MOONLIGHT LOVE (Complete)

KA TA BIK BIK

ELTY LUHLUL AUG HNAMTE

` Thiannu, kan inkarah hian inrawlh tawh lo la ka duh takzet. I kum ala naupang a, ka bialpa hian a duh hek lo che, dawt a min lo puh hi bansan tawh rawh` Tetei, kum 19 mi lek, nau ang mai a ka lo en thin chu ka en ran a, ka thin pawh a ti rim pha lo. 

Joseph Lalchhanchhuaha nen hian kum 2 lai chu kan inzui ve tawh. Keiaiin kum 1 in a naupang a, mahse keiaiin a puitling zawk chang a tam mai. Kum 2 kan inkawp tling tep, thla 2 vel ala awm tih ah hian ka thiannu zarah thian pakhat ka chhar thar a, a hming chu Tetei a ni. Kum 19 mi lek ani a, a hringnun a harsat zia pawh ka hre ve tawh bawk. birthday lawmna ah ka thiannu Hruaii hian alo hruai ve a, hmeichhe innocent tak ni in ka hria. Ka kawmngeih chi tak pawh ni in ka hria. Mahse a pawnlam landan a innocent tak si kha ka bialpa hnen a min sawi duhdan a mak chho ta viau. Whatsapp group ah kan awm ho vek a, kan thianho zing a kan lawmluh hnu ah Tetei pawh kan add ve nghal. Kan cas te an awm ve vek bawk a, kan thianho hi kan mak ve na em em chu kan cas te hi kan inkawmngeih tir vek thei. Kan mipa thiante cas te pawh kan kawmngeih thei vek bawk. Mahse private lam ah erawh kan inbiaksak ngai eih lo thung. Tetei alo luh ve atang Jo hi a ruk a biak a ching a, Jo erawh in min hrilh lo ngai lo. Mahse thian ang a a biak miau avangin ngaihthatlohna em em ka nei lo nachungin kan thianho zia lo a put avang erawh chuan amah ah hian ka bet vak lo. Mahse thian dnagte erawh ka hrilh hran lo.

` Tunge mipa dang awm chu?` Jo chuan min melh ran a, a thinrim hmel em em lehnghal.

` Enge i sawi awmzia?` ngaihna hre lo zetin ka lo ti hu a, ka hrelo tak tak miau a ni.

` I hria. Nichin ah Tetei`n min lo bia a, mipa dang an awm tih a sawi. Kawp tur khawpin ilak ah ka lo hlu lo tihna em ni?` a ti leh nghat a, ka sa kher mai. 

` Chutiang a sawi ngam tur khawp chuan ilo be tlangnel viau tihna mi?` ka dak vah a, ka lawm hlawl lo.

` Ka zawhna che chu chhang zawk rawh. Enge itan tihloh ka neih?`

` I awih em?`

` Ka hre lo`

` A tha anihchu. Reilote i hriat thusawi chu i awih tihna ania, insawifiah ka mamawh lo` ka tho tharh a, ka kal nghal. Ni e, chhuak tur a min rawn sawm khan ka ngaih a thalo hran lo. Mahse helai hmun kan pan khan boruak engemaw a awm ka ring a ni. Inngaizawng ve ta chu inkhak chang hi kan ngah ve lutuk, kan inhauh dawn chuan helai hmun hi kan pan tlangpui. Jo ka fakna em em chu a lungawiloh chang pawhin midang hma ah a tilang ngai miah lo hi a ni.

` Ding rawh` ka banah a rawn vuan a, keiin rangzetin ka phihthla nghal thung.

` I bialnu ka nihna ang a min rin tawk lohna kha ka duhtawk ni rawh se` tih nghat pah chuan ka kal leh ngat a, min dang mahse awmzia a awm dawn lo tih hretu a ni.

Thla 2 zet chu Jo nen pawh kan boruak a tha thei lo. Min biakpawh a tum viau nangin Tetei a tawngtam a, thiandangte bulah Jo nen inkawp angin a insawi a, keilah Jo nen kan boruak a chhiat rual khan mahni te in ka nung a, group ka chhuahsan rih a, tumah ka kawm ta lo. Thianten min zawh pawhin engmah ka sawi lem lo a, hahchawlh lawk ka duh tih bak ka sawi duh lo bawk. Ka na a, ka tuar a, mahse ka natna leh tawrhna erawh ka tilang lo a, mahni in ka tuar tlawk tlawk mai a ni. Thian ten zawhna min pe nasa a, chhanna erawh tumah ka pe lo. Tetei erawh ala ri zarh zarh a, ka ngaih huat tawk lek a status update lah a ching nangiang bawk. Keipawhin chhanlet ve sak sak chang ka nei ve tho. Jo pawh ka dem bawk. Min biak tumin theihtawp a chhuah a, in ah hial alo kal a, mahse hmuh ka duh lo a, ka chhungte hnen ah chhuanlam min siamsak mai turin ka ngen hial a ni. 

` U, U fela alo kal a, hmuh ngei ngei che a duh a` ka nau chu ka room kawngka ah a rawn dak a, an hnar zo ta ngang lo anih hmel. Fela hi Jo thian kawmngeih tak ani bawk.

` Ka room-ah lo chhoh tir mai rawh` 

` Hey, biakpawh iva har ve` ka room a lo luh pah chuan Fela chuan a rawn ti lut lung lung a, ka lo nui ringawt.

` Enge i rawn tih tehmial a?` alo kalchhan awm hre tho mahila ka zawt lui ve sak tho.

` Enge nangni hi in awmzia?` ka room a sofa ah chuan a thu a, min en ngur bawk. 

` Awmzia a awm lo`

` Tha takin sawidun thei ula a tha ber a`

` Kei aia khanu kha a rin zawk miau avangin sawidun tur kan nei hleinem`

` A ring zawk tih i hre ngawt ami?`

` Min ring em tih ka zawh khan a hriatloh thu a sawi a, a chiang mai alawm`

` A dinhmun ah ding ve ta la...`

` Ka ding miau lo a, ka hrethiam lo ani mai. Thingpui kan lumtir ang aw` kan subject thlak ka duh, ka sawi peih hlawl lo.

` Aih. Amah nen inbe teh u. Hetiang ringawt tur ani lo`

` A ngai lo mai. Tetei nen inbia se a hlim viau kha`

` I va ho tak e aw... An inbe tawh lo. Bakah i thiannu ania...`

` Ani tawh lo. Aaaaa, Fel, sawi tawh lovang. Kan term a tawp ah ngai ang` ka ban ka phar hliai a, ka ipik takzet. Ni e, nizan lam ah Rempuii`n Tetei thusawi min rawn hrilh a, Jo nen an inkawp tih a sawi a, chhin khat pawh ka chhing lo. An induh anihchuan dawt a min puh lo khan tha takin min then se ka dam zawk daih ang.

` Ani ngawt lo. Jo pawh a dam bik lo a, in pahnih a sawidun in mamawh. Midang ngaihtuah lo ula, in pahnih chiah khan ngaihtuah ula, sawidun rawh u. A hrim hrim in Tetei in tih pawh chu kan lo be ck dawn mi? Enge mi inkar a tihbuai ngam reng reng ni. Zirtirna pek a ngai nihchu` a tih chuan ka nui hak a, hepa hian a ti leh duh tak tak ang tih ka ring. 

` I thianpa bialnu i ck pui duh tihna maw?` ka lo ti vat thung.

` A bialnu ani awkawng lo. Ka hria alawm. Ni e, tlang deuhin kan sawi law law ange. Thianpa hi chuan a hrethiam ve chiah lo a, khanu te kha chuan a duh tih a hriat, mahse chutiang hawi chuan a rawn kawm em em chuang miah lo. An inbiakna ka en alawm. Naupang lakah tlawm i tum ami?` min tih chuan ka lu ka thing nar nar.

` Ka tlawm ni rawh se. Keiaia a rin miau avangin a rilru ah pawh a tla na zawk tihna ani mai a, mi inkarah ka tlazep lo zawk ange`

Engmah ka sawipui theih miau loh avangin Fela pawhin min hawsan leh ta nge nge. Ni e, keichu ka tawngduh a, fiamthu pawh ka duh. Mahse ngaihzawng leh thian chungchang ah hian ka fair em em. Jo hma ah hian pakhat chu uluk tak a kawp ka nei thin. Mahse min rinawmlohsan ve tho a, ka hriatchhuah rual khan a lehpek awm lo turin ka kalsan mai. Ka na ve reng a, mahse ka luhlulna leh induhtawkna hian kawp nih kha a pawmdan thei lo. Ngaihdam min dil viau nangin awmzia a awm lo. Hunrei tak ka tuar a, mipa ka kawp lo a, kum 3 hnu ah Jo hi ka tawng a, ka rilru a inpeih ve hman ta. Kan inngaihzawn chhung khan mipa dang leh hmeichhe dang lakah inrinhlelhna tur kan neih ka hre ngai lo. Kan inhau ve pawh hi diktak chuan midang vang ni lo in, chhan ho te te vang bakin kan inhau ngai lo. Mahse tunah chuan a dan a dang ta.

Rempuii`n min lo call a, ka thiante pawh ka be chho veleh tan tawh. Mahse ka be tam hran hlawm lo. Vawiin chu a U fapa naktuk a kumkhat tlin lawmna tur atan bazarpui ah min sawm a, pawi ka ti hran lo. Ka kalpui ang tih ka tiam a, a phur em em zui lehnghal. Min rawn sawm a, scooty ka ken peih loh avangin a scooty ah kan inphur a, MC lam ah an thil order sa lam ani deuh mai a, lei tur em em pawh a awm chuang lo. Hi-five ah burger ei turin kan lut a, helai dawr burger kher hi chu ka hnar hleithei lo chu a ni e. Kan in eipuar zawh hnu in a kawr tur en pui ah min sawm a, pawi ka lem lo. A chhan pawh ka chhuah lohna a rei tawh a, han vah chhuah ve chuan keimah pawh ka zang deuh hawkin ka hria. A duh ang thlap kawr kan lei hnu chuan inhnuai lam parking ah a scooty a dah avangin kan inzui thla a, a awmna a pilril deuh avangin ka luh phei pui peih lo a, gate bulah ka lo nghak thung.

` Mate` chu aw chu ka hai hauh lo. Hnunglam hawi lo turin ka insangmar nghal teuh. Hmuh ka duh lo.

` Tu nen nge inchhuah?` tihngaihna vak a awm tawh lo. Ka bulah a rawn ding a, a rim chu a tui ngaiin ala tui reng.

` Rempuii nen` khawlai ani a, mawilo tak a chhan hun ani lo tih ka hria. Ka taksa khur der der chu a hriat ka va hlau tak em!

` In haw tawh dawn ami?`

` Ummm...`

` Zanah ka rawn hmu thei che ngem?` ka melh zauh a, a serious zia ka hria.

` I thu thu alawm` ka ti ve ta nge nge. Tlanchhiat reng a tulna ka hre lo. Diktak chuan ka chik ve reng a, Tetei nen hian an inngaihzawnna tur awm ka hmu ngai miah lo. Mipa ani a, whatsapp velah status a nei ve duah ngai lo, love lampang phei chu a nei khat khawp mai. Kan inthen hnu ah erawh a lunglenna lam hi post ve zauh zauh chang a nei a, mahse chupawh vawi 2 chiah a ni bawk. Tetei lah a status ah Jo nen an inkar tur awm ang a lang ngai ta miah lo bawk. Mahse a ruk pawhin an inbe thei tho tih ka hre ve kar.

` Fimkhur ula, Hospital a kal ka ngai a, ka kal phawt ang` tih pah chuan a tih thin dan ang bawkin ka lu a tuai zauh a, ka haw thei em em thin, mahse tun tum ah erawh ka tah a chhuak tlat. Ka ziaawm tawh viau emaw ka tia, atak a han intawh meuh chuan ka lo la danglam lo nasa anih hi.

Chaw eikham chuan helhkham nei ru run in ka awm a, alo kal ngei ngei ang tih ka chiang, mahse ka confi hlawl lo. Ka room ah vawi engemawzat ka lut a, ka chhuak leh a, ka nau nui tet chu ka ngei kher mai. Kan bazar haw khan Jo lo kal tur thu ka hrilh a, a hresa tlat a ni. A chang chuan he nau hi chu a chimawm thin. Mahse ka unau neihchhun kha ani ve miau a, kan inkawmngeih a, keiaiin a nau fal deuh nangin amah hi a puitling chi ania, keiaiin a felfai thlap zawk fo a ni.

` Mate, sawidun tawh ang` ka bul a thu chu ka en ngam lo. A huhang hi ka zo hleithei ngai lo.

` Mahse mi bulah pawh in inkawp thu a sawi a` ka kuttin chu ka kheuh niap niap a, ka nervous hian ka kuttin hian a tuar ngei ngei ziah bawk.

` Min ring em?`

` Ka hre lo` phuba lakna chance hi ka hmaih phal ngai hlek lo. Chu chu jo hian a hrechiang em em bawk, a nui sak.

` Min ring emaw, ring lo emaw, thudik chu nang hi vawikhatmah ka kawp lo che a, ka hriattirh atang che nangaia duh hi pakhat chiah ka la nei...`

phawk zetin ka melh a, a hmel a thutak ngang mai bawk si. Keiaia duh chu a nei alawm, ni e, Tetei bak va ni suh.

` Ka hrethiam alawm. Ka nat viau i ring a tiraw? Keiaia duh i nei tih chu ka hre tawh alawm, tunah chuan lungdam takin awm rawh, ka tibuai hauh lovang che u` ka sawi tawp lam a ka aw khur chu ka thup zo ta chiah lo.

` Ni e, min tibuai phalo reng a ni. A chhan chu Megan Fox nen chuan min tibuai teuh lo` a tih chuan ka en nawn lehnghal, a nui suk. A mize ngai, thiam lo zet a a fiamthu thawh dan ngai tho. 

` Tetei...`

` A hming kha sawi ri tawh lovang. Ka duh ngai lova, i chanchin kha a hre ta em a, min hrilh ta reng kha chu ka zawt lo thei bik lo che a, a hunlai khan ka na bawk a, mahse min hnaih telh telh a, a zia ka hre telh telh a, i dam hun ka nghak a, ila dam fel lo ang tih ka hria, mahse min ngaithla turin i chak tawk tawh tih ka hre thung. Tunah chuan khang thil ho mai mai vang khan buaina nei tawh lo ila, i ta ka nih ang bawkin nang hi KA TA BIK BIK i ni a, i ni reng tawh ang` ka kut vuan a ka mit tak a min en chung a a sawi takah chuan ka ring nghet thlap. A chhan chu dawt min hrilh ngai lo tu hi KA TA BIK BIK a ni miau alawm le.