MEZZANOTTE - 5

MEZZANOTTE - 5


ELTY LUHLUL AUG HNAMTE


Opa POV


Lola mitmeng nin hmel zet ka hmuh chuan ka nuih aza ru kher mai. Diktak chuan ka bul a awm tur a ni hauh lo nangin ka PS ber a damloh avangin ka ko lut ta kha ania, atan chuan a harsa ve khawp ang. Mahse min hnial hauh lo a tihtur ka sawi a tih ve mai avang erawh chuan ka lawm ru viau thung.


`Lola, ti kha chuan sawlam ah ilo va phei thei tawh ang` coffee min rawn chhawp hnu chuan ka lo ti nghut a, a nui sek a, min buk khum zauh a, min chhuahsan zui nghal.


Nileng teh meuhin meeting kan neih zawh hnu ah dar 4 rik hma hretin kan zo fel hram a, pa tawh khirh tak a ni. Chutihrualin ka lawm zawng tak a ni thung. Sumdawnna a mi awlsam tak te hi mi hlawhtling ah an chhuak ngai lo a, harsa tak leh fimkhur tak a che thin te chauh hi mi hlawhtling an ni thin tih hi ka changvawn pakhat a ni. Kei ngei pawh hian hun harsa tak tak ka paltlang fo a, contract sign dawn phei chuan company 1 phei chuan min dawr peih tawh lo, pawi ka ti hauh lo bawk. A chhan chu awlsam tak a inzawmna neih pui reng reng a tlo ngai tlat lo.


`Sir, ka haw thei tawh angem?` kawngka a Lola lo dak chu ka melh zauh a, sana ka en zui nghal. Dar 4 alo pel hret tawh.


`Thei ang. Mahse thil pakhat, vawiin a i record kha naktuk ah dar 10-ah ka duh dawn a, engkim felfai tak a tih ka duh bawk ang`


`Mahse ka la ti ngai miah lo a...` a kut chu hmalam ah a suih a, a hmui a pet zauh a, a biang tai hlar mai chuan a tilang duhawm takzet. Shit! Ni lo, hei hi ka ngaihtuah tur a ni hauh lo, ka staff pakhat ve mai anih hi.


`I thiam lo anihchuan Asangi kha i zawt thei ang. Tun atang chuan ka PS i ni tawh dawn a, naktuk atang Muana nen i hna tur in inzirtir dawn nia` ka ti hmuk a, engvang a ani hi ka PS atan thlang nge ka nih ka hre lo. Muana hi a tha tawk viau a, a hna a tlin a, engkim ah ka chhawr thei bawk a, mahse tun a ka thutlukna hi keimah ngei pawhin ka hrethiam hauh lo.


`Hey, zanin chu chhuak ila` Jerome hi zawng zan lam chhuah hi nuam a ti viau, hrehawm ka ti bik hauh lo nangin Agatha vang khan ka chhuah chakna a tlem sawt viau.


`Pawi hleinem. Mahse ka haw mek a, khawilam ah nge?`


`Khatla lam ah chicks party a awm dawn a, keimah chuan ka zo lovang` a nui huah huah a, an nu in party a siam leh dawn tih sawi kher a ngai lo. Sarai tur an awm leh ngei bawk ang.


`Ka rawn sawm phei mai ang che` ka tih hnu chuan phone kan dah zui nghal. Ka chak viau hran lo nangin in a tawm tawp ai chuan pawi ka ti chuang hek lo.


In ka thlen in ka nu in min lo chhawnchhaih vat a, ka U alo haw tawh bawk. Ka pa erawh pawimawh ah a chhuak tih ka nu in alo sawi vat a, ka room lam ah inthlak turin ka chho zui nghal. Ka room hi kan siamna ala rei lo a, a hma chuan ka U nen inhnuai ah room indawt in kan awm thin a, mahse inchung zawl ah awm ka chak zawk avangin ka pa remtihna in ka room tur ka siam a, ka duh uluk bawk a, ka duhthu a sam viau. Ka room lehlam chiah ah room pakhat, ka hnathawhna ni pah fawm a ka thian kawmna ka siamtel bawk a, inchhung lut kher lo pawhin pawnlam atang a luh theih bawk a ni.


`Hey, hmeltha, ka lo thu ve thei angem?` ti tu hmeichhe chhelo zet chu ka melh zauh a, party ninawm lam hret a ni. A chhan chu hmeichhe kawp chakna ka neih tlat loh vang a ni. Ka mitthla a thil rawn lang leh thin chu ka haw lek lek ta mai.


`I ta vek alawm` ka nui suk a, a thawmhnaw chuan puanthan a mamawh tam lo khawp ang. A mithmul sei leh er zet chu a pianpui a ni lo tih ka sawi chiang ngam sak! A bawp khuhtu nei mang lo erawh pianpui mawina chiang tak a ni thung.


`Nuam i ti vak nange?` a nuih zawng a a hmui, lipstick sen tai hlar mai rual a a ha var that chu a inhmeh ve reng.


`Ti e. Ka lo hahchawl mai mai`


`Nunpuii ka nia` tih pah chuan a no dawm chu a lem zauh a, a hnute bu lian kawh nalh zet chuan mipa engzat tak tibuai ve tawh ang maw?


`Opa` sawi zawm tur vak ka hre lo.


`Hming mawi tak a ni. Inchung lam ah i awm thlan dai duh em?` chu sawmna chu a awmzia hrethiam lo rual ka ni hauh lo.


`Aaaa....` kan piah lawk a in tur sem hmeichhia ka va hmuh chuan ka tawng zawm mai thei lo, he hmun ah ber kher ka hmu chu ka lawm viau lo.


`Hey, ka sawi chu....`


`Ahhh, ok, a tha alawm` tih pah chuan ka tho a, a rawn tho chhuak ve nghal a, a mawngbawr chu mipa tam tak chuan an hmaih phal hauh lovang.


Inchung lam ah chuan kan inzui chho a, step chanve vel kan thlen chuan ka zuk hawithla hram a, Lola chuan min lo en kar a, ka zuk en veleh chuan a mit ala sawn vat a, rangzetin a tray chawi lai nen chuan kitchen lam a pan zuinghal a, engvang a mahni inthiam lo ve ngawt nge ka nih ka hre lo. Tumdang chu ni se he hmeichhe itawm zet hi phur takin room ka panpui tawh ngei ang, mahse tun tum erawh chu phurna ka nei eih lo.


`Min lo hrethiam la, ka rawn let leh vat ang` step kan chhuah chhoh rual chuan ka ti nghut a, Nunpuii mitmeng a maktihna lo lang chu ka hmuh hmaih hauh lo, mahse Lola hmel ka hmuh khan ka engtih mah a tui ta tlat lo a ni.


`Honey, nang hetah maw?` step ka chhuak thla chiah chu Agatha nen kan intawk hlawl. Jerome khan a tel ve tur thu a sawi hauh lo. Bakah kan thlen tirh atang ka la hmu miah lo bawk nen, ka hamhaih phian.


`Aaaa... Nia....`


`Zawngi, hawi ta che` Agatha chu a au that a, Lola tray ken chhuat a tla ri chuan a zui nghal bawk.


`Ka tihpalh lutuk` Lola chuan a ti vat a, a hmel a hlauhthawnna te, zamna te chu light eng vaklo kar ah chuan ka hmuh hmaih hauh lo.


`I hna i tlin lo anihchuan engvangin nge i thawh?` Agatha bawk. Lola chuan harsatna a tawk ngei ang le!


`Ka tihpalh lutuk Miss` a tray ken leh glass keh chu chhar turin a kun hniam nghal a, sawi ve tur ka hre hauh lo.


`I tihpalh vang khan ka thawmhnaw hi a ro phah dawn ami?` tih pah a Lola kunhniam chu Agtha chuan a zuk nam sawk a, Lola chu a thu sawp niaih a, chu em chu a mah mah ka ti ve tho.


`Agatha, a tawk` ka ti that a, hmeichhe buaina a inrawlh hi ka duh hauh lo, mahse chu aia ka duh loh chu mahni aia hniam ni a hriatte hmusit tak a tih hi ka duh lo zawk.


`Enteh, Dear, ka thawmhnaw a huh vek hi` Agatha chuan min en a, a men par bawk, hei hi chu a tih fo dan a ni.


`Thawmhnaw chu a thlak theih. Enge ka duh loh zawng tak tih i hriat kha` ka en run a, ka warning na a ni bawk.


`Mahse....`


`A tawk ka tih chu`


`He hmeichhia vang hian min vin amaw? Chupawh i staff anih vang tiraw?` Agatha chuan min en kal a, ka staff tih engtinnge alo hriat theih ka hre hauh lo.


`Helai hi ka hna chungchang sawina a ni lo` inchhung a awm te chuan min en thap tawh. Lola pawh a rawn tho chhuak a, a hmel ah chuan zahna hlir a lang. Humhim duhna in ka khat.


`Miss, ka tihpalh takzet a ni` Lola chuan Agatha chu a en a, a mit chu a khap sak sak bawk.


`Tihpalh tih sawi leh turin engmah tisual tawh suh, hmeichhe mawl lutuk` Agatha chuan a ti leh nghat a, dik tak chuan tawng hnem ka ti takzet. Officer ve meuh si manner mawi a hre lo lutuk chu engvang a lo ngaizawng thin nge ka nih ka hrethiam lo zawk.


`A thleng nawn tawh lovang` tih pah chuan Lola chu a inher a, ka khawngaih ru takzet.


`Thleng nawn tawh suh se. Fahrah tih tak ah nungchang mawi hre lo lutuk` Agatha bawk chuan a ti leh hlak a, Lola kal lai chu a ding dat a, muangchangin a rawn inher a.


`Enteh, i duhtawk thei tawh em? Fahrah i hmusit anihchuan i chung ah thleng lo mahse i fate chungah a thleng ve thei` Agatha hma tak ah chuan a ding a, nichin a tlawm hmel tak hmeichhia kha hmuh tur a awm tawh lo, hmeichhia, mahni induhtawk tak hmel a pu tawh thung.


`Iva zaklo ve nang inhlawhfa...` tih pah chuan Lola hmai chu ben a tum a, engtiklaiin nge ka kut ka chet ka hre lo, Agatha ban chu ka man bet a, makti zetin Agatha chuan min en a.


`Duhtawk tawh rawh, helai hmun a mualpho hi i duh ka ring lo` a mit ah tak chuan ka en a, ka tawng ring lo, mahse a zawm ngei ka beisei.


`Nang lehzel bawk maw? I staff ai pawhin ka hniam zawk amaw?` a mitmeng a na tihna chu ka hmu, mahse a chetdan avang khan ka lawm lo miau a, ka khawngaih hran lo.


`Lola, insiam la, ka va thlah ang che` Lola chu ka en a, ka chetdan atang chuan anipawh a hamhaih tih ka hria, mahse chutiang ka ngaihtuah lo. Helai hmun atang a lakchhuah vat hi ka tihtur a ni. Anihloh chuan heng hmeichhe nasa tak tak ho hian an chhuah hauh lovang tih ka chiang.


`Ooohhh..... Helai ah hian ka chanpual alo awm daih ani maw?` Lola kal hnu chuan Nunpuii a rawn lang veleh, buaina leh bawk.


`Henu hi tunge?` Agatha chuan min en kal a, hetiang buaina hi ka la tawk ngai hauh lo.


`Ohhh... Aga, min hre lo amaw? Nunpuii.... Min hria tiraw?` Nunpuii chuan Agatha lam chu a hawi a, a nuisang bawk. A awmdan chuan min ti hrilhhai viau bawk.


`Zawngi, ka bialpa hi ilo beisei ve tihna em ni?` Agatha chu a teu hlar mai. A bialpa ka ni tawh lo tih hi a hma aia chiang a ka hrilhfiah ngei a ngai dawn anih hi.


`Nope. I bialpa ani tawh lo ani lawm ni?` ngeiawm zet a Nunpuii nui chu ka nuih aza ru phian. Mahse ka chungchang a midang zing a inhnial erawh ka duh hauh lo.


`Babe, hrilh rawh he nu...`


`Duhtawk rawh u. Hmeichhe nasa tak hi ka ngaina lo` tih pah chuan ka inher a, pawn lam ka pan zui nghal. Jerome ka hmu lo a, phone pawh ka tum buai hek lo. Agatha a tel ve dawn tih min hrilh loh avang erawh chuan a insawifiah ve viau chu a ngai ngei ang.


`Enteh, min thlah a ngai lovang` Lola lo chhuak in min rawn hmuh chuan a rawn ti nghal a, a hmel chu current eng ah chuan a chauh hmelin rilru natna a  nei tih a hriat theih.


`Motor ah lut rawh` ka kekawr ipte ka zen a, ka thu awih tur in ka duh bawk.


`Aih, taxi ka chang thei. I hun hlu tak lo lakpen chu ka duh hauh lo`


`Ka sawi ang chuan awm mai rawh`


`Enteh, tunah hi chuan ka boss i ni hauh lo. Keimah in ka haw thei` a tih leh talh avang chuan ka thin in a tuar ta lo. A ban ah ka kai lawp a, a inring lo viau aniang a pai khat a, motor lam ah ka pawt phei a, anipawh chuan min hnial zui ngam ta bik lo aniang, motor kawngka ka hawn chuan ngawirengin a lut ve mai.


`Enteh, kha kha ka thiam loh chu ania, mahse fahrah tih kher kha ka duh lo a. I bialnu tih chu ka hre tho a, mahse....` a ngawi ta daih a, ka nui hawk ringawt. Ka bialnu tih a hria, ka chanchin chu alo hre ve tho a, mahse a hriat a hlui ve deuh tawh thung.


`Tupawhnise khatiang khan tumah intawngkhum tur a ni lo. Ka dem lo che` ka ti sup a, ka bialnu a ni tawh lo tih erawh sawi kher a tulna ka hre lo.


`A thin a rim viau ang a, a bulah i awm lo a` a ti leh sep a, nichin a hmeichhe kawlhsen tak kha tunah chuan a dang leh daih tawh.


`I bulah ka awm thung alawm` ka ti nghut a, han sawi kual duah ka thiam ve lo.


`Mahse...`


`Kan thleng e` ka tih chuan a thaw hak a, motor ka tihdin rual chuan kawngka a hawng zui nghal a, motor atang chhuk thlak auh pah chuan lawmthu a sawi sep a, rawn hawilet tawh lovin a kal nghal nal nal bawk. Hmeichhe mak ve tak chu a ni.


.


.


.


Thla 2 et lola pawh ka hnen ah a thawk ve ta a, hmeichhe mak tak a ni. A invawng em em a, ka rindan in ka ngaihven viau a ni. Mahse chu chu pawm har ka ti viau thung. A mize ngeng ngalh, hnathawhna hmun a mahni hna tlin em em, nui duh ve tak a ni, ka bulah tih loh chuan. Midang bul a hlim tak a a nuih theih laiin ka bulah erawh a nui mang lova, a tawng tlem em em bawk. Min hlau ni berin ka hria.


`Sir, vawiin ah ka haw hma thei angem?` file kan chinfel zawh hnu chuan min dil a, a sangha zawrh alo thlen belh dawn tih pawh ka hria. A chhan chu kha thla 2 chhung khan a chanchin tam zawk ka hre miau a ni. A thiannu ve ber pawh Jerome bulah a thawk tih ka hre bawk.


`Thei ang. Mahse naktukah i rawn kal hma a ngai ang`


`Ka lawm e. Dar engzatah nge lo thlen ngai ang?`


`Dar 8-ah i rawn thleng ang. Thawmhnaw hak thlak 2 vel keng la, hna thil ah Silchar kal kan ngai dawn a, ni 3 kan cham ang` hruai tum sa ka ni hauh lo, mahse enge ka sawi ber hi ni ta?


`Maw?` a au deuh that a, a rin loh lam ka sawi tih ka hria, keipawh ka inring hman bik lo. Nidang a ka zin chuan Muana zawk ka hruai thin a, vawikhatmah ka zinna ah ka la hruai ngai tlat lo a ni.


`Ka sawi ang chu a ni mai` ka ti leh nghut a, min hnial ka hlau tak zet a ni.


`Aw le` thawk halh pah chuan a ti sap a, a bag ala a, ka room a chhuahsan zui nghal. A sangha zawrh a buai phah ngei ang tih ka ngaihtuah a, mahse chupawh ka pawisa thei tlat lo.


.


.


.


Lola POV


Ka boss thusawi avang chuan ka rilru a buai kher mai. Ka sangha lo thleng tur hi ni 3 chhung lai engtinnge ka kalsan theih ang. Mahse hnial thei dinhmun ka ding si lo. Rilru hah zet in bazar ka pan hnak hnak a, engtia tih chi nge ka hrethiam lo. Nupuii ka biak ngei a ngai. Anipawh ka boss thianpa bulah a thawk a, nuam a ti viau. Kan inhmu tam thei lo a, mahse sunday ah erawh chaw eiin a rawn phei ziah thung. Ka inluah ah awm ve turin ka sawm viau nangin chhungte nei ania, awm em chu a hreh ve pawh ani mahna.


`Thiani, tlai chaw ilo ei hman angem?` ka phone hlui ve tawh tak, Asangi nu hman hlui tlawm te a ka lei chu ka hmang ve tang a, colour pawh ni lo lehnghal. Mahse ka tan erawh a hlu viau a, mi phone man to tak a an neih a an hlimpui ang tho in keipawhin ka hlimpui ve tho. Biak tur ka nei lo em em a, thian nei hek lo le, mahse ka lung erawh a awi viau tho.


`Aaaaa, eng lo, ka Ni a nuamsam lo a, tikhan a sawi mai theih em?` a tih chuan ka thaw hak a, dawt a sawi hauh lovang. Ka mamawh laiin ka tan a awm lo ngai lo tlat a ni.


`Englo ania, naktuk ah hna thil ah kan pu nen zin a ngai sia, sangha alo thleng sia, ni 3 lek min lo thut sak thei angem?` ka inthlahrung tak zet a ni.


`Problem awm lo. Mahse dar 5 ah ka bang chauh sia, ka inhralh tha lovang tih ka va hlau` a nui hak a, ka thaw huai mai.


`A pawi lo. Alo thleng tam lova, a zo hman tho ang. Ka lo siam sa anga, ka lo haw ah thil ka treat ang che` ka tih chuan a nui vak vak a, chhungte ka nei nual nangin ka putea nupui a fuh lo a, ka patea nupui a fuh hek lo, chuvangin tumah ka kalpawh leh tawh lo a ni.


.


.


.


Hna ka thlen chuan Boss alo thleng vang tawh a, ka chak lo kher mai. Mahse ka hna anih miau avangin chak lo mahila phur tak a tih mai chu ka hna a ni.


`Ka lo thleng har em?` ka nuih sang a, maktih hmel deuh chuan min en a, k=chu a hmel chu keiin mak ka ti veleh thung.


`Aaaa... Har lo e. I inpeih sa chuan motor ah i thawmhnaw kha va dah la, file pawimawh ho kha ilo check dawn nia. Chalan paper kha ka dawhkan ah a awm ang` a kekawr ipte a zen a, nidang a a dress aiin a inhmeh zawk. Ni lo, chutiang chu ngaihtuah thei ka ni lo, he mihring hi ka vei lutuk tih tumah ka hrilh thiang lo.


`Aw le` tih pah chuan ka bag ah chu motor lam ah dah turin ka kal zui nghal. Diktak chuan ngaihzawng hi pakhatmah ka la nei lo, mipa duhzawng lah ka neih ka la hre lo bawk. He mihring erawh hi chu ka hmuh hmasak ber atang khan ka mitthla ah a cham tawp thei lo. Mahse chu erawh keimah chiahin ka hre thung. Mipa hot tak, vawt tak si, nelawm miah loh, mahse chhungril erawh chhe miah lo, hmeichhe kawp lar tak a ni.


`I ril a tam em?` motor chhung uap zet avang chuan ka luak a chhuak up up thei.


`Aih` ka luak mai ka hlauh avangin ka tawng thui ngam lo.


`I rui ani maw? Glass kha down la, hahdam tum rawh` a thusawi tawh ah chuan ka lawm ber tum aniang. Glass a up tlat avangin ka rui tih ka hria, mahse keima thu a down erawh ka ngam bik si lo. Glass ka down vat a, boruak rawn lut chu ka hip vang vang a, a nuam kher mai. Ka mit ka chhing a, nizan lam ah sangha buaipui a ka men rei avangin ka mut a chhuak em em bawk.


.


.


.


Motor insawh dawt ri ka hria, a ka hming a au tuarh ri ka hre bawk. A ri buk a, abak ka hre chhunzawm ta lo.