MEZZANOTTE - 9

MEZZANOTTE - 9


ELTY LUHLUL AUG HNAMTE


` Ngaithla rawh, Opa lak atang hian hla thei ang ber ah awm ang che` chu aw chu ka hre tawh, mahse ka hrechhuak zo si lo.


`Tunge inih?` ka ti ve ngat a, tunang hun tawh a Opa phone lehnghal in!


`Min hrelo amaw? I mipa duh em em, Opa bialnu chuai thei lo Agatha ka nih hi. Tichuan a chiang tawh em? Ka mipa min chhuhsak theih inbeiseiin a in ah te ilo cheng vel tih thawm ka lo hria a, kutdawh hmeichhia, fahrah lehnghal hi ani ang mipa hian engatan nge a tih ang che? A hmangaih che i inbeisei amaw? Hahaha... Nula, fahrah i nihna avangin ka hrethiam hram hram che a, mahse i ram chin lo hre tawh ang che` chutiang em em a inhmuhsitna chu kei, mihring ve tho tan chuan a na tawp a ni.


`Enteh, engmah i hre lo. I ngaih.....`


`Ooohh, dear, i inbual zo tawh elaw? phone lehlam a tawngri avang chu ka ngawi ta dat a, ka kawchhung chu tui chhuanso ang maiin a so bulh mai ni in ka hria.


`Ilo la mu nange?` chu aw ka hriat phei chuan ka khawng at thei. Keihian enge ka lo beisei ve ni chiah? Ka tiphur thei tih a sawi a min fawh a tum vang ringawt khan min duh ve emaw ka lo ti amaw? Ka zak ngawih ngawih. An tawng ngaihthlak chhunzawm ka duh loh avangin phone chu ka off hmak a, ka muhil tawh lo chiang teh e.


Hna ka thlen chuan ka luak a chhuak nghulh thei. Nidang aiin ka thleng hma bawk. Ka thlen hnu deuh ah Asangi alo thleng a, thingpui a rawn chawi phei a, chaw ka ei loh avangin ka lo ban vat a, nuih luih chu har ka ti. Diktak chuan vawiin hian chaw min eichhuahpui kha a tum a, mahse nizan lam a boruak atang kan eichhuah ka ring lem lo. Bakah ka duh lo hrim hrim bawk. Ka ba rulh zawhvat a, he hmun atang a talchhuah vat hi ka duh ber tawh a ni. Thla 7 zet ka la awm a ngai a, chumi chhung chuan hrehawm deuh mahse ka tuar thei mai ang chu.


`Engvang a ka phone call leh msg engmah chhang lo nge inih?` ka in kawngka ah chuan a ding run a, a mitmeng chu a nelawm loh takzet.


`Lo leng rawh` a tawng haider chuan kawgka ka hawng zau a, ka inher a, a thawm atang min lo zui lut ve tih ka hre thei. Diktak chuan nilengin a call ka chhang lova, a msg ka reply hek lo. Dar 5 vel ah Aizawl alo thleng tih pawh a msg atang ka hria, mahse biak chhan tur ka neih ka hre lem lo.


`Ka zawhna ila chhang lo` ka hma ah chuan a thu a, min en ran bawk.


`Aaaaa, ka buai ani mai alawm` ka ti sap a, diktak chuan ka buai eih lo, ni lo, Agatha tawngkam avang khan ka buai chiang alawm, mahse awlthawng takin ka buai thung.


`I bialpa phone call leh msg chhang hman lo khawp a buaiin hna ilo thawk tihna ami?` a nui hak a, mahse a hmel ah erawh a nuihzatloh zia a lang chiang em em thung.


`Bialpa ka neih ka lo hre miah lo a!` ka bialpa ang a a insawi chu ka nuih a za lek lek zawk. A hausak leh hmelthat vang ringawt a ngaihzawng a nei reng chung a lo duh ve mai tur ah min ngai anihchuan a tisual ve chiang ang, kilkhat a hmeichhe dang a awmpui a lungawi mai mai tur a nep ka ni bik tlat lo.


`Enge i lungawi lohna?` ka thusawi chu a haider hmak thung.


`Lungawi lohna ka neih ka hre hauh lo`


`Anihchuan nimin mai a min thlahlel tak hmeichhia kha zankhat thil thu ah engvang a danglam vek nge anih?`a lu a thle buk a, thutthleng ban ah a kiu a nghat a, a kutzungtangin a chal a dawm a, a mit erawh ka lak atang a kalsawn eih lo thung.


`Agatha nen a ngaihzawng intawm ka duh lo` hnuai lam ka bih tlat a, thudik a ka chhan mai loh chuan he mihring hian min kalsan hauh lovang.


`Tunge in intawm ti che a?` a thaw huai a, a aw pawh a hahdam sawtin ka hria.


`In zin dun a, chuan....` ka ngawi ta daih, kha zan, an mu dun dawn tih chiang lutuk a an tawngdan kha ka beng ah a rawn ri nawn leh a, ka zak vawng vawng thei.


`Chuan....`


`Ihhh.... Aaaaa, haw tawh rawh. I bialnu tur chi ka ni lo` ka ti ta hliai a, diktak chuan ka duh alawm, mahse an nundan leh ka khawvel hi a in ang lo a, engtikawngmahin kan inkawprem dawn chuang lo tlat a ni.


`Insiam la, chaw ei tur in kan chhuah dawn kha` ka tawng haider hmak chuan ka ti nghat a, ka ngei kher mai.


`Aih, khawiahmah chhuah tumna ka nei lo` a mit ah ka en ve kal a, ka zam lutuk tih chu tilang lo turin ka kut ka hum ruh viau thung.


`Keiman ka siam kher dawn che nge?` a tih chuan ka ding zawt a, a duhna ah chuan nawrluih a har zia hretu hian thuawih tak a insiam mai ka tihtur a ni tlat a ni. Rangzet a room a ka luh chuan a nui zui hak a, ka va han haw ber tak. Chaw eichhuahpui pawh ni ila a bialnu ka ni dawn chuang hauh lo.


Min hruaina hmun chu a nuam kher mai. Khawpui atang hla lutuk lo, rehruih mai, romantic zet ania, customer tlem azawng an lo awm ve nangin an bengchheng lo a, bakah inkawp te te a kal an nih ve hlawm avangin han ri hlaui tur an awm hmel loh. Light cool raih hnuai ah chuan pawnlam lang thei ah chuan min thutpui a, kan thutna atang a lang thei chiah chiah ah hian room ni awm tak a awm a, abak chu room hran ka hmu lem lo. Chu room atang chuan ring lutuk lo in music ri a awm a, mahse ngaihmawh tham erawh ani lem lo. An hla play chu ka duh tak, Marc Anthony sak `I need you` tih ania, he hla hi nalh ka ti thei lutuk, mahse phone tha kha ka nei har ve em a, ka duh hun hun ah ka ngaithla thei ngai lo a, tunaherawh Opa zarah phone tha tak ka nei ve tawh a, zantin ka la ngaithla ziah anih hi.


`I duhzawng ani em?` Opa`n a tih chuan ka nui var var a, ka duhzawng anih thu ka lo sawi vat a, a nui vur vur a, a bu nghut bawk. Kan eitur kan chahfel hnu chuan pawnlam chu ka hawi vauh vauh a, thla eng no nghalh hnuai a light dim tak hnuai a thut chu ka rilru hi engemaw ti takin a no deuh riau lehnghal. Ka nu khan thla eng hi a lawm thin khawp a, thla bial zan te hian khum bul tukverh kha a hawng a, thla eng hnuai ah ka pa awmloh hnu khan kan nufa in kan mu thin a, muthmun ah kan zai dun rat rat thin.


`Enge i ngaihtuah vung vung a?` Opa tawngri ah chuan ka phu deuh zuk a, mahni a thil ngaihtuah vung vung hi ka sim hleithei lo chu anih hi.


`Aaaa... Engmah ni lo e. Boruak awmdan te hian lung a ti leng reuh ka ti` ka lo ti vat a, ka ngaihtuah chu sawichhuah ka duh lem lo, a chhan chu mahni hlimloh rukna midang bul a share vak hi midangte ti hnualtu kan ni thei a, ka ching tam viau lo khawp mai.


`Kan inneih zan ni ta se` a rawn tihleh chuan ka va melh hrawk a, uluk zetin min lo en thung. Ka lai lutuk chu ka hawisawn vat a, ka hnar lo thlan dep chu a hmuh loh hram ka beisei.


`Duhthusam mai anihchu` ka ti sap a, ani nen hian kan innei mawlh lovang.


`Ala thleng ngei ang`


Chhan dan tur hre lo a ka awmlai tak chuan kan eitur chah a rawn thleng hlauh a, ka thaw huai thei. Ni e, engkim a i phuloh ni a i hriat mipa khan a neih tur thu che sawi ta se, a bialnu pakhatin vau bawk ta che se, ka dinhmun ah hian indahchhin la ka awmdan ang tho hian i awm ve tho in ka ring a ni. Thil kan ei chhung chuan kan tawng lem lo a, zing chaw pawh ei lo ka nih vang nge ka rinaia tam ka ei a, anipawhin a ei tlem bik hauh lo tih ka hria, kan chhuah chhan ber kan hlawhtling ah ka ngai hmiah. Chaw eitur a chhuak alawm kan nih le.


Kan thil ei zawh chuan rei kan thu muang lo a, chhuah tum a kan ding chiah chu music rawn rikna room chu a rawn inhawng a, hmeichhe rual an rawn chhuak a, keierawh ka thaw hawk thung. A chhan chu chung hmeichhe rual zing ah chuan Agatha a tel miau a, anipawhin min rawn hmuh hmaih lo chiang khawp mai. Ka enna lam chu Opa chuan a en phei ve vat a, a tumloh a hmu tih chu a hmel awmdan ah ka hai hauh lo. Ni e, a nupui tur ang mai a tawngkam ka lak a a neih hnu a a bialnu, zan hmasa lawk a khum a tawmpui han hmuh thut chu hamhaih a awl ve khawp ang.


`Hetah hmuh che u ka lo inbeisei hauh lo a` Opa bulah chuan a rawn ding a, a ban a vuan nghal chat bawk. A thawmhnaw chu a man a to dawn tih hriat tak a ni.


`Kan inhmu chu ania` Opa pawh chuan a ti tha ve mai a, mahse a tawngri ah chuan a lawm hmel viau lem loh.


`Ani hi i staff pakhat kha tiraw?` min hre lo der thiam lutuk chu ka nuih alo za tawp.


`Ka staff bakah ka bialnu ani` Opa`n a tih chuan ka ka hau ringawt. Nizan lawk a Agatha tawngkam atang kha chuan hetiang a a chhan a rinawm hauh loh. Mahse a chhang miau si!


`Maw?` Agatha chu a meng ling nghal hlar a, a beisei loh chhanna a hmu tih chu phat ngaih a awm lo, keierawh tawng ngaihna ka hre hauh lo thung.


`Kan kal dawn mi?` tihpah chuan Opa chuan ka ban a rawn vuan a, awmdan tur ka lai vel vek. Nizan a Agatha rawn sawi kha thudik lo tihna ami? Mahse room khat ah an awmdun ngei bawk si. Chulai dawr kan chhuahsan a, pawn kan thlen chuan rangzetin Opa min vawnna chu ka thing thla nghal a, eng lemchanna nge ni ngai? Inhmuhfuh lohna an nei anga, runluih nan min hmang a ni thei angem?


`Kan inkar chu thup a har dawn ta anih hi` motor khalh chung chuan a ti nghut a, keierawh ka ngaihtuahna hmundang daih ah a awm thung. Tunah hian ka nu kha la dam se thurawn min pe thei ngei awm sia.


`Tinge ani hnen ah khan khatiang a i sawi? Nangnen hian inngaihzawnna kan nei lo` ka ti hmak a, ka lawm tehchiam tlat lo.


`Thudik sawi mai hi ka chindan alawm`


`Anihchuan dawt i sawi anihchu`


`Ni lo e, nang leh keihi kan inngaizawng a ni. Nge min lo duhlo viau?` kawngsir reh lai ah chuan a ding a, thla eng nen, a reh tha bawk si, mood dik deuh a kal ni ta ila nuam ka ti khawp ang. Tunah pawh hrehawm ka ti chuang hek lo.


`Enteh, inlo intithiamlo anihpawhin amah runluih nan chuan min hmang lo hram teh` ka ti ve ta nghat a, anierawh a nui hawk thung.


`Naupangchhia lutuk. Mi runluih tur khawpin ka naupang tawh lo. Ani nen kan chungchang chu a tawp vek tawh` a tih chuan ka nui ve hak thung. Nizan mai kha chuan a tawp hauh lo tih a hriat reng.


`Mahse chumi vang ringawt chuan i bialnu ka nihna a awm lo`


`Tih har lutuk. Engvang a ka bialnu nihchu duh lo em em nge maw inih le?` a ti leh hluk a, a bialnu nih te chu ka duh chiang alawm, a nupui nih pawh ka chak. Mahse hmeichhe dang nen a pawm kawp nih ka duh tlat lo a ni.


`Kan haw thei tawh angem?` thudang a pakai mai tha in ka hre tawh a ni.


`Aih, chhanna min pe rawh`


`Aw le. Nihleh nizan ah tu bul ah nge i riah?` ka tih chuan maktih hmel zetin min melh a, keilah ka lo hawi vah thung.


`Keimahin. Mahse chu chu tinge min zawh?`


`I chiang amaw?`


`Aaaa.... enge i hriat duh tak han sawi teh` tihpah chuan ka lam hawiin a rawn insiamrem a, thla eng hnuai ah chuan a hmel chu a hahdam thlup a, ekierawh ka lo insangmar auh thung.


`Ihhhh, nizan khan i phone in Agatha khan min lo bia a, chuan in inkawp leh thu a sawi a, kan inbiak laklawh laiin room ah i lut a, in mu ta aniang...` ka ti ta niah niah a, an mudun ngei em ka hre hauh lo.


`Chuvang chuan ka lak ah i lungawi ta lo em em a. Ngaithla la, hei bak ka sawi nawn dawn lo. Ka chungchang thu ah mi hnen atang i hria anihpawhin keimah min zawt hmasa zel la, keipawhin chutiang bawk chuan ka ti ang. Chuan, Agatha aniemaw, tupawhnise min zawtchiang hmasa lovin an thusawi atang thutlukna siam ngai suh ang che` tihpah chuan ka kut a rawn vuan a, enge awih a awih loh tur pawh ka hrethiam nek lo e.


`Nizan chuan...`


`Aw, IB pakhat ah kan thleng ho, mahse zin ho erawh kan ni lo. Hna thil ah ani alo awm sa a, kan zuk inhmu chawp. Chuan, alo bia che tih chu ka hre hauh lo, mahse a awmna room kha PWD lam hotute an lo kal avangin a riahchhuah a ngai thut a, ka room ka kian a, keierawh lobby ah ka riak` a tihchuan maktakin ka hahdam ta huai.


`Kan buaina a kiang em?` amah bawk chuan nui chung a a rawn tih chuan ka lo nui ve tawp. Mipa in a sawi a, a dik tur ah ka ngai.


Karhnih zet Opa nen pawh kan inngaizawng ve ta. Ka rinai daihin mi a duat thiam a, min duat hurh lo a, mahse a hun leh a hmun erawh a hria in hna ah chun a staff ang chiahin min en a, hna ban ah erawh a ruallo a ka haw a phallo bur thung. Agatha hnen a kan inngaihzawn thu sawi chu a thang chak phian bawk a, ani sumdawng mi hriat hlawh alo ni bawk nen, inthup theih meuh pawh a ni lo. Ka thawhpuite pawn an hre vek tawh. A tir chuan min en dan a dang deuh hlawm viau nangin ka awmdan ka tidanglam miah lo a, Opa lahin an hmuh ah min duat hurh lo bawk nen, ngaiah min nei leh viau tawh.


`Naktuk hian in khua ah kal a ngai dawn a, i peih ve em?` Opa awm ngheng chuan ka thu a, zanah hian a hman phawt chuan alo kallo ngai lo.


`Ngati tehthut nge?` tih pah chuan ka chhoh en deuh ha a, mahse min kuahna erawh a thlah chuang lo. Ka chanchin hi a hre ve nual tawh a, kan khaw lam haw ka chak zia leh ka huphurh zia hrechiangtu a ni. Ka nu leh pa thlan tlawh ka chak ngawih ngawih a, mahse ka patea te chhungkaw hmuh a inlan erawh ka chak hlawl lo thung.


`In khaw VCP thin khan dawr hawn a tum a, Pu Thuama kha. Bungrua supply turin min bia a, a dawr lenzawngte, a hmun hma neih dan te han enfel a tul ka ti deuh. Agent ang ve deuh a awm a duh sia` a tih chuan ka bu nghauh a. Pu Thuama chu ka pa thianpa thin a ni. Pa fel tak, taima tak a ni bawk. A VCP lai khan party workers thenkhat in contract diklo hmang a an nawr nasat avangin inthlan leh ah khan a ding duh ta lo reng a, huan zau tak an nei a, a fate an fel bawk a, an pa rual bawk a, nupui an nei vek tawh a, an mo te an fel bawk si, ka rindan chuan kan khua ah chuan an hausak ber ka ring.


`An va lawmpuiawm ve` ka ti sap a, ka kal ve chak reng mai, mahse ka patea te hmuh ka chak thlawt lo.


`Zingkar ah kan chhuak anga, zan kan riak lovang. I peih veleh lo insiam la, Muana ka hruai lo mai anga` a tih chuan hreh deuh mahila ka kiang ah ani a awm dawn tho a, kan riak dawn chuang lo bawk a, ka nu leh pa thlan ka va tlawh thei anga, a tihzia phian dawn ani mai. Bakah kan inluahtu te pawh ka tlawh ve thei anga.


Opa sawi ang in zingkar ah min rawn lam a, kan khua kan thlen chuan dar 11 a ri thuak tawh. Pu Thuama`n min hmuh chuan a mittui a tla ve hial a. Ni e, ka nu boral hnu ah vawikhatmah kan khua ka tlawh tawh lo a, ka nu nen khan ka pa boral hnu ah kan belh ber pawh an ni. Mahse ka nu lehzel a kal tak ah kha chuan kan khua a let leh chakna ka nei ta lo bawk nen, tunhi ka nu awm loh hnu a kan inhmuh leh hmasak ber a ni. An dawrsak te chu Opa chuan a enkual a, a lian tha bawk a, a lungawi viau in ka hria.


Chawhnu lam her ah ka nu leh pa thlan chu Pu Thuama ho in kan va kal a, alo hnim viau a, kan thianfai nghal bawk. Opa chuan min veng ru deuh tih ka hria, mahse tah lam a lang lo. Pachang takin ka awm ve tlat a, ka awmloh laiin tlawhtu a nei ngai lo tih a hriat ngei mai. Pu Thuama chuan a inthiamloh thu leh alo ngaihven zui tawh tur thu te chu a sawi nuap nuap a, ka dem lo reng reng. A tihtur pawh a ni hek lo. Thlan kan tihfai zawh chuan Pu Thuama te in lam ah kan let lehnghal a, an nupa in zankhat tal riak tur a min tih tlat avang chuan Opa pawh chuan a hnial lui duh ta bik lo.


Zanriah eikham ah kan in tlawh turin Pu Thuama ho bawkin kan chhuak leh a, ka huphurh ru takzet. Kan va thlen chuan ka rinloh lutukin ka Patea te nupa an lo awm ve a, an tawngkam atang kan kal thu an lo hre tawh tih pawh a hriat. Ka nutei a tawng duh viau a, ka patea erawh a tawng tam lem lo thung. Inluahtu te nen kan titi ho a, thingpui kan inzawh chuan ka nutei tawngkam mei nei tak tak avang chuan awm reng chakna ka nei lo a, haw ka rawt ta hmak reng bawk.


`Mambawih, naktuk inchhuah hma in kan inhmu lawk thei angem?` ka patea chuan motor ka luh hma chuan a rawn ti nghut a, ka hawilet vat. Ka nutei hriat loh a sawiduh a nei pawh ani mahna!


`Ka hrelo le. Dar 6 ah kan chhuak dawn a, engenita?` ka patea mitmeng a min ngenna chu hmu reng mahila a sir a ka nutei mengrang kual avang chuan inhmuhfal vel chu ka chak lem lo.


`Aaaaa, eng ni lo e. Ka hman leh rawn vailiam che u ka tum dawn nia` a ti ta ngawt a, ka khawngaih ve tep a ni. Ni e, pangai takin awm se, kan nufa khan a nupuiin min nghaisak lai khan vawikhat lek pawh tawng ve se chuan hetiang em em hian ka haw bik lovang.