REAL SAD LOVE

REAL SAD LOVE


ELTY LUHLUL AUG HNAMTE


Ni tla tur chu ka thlir vang vang a, kum 17 liam ta a ka mipa tawn, ka tleirawl mawl luat vang a ka ta ni ve tawh ngai lo tur mihring ngaihtuah bawkin kum 30 ka pelh hnu pawhin ka la buai chu anih hi! Ni e, ani kha ka hmangaih a, ka hmangaih ani tih ka hre har lutuk erawh ka vanduaina ti kaltluangtu a ni ta a ni.


`Nute, Puia hian a duh lutuk che a a` min ti tu kan thiannu pakhat chu ka en ang he haw a, ka nui vak ringawt. Ni e, khatihlai khan kum naupang te ka la ni, zep lo ah chuan inngaihzawn awmzia tak tak pawh ka la hre pha lo. Ka thiante chu keiaiin an kum a upa vek a, an lerh chuan ka lerh ve ani mai a, mahse ka pawh pha chiah lo deuh chu a ni.


`A ho emai, a mithmul a buk si` ka lo ti hlak a, ka thiante lah ring em em in an nui zui. Ni e, a mithmul kha a buk reuh khawp a, khatihlai a ka duhloh chhan ni a ka sawi kha tunhnu ah erawh a duhawmna tizualtu a ni tlat thung si.


`Ni ru, bakah tui pawh a chawi pui thei che anga, a tha dawn lutuk` an tih chuan ka phur ta ria. Khatih hunlai khan tui connection te la awm tha hek lo, mitin khan tui kan la chawi deuh vek ti ila dawt ka sawi tam lovang. Tui connection nei tan pawh a haw chhunin a haw tam lo a, kartawp ah chuan chawi a ngai tho tho.


Lehlawk, Puia hi kan thiannu Engi cousin Dina te nen thianho an nia, kan veng lam ah an rawn leng nasa bawk nen, kan innel hlawm phian a, an mawl a, keini lah bang lo. Tunhnu a ka ngaihtuah leh hian Puia kha mipa harh thawt thawt anih ngai ka hre lo. A cool a, a ding nuih suk suk thin. A tawng tlem em em a, mahse tu tawng pawh a ngaithla peh vek zel thung. Tun ang lai khawvel chu ni se a mizia ringawt ah hian hmeichhe tam tak an tawlhthlu ngeiin ka ring.


March ni 7.20** chu Puia bialnu ka nih tan ni a ni. Bialpa thar nei ka ni tih pawh hriat loh khawpin ka mizia a danglam eih lova, keimah a engmah effect a neih pawh ka hre hek lo. Khami ni, kan inngaihzawn ni tak khan tui kan neih tlem avangin ka pa in tui chawi turin min tir a, Puia te thianho an lo phei bawk a, a thiante dang erawh Engi te in lam ah an awm a, anierawh kan in ah a awm ve ran. Ka pa min tirhna angin Puia nen chuan tuichawi turin kan inzuichhuak hnak hnak a, kan inngaihzawn dawn khan ka thiante khan tui kin chawipuitu tur atan a that dan tur an sawi avang khan kei tleirawl at lai ni bawk chu a tuikawh haw na tur bucket lian tha tawk tak ka keng tel hmiah. Ani in engmah sawisel hek lo le, tichuan tuikhur a tui chu ka thal mawlh mawlh a, haw tur a tui min hlan hnu chuan a chanpual ve chu kawh tum a an thu, an tho leh tur chu a tho zo ta lo! Keilahin ka lo nuihzat khawp lehnghal! A bucket ami chu a paih then a, a khat lo a an kawt chu ka nuih a ti za khawp lehnghal. Ka lo va mawl thei tak!


.


.


.


Ka fapa chuan ka kut ah a vuan ve ran a, ni e, ka khawvel chu ani hi a ni tawh. Kum naupangte in pasal ka nei a, mahse keima fel tawk loh vang pawh ani ang, nuthlawi dinhmun ah chuan ka ding ve ta ran a! Nuthlawi nih hi ka tum a ni ngai lo, mahse ka dinna hmun apiang a lungawi mai thin hmeichhe pakhat kha ka ni miau a, mi thenkhatin nuthlawi an hmuhsit em em laiin thenkhat erawh chuan a reason an chhuichiang hmasa ve phawt thin, khawvel a ni miau a, tumah dem thei kan ni lo ve. Ka fapa hi lo piang lo ta se eng ang chiahin nge ka kahwvel hi a in her ang? Keima ngaihdan hrim hrim ah chuan ka nun hi a ho viau in ka ring. Diktak chuan mipat hmeichhiatna ah ka tlan ak ring lo, mahse zu ka heh viau in ka ring. Tunah ngei pawh hmeichhe perfect ka ni hek lo. Mahse ka fapa vang liau liau hian ka nun ruakna hi hnawh khah in a awm leh thin.


`Ma, saw saw ka duh ve` ti a ka fapa in a kawhna lam chu ka hawi a, ka pum a so nghal nghulh thei. A chhan chu chu mipa naupangin a ken toys vang ni lovin, chu mipa naupang bul a ding mipa zawk chuan a ni ka kawchhung ti so bulh tu zawk chu.


`Maaaa` ka fapa in min auh leh chuan ka harhchhuak nghal zawk.


`Bawihte, nakin....`


` Nute..` chu aw-ri ka hriat chuan ka khawng lah thei. Ni e, he mihring hi pasal ah ka nei lovang ti a Bible meuh nemnghet a ka tiam kha a ni. A chhan erawh min zawt su aw.... Ka hmangaih a, mahse ka nei thei si lo a ni.


`Aaa... Aw...` ka tawng bah nak a, ka la sim thei lo. A bulah hi chuan ka nervous thei mah mah a ni.


` Ava lian tawh ve a` a nui suk a, hmai sa hat hat chuan ka nui ve hak. A mithmul buk lam deuh hnuai a a mitmeng fiah kak si, mahse a mawi tawk lek a si sep si, a hmui lian lam aia te lampang, duk tih dawn a duk dum ni si lo, a pa tawk a ni ber mai. A sam dum hlap, tlem a kawi deuh hlek chu a sei lam hret tawh, a chal thui ve lam tawh chu a chalsam chuan a hliah a, a hnar zum vah mai hi alawm mawi ti a ka en nawn leh fo thin chu.


`Nia... Khawnge in kal a?` ka zam ani tih hrilh lo mahila ani tluk a hrechang an awm lo thung ang. A chhan chu hman atang tun thleng hian a bulah ka normal ngai tlat lo a ni.


`Hei, Bawiha hi inchung ah khian ka entir dawn a, kan la nghak anih hi Nangni zawk?`


`Keinipawh kan ni ve tho. Dr.Samu hnen ah ami?`


`Ummm.... A enge?`


`Aaaaa, hmanni deuh ah a zunkawng lam chiang lo ah kan kal tawh a, check up leh hun ania, mahse tunah chuan a tha tawh e. nangni zawk?`


`Anihchu. Keinichu a awm na hi a rei tawh deuh a, midang ah kan kal tawh a, hma kan sawn lutuk lo a, he doctor hi a tha an tia, kan test ve ang chu ka ti. Engzatna nge in nih?` a tih zawm zat a, ka pasal ni in ka fate pa ni se ava nuam dawn tak!


`11 na...`


`Anihchu, kan inhnaih hle mai. Tiru, thingpui in ang u hmiang. Ila in lo tih ka hria ania...` nui vur vur chuan a ti leh zat a, a sawidik. Kan la in lo tlat a ni.


`Yesss... Ma, keichu burger` ka fapa in alo tih chuan Puia fapa chuan alo tuihnih vat a, ka=eini pahnih erawh kan in en a, kan nui tawp.


Hi-5ive dawr lam chu kan pan nghal a, chhungkua te pawh kan ang in ka hria. Kan fate ve ve kan hma ah an kal a, an vawikhat inhmuhna mah ni se an innel nghal mai a, an inchhaih phei a, hmuh an nuam tak zet. A hnunglam a kal pahnih te erawh kan hmel ah nui hmel pu mahila boruak erawh a tang at thung. Ni e, naupang pahnih te ang mai a infiam bawrh bawrh thei kan ni ve tlat lo alawm.


AFTER 2 WEEKS


Hmanhmawh zetin ka insiam a, ka fapa school kal tur ka thlah fel a, ka hna lam a kal turin ka chhuak zui veleh nghal. Ka pa a boral tawh a, ka nu ho in kan unau 3 nen kan awm a, keihi a thlawi awmchhun ka ni a, unau mipa pakhat kan nei a, nupui neih a tum hnai tawh nghe nghe. Thian pakhat, ka engkim ka hrilh ngamna ka nei a, anipawhin ka lak ah zep a nei ngai lo. Engkim ah kan inthurual a, drinks zeuh zeuh pawh kan ching ve reng. Mahse hriatna hloh leh mawi lo zawng a khawsa erawh kan ni ngai lo thung. Midang kan mamawh em em lova, kan pahnih te hian kan hlim em em bawk. Hnathawhna in ang kan ni bawk nen, kan khawvel hi a nuam tawk viau. Ka chhungte zar ah fa pawm lo ang tluk ka ni nangin ka fapa tan erawh ka ngaihtuahna ka seng in ka hun pawh ka theih ang ang in ka pe ve bawk.


`Iva tlai tak. Enteh, Puia nen hmanni ah in inhmu em?` Mawitei min lo nghahna hmun ka thlen chuan alo ti nghal bawrh bawrh a, Puia nen kan chanchin hi hriat loh a nei lovang tih tur khawp a ni. Hmanni kan inhmuh erawh ka hrilh ta lo thung. A chhan chu inthiarfihlim tur a min hrilh reng avangin ho te ah a phili leh chul anga, chu chu ka peih hauh lo.


`Hmu e. Tinge?` ngaihsam hmel zet chuan ka chhang a, mahse engtinnge a hriat erawh ka hre chak zek zek thung. Ni e, Puia chanchin hi chu ka beng a verh reng thin tlat a ni.


`Min lo bia a...` ka hmel awmdan hre duhin min melh kar bawk. Hei hi chu a tih loh dan a ni hran lo. Puia chanchin a hriatin min hrilh lo ngai bik lo, mahse ka danglam em tih erawh chik zetin min melh ziah thung. Nghal lutuk hian!


`Anihchu. Kal ang, boss alo thlen leh hman chuan nilengin kan hrehawm leh tlawk tlawk palh ang` ngaihven loh hmel zet chuan ka kal a, a thawkhalh dan atang chuan ka lemchan chu ka hlawhchham tih erawh ka hrechiang ngang thung.


`A rawn tap a...` ka ding chawt a, ka kut ka hum ruh nasa khawp mai. Ni e, keipawh kha kar 2 chhung khan zan ah hian mittui nen a mut loh zan ka nei bik lo. Diktak chuan ka hmuh loh vang vang hi chuan ka zia ve mai a, ka suangtuahna ah erawh awm loh lai a nei ngai lo thung. Mitin in dream kan nei vek, ka dream ah hian amah lo chu tumah leng pha an awm lo.


`Kal ang` ka tah loh nan ka inhumruh nasa lutuk chu ka hah vek thei hial a ni.


`Chance hi pek veleh tumna i nei miah lo em ni?`


`Aih, awmzia a awm tawh lo. A fate ti fahrah turin keihi fahrah siamchhuaktu ang mai a nunrawng nih ka duh lo` ka aw chu a chang ta rat mai. Ni e, kha thutiam ka tiam ni khan keihian fahrah fa ka pawm tawh a, midang fa lehzel ti fahrah tu ka ni lovang tih ka tiam tel miau a ni


`Fahrah chu an ni sa reng alawm`


`An nu in a hmangaih a, let leh rawh se. A fate nu tluk a hlu a chhungkaw tan a awm lo. Ilo kal dawn nge ka kalsan dawn che?` ka ti nghat a, ka thiani lo kal thawm ka hre zui nghal. Nilengin ka awm a nuam lo a, taksa natna nei si lovin ka na reng tho si. Ni e, tun ah hian kum 13 lai a liam tawh. Nupui/pasal niin nun hrang kan nei ve ve tawh. Ka tihsual hmasak anih angin hremna chu ka tuar mai tur a ni.


........


`Hey, intiharh teh` ka thiannu chuan min sawi nawk nawk a, a sir ah kan thiannu tho pakhat, tun a kan awm mekna dawr neitu ni bawk chuan whisky dawmin alo nui awr awr thung. Office kan ban hma avang leh ka fapa apa te in lam ah zan 3 lai riak tur a a kal avangin ka free ve hle a, kan thiannu dawr ah kan lut kawi a, angaitein kan dawm leh nghal. Ka rilru ipik lutuk chhawk nan chinlem nei lo chuan ka in lehpek tawh.


`Min hawsan ru` zawi zet chuan ka ti nghat a, min hawsan dawn lo tih ka chiang. Kan zu in hma in Remi(dawr neitu) pawhin a chhungte phone in dawr bungrua a thlen dawn avang a a haw tlai tur thu a sawi lawk tlat a ni.


`Engvang nge? Ka hmangaih asin. Tinge a tah? Tinge min lo nghah loh? A tello chuan khawvel hi ka awm peih lo. Ata nih ka duh` ka mittui a tla a, hei hi ka ruih apiang a ka chham thin a ni. Harhfim a ka sawiduh miah loh hi ka ruih tawh chuan ka sawi leh mai thin.


.....


`Nute...` ka bengchhe ri em ni? Chu aw-ri chu Puia aw-ri a ni. Rui eng ang mahila he mihring aw-ri hi ka hai ngai lovang.


`Chu, Puia ani chiang. Ka mumang lam ah k cheng leh tawh. Lalnunpuia hian engtikahmah min pan tawh ngai lovang. A chhan chu a fate nu a nei tawh alawm` mittui nen ka au a ni ber. Ni e, nupui kha lo nei hman lo se chuan keihi hetiang hian ka awm lo anga, nupui tha tak ni in ka hmangaih chu nitin zantin ka kiang ah awmin ka hlim ve tur ania.


`Bawihte...` ka dar a vuantu chu muangchangin ka en a, ka mumang a ni hauh lo. Puia, ni e, Puia ngei mai chuan rilru nat hmel zet chuan min en a, mahse keimah a sual a rawn lian leh ta tho.


`Huh! Ilo kal elaw? Kal teh, mi pasal duhlai hi ka hnaih ah awm lo zawk teh` tih pah chuan min kuah a tumna a ban chu ka vai kiang lawp a, thawh ka tum a, mahse tho tur ka awm lo a ni ber e. Ka tlu tur chu rangzetin min rawn pawm bet a, tal ka duh, mahse ka taksa chu zlcohol in a hneh mah mah a ni. Tal tur ka awm hlawl lo. Ka va inhaw ru si tak em!


`Bawihte, tiang hian awm suh. Ka hruai haw ang che aw...` rui viau mahila a aw-ri a min ngaihtuahna leh a rilru natna chu ka hai mawlh lo.


`Ka haw ve thei. Rem, Mawi, haw ang u` mahni pawh a kal thei lo chuan ka cho harh thung. Ni e, eng ang pawhin ankhum in kut pawh thlak ila zaidam takin min dawm thin miau a, thinrim in min ti let dawn lo tih ka chiang em em.


`Bawihte, Mawitei a haw tawh. Remi thlah ila, ka thlah dawn che nia` a tih chuan ka harhkawk. Mawitei haw lai ka hre miah lo. Ka hawichhuak a, Remi pawh a dawhkan bawhin alo mu nguai, a kai ve hle tih hrilh chawp ka ngai lo.


Puia chu hnial chi ah vak ka ngai tawh lo. Remi dawr chu a khar fel sak a ni ringawt, kan pahnih chuan Remi dawr thlang a a motor hunna thleng chuan min kuah thla a, mi an reh tawh a, min hmu tur an awm lem lo bawk a, ka harh ta deuh bawk nen, Remi zawk chu ala kai ngang mai. Remi te in kan thlen chuan a room hi an inchung ah anih avangin ka han kuahchho a, keichu ka normal tawh viau.


Kan haw kawng ah chuan hmun pakhat, mi rehna lai deuh a awm a, ngawirengin a ding a, keipawh ka tawng bik lo. Alcohol khan keimah ah effect la nei tho mahse ka rui lutuk erawh a reh vek tawh. Mahse nidang a a bul a ka zam ang em em chuan ka zam tawh hauh lo thung. Alcohol hnathawh te pawh aniang.


`Ka rin phak bakin i awm?` a ti nghat a, motor steering a chum dat a, ka inthlahrung ru ve kher mai.


`Thil hi kan rindan ang vekin a kal lo anih hi` ka ti ve nghat thung.


`Mahse....`


`Ka vawikhatna a ni lo ania. Vawi tam tak zu ka in tawh` ka lo ti leh hmiah thung. Ni e, ka nihna ania, engvangin nge dawt ka sawi tehlul ang???


`Keimah vang vek tiraw....`


`Aih, ka duh a, tu vang mahin ka in lo` ka ti leh nghat. Ni e, puh tur ting chuan amah ka ngai thei lutuk chhawk nan ka in thin. Ka in tirh khan tui ka ti lo. Mahse chatthla hmawkin ka in lui a, ka chahthlak lai khan engmah ka hre lo a, kha kha nuam ka ti em em tlat a ni.


`Ila sim thei angem?` ka nui hawk! Zu ngawlvei ang maiin min hmu anihchu! Ka dem hran lo ve. Hmeichhia akar a zuthlawi lehnghal khatiang em em a han ruih kha chu ka zahpuiawm takzet alawm. Mahse enge ka tih chuan ang? Ka nun khawhar lutuk hnawhkhah nan hian mipa ai chuan zu hi ka thlang ve mai a ni.


`Buai duh suh. A tlai tawh, kal ang, i nupui fanau ten an lo nghakhlel ang che` ka ti sap a, nupui tih thumal ka sawi dawn khan ka tawt up up a, ka aw lawi rat pawh chu thup vak ngaihna a awm lo.


`Nupui ka nei tawh lo` a tawi tek tawk viau.


`Ila nei leh dawn, i fate nu ngei`


`Ka fate chuan nangmah hi an nu thei....`


`Thu ho mai mai sawi tur chuan kan upa tawh` a tawng zawh hma chuan ka lo tihkhalh hmak.


`Thil pakhat ka zawt thei che ngem?` a tih chuan remtihnan ka bu nghauh a.


`Engvang a khatihlai khan min kalsan nge inih?` a tih chuan ka ner nawk. Ka kalsan chhan kha hriatloh der thar a tum tihna em ni? Kum 13 a liam tawh, mahse a bialnu ngeiin ka hnen a an inngaihzawn thu min hrilh lai khan ka bialpa chu amah hi a ni. Engvanginnge kei tleirawl, a bialpa atchilh a tih thinur hlau reng thin khan a bialpa kha a zawh ngam tehlul ang? Dawihzep tak a tlanchhia kha tun a a hma a ding, nun zawng zawng hloh ta hi a ni tih hriat loh der a tum tihna maw? Tenawm hian!


`Heh! I hre lo amaw?` ka en ran a, ka nuihsawh hmel a hmuh chuan a thle bak a.


`Hria ila ka zawt hauh lovang che` a ti ve nghat.


`I bialnu ka nih lai a i bialnu in inngaihzawn thu min hrilh khan enge ti se min tih?` ka tih chuan makti zetin min melh a, keilah thinrim avangin ka meng de sar thung.


`Chutiangin nang lo ngaihzawng ka neih ka hre ve hauh lo` a ti sap a, mak tak maiin a thusawi chu a dik tih ka thinlung ah a chiang em em tlat.


`Mahse a sawi miau alawm` ka awmdan chu hman a hmeichhe tleirawl, rilru no em em kha ni in ka inhre leh hial a ni.


`Min zawt hmasa tur ini asin` a ti sap a, min dem a, ka hrethiam. Ni e, ka zawt lo a, khatih hunlai khan ka hlauthanwg lutuk a, `Aw` ti a min chhan ka hlau lutuk kha ngawirengin ka kalsan ta kha a ni. Vawi engemawzat min biak a tum a, ka chhang ngai lo. Kan in ah meuh alo kal a, biak theihin ka awm ngai hek lo. PPasal ka um zan khan let leh turin min ngen a, mahse a tlai tawh. Khatah chiah khan alawm ka hmangaih chu tunge anih ka hriatchhuah tak chiah ni.


`Ka hlauthawng a ni` ka ti sap a, ngawirengin ka kut ah a rawn vuan a.


`I tihsual a awm lo ania. Ihmaw, i chanchin hi ka hrereng, ka ngaihven reng. Hmeichhe nasa tak, nuthlawi nasa, hlauh nei lo an ti thin che. Mahse ka chiang a ni. I NI LO. Hmeichhe nunnem, midang hlimna atan a in pe ral thak ngam, thinlung no em em i ni tih ka hria. I zu in chungchang hi ka la hre lo a, i inthup ve thin viau ang tih ka hrethiam. Mahse hei chauh hi ka ngen ang che, ZU IN TAWH SUH` a tih chuan za vaklo in ka nui hak a, ka ta ni se chuan he ka inhnem ve na ZU hi ka in hauh lovang.


`Aih, nuthlawi nasa nih zel hi ka duh` ka ti nghat a. Mi min sawidan ah ka buai lo, mahse he ka buan hneh theih loh HMANGAIHNA vang hian engmah hi ka hmachhawn tha peih lo a ni ber e.


`I nihna ni miah lo a lan i tum tlat hi tha ka ti lo`


`Ka chung a thuneitu ni la chuan ka zawm mai tur ania` ka nui lui leh hak a, dawt ni miau hek lo.


`Tiang hian awm suh`


`Engtin?`


`Ka sawi awih la`


`I ho e a` ka tih chuan a lam ah min pawt hnai dawrh a, rem lo zet a min rawn fawh chuan ka insum hman bik lo, duhthawh zet chuan ka chhang let ve nghal a, a vawikhatna!


....



Hun a liam a, kum a liam a, eng ang pawhin hmangaih ila awmze awm lo hmangaih hi bansan ka ngai tih nitin inhrilh chungin a tawpna ka siam thei chuang lo. engvanginnge he HMANGAIHNA hi min pek bik? Kei hmeichhe chaklo tak hi tinge he thil hi min pek bik? Mahse ka tuar zawh bak harsatna min pe lovang tih rinna neitu ka nih miau avangin ka vui lo va, hmangaih nei thei khawp a mi pangai a min siamtu hi he ka LOVE LINE -ah hian demna ka nei ngai lo.


`A tawpna atan kan inhmu thei angem?` ka msg dawn chu ka en a, ka nui sak. Nasa takin hma ka sawn tawh tih ka hria. Mahse hmu leh ta ila, bultan that leh a chakawm thu sawidun leh ta ila engtiang chiahin nge ka awmzui ang ka hre lo, mahse infiah ve chu ka phu tawh alawm. Kum 16 a liam tawh e.


`A hun leh hmun sawi la.....`


`Zanah ka lo kal anga, hmun dang a ngai lo, duhleh motor ah kan ti ti anga` min reply rang kher mai. Ni e, ka duhdan la theihnghilh lo tu a ni. In ah emaw, mi zing a kal vel hi ka peih lem lo a, motor a awm chuan khawilai hmun reh deuh lai a motor chhung a thut pah a ti ti mai mai kha nuam ka ti ber thin miau a ni. Tunah pawh chu chu ka nuam tih ber ala ni.


Dar 7 rik hma hretin alo thleng a, ka chhungte chhuah ka dil tawh a, ka fapa leh ka nu an inkhawm a, haw har lo turin min hrilh mai a, min rintawkna ah ka lawm viau zel. In atang min tlanchhuah pui a, muangchangin Chite lam min pan pui a, ka rilru chuan mi pasal ka chhuahpui avangin ka inthiam chiah lem lo. Mahse ka hmangaih berka chhuahpui ti in ka inhnem chawp ve tlat thung.


`Ka lawm e aw....` hmun pakhat ah chuan kan ding a, khua a lum deuh avangin motor chhung atang chhuak in motor hma lam ah motor ngheng in kan awm a, thla a eng no em em zui.


`Engvang ngawtin?`


`Ka dilna che i remtih avangin`


`A tawpna tur a ni bawk a, lawmthu sawi ai chuan kan hmalam hun sawi zawk ang` ka ti vat a, diktak chuan a rimtui lutuk te, a taksa lum in min ur ham ham na te avang chuan amah kuah lo turin ka insum hram hram chu a ni ber e.


`Tlanbo daih ang` ka nui hawk thung.


`Naupang an tha em?` a thusawi chu ka haider hmiah.


`Tha e. Ka sawi chu....` a ze ngai bawk. A zawhna hi engpawhnise haider tum thin mahila a theih loh bur.


`In nu...`


`Sawi lovang`


`Ihmaw, zanin hian nang leh kei a inkar hi siamtha leh tur a hmu che ka ni lova, lungdam tak a thlah liam che ka duh avang chauhin i rawtna kha pawm ka ni. Ka hmangaih tawh lovang che ka ti lo, mahse ka hmangaih che avangin mi 4 natna pe tur khawpin ka sual bik lo ania aw` ka nui sak a, a rinloh lam ka sawi tih ka hria. Mahse keimah a chhia leh tha hriatna hian hmangaihna selfish tak min neih tir thei tlat lo.


`Tinge maw kan vanduai bik em em le....` ka sawi tur awm zawk tak ni in ka lo hre pek. Anichu vanduai kar ah a vannei a, a nupui fanau te nen an la awm ho a, hmangaih em em tu nupui a nei bawk.


`Keichu kan vannei ka ti`


`Min hmangaih ve miah lo tihna ami?` ka en a, ka lu ka thing a.


`Ka hmangaih che. Nangaia mipa hmangaih hi ka nei leh tawh kher lovang. Mahse ka lawm asin. Hmangaihna nei thei khawp a chunglam khian dinhmun ropui a min dah hi ka lawm a, phulo ka in ti. I ta ni in ka ta ni ngai dawn lo mahla maw, ka hmangaih miau che avangin ka la lawm fan. A chhan chu maw, hmangaihna a awm pawh ring lo tu te hnen a nang ka hmangaihna che ka sawi thei tur hi ka lawm asin. Ka hmangaih che hi ka inchhir ngai lova, vawi tam tak tap chungin muhil thin mah ila Pathian hi a tha asin, he khawvel a nangmah hmangaih leh tehi tur che a min kaitho lehzel hi` ka tih chuan min rawn kuah hnawk a, ni e, ka ngaihdan a ni, chumi rual chuan a sawi ang chiahin vanduai ka in ti teh meuh mai. Mahse a lungkuai zawng a ka sawi ve anih chuan ka hmangaih rilru hi a buai tulh tulh anga, mualpho leh midang tihnat bak kan hmachhawn dawn lo tih ak chiang em asin.


`Ka hua che a, mahse ka hmangaih ngawih ngawih si che. Ka duh ang hian vawikhat tal awm ve la mi sawina mai mai chu a reh leh mai dawn a, kan pahnih in hlim takin kan awm thei dawn alawm` a sawidik chiah. Mi sawina chu a reh veleh mai ang, mahse chu chu kawng tha ber a ni lo. Thlemna duhawm tak a ni, mahse chu thlemna chu hneh ka ngai thung si. Ka hringnun hi a fair hlawl lo.


`Ni lo e. Tihian ti ang, nangin min hmangaih reng chungin i nupui fanau te i enkawl anga, keiin nang hmangaih reng chungin ka fapa tan ka nung anga, nun bawlhhlawh leh tenawm, kan chhungkua ve ve tan a zahna leh rumna thlen lo turin kan nung anga, a thi hmasa zawk zawk erawh hmui a fawpin inthlah ang` ka tih chuan a awm ah min kuah bet a, a tawng tawh lo. Keipawh tawng leh tur ka awm bik lo. Diktak chuan thi hmasa ila ka ti thin. A chhan chu ka ruang chung ah hian thlahna a siam ngei ang tih ka ring tlat a ni.


`I thi hmasa lovang tih min tiam rawh` a aw chu a lawi rut a, ka mittui chuan a awm a ti huh hlap tawh bawk. Tanwg duah lo mahila kan inkar hi chu ngawireng pawn tahna a tam asin. Kan ka a kan sawi hi kan thinlungin a zawm zo thin si lo alawm le.


`Thih rual ka duh` ka tap tih ka thup buai peih tawh lo. Ka insut hlawp hlawp a, min hnem turin a kut emaw, a taksa a che lo a, tawngkam a nei hek lo. Mahse nghet tak a min kuahna chuan a taksa tihchet emaw twngkam a neih a ngai lo.


`Hringnun hi a rawng mange` min kuahna a tih thawl deuh hnu chuan a ti sup a, ka rilrem zawng tak a ni.


`Mahse kan paltlang ngei a ngai si alawm....` ka sawi zawh hma in a phone a rawn ri a, a ngaihsak lo. Mahse a rawn rik nawn leh chuan la turin ka ti tlat a, tunge lo call tih kan hrechiang dun lutuk tlat.


`Hello`


`Zawnga, khawnge i awm? Rawn haw nghal rawh` chu aw-ri ka hriat chuan ka khawng lah thung. Ka hmangaih hi Zawnga tih a koh a phulo asin.


`Nakin ah ka rawn bia ang che` tih pah chuan phone a dah hmak a, a switch off zui nghal hmak bawk.


`Ihhh....`


`Sawi zui lovang` alo ti vat thung. Mahse ka insum thei tlat lo.


`Tiang khan a vin thin che ami?`


`I hriat kha, a chang chuan hmeichhia hi in thin a chhe ve thin a` a nupui khuhmawi a tumna chu na ve det mahila ka fak hle thung.


`Mahse zawnga a ti che a` ka helh lai ber ka sawichhuak ta nge nge.


`Hrethiam rawh. Hmeichhia hi nangmah ang vek an ni lo alawm. I mut a chhuak em?` a thusawi inpersan lutuk avang chuan ka nui hak a.


`Chhuak lo e. Mahse haw tawh ila a that ka ring` ka ti vat thung. Heta kan awm reng hian engmah kan siamthat phah dawn lo.


`Ka haw peih lo eeee` a tih chuan ka lainat kher mai.


`A theih ngawt loh. I haw veleh i nupui alo vin emaw, alo titau anihpawhin tha takin bia la, i hmangaihna hmuhtir ang che. I fate hma ah in nupa inhau ngai lo ula, i nu leh pa, i unaute tan mo leh unaunu tha tak anih zel theih nan i nupui rilru hah in dah ngai suh ang che` ka ti sap a, sawi a harsat zia chu a tawng ve tan lo chuan hriatthiam phak chi a ni lo. Thinlung rum vawng vawng a duhsakna thu hlan a ngai a, mahse keiaiin he thil hi a tawng hmasa zawk. Tunah chuan alo nat tawhna kha ka hraitthiampui ve tan chauh zawk a ni.


Kan inbul kan thlen chuan motor atang a ka chhuah hma in ka kut a rawn vuan a, a tawpna atan sawi duh a nei tih ka hria, keipawn ka nei, mahse engmah sawi ka tum tawh lo.


`Ka hmangaih che tih hrereng la, i rilru i thlak anihchuan i tan ka awm reng ang. Nangmah a thatna tam tak awm kha keimah vang mai mai in tichhe lo la, i fapa tan nu tha tak ni la, ka tan ka hmangaih, ka chhuan em em thin ni reng ang che. Harsatna i neihin min hrilh hreh lo la, nangmah chauh a beih a, zu nen a fight kha sim la, i tan ka awm reng ang. Mi in engtinpawh sawi che se keiaia hrechiang che an awm lo a, buai ngai suh ang che. Chuan, a tawpna atan ka fawp thei che angem?` a tih chuan ka mittui a tling pap a, ka remti tih nan ka bu nghauh a, a lam ah min pawt hnai a, duhthawh leh lungchim zetin min fawp a, keipawh ka duhthawh kher mai. Hei hi ka van kai pui tur anih ka ring bawk.


`Kal tawh rawh. Ka kham ngai dawn lo che. A tawp nan tak tak, PIALRAL HI A AWM VE TAK TAK ANIHCHUAN PIALRAL AH TAL KA TA NI VE TAWH RAWH AW....` kham lo zet a min fawh zawh chuan min namsawn a, he thu hi a sawi ta a ni. Ka chhang thei lo. Pialral ah pawh an nu hian min pe phal angem ka hre miau lo a, mahse beiseina tih mit erawh ka tum bik lo.


Ka hmangaih chu ka thlah ta, ka kehsawm a, a duhdan ang lovin ka nun ka hmang a, mipa reng reng ka hnaih chak lova, bultan that tumin ngaihzawng nei ve thin mahila a tawp ah amah nen bawk ka khaikhin leh a, amah chhingzo tumah an la awm si lo. Ka tlan a, ka au a, ka vai ruai a, mahse a nun tibuai turin engthil mah a hnen ah sawi ka nei leh tawh ngai lo thung. A chanchin zawh ka bang lova, anipawhin a bang bik lo. Mahse daidantu bang hi a chhah em a, paltlang turin ka thutiam avangin ka su tlang thei si lo. Vawi tam tak mi sawi pawh ngaihven lova sahal a thutlukna ka siam chung pawhin ka thluak sir a fim tlemte awm hian min khap bet leh si thin a ni.


HLIM LA, NUI LA, MALSAWMNA TAM TAK DAWNG LA, PIALRAL AH I TAN KA LO AWM RENG ANG.






( KA STORY KAL LAI MEZZANOTE KA CHHUNZAWM THEI RIH LOVA, A FULL LAW LAW A DAH KA DUH AVANGIN A KARLAK A CHHIAR AH HEI HI KA RAWN HUNG LUT RIH E. MEZZANOTE KHA KA ZAWM NGEI DAWN A, MAHSE ENGTIKNGE TIH KA SAWI MAI THEI RIH LO A, KA RAWN DAH ANIH ERAWH CHUAN A FULL IN KA RAWN DAH NGEI THUNG ANG. KEI SIMEIKHU HI MIN LO HRETHIAM LEH HRAM HRAM RU AW.....)