MEZZANOTTE - 8

MEZZANOTTE - 8


ELTY LUHLUL AUG HNAMTE


Hna ka tan veleh ta. Asangi nen kan inhmu chu kan ri dun ve chul a, tiang ka la hawl avangin ka chet erawh a khawr deuh lo thei lo.


`Awi, ilo kal leh thei tawh chu ka van lawm tak` ka luh rual chuan alo ti chul a, ani hi ka hnathawhna hmun a ka kawmngeih ber leh engkim min zirtirtu a ni. Keiin kum 1 in a naupang a, mahse anu in a enkawl that zia tur hi a nunzia ah a langchiang vek. Tumah ngeih loh a nei lo a, kan thawhpui hmeichhe 2 te ang lo takin tupawh mai hi nuisangin a hmachhawn thei a, mi chanchin a chhe zawng a a sawi ka hre ngai hek lo.


`Keideuh. In lo buai awm...`


`Buai lo e. Taka, Sir alo kal tlai dawn a, i dawhkan ah file khawih tur a dah a, chuan Silchar a durotuff chalan bik kha lo peih a ngai aw` dawhkan hrukfai malh malh pah chuan alo ti vat a, ka ner nawk. Vawiin kher chu hnathawh mood ah ka awm lem lo, mahse ka hna a ni miau a, ka tih ngei tur a ni.


`Yes Miss` nui var var a ka tih hnu chuan ka dawhkan lam ka pan zui nghal.


Boss lo thlen chuan ka hna ka lo khawih zo hman vek a, a room ah ka dahlut nghal a, kan inbe tam lem lo. A hmel a nelawm loh a, keipawh ka be tha peih bik chuang lo. Engvang a hna kal tur a min rawn ti thut nge anih ka hrethiam nek lo ve. A rilru hriatthiam har lutuk hi a bul a awm a hahthlak ka ti ve thin.


` Hello, i boss hi inleng a nei em aw?` ti tu lam ka hawi chu ka insangmar nghal teuh. He mihring hi helai ah ka hmuh ka inring hauh lo. Ka putea nupui fa hmasa a ni. Ka nu mittui tla khawp a tawngkhumtu a ni bawk. Ka nu, cancer chau tawh tak kha a chen ve miah lohna in a a awm kha a ngaithei lo a, tawngkam na takin a tawngkhum lai keimah ngeiin ka man anih kha.


`Aaaa... Ihhh`


`Enteh, inhre ngai ang a awm kher a ngai lo. I boss kawplai hmeichhia ka ni tih hria la a tawk viau a ni` a tawngkam ngeiawm tak te, a hmuhsit zawng lak a a mitmeng de ralh thin te, a pian nalh leh a hmeltha tak te, a engmah hi danglam ala awm lo. Hmeichhia, mahni lu zo tak, Mizoram pawn a hnathawk a awm reng, a rawn let hnu ah eizawnna mumal tak nei si lo a hausa em em tho si, mahni a in ding lai lei nalh thei a ni, tumah zahpah a nei ngai hek lo bawk.


`Chuzawng thil harsa lo tak anih ka ring. I mipa kawplai chu inleng a neih leh neih loh zawt ngam tur khawpin i tlatlum lo viau tih hi keipawhin mak ka ti viau!` ka hmai ka poh vah a, ka mengkual lui ve ngat bawk. Tunah chuan an in ah kan awm tawh lo a, ni lo, anu te in ah, an neih ka ei hek lo, zahpah vak chhan tur ka neih ka hre tlat lo.


`Enteh, Lallawmzual, min zah lo takin tawng hauh suh, kan zar a in nufa in chaw eitur nei ve thin mai in nih kha` ka nghing lawih, mahse ka nui chhuak hak thung. An chaw kan ei man te, an in kan riahman te kha Putea hriat hauh lohin Pitei khan min dil a, ka sangha zawrhna hlawh atang a chhiar ang zat ka pe leh vek bawk.


`Kan mamawh laia i nu te lo awm kha a lawmawm, mahse a thlawnin engmah kan ei in kan in lo a, kan awm man pawh kan pe vek e` ka nuisang a, a hmel ah maktihna a lang zawk a, mahse a bo leh vat thung.


`I...` Boss room kawngka a rawn inhawng a, amah a rawn chhuak zui nghal. Nunpuii a hmuh chuan a meng awk a, mahse a rei hran lo.


`Ilo kal ani maw?` Nunpuii a en a, lawm hmel a pu lo a, lawm lo hmel lah a pu hek lo.


`Nia. I hnathawk nen hian kan inlo inbia a, inleng i neih lai anih ka hlau deuh sia` a nui sang a, a mize inthlak leh dawrh chu ka nuih alo ti za viau thung.


`Anihchu. Lo lut la.... Lola, Zuala a rawn kal anihchuan Floortiles chalan kha ilo pe dawn nia` ka lam a rawn hawi a, ka lo bu nghauh ringawt. Diktak chuan a mizia hrethiam lo in han thinrim deuh thin mahila he mihring ka duhna hi ka up bet seng bik thin lo.


Zuala a rawn kal a, chalan siam sa ka pe a, reivaklo min pui bawk a, ani hi ka ngaina a, min pui nasa em em bawk. Asangi tih loh ah chuan ka ngainat ber a ni. Bakah boss pawn a ring em em bawk. Rosaline te thiandun erawh ka thawhpui te zing ah ka ngaina lo fal nalh thung. Mi chanchin tha lam aia a mawi lo lam sawi nuam an tih zawk miau avangin an bulah ka tal tam ngai lo.


`Ka chhuah a ngai a, paper work a zawh chuan i haw thei ang` Boss leh Nunpuii rawn inzuichhuak chu ka melh zawk a, Nunpuii`n a ban ah a vuan a, an inhmeh viau bawk.


`Lehlawk, file hring kha hawn la, zan ah ka rawn kal ang. Naktuk dar 9 ah peih hman a ngai dawn a` tih pah chuan ka dawhkan a file hring chhah zet chu a kawk zauh a, ka bu nghat. Nunpuii in la engemaw vel ka hmuh peih loh avangin ka melh duh hauh lo thung.


`Lola, haw rual ila, in veng lam ah kal ka ngai a` Asangi chu ka dawhkan bulah a rawn ding a, tui vawt min rawn pe zui nghal. Khua a lum deuh tawh avangin thingpui in a chakawm tawh lem loh.


`Pawi miah lo. Mahse bus a haw ka ngai sia` ka inthlahrung deuh. Diktak chuan a hma kha chuan ke in ka haw mai thin a, tunah erawh ke a haw tur chuan ka mal hian ala tlin chiah lo a ni.


`Hey, scooty ka nei ve tawh alawm` a tih chuan ka en hau a, alo nei ve ta nge nge, ka van lawmpui tak. An veng a hla a, kal man ah a inseng hnem thin a, tunah chuan a buaina a kiang ta.


`Wow! Congrats. Mahse i phurh ah...`


`Hey, tenawm suh. Ka thiam sa alawm. A hma in heta ka thawh hma hian delivery girl ka ni thin a, hlauthawng suh` a tih chuan ka lo nui hak a, ka ring nghal hmiah bawk. He mihring tluk a hringnun pal nasa leh fight nasa hi a kum rualpui ah an tam lo khawp ang.


`E, chuan, Boss in haw hma a phal a, nangpawh i haw hma dawn tih a sawi a, tihchi lutuk. I in ah pawh ka lo leng ve pah thei tihna` a tih chuan pawi ka ti lo nasa mai. Diktak chuan ka chau ru viau, bus a haw pawh ka chak lo.


Ka in thleng Asangi chuan min thlah a, a kalna tur pawh ka in atang a hla lo, ava kal hmasa a, keierawh ka in ah ka lut thla nghal thung. Ka in tifai a, rawng ka bawl zui nghal a, Asangi ka bawl kep nghal hmak. Mahni a chaw ei ka peih lo a, ka unaupa lah anu chhungte in ah chaw a ei dawn bawk nen, scooty a nei tho a, a haw tlai dawn chuang lo tih rilru pu ran in amah rawn lo in ka bawl kep ve hmiah.


`Awi, i in nawm reuh zia hi` Asangi lo lut chu a ri leh hlut a, behlawi bai tur ka lo mal lai tak a ni.


`Avan lawmawm. Enteh, chaw ka chhum kep che. Robert alo haw dawn bawk si lo a` ka tih chuan maktih hmel deuhin min en a, ka unaupa anih thu ka lo sawi vat.


`Ka nu kan phone ange` tih pah chuan a phone a phawrh mawlh mawlh a, anu a be lang lang a, ka awt takzet a ni.


`Chuan, enteh, vawiin a lo kal hmeichhia kha i hriat zawng a ni em?` ka bulah a rawn thu a, behlawi min rawn then pui ve nghal.


`Aaaaa, hre vak lo` ka ti sap a, ka hre lutuk tih sawi kher ngaiin ka hre lo.


`Awi, ihmaw, mi hriat a sawi chi chu a ni hran lo nangin Boss hian engtinnge a duh zawk le? Vairam a zuk awmna ah pawh a tal ngap lutuk an tia, bakah a nu hian a tan lutuk an la ti zui. Tihian hnathawh mumal nei lovin mahni in a awm a, a che lian em em lehnghal` a ti hlap hlap a, ka nuih aza ru zawk. Mi hian an lo hre ve tho anih dawn hi.


`Thawk lo a nuamsa tak a awm dan a hre bik aniang` ka lo ti ve sap a, ka nuih erawh aza tlat pek.


`Awiiii, mihring hi hnathawk lo in nuamsa takin a awm theih loh chiang eeeeee.... Aaaaa, officer special choice ani miau a. Enteh, kan veng ah pawh nupa an inthen phah asin. An pa kha officer ania, khanu nen khan an inkawp a, a nupui leh a faten an chhuahsan a, mahse an pa a inchhir tawp` ani leh ni lo ang in mi chanchin a sawi ve nasa lutuk chu ka nuih aza phian. Mahse ka demlo, thian tha ah min ngai a, ka hnen ah a sawi ngam ani mai a, keimah atang chuan khawiahmah a chhuak leh tawh dawn lo bur thung.


`Ava zialo ve. Taka, in veng ah inluah tur i hria em? Ka nau awmna tur hi ania, a vang bawk si` thudang sawi ka duh tawh zawk.


`Tinge hetah a awm ve thei mai lo ami?` min en hu a, a ngaihdan ah chuan a awm ve reng. Kan chanchin engmah hre tlat hek lo.


`Aaaaa, theih loh pawh a awm lo a, mahse amah hian puitlin zir nan luah hran ve phawt a duh a` dawt chiang lutuk ka sawi chu nuam ka ti miah lo, mahse hetia ka tih mai loh chuan engkim sawi a ngai dawn a, thian tha tak pawh ni mahila kan chhungkaw buaina ania, a hre ve lo a, hriattir kher a tulna ka hre lem lo.


`A dik ve reng. Mipa hi zawng, an puitling mawh si. Pitari inhnuai chu a ruak ngei mai a, mahse a luah peih ange maw, a khirh lutuk a, tuman an luah rei peih ngai lo` a nui hak hak a, a bul a awm hi zawng a hahdam a ni. Nupuii nen kan inhmu tam thei lo a, Nupuii tih loh ah chuan ka mihring ngainat ber ani hial ang.


Asangi haw hnu ah khum ah ka mu zal a, ka taksa la fit loh zia khum ka deh rualin ka hria. Robert lah a nu U te in ah a riak nghal dawn a, ka hna hawn chu ka phawrh a, Opa lo thlen hma a lo bih lawk tha ka ti. Kan enkual chu a hmanhmawh chhan ka hrethiam, naktuk ah Muana nen an zin dawn a, chuta an ken a ngai tlat a ni. Kawngka kik thawm ah ka tho vat a, ka lo muthlu hman lek lek. Kawngka ka va hawn chuan Opa alo ding run a, a thawmhnaw chu a inhmeh takzet a ni. A rim a thiang sar a, a sam ala hnawng chap bawk.


`Min en reng dawn ami?` a tih ah chuan ka harh chhuak zawk.


`Aaaa... Lo lut la` ka ti bah nak a, ka inher zui nghal.


`Chaw ilo ei tawh ang chu maw?` tih pah chuan chair-ah chuan a thu a, ka in a te bawk si, a khat mup ni ber in ka hria.


`Aw. Lawks, file chu kan la ange. Ka lo en lawk e ka tia` tih pah chuan ka room ve te ah chuan ka lut a, khum a file chu ka la a, ka va chhuah leh chuan tukverh bulah chuan alo ding vung a, tiang em em a ka in ka hmuh tet hi ka la hre lo.


`Engvang a ka awmloh lai a lo chhuak daih nge i nih?` pawn lam ala hawi a, lai zet chuan a hnung ah chuan file kengin ka ding ran thung.


`Min chhang dawn lo ami?` a ti leh nghut a, a hmuh loh ah ka dar ka san ak ringawt.


`Aaaaa, Robert alo chhuk bawk sia, bakah in in a awm reng kha thil tha ber a ni lo alawm` ka tih chuan muangchangin ka lam a rawn hawi a, a kekawr ipte a zen a, uluk zetin min enkual a, ka kawchhung a so balh thei.


`Ka mawhphurhna i ni tih ka hrilh lo che em ni?`


`Aih, ka ni lo` file chu dawhkan tereuhte, ka neih ve chhun ah chuan ka dahthla a, thudang sawi ka duh takzet a ni. Keipawhin ka chhuah chhan kha ka chiang lo, ni lo, nitin a ka hmu thei kha ka rilru ka thupzo dawn lo tih ka chian avangin ka insaseng ani ber zawk.


`Keimah vang a khatiang a awm kha i nia, a tawp thleng ka enkawl...`


`Kan tan thei tawh em?` a tawng laklawh lai pawhchah a huatzia an in a ka awmlai khan hre tawh mahila tunah tak hi chuan hlau thei ka ni lo, ka rilru puan ai chuan a thin pawh ti rim ila ka duh zawk a ni.


`A tha alawm` ka rinloh takin dam thlaum chuan a ti ve mai a, ka bulah chuan a rawn thu thla zui ve nghal zat.


Ka bul a a rawn kun hnaih apiang chuan ka zam em em ani tawp mai. Anilah chuan hna bak a ngaihtuah lo tih hriat takin a pen chuan paper a a pawimawh lai chu thai bial pahin min hrilhfiah mawlh mawlh bawk a, keiin a thai bial sa chu paper dang ah ka copy char char bawk a, mahse keiangin tibuaitu a nei ve lo thung. Dar 9 a rik meuh chuan kan zo fel ve thuak a, a harsa lai ber belhkhawm tur kan la bak thung.


`Thingpui in ava chakawm ta ve` a tih chuan ka la lum sak lo tih ka hrechhuak chiah. Mahse ka inthiamlo lem lo, a chhan chu hna kan thawk miau alawm.


`A thlum nge a hang?` tih pah chuan ka tho vat a, mahse ka ke chhep a sual ta pek, ka te that a, ka malpui thip zawk pawh ka hria.


`Fimkhur tawh la` a ban chak zet chuan min dawm a, a tawng lam ka ngaihtuah lo, ka malpui na vang vang avang chuan ka thlan a chhuak hlap hlap tih ka hria, bakah ami uapna avang chuan ka zam takzet bawk.


`Ana ami?` tih pah chuan thutthleng ah chuan min thut tir a, keierawh nat vang leh zam lutuk vang chuan ka tawng mai thei lo zui.


`Shit! Hahdam la, thingpui lam chu theihnghilh rawh` tih nghut pah chuan ka thutthleng sei neih ve chhun ah chuan min muttir a, keimahin ka mu thei lo pawh a ni lo, ka che hleithei lo a ni ber mai. Kha zan, an in a ka awm lai a, a room a paper han pek ka tum, ka han chhoh a thawmhnaw ha mumal lo a a awm ka hmuh atang khan abul ah hian ka hahdam hleithei tawh lo a ni ber.


`Ka tha tawh. Ka tho thut kha a fuh lo ania` tih pah chuan ka tho a, min lo pui vat. A hmel ka en zauh a, min ngaihtuah hmel pu ka hmu chu ka lung a chhe mah zawk, diktak chuan ka nu awm loh hnu ah Nupuii tih loh hi chuan min ngaihtuah tak tak an awm ngai lo a, Asangi fel viau mahse ka dinhmun engmah a hre lo a, thian kan ni, mahse a bak a awm lo.


`Tikhan lo thu la, hahdam deuh la, a zia hun ah kan zawm dawn nia` ka mittui chu a hmuh hlau in ka kun vat a, ka mittui tla hi a hmu tur a ni lo.


`Hey, i tha em?` inthup tum viau mahila min lo hmu hman tho anih hmel.


`Aw, ka tha` tih pah chuan ka mittui chu ka hru tak a, thingpui lum turin ka kalsan zui nghal daih.


`Ana viau ami?` ka hnung atang a a rawn tawng chuan ka phu nasa ngei mai.


`Awi! Aih... ihhh... A na lo` ka ti bah nawk a, ka kawng a a rawn vawn chuan ka khawng nghal at thung.


`Lola...` ka nghawng bul mai ah chuan a rawn ti sup a, awmngaihna ka hre lo.


`Ummm` pangai thei ang ber a tih tum mahila ka khur nasa lutuk chu ka inthup thei bik lo.


`Min en teh` tih pah chuan a lam hawiin min kuai her a, ka zam lutuk chu min dah ang ang chuan ka awm ani tawp mai.


`Hmeichhia, mi tiphur thei tak i ni tih i hria em?` ka biang ah chuan a dawm a, min kuai dak a, ka meng ngam lo.


`Min en rawh` ka meng ngam chuang lo.


`Lola, i hria em? Nang hian min tibuai lutuk tih i hria em?` tih pah chuan a rawn kun hniam a, ka hmui ah a hmuiin a rawn sik chuan ka ngawng vekin ka hria.


`Shit` tih sup ri ah chuan ka harh chhuak a, a phone ri chu ka hre zuinghal. Min kuahna thlah chuang miah lo chuan a phone chu a pick up a, mahse lehlam a hmeichhe aw ka hriat avang chuan min kuahna atang chuan ka tal chhuak vat a, ka thingpui lum so bawrh bawrh chu ka ngaihtuah lui a, mahse kha feeling khan min kalsan mawlh lo. Ka kut khur dar dar chu ka haw kher mai.


Thingpui kan inzawh chuan kan hna kan tan lehnghal a, anichu a pangai leh mai, kei erawh ka pangai thei der lo thung. Kan zawh meuh chuan dar 12 a ri thuak tawh. Kan thil khawih hnawk ka ti fel a, anierawh thuthleng sei ah awn dar in a thu a, nichin mai a thil thleng khan amah ah nghawng a nei ve miah lo ni in ka hria. Engvang a infawh tir ngawt nge maw ka nih le? Min hmu hniam viau in ka ring, mahse ka bultan a ni bik lo a, ka thiam loh a awm bik lo.


Hna ka thleng chu ka lu a na viau. Nizan lam ka mengrei bawk nen, Boss ber a zin bawk a ti in ka thutna ah ka thu a, ka muthlu diar diar. Nizan khan a haw dawn ah a uang mai mai lo tih a sawi a, min fawp nawn lehngat anih kha. Ka hlimzia leh awih har ka tihzia a inzat reng ang. Nupuii ka hrilh ang nge hrilh lovang tih ka ngaihtuah a, mahse lo haw phawt se, alo haw ah ka rin ngam dawn leh dawn loh ka chian hma chuan mahni a hriat a tawk ka ti ta zawk a, ka hrilh duh ta lem lo.


`I phone a ri reng ania` Asangi tawng ah chuan ka harh zawk. Ka lo muthlu hman pek.


`Hello` min lo phone tu hming ka hmuh a ka phur zia leh ka zam zia a inat chiah ang.


`I muthlu anih ka ring` nui hak a a rawn tih chuan ka lei ka chhuah vak ringawt.


`Naktuk tlai ah chhuak turin lo in ready la, ka rawn lam ang che` a tih chuan a ngaihna ka hre lo viau. A chhan chu ni 3 an cham tur thu a sawi sia, naktuk zan ah kan inhmu thei lo hrim hrim.


`I uang peih` ka lo ti hlak a, ka pangchang nghal der maiin ka hria.


`Uang lo. Naktuk zingkar ah kan rawn let ang. Thingpui i in tawh em?` a tih chuan ka au vak tep a ni.


`Aw... aih... E, aw, in lo` ka tih bah nawk ah chuan a nui hawk a, min hmu thei lo mahse ka lai kher mai.


`In la, zan ah ka rawn bia ang che. Vawiin chu haw la, in ah mu ang che` a tih chu hnial mahila ka hnial hneh ta chuang lo. Phone kan dah hnu chuan Asangi nen tiffin kan ei a, ka hawsan zui nghal.


Dar 10 a ri tawh, phone call emaw, msg pawh a awm lo. A buai anih ka ring a, ka be buai duh lem lo. Mahse min rawn biak hun erawh ka nghak ve reng thung. Dar 11 a ri tawh, ala rawn ri chuang lo, ka rilru chu a buai ve nek tawh. Keihian ka lo la serious lutuk anga, mahni ka inhrem mai mai ani thei angem? Ka ngaihtuahna ah thil a lut zut zut a, ka zak veng veng bawk. Ka phone ka dah a, mutthilh tum mai a hlawk zawk tih ka hria. Mutthilh tum a ka insiamthat lai tak chuan ka phone a rawn ri, rangzetin ka ban, Opa phone call ngei.


`Ummm...` mutchhuah hmel zet chuan ka ti lui ve ngat a, mahse ka rin loh lutuk a rawn tawng thung.