MEZZANOTTED - 3

MEZZANOTTE - 3


ELTY LUHLUL AUG HNAMTE


Agatha nen kan inkar a tawp atang thla 1 a liam ve ta. Ka tuar na em ka hre lo, mahse engemaw chang a han hriatchhuah chang chu ka nei ve tho. Min biak tum in vawi tam tak alo call a, mahse ka be ngai lo thung. Ka office-ah meuh pawh min kalchilh nangin min biak falna hun remchang ka pe ngai eih lo. Chutihrualin a beidawng mai mai lovang tih hrechiangtu ka ni thung.


`Zanin chu chaw eichhuak ila` ka U hna bang a rawn kawi a, a nupui neih tur kha an nu tur pu boral avangin an sawn a, July ni 17-ah an innei dawn ani.


`Teh thut chuan!`


`Nia, Remi`n lo sawm ve la a tia, an thenawm nula a rawn hruai dawn a, nuam lo a tih a hlau deuh a`


`Chu, hmeichhia min zawnpui deuh tihna em ni?` ka nui hawk a, Agatha nen kan inthen an hre vek.


`Nope. A sawi danin an thenawm nula chu a khawngaih a, a nu cancer a awmpui a, hmanni deuh ah a boralsan a ni awm e. Vah harh pui a duh` a tih chuan ka hrethiam. Ka U nupui tur hi hmeichhe fel tak, fahrah leh chanhai te ngaihven a ngaihsak reng thin mi a ni miau a.


`A tha lawm. Jerome a zin a, program hranpa ka nei chuang lo a` ka ti ve mai. Ni e, ka nun ah hian mi puih ka neih pawh ka la hre lem lo. Kha hmeichhia, Lola kha puih ka tum ve ngei a, mahse a duh lo kha a nia. Khanu kha engtinnge hun a hman zel ang le?


Kan chaw eina tur hmun kan va thlen chuan Remliani ten min lo thlen khalh a, a kalpui hmeichhia erawh washroom a hmang tih alo sawi vat thung. Helai hmun ber kher hi ka ngaina hauh lo, a chhan chu Agatha tal ngapna hmun a ni tih ka hria, mi zing a hmuh ka la chak hran hauh lo, ka U bulah ngat phei chuan.


`I dam tha maw?` Remliani chuan min melh zauh a, hmeichhe tha tak ni a ka hriatna hi ka tihsual ka ring hauh lo.


`Dam alawm. Khawnge i thiannu chu ava rei, nangni inthlahlel sir a lo thut bik a nuam....`


`Ka rei em?` ti tu lam chu rang zet in ka hawi a, amah bawk!


`Nang`


`Enge hetah i tih?` ka ti nghut a, hmuh ka inbeisei miah lo.


`Nangni pahnih hi....`


`Party kan kalna ah part time in alo thawk ve a` ka lo ti vat a, amah erawh ka en duh miah lo thung.


`A that chu. Lola, ani hi Opa ania, Lalawmpuia. Ka nau luhlul leh tihmawh em em, mahse rilru tha tak anih hi` ka U chuan a lo ti vat a, Lola lo nui seih chu ka run kher mai.


`Ka hria alawm, ka buaina atang min chhanchhuak tawh a` a nuih zawng a a ha var rual that chu a inhmeh reuh phian.


`Khatiang kha a ho. Enge kan ei tur?` ka lo ti hmuk a, kha zan kha sawichhuah nawn fo ka duh hauh lo.


`Kan lo order tawh a, i U in i duhzawng a sawi ka ring mai a. Hei en la` tih pah chuan an lo order tawh ho chu Remliani chuan min hmuh a, ka U hi chuan min hrechiang viau a ni.


Kan chaw ei chu ka rinai takin a nuam phian. Ka U hi ka zui chhuak em em lo a, a life hi ka awh zawng a ni ngai lo a, mahse a bul a kan awm ve meuh chuan ka rinai tak chuan a hahdam vei thlup a, alcohol tello a ka dine-out hmasak ber anih ka ring hial, ka puitlin hnu ah.


`Man, Lola hi i thlah anga, Remi nen hian mi hmuh kawi zawk tur kan nei a. Lola, harsatna a awm angem?` ka U chuan kan dawhkan kan kalsan hma chuan a ti vat a, ka chak loh zawng tak a ni.


`Aw... Aih, ni lo, a tha alawm` a ti bah nak a, anipawh chuan ka rual a haw a chak hmel bik vak loh khawp mai.


`Anihchuan kal ila. Man, hmeichhia anih kha` ka U in a tih leh ngat ah chuan ka hmeichhe chhuahpui thin dang ang a ni lo tih min hrilhna tih ka hrethiam, ka ding nuih suk ringawt.


`I nu i chan tih ka lo hria a...`


`Ooohhh... Sawi suh` a mit a chhing a, a aw a khur bawk. Hmeichhe tihnat awl tak anih ka ring.


`Ka tawrhpui che tih sawi ka tum mai ania` ka ti nghut a, a kut chu a humruh a, a mit erawh ala meng hauh lo.


`Khawngaihin...` ka va melh zawk a, a biang a mittui tla chu ka ve hmu hman. Sawi a hun lo tih ka hrethiam.


`Enteh...` an in kawt kan thleng tawh. Ni lo, a in luah ka hre miah lo, mahse Remliani te in kawt kan thleng miau a.


`Ihhh, ka lawm e` tih pahin hmanhmawh zet in motor atang a chhuak a, Remliani te inbul chiah a in tha vak tawh lo awm lam chu panin a hnuai luhthlakna ah chuan a chhukthla zui nghal.


.


.


.


Ka U te inneih ni a ni. Lola pawh kha zan bak kha ka hmu leh hran tawh lo. Jerome nen ni 3 chhung kan hna kalsan a zinchhuah kan rawt a, midang erawh kan sawm hran lo. Diktak chuan kan pahnih hian kan tlei viau a, bakah kan thian dang te tumah an awm lo bawk nen, a bialnu hruai ve a chak tih chu ka hria, mahse hmeichhe hruai ka peih lo tih ka sawi avangin min nawrlui hreh tih a hriat reng.


`I nalh e` ka U inchhei zo lo chhuak chu ka lo nuih var var a, anipawh a hmel hmuh a nuam viau.


`Ka lawm e. Chuan, naktuk a kal nghal maw in tum?` ka zin tum hi a lawm vak lo tih hre mahila ka tum chu ka ti leh dawn tho tih a hrechiang a, min hnail lui lem lo.


`Ni 3 chiah` ka mit ka siai zauh a, a nui ve hak ta hram e.


Nilengin Biakin lam ah kan awm a, mo lawmna pawh Biakin ah vek kan nei a, in lam ah engmah hnawk a awm lo, tha ka ti viau. Mahse kei ang lo takin ka U chuan a first night chu ama room ah ngei hman a duh. Keichuan ka lo ngaihtuah thin chu, ka nupui neih zan chuan ka pa huan ah hman ka duh ve tlat thung. Ka pa hian Tuirial bul lawk ah ram zau tak a nei a, in nuam tak a sa tel bawk. Chhungkua a han riah luh zauh zauh chang kan nei fo bawk.


`Eng thil nge?` Jerome nen Biakin chhak, motor dahna ah chuan kan ding dun a, kan phun dun bul bul. A chhan pawh ka U in party a rawt miau loh avangin. Chutia kan lo din dun lai chuan kan piah deuh a hmeichhe te that thawm kan hriat avangin kan tlan phei a, in pakhat hnung lam a Lola lo tlu niaih leh a bul a nu pakhat lo ding run chu kan hmu nghal.


`Tlangval, ilo inrawlh ve na chi a ni lo e` chu nutling huai hmel zet chuan a ti hmak a, Lola erawh lei lam a bih a, a incheina te chu a berh nual bawk.


`Ka pi, nang ka be lo che. Lola, enge thil awmzia?` a bul ah chuan ka zuk thu hniam a, a tap ri ka hre lo a, a mittui lei a far kauh erawh ka hmu chiang thung.


`Min kalsan rawh` zawi te chuan a ti sap a, mahse chu tawngkam ka hriat rual a ka hriat tel chu `He hmeichhia hian puih a mamawh` tih a ni thung.


`A chhan...`


`Tlangval, i inrawlhna chi a ni lo ka tih kha. A ba hi i rul zo dawn anihloh chuan kalsan rawh` chu nu bawk chuan alo ti leh tun tun. Inneihna a lo kal ve pawh a ang si lo, ala huai em em zui lehnghal.


`Nute, khawngaihin. Op, kal rawh. Chhungkaw thil a ni e` Lola chuan mangan hmel zetin min melh a, Jerome lo khuh khauh ah chuan Jerome pawh a awm ve tih ka hrechhuak leh chauh.


`Ka pi, engzat fakau nge i pawisa chu a bat a?` Lola lo ding chhuak chu ka haider hmiah. Ka huat zawng tak chu, a pawisa a ba anih pawhin hetia khawlai a mualpho pui kher lo hian in ah an chingfel thei lo em ni? Nge he Lola te reuh hi hmeichhe nasa tak ni in, a pawisa batna te hi tlanbosan alo tum zawk ni ang? Ni lo, ka awih hran lo.


`I rulh sak dawn anih loh chuan hei chu chhungkaw thil a ni` chu nu bawk chuana  ti leh hmak a, Lola hmel chu a buai nak, a hmai a sen tan tan bawk.


`Sawi la`


`Bro...`


`Bro, lo inrawlh....`


`Nangmah zawk kha lo inrawlh suh` Jerome tawnglai ka dang chat a, ka tawng lai Lola chuan a rawn dang chat veleh thung.


`Tlangval, singnga a ni e. I rulhsak thei anihchuan an in leh lo hi kan hralh sak lo anga, anihloh chuan kan hralh ngei ang` Lola hmai sen awp awp chu ka hmu reng. Singnga vang chauh in heti khawp hian mualpho an hreh lo chu ka nuih a za letling zawk.


`Aw le, a tha e. Hei hi ka card ania, naktuk ah hemi address ah hian pawisa chu in lo lam dawn nia. Ka awm loh pawhin an lo pe ang che u. Mahse lehkha ka lo dah anga, chutah chuan i hming ilo sign dawn nia. Chuan, Lola hi buaina i rawn siam tawh tur a ni lo` ka ti nghut a, chu nu chu ka card chu ka pe a, ka inher vut a, Jerome min lo en reng chu mit ka siai zauh a, min rawn zui ve nghal.


`Hey, enge i thil tih kha a awmzia?` motor bul kan thlen chuan Jerome chuan ka hnung ah a rawn hnek dat a, ni e, ka uikawm zia leh sum ka hlut zia hrechiangtu a ni. Ka hlawkna tur ni lo ah chuan sum ka theh chhuak mai mai ngai tlat lo.


`Awmzia awm lo. Hmeichhe pakhat ka tanpui ve mai ani`


`I tanpuina ka dil hauh lo che` chu aw-ri ka hriat chuan ka inher vut a, ka hma a Lola lo ding chu ka melh run a.


`Theihnghilh rawh` ka lo ti hluk. Jerome chu faifuk ratin a kalsawn zui nghal hmak bawk. Chimawm lutuk!


`I pawisa kha ka mamawh hauh lo` Nichin mai a puih ngai hmel zet kha tunah erawh thinrim avangin a hmai a tai hlar thung.


`I mamawh lo maw? Huh!`


`Enteh, pawisa chu ka mamawh ngei alawm, mahse i hnen atang ni lo`


`Anihchuan min rul leh mai dawn nia`


`Enteh...`


`Bawiha, ipa in a hmu lawk duh che` ka nu chuan min rawn au lang lang a.


`Nakin ah kan sawi zawm dawn nia` tih pah chuan ka nui suk a, a thaw hak ri chu hre rengin ka kal pel hmiah.


.


.


.


`Bro, khanu kha a hot hrep` chair-ah kan thu a, tun tum chu zinkual kan tum viau nangin ka pa in huan thli thlai pah a huan a riak lut tur a min ngenna chu tihhlawhtlin ka thlang ta zawk, bakah Jerome pawhin alo chak zawk daih bawk.


`Tu chu?`


`Ba i rulh sak nu kha. Ka sarai chak khawp mai`


`Ngawi hmak rawh` ka ti hmuk a, ka aw chu a vin lam hret bawk. Engvang a chutia thinrim nghal tun nge ka nih ka hre lo, mahse ka lawm tlat si lo.


`Hey, man, nanghi.... I sarai tawh...`


`I lei kha ka tan hma in ngawi rawh. Remliani thiannu anih kha, hria se a lawm hauh lovang` ka lo ti leh hmuk. Ni e, kan thian dun hian nula itawm hi hmaih tum lo mahila kan chi leh kuang, keimahni hnaih erawh khawih thiang lo bur a ni.


Chawhnu lam ah huan sir vel ah kan kual dun a, nghakuai kan keng a, huan mawng lam a tuikhuah ah sangha kan man dun a, hetiang hun ah hian drinks lampang kan keng ngai miah lo thung. In ve viau mahila party leh weekend anihloh chuan kan hmeichhe kawp te bul ah bak kan in ngai lo. Bakah zu hian kan hnathawh a tihbuai kan duh hauh lo.


.


.


.


Dawr ka thlen rual chuan kan hnathawk pakhat in min hmu duh an awm thu min lo hrilh vat a, 5mins hnu ah ka room a lo luhtir mai tur in ka hrilh a, green tea ka la a, ka room lam ah ka lut zui nghal.


`Ka lo lut thei angem?` tih rikna lam ka hawi a, amah bawk!


`Thu rawh` ka hma a chair chu ka melh zauh a, a rawn thu ve mai bawk.


`Englo ania...`


`Hmanni pawisa chungchang kha anih chuan...`


`Aw... Khami kha, engtia rei nge rulh theih hunchhung min pek ang?`a hmui hnuai lam a pet sawi zauh a, a biang a tai tek bawk. A thawmhnaw chu a man a to lo nangin a fai sar thung. Hei hi chu ka hmuh apiang a ka hmuh tel thin ziah a ni.


`Vawiin hun ka pe thei che ti ta ila...` ka nui lo, mahse ka fiamthu ve a ni.


`Ooohhh, chuzawng i ti thei lovang` a chal atang a thlan lo chhuak tiam tiam chuan a rilru a hah zia sawi kher ngai lovin a tilang chiang khawp mai.


`Ka thei ti ta ila`


`Ni lo. Kha pawisa kha ka dil che pawh a ni hauh lo`


`Mahse ipa in hnutchhiah che chu kan hum tho ani lawm ni?` ka mit ka siai khum sak a, ten hmel zet chuan min melh khai a, a lang duhawm phian.


`Tenawm lutuk!` a ti hlak a, ka nuih erawh a za ru viau thung.


`Tihian ti mai ang, hnathawk lak belh ka ngai tho a, kum 1 chhung ka bul ah thawk la, hlawh pangai in ila anga, a tha i ti em?`


`Thla 5 hun min pe la, ka rul zo ngei ang che` ka sawm fiamna chu a pawm lo tih hriat zetin ruahmanna dang a rawn nei hmak thung. A lawmawm ru reuh phian.


`Duh ta lo ila`


`Anihchuan enge i duh?`


`Ka sawi tawh kha`


`Mahse i hna ang hi ka thiam zawng a ni hauh lovang` beidawng zetin a thaw hak a, mahse a duhawm zual sauh thung. Keihi enge ka ngaihtuah tak hi?


`I thiam ang tih ka hria. A hmasa berin hmunphiah i thiam a, a dawt ah thil zawrh i thiam a`


`Hetiang a tenawm hian deal min neih pui ka lo ring hauh lo a` a mitmeng a min huatna te, manganna te chu ka hmuh hmaih hauh lo, mahse henu hi hnaih chakna ka nei tlat a ni.


`Ohhh, chutiang lam a ni hauh lo. I harsatna atang ka chhanchhuak zawk chauh che tih i hriat kha. Kha sum duh zet hmeichhia khan i nu thlarau pawh zah...`


`Ngawi hmak rawh` a awrawl chu a ring lo a, a vin hek lo, mahse engemaw riau a awm thung.


`Ka nu chungchang emaw, anni chungchang emaw kha vawikhat pawh i ka atang khan chhuak tawh suh se` a mitmeng ah chuan hlauhna hmuh tur a awm lo.


`Anihchuan kan inremsiam tihna ani mai em?`


`Thil pakhat, lehkha in felfai tak a ziah ka duh a, chuan ka hanthawh hun chhung tur ka hre duh. Dar 4 hnulam ah hna ka thawk thei lo tih ka hrilh nghal ang che` a tlawm zawk ni mahse a duhdan a kal chu a tum viau, mahse pawi ka ti hran lo.


`Ok, naktuk ah dar 10 ah rawn thleng hman la, 10-4 i hnathawh hun chhung a ni ang` ka ti ve nghut a, hmeichhe thu hi ka awih ngai lo a, henu erawh hi chuan danglamna tak a nei pawh a ni ta ve ang.