ECCITATO - 20

ECCITATO - 20


ELTY LUHLUL AUG HNAMTE


`Mama, Lalawmpuia hian Papa min laksak daih ania` Bawihpuia chu ka bul ah a rawn ding tau a, a nau hi a duat viau nangin apa in an pawm ve deuh hian a ngaithei ngai lo. Apa in a pawm loh chuan Naunau ti in a ko a, apa in a pawm tawh erawh chuan a hmingpum ngat hian a ko kher zel.


`Bawihte, Nanau kha amahin ala kal ve thei lo a, ka buai chuan Papa in alo pawm a ngai thin alawm` tih pah chuan ka puan thleh lai chu ka dah a, amah chu ka kuah a, mahse a lung a awi tlat lo.


`Aih, Mama, U Seni pawh a awm, Papa kherin tinge a pawm?` ka kuahna atang a talchhuak a, a kut a kuangkuah hmak bawk.


`Aw le. Nihleh ti hian ti ang, hei hi min tih zawh pui vat la, nanau ka pawm anga, Papa in a pawm che anga` ka tih chuan a rawn nui var var a, hei hi kan nitin nun hman chhoh dan a ni ta ber. Nau ka neih hlim khan a thik lulai lutuk kha room khat ah pawh kan awm thei lo a, apa in room hran ah a riahpui mai thin a, mahse hun alo kal a, tunah a nau thla 7 a ni ve tawh a, a duat ve viau tawh a, room khat ah mu in a nau nen khum indawtin an mu a, keini nupa erawh khum khat ah kan mu. Fate mutpui loh in lo ti mai thei, mahse nakin zel ah kan buai loh nan zawk nikhua an hriat theih hma atang a muthran tir mai kha a tha kan ti zawk a ni.


`I phone a ri zing tawh khawp mai` Noah chuan Bawihpuia a pawm a, Inrinni a ni. Ka ni thlakhlelh em em thin. A chhan chu Noah in ah a awm ve thei a, Bawihpuia pawh apa a awm chuan enkawl a hahthlak loh deuh thin. Noah ka fakna em em chu Bawihpuia hi enhranna pakhatmah a nei ngai lo. Kan fapa ai pawhin a ngaihtuah zawk tih ka sawi ngam sak. A nau zawk ammawh hi a ngaihtuah vak loh laiin Bawihpuia mamawh erawh sawi ngai lo hian a lei thlap thlap zel thung.


`Hello`


`Mambawih, vawiin chu chaw rawn ei kan duh a, engemaw sawiho tur a awm bawk nen, in pa chu kan rawn hrilh tawh a` ka pa in a rawn tih chuan ka phur viau. Ka chhangchhe ve tawh a, ka pa te tlawhna hun ak ngah tawh lo. Noah erawh kartin an dam that leh that loh hre turin vawikhat tal a kal ziah thung.


`Ava nuam dawn ve. In lo phei har angem?`


`Tunah dar 11 ania, dar 1 vel ah chuan kan rawn thleng phei hman ang. Chawhmeh erawh lo buaipui lo ula. Remi`n hetah a siam lawk a, khalam ah chuan chaw chhum leh salad siam a ni mai` a tih chuan ka nui hak. Kan nula eisiam hi an ei tha peih vak lo a, ka dem hran lo. A thiam lo pawh ani lo, anni hi chuan Remi hi an mil bik tlat a ni.


`Aw le. Lo thleng vat ru, Bawihpuia pawhin nuam a ti viau ang`


Ka pa te lo kal chu Bawihpuia`n nuam a ti ngang mai. Apa diktak nen an in awrh chawt a, toys a rawn hawn nual bawk a, an pahnihin an inkhuallem a, hmuh a nawm rualin rilru in U Partei a hrereng thung. Tunh te hian la dam se nuam a tih dawn vei nen.


`Hei, hetia kan rawn phei thut chhan chu i U hi an transfer a` ka pa in a tih chuan ka hnual rawih thei. Diktak chuan hmun hran a a awm leh daih hi ka phal lo, Bawihpuia hi hmangaih em em mahila a hringtu nen a inhlat tak a an awm chu ka duh lem lo. Bawihpuia hi chu a tlei thei mai ang, mahse ka U zawk hi a tlei thei meuh angemaw chu le....


`Khawi ah?`


`Lunglei ah ania, mahse...`


`Enge?` a tawng zawh hma chuan ka lo ti vat.


`A hna hi chawlhsan in sumdawnna hi enkawl tawh mai se ka duh a` a tih chuan ka lawm lutuk chu ka nui chhuak hial. Ni e, hna chu a tha lutuk, mahse hmundang a a awm daih chuan ka nu leh pa an upat tawh bak ah Bawihpuia tan mawlh hian ka duh lo a ni mai.


`Mama, i duh ami?`


`Pawi ka ti hran lo. Ka pa remruatna aia tha hi kan tan a awm chuang hleinem` Bawihpuia chu a malchung ah a thut tir a, hmangaih tih hriat ngawih ngawih in a en bawk.


Ka pa duh ang in ka U chuan a hna a chawlhsan a, ka pa sumdawnna a enkawl a, rinai takin nuam lah a ti. Noah nen an inkawmngeih a, Noah lah sumdawn nuam ti chi alo ni nen, a hna a chawlh chang chuan ka U kawm turin a phei leh nge nge thin. Bawihpuia a hruai tel ziah bawk a, mahni pasal te leh unaupa te an inkawmngeih tluk a nuam ka tan a awm chuang lo. A changin Bawihpuia chu Noah hna kal turin dawr ah te a dah phei a, nileng in an pafa in an in awm a, tlai hna ban ah a rawn lam haw leh mai thin. Diktak chuan fa kan neih tawh vang ni lovin pa leh a fapa inkar hi nghet tak a siam kan duh bak ah nikhua alo hriat hun ah min dem loh nan leh amah a inhuat loh nan an pafa inkar hi tha tak a siam chu kan tihtur a ni.


`Bawihi, Bawihpuia hian nu neih a hnaih in ka hria` naupang mut hnu chuan kan nupa in khum ah kan mu dun a, nghet takin kan pa in min kuah bawk.


`Maw?` ka tang nghal at thei.


`Inbengdai la, i U hian kawppui neih a mamawh alawm` ka ban ah a chul hauh hauh a, diktak chuan Bawihpuia`n nuhrawn a nei tur chu ka lawm hauh lo. Khawvel a ka hlauh ber chu nuhrawn hrawn hi a ni.


`A tha alawm. Mahse an hnen ah ka dah dawn hauh lo. Nangmah pawhin dah tum la ka fate nen hian kan chhuak nghal a ni mai` ka ngaihdan diktak a ni.


`Dah dawn lo ve. Bawihpuia chu kan fapa liau liau alawm. I U zawk hian a mamawh a, kum upa ala ni lova, amah chauh a awmtir reng chu a tha lo alawm` nui hak chuan min chhang a, ka hrechiang a ni, Noah hian Bawihpuia hi kan lak atang tumah a lak tir hauh lovang. Nichin ka thusawi pawh kha ka hlauhthawn vang mai mai a sawi ka ni. Mahse laktir dawn ta ang se ka chhuahpui duh ngei ngei thung ang tih ka chiang thung.


`Nanghi, Mama hi ilo zawnpui vel ani maw?` ka inbengkang a, side table light in a hmel a hliah loh chiah ah chuan ka inbengkang a, ka melh ran bawk.


`I ti awm lo thin emai. Ka nula mi loh zia chu i hriat kha` a nui hawk a, a dik. Diktak chuan Kimkimi kha a ngaihzawng neih ka hriat pangai a ni. Spi erawh an inkawp lo tih ka hrechiang tawh. Keilah inngaihzawnna awm lo a innei kan ni bawk.


`Khawi ami nge? Tinge Mama chuan min hrilh ve mai loh le...` ka lunghnur deuh. Ka pasal nen hian diktak chuan an inmil mah mah lutuk hi ka thik fo thin, mahse huatna tello in.


`Zotlang ami ania. Indawr piah deuh ah khan dawr an rawn siam thar a, a hma in college an lo kal ho tawh ani awm e. Nula fel tak anih hmel` a tih chuan ka thaw huai. Mi tha lo tak mo ah neih ka hlau takzet. U Partei tluk kha chu an awm tawh in ka ring lo.


`Anihchu. Mahse U Partei chhungte...` ka ngawi dat a, nupui nei leh hma an tih ka hlau a ni.


`Lungngai suh, i U chuan engkim a hrilh tawh a, an lawmpui hmel khawp mai` a tih chuan ka thaw huai. Mahse engmah ka hriat ve loh avang chuan ka lawm lo viau thung.


Ka u nupui neih ni chuan mi an tam khawp a, Dan khatna ngeiin nupui a nei nawn leh ta! An nu lah ka hriat mi lo ni rengin. Vairam ka awm lai a ka hriat ve chhun, ka inluahna piah lawk a inluah ve tho, Nunga U alo ni reng a, nula fel tak a ni. A kum a naupang tawh bik lova, mahni lu zo tak, sumdawn thiam tak, hmingchhiatna em em nei lo, kohhran bel mi tak a ni. Bakah anu in a pasal a zahthiam zia hi tlang sawi a ni, chu chu ka pa duhchhan tak pawh a ni. Hausakna en ngai lo ka pa in a en fo thin chu chhungkaw inrelbawlna a tha em? An hmeichhia ten an mipa te an zah thiam em? An mipa te zahawm in a awm em? Heng hi ka pa in kawppui atan a a zawn thin te an ni.


`U Mam, Bawihpuia an school step-ah a lum palh a, Hospital ah kan kal a` ka tha a khur nghal thei. Bawihpuia school kal hi keimahin hruai hram duh thin viau mahila a nau alo sual ve deuh chuan hruai theih loh chang ka nei ve fo tho. Kal lam ah apa in a thlah a, Mama te lah nau an pawm ve tawh bawk nen, an rin theih lutuk loh a, bakah nupui a neih dawn khan ka sawisa a, an nu in a hmangaih lovang tih lam ni lovin kan nupa kut ah a awm ta sa sa, kan pur buai anihloh chuan zar buai lo hram turin ka ngen sa a, chu chu an zawm viau. Engemaw chang erawh chuan an la phei tho a, mahse amah alo lung fing ve tan tawh nen, a nu leh pa tak ah min ngai bawk nen, rei a awm duh ngai lem lo thung.


`Apa i phone tawh em?`


`Aih, ka lo be hmasa che`


`Kan lo kal nghal ang` phone ka dah nghal a, Noah ka phone chu thawk pawh ka thaw hleithei tawh lo.


`Mama, Jerome nen kan infiam a, min nam a` ka fapa chu damdawiin khum ah a mu bam a, a chal tlem a tauh a, mahse a hlauhawm lem loh. Apa lo luh rual chuan apa chu alo ban nghal a, apa tang ah chuan abei hlan a, doctor in damdawi eng eng emaw min chawh hnu chuan kan haw leh ta dial a, Noah pawh a hna let tawh lovin a rawn haw tlang nghal a, Bawihtea tlei lo bawk, Bawihpuia chiau-hiar bawk, chhangchhe nun diktak chu ka tem ve chiang e. Mahse pasal tha tak neih man a awm thin, engkim ah min pui a, mipa tih vangin a thu mai mai ngai lo. Mipa tam tak chu nupui te buai em em hmu thei deuh, eizawngtu in ti lutuk a in lam a nupui te puih nachang hre lo, fa te kuah a pawm a buaipui ngai lo an tam tih ka hria, mahse chutiang mipa chu ka pasal a ni ve lo hlauh hi Pathian hnen ah lawmthu ka sawi fo thin.


`Mama, nanaute pahnih hi an harh lutuk ania....` Bawihpuia chu swimming pool awmna atang a rawn chho hnak hnak a, anu (apa nupui) ho in pool-ah an awm a, a naute pahnih a harh rual an ni ve tawh, ani lah inti tlangval ve tawh riau a, a naute hi han nin ve chang a nei tlat tawh. Vawiin hi family picnic ania, U Muani(Mama nupui) chhungte an rawn tel a, U Partei nau Sangi kan sawm bawk. Ani hi Aizawl ah hnathawk in a rawn awm ve tawh a, ka pa in a hmuhsak a ni nghe nghe.


`U chuan naute chu an duat tur ania` apa nen kan thutna inkar ah chuan a rawn ding a, apa dar a ngheng nghal. Diktak chuan keiaiin apa hi a ngaina zawk a, engpawh ti dawn se apa a rawn hmasa ngei ngei thin. Apa thu lo chuan engmah hi a ti ngai lo tluk a ni.


`Mahse an buaithlak alawm. Mama pakhat lah hi ninawm` a ti hluk a, a nuhrawn hi a ngaina lutuk lem lo. Ni e, an inhmu khat a, bakah amah nau lawm lutuk chi alo ni hran lo bawk nen, innel vak lo mahse a tu mah mah an demawm lem loh.


`Mama sawisel phal ani lo ka tih kha` ka lo ti vat a, a chhan chu a len hun ah a thanhnan ang tih ka hlau a ni.


`Mahse....`


`Aih, min hnial suh. Mama sawisel leh chu chal ah pen tur` ka lo tih khalh leh vat a, a lungawi loh hmel nasa mai.


`Papa, Mama hi min hau` apa chu a kuah a, min hek zui nghal zat. Apa a awm hi chuan a ngeng ngulh a, min chhang veleh zut zut thin. Apa awm loh thung erawh chuan mipa naupang thuawih tak a ni thung. A nau lah a duat viau tawh bawk.


`My boy, Mama khan thudik a sawi alawm. Mama pakhat zawk hi a sual lo a, Mama nen an hmangaih ve ve che. I nau te chu kan zuk hruai chhuak tawh dawn em ni niang?` tih pah chuan a thutna atang chuan a tho a, thuawih zetin Bawihpuia chuan apa kal chu a zui nghal.


Ka U in chho tawh tur a min rawn auh chuan ka thutna atang chuan ka chhungkua te tuicheng chu ka la thlir a, a nau te rawn hruai chho mai tur a ka rinlaiin apa a thlem thlu leh tih hriat takin ka hmangaih em em te pafa tuicheng chu ka thlir ta reng a, khawvel ah keiaia vannei an awm dawn bik chuang em ni? Pasal tha tak, min hmangaih a ka chhungte hmangaih em em tu ka nei a, hun harsa tak lo paltlang tawh mahila khang harsatna aia lian zawk hlimna min pe leh tu Pathian hi fak lo thei ka ni lo. Nun chak loh ngawih ngawihna khawvel ata min hruai chhuak a, ECCITATO khawvel a min luhpui leh tu ka pasal hi piang nawn leh pawh ni ila amah tho hi ka la thlang tho ang. Chutiang bawkin piang nawn leh in fa nei leh dawn ta ila ka hringnun a ECCITATO nun min pe tu ka fa te tho hi fa atan ka la duh leh tho vang.


(Ka story beitham tak leh regular thei lo tak min chhiarsak a, dawhtheihna nen a min vuan tlat thin tu te, in va hlu tak em! Hman a ELTY, lawmthusawi thiam lo bawk kha ka la ni reng ania, KA LAWM E (inhriatthiam kha). Next story atan he story chhunzawmna tho hi ala rawn kal leh ang. Mahse ka hun neih te kan insiamrem veleh phawt anga, lo let leh vat ka tum ang. He story min chhiarsaktu zawng zawngte, ka lawm em em e aw.... Story thar nen ka lo let elh vat tur ah ngai ang. Love you em em vek u)