei angem?` ka pa in chaw ei ah min sawm a, kan vaiin kan phei a, Mama erawh hna chhuanlam siam in room lam ah a awm daih thung.


`Lo thu rawh`


`Enteh, Mam, nau ka pai avang hian Bawihpuia hi kan thlauhthlak i hlau tiraw?` a bul ah chuan ka va ding a, a dar ah ka kut ka nghat a.


`Aaaa, englo...`


`Ka hria alawm. Mahse i hlauhthawn ang chu engmah a thleng ngai lovang. Hahdam takin awm la, i nau ka dam chhung chuan Bawihpuia hian nu a nei reng tawh ang` ka tih chuan a rawn inher a, ka kawng ah a rawn kuah a, a tap a ni. Ni e, ka U a tap. Mahse lungngaih vang ni lovin lawm vang zawk a ni tih ka chiang.