MOONLIGHT LOVE (Complete)

• FAKE FRIEND

ELTY LUHLUL AUG HNAMTE

‘Te, kan va inbe khât ve' ka beng bul a ka phone ngaihthlak chu nghet zet in ka vuan a, ka tawt leh ta up up e!


LALTLANMAWII ka ni a, nu leh pa tha tak ka nei chungin ze danglam tak ka nei. Kum 29 na ka hmang mek a, nula senior lam ka kai tan tawh. Mahse ka vun no surh leh khal lampang ka nihna hian ka kum aiin min lan naupang tir a, ka kum ring dik nghal chat hi tumah ka la hre lo. Sawrkar hnuai a department pakhat ah LDC hna ka chelh ve a, ka hna ah ka hlim tawk em em a, Kum 10 liam ta a min ti na ngawih ngawih tu vang a zuai chang nei ni mahila ka inbawhbeh tir duh tawh lo thung.


Ani nen khan Kum 18 ka tlin kum in kan intawng a, chunglai chuan college ka Kal lai ani bawk. Ka graduate hma chiah kum ani a, anierawh college kal tawh lo in bank pakhat ah hnathawkin a awm thung. A tawi zawngin, Kum 1 kan inngaizawng tling tep tih in ka thian pakhat, ka rin em em nen an inkawp tih ka hrechhuak a, khami tum a ka nat zia kha thu hian a sawifiah zo in ka ring lo.


College kal tawp ni anih avang leh Christmas a hnaih tawh bawk vang ni pah fawmin kan thianho chuan Chaw eikhawm kan rel a, kan thiannu pakhat, Aremi te in ah kan eikhawm a, ngaihzawng nei in hruai kan tih bawk avangin keipawh in U Chhantea chu ka sawm a, anipawh hna an ban hma dawn tho avangin a hnial lem lo. Aremi chu an pa alo kal tlai dawn avangin Bazar pui ah min sawm a, U Chhantea chu a hman ve loh avangin leh Puii (Kan thiannu, ka bialpa min chhuhsaktu ngei mai) chu a nu in a tirh kawi avangin U Chhantea lo lam turin kan ti a, ngaihthat lohna pawh nei miah lo chuan Aremi nen kan Bazar ta kha ania, khati khawp a ka mi rin ten min bum thei kha ka ngaihtuah let apiangin na ka ti thar leh a, ka zak bang thei lo a ni tawp mai.


'Te, in pa te chu han phone teh, sa-um lo lei se, ka lo pe leh ang' Aremi chuan rawng kan bawl mawlh mawlh lai chuan a rawn ti sat sat a, keipawhin U Chhantea chu ka call nghal a, an lo kal mek thu leh an rawn lei tur thu min hrilh hnu chuan phone ka dah zui lehnghal mai. Khatihlai khan ka thluak hi hmang ila chuan U Chhantea thaw ham ham ri kha ka ngaih a tha hauh lo tur, ka ngaihtuah let erawh chuan ka hre let vang vang thunh si.


Chaw eikham chuan Aremi te inchung zawl ah kan thu a, guitar perh in kan zai a, kan hlim ve khawp mai. Puii chu cas nei lo bik anih avangin kan care hlawm viau a, keitak phei chuan hrehawm a tih ka hlauh avangin U Chhantea bulah pawh ka thu lo a, Puii zawk thu in kei an opposite ah ka thu thung. Thian kan Ni a, thik en ah ka en miah lo bawk.


Tui ti tak a kan zai lai chuan ka mit fukna chuan min ti tim sawk thei. Aremi bialpa, Sangpuia'n guitar a perh a, Aremi chuan alo ngheng chial bawk. Chulam ai chuan Puii kut humtu kut chu tudang mah ni lo in ka bialpa ngei mai a ni tlat si. Ka chhungril hi a che dawt a, mahse ka inngaihtuah fim thuai a, bialpa nei ve lo anih vangin U Chhantea chuan a hnem ni turah ka ngai lui tlat. Mahse ka chhungril erawh a hlim kim ta tlat lo.


‘Te, theitui zuk siam lawk ila' Aremi'n a tih chuan rangzetin ka tho a, ka ngaihtuahna lo kawm bawk nen, tawng lem lo chuan ka kal nghal vut.


Theitui kan siam lai chuan Sangpuia zung Turin a rawn chhuk ve bawk a, a zun zawh rual chuan theitui chu kan chawi chho nghal a. Mahse enge ka ei hriat ka hre lo, step kan rah tantirh chuan Aremi te pahnih chu thawm siam lo turin ka hrilh sap a, maktih hmel deuh a min en chuan ka lu ka thing tawp. Engemaw tak tawk tur ah ka inngai tlat bawk. Anni pawh chuan min hnial lo chuan thawm nei miah lo chuan min zui ve mai a, inchung luhna kawngka ka thlen chuan ka thil hmuh chuan min thawng lo ti ila chuan ka tisual mai thei, mahse ka buai chhe miah lo, hei hi keimah ti keimahtu an tih thin a ni. Thil thinthawng tawn thut hian ka buai chul ngai lo a, dam dap in ka hmachhawn thei zawk thin. Chumi vang erawh chuan min thawng lo tihna erawh ani chuang hek lo.


'Theitui hi in duh ve angem?’ uluk tak a infawp te chuan ka lam an lo hawi rual thawt a, an hmel chu Phung hmu thut ai pawhin a phawk zawk in ka ring.


'Enteh… Te… Ihhhh….’ Puii tawng tur chu ka nuihsak a.


'Insawifiah a ngai hleinem. Keimah ber hi single ka lo ni zawk anih hmel' ka tray chawi chu dawhkan te awm ah chuan ka hung a, ka che erawh a dam dap thung.


‘Ni lo…. Bawih….’


‘Arem, Sangpuia hian min thlah mai se pawi iti em?’ Mak tih hmel zet a lot hawi Aremi chu ka melh a, remti hram se ti lutukin ka en bawk.


'Aww…. Aih,Ni lo…. Aw, lutuk' Aremi tawng bah nuaih chu ka nuihsak a, ka haw vat erawh a ngai, anihlohchuan helai hmun ah hian ka mize lehlam a lang palh hlauh ang tih ka hlau, thinrim lutuk avang a khaw hmu lo a Chetna!


‘Bawihi….’ U Chhantea chuan min rawn pan a, kei erawh kuangkuahin ka ding ran thung.


'Insawifiah a ngai lo ka tih tawh kha. Puii, ka thian tha tak I ni a, I duh anihphawt chuan min hrilh la, hetiang lo deuh hian ka kian mai tur che, a awmzia chu, hei aia zahawm zawk hian I bialpa a ni mai tur ka tihna ania' ka kut khur chu an hmu ang tih erawh ka hlau lutuk.


'Khachu tihpalh….’


‘I bialnu thiannu duhthawh tak a fawh kha tihpalh anihchuan khawvel ah hian tihpalh a tam awm mange! Pui, tha takin enkawl la, a chungchang a hriat duh I neih chuan I thiannu hi min zawt thei reng ania. Sangpui, min va thlah ta che' tih pah chuan Sangpuia lam chu ka hawi nghal a, ka hmel en in Aremi pawhin min hrethiam aniang, Sangpuia chu a mitmei zauh a, hawilet leh tawh miah lo chuan ka pen zui nghal!


Khatiang thil tehhrep hnu ah khan U Chhantea pawhin min biak a insawifiah a tum viau nangin kei hmeichhe lunglian, dawhthei tak, a tih loh lam a hawilet ngai lo chuan biak tumna pakhatmah ka nei lo.


Heta tang hian ka nun a danglam chho a, hmeichhe harhvang, fiamthu duh leh rual Pawl thiam tak kha hmeichhe tawng mawh, thian ngaina lo leh mal tlat nun neitu ka lo ni ta a ni.


Ka graduate hnu ah ka hna dil ka tling ve hlauh a, tuna ka thawh mekna hi a ni. Mahni a hna ka vawn hnu Kum 2 na ah mo kan nei a, a fel viau nachungin pasal neih ka tum miau loh avangin mo te tan a hnawksak nih hun a thleng thei tih chhuanlam in ka indang a, ka chhungte thinrim viau mahse tunaherawh an lawm viau tawh thung.


Kha hun hrehawm zet ka tawn hnu atang Khan ngaihzawng ka la nei leh miah lo a, thian pawh Aremi bak ka neih belh hek lo. Anni erawh Sangpuia nen innei in fapa duhawm zet an nei tawh a, pasal ngaihsak turin min nawr beidawng tawh a, mahse min ngaihtuah tu ber te an ni ta zel.


‘Thiani, zanin chu Chaw lo ei rawh aw…. Kan pa lui kal in Sangha a rawn hawn teuh a, ei ho ang u' Aremi chuan office a ka awm lai chuan min rawn phone lauh lauh a, henu zet hi chuan min duhsak a, min hmangaih tih hi phat ka tum buai lo.


'Aw le. Tak a, ka lobster chah alo thleng a, kan siam tel nghal thei ani mai' lobster ka ngainat em avangin to deuh mahse chawm nei ve ta lo chu ka chah ve a, Aremi te Chaw ei a sawm ka lo rilruk zawk ani nangin a che hmasa leh ta zawk sia, Ken a rem ta phian zawk.


‘Yessss… E, chuan kan pa cousin in Chaw alo ei ve dawn a, mahse hnawksak lo chi. Gamer ania, phone a khawih leh daih tho ang' a rawn sawifiah nghal chu a tih than loh dan ani lo. Ka zia a hrechiang a, hriat ngai loh bul a awm ai chuan mahni a awm bo hmak duh chi ka ni tih a hrechiang lutuk tlat.


‘Aw le. Ka lo bang vat ang' ka tih hnu chuan phone kan dah a, ka hna ka thawk zui leh mawlh mawlh. Ka sir a thu, Rinawmi pawh a hming pu zo lo zet in a hna ngaihsak lo lekin phone a hman leh tawh hi! He mihring tluk a phone lawm leh hna ngaihsak lo hi ka la hre ngai lo. Keiaiin a junior a, Mamit atang an rawn transfer ania, thla 3 em pawh kan la thawk ho lo, a zia hi ka ngaina hlawl lo. Kan pu room ah a tam em em a, a rawn chhuah hian lipstick a inhnawih tha ngei ngei bawk. Tenawm lutuk!


'Ka rinaiin ilo haw hma. Bawihtea hi lo la lawks teh' Aremi te in ka luh rual chuan kan naute hmeltha chu ka kut ah a awm nghal hmiah. Inchhung Chet, rawngbawl zei tak ka nih miau loh avangin Chaw kan ei ho dawn reng reng in nau ka chang a, Aremi'n rawng a bawl thung thin.


'Rem, Sanga chu alo haw dawn tawh em?’ sitting room atang a choka luh pheina atang a mipa lo tawng chu ka en vat a, a hmeltha. Aw, Ni e, a tha a ni tawp mai. A ngo hluak lo a, a hmui a tawk te in a chhah tap a, a sam chu chunglam a buk deuh hlek a, a mitmeng a zim lam deuh a ni. A mitmu erawh a var viau lo, Sangzuala cousin anih ka ring nghal, a chhan chu an hmai pian a in ang tlat a ni.


‘E, aw, alo thleng tep ang. Nick, hei hi Tei, ka bestie, Te, hei hi Kan pa cousin Nicky anih hi' Aremi chuan min inhmelhriattir vat a, nuisang chuan ka en a, tawite in a khi suk a, sitting room lam ah a lut zui lehnghal daih.


‘'Ka va hmu ve ngai lo ve' Aremi chu ka en ha a, ka naute pawm chu ka malchung ah a muhil chiah chiah bawk.


'A awm tlem a, phai ah hnathawk in a awm char char a, thla hmasa lawk Khan alo haw chiah alawm. A lengchhuak ngai lo a' ka lobster hawn chu siam turin a buatsaih mawlh mawlh a, a hmel atang a phurzia ka hre thei. Nia, Kan ei duhzawng te hi kan thiandun hian in ang vek hek! Lobster te chu lei mai mai tur awm lo ania, hmuh chhun ah tunge phur lo tehlul ang!


Aremi te pawh karhnih lai kan intlawh ta lo. Hna lam ah ka tul em a, April thla anih dawn hi chuan sawrkar hnathawk te hi mawng vawm ba ang mai kan ni thin miau a!


'In va bang tlai awm ve…' Office kawt ah ka ding a, ka scooty chu ka hru fai mawlh mawlh. Aw-ri ka hriatna lam chu ka hawi vat a, ka bul mai a Nicky ding ka hmuh chuan ka phu zawk thei. Nia, khami ni bak kha ka hmu leh tawh lo a, ka hre zui chuang hek lo.


'Aaaa… Nia. Khawnge I kal a?’ ka ti tha ve mai a, a hmelthat zia erawh ka la sawi fan ang. Mipa hmeltha ka hmuh khât vei nen!


'Bungkawn ah ka thianpa ka han hmu lawk a'


'Nihchu. Ka kalsan phawt ang che' tih pah chuan scooty chu ka ti nung nghal vat a, engemaw ti tak hian ka zâm riau pek!


A tawi zawngin, Nicky khan ka number Aremi alo zawt a, ka thiannu lah lo phusa, min rawn eih lo in alo pe hmiah. Mahse a hunlai khan lungawi loh ai mahin ka lawm daih zawk. A chhan chu keipawhin ka star ru ve tho a, ka bialpa anih theih phah a, ka hlim zia kha phatsan ka tawh leh hma khan!


Rinai takin Nicky chu a puitling a, computer lam a thiam tha a, mi hnuai a daily a thawk ni hran lovin a thiamna hmang tangkaiin sawrkar hna pawimawh tak tak sawrkar tan a thawhsak fo a, mimal leh company pawhin an hire ve deuh reng, chutihrualin hna nghet ang a thawh erawh a duh tlat lo thung. A chhan erawh min hrilh duh rih lo tih a sawi a, ka zawt lui bik ngai lo.


Kan inngaihzawnna boruak chu a hlimawm a, Kan biahthu lo em em chungin kan inngai viau tho. Zanah ka mut hma game a khel ngai lo a, ka mut hnu ah a khel tan ve choh thin. Hna a awl chang a chhun a a khel erawh ka tihtauh pui fo a, PUBG nge keimah tih hi duh ka thlan tir chang lah a tan, confi tak in ka hming a sawi mai a, ka lungawi leh mai zel bawk.


A chang a a PUBG khelh vang a call a pick loh leh fo thin avangin ka ning ta deuh a, zan lam ah muttheih loh changin ani khel duh si tihbuai reng ai chuan ti in ka install ve pek alawm, kei mobile games vel khel ngai lo lutuk hian a tir ah chuan ka zei lo lutuk hi Amah ngei pawhin min nuih tawp zel. Mahse ka khel tam tulh tulh a, a zia ka man tulh tulh a, amah ai mah in ka uar ta zawk. Lewl….


Inhauhna kan nei ngai lo a, kan hlim a, hnathawh chhung bakah chuan game kan khel ta reng zawk a, engemaw ti takin nuam ka ti. A chhan chu ka khelh ve hma kha chuan kan inbiak hian games a khelh duh tawh ka hlauh avang hian ka be rei lutuk hreh thin a, tunah chuan kan mu rual thei a, PUBG atang kan inbe thei reng bawk a, ka enjoy ta phian!



Chutia khel ve ta fo chu thian thar neuh neih ka neih belh a, nuam ka ti in ka zia pawh a dang sawt hle. Ka nui tam a, ka khawvel thlir pawh a dang chho veleh tial tial. Hman a keimah, tawngduh leh nuih duh zet kha ka let leh tan mek a ni. Ka thian thar zing a pakhat, FX_Linda tih chu ka ngaina a, hmeichhe thian zing ah ka khelhpui tam ber Pawl ani Ang. Mahse ka natna tur tih reng ka hre hauh lo.


Zankhat chu office hna ka hawn avangin Nicky pawh min khelhsan rih tur leh hnathawh ka ngaih rih thu ka hrilh a, anipawh chuan alo aw ve Mai. A chhan chu hna ka thawhin ka biak theih loh tih hrechiangtu ani ve tlat tawh. Alo Len pawhin hna ka hawn palh vaih chuan ngawireng a TV lo en a ni tawp mai.


Hna ka zawh chuan a tuk inrinni a ni bawk nen, dar 12 dawn ah PUBG chu ka lut a, Vicky leh Linda pawh an lo khelhdun ran a, an khelh zawh ka nghak mai a, hei hi kan tih thin Dan a ni. An zawh chuan ka va tel nidang ang bawk chuan ka ri leh bawrh bawrh a, Linda pawh chuan min lo be bawrh bawrh a, mahse kan khel tan chu nidang a ka bul a kal zel thin kha Nicky kha a tla fal nalh a, voice a on lo bawk. Voice hi chu net a that loh chuan ka hrethiam, mahse min kalsan zel chu mak ka ti ru tan. Rank kan push avangin hmun fal lam ah Kan zuang a, Zharki ah kan tum a, min hnaih lo lam zel ah a kal a, Linda chuan a zui hnak hnak bawk. Ka chhungril ah diklo a awm tih ka hria, mahse ka sawi fak thei si lo. Hemi zan hian gkhâtkhat bak khel lo in ngawirengin ka out a, ka muhil zui ta daih.


Zing ah chuan peih lo zetin ka tho a, nizan lam thil avang Khan ka awm a nuam thei tlat lo. Mi sawi tan tak ka hria, PUBG atang a inhriat, inngaizawngte, nupa hial inthen phah te ka hre nual, ka awm a nuam hlawl lo. Ka phone ka en a, morning wish na erawh alo awm thlap. Mahse nizan a ka out daih vang a zawhna erawh ka dawng hauh lo.


Nileng in phone ka silent a, ka en duh lo. Hna ka thawk nileng hmiah a, mahse zanriah ka eikham erawh chuan inleng ka nei hlawl! Nia, min biak a tum a, phone ka pick lo a, msg ka chhang lo a, engahmah ka online lo bawk. Keimah bikah thil diklo thleng tur a awm hian ka feel lawk thin a, Chu ngei chu a ni tun ka dinhmun pawh hi.


‘Nilengin phone call leh msg engmah I chhang lo a, enge a chhan?’ ka hma a thu chu ka en ran a, engemaw ti takin ka luak a chhuak tlat pek.


'Nia, hna ka thawk a' teh tawk mai a!


‘Zing thawh hlim ah wish na pawh….’


'I wish na ka hmu a, phone ka lo kalsan zui leh daih alawm….’ Ka kawchhung so bulh bulh chu engvangnge ka hria! Kha ka nunhlui, phatsan ka nihna kha ka mitthla ah chiang em em in a lang leh vek miau a ni.


‘Enge I awmzia? Lungawi lohna I nei ami?’


‘Awmzia ka awm lo' chu zawng chu chhanna ka nei miau a ni


‘Nizan ah lah engmah sawi lo in I out hmak a….’


‘Heh! Tunah I hrechhuak chiah tihna mi?’ ka ze chhe zawk ngei mai a lang dawn tih ka hria. Insum tur a rilru a infuih ka ngai takzet.


‘Kan khelhpui tan pawh a nuam lo thei a, bakah…..’


‘'Nia, a dik khawp mai. Ka tan tak pawh a nuam lo. Thingpui I duh em?’ ngaih pawimawh loh hmel zet chuan ka nui hawk a, mahse chu ka nui chu hlim vang ani lo, kan khelhpui tan a nuam lo chu alo care viau zawk a, ka tlawm teh e!


'Enge I tan a nawmloh ve ngawtna?’ a thusawi vang chuan ka ner nawk a.


‘Eng Ni lo e….’ hetiang hian a awm ngai lo. Ka tan a hrehawm tur thlen tir a duh ngai miah lo, mahse a danglam hle ta si a!



'Lut ila, hei, Linda pawhin min nghak' a msg dawn a en zawh chuan a ti nghal vut a, number hial an lo in pe tawh nia!


‘Lut rawh, ka chak rih lo' ka aw chu a ri chang Chang ani ber e. Ka thinlung na vawng vawng chu tumahin min hriatthiam pui ngai lovang.


Dar 10 vel thleng a leng a, mahse kan inbe mang lo. Games a khelh a, ngawirengin kei fb ah lut in ka phone ka khawih bawk. Thingpui erawh ka lumsak tho. A haw dawn ah erawh chuan min fawp zauh a, kan inkar danglam chu ka hai mawlh lo. A hma ang bawk a phatsan ka ni leh dawn nge ka lo ni reng tawh zawk ka hrethiam ta lo.


Zankhua chuan kan inbe ta lo a, game ka khel lo a, lut turin min rawn sawm hek lo. Luh chakna pakhatmah ka nei hek lo. Aremi ka hrilh dawn nge dawn lo tih ka ngaihtuah a, mahse a pasal cousin ani a, sawi ila min tan nasa dawn. Fiahna pawh ka nei lo a, bakah ka landan ah thikthuchhia tih Bak ka hlawh lovang, a chhan chu ka thik kha ka thiannu ani miau a! Ngawireng a then ka duh ta zawk. Kha nunhlui tenawm tak vang khan alawm mipa ka hnaih loh reng. Ka hnaih leh hmasak ber erawh a ngaite bawkin nunhlui ah min hnuklut leh ta chu ania.


Nicky nen pawh kan inbe tlem tial tial a, nileng a vawikhat chiah inbiak chang a tam ta! Game ka khelh tawh loh chhan min zawh ngai loh avangin khel lo tur a min duh zia a Lang Chiang viau ah ka ngai hmiah a, khelh chakna pawh ka nei tawh hek lo. Morning wish erawh a hmaih ngai lo a, keipawhin normal reply chu ka pe ve ziah tho.


Khang thil a thlen hnu thla 2 a liam leh meuh chuan msg in inthenna ka sawi fel ta! Ni e, inthen ang reng kan Ni tawh tho a, ka confirm ti ila a dik ber zawk ang. Inthenna ka thawn zan ah erawh a rawn kal nghal a, a chhan min zawt chiam nangin sawi ka tum lo. Min zawt nawn tluk tluk a, inthen a duh loh zia a sawi a, mahse ka rilru ka siamfel tlat tawh a ni. Ka nunhlui ah bawk min hruai let a, zahna leh natna min pe nawn tu hi ka pawm nawn thei bik lo. Fiahna nei miah lo mahila nitin Linda nen an status a PUBG an khelhdunna an update ziah te, ka tan a thu hnutchhiah aia an pahnih infiamna status hmu reng Chung hian ka bialpa anih zel chhan tur ka hre tawh lo. Ka ngai ngei ang, mahse ka thih phah lovang tih erawh ka chiang e!


Aremi'n Nicky nen kan inthen tih a hriat chuan min rawn be nghal a, mahse hlim takin ka lo bia a, mipa tello a khawvel ka hmachhawn duh thu ka hrilh ah chuan min hrechiangtu hian natna ka nei tih hre vek mahse min zawt lui duh ta bik lo.


Thla 2 a liam leh meuh chuan hmeichhe tawngtlem, thian nei lo ka ni fel leh ta thlap mai. Aremi takngial pawh ka hnaih lo, a chhan chu chhungkhat an Ni miau a, phone a kan inbiak bak lo len an tum in chhuanlam ka siam fo takah chuan hun min pe ve mai a, engtikah emaw chuan ka thain tha ber hi ka la hrilh ve mahnale!


Nicky leh Linda pawh an ni ta chuang lo nge, Linda pawh a bialpa nen an thlalak a status fo a, mahse ka thuthlukna kha ka inchhir chuang lo. An inngaizawng emaw, ngaizawng lo emaw, thla 1 chuang rilru bet lo tak a ka awm hnu a thuthlukna ka siam kha ka tihsual ka ring lo. Nicky erawh a status ah hla thu, lunglenna a update fo a, a caption tawp ah T tih a dahtel ziah bawk. A ngaihzawng tawh te ah T ti a Koh theih keimah chiah ka awm in ka hria, ka tan a update anihpawhin a hunlai a ka hlutna hre lo tu chuan rohlu tak a chân tihna ani mai.


PUBG kha lo khel lo ila chuan kan inthen kher lovang tih ka ngaihtuah fo thin nangin vanduaina hi ka tan a ruat aniange, mipa hi chunglam khian ka tan a dah ve lo nge thian rinawm lo hi ka tan a dahtel tih hretu chu Pathian chiah a ni e.


( PUBG ka sawichhiatna emaw lo ti suh u aw…. Ka khel ve reng ania…. Hihihi…. Mahse game ni lo a cas khel chi ka ni hran lo a, game ani keichuan ka khelh aw…. Chuan, he story hi true story based tih sawitel zauh ang. Lo hrisel la, lo hlim la, laptop ka kawl veleh ka lo khambeeekkkk tak tak thei tawh ang. Phone a type zawng lu a hai awl lutuk a, sakei seh aiin lu a hai hma tlats…. Lol)